ရေတံခွန်နဲ့တူသောသူ........

ဘာလို့လဲ မသိဘူး အဲဒီကောင်လေးကိုစတွေ့ကတည်းက ရေတံခွန်ကစီးကျလာတဲ့ ရေကြည်ရေပေါက်တွေလိုပဲ ခံစားမိတယ်....။ ကြည်ကြည်လင်လင်လေး...။ သန့်သန့်ရှင်းရှင်းလေး...။

သူနဲ့ကိုယ်တို့ရဲ့ ငယ်စဉ်ဘဝလေး နဲနဲခပ်ဆင်ဆင်တူတယ်....။ မောင်နှမလေးယောက်ရှိတာချင်းရော အကြီးဆုံးဖြစ်တာရော... မောင်နှမလေးယောက်မှာ မိန်းကလေးနှစ်ယောက် ယောကျာ်းလေးနှစ်ယောက် ဖြစ်နေတာရော.....။ ရွာမှာနေပြီး ကြီးပြင်းခဲ့တာချင်းရောပေါ့.........။ ဒီလိုပါပဲ လူ့ဘဝဆိုတာ ဘယ်အရွယ်ရောက်ရောက် ရုန်းကန်လှုပ်ရှားရတာချည်းပါပဲ..။ ဘာမှမလုပ်ရမကိုင်ရဘဲ သာသာယာယာနဲ့ ဘဝကြီးကိုဖြတ်သန်းရမယ် ဆိုရင် တော်တော်တော့ ပျင်းစရာကောင်းမယ်.....။

သူကရေတံခွန်နဲ့တူတယ်.....။ အောက်က ရေအိုင်ထဲကိုမရောက်ခင်အထိတော့ ဝုန်းဒိုင်းကျဲပြီး ခုန်ဆင်းကျလာတယ်....။ အောက်လဲရောက်ရော....ရေအိုင်လေးက တည်တည်ငြိမ်ငြိမ်ကလေးဖြစ်သွားတယ်..။ ရေကျတဲ့အရှိန်နဲ့မို့လဲ ရေအိုင်ကနက်နဲစိမ်းမှောင်နေတယ်.....။ အဲလိုပဲ သူ့ရဲ့ နေ့စဉ်အလုပ်တွေကို မနားမနေပြေးလွှားလှုပ်ရှား လုပ်ရတယ်.....။ ပြီးတော့မှသာ ရေအိုင်လို အေးဆေးစွာနဲ့ သူအိပ်စက်အနားယူတယ်..။ တောင်ပေါ်ကကျလာတဲ့အရှိန်ကြောင့် ရေတံခွန်လေးဟာ တခါတလေတော့ ထိခိုက်နာကျင်တာတွေရှိတတ်တာပေါ့.....။ တခါတခါကျတော့လဲ စမ်းရေအိုင်ထဲက ရောင်စုံငါးလေးတွေ လူးလားခေါက်ပြန်ကူးခတ်တော့ ရေတံခွန်လေးအတွက် ပျော်ရွှင်မှုပဲပေါ့....။

ကိုယ်ကသာ အဲဒီကောင်လေးကို ရေတံခွန်နဲ့ခိုင်းနှိုင်းတာ သူကတော့အနားမှာ ရေဗူးထားမသောက်တတ်တဲ့ သူမျိုး....။ ကိုယ်နဲ့စကားပြောရင်တော့ သူကပြောတတ်သေးတယ် ရေများများသောက် အသားရေလှတယ်တဲ့...။ ကိုယ့်အမြင်တော့ အဲလိုရေတံခွန်နဲ့တူတဲ့သူဟာ ဘဝမှာ ဘယ်လောက်ပဲခက်ခဲကြမ်းတမ်းပါစေ အဲဒီအချိန်ကိုရအောင် ဖြတ်ကျော်တယ်....။ ဖြတ်ကျော်နေစဉ်ကာလမှာပဲ လူကအပူမီးတွေတောက်လောင်တာ အားလုံးလဲ ပြီးသွားရော စမ်းရေအိုင်လေးလိုအေးချမ်းသွားလိုက်တာ....။ ဒါကြောင့် သူ့ကိုကြည့်ရင် အမြဲအေးဆေးနေတတ်တယ်.....။ ရေတံခွန်လေးဟာ....ဘဝအခက်အခဲတွေကို အေးအေးချမ်းချမ်းနဲ့ ရင်ဆိုင်ဖြေရှင်းတတ်သူမို့ လူမသိသူမသိဘဝကိုသာသာယာယာ ဖြတ်သန်းနေရသလိုထင်ရတယ်.....။

ရေတံခွန်လေးဟာ သူ့မှာရှိတဲ့စိတ်ကူးယဉ်မှုတွေကို စီးဆင်းစေတဲ့ စမ်းချောင်းလေးတစ်ခု ပိုင်ဆိုင်ထားတယ်...။ သူ့ရဲ့စိတ်ကူးလေးထဲမှာ နှင်းဆီပန်းပွင့်လေးတွေပါမယ်.... ချယ်ရီပန်းပွင့်လေးတွေပါမယ်... ညအလှကိုဖြည့်ဆည်းပေးတဲ့ လင်းလက်တောက်ပတဲ့ ကြယ်ပွင့်ကလေးတွေပါမယ်.... လိပ်ပြာကလေးတွေပါမယ် ငှက်ကလေးတွေပါမယ်.....မြက်ခင်းပြင်စိမ်းစိမ်းတွေပါမယ်....။ ပြီးတော့ ညဝတ်ရုံလွှာနဲ့ သိပ်လှတဲ့ နတ်သမီးတစ်ပါးလည်း ရှိသေးတယ်တဲ့......။

သူ့ဘဝအမောတွေပြေစေဖို့ သူ့ရဲ့ စမ်းချောင်းထဲမှာ သူနေ့စဉ်ကူးခတ်အနားယူရတယ်.......။ ဟုတ်တယ်လေ ရေတံခွန်ဆိုတာ ဟိုးးးအမြင့်ကနေစီးကျလာပြီးရင်.......နောက်ဆုံးတော့ ဒီစမ်းအိုင်ထဲ စီးဆင်းလာသမျှ ခရီးပန်းလာသမျှ အမောဖြေရတာပဲမဟုတ်လား........။

မိုးငွေ့