ခပ်နွေးနွေးလေးလွမ်းကြမယ်.....

တစ်ခါတစ်ခါ ဖြေးဖြေးညိမ့်ညိမ့်လေး

တခါတလေလည်း ပြင်းပြရှတ

အဲဒီအလွမ်းတွေအောက်မှာ

ကိုယ်တို့ယစ်မူးခဲ့ကြတယ်

တစ်နေ့တာလွမ်း တစ်ညတာလွမ်း

ခနတာလည်းလွမ်းတာပါပဲ

အလွမ်းတွေကို ပန်းတွေလိုသီလို့

စိတ်ကူးတွေနဲ့ ဆံနွယ်ထက်မှာ

ပန်ဆင်ပေးမိတယ်

အလွမ်းတွေကို ဝေလို့

လွမ်းလွန်းလို့တော့

မျက်ရည်တွေမကျလိုက်နဲ့

အလွမ်းတွေ ကျဲကုန်လိမ့်မယ်

နှုတ်ခမ်းနှစ်လွှာဖွင့်ဟ

အပြုံးစစနဲ့ လွမ်းလိုက်ပါ

လွမ်းတတ်သူအဖို့

ဟောဒီတစ်ညကို ဖြတ်ကျော်ဖို့

လက်ဆောင်ပေးလိုက်မယ်

မျက်လုံးမှိတ်ပြီး

လက်ဖဝါးလေးဖြန့်လိုက်ပါ

လျှံမကျစေနဲ့

ရော့.... 

***အလွမ်း***

ဘယ်ဖက်အိပ်ကပ်ထဲ

ထည့်သိမ်းခဲ့ရင်တော့

သွေးခုန်လိုက်တိုင်း

ခပ်နွေးနွေးလေး လွမ်းရတာပေါ့

ကိုယ်တို့ ခပ်နွေးနွေးလေး

လွမ်းကြမယ်လေ...

***ခပ်နွေးနွေးလေး*** (ကျမ၏ကဗျာဆရာ)