သီးစုံဝက်သားကုန်းဘောင်ကြော်.....

 

ကုန်းဘောင်ကြီးကြော်ဆို မစားဖူးတဲ့သူမရှိသလောက်ပါ...။ တရုတ်ဟင်းထဲမှာ သူက နာမည်ရပြီးသား ဟင်းအမယ်တစ်မျိုးမဟုတ်လား...။ ကုန်းဘောင်ကြော်နည်းအခြေခံက ဒါဒါပဲဆိုပေမယ့်ပေမယ့် ကိုယ့်ကြော်နည်းလေးကို ပြန်မျှဝေချင်တာကြောင့်ရယ်ပါ။

ဝက်သားကုန်းဘောင်ကြော်အတွက် ကိုယ်ထည့်မယ့် အမယ်လေးတွေကိုပြောပြမယ်...။

၁) ၀က်သား 200g (တစ်လက်မအရွယ်ပါးပါးလှီးထားတဲ့ မိုးခိုသား/ကျောကုန်းသား)
၂) ကြက်သွန်နီကြီးတစ်ဥ+ဖြူနှစ်မွှာ+ဂျင်းလက်တစ်ဆစ်
၃) ငရုတ်နီ ငါးတောင့်
၎) ချယ်ရီခရမ်းချဉ်သီး 12လုံး
၅) မုန်လာဥနီ 1/2လုံး
၆) ခရမ်းချဉ်သီးတစ်လုံး
၇) ငရုတ်ပွနှစ်လုံး
၈) ပဲငံပြာရည်အနှောက် 1 tbsp
၉) ပဲဆီ(သို့)နေကြာဆီ ဟင်းခတ်ဇွန်းကြီးတစ်ဇွန်းခွဲ


အသားနှပ်မည့် ဟင်းခတ်တွေက
(အသားထဲကို အောက်က ဟင်းခတ်တွေအကုန်ထည့်ပြီး ဆယ်မိနစ်လောက်နှပ်ထားပါ)
၁) ပဲငံပြာရည်အကြည် 1tbsp
၂) ပဲငံပြညရည်အနှောက် 1tbsp
၃) ဟင်းခတ်မှုန့် 2 tsp
၎) ငရုတ်ကောင်းအမဲမှုန့် 2 tsp
၅) ပြောင်းမှုန့် 2 tsp
၆) ဆန်ဝိုင် 2 tbsp
၇) သကြား 2 tsp
၈)နှမ်းဆီ သုံးစက်(အားလုံးကိုရောမွှေပြီးမှ နှမ်းဆီကိုနောက်ဆုံးမှထည့်မယ်)

ပုံမှန်ကြော်နည်း (သို့) မူလကြော်နည်းမှာတော့ ဂျင်း ကြက်သွန်နီ ဖြူတွေကို အရင်ကြော်ပြီး ပန်းကန်ထဲပြန်ဖယ်ထားတတ်ကြတယ်...။ ကိုယ်ကြော်မယ့်နည်းကတော့ အဲဒါနဲ့ပြောင်းပြန်...။ ဆီပူဒယ်ထဲကို အရင်ဦးဆုံး အစောင်းလေးတွေလှီးထားတဲ့ ကြက်သွန်ပင်အရင်းလေးကို ဆီသတ်တယ် နှစ်ချက်လောက်မွှေပြီးတာနဲ့ ဂျင်းချောင်းလေးတွေဆက်ထည့် ခရမ်းချဉ်သီး ထည့်ကြော်တယ်။

ခရမ်းချဉ်သီးနဲနဲနွမ်းလာတာနဲ့ နှပ်ထားတဲ့ ၀က်သားထည့်ကြော်ပါမယ်..။ သြော်တစ်ခုပြောဖို့မေ့သွားတယ် သိပြီးသားလဲဖြစ်ကြမှာပါ..။ ခုလို Stir Fry လို့ခေါ်တဲ့အကြော်တွေမှာ အသားကို အမြန်နူးလွယ်တဲ့အသားမျိုးကိုသုံးဖို့လိုပါတယ်..။ ဥပမာ ၀က်သားဆို မိုခိုသား ကျောကုန်းသား မဟုတ်ရင် နံရိုးနားက ခွာထားတဲ့ ခွာသွားတွေကို သုံးရင်ပိုကောင်းတယ် မဟုတ်ဘဲ ပေါင်သားတို့ဘာတို့နဲ့ကြော်မိရင် အသားမနူးဘဲ မာဆတ်ဆတ်နဲ့စားမကောင်းတတ်ပါဘူး။ ကြက်သားဆိုလည်း ရင်အုံသားဆို ပိုကောင်းတယ်။ 

အိုခေ... အသားထည့်ပြီးရင် ဆက်တိုက်သာမွှေပေးနေ... အရောင်လိုရင် ပဲငံပြာရည်အနှောက်ထပ်ထည့်ပြီး အသားလေးမွှေးပြီးနူးအိလာခါနီးပြီဆို ကျန်တဲ့အသီးအရွက်တွေဖြစ်တဲ့ ကြက်သွန်နီလေးစိပ်စိပ်နဲ့ ဓါးပြားရိုက်ကြက်သွန်ဖြူရယ် ငရုတ်နီနဲ့ ဥနီကိုထည့်ကြော် တစ်မိနစ်လောကမွှေကြော်ပြီးရင် ငရုတ်ပွစိမ်း ဆက်ထည့်ပြီး ကြော်လိုက်ရုံပဲ....။ ငရုတ်ကောင်းနဲ့ နှမ်းဆီနံ့မွှေးပျံ့နေတဲ့ ဆန်ဝိုင်ကြောင့်နူးညံ့နေတဲ့ ၀က်သားကုန်းဘောင်ကြော်တစ်ပွဲရပါပြီ...။ သူ့အဆီလေးကို ထမင်းပူပူမှာနယ်ပြီးစားရင် သိပ်ကောင်းတယ်။

မိုးငွေ့