Dear Angel .....(24)

 

Dear Angel.....,

ကြာပြီပဲ.......

ကိုယ်မျက်မကျဖြစ်တာ နှစ်တွေကြာခဲ့ပြီပဲ........

မနေ့ညက လျှပ်စီးလက် မိုးခြိမ်းတော့ သီချင်းတွေနားထောင်ရင်း သူ့ကိုသတိရလို့ ငိုရသေးတယ်....။ 

ခုနောက်ပိုင်း စိတ်ရှုပ်စရာတွေ စိတ်ဆင်းရဲစရာတွေဆို ရုပ်ရှင်ကားတောင်မကြည့်ဖြစ်ဘူး...။ ပျော်စရာ စိတ်ချမ်းသာစရာလေးတွေပဲ ရွေးပြီးကြည့်ဖြစ်တယ် တွေးဖြစ်တယ် လုပ်ဖြစ်တယ်...။

ဒီနှစ်ထဲ မင်းဆီ ကိုယ်ခုမှစာရေးဖြစ်တာပဲ....။ အကြောင်းထွေထွေထူးထူးသိပ်မရှိတာရယ် မင်းကို ကိုယ့်ရဲ့ တခါတလေ မူမမှန်တဲ့စိတ်အခြေအနေတွေနဲ့ စိတ်မသက်သာစရာ စာတွေမဖတ်စေချင်လို့လည်းပါတယ်...။ ဒီနှစ် နှစ်ဝက်ကျိုးသွားပြီ...ကိုယ်တို့တွေဘာမှ ထူးခြားပြောင်းလဲမလာသေးဘူး...။ ကိုယ့်ကျန်းမာရေးကတော့ ဒီလိုပါပဲ ဒီအသက်အရွယ်မှာ စိတ်ပိုင်းဆိုင်ရာ ရုပ်ပိုင်းဆိုင်ရာတွေက တစ်နေ့ငွေ တစ်နေ့ရွှေပါပဲ....။ ဒါပေမယ့် ကိုယ်ကြိုးစားပြီး နေတတ်အောင်နေပါတယ်...။

မင်္ဂလာဆောင်တစ်ခုသွားစရာရှိလို့ ကိုယ် လက်သည်းခြေသည်းတွေ ဆိုင်မှာ extension သွားလုပ်ဖြစ်တယ်...။ ဘာအရောင်မှမခြယ်ဘဲ သဘာဝအတိုင်း လေးငါးနှစ်မကနေလာတော့ အဲဒါကိုကြည့်ပြီး ကိုယ့်ခန္ဓာနဲ့မသက်ဆိုင်သလို သပ်သပ်သီးခြားကြီးလိုမြင်နေတယ် အဆင်မပြေနေဘူး..လို့ခံစားနေရတယ်...။ ခုနောက်ပိုင်း တဖြေးဖြေးနဲ့ ဝတ်စားဆင်ယဉ်မှုကအစ လွတ်လပ်ပေါ့ပါးတာ လွယ်တာတွေကိုပဲရွေးဝတ်ဖြစ်တယ်...။ စိတ်သက်သာမှုမပေးတဲ့ ဘယ်အရာမျိုးမဆို လက်မခံနိုင်ဘူးဖြစ်နေတယ်...။

ကိုယ်ဆံပင်တိုတိုလေး ညှပ်လိုက်ပြီ....။ ဟိုအရင် မင်းကိုယ်ဆံပင်ညှပ်တာကို "မမကလဲ ဘာပုံကြီးညှပ်ထားလည်းမသိဘူး"လို့ ပြောဖူးတာမှတ်မိတယ်...။ လူတိုင်းနီးပါးက ကိုယ့်ကို ဆံပင်အရှည်နဲ့ပဲလိုက်ဖက်တယ်လို့ ပြောကြတယ်...။ ငယ်ငယ်တုန်းကတော့ အသက်ငါးဆယ်ကျော်လာရင် ဘာလို့ ဆံပင်တွေတိုသွားကြတာလည်းလို့ နားမလည်ခဲ့ဘူး....။ ခုတော့ ကောင်းကောင်းနားလည်သွားပြီ...။ ဆံပင်တွေ ကျွတ်လို့ အရှည်ပုံကို မထိန်းသိမ်းချင်တော့လို့ ခေါင်းလျှော်ပြီး ခေါင်းသုတ်ပြီး ဘီးဖီးစရာမလိုတော့တဲ့ အနေအထားကို နှစ်သက်တတ်လာလို့....။ ဒါတောင် ဆံပင်ညှပ်ဆရာက နှမြောပြီး နဲနဲရှည်နေသေးတာ ညှပ်ပေးတာက...။ ကိုယ့်သဘောအရဆို ကတုံးဆံပင်ပေါက်နဲနဲရှည်လာတဲ့ပုံမျိုးလိုချင်တာ...။

ဒီနှစ်ပိုင်း ကိုယ့်ရဲ့ထူးခြားချက်တွေက ဒါတွေပါပဲ....

ကျန်းမာရေးဂရုစိုက်.....

မိုးရာသီမှာ မိုးအေးလို့ အအေးမမိအောင် နွေး"ထွေး"နေပါ....

သတိရတိုင်း ကိုယ့်စာလာဖတ်ပါ.....

Still flying......

Still loving......

မိုးငွေ့

Dear Angel.....(23)

 

ချစ်သော အိန်ဂျယ်.....,

LTNS....

ကိုယ်အရင်တုန်းက တစ်ခါပြောပြဖူးတာ မှတ်မိသေးလား? အဲဒီလူတစ်ယောက်သေသွားရင် သူ့အသုဘကိုတောင် သွားမပို့ဘူးလို့ ပြောဖူးခဲ့တာလေ အဲတုန်းက ဒေါသစိတ်တွေက အကုသိုလ်စိတ်တွေဆိုတာ ကိုယ်နောက်ပိုင်းအဘိဓမ္မာလေ့လာတော့မှ အသေးစိပ်သိလာရတယ်...။  အဲဒီလိုစိတ်မျိုးကိုကြုံရတဲ့အခါ အမြဲတမ်းစိတ်ရော လူရော လွတ်လပ်ပေါ့ပါးအောင်နေလာတော့ လူတစ်ယောက်ဟာ သူ့ရဲ့ အတွင်းစိတ်ကို ချက်ချင်းထိန်းချုပ်နိုင်ဖို့အတွက် အင်မတန်ခဲယင်းပါလားလို့ သိလာရတယ်....။ 

တကယ်လက်တွေ့မှာ အဲဒီလူအနိစ္စရောက်တော့ ကိုယ်ကိုယ်တိုင် ဆေးရုံတက်တာကအစ နာရေးကိစ္စ ရက်လည် လလည်ကအစ လိုက်ပါကူညီဆောင်ရွက်ပေးခဲ့ရတယ်....။ အပြန်အလှန် စိတ်နဲ့ နှုတ်နဲ့ ပြစ်မှားခဲ့တာရှိရင်ခွင့်လွှတ်ပါတယ် ဘာမှအပြစ်မယူပါဘူးလို့လည်း ဘုရားရှိခိုးလို့ ခင်ပွန်းကြီးဆယ်ပါးကန်တော့တိုင်းဆုတောင်းဖြစ်တယ်...။ ကိုယ်သိလိုက်တဲ့ အသိတစ်ခုက ကံငါးပါးလုံခြုံနေတဲ့လူတစ်ယောက်ကို အမှတ်မထင်ဘဲဖြစ်ဖြစ် ရည်ရွယ်ချက်ရှိလို့ပဲဖြစ်ဖြစ် စော်ကားပြောဆိုခဲ့ရင် ခံရတဲ့ကာယကံရှင်က ဘာမှမသိလိုက်ပေမယ့်သူ့ရဲ့ အစောင့်အရှောက်ကငြိမ်မနေဘူးဆိုတာပဲ..။ 

ကိုယ်မှတ်မိနေသေးတယ် အာဏာမသိမ်းခင် တစ်လအလိုက လူတစ်ယောက်အဲလိုပဲ ကိုးဗစ်လိုလိုဘာလိုလိုနဲ့ အသက်ဆုံးသွားခဲ့တယ်...။ အဲဒီလူမဆုံးခင် နှစ်လအလိုက ကိုယ်နဲ့ရုံးမှာဆုံတယ်...။ သူကကိုယ့်ဘော့စ်ရဲ့အစ်ကိုအရင်းခေါက်ခေါက်....။ ကိုယ့်ကိုတွေ့တော့ "နင်ပိန်သွားလိုက်တာ"လို့စပြောတယ်...။ အဲဒီတစ်ခုလည်းပြောချင်တယ် ဗမာလူမျိုးတွေ လူတွေ့ရင် ပိန်တာ ဝတာကစပြီး ဘလိမ်းတဲ့စကားမဟုတ်ရင် တခြားဘာမှမပြောတတ်ကြတော့ဘူးလား....။ ဉပမာ ဒီနေ့ရာသီဥတုကောင်းတယ်နော် မတွေ့တာကြာလို့ နင်ကြည့်ကောင်းလာတယ် အလုပ်အကိုင်ဘယ်လိုလဲ စတဲ့ Positive thinking လေးဘာလေးမပြောတတ်မမေးတတ်ကြတော့ဘူးလား...။ ထားပါတော့ အဲဒါနဲ့ ကိုယ်လဲ "ဟုတ်တယ်ဦးလေးရေ သမီးကပြီးခဲ့တဲ့ ဝါတွင်း သက်သတ်လွတ်စားလို့ ဝိတ်နဲနဲကျသွားတာ"လို့ပြန်ဖြေတော့ ဘိုးတော်က ဘာပြန်ပြောတဲ့ထင်တုန်း...? "နင်က သက်သတ်လွတ်စားပြီး မဟုတ်တာလုပ်နေတယ်"တဲ့ ကိုယ်အဲစကားကြားတော့ ဒေါသထောင်းခနဲထွက်သွားခဲ့တယ် ဒါပေမယ့် ကိုယ့်ဒေါသတွေ အပြင်ထွက်မလာကြပါဘူး.... စိတ်ထဲကချက်ချင်းတုန့်ပြန်လိုက်မိတာက " ငါဟာ အခါတိုင်းအချိန်တွေထက် ကံငါးပါးကို ခါးဝတ်ပုဆိုးလိုမြဲအောင်နေနေတဲ့သူ ငါ့လိပ်ပြာငါအလုံဆုံးပဲ ငါ့ကိုဒီလိုမဟုတ်တမ်းလာစွပ်စွဲနေတာ ဒီအဖိုးကြီးကိုးဗစ်နဲ့မကြုံပါစေနဲ့" ဆိုပြီးတော့လေ ....။ အဲလိုနဲ့ နောက်နှစ်လကြာတော့ အဲဒီဦးလေးကြီး ကိုးဗစ်လိုလို သွေးတိုးလိုလို ဘာလိုလိုနဲ့ ICU ထဲမှာပဲ မျောပြီး အသက်ပြန်ပါမလာတော့ဘူး....။ ကိုယ်အဲအဖြစ်ကိုသိလိုက်တော့ ကိုယ့်ကိုယ်ကိုလန့်သွားခဲ့တယ်...။ ကိုးဗစ်ကာလနှောင်းပိုင်းဆိုပေမယ့် သူ့အသုဘကိုလဲ လိုက်မပို့ဘူး သူသေတာ ငါ့ပယောဂကင်းရဲ့လားလို့တွေးနေမိတယ်...။ ကိုယ်ကိုယ်တိုင် ဘာမှသွားလုပ်တာမဟုတ်ပေမယ့် အဲတုန်းကပြောခံလိုက်ရတဲ့ ဒေါသစိတ်ကြောင့် ဖြစ်သွားခဲ့တာလား သူ့ကံနဲ့သူ အချိန်တန်လို့ဖြစ်သွားတာလားဆိုတာ ဘုရားမှတပါးမသိနိုင်တော့ပြီ...။ အဲနောက်ပိုင်းမှ သီလမြဲတဲ့သူမှာ အစောင့်အရှောက်ရှိတယ်ဆိုတာကိုသိလာရင်း ကိုယ့်ဒေါသစိတ်လေးကို ထိန်းတတ်ရမယ်ဆိုတာလေး သတိချပ်မိတယ်...။

ခုရက်ပိုင်း ထစ်ခနဲဆို မကောင်းစိတ်တွေဝင်ဝင်နေတာ သတိထားမိတယ်....။ တစ်ခုခု ဒေါသစိတ်ဖြစ်မိတာနဲ့ အဲဒီလူကို မကောင်းတာဖြစ်ပါစေလို့ စိတ်ထဲကျိန်ကျိန်နေမိတယ်....။ အဲဒီစိတ်ကို အခုလောလောဆယ် ကြိုးစားထိန်းချုပ်နေရတယ်...။ Pisces တွေဟာ လက်နဲ့တုန့်ပြန်စရာမလိုဘဲ စိတ်ကိုပဲ ညှင်းစဲပြီးသတ်လိုက်လို့ရတာရယ် တော်ရုံနဲ့တော့ အဲစိတ်ကထွက်မလာပါဘူး တော်ရုံနဲ့နော်...ဒါပေမယ့်သူတို့ကို ခနခန အနိုင်ကျင့်စော်ကားမယ်ဆိုရင် ငါးနှစ်ကောင်ဟာ သူတို့ဖွက်ထားတဲ့ ဆူးတောင်တွေအကုန်ထုတ်ပြီး ဆော်ပြီပဲ...။ အန္တရာယ်အများဆုံး ရာသီခွင်ထဲမှာပါတဲ့ သူတို့ရဲ့ အမှောင်ဖက်ခြမ်းတွေအလုပ်လုပ်ရင် သူများထက်ပိုကြောက်စရာကောင်းတယ်ဆိုတာ ကိုယ်တိုင်ကိုယ်ကျသိလာရတော့တယ်..။ 

အိန်ဂျယ်ရေ ဒီတစ်ခါ လာပြောပြတာကတော့ ပျော်စရာလည်းမဟုတ်ဘူး ဝမ်းနည်းစရာလည်းမပါဘူး... ကိုယ့်ရဲ့ စိတ်အခြေအနေသက်သက်ကိုပဲလာပြောတာ.....။

ဒီမိုးတွင်း ရာသီတုပ်ကွေးတွေ အရမ်းဖြစ်ကြတယ် 

ကျန်းမာရေးဂရုစိုက်ပါ....

BYE!!!!

Still flying....

Still loving.....

Dear Angel.....(22)

 

ချစ်သော အိန်ဂျယ်.....,

နေကောင်းလား မတွေ့တာကြာပြီ....

ဘလော့မှာစာရေးပြီး Official Publish မတင်ဖြစ်တော့ဘူးဆိုပေမယ့် မင်းကိုတော့ ကိုယ်ရင်ဖွင့်စရာရှိရင် လာပြောလို့ရတယ်မဟုတ်လား....။

ဒီမနက်အစောကြီးပဲနိုးလာခဲ့တယ် မနက် သုံးနာရီလောက်ပဲရှိဦးမယ်ထင်တယ်...။ ပြန်အိပ်ပျော်သွားတော့ ငါးနာရီမထိုးခင်ဆိုတာကို သိတယ်...။ အဲမှာ အိပ်မက်တွေ ဆက်တိုက်မက်တော့တာပဲ...။ ခုနောက်ပိုင်း အိပ်မက်တွေ မက်တာ ကျဲသွားတယ်လို့ သတိထားမိတယ်...။ အရင် အသက်ငယ်တုန်းကတော့ အိပ်မက်မက်ရတာကို သဘောကျတယ် ပျော်ရွှင်စရာ ကြည်နူးစရာအိပ်မက်တွေဆို တစ်သက်လုံးမမေ့အောင် သိမ်းထားချင်တယ် စွဲလန်းခဲ့တာတွေရှိတယ်...။ ခုချိန်ထိ မမေ့သေးတဲ့ အိပ်မက်တချို့လဲရှိတယ်...။ တကယ်တော့ အိပ်မက်မက်ရတာက ပင်ပန်းမှန်း အသက်ကြီးလာမှ သိရတယ်...။ အိပ်မက်မက်တယ်ဆိုတာ အိပ်ချိန်မှာ ဦးနှောက်ကို တောက်လျှောက်မနားတမ်းအလုပ်ပေးနေတာ သိပ်ပင်ပန်းမှန်း နောက်ပိုင်း အိပ်ရေးပျက်ပါများလာတော့မှ နားလည်လာတယ်...။ 

မနက်က အိပ်မက်ထဲမှာ ကိုယ်သံယောဇဉ်ဖြစ်ပြီး ချစ်ခင်တဲ့သူတွေပါတယ်...။ အိပ်မက်ထဲမှာ သူတို့ ကိုယ့်အပေါ်ထားရှိတဲ့ ချစ်ခြင်းမေတ္တာနဲ့ အန္တရာယ်တွေနဲ့ရင်ဆိုင်ရတဲ့အခါကိုယ့်ကိုကာကွယ်ပေးတဲ့ သူတို့ရဲ့ ဂရုဏာနဲ့စိတ်စေတနာတွေကိုပဲ အချိန်တိုတို အိပ်မက်လေးထဲ ခံစားသိ သိရလို့ အိပ်မက်ကနိုးလာတော့ ကျေနပ်ပီတိဖြစ်ရတယ်...။ အဲဒီအတွက်လည်း ချစ်ခင်သူတွေကို ကျေးဇူးတင်ရပါတယ်.....။

အပြင်မှာတကယ်ဖြစ်မယ့် နိမိတ်ဆန်ဆန်အိပ်မက်တွေကို မက်ခဲ့ဖူးလွန်းလို့ ကိုယ် အိပ်မက်မက်မှာကြောက်မိတဲ့ အချိန်တွေလည်းရှိခဲ့တယ်...။ သဘာဝပတ်ဝန်းကျင်နဲ့ပတ်သတ်တဲ့ ဘေးတွေ အရေးအခင်းဖြစ်မယ့်နိမိတ်တွေကို ကိုယ်ကြိုပြီးမက်ဖူးတာတွေ ကြုံခဲ့ဖူးလို့ အဲလိုထူးခြားတဲ့ အိပ်မက်မက်တိုင်းကိုယ်ရေးမှတ်ထားမိတယ်...။ တကယ် လက်တွေ့ဖြစ်လာတာကို တိုက်တိုက်ဆိုင်ဆိုင် မြင်ရတော့ ကိုယ့်ကိုယ်ကို တခါတခါ ကြောက်လာပြန်ရော...။ ကိုယ်အမြဲတွေးမိတယ် ကိုယ်တကယ်ထဲထဲဝင်ဝင် ဝိပဿနာကိုသေချာလုပ်ရင် ကိုယ့်အတွက် တကယ်အကျိုးရှိစေမှာပဲဆိုတာလေ...ဒါပေမယ့် အခုထိမလုပ်နိုင်သေးဘူး....။

ကိုယ့်အိပ်မက်ရဲ့ အဝေးဆုံးတစ်နေရာကိုရောက်နေတဲ့ မင်းကတော့ ကိုယ့်အိပ်မက်ထဲအလည်ရောက်လာဖို့ မဖြစ်နိုင်တော့ပေမယ့် ကိုယ်မင်းကို ဒီနေရာလေးမှာတော့ စကားလာပြောလို့ရသေးတယ်မဟုတ်လား...။

Still flying....

Still loving....

မိုးငွေ့

Dear Angel (21).....

 

ချစ်သော... အိန်ဂျယ်,,

ဒီနှစ်မိုးရာသီက နေပူလိုက်  မိုးရွာလိုက်နဲ့ မတည်မငြိမ်ဖြစ်နေတာ ကိုယ့်စိတ်အခြေအနေတိုင်းပါပဲ....။ 

ကိုယ့်စိတ်ကခုတလော ဆတ်ဆတ်ထိမခံဖြစ်နေတယ်... တစ်ခုခုဆို ဒေါသထွက်လွယ် ဝမ်းနည်းလွယ်တတ်လာတယ်....အရာရာတိုင်းကို ခံစားနစ်ဝင်မှု အားကြီးလွန်းတယ်လို့ ကိုယ့်ကို သူမကြာခဏ စကားကြုံတိုင်းပြောတတ်တယ်...။ အထူးသဖြင့် စာရေးခြင်းကိစ္စနဲ့ပတ်သက်ပြီး နည်းနည်းလေးမှသေးသေးတင်မခံတာမျိုးပေါ့...။ တခါတလေကျရင် ကိုယ်ဘာဖြစ်ချင်နေတာမှန်းတောင် ကိုယ့်ဘာသာနားမလည်နိုင်တော့အောင်ပါပဲ...။ 

ကိုယ်က လူတစ်ယောက်ယောက်အတွက် အနှောက်အယှက်တစ်ခုပါပဲတကယ်တော့ ကိုယ်နဲ့လာပတ်သက်ရင် သူတို့ ပူလောင်ရမှာ လွယ်လွယ်ပြောရရင် ကိုယ်က မီးတောက်တစ်ခုပမာပဲ...။ စိတ်ချမ်းမြေ့စရာ ဘာတစ်ခုမှမပေးစွမ်းနိုင်တဲ့ ကိုယ့်နားကို ဘာကြောင့်နေချင်ရတာလဲ ကိုယ်နားမလည်နိုင်ဘူး ...။ ချစ်တဲ့စိတ် ဆိုတာတစ်ခုတည်းနဲ့ လွယ်လွယ်ပြန်မပြောပါနဲ့ ပင်ပန်းရပါတယ်...။ ကိုယ့်အနားမှာရှိရင် အမြဲစိတ်ပင်ပန်းရတယ်လို့ သူမကြာခဏပြောဖူးသလိုပေါ့...။ ဒါနဲ့များ ကိုယ့်ဆီ ဘာကြောင့်လာချင်ရတာလဲ...။ တကယ်တော့ ကိုယ်က စိတ်ကုန်ချင်စရာ မိန်းမတစ်ယောက်ဆိုတာ သူနားလည်ဖို့ကောင်းပြီ...။

ကိုယ်တစ်ယောက်ထဲပဲ တိတ်တိတ်ဆိတ်ဆိတ်နေချင်တယ်....။ ဘာအပူသောကမှမရှိတဲ့ ကိုယ့်အခန်းလေးထဲမှာပဲ ကိုယ်နေချင်တယ် ဘယ်သူနဲ့မှလည်းမတွေ့ချင်ဘူး...။ ကိုယ့်ကိုလည်း တွေ့ဖို့ မကြိုးစားပါနဲ့...။ ခုရက်ပိုင်း Physically ရော Mentally ရော ill ဖြစ်နေတယ်....။ တလောကလုံး E စီးကရက် (Vape) တွေကို မသောက်ဖို့ တင်းတင်းကြပ်ကြပ်တားမြစ်နေချိန်မှာ ကိုယ်ကတော့ သူ့ကိုစွဲနေခဲ့ပြီ...။ မီးခိုးတွေကို မှုတ်ထုတ်လိုက်တဲ့ အရသာကို ကိုယ်ကြိုက်သွားတာ မီးခိုးတန်းတလျှောက်အတွေးတွေလိုက်ပါရတာကို သဘောကျသွားတာ...။

ကိုယ့်ဘဝမှာ ကိုယ့်အတွက် ကိုယ့်စိတ်အတွက် လုံခြုံမှုပေးနိုင်တဲ့ ကိုယ့်အခန်းကျဉ်းလေးရယ် သီချင်းသံစဉ်တွေရယ် ပုံဆွဲဖို့ကိရိယာတချို့ရယ်နဲ့ Vape လေးတစ်ခုရယ်ရှိရင် ပြည့်စုံပြီပဲ...။ အရင်ကဆိုရင်တော့ စာအုပ်တွေ ကော်ဖီတွေပါလိမ့်မယ် ခုတော့ ကိုယ်အဲဒါတွေမလိုတော့ဘူး...။ တဖြေးဖြေးနဲ့ ဖြတ်ချနိုင်သလောက် ပစ်ချနိုင်သလောက်ဝန်တွေပေါ့အောင် ကိုယ်ကြိုးစားနေပါတယ်...။ ဘယ်သူတစ်ဦးတစ်ယောက်ရဲ့ ရင်ခွင်မှာမှမခိုလုံချင်သလို ဘယ်တစ်ဦးတစ်ယောက်မှလည်း ကိုယ့်ရင်ခွင်မှာ လာခိုလုံခွင့်မပြုနိုင်ဘူး...။ ကိုယ်ဟာ အဲဒီလို ရက်စက်တတ်သော မိန်းမတစ်ယောက်ပါ....။

သတိရခြင်းကို သယ်ဆောင်လာမယ့်
လိပ်ပြာတွေက ပန်းပွင့်ရဲ့
ဖြားယောင်းမှုကြောင့်
သေဆုံးသွားကြပြီ .....တဲ့ အိန်ဂျယ် ။

Still flying .....

Still loving .....

__________________
Revolution will prevail
မိုးငွေ့

Dear Angel (20).....

 

ချစ်သောအိန်ဂျယ်....,

နေကောင်းလား ...?

ဒီမှာမိုးတွေရွာနေပြီ....

မိုးရာသီဝင်လာပြီဆိုတော့ မိုးအေးတယ် ကျန်းမာရေးဂရုစိုက်ပါ...။

ညတုန်းက မိုးတွေ တစက်စက်နဲ့ရွာနေတာ တစ်ညလုံးပဲ....။

မိုးရာသီကို ပီပီပြင်ပြင်ရောက်သွားပြီဆိုတဲ့အကြောင်း ကိုယ့်ကို မိုးက တစ်ညလုံးလာပြောပြပြီးချော့သိပ်ခဲ့တယ်...။

ကိုယ့်အိပ်ခန်းထဲကို ကိုယ်ပြန်အိပ်ရတဲ့ ပထမဆုံးညမှာပဲ မိုးကျသံကိုနားထောင်ပြီး အိပ်ရတာ မိုးကိုချစ်တဲ့  မိုးကပေးတဲ့ ကိုယ့်ရဲ့ ကံကောင်းခြင်းလက်ဆောင်တစ်ခုပဲ... ။ ဒီတစ်နှစ်ပတ်လုံးမှာ (နာရီနည်းနည်းလေးပေမယ့်) ကိုယ်အိပ်စက်ရတာ အပျော်ဆုံးနဲ့ အိပ်ရေးအဝဆုံးလို့ပြောလို့ရတယ်...။ 

ပြီးတော့ ဒီအိပ်ခန်းမှာ အမှတ်တရထင်ကျန်စေတဲ့ အငွေ့အသက်တွေ အများကြီးရှိနေတယ်...။ ဒီအိပ်ခန်းလေးထဲမှာ ညလုံးပေါက်နီးပါး ဖုန်းပြောခဲ့တဲ့အသံတွေ... မိုးရာသီမှာ မိုးအကြောင်း လသာညမှာ လပြည့်လအကြောင်း ခုလိုမိုးဖွဲဖွဲလေးမှာ ပွင့်လာမယ့် မွှေးပျံ့နေမယ့် သူစိုက်ထားတဲ့ ယုဇနပန်းတွေအကြောင်း ကိုယ့်ကို သူဘယ်လောက်ချစ်ကြောင်း ပြောဖြစ်ခဲ့ဖူးသလို မကြာခဏကိုယ်တို့ ရန်ဖြစ်စကားများခဲ့ကြဖူးတယ်...။

မိုးကိုချစ်တတ်သူလို့ ကိုယ့်ကို သူသိထားတာမို့ မိုးရွာတာမြင်တိုင်း ကိုယ့်ကို သူသတိရနေလိမ့်မယ်လို့ ကိုယ်ယုံကြည်ပါတယ်...။ သူတစ်ခါပြောဖူးတယ် တစ်ယောက်ယောက်က သူ့ကိုသတိရနေတာပါလားလို့ဆိုတဲ့ အသိနဲ့ သူ့အကြောင်းစာရေးတာကို သူသဘောကျတယ် ဒါပေမယ့် အဲတစ်ယောက်(ကိုယ်)က သူ့ကို မမေ့သေးပါလားဆိုတဲ့အသိနဲ့ သတိရနေရတဲ့ ခံစားမှုမျိုးကို သူမကြိုက်ဘူးတဲ့...။

ကိုယ်ချစ်တဲ့ မိုးနဲ့ ကိုယ်ချစ်တဲ့အိပ်ခန်းလေးထဲမှာ ကိုယ်ချစ်တဲ့သူအကြောင်း တွေးပြီး အိပ်စက်ရတဲ့ ညတစ်ညမို့ ကိုယ့်အတွက် အမြဲတမ်းအမှတ်ရနေစေမယ့် မိုးညတစ်ညလည်းဖြစ်လိမ့်မယ်...။

ကိုယ်ပျော်နေပါတယ် ..... နည်းနည်းနေမကောင်းဖြစ်တာကလွဲလို့ ကိုယ် စိတ်ချမ်းသာနေပါတယ်...:)

ပြီးတော့ ကိုယ်အမြဲတမ်း သတိရနေပါတယ်.....

🎵.. မိုးတွေရွာတိုင်း မင်းကိုလွမ်းတယ် သိစိတ်ကရော မသိစိတ်ကရော....🎵

Still flying.....

Still loving.....

__________________
Revolution will prevail
မိုးငွေ့

Dear Angel (19).....

ချစ်သော .... အိန်ဂျယ်

ပြီးခဲ့တဲ့ လဆန်းပိုင်းတုန်းက ရင်းနှီးချစ်ခင်ရတဲ့ အန်တီကြီးတစ်ယောက်ဆုံးပါးသွားလို့ ရေဝေးသုဿန်ကို လိုက်ပို့ဖြစ်ခဲ့တယ်..။ အဲနေ့က နေအပူရှိန်ကလည်းပြင်း နေကာမျက်မှန်မပါရင် လုံးဝအဆင်မပြေဘူး...။ ဟိုရောက်တော့ စောနေသေးလို့ ကိုယ်ပို့ရမယ့် နာရေးရှင်တွေတောင် မရောက်ကြသေးဘူး ဒါနဲ့ ဟိုဖက်ထိပ်ဒီဖက်ထိပ် အဆောင်တွေကိုလျှောက်ကြည့်ဖြစ်တယ်...။ အဲနေ့က သင်္ဂြုလ်တဲ့ထဲ အသက် ၃၅နှစ် အမျိုးသမီးလေးက အငယ်ဆုံးပဲ ကျန်တဲ့သူတွေက ၅၉ တို့ ၆၅ တို့ ကိုယ်တို့ပို့ရမယ့် အန်တီကြီးကတော့ ၇၇နှစ်ရှိပြီ....။ အပြန်ကျကားပေါ်မှာ အတူသွားတဲ့ အဖော်တွေနဲ့ စကားတွေတစ်လမ်းလုံးပြောလာကြတာ ဒီလိုနေရာတစ်ခါရောက်တိုင်းလူတွေက သံဝေဂတော့တစ်ခါရကြတယ်မဟုတ်လား...။ ဒီလိုနဲ့ ကိုယ်သေရင် ဘယ်လိုတွေလုပ်မလဲကအစ ပြောဖြစ်လာတာ ကိုယ်အသက် ၄၂နှစ်ပြည့်မွေးနေ့တုန်းက အမှတ်(၁)ဆေးကျောင်းကို ကိုယ်သေရင် Body  လှူဖို့ Cert ယူထားခဲ့ပြီးသား...။ ဒီနောက်ပိုင်း ကိုယ်သေရင် Body ကိုလည်း မလှူတော့သလို မီးလဲမသင်္ဂြုလ်ဘူးလို့ ဆုံးဖြတ်ထားတယ်...။ ကိုယ်သေလွန်သွားပြီးခဲ့ရင် မြေမြှုပ်ဂူသွင်းမယ် ကိုယ့်ခန္ဓာကိုယ်ကို ကမ္ဘာမြေမှာ နောင်နှစ်ပေါင်းများစွာအထိ ဆက်လက်အသက်ရှင်သန်ပွားများသွားမယ့် အင်းဆက်ပိုးကောင်လေးတွေအတွက်ဖြစ်ဖို့ ကိုယ်ဆုံးဖြတ်ထားခဲ့တယ်...(ဒါပေမယ့် မျက်ကြည်လွှာကိုတော့ အရင်လှူထားတဲ့အတိုင်းပဲ လှူပါမယ်)။ မြေတွေကြိုဝယ်ဖို့စိတ်ကူးပေမယ့် ကိုယ်ဘယ်အချိန် ဘယ်နေရာမှာသေမယ်ဆိုတာမှကြိုမသိရဘဲမဟုတ်လား...။ အဲလို ဆုံးဖြတ်ချက်ပြောင်းလဲသွားရတာကလည်း ကိုယ်တို့ဝေးသွားတဲ့အခါ ကိုယ့်ကို နောက်ဆုံးတောင်းဆိုထားဖူးခဲ့တဲ့ လူတစ်ယောက်ရဲ့ဆန္ဒ အတွက်ကြောင့်ပါပဲ....။ သူ ကိုယ့်ကို ဒီလိုပြောထားခဲ့ဖူးတယ်လေ....။

" ဖြစ်နိုင်ရင် မင်း ဘော်ဒီကို မြေမြှုပ်ခဲ့ဖို့ စဥ်းစား မင်းအသားကနေ သက်ရှိဇီဝတွေ ဖြစ်လာလိမ့်မယ်  မင်းရဲ့ ဆေးရုံကိုလှူမယ့်အစီအစဥ်ကြီး ကိုယ်ဖျက်စေချင်တယ်သိလား....။    မီးလည်းမရှို့နဲ့ မြေမြှုပ်ပြီးဂူသွင်းဖို့သာစဥ်းစား အဲဒါက မင်းရဲ့ အသက်ဝိဥာဥ်ကို ဆက်ပြီးရှင်သန်စေမယ့်တစ်ခုတည်းသော အကြောင်းတရားပဲ ...။ မင်းတစ်ကိုယ်လုံးမှာရှိတဲ့ အစိတ်အပိုင်းအားလုံးကို ပိုးကောင်တွေကစားကြလိမ့်မယ် မင်းရဲ့အသားတွေ ခြင်ဆီတွေက သူတို့အတွက် စွမ်းအင်ဖြစ်လာလိမ့်မယ် အဲဒီစွမ်းအင်တွေရဲ့ စွမ်းအားကြောင့် သူတို့ အသက်ဆက်ရှင်သန်နိုင်လိမ့်မယ် ပြီးရင် ကိုယ်ပြောသလို သူတို့မျိုးပွားကြလိမ့်မယ်...။ အဲဒီသက်ရှိဇီဝလေးတွေက မင်းရဲ့ ကိုယ်ပွားတွေအဖြစ် ကမ္ဘာမြေပေါ်မှာ မပြတ်စတမ်းရှင်သန်နေထိုင်သွားကြလိမ့်မယ်... ကိုယ်ပြောတာသိလား အဲဒီအချိန်ကျရင်တော့ တူညီသက်ရှိလေးတွေဖြစ်ခဲ့ရင်တော့ ကိုယ်တို့အချင်းချင်း ပြန်ဆုံတွေ့ကောင်းလည်းဆုံတွေ့ကြမှာပေါ့....။ မင်းအလောင်းကိုမီးလည်းမရှို့နဲ့ ဆေးရုံကိုလည်းမပေးနဲ့ မင်းကိုယ်ပြောတာ နားထောင်မယ်ဆိုရင် နောက်ဆုံးအနေနဲ့ အဲဒီတစ်ခုကို နားထောင်ပေး.....။ ပြီးတော့  မင်းသေဆုံးသွားခဲ့ရင် မင်းအုတ်ဂူနား ကိုယ်အပင်လာစိုက်ချင်တယ် အခွင့်ရေးရှိခဲ့ရင်ပေါ့.... မင်းဆီက ကိုယ်နောက်ဆုံးတောင်းဆိုတဲ့အရာက ဒီကိစ္စတွေပါပဲ....။ "

ကြည့်စမ်း !!!!!

ကိုယ်..အခုမှသိလိုက်တယ် 

တလောကလုံးမှာ ကိုယ်ဂရုစိုက်တာ သူတစ်ယောက်တည်းရှိတာပဲ

ကိုယ်ဟာ ဘယ်သူ့ကိုမှ သောက်ဂရုမစိုက်ဘူးလို့ တစ်ချိန်လုံးကြွေးကြော်နေပေမယ့် သူ့ကိုတော့ ကိုယ်က အရာရာတိုင်းမှာ ဂရုစိုက်နေမိတာကိုတော့ အံ့ဩမိတယ်...။

သတိရခြင်းတွေကနေ အိပ်မက်တွေဖြစ်လာတာလို့ အိပ်မက်အကြောင်းလေ့လာသူတွေပြောလေ့ရှိတာဖတ်ဖူးတယ်...။ 

တစ်စုံတစ်ယောက်က ကိုယ့်ကိုအိပ်မက်တာ သူ ကိုယ့်ကို သတိရနေတာဖြစ်နိုင်သလို

သူ ကိုယ့်ကိုတစ်နေကုန်အိပ်မက်မက်နေတာလည်း ကိုယ် သူ့ကို အချိန်တိုင်းသတိရနေလို့လို့ သူဘာလို့မတွေးမိလဲ

ဒီဘလော့ဟာ ကိုယ့်ဘဝရဲ့တစ်စိတ်တစ်ပိုင်းလို့တောင် သတ်မှတ်လို့ရတဲ့ ကိုယ်မြတ်နိုးတန်ဖိုးထားရတဲ့ နေရာတစ်ခုဖြစ်တယ်....။ အဲဒီကိုယ်မြတ်နိုးတန်ဖိုးထားတဲ့နေရာလေးကိုပဲ ကိုယ်က အကြိမ်ပေါင်းများစွာ စွန့်ခွာဖို့ စဉ်းစားခဲ့ဖူးတယ် ခုချိန်ထိလဲ စဉ်းစားနေတုန်းပဲ....။ လူတစ်ယောက်ကိုယ့်ကို မေ့သွားဖို့ဆိုတဲ့အကြောင်းပြချက်သက်သက်နဲ့ ရက်တော်တော်ကြာတဲ့အထိ ကိုယ်စာမရေးဘဲနေခဲ့တယ်...။ ကိုယ်မြတ်နိုးတဲ့နေရာလေးဖြစ်ပေမယ့် တစ်စုံတစ်ဦးအတွက် စိတ်အနှောက်အယှက်ဖြစ်စရာ သတိရအမှတ်ရစရာနေရာ စိတ်နာစရာနေရာ မေ့မရတဲ့နေရာအဖြစ်လည်း မခံချင်ဘူး....။ ဘယ်တော့မှစာပြန်မရေးတော့ဘူးလို့လဲ စဉ်းစားထားခဲ့သေးတယ်...။ ကိုယ်တကယ်နေနိုင်အောင်လုပ်လို့ရပေမယ့် အသက်ရှင်ရမယ့် အချိန်တိုတိုလေးမှာ ဆန္ဒတွေကို ဘာလို့ ပိတ်ပင်တားဆီးထားမလဲ....။ ကျေးဇူးပြုပြီး တကယ်မေ့ချင်ရင် သတိမရချင်တော့ရင် ဒီနေရာလေးကို ဘယ်တော့မှမလာပါနဲ့လို့.....။

ဒီတလော နေလို့မကောင်းဘူး စိတ်ဓါတ်အမြဲကြံ့ခိုင်နေဖို့ ခံနိုင်ရည်အားရှိဖို့ ကိုယ်ကြိုးစားအားတင်းပြီးနေနေပါတယ်....။ အသက်ရှူမမေ့ဖို့ အမြဲသတိရအောင်နေတယ်...။ တစ်နေ့တာ သောက်သုံးရမယ့် ရေကိုလည်း များများသောက်တယ်...။ ဒီလိုဆိုတော့ တစ်စုံတစ်ယောက်ရဲ့ စကားကို ကိုယ်နားထောင်ဖြစ်နေသေးတာပဲ...။

__________________
Revolution will prevail
မိုးငွေ့

Dear Angel (18).....

ချစ်သောအိန်ဂျယ်.....,

ဒီရက်ပိုင်း ကိုယ့်ဆီရောက်လာတဲ့ စာတချို့ကြောင့် စိတ်အနှောက်ယှက်ဖြစ်ရတယ်.....

စိတ်ညစ်ရတဲ့အခါ လောကကြီးထဲကနေ ပျောက်ကွယ်သွားချင်တဲ့ ခံစားမှုမျိုး မင်းရော ဖြစ်ဖူးလား

ကိုယ်တော့ အကြိမ်ကြိမ်ဖြစ်ဖူးတယ်....

ဒါပေမယ့်လည်း အချိန်မကျသေးတော့ ဘယ်မှလည်း ပျောက်ကွယ်သွားလို့မရပါဘူး....

သူ့အပေါ် စာနာစိတ်ကင်းခဲ့ဖူးတဲ့အချိန်တွေကို ပြန်တွေးမိတော့ ကိုယ့်ရဲ့ကွန်မြူနစ်ဆန်တဲ့ စိတ်ကိုသတိထားမိပြန်တယ်...။ နူးနူးညံ့ညံ့မဆက်ဆံဘဲ တခါတလေ ရက်စက်မာကျောတတ်တဲ့ ကိုယ့်ကိုယ်ကို ပြန်မြင်တဲ့အခါ သူ့အတွက်ဝမ်းနည်းရတယ်...။

ငယ်စဉ်ကတည်းက ပုံသွင်းခံထားရလို့ ခက်ထန်တဲ့ နှလုံးသားကို အနုပညာချစ်တဲ့စိတ်နဲ့ ကုစားခဲ့ပေမယ့်လည်း တခါတခါ ပြန်ပြန်ပေါ်လာတတ်တာပဲ....။

ကိုယ့် follower ထဲကနေ တိတ်တိတ်ကလေး တစ်ယောက်ထွက်သွားတာ ကိုယ်သိတယ်...။ ကိုယ့်စာတွေကို ဘယ်သူမှလာမဖတ်တော့ရင်တောင် လာဖတ်မယ့်သူ(တစ်ယောက်)အတွက် ကိုယ်စာရေးနေဦးမယ်ဆိုပေမယ့်လည်း...  "နွေဦး(၁၄)" ပို့စ်တင်ပြီးရင်  ပို့စ်အသစ်တွေဆက်မတင်တော့ဖို့ ကိုယ်စိတ်ဆုံးဖြတ်ထားခဲ့သေးတယ် ....။ ဒါပေမယ့်  ကိုယ်တို့ရဲ့ကြေးနန်းကြိုးဟာ ဒီတစ်နေရာထဲမှာပဲရှိနေတဲ့အတွက် အစီအစဉ်က မအောင်မြင်ပြန်ဘူး...။

နောက်တစ်ရက်မှာ ထပ်ရောက်လာခဲ့တဲ့ စာ၂စောင်ကိုဖတ်ပြီးတဲ့အချိန် ကမ္ဘာမှာ ဘဝတစ်ခုလုံး အရာအားလုံးနဲ့ရင်းနှီးပြီး ကိုယ့်ကို ချစ်ခဲ့တဲ့(ချစ်နေတဲ့) ယောကျာ်းတစ်ယောက်ရှိတယ်ဆိုတာရယ်... အခေါက်ခေါက်အခါခါ ပြန်ဖတ်ရတဲ့သူ့ရဲ့ မုသားမာယာစကားလုံးတွေရယ်နဲ့ ကိုယ်တစ်ညလုံးမအိပ်ရဘဲ အိပ်ရေးပျက်ခဲ့တယ်....။

ကိုယ်တော့ အလင်းတန်းရှိရာဆီကို ပြေးသွားချင်မိပြီ.....။

Still flying....

Still loving....

__________________
Revolution will prevail
မိုးငွေ့

နွေဦး.....(၁၄)

 

အိန်ဂျယ်ရေ.....

အလွမ်းတွေနဲ့ ပြည့်နှက်နေတဲ့ ရာသီအချိန်လေး တစ်ပတ်လည်ရောက်လာခဲ့ပြန်ပြီ.....

မြူခိုးတွေနဲ့ ညှို့ဆိုင်းနေတဲ့ ညနေ နေဝင်ချိန်ဟာ နွေဦးအတွက် တန်ဖိုးဖြတ်မရတဲ့ ပန်းချီကားတစ်ချပ်ပဲ....။

ဘယ်တော့မှ ထပ်ဆုံတွေ့ခွင့်မရတော့တဲ့ သူတွေအတွက် ကိုယ်တိုင်ဖန်တီးထားတဲ့  စကားလုံးတွေဟာ အသက်ရှိသရွေ့ ရှင်သန်နေမှာအသေအချာဆိုတာ နွေဦးက နှစ်တိုင်း သက်သေပြနေဆဲပါ...။

Miss U Angel

Still flying.....

Still loving.....

___________________
Revolution will prevail
မိုးငွေ့

Dear Angel(17).....

 

ချစ်သော အိန်ဂျယ်....,

ဟိုး....အရင်တုန်းက ကိုယ်တို့နှစ်ယောက်  နှုတ်ဆက်နေကျ ဒီဇင်ဘာက ခုတော့ သူမဟုတ်သလို စိမ်းစိမ်းကားကားကြီးနဲ့ ဖြူလွလွနှင်းပွင့်လေးတွေကိုတောင် မခြွေချပေးနိုင်တော့တာ ဘယ်လောက်ကြာပြီလဲ...။

တစ်သီးပုဂ္ဂလကြောင့်ရော အကြောင်းအမျိုးမျိုးကြောင့်ရော...ခုတလော စိတ်နဲ့ကိုယ် ကပ်လိုက်မကပ်လိုက်ပါပဲ....။ ကြုံတွေ့နေရတဲ့ နိုင်ငံရေး စီးပွားရေး လူမှုရေးတွေက လူတစ်ယောက် ရှင်သန်ရပ်တည်နိုင်ဖို့ အလွန်ခက်ခဲတယ်ဆိုတာ အကုန်လုံးလက်တွေ့ကြုံနေကြရတာမဟုတ်လား...။

စုတ်သထက် စုတ်ပြတ်သပ်လာနေတဲ့ လူ့လောကကြီးမှာ ရာသီဉတုတွေ ဖေါက်လွဲဖေါက်ပြန်ဖြစ်တာလဲ မဆန်းပါဘူး...။ 

ဘယ်တော့များမှ ကိုယ်တို့ အေးချမ်းတဲ့အချိန်ရောက်လာမှာလဲ ?

ဘယ်တော့များမှ သာယာလှပစည်ပင်ဝပြောတဲ့ တိုင်းပြည်တစ်ခုဖြစ်လာမလဲ?

ဘယ်တော့များမှ စည်းလုံးညီညွှတ်တဲ့ သူတွေအားလုံးနဲ့ ပျော်စရာကောင်းတဲ့ နိုင်ငံဖြစ်လာမလဲ?

အဲဒီအတွက် ကိုယ်တို့အများကြီး ရင်းနှီးရဦးမှာ ကိုယ့်အတွက်မဟုတ်တဲ့ ကျန်ရစ်ခဲ့သူတွေအတွက် ဆက်ပြီး ရင်းနှီးနေရဦးမှာပဲ......ကိုယ်တတ်နိုင်တဲ့ မြူတစ်မှုန် သဲတစ်ပွင့် ဖြစ်ဖြစ်ပေါ့....။

လုပ်စရာရှိတာတွေပဲ လုပ်နေရင်း စာတွေလဲမရေးဖြစ်သလို စာတွေလည်း မဖတ်ဖြစ်ဘူး....

Miss you Angel

Still flying

Still loving

__________________
Revolution will prevail
မိုးငွေ့

Dear Angel(16).....

ချစ်သော အိန်ဂျယ်......,,

နောက်ဆို  မင်းဆီကို ကိုယ့်ရဲ့ ဝမ်းနည်းစရာတွေ စိတ်ညစ်စရာတွေကို သယ်ဆောင်ယူလာဖို့ သိပ်မရှိတော့ပါဘူး...ခုကစပြီး စိတ်ကျေနပ်စရာအကြောင်းအရာတွေကိုပဲ မင်းကိုလာပြောပြဖြစ်တော့မှာပါ...။

ပြီးခဲ့တဲ့ Dear Angel စာစုတွေကို ပြန်ဖတ်တော့ 

ခံစားမှုတွေက လေးလံထိုင်းမှိုင်းလိုက်တာ...မွန်းကြပ်လိုက်တာ....။ 

ဆောရီး အိန်ဂျယ်.... အဲဒီအတွက် ကိုယ်..တကယ်တောင်းပန်ပါတယ်....။

ကိုယ်မင်းကို စိတ်ဆင်းရဲစရာတွေချည်းပဲ တောက်လျှောက်လာလာပြောပြနေခဲ့တာ အပိုင်း(၁၅)ထိတဲ့.....။  ကိုယ်ခံစားရသမျှ ပျော်ရွှင်မှုတွေ ဝမ်းနည်းမှုတွေအားလုံးကို နားထောင်ပေးလို့ ဖတ်ပေးလို့ ကျေးဇူးတင်ပါတယ် အိန်ဂျယ်....။

ခုတော့ ကိုယ်.. ပျော်ရွှင်မယ့် အရာတွေကိုပဲ လုပ်နေပါပြီ...။ ပျော်ရွှင်မှုကိုပဲ ကိုယ်ရသမျှရှာဖွေနေပါပြီ...။

တည်မြဲခြင်းတောင် မတည်မြဲတဲ့ လူ့ဘဝ ခဏတာလေးမှာ... မနက်ဖန် တဘက်ခါ နောက် မိနစ်ပိုင်း နာရီပိုင်း အချိန်မရွေး ဒီလောကကြီးထဲကနေ ပျောက်ကွယ်သွားနိုင်တာပဲ...။ 

တစ်ခုခုကို  အဆုံးသတ်ခြင်းက ကိုယ့်အတွက် ပျော်ရွှင်ခြင်းရဲ့အစပဲ.... 

ခုတော့... ပျော်ရွှင်ခြင်းနိုင်ငံတွေဆီကို ခရီးထွက်ဖို့ ကိုယ်ပြင်ဆင်နေပါပြီ...။

Miss you Angel...,

Still flying .....

Still loving.....

__________________
Revolution will prevail
မိုးငွေ့

Dear Angel(15)....

ချစ်သော အိန်ဂျယ်.....,,

အခု...မိုးတွေစရွာနေပြီ....

ဒီနှစ် မိုးကနောက်ကျတယ်.... မိုခါးမုန်တိုင်းဆဲပြီးနောက် နှစ်ပတ်လောက်နေမှရွာတာ... ထုံးစံအတိုင်း ပန်းတောက်တွေကလည်း မိုးကိုစောင့်နေရလို့ မိုးပေါက်တွေထိတွေ့မှပဲ တပြိုင်နက်ထဲ ပွင့်ကြရတယ်...။ 

မိုးကိုချစ်တတ်တဲ့ကိုယ်......
မိုးရိပ်တွေညို ပတ်ဝန်းကျင်တစ်ခုလုံး အုံ့မှိုင်းနေတဲ့အနေအထားမျိုးကို နှစ်သက်တတ်လွန်းတဲ့ ကိုယ်က ဒီနှစ်မိုးရာသီကို အမှုမဲ့အမှတ်မဲ့ဖြစ်သွားရလောက်အောင် အသိစိတ်တွေလွတ်နေခဲ့တယ်...။ 

ကြုံဆုံခဲ့ရတဲ့... အဖြစ်အပျက်တွေက  အိပ်မက်ထဲထိခြောက်လှန့်နေတုန်း.....။

ကိုယ်ရဲ့ Guardian Angel က   နာကျင်မှုတွေနဲ့အတူ ကိုယ့်ကို အမှတ်သည်းခြေကြီးကြီးနဲ့ သင်ခန်းစာပေးသွားခဲ့တယ်...။ အဲဒီသင်ခန်းစာကရတဲ့အရာအားလုံးကို သေတဲ့အထိမှတ်သားဖို့ နာတတ်ဖို့ ကိုယ့်ကိုယ်ကိုအကြိမ်ကြိမ် သတိပေးထားတယ်..။ အဲချိန်ကစပြီး ကိုယ်ဟာ ပေါ့ပါးတဲ့အမွှေးအတောင်တစ်စုံနဲ့ ဝေဟင်မှာ လွတ်လပ်စွာ ပျံသန်းနိုင်ပါသေးလားလို့ သတိတရရှိစေခဲ့တယ်....။

အချိန်တစ်ခုထိတော့ အိပ်မက်ဆိုးတွေကို မက်နေရလိမ့်ဦးမယ်...  အဲဒီနောက် အိပ်မက်ဆိုးတွေဟာ တဖြေးဖြေး...... တဖြေးဖြေးနဲ့ ကိုယ့်ထံကနေ မှေးမှိန်ပျောက်ကွယ်သွားလိမ့်မယ်လို့ ကိုယ်မျှော်လင့်ပါတယ်...။ 

ဆန့်ကျင်ဖက်ဘယ်လိုအရာမဆို အချိန်အကြာကြီး ဒွန်တွဲရိုးမရှိပါဘူး...။ သဟဇာတရှိမနေသမျှတော့ ဘယ်လိုလူမျိုး ဘယ်လိုအရာမျိုးကမှ အတူတူရှိနေလို့မရပါဘူး..။ ဒါ..လောက သဘာဝပါ...။

အခု ကိုယ်ဘာတွေလုပ်မလဲဆို.... ဝင်းမြင့်ရဲ့ ကဗျာစာအုပ်လေးတွေကိုဖတ်မယ်... ပုံဆွဲမယ်... သီချင်းတွေနားထောင်မယ် ...အစားကောင်းတွေ လျှောက်သွားစားမယ် ကော်ဖီဆိုင်ထိုင်ရင်း မျက်စိအစာကျွေးမယ်....ပျော်စရာကြီးနော် အိန်ဂျယ်...။

ခုကစပြီး မိုးတွေရွာတာကိုကြည့်ပြီး အရင်လို ပျော်ရွှင်နိုင်ဖို့ ကိုယ့်ကိုယ်ကို သတိပေးထားတယ်...:)

Still flying....

Still loving.....

____________________
Revolution will prevail
မိုးငွေ့

Dear Angel......(14)

 

ချစ်သော အိန်ဂျယ်.....,

ဒီနေ့ တစ်နေ့လုံး မိုးအုံ့တယ် .....

တကယ်က ဒီလိုရာသီဥတုရဲ့အရောင်အဆင်းမျိုးကို ကိုယ်အမြဲနှစ်သက်ခဲ့တာ မင်းအသိပါ..။ ဒါပေမယ့် နွေရာသီအုံ့တဲ့မိုးဟာ သွေ့ခြောက်ပူလောင်စေတယ် စိတ်ကိုမွန်းကြပ်စေတယ်လို့ခံစားမိတယ်...။ မိုးရာသီလို စိုစွတ်လန်းဆန်းကြည်နူးမှုမျိုး မရစေတာတော့ သေချာတယ်...။

ပင်လယ်ကမ်းခြေကို မရောက်ဖြစ်တာတော်တော်ကြာသွားခဲ့ပြီပဲ....။ 

ပင်လယ်ကြီးကို ထိုင်ငေးချင်တယ် ပင်လယ်ပြင်ကို ဖြတ်တိုက်လာတဲ့ လေတွေကို တဝကြီးရှူရှိုက်ရရင် အမောပြေသွားမလားလို့....။

တစ်ခေါက်တော့ရောက်အောင်သွားဦးမယ် ဘယ်ကမ်းခြေဖြစ်ဖြစ်ပေါ့....။ ကိုယ်တို့အမှတ်တရရှိခဲ့ဖူးတဲ့ ကမ်းခြေကတော့ ခုချိန်ဆို လူတွေရှုပ်ယှက်ခတ် ရေတွေလည်း ညစ်ပတ်နေလောက်ရောပေါ့...။ လူတွေရှုပ်ထွေးတဲ့နေရာမျိုးကို ကိုယ်မသွားချင်ဘူး ...။ တိတ်ဆိတ်အေးချမ်းတဲ့နေရာလောက်ပဲ ကိုယ်လိုချင်တယ်...။ တစ်ချိန်ချိန်မှာ ကိုယ်တတ်နိုင်ခဲ့ရင် ကမ်းခြေမှာ အိမ်လေးတစ်လုံးဆောက်နေချင်တယ်...။ အဲစိတ်ကူးလေး မင်းကိုအရင်ကပြောပြဖြစ်ခဲ့ဖူးလား?

ဘဝရဲ့ စိတ်နွမ်းနယ်မှုတွေ အညစ်အကြေးတွေ ဒဏ်ရာတွေကို ပင်လယ်ရေနဲ့ဆေးကြောပစ်လိုက်ချင်တာပဲ...။

တကယ်တော့ လူဆိုတာ ကိုယ်လုပ်ခဲ့တဲ့လုပ်ရပ်ရဲ့ တန်ပြန်ဒဏ်ခတ်မှုကိုခံကြရတာချည်းပဲ ဘယ်သူ့ ဘယ်သူမှအပြစ်မတင်ပါဘူး...။ ခုချိန် ကိုယ်စိတ်မောပန်းနွမ်းနယ်တာဟာ သူတစ်ပါးကိုလည်း မောပန်းနွမ်းနယ်အောင်လုပ်ခဲ့လို့ပေါ့.......။ ဒါပေမယ့် ဒီလို Action , Reaction သဘောတရားကို လက်မခံတတ်တဲ့ အမှားအမှန်ကိုလက်မခံ အယုံအကြည်မရှိတဲ့ မထိုက်တန်တဲ့ သူတွေလည်းရှိနေမှာပါပဲ....။

ကိုယ့်စိတ်ထွက်ပေါက်ကို ပေးတဲ့ မင်းကလည်း ကိုယ့်အိန်ဂျယ် ၁၂ ပါးထဲက တစ်ပါးပါပဲ...။ 

လူတစ်ယောက်ရဲ့ ဘဝအောင်မြင်မှုကို သူ့ရဲ့ ပျော်ရွှင်မှုနဲ့ ယေဘူယျ တိုင်းတာသတ်မှတ်ကြတယ်....။ ကိုယ့်ကိုယ်ကို ပြန်မေးကြည့်ရမယ် ကိုယ်ပျော်ခဲ့ဖူးရဲ့လားလို့....။

Miss you Angel

Still flying.....
Still loving.....

__________________
Revolution will prevail
မိုးငွေ့

နွေဦး.....(၁၃)

 

မိုးငွေ့နဲ့အတူ နွေဦးရဲ့ ဖြစ်တည်ရှင်သန်မှုဟာ တစ်ဆယ့်သုံးနှစ်တိုင်ခဲ့ပြီ.....။

ဘယ်တုန်းကမှ ရိုးအီမသွားတဲ့....

ဘယ်တုန်းကမှ ငြီးငွေ့မသွားတဲ့....

ဘယ်တုန်းကမှ ပျောက်ကွယ်မှေးမှိန်မသွားတဲ့....

ခံစားမှုတွေ.... 

ရသတွေ.....

လွမ်းဆွတ်တသမှုတွေ.....

မြူမှုန်တွေကြားက အိမ်မက်ငွေ့ငွေ့တွေဟာ နွေဦးရောက်တိုင်း ဝေ့ဝဲရောက်လာတတ်ကြတယ်.....။

ပြီးတော့ နွေဦးနဲ့သက်ဆိုင်တဲ့ အရာအားလုံးလည်း နှစ်စဉ် မပြောင်းမလဲရှိနေဆဲ....

Miss You Angel...

Still flying.....

Still loving.....

___________________

Revolution will prevail

မိုးငွေ့

Dear Angel(13).....

 

ချစ်သောအိန်ဂျယ်.....,

ဒီနေရာကိုမရောက်ဖြစ်တာတောင်ကြာပြီပဲ....

ဒီနှစ်ရန်ကုန်ဆောင်းကအေးတယ်.....။ နေ့ရောညရော စိမ့်နေတာပဲ....။ အေးတဲ့ရာသီဆို ဒဏ်ရာအနာတရတွေက ယင်းတတ်တယ်တဲ့...။ ကိုယ့်မှာ မှားယွင်းလွဲချော်တဲ့နားလည်မှုတစ်ခုကြောင့် ရုပ်ပိုင်းဆိုင်ရာ စိတ်ပိုင်းဆိုင်ရာ ဒဏ်ရာတွေရှိနေတယ် အတွင်းရောအပြင်ရော အနာယင်းနေတယ်...။ တခြားဉတုတွေထက်တော့ သူက ရက်ပိုကြာတတ်တယ် အေးစိမ့်လေ အနာက ပိုနာလေပဲလေ....။ ငယ်စဉ်ကတည်းက မိစုံဖစုံနဲ့အတူမနေခဲ့ရတော့ ကိုယ့်ကိုယ်ကိုသာကိုးကွယ်ရာ ကိုယ့်အတွက်ကိုယ်ပဲသူရဲကောင်းဆိုသလိုပေါ့...။ အဆိုးဆုံးအခြေအနေရောက်တဲ့အထိ ခံနိုင်ရည်ရှိဖို့ ကိုယ်အမြဲကြိုးစားလေ့ကျင့်ထားခဲ့တယ်...။ ကိုယ့်မကြိုက်ဆုံး အဆိုးဆုံးအရာတွေ... ဉပမာကိုယ်က အနံ့ဆိုးတွေကိုလုံးဝမခံနိုင်တာတို့ ရွံတတ်တာတို့ကအစပေါ့...။ 

ညဖက်ဆိုဆောင်းလေက စိမ့်စိမ့်ပြီး ရှိရှိသမျှအပေါက်ကတိုးဝင်တော့တာပဲ...။ မနက်စောစောပိုင်းဆို နှင်းတွေမြူတွေကျတာ မြင်ရလိမ့်မယ်ထင်တယ်...။ အရင်လို စောစောထ လမ်းလျှောက်တာလည်းမလုပ်ဖြစ်တာ နှစ်ချီနေပြီ...။ ဆောင်းမနက်စောစောရဲ့ မြင်ကွင်းကို ဒီနှစ်ကိုယ်မမြင်ရသေးဘူးပဲ....။ ရန်ကုန်ဆောင်းမနက်ခင်း နေမထွက်ခင်မှာ ချစ်ခင်သူနဲ့ လက်ဖက်ရည်ပူပူလေးသောက်ရရင်ကောင်းမှာပဲ မုန့်ဟင်းခါး ရှမ်းခေါက်ဆွဲ အုန်းဆီချက်နဲ့နယ်ထားတဲ့ ပဲပြုတ်ကောက်ညှင်းပေါင်းပူပူ တိုရှည် ပူရီ ပလာတာစားရရင်ကောင်းမှာပဲ....။ တကယ်က အေးတဲ့ရာသီဉတုနဲ့ကိုယ့်ကျန်းမာရေးက မကိုက်ဘူး...။ အေးလာရင် နှာပိတ်တာတို့ အသက်ရှူကြပ်တာတို့ ခြေသလုံးကြွက်တက်တာတို့ ခြေချောင်းအကြောကပ်တာတို့ဖြစ်တတ်လို့လေ...။ ဒီအသက်အရွယ်မှာ ကြီးကြီးမားမားရောဂါမရှိ ကျန်းမာရေးကောင်းတယ်လို့ ဆိုနိုင်ပေမယ့် အဲလို သေးသေးမွှားမွှားလေးတွေတော့ ကြိုကြားကြိုကြားဖြစ်တတ်တယ်....။ နှစ်တိုင်းမိုးတွင်းမှာဖြစ်နေကျ ဓါတ်မတည့်စာစားလို့ လက်ဖမိုးယားယံပြီးရောင်တာလိုမျိုးတွေရောပေါ့....။ 

ရာသီဉတုအေးတယ် အိန်ဂျယ်....ကျန်းမာရေးဂရုစိုက်ပါ 

Still flying....

Still loving....

___________________
Revolution will prevail
မိုးငွေ့

Dear Angel(12).....

 

ချစ်သော အိန်ဂျယ်....,,,,

ပျော်ရွှင်လွတ်လပ်မှုကို ဘုရားတစ်ဆူလိုကိုးကွယ်တတ်တဲ့ ကိုယ့်အတွက် ဘယ်လိုအရာ ဘယ်လိုရွှေငွေစည်းစိမ်ကမှ မဆွဲဆောင်နိုင်တာ သေချာသွားခဲ့ပြီ....။

အသက်ရှင်နေထိုင်ရတဲ့ အချိန်တိုတိုလေးမှာ ကိုယ်စိတ်ချမ်းသာ ပျော်ရွှင်စွာပဲနေချင်တယ် ကိုယ်လုပ်ချင်တဲ့အရာမှန်သမျှကို လုပ်နေရင်းနဲ့ပေါ့...။ စားချင်တာလေးတွေချက်စားမယ် သီချင်းနားထောင်မယ် စာအုပ်တွေဖတ်မယ်.. တခါတလေ ပုံလေးတွေဆွဲမယ်...။ ကိုယ်ချစ်ခင်ရတဲ့သူတွေနဲ့ ကော်ဖီဆိုင်ထိုင်ရင်း အသိတွေဖလှယ်ကြမယ်...။ ခရီးသွားနိုင်သေးရင် ခရီးထွက်မယ်... ဒီလောက်ပါပဲ ကျန်တာ ကိုယ်ဘာမှမက်မောတွယ်တာစရာမရှိဘူးပဲ....။

မင်းလည်း အချိန်အားရင် ကိုယ့်ဘလော့ကို အပျင်းပြေစာလာဖတ်ပါ...။ ပြုံးပျော်စရာစကားလုံးတစ်ခုတော့အနည်းဆုံး မင်းအတွက်ထင်ကျန်ရစ်စေမှာပါ ....။

Still flying .....

Still loving.....

__________________

Revolution will prevail

မိုးငွေ့

Dear Angel (11).....

ချစ်သော.... အိန်ဂျယ်...,,

ဘာရယ်မဟုတ် ဒီလိုပဲ အာလူးဖုတ်ချင်လို့ရောက်လာတာပါလို့...မင်းကို ညာပြောမိပြန်ပြီ...။ တကယ်က ဒီနေရာရောက်လာတိုင်း ကိုယ့်မှာ ရင်ဖွင့်စရာ ဝမ်းနည်းစရာ နာကျင်စရာကလွဲပြီး မင်းကို ခုထိ ပျော်ရွှင်ကြည်နူးစရာကောင်းတဲ့အကြောင်းရာမျိုး မပြောဖြစ်သေးဘူး...။ 

သိမ်းဆည်းမြိုသိပ်မထားချင်တဲ့ အကြောင်းရာတချို့ကို ဒီနေရာလေးမှာ ဖွင့်ဟခွင့်ရတဲ့အတွက် တကယ်ကျေးဇူးတင်ပါတယ်...။ တကယ်တော့ ကိုယ်က အတိတ်ကိုတူးဆွပြီး ပြဿနာရှာတတ်တဲ့သူထဲမှာ မပါပါဘူး....။ ကိုယ့်ကိုလဲအဲလိုလုပ်တာ မကြိုက်ဘူး...။ ပစ္စုပ္ပန်တည့်တည့်ကိုပဲ အမြဲအားစိုက်ကြည့်သူပါ...။ အတွေးတစ်ခုကြောင့် ကိုယ့်မှာမေးခွန်းတစ်ခုပေါ်လာခဲ့တယ်...။ အဲဒီမေးခွန်းကိုအဖြေတိုက်ရိုက်မရပေမယ့် တွယ်ဝိုက်ပြီးနားလည်လိုက်တဲ့အခါမှာ တော်တော်လေးနာကျင်ခံစားလိုက်ရတယ်...။ ကိုယ်အဲလိုခံစားမှုမျိုးကိုမုန်းလိုက်တာ....။   နားလည်လက်ခံထားပြီးသား အကြောင်းအရာကို ကိုယ်ဘာလို့ထပ်သိချင်နေရတာလဲ...။ အခုခံစားနေရတဲ့ ကြေကွဲမှုဟာ မမြင်ရတဲ့အမျှင်တန်းတွေဆီက ဆင်းသက်လာတာလား....။ ဘာကိုမှ ဘယ်အရာကိုမှ မတွယ်တာမိဖို့ ကိုယ့်ကိုယ်ကို အထပ်ထပ်သတိပေးနေလျက်နဲ့ ခုလိုထပ်နာကျင်ရတာမျိုး...။ 

Hip Hop သီချင်းတွေ အသံကုန်ဖွင့်နားထောင်ရတာ ကိုယ့်အတွက် တဒင်္ဂတော့ ဝေဒနာတွေ ပျောက်ကင်းစေမယ်ထင်တယ်...။ 

ပြီးတော့ ကိုယ်နာရီအကြာကြီး အိပ်ပျော်သွားချင်တယ်.....

ခုရက်ပိုင်း နေရောင်မမြင်ရတာကြာပြီ...။ ကိုယ့်ကိုယ်ကိုလဲ နေရောင်ခြည်စွမ်းအင်တွေလိုနေတယ်လို့ခံစားရတယ်...။ 

ကိုယ်တောင်းတနေတဲ့ အိပ်စက်ခြင်းက အမှောင်ထဲမှာ ....

ကိုယ်လိုအပ်နေတဲ့ စွမ်းအင်ကတော့ အလင်းစက်မှာ.....

ဆန့်ကျင်ဖက်နှစ်ခုကို မျှချေညီဖို့ ကိုယ်လုပ်ရတော့မယ်....။

Still flying…. 

Still loving….

___________________
Revolution will prevail 
မိုးငွေ့

Dear Angel (10).....

 

ချစ်သော... အိန်ဂျယ်.,,,

အရှေ့ပို့စ်မှာတုန်းက ကိုယ်ပျော်ပါတယ်လို့ပြောတာ တကယ်မဟုတ်ဘူး ကိုယ်ညာတာ....။

ခုရက်ပိုင်း မနက်လင်းလို့ နိုးလာတာနဲ့ စိတ်ထဲမပျော်ဘူး....။ လူကြီးတွေမကြာခဏပြောသလို ရင်ထဲမကောင်းဘူး နေလို့မပျော်ဘူးဆိုတဲ့ ခံစားမှုမျိုးကို ကိုယ်နားလည်လာသလိုပဲ....။ အိပ်ရာနိုးနိုးချင်း ကိုယ့်ကိုယ်ကို အသက်ရှင်သန်ခွင့်တစ်ရက်ထပ်ရလို့ ကျေးဇူးတင်ဖို့မမေ့အောင်နေတယ်....။ အသက်ကြီးလာရင် အချိန်ပိုတွေအတွက် ဘာလုပ်မယ်ညာလုပ်မယ်လို့ စဉ်းစားထား ဟစ်ကြွေးထားပေမယ့် ခုကတည်းက ဘာမှလုပ်စရာမရှိရင်စာဖတ်မယ်ဆိုတဲ့ ပထမဆုံးတေးထားတာလေးကိုတောင် ဖြစ်အောင်မလုပ်နိုင်ဘူး စာအုပ်ကောက်ကိုင်လိုက် ဖတ်မယ်ဆို ဖတ်ချင်စိတ်ကမရှိဘူးဖြစ်နေတယ်....။ စိတ်ဝင်စားစရာ ကိုယ့်အတွက် ထွေထွေထူးထူးမရှိဘူးဖြစ်နေတယ်...။ ညနေအလုပ်ဆင်းရင် ဟိုဆိုင်သွားထိုင်မယ် ဒီဆိုင်သွားစားမယ်ဆိုတာတွေကလည်း စိတ်ကူးပဲရှိတယ် တကယ့်လက်တွေ့ကျ သွားရမှာ တစ်ယောက်ထဲဖြစ်နေလို့ ဝေးလို့ ကားကြပ်လို့ စတဲ့အကြောင်းပြချက်တွေ တစ်သီကြီးနဲ့ အိမ်ထဲကအိမ်ပြင်မထွက်ဖြစ်ပြန်ဘူး....။ နီးနီးနားနား ရုံးဆင်းပြီးရင် ရေကူးမယ်ဆိုတာတောင် သုံးလလောက်ရှိပြီ ခုထိ မကူးဖြစ်သေးဘူး....။ ကိုယ်လက်လှုပ်ရှားမှုအတွက် အိမ်ရှေ့ ကော်ရစ်ဒါလေးမှာပဲ သီချင်းလေးနားထောင်ပြီး ခေါက်တုန့်ခေါက်ပြန် နာရီဝက် တစ်နာရီလောက်လျှောက်ဖြစ်တယ်ဆိုတော့ မဆိုးပါဘူး ဒါလေးတစ်ခုကိုတော့ ကိုယ်လုပ်ဖြစ်နေတယ်....။ 

ခန္ဓာကိုယ်အတွက် ပျော်ရွှင်စေမယ့်ဓါတ်တစ်ခုခုလိုနေတယ်လို့ ကိုယ်ထင်တယ် ...ချောကလက်လိုမျိုး အချိုဓါတ်တစ်ခုခုချို့တဲ့နေသလားပဲ...။ ခက်တာက ကိုယ်က ချောကလက်မကြိုက်တဲ့သူ အဲ ဒါပေမယ့် M&M လိုရောင်စုံချောကလက်တော့ ကိုယ်ကြိုက်တယ်...။ ပြီးတော့ ချောကလက်ဆော့စ်ပါတဲ့ မိုခါးကော်ဖီသောက်တယ်...။ ကော်ဖီဆိုင်လေးဘာလေးသွားထိုင်ဦးမယ်...။ နောက်ပိုင်း တစ်လတစ်ခါပဲ သူငယ်ချင်းတွေနဲ့ချိန်းပြီး ကော်ဖီဆိုင်ထိုင်ဖြစ်တာ ကိုယ့်ဟာနဲ့ကိုယ်ကျတော့ မထိုင်ဖြစ်တော့ဘူး....။ Loneliness ဖြစ်ခြင်းရဲ့ ဝေဒနာက မသေးဘူးပဲ...။ အသက်ရလာတာနဲ့အမျှ နေတတ်ဖို့ တော်တော်အရေးကြီးတယ်ဆိုတာတွေ့လာရတယ်...။ လောကမှာ မနေတတ်ရင် တစ်နေ့တစ်ခြား ပျော်စရာတွေက ကင်းမဲ့လာတယ်...။ ဘယ်လိုအရာမျိုးဖြစ်ဖြစ် ကိုယ့်စိတ်ကို ပျော်အောင်လုပ်လို့ရတာ အကုန်လုပ်ချင်တယ် ခုချိန်မှာ....။ လူတစ်ယောက်အတွက် ပျော်ရွှင်မှုက အဓိကလိုအပ်ချက်ပဲ မပျော်တော့ဘူးဆိုရင် နေရတာ ဘာအဓိပ္ပါယ်မှမရှိတော့ဘူးပဲ...။ အရင်ကဆို အစားကောင်းစားရရင်ပျော်တယ်....။ အချိုတွေစားရရင်ပျော်တယ်....။ အချိုကလည်း လိုတာထက်ပိုစားလို့မဖြစ်ဘူးမဟုတ်လား သူက အိုမင်းရင့်ရော်မှုကို အားပေးသလို ကင်ဆာဆဲလ်တွေကိုလည်း အားပေးတယ်လေ...။ ဘာပဲဖြစ်ဖြစ် အချိုလေးစားရရင်တော့ ကိုယ်ပျော်မယ်ထင်တယ်....။ ဒီရက်ပိုင်း ကိုယ့်ကို အုန်းကပ်စေးနှဲလာကျွေးမယ့်သူရှိတယ် ...။ ကိုယ့်မျှော်လင့်ချက်ကို ပုံပြင်တစ်ပုဒ်လုပ်မသွားလောက်ဘူး ထင်တာပဲ...။

ကိုယ့်အတွက် အက်ဆေးတစ်ပုဒ်ရေးရတာ ကော်ဖီတစ်ခွက်ထိုင်သောက်ပြီး သီချင်းနားထောင်နေရတဲ့အချိန်ဟာ အပျော်ရွှင်ဆုံးအချိန်လို့တောင်ပြောလို့ရနေပြီ....။ နယ်မှာနေတုန်းက ကလေးဘဝ အပူအပင်မရှိစဉ်ကတော့ ဘယ်ချိန်မဆို ပျော်ရတယ်လို့ထင်ခဲ့တယ်....။ ဘာမှလည်း သိပ်မတွေးတတ်သေးတဲ့အချိန်ကိုး...။ အိမ်နဲ့ဝေး အဖေအမေနဲ့ဝေး မိသားစုမောင်နှမနဲ့ဝေးတဲ့အချိန်ကစပြီး... အရာရာကိုအကြောက်လွန်တဲ့ Panic အမြဲရှိနေခဲ့တယ်...။ လူတွေနဲ့စကားပြောရမှာကြောက် တွေ့ရမှာလည်းကြောက် ဖုန်းပြောရမှာလည်းကြောက် နေရာတကာကြောက်နေတော့တာပဲ....။ ကိုယ်မှတ်မိသလောက် ကိုယ့်မှာ ငယ်စဉ်ကတည်းက Social Phobia လိုမျိုးရှိတယ်...။ ဟိုးအတွင်းပိုင်းမှာ ပုန်းအောင်းနေတဲ့ စိတ်ဒဏ်ရာတစ်ချို့ရှိတယ်...။

ခုကိုယ်ခံစားနေရတာ စိတ်ကျရောဂါ အမျိုးမျိုးတွေထဲက တစ်မျိုးပါဝင်နေပြီလား...။ ခပ်ပါးပါးလေးစတင်နေပြီလား....။ ဒီပုံစံနဲ့ရှေ့ဆက်ရင် ကိုယ့်စိတ်အခြေအနေကို စာနဲနဲတော့ဖတ်ကြည့်ရတော့မယ်ထင်တယ်...။ လောလောဆယ်တော့ စိတ်တည်ငြိမ်အောင်စုစည်းဖို့ Meditation လုပ်ရင်း ကိုယ့်စိတ်ကိုယ်ကုစားလို့ရသေးမယ်ထင်တယ်....။ ညအိပ်မပျော်တာမျိုးမဖြစ်လို့ တော်ပါသေးရဲ့.....။ 

ခုချိန်မှာ Hot lemon tea နွေးနွေးလေးတစ်ခွက်နဲ့ Bite size မုန့်လေးစားလိုက်ရရင်လည်း နေလို့ကောင်းသွားမှာထင်တယ်...ခဏပေါ့....။  တောင်းပန်ပါတယ် အိန်ဂျယ် ...မင်းကို ကိုယ် အမြဲတမ်း မပျော်ရွှင်ခြင်းတွေကိုပဲ သယ်ဆောင်လာပေးမိ.....။

Still flying.....

Still loving.....

__________________
Revolution will prevail
မိုးငွေ့

Dear Angel (9)…..

 

ချစ်သော... အိန်ဂျယ်,,,

နေကောင်းလား...?

ကိုယ်ကတော့ ၂နှစ်ကျော်လုံးလုံး သူများတကာတွေ တလောကလုံး အသုန်းအရုန်း ဖျားနာကြ မလွတ်တဲ့သူများ expired တွေဖြစ်ကြတဲ့အချိန်တွေမှာ ကျန်းမာရေးဒေါင်ဒေါင်မြည်ခဲ့ပါလျက်နဲ့  ဟိုတလောက ဆေးစစ်ပြီး သွေးတွင်းအဆီများနေတာကိုချရင်း သတိမပြုလိုက်မိတာ Immune system ပါကျပြီး နှာစေး ချောင်းဆိုးဖြစ် လည်ချောင်းပါနဲနဲနာချင် (အဖျားတော့မရှိ) တာကို ၃ရက်လောက်ဖြစ်လိုက်တယ်...​။ အားလုံးကတော့ ဒါကိုဗစ်လက္ခဏာပဲဘာညာပြောကြ ထင်ကြေးပေးကြ ဆေးခန်းပြခိုင်းကြပေမယ့် ကိုယ်ကတော့ပေပြီး အိမ်မှာပဲကိုယ်ဘာသာကိုယ် ထူထောင်အောင်လုပ်တယ်...။ လုပ်နေကျ ညနေတိုင်းလမ်းလျှောက်တယ် ရေများများသောက်တယ်...။ ကြက်ဥ အသားငါး ဘာမှစားချင်စိတ်မရှိဘဲ သစ်သီးတွေကိုပဲစားချင်နေမိတယ်....။ မောတာတွေတော့မဖြစ်ပါဘူး...။ အသက်ရှည်ရှည်ရှူတယ်....။ ပါးစပ်တော့အစားပျက်တယ်...။ ထမင်းစားမကောင်းဘူး....။ ဒီလောက်ပါပဲ ခုတော့ နေကောင်းသွားပါပြီ...။ ဝိတ်ကိုလည်း အထူးတလည်ချစရာမလိုတော့ဘူး အခု ၁၂၅-၂၆ နေလို့ထိုင်လို့ကောင်းတယ်...။ အဝတ်စားဝတ်ရတာလဲ သက်တောင့်သက်သာရှိတယ်....။ မျက်နှာလည်းအဆီကျ မေးရိုးထင်းထင်းပေါ်  ဘော်ဒီလည်းရှည်ရှည်ပါးပါး မော်ဒယ်လ်ဖြစ်သွားပြီသိလား....။ 

ပိုပြီးနေလို့ကောင်းသွားတာက တကယ့်ဖြစ်တည်မှုအမှန်ကို ကိုယ်လက်ခံတတ်သွားတာကြောင့်ပဲ...။ တစ်သက်လုံး အမှန်လို့မျက်စိမှိတ်ယုံကြည်ခဲ့တဲ့ အရာတချို့ကို ရှင်းလင်းစွာသိရတာတွေကြောင့်ရယ်ပေါ့...။ ကိုယ် မသေခင် သိလိုက်ရတဲ့အကြောင်းအရာတချို့တွေအတွက်လည်း သိပ်ကိုကျေနပ်မိပါတယ်....။ ကိုယ်သေဆုံးတဲ့အခါ ကိုယ့်ခန္ဓာကိုယ်ကို ဆေးရုံလှူဒါန်းတဲ့ ဆုံးဖြတ်ချက်ကိုလည်း ကိုယ် ပယ်ဖျက်ပစ်လိုက်ပီ...။ အတုအယောင်တွေနဲ့ဖုံးလွှမ်းထားတဲ့ ကမ္ဘာကြီးမှာ အမှန်ကိုမြင်နိုင်တဲ့လူဦးရေတွေ အရမ်းနည်းသေးတဲ့အတွက် အားမရတော့ဖြစ်မိတယ်...။ ဒါပေမယ့်လည်း ကမ္ဘာပေါ်နေထိုင်ကြတဲ့ လူအားလုံးသာ အမှန်ကဘာလဲဆိုတာသိသွားကြရင် ကမ္ဘာကြီးလည်နေတာ ရပ်သွားနိုင်မယ်လို့ ကိုယ်ထင်တယ်....။ 

ပိုနေမြဲကျားနေမြဲ မသိသေးတာကိုမသိတာလဲ ခပ်ကောင်းကောင်းပါ....။ ကိုယ်ဆိုအရင်က အမြဲတမ်းအရာရာကို အကောင်းမြင်ဝါဒရှိခဲ့တယ်...။ အဲဒီစိတ်ကို မကောင်းဘူးလို့မဆိုလိုပါဘူး...။ Life is not a morning rose မဟုတ်လား....။ ကိုယ့်စိတ်ကူးလေးနဲ့ ကိုယ့်မျှော်လင့်ချက်လေးနဲ့ မျောလွင့်နေရတာကောင်းတယ်လေ....။ ဟော.... ဘာကဘာလဲဆိုတာ သိလိုက်ရတဲ့အချိန်ကစပြီး စိတ်ကူးယဉ်လို့မရတော့သလို ပျင်းစရာလဲကောင်းလာတယ်...။ ဒါကြောင့်ဒီနောက်ပိုင်း ကိုယ်သီချင်းတွေနဲ့ပဲအဖော်လုပ်နေရတာ ဘယ်လောက်ကြာပြီလဲ…။  ဒါပေမယ့် ကိုယ်ပျော်ပါတယ်....။

Still flying......
Still loving....

__________________
Revolution will prevail

မိုးငွေ့

Dear Angel .....(8)

 

ချစ်သော..... အိန်ဂျယ်..,

မနေ့ညက အိပ်ခါနီး မင်းနဲ့စတွေ့တုန်းက Gtalk မှာ Chat ခဲ့တာတွေကို ပြန်စဉ်းစားမိရင်း   ဒီစာကို ရေးဖြစ်သွားတာပါ....။

တကယ်တော့ မင်းနဲ့စတွေ့ခဲ့တဲ့ ၂၀၁၁ မှာ Facebook သုံးနေကြပြီ အကောင့်တွေကိုယ်စီရှိနေကြပြီဆိုပေမယ့် ကိုယ်တို့  Gtalk မှာပဲ စကားပြောဖြစ်တာများတယ်...။ Gtalk နစ်မှာ တစ်နေ့သာ Daily Quote တွေတင်ကြတဲ့ ခေတ်ပေါ့....Facebook မှာ Story တင်သလိုပေါ့....။ ကိုယ့်သူငယ်ချင်းတွေထဲမှာ မီးစိမ်းနေတာမြင်နေရပြီး လာမနှုတ်ဆက်ရင် နစ်မှာ "သတိရသေးရင်နှုတ်ဆက်ပါ"တို့ ဘာတို့ ရေးတင်တာပေါ့.....။ မင်းမှတ်မိဦးမှာပါ... တစ်နေ့..ကိုယ့်နစ်မှာ " အိန်ဂျယ်နဲ့အတူကော်ဖီသောက်နေတယ်" လို့ တင်ထားတာကို ကိုယ့် Cousin တစ်ယောက်ကလာပြီး "Wake up from your dream" လို့လာပြောတယ်....။ ကိုယ့်ကို သူက စိတ်ကူးပဲယဉ်နေတယ် အပြင်လောကနဲ့ အဆက်သွယ်ပြတ်နေတယ်ပြောချင်တာ....။ ကိုယ့် Privacy ကို အဲလို လာစွပ်ဖက်တာလောက် မကြိုက်တာမရှိဘူး ကိုယ်လဲ သူများလွတ်လပ်ခွင့်ကို မစွပ်ဖက်သလို တားမြစ်ပိတ်ပင်တာမလုပ်ဘူး.....။ ကိုယ့်အလုပ်နဲ့ ကိုယ့်ဝါသနာကို တစ်သီးတစ်သန့်စီ ခွဲထားပြီးသား ဘာမှ ကိုယ့် Personal မှာ ဆရာလာလုပ်စရာကိုမလိုဘူး...။ ကိုယ့်စိတ်ထဲရှိတာ ပြောချင်တာပြောဖို့ ရေးချင်တာရေးဖို့ Personal အကောင့်လုပ်ထားတာလေ...။ တကယ်...ပြောချင်တာက အဲဒါပဲ ခုပဲ လူတစ်ယောက်ကို အိပ်မက်ယောင်နေသူ, အပြင်လောကနဲ့လက်တွေ့ကင်းကွာနေသူတစ်ယောက်ကို အိပ်မက်ကနိုးထလိုက်တော့လို့ ကိုယ်ပြောလိုက်မိတယ်....။ ခုလိုပြောမိလို့ ကိုယ်အဲတုန်းက အပြောခံခဲ့တာကို ပြန်အမှတ်ရမိတာပါ....။  ဒီလိုပြောရတာကလဲ နှစ်ရှည်လများ လိုအပ်တာရော မလိုအပ်တဲ့အတွေးတွေရောနဲ့ အိပ်မက်ထဲလမ်းလျှောက်နေသူတစ်ယောက်ကို လှုပ်နှိုးပေးချင်တာတစ်ခုကြောင့်ပါပဲ.....။ မလိုအပ်တဲ့အရာတွေအတွက် ဦးနှောက်ကို အနားပေးစေချင်တာသက်သက်ပါပဲ ဒီလောက်ပါပဲ.....။

I miss you Angel.....

Still flying.....
Still loving.....

___________________
Revolution will prevail
မိုးငွေ့

Dear Angel…..(7)

 

ချစ်သောအိန်ဂျယ်.....,

လူတစ်ယောက်ကပြောဖူးတယ်  သူကိုယ်တိုင်ဖန်တီးထားတဲ့ ဘယ်အရာမဆို ခလုတ်တစ်ချက်နှိပ်ပြီး Delete လုပ်ပစ်တဲ့ထိ မမိုက်မဲဘူးတဲ့...။ ဒီလိုဆို ကိုယ်ကအကြိမ်ကြိမ်မိုက်မဲခဲ့တဲ့သူပဲ ကိုယ်ကိုယ်တိုင်ဖန်တီးထားတဲ့ အရာတွေကို အတော်များများဖျက်စီးခဲ့ဖူးတယ် ခလုတ်လေးတစ်ချက်နှိပ်ပြီးလဲ Delete လုပ်ခဲ့ဖူးတယ်....။ 

ကိုယ်မြတ်နိုးတဲ့အရာကိုမှပဲ ခလုတ်လေးတစ်ချက်နဲ့ ကိုယ်ဖျက်စီးပစ်ခဲ့တယ်....။ မင်းနဲ့ပတ်သက်တဲ့အမှတ်တရတွေတော့ ကိုယ်ဘာနဲ့မဆိုလဲပြီး ကာကွယ်မယ် ဘယ်တော့မှမပျောက်ပျက်အောင်ထိန်းသိမ်းမယ် Google စနစ်မပပျောက်သရွေ့ ကိုယ့်ဘလော့ရှိနေသရွေ့ ကိုယ်အသက်ရှင်သရွေ့ အိန်ဂျယ်ဆိုတာ ဘယ်တော့မှ ပျောက်ကွယ်မသွားစေရဘူး ....။

Be good enough to forgive for someone but don’t be stupid enough to trust them again. တစ်ခါသေဖူး ပျဉ်ဖိုးနားလည် ဆိုတဲ့ စကားပုံလိုပါပဲ ကိုယ့်ကိုယ်ကို အကြိမ်ကြိမ် အမှတ်ရနေစေဖို့ နောက်ထပ်မမိုက်မဲမိဖို့ ....သတိ သတိ သတိ....။

I miss you Angel .....😢

Still flying …..
Still loving ….

___________________
Revolution will prevail
မိုးငွေ့