မိမိကိုယ်မိမိ ချစ်ဖို့မမေ့ပါနဲ့။
လူတွေက ကိုယ့်ကိုယ်ကို အချစ်ဆုံးဆိုတဲ့ စကားကိုကြားဖူးမှာပါ။ ချစ်တယ်ဆိုတဲ့စကားထဲမှာ ဂရုစိုက်တာ၊ သနားတာ၊ ကြင်နာတာ၊ မြတ်နိုးတာ၊ တန်ဖိုးထားတာနဲ့ တခြားကောင်းတဲ့ အရည်အချင်းတွေပါဝင်မှာပါ။
ဒါပေမယ့် ကျွန်တော်တို့ပတ်ဝန်းကျင်ကိုကြည့်လိုက်ရင် လူအများစုက ကိုယ့်ကိုယ်ကိုအချစ်ဆုံးဆိုတာ ဟုတ်ရဲ့လားလို့တွေးစရာတွေဖြစ်လာမှာပါ။
တကယ်လို့ ကိုယ့်ကိုယ်ကို အချစ်ဆုံးဆိုတာမှန်ရင်တောင် ချစ်ပုံချစ်နည်းတွေလွဲမှားနေတာကို တွေ့ရမှာပါ။
ကိုယ့်ကိုယ်ကို ဂရုစိုက်ရမယ့်အစား၊ ပျက်ဆီးအောင် ဖျက်ဆီးနေမိကြတယ်။ ကိုယ့်ခေါင်းထဲကို၊ ကိုယ့်ခန္ဓာကိုယ်ထဲကို မကောင်းတာတွေထည့်မိနေကြတယ်။
ကိုယ့်ကိုယ်ကို တန်ဖိုးထားရမယ့်အစား၊ ပြိုလဲအောင် ဖြိုခွဲနေမိကြတယ်။ ကိုယ့်ကိုယ်ကိုပြန်ပြောတဲ့စကားတွေဟာ ခင်မင်တဲ့မိတ်ဆွေတစ်ယောက်ကိုတောင် မပြောတဲ့စကားလုံးတွေအသုံးပြုကြတယ်။
ကိုယ့်ကိုယ်ကို တိုးတက်အောင်ကြိုးစားရမယ့်အစား၊ အပေါ်ယံတွေနဲ့ အချိန်တွေကုန်နေကြတယ်။ စာဖတ်ဖို့ လေ့လာအားထုတ်ဖို့ ပုံမှန်အချိန်မပေးနိုင်ပဲ အချိန်တွေဟာ အကျိုးမဲ့စွာ ကုန်ဆုံးနေကြတယ်။
ကိုယ့်ဘ၀ရဲ့ အဓိပ္ပါယ်ကိုအကောင်အထည်ဖေါ်ထုတ်ရမယ့်အစား၊ ဘာမှန်းမသိ ပြီးဆုံးသွားကြတယ်။ ပညာရှင်များရဲ့ ခန့်မှန်းချက်အရ လူပေါင်း ၁၀၀ ဘီလီယံဟာ အသက်ရှင်ပြီး သေဆုံးသွားကြပြီးပြီ။ ၁၀၀ ဘီလီယံထဲက သမိုင်းမှာကျန်ခဲ့တဲ့သူတွေဟာ အနည်းငယ်သာရှိပါတယ်။ ကျန်တဲ့လူတွေဟာ သေပြီးနဲ့နောက်မှာ ဘယ်သူ့မှတောင် အမှတ်မရပါဘူးတဲ့။ အသက်ရှင်ခဲ့တာ ဘာအကျိုးရှိမှာလဲ။
ကိုယ့်ကိုယ်ကိုချစ်တယ်ဆိုတာ ဒီ ၄ ခုကို နေ့စဉ်ပြုလုပ်နေဖို့ပါလို့ အတွေးအခေါ်ပညာရှင်တွေက စာတွေထဲမှာ ရေးသားထားခဲ့ပါတယ်။
(၁) ကိုယ့်ကျန်းမာရေးကိုကောင်းအောင် အမြဲသတိပြုနေထိုင် စားသောက်ပါ။ အားကစားလုပ်ပါ။ ကျန်းမာရေးလိုက်စားပါ။ အစားအသောက်ဆင်ခြင်ပါ။ အိပ်ရေး၀၀အိပ်ပါ။ အနားယူပါ။
(၂) ကိုယ့်ရဲ့နှလုံးအိမ်ကို အေးချမ်းအောင်ထားပါ။ ကိုယ့်အတွက်အရေးကြီးပြီး တန်ဖိုးရှိတဲ့ လူတွေနဲ့ဆက်ဆံရေးကို အမြဲကောင်းအောင် ကြိုးစားနေပါ။ သူတို့ကို အချိန်ပေးပါ။ မိမိကိုယ်မိမိပြောတဲ့စကားတွေကို စောင့်ကြည့်ပါ။ မိမိကိုယ်မိမိ အားပေးစကားတွေ၊ တက်ကြွစေမယ့်စကားတွေကို ပြောပါ။ သူများကပြောတာထက် ကိုယ့်ကိုယ်ကိုပေးတဲ့ အားပေးစကားက ပို တန်ဖိုးရှိပါတယ်။ မိမိကိုယ်မိမိပျော်ရွှင်ကျေနပ်အောင်ထားပါ။ စိတ်အားငယ်နေတဲ့အချိန်၊ အဆင်မပြေနေတဲ့အချိန်တွေမှာ ပိုပြီးလိုအပ်ပါတယ်။
(၃) ကိုယ့်အသိဉာဏ်ပညာနဲ့ အတွေ့အကြုံကို တိုးတက်အောင် အမြဲကြိုးစားနေပါ။ စာဖတ်ပါ။ လေ့လာပါ။ စမ်းစစ်နေပါ။
(၄) ကိုယ့်ဘ၀ရဲ့အဓိပ္ပါယ်ကို တည်ဆောက်ပါ။ တချို့တွေအတွက် ဘ၀ရဲ့ အဓိပ္ပါယ်ကို မိမိကိုးကွယ်တဲ့ ဘာသာတရားက ပေးနိုင်ပါတယ်။ တချို့တွေအတွက် ကိုယ့်ဘ၀ရဲ့အဓိပ္ပါယ်ကို အများအကျိုးပြုလုပ်နိုင်စွမ်းက ပေးနိုင်ပါလိမ့်မယ်။ တချို့တွေအတွက် ကိုယ့်ရဲ့ယုံကြည်မှုနဲ့ ဝါသနာကပေးနိင်ပါလိမ့်မယ်။ အဓိကတော့ ဘ၀ရဲ့အဆုံးမှာ ကျေနပ်ဝမ်းမြောက်စွာ နှုတ်ဆက်ခဲ့မလား ဝမ်းနည်းကြေကွဲစွာ နှုတ်ဆက်ခဲ့မလားဆိုတာပါပဲ။
ဒီ ၄ ချက်ကို 7 Habits of Highly Effective People စာအုပ်ထဲမှာ Dr. Stephen Covey က Body, Heart, Mind and Spirit လို့ရှင်းပြခဲ့ပါတယ်....။ ကျွန်တော့်ကိုကျွန်တော့် သတိပေးရင်း မိတ်ဆွေတို့ကိုလည်း ကိုယ့်ကိုယ်ကို စစ်မှန်တဲ့နည်းနဲ့ ချစ်ဖို့ မမေ့ပါနဲ့လို့ သတိစကားလေးပါးလိုက်ပါတယ်။
#AMR
#LoveYourself
Connecting You With The World's Greatest Minds
Revolution will prevail
မိုးငွေ့
