ချစ်သူရဲ့မြို့.....

အဲဒီတုန်းက မြူတွေမှုန်ဝါးဝါးနဲ့ ညနေခင်းလေးမှာ ဘုရားဖူးရင်း အဲဒီဘုရားရှေ့က အုတ်ခုံတန်းလေးမှာ ထိုင်ခဲ့ဖူးတယ်.......။ မီးခိုးရောင်မှိန်မှိန်အောက်ကမြို့ကလေးကို ငေးကြည့်ခဲ့မိတယ်....။ နာရီစင်ကိုငေးကြည့်ခဲ့မိတယ်...။ လမ်းမပေါ်မှာ ဆိုင်ကယ်တွေနဲ့ရှုပ်ရှက်ခတ်နေတာကို ငေးကြည့်ခဲ့မိတယ်...။ ခဏလေးပါပဲ....။ ဘယ်လိုထင်ခဲ့မလဲနော်....။ အဲဒီမြို့ကလေးက လူငယ်လေးတစ်ယောက်နဲ့ ဆုံတွေ့ပတ်သက်လိမ့်မယ်လို့....။

ညနေဆည်းဆာချိန်လေးရဲ့ မြင်ကွင်းက လွမ်းဆွေးချင်စရာလေးပါ....။

အဝေးပြေးလမ်းကလဲ မီးခိုးရောင် လမ်းတလျှောက်တွေ့ရတဲ့ အပင်တွေကအစ ညနေအရောင်လေးကြောင့်မီးခိုးရောင်ခပ်ရင့်ရင့်တွေဖြစ်ကုန်တယ်....။

မြန်မာပြည်ရဲ့ အထင်ကရမြစ်တစ်စင်းကိုဖြတ်ကျော်ပြီးမှ ရောက်တဲ့မြို့ကလေး....။

မြို့ကလေးက သေးငယ်ပေမယ့် လူတွေစည်ကားလို့ အသီးအနှံတွေလည်းပေါတယ်ပြောတယ်....။ ခရီးသွားဟန်လွှဲ ခဏလေးပဲဖြတ်သွားရတာမို့ မြို့ကလေးကို နှံ့နံှ့စပ်စပ်မလေ့လာခဲ့ရဘူး......။ မြို့ကလေးရဲ့ အဓိကစီးပွားရေးက စိုက်ပျိုးရေးလို့တော့ အကြမ်းမျဉ်းသိရတယ်...။ ဒါဖြင့် သူကြိုက်တတ်တဲ့ ပန်းကလေးတွေကောစိုက်ကြသလား.......။ ဒီဒေသမှာ ဘာပန်းတွေထွက်သလဲ သိချင်မိတယ်။

စိတ်ကူးထဲမှာတော့ တောင်စောင်းအနိမ့်အမြင့်လေးတွေမှာ ရောင်စုံပန်းခင်းလေးတွေကိုမြင်မိတယ်...။ ဒါပေမယ့် ရှမ်းပြည်လိုအေးတဲ့ နေရာမျိုးမှာပဲ ဒီလိုမြင်ကွင်းမျိုးရှိမယ်ထင်တယ်...။ ဒီမြို့ကလေးရဲ့ ရာသီဥတုက နဲနဲ ပူအိုက်စွတ်စိုတဲ့ အထဲပါလိမ့်မယ်ထင်တယ် မိုးလေဝသ သတင်းထဲမှာ အပူချိန်တွေကိုကြည့်ရသလောက်ပေါ့..။

ချစ်သူကို လွမ်းလို့ ခဏကလေးရောက်ခဲ့ဖူးတဲ့ ချစ်သူရဲ့မြို့ကို ပြန်မှန်းဆကြည့်မိတာပါ.....။

မြို့ကလေးအကြောင်းကို သေသေချာချာမသိပေမယ့် အလင်းရောင်အောက်မှာလဲ သိပ်လှတဲ့မြို့ကလေးတစ်မြို့ဖြစ်လိမ့်မယ်လို့ထင်ပါတယ်.....။

မိုးငွေ့