စာရေးဆရာမ မွန်ဟော်စီကို ကျွန်မတစ်ခါတစ်လေ ကြည့်တဲ့ Soulmate ရဲ့ ဖေ့ဘုတ်မှာ friend ဖြစ်နေတဲ့ ညီမတစ်ယောက်က အမြဲလိုလို ဆရာမရဲ့ စာလေးတွေကို ရှယ်ထားတာတွေ့လို့ ဝင်ဝင်ဖတ်ကြည့်ရင်းနဲ့ အခုဆိုသူ့ကို Followed လုပ်ထားလိုက်တယ်....။ ဒီနေ့တွေ့လိုက်တဲ့ ဆရာမစာလေးကိုကြိုက်လို့ ကျွန်မ ဘလော့မှာပြန်မျှဝေချင်တာနဲ့ တင်ပေးလိုက်ပါတယ်...။ ဆရာမရဲ့ "ဆက်၍မပွင့်တော့သောနှင်းဆီများ" စာအုပ်အခုဖတ်နေတယ် ဖတ်ပြီးသွားရင် နဲနဲပါးပါးလာပြန်ပြောပြမယ်....။
Giving is the secret source of Abundance ဆိုတဲ့ အဆိုလေးရဲ့အဓိပ္ပါယ်ကိုကြိုက်လို့ ဒီစာလေးကို မျှဝေဖြစ်သွားတာပါ...။ ပြည့်စုံကြွယ်ဝခြင်းရဲ့ လျှို့ဝှက်ချက် အရင်းအမြစ်က ပေးကမ်းလှူဒါန်းခြင်းပါပဲတဲ့.....။ မရှိလို့မလှူ မလှူလို့မရှိဆိုတာ မြန်မာစကားမှာပဲရှိတယ်မှတ်တာ....။ သူတို့မှာလည်း အဲလိုရှိသားပဲ ယုံကြည်ကြသားပဲပေါ့...။ လောကမှာ အရချည်းပဲ လိုချင်တပ်မက်မှုပဲရှိပြီး ပေးကမ်းရမှာ တွန့်တိုတတ်တဲ့သူတွေ ကျွန်မအနီးနား ပတ်ဝန်းကျင်မှာ အများကြီးတွေ့ဖူးတယ်....။ ကျွန်မက ငယ်စဉ်ကလေးဘဝကတည်းက လိုချင်တပ်မက်စိတ်ထက် သူများကိုပေးကမ်းချင်တဲ့စိတ်အမြဲရှိခဲ့တယ်... အဲဒီမွေးရာပါစိတ်ကလေးရှိနေတာအတွက် ကိုယ့်ကိုယ်ကို အမြဲအားရကျေနပ်မိတယ် ခုချိန်ထိပဲ....။ ဒီစိတ်က ကျွန်မရဲ့ အားနည်းချက်မဟုတ်ဘူးနော် တချို့က အဲဒါကိုအားနည်းချက်လို့ထင်ပြီး နင်းချင်ကြတယ်....။ ကျွန်မက အားမနာတတ်ဘူး ကျွန်မတကယ်ပေးချင်တဲ့သူဆို အပြီးအပြတ်ပေးလိုက်တယ် အဲဒီအတွက် သူတို့ဆီက ဘာတပြားတချပ်မှ ပြန်ပြီးမမျှော်လင့်ဘူး...။ ကျွန်မဆီကနေ ချေးငှားတာလဲ လက်မခံပါဘူး ပေးချင်တဲ့စိတ်စေတနာတကယ်ရှိရင်ပေးလိုက်မယ် လှူလိုက်မယ် စိတ်ထဲမပါတဲ့အရာဆို မပေးဘူး မလှူဘူး....။
ကျွန်မ သဘောကျတဲ့ အဲဒီမွေးရာပါစိတ်ကလေးဟာ အဖေ့ဆီကရတာလား အမေ့ဆီကရတာလား အဖေက စောစောစီးစီး လူ့လောကထဲကထွက်သွားတော့ သူ့စိတ်နေစိတ်ထားကို သေချာမသိလိုက်ဘူး...။ ဒါပေမယ့် အဖေ့စိတ်ကလေးကိုအမွေရတာပိုဖြစ်နိုင်တယ်...ဘာလို့လဲဆိုတော့ ကျွန်မအမေက ဗီယက်နမ် ကွန်မြူနစ်ဝါဒီ သွေးထဲနဲနဲစီးနေတာမို့ အဲလိုပေးကမ်းလှူဒါန်းတာတွေမှာ မရေက်ရောတတ်ဘူး လက်တွန့်တယ် ဆိုပါစို့....။ ကိုယ့်အမေအတင်းတုတ်လိုက်ဦးမယ် သီတင်းကျွတ်ကန်တော့လို့ မုန့်ဖိုးပေးရင်တောင် ဒီလောက်ပေးတာ များသွားပြီလား ပေးရမလား မပေးရဘူးလား တွေဝေတွက်ချက်သေးတာ....။ ကျွန်မကျတော့ အဲလိုဆို မလိုချင်တော့ဘူးပေးလဲ....။
ဒါနဲ့ပြောရဦးမယ် ဒီနှစ် သီတင်းကျွတ်တော့ လူကြီးတွေကို မကန်တော့ခင် ကျွန်မကို ရုံးက နှစ်တိုင်းကန်တော့နေကျ ကလေးမလေးရှိတယ် သံတွဲကရခိုင်မလေး ...ဗိုင်ဘာကနေ လှမ်းကန်တော့တယ်....။ ကိုးဗစ်ဖြစ်တာနှစ်နှစ်ရှိပြီဆိုတော့ ခုကအွန်လိုင်းကပဲကန်တော့ကြတော့တာမဟုတ်လား...။ အဲကလေးမလေးက ခု ကလေးမွေးသွားပြီ သားလေးမွေးတယ် သူလှမ်းကန်တော့တုန်းက မမွေးသေးဘူး... အဲဒါ သူကပထမဆုံးပဲ ကျွန်မကို ကန်တော့တာ Kpay နဲ့ မုန့်ဖိုးပြန်လွှဲပေးလိုက်တယ်....။ နောက်တစ်ယောက်က ကျွန်မကို Series တွေ ကောင်းတာတွေ့ရင် လင့်ပို့ပေးတတ်တဲ့ Mr. Sun Shine လေး သူလဲ Instagram ကနေ လှမ်းကန်တော့လို့ Kpay နဲ့ မုန့်ဖိုးလွှဲပေးတော့ သူကပျော်လို့....။ ဟိုတစ်ခါသူ ကျွန်မကိုမုန့်ဝယ်ကျွေးထားသေးတာလေ....(ချင်းပြည်ထန်တလန်မှာ မီးလောင်လို့ အဲမုန့်ဖိုးတွေ အကုန်လှူလိုက်ပြီတဲ့ သူတို့ကကိုယ်လှူမှစားရမှာ ကျွန်တော်က ကိုယ့်ဘာသာမုန့်ဝယ်စားနိုင်တယ်)တဲ့...။ အို... တော်လိုက်တာ စိတ်ထားလေး ကောင်းလိုက်တာ သူတို့ Generation လေးတွေက စိတ်ဓါတ်ကောင်းလိုက်တာ ပေးကမ်းမျှဝေချင်တဲ့ စိတ်စေတနာတွေ သင်ပေးစရာမလို ကိန်းအောင်းနေကြတာ တကယ်လေးစားရပါတယ်... ။
အဲလို အပြန်အလှန် စေတနာ မေတ္တာတွေရဲ့ အကျိုးပေးကောင်းလို့လား မန္တလေးကအဒေါ်တစ်ယောက်ကို လှမ်းကန်တော့တာ သူက အကောင့်ထဲ မုန့်ဖိုးနှစ်သိန်းလွှဲပေးတယ်...။ ကျွန်မ မုန့်ဖိုးလိုချင်လို့ ကန်တော့တာမဟုတ်ဘူး တကယ် ဂါရဝထားလို့ တစ်ချိန်က သူ့အိမ်မှာ ထမင်းစားခဲ့ဖူးလို့ ကျေးဇူးသိတတ်တဲ့အနေနဲ့ ကန်တော့တာ မနှစ်ကတည်းက အဲအဒေါ်က မုန့်ဖိုးပေးချင်နေတာ ကျွန်မက ''ကန်တော့ခံအရွယ်ဖြစ်နေပြီ မုန့်ဖိုးမပေးပါနဲ့ရပါတယ်အန်တီ"လို့ ယဉ်ယဉ်ကျေးကျေးပဲငြင်းဆိုခဲ့တာပါ....။ ဒီနှစ်တော့ မငြင်းတော့ဘဲ လက်ခံလိုက်တယ်....။ အန်တီသက်ရှည်ကျန်းမာပါစေ.....(သီတင်းကျွတ်မဟုတ်လဲ ခါတိုင်း မန္တလေးရောက်တိုင်း အဲအဒေါ်ကို အမြဲဝင်ကန်တော့နေကျ....) သူက ကျွန်မတစ်ယောက်ထဲပေးတာပေမယ့် ကျွန်မက အိမ်မှာမောင်နှမလေးယောက်ရှိတာ တစ်ယောက်ငါးသောင်းဆီပြန်ဝေလိုက်ပါတယ်....။ အဲလိုမျှဝေချင်တဲ့ ကျွန်မရဲ့စိတ်ကလေးကို ကျွန်မချစ်တယ်....။
တစ်ခုတော့ရှိတယ် ကျွန်မက ပြတ်သားတယ် အဒေါ်ထဲမှာတောင် ကိုယ်ဂါရဝမထားနိုင်တဲ့ မလေးစားတဲ့သူဆို လုံးဝမကန်တော့ဘူး..... ။ ဉပမာ ဟိုနေကြာပန်းအဖွဲ့ထဲ တစ်သက်လုံးကျွန်ခံနေတဲ့သူတွေပေါ့ နိုးပဲ လုံးဝမကန်တော့ပါ....အဲဒါအပြင် ကိုးဗစ်ကာလမှာ နေကောင်းလား ဘာလား လူမှုရေးအရတောင် မလုပ်တာထိပဲ....။ ကြဉ်တယ်ဆိုတာ အဲလို ပြတ်သားတဲ့စိတ်ရှိမှရမှာ သူက ငါ့အမျိုးပဲ သနားပါတယ်လေဆိုပြီးလဲမရှိဘူးကျွန်မကတော့...။ မောင်နှမထဲ အမျိုးထဲတောင် ကိုယ်က စိတ်မတွေ့ရင် Instagram မှာတောင် unfriend ချက်ချင်းလုပ်ပစ်တာ...။
ဒီလောက်ပါပဲ ဆရာမမွန်ဟော်စီ စာလေးအကြောင်းပြုပြီး ကိုယ်ရေးချင်ပြောချင်တာတွေများသွားပြီ.....။
_____________________
Revolution will prevail
မိုးငွေ့
@@@@@@@@@@@@
အိမ်မှာ အလုပ်လာလုပ်ပေးတဲ့ မိန်းကလေးကို ကျွန်မက လစဥ် ဆန်တစ်အိတ် ဆီတစ်ပုံးပါ ပေးပါတယ်..ဆန်တွေ ဆီတွေနဲ့ သူအိမ်ပြန်သွားတဲ့နေ့ဆိုရင် သူ့အိမ်နားဝန်းကျင်က လူတချို့ လာပြီး ဆန်လေးတွေ ဆီလေးတွေ ချေးကြတယ်လို့ ဆိုပါတယ်......။
ဘေးအိမ်က အဒေါ်ကြီးက ဆန်နှစ်လုံး ချေးသေးတယ်..သူ့သမီးဆီက လခရရင် ပြန်ဝယ်ပေးမယ်တဲ့..အိမ်ရှေ့က အစ်မကြီးက ဆီလေး နှစ်ဇွန်းလောက် ချေးသေးတယ်..စသည်ဖြင့် ကျွန်မကို ပြောပြတတ်တယ်..ဒါပေမဲ့..အေးအေး..ကတော့..ပြန်တောင်းမနေပါဘူး..ပြန်ပေးမနေနဲ့ဒေါ်ကြီး..ဆိုပြီး......လှူလိုက်တယ်... ပေးလိုက်တယ်လို့ ပြောပါတယ်..ကောင်းလိုက်တာ..မအေးလည်း မရှိတဲ့ကြားက လှူဖြစ်နေတာပေါ့..လို့ သာဓု ခေါ်လိုက်ရပါတယ်.....။
သူလည်း အဆင်ပြေတယ်မဟုတ်ဘဲ ရုန်းကန်နေရသူပါပဲ..သူ့အမျိုးသားလည်း အလုပ်မရှိရှာဘူး..ကလေးနှစ်ယောက်နဲ့ အိမ်ဌားခနဲ့ ရွာက မိဘတွေတစ်ခါတလေ ထောက်ပံ့ရတာနဲ့..တစ်ယောက်တည်း ပတ်ချာလည်ရိုက်နေတယ်..ဒီထဲကမှ သူရတာလေးတွေကို လျော့သွားမှာ..ကုန်သွားမှာ မစိုးဘဲ ပေးတယ်..ဝေတယ်ဆိုတာ စိတ်ဓာတ်အားဖြင့် ပြည့်စုံကြွယ်ဝတဲ့ Abundance Mentality ရှိလို့ပဲ ဖြစ်ပါတယ်.....။
မြန်မာစကားမှာတော့ မရှိလို့မလှူ..မလှူလို့မရှိ.. ဆိုပြီး ပြောကြတယ်.. အင်္ဂလိပ်စကားမှာတော့..Giving is the secret source of Abundance လို့ ဆိုကြတယ်.....။ Giving ဆိုတာ ပေးကမ်းခြင်းဖြစ်ပြီး.. Abundance ဆိုတာ ကြွယ်ဝ ပြည့်စုံခြင်းကို ဆိုလိုပါတယ်..ပြည့်စုံ ကြွယ်ဝခြင်းရဲ့ လျှို့ဝှက်ချက်.. အရင်းအမြစ်ဟာ.. ပေးကမ်းလှူဒါန်းခြင်းပဲ ဖြစ်ပါသတဲ့..ပေးလေ..ရလေပါပဲ.....။ Abundance Mentality ဆိုတာက ပြည့်စုံကြွယ်ဝတဲ့ စိတ်ဖြစ်ပါတယ်..တချို့ဆင်းရဲပေမဲ့ ပေးချင်ကမ်းချင်တဲ့စိတ်ရှိတယ်..တချို့ ချမ်းသာပေမဲ့ စေ့ကုပ်စေးနဲနေတဲ့သူရှိတယ်.....။
Abundance Mentality ရဲ့ ဆန့်ကျင်ဘက်..Lack Mentality ဆိုတာကိုတော့.. တိုရေရှားရေစိတ်ဓာတ်လို့ ပြောရမယ်ထင်ပါတယ်......။ Lack Mentality ကို Scarcity Mentality လို့လည်း ပြောကြတယ် ..ပါးရှားတဲ့ စိတ်မျိုးပေါ့..တစ်ခုခုကို မပေးချင်ဘူး..ကုန်သွားမှာစိုးတယ်..ငါ့အတွက်မလောက်ငှဘူး..မကျန်တော့မှာ စိုးတယ်.....စသည်ဖြင့် တွေးတောတတ်တဲ့ စိတ်ဟာ..Lack Mentality ပဲ ဖြစ်ပါတယ်..Fear Based ကြောက်ရွံ့ခြင်းမှာ အခြေခံတယ်..Energy တွေ ကျသွားတယ်......။
လှုဒါန်းပေးကမ်းခြင်းနဲ့ ပတ်သက်ရင် ငါ..တော့ သိပ်မလှုတော့ဘူး..လှုတာများသွားပြီ..စုထားတာထဲက လျော့သွားလို့မဖြစ်ဘူး..တော်ပါပြီလေ..တစ်ထောင်မလှုတော့ဘူး..တစ်ရာပဲ လှုတော့မယ်..စသည်ဖြင့် ရည်မှန်းထားတဲ့အတိုင်းမဟုတ်ဘဲ..လျှော့လှုတာ..ကန့်သတ်ချက်တွေနဲ့လှုတာ..သံသယတွေနဲ့လှုတာဟာ..Lack Mentality ပါပဲ.....။
တစ်ခါတလေကျတော့လည်း လူတွေမှာ Lack Mentality ကပိတ်ဆို့ကာဆီးနေတတ်ပါတယ်..ကျွန်မ ကိုယ်တိုင် အလှူနဲ့ ပတ်သက်ပြီး..စိတ်ထဲကပါသလောက် မလုပ်ဖြစ်ဘဲ..လုပ်ခါနီးမှ..လျှော့လိုက်တာမျိုးတွေရှိတယ်..ကိုယ့်ကိုယ်ကိုယ် သိပ်မကျေနပ်ဘူး..Limitation အကန့်အသတ်တွေနဲ့..လှူလိုက်တယ်.. အဲဒီအချိန်တုန်းက ကျွန်မရတဲ့ လာဘ်လာဘတွေဟာလည်း အကန့်အသတ်တွေနဲ့ပဲလာတယ်......။ ပိုက်ဆံဆိုတာ မသေသရွေ့ပြန်ရှာလို့ရပါတယ်..သေသွားရင် ရှာထားသမျှ မလှုလိုက်ရဘူး ဖြစ်နေမယ်ဆိုတဲ့ စိတ်နဲ့လှူလာတဲ့အခါ..ခုတော့..စိတ်ကပါသလောက်.. လက်ကရောက်တဲ့ Abundance Mentality ကို ရလာတယ်.....။
ကားထဲမှာ ဆန်..ဆီ..ခေါက်ဆွဲခြောက်စသည်ဖြင့် အထုပ်လေးတွေထည့်ထားပြီး..သွားလေရာမှာ..လိုအပ်တဲ့သူတွေ လှုပါတယ်..ဒါကိုသိတဲ့..လူတစ်ယောက်က ကျွန်မကို..ဆီလေးတစ်ပုလင်းလောက်ပေးပါ..လို့ ..တစ်ရက်ကအလှုခံလာတယ်.. သူ့ကို ဆီတစ်ပုလင်းသာမက..ဆီတစ်ပုံး ဆန်တစ်အိတ်ပါ ယူသွားပါလို့ ပြည့်စုံအောင်ပေးကမ်းနိုင်တဲ့..အတွက် ဝမ်းသာမိတယ်..စိန်တွေရွှေတွေမလှုနိုင်ပေမဲ့..ဆန်ဆီ..စားစရာလောက်တော့လှုနိုင်တယ်..အမြဲအသင့်ရှိနေတယ်......။ အားရပါးရပဲ လှူလိုက်ချင်တယ်..သူများတွေ အားရပါးရလှူတာတွေ့ရင်လည်း ဝမ်းသာမိတယ်.. .... . ။
ပိုင်းလော့ဆရာတော်ကြီးကလည်း လှူတဲ့အခါ စလယ်ဆုံး ဖြူဖြူစင်စင် ပျော်ပျော်ရွှင်ရွှင် ဖြစ်ရမယ်လို့ ဆိုတာ နာဖူးတယ်......။ ဒီလိုပေးခွင့်ရတဲ့အတွက် ကိုယ့်ကိုယ်ကိုယ်လည်း အားရှိလာတယ်....Energy တွေရလာတယ်. မကုန်သွားဘူး..ထပ်ရလာဦးမယ်..ပေးလို့ရသေးတယ်ဆိုတဲ့ ယုံကြည်မှုလည်းပေါ်လာတယ်.... Trust Based ဖြစ်လာပါတယ်.....။ အများကြီး မချမ်းသာပေမဲ့ မခက်ခဲတော့ဘူး..လိုချင်တယ်လို့ စိတ်ကဖြစ်ရင် ပေးတဲ့သူပေါ်လာတာတွေလည်း မကြာခဏကြုံရတာ အမှန်ပါပဲ......။
Lack Mentality က Negative Energy ဖြစ်တယ်..Abundance Mentality ကတော့ Positive Energy ဖြစ်တယ်.....။ Abundance Mentality နဲ့ Lack Mentality ရဲ့ ကွဲပြားခြားနားချက်လေးတွေကိုလည်း ဖော်ပြပေးလိုက်ပါတယ် Abundance Mentality ပြည့်စုံ ကြွယ်ဝသောစိတ်....။
Grateful ကိုယ့်ဘဝကို ကျေးဇူးတင်တတ်သလို..သူများအပေါ်လည်း ကျေးဇူးတင်တတ်တယ် Knows there is enough for everyone အားလုံးအတွက် လုံလောက်ပါတယ်လို့တွေးတယ်....။ Celebrates/ Recognises other people တခြားသူတွေကို အသိအမှတ်ပြုတယ်..ဝမ်းသာပေးတယ်...။ Focus and notice abundance in current life အခုလက်ရှိဘဝမှာ ရနေတဲ့အရာတွေကို သတိထားမိ မြင်မိတယ် ....။ Trust Based ယုံကြည်မှုကို အခြေခံထားတယ် ...။ Can Nourish your positive energy ကောင်းသော စွမ်းအင်တွေကို ပွားလာစေတယ် ...။
How can I serve others?
ကိုယ် ဘယ်လိုပေးရမလဲ စဥ်းစားနေတယ်..
Lack Mentality တိုရေရှားရေစိတ်
Ungrateful ကိုယ့်ဘဝကိုရော..သူများတွေကိုပါ..
ကျေးဇူးမတင်တတ်ဘူး Knows there is not enough for everyone
ဘယ်သူ့အတွက်မှ လုံလုံလောက်လောက်မရှိဘူးလို့ တွေးတယ်
Jelous of other people
မနာလိုစိတ်ရှိတယ်
Doesn't focus and notice abundance in current life
အခုလက်ရှိဘဝမှာ ရနေတာတွေကို မမြင်တတ်ဘူး
Feared based
ကြောက်ရွံစိတ်ကိုအခြေခံတယ်
Can deplete positive energy
ကောင်းသောစွမ်းအင်တွေ လျော့ကျသွားစေတယ်
What's in it for me ?
ကိုယ့်အတွက်ဘာရှိလဲပဲ စဥ်းစားတယ်..
ဒါနပါရမီ ဖြည့်ဆည်းတဲ့နေရာမှာ.. ဒီ စိတ်နှစ်မျိုးကြောင့် ဘယ်လို အကျိုး ရလာဒ်တွေရနိုင်သလဲ ဆိုတာ သိစေချင်လို့..Lack Mentalityနဲ့ Abundance Mentality အကြောင်းလေးကို ရေးတင်ပေးလိုက်ပါတယ်..... .။
မွန်ဟော်စီ
အောက်တိုဘာ ၂၀၂၁
Credit: Mon Hosey face book page
#monhalsey
#morningvitamin
#မနက်စာအာဟာရ
#LackVsAbundanceMentality
