အချိန်တန် လူနှစ်ယောက် ရေစက်ကုန်သွားတဲ့အခါ ကျောခိုင်းသွားကြရတာပဲ...။ သူကတော့ပြောဖူးတယ် ကျမတို့နှစ်ယောက်က ရေစက်တစ်ဝက် ဝဋ်ကျွေးတစ်ဝက်နဲ့ဆုံခဲ့ကြတာတဲ့...။ ခုတော့ ရေစက်ရော ဝဋ်ကျွေးရောကုန်သွားတဲ့တစ်နေ့ကို ရောက်လာခဲ့ပါပြီ....။
ဆောင်းရဲ့ အငွေ့အသက်လေးတွေကျန်နေသေးတဲ့ နွေးဦးရဲ့ နံနက်ခင်း တစ်ခုမှာ သူငှားနေတဲ့အိမ်ကလေးဆီကနေ ကျမ အပြီးအပိုင်ထွက်လာခဲ့လိုက်ရပြီ....။ ကျမကျောပြင်ကို မျက်စိတဆုံး ပျောက်ကွယ်သွားတဲ့အချိန်အထိ သူဝရံတာလေးကနေ စက္ကူပန်းပင်ကြားကနေ ထွက်ကြည့်နေလိမ့်မယ်လို့ လှည့်မကြည့်ဘဲ ကျမခံစားလိုက်ရတယ်...။ ကျမဆင်းလာခါးနီး အိမ်တံခါးသော့လိုက်ဖွင့်တော့ mask တပ်ပြီး ခေါင်းငုံ့ထားတဲ့ ကျမကို သူ စကားတစ်ခွန်းပြန်မပြောသလို သူ့ကိုလည်း ကျမမော့မကြည့်မိဘူး သွားတော့မယ်နော်လို့တောင် တစ်ခွန်းမနှုတ်ဆက်ခဲ့လိုက်ဘူး...။
အဲဒီညက အဖြစ်အပျက်....
ကျမတို့နှစ်ယောက် သူငှားနေတဲ့အိမ်ကနေ အလှမ်းဝေးတဲ့ တခြားမြို့နယ်တစ်ခုက ဘားမှာသွားထိုင်ဖြစ်ကြတယ်...။ သူကထုံးစံအတိုင်း ဘီယာမှာသောက်တယ် ကန်ဇွန်းပလိမ်းတစ်ပွဲနဲ့ နောက်ထပ်စားစရာတစ်ခုမှာတယ်..။ စားသောက်နေရင်း သူက စီးကရက်သောက်ချင်လို့ အိတ်ထဲနှိုက်ကြည့်တော့ ပါမလာဘူး...။ ဒါနဲ့ မွေးနေ့လာလုပ်တဲ့ လူငယ်လေးတွေဆယ်ယောက်ကျော်လောက်ရှိတဲ့ ဘေးဝိုင်းက ကောင်လေးတစ်ယောက်ဆီကနေ သူထပြီး စီးကရက်တစ်လိတ်တောင်းသောက်တယ်...။ ကျမက မလေးရှားညှပ်ခေါက်ဆွဲကြော်မှာစားတယ်...။ ကျမတို့စကားသိပ်မပြောဖြစ်ဘူး...။ အဲကနေပြီးတော့ ကျမတို့ အိမ်မပြန်ကြသေးဘဲ နောက်တစ်ဆိုင်ထပ်ပြောင်းထိုင်တယ်...။ နောက်တစ်ဆိုင်ကလည်း အဲလမ်းမထဲမှာပဲ လမ်းထိပ်ဖက်မှာရှိတဲ့ roof top ပေါ်မှာဖွင့်ထားတဲ့ဘားတစ်ခု...။ အဲမှာတော့ တော်တော်ကြာကြာထိုင်ဖြစ်တယ် ညသန်းခေါင်နီးနေပြီး ကျမတို့နှစ်ယောက် ရန်ဖြစ်စကားများကြတယ် သူကျမကို စိတ်တိုအောင် စိတ်ဆိုးအောင် ရန်စကားတွေပဲ ဆက်တိုက်ပြောနေတာ သိသာတယ်...။ ကျမတို့နှစ်ယောက် အဝေးတစ်နေရာဆီ ရောက်ဖို့ အချိန်တန်ပြီဆိုတာ ရိပ်မိနေတယ်...။ နောက်တော့ ကျမတို့ ဘားဆိုင်ကနေပြန်ဆင်းလာပြီး အဲလမ်းမပေါ်က ခြံဝင်းတစ်ခုရှေ့က အုတ်ခုံမှာထိုင်လိုက်ကြသေးတယ် သူကလည်း ဘီယာအရှိန်နဲ့တော်တော်မူးနေပြီ...။ အသိစိတ်သိပ်မကပ်တော့တဲ့အချိန်မှာ ကျမရဲ့တမင်သက်သက် ရည်ရွယ်ချက်ပါပါရန်စကားတစ်ခွန်းက သူလက်သီးတွေ ကျမဘယ်ဖက်ပါးမေးရိုးကိုချက်ချင်းယောင်ကိုင်းသွားအောင် လုပ်လိုက်နိုင်ခဲ့တယ်...။ နာကျင်မှုကြောင့် မျက်ရည်တွေပိုးပိုးပေါက်ပေါက်ကျလာတယ်...။ ရပြီ ကျမအသားဒီလောက်နာကျင်ပြီဆို ကျမသူ့ကိုအပြတ်ဖြတ်လိုက်ဖို့ လုံလောက်တဲ့ အကြောင်းပြချက်ရသွားပြီ...။
သူ့ရိုက်ချက်ကြောင့် အုတ်ခုံနောက်လှန်ကျသွားတဲ့ ကျမကို သူပြာပြာသလဲ ချက်ချင်းပြန်ထူပြီး ကျမပါးပြင်ကို သိပ်နာသွားမှာပဲလို့ ကြောက်လန့်တကြားလာပွတ်သပ်နေတယ်...။ အဲချိန်...သူအမူးလည်းနည်းနည်းပြေသွားပုံရတယ်...။ အမှောင်ထဲမှာ စိတ်မကောင်းဖြစ်ပြီး သူငိုလိုက်သေးလား ကျမ.... မမှတ်မိဘူး...။
"ကိုယ် အတန်တန်ပြောနေတယ်လေ မင်းကိုကိုယ်လက်ပါမိသွားရင် ငါတို့ဇာတ်လမ်းတော့သိမ်းပြီလို့ မင်းဘာလို့ ဒီလိုလုပ်ရပ်မျိုးဖြစ်အောင် တမင်ရန်စရတာလည်း"
"အဲလို ဇာတ်သိမ်းအောင်လို့ကို တမင်လုပ်လိုက်တာပဲ" လို့ ကျမ စိတ်ထဲပြောမိခဲ့တယ်...။ ကျမတို့ အိမ်ကို တက်စီငှားပြန်တော့ သန်းခေါင်းကျော်နေပြီ...။ ကားတွေတောင်မရှိတော့ဘူး...။ ကားရဖို့ အတော်စောင့်လိုက်ရသေးတယ်...။ လမ်းပေါ်မှာ သူစိမ်းမြင်ရင်ဟောင်တတ်တဲ့ လမ်းဘေးလေလွင့်ခွေးတစ်အုပ်နဲ့ အိမ်ပြန်နောက်ကျတဲ့ ကောင်လေးတစ်အသိုက်ကျမတို့ကို အော်ဟစ်စနောက်တာ ကြုံလိုက်ရသေးတယ်...။ အိမ်ပြန်ရောက်တော့ နံရံနားကျောမှီပြီး သူ့ထိုးချက်ကြောင့် ယောင်နေတဲ့မေးရိုးကို အဝတ်စနဲ့ကိုယ့်ဘာသာကြပ်ပူထိုးနေမိတယ်...။ သူက ကျမကိုခပ်ဝေးဝေးကနေ ထိုင်ကြည့်နေတယ်...။ ခနနေတော့ ကျမကို ကြပ်ပူလာထိုးပေးရင်းပြန်လာချော့တယ်...။ ဒါပေမယ့်ကျမဆုံးဖြတ်လိုက်ပြီ....။ ဒီညဟာ ကျမတို့နှစ်ယောက်ဆုံတွေ့မှု နောက်ဆုံးညတစ်ညပဲ...။ သူတစ်ညလုံးမအိပ်ဘဲ ကျမကို စကားလာပြောလိုက် ချော့လိုက်လုပ်ပေမယ့်ကျမက ကျောခိုင်းပြီး မျက်စိမှိတ်ထားလိုက်တယ်....။ သီးခံ သီးခံထားပါလို့ ကျမ ကိုယ့်ကိုယ်ကိုအားပေးနေမိတယ် မနက်မိုးလင်းတာနဲ့ သူ့ဆီကနေ ကျမလွတ်မြောက်ပြီ....။ တစ်ညလုံးအိပ်မပျော်ပေမယ့် မနက်မိုးလင်းတော့ တစ်ချက်အိပ်ပျော်သွားတယ် ကျမနိုးလာတော့ တန်းဆွမ်းကြွတဲ့ သံဃာတွေကို သူဝတ္ထုငွေတစ်ချို့ဆင်းသွားလှူပြီး ပြန်တက်လာတယ်...။ ဘာသာမဲ့တစ်ယောက်လို့ခံယူထားပေမယ့် သူစိတ်ပါရင်ပါသလို ကုသိုလ်ကောင်းမှုလေးတွေ လုပ်ဖြစ်တာလေး တွေ့မိတယ်...။
တကယ်တော့ ကျမတို့နှစ်ယောက်က တစ်ယောက်ကိုတစ်ယောက် ဒီထက်သံယောဇဉ်မတွယ်မိအောင်လို့ အချင်းချင်းနာကျင်အောင် နာကျည်းအောင် ဖန်တီးလုပ်ဇာတ်ခင်းပြီး ကိုယ်စီတွန်းထုတ်နေကြမှန်းလည်း သိကြတယ်...။
နှုတ်မဆက်ခဲ့ရပေမယ့် အခုနှုတ်ဆက်ပါတယ်.....
နောင်ဘဝဆိုတာကို အယုံအကြည်မရှိတဲ့သူ့အတွက် ကျမတို့နှစ်ယောက် သေလွန်ပြီးတဲ့အခါ လိပ်ပြာလေးတွေအဖြစ်ပြန်ဆုံတွေ့ဖို့ စိတ်ကူးယဉ်မိပါသေးရဲ့.....။ ပြီးတော့ ကျမဘေးနားမရှိတော့တဲ့ ဘဝမှာ လုပ်ဖို့ကျန်နေသေးတဲ့အလုပ်တွေ လုပ်ချင်တဲ့အရာတွေအကုန်လုပ်ပါ.... ကျန်းမာရေးဂရုစိုက်ပါ ....။ "ကျမကို မေ့ပစ်လိုက်ပါလို့" ကိုကျတော့ အတ္တကြီးစွာနဲ့မတောင်းဆိုတော့ပါဘူး...။
မိုးငွေ့
