လိပ်ပြာဒိုင်ယာရီ.....(တွေ့ဆုံခွင့်)

 

အချိန်အတိုင်းတာတစ်ခုအထိ အွန်လိုင်းမှာ ကျွန်မတို့စကားပြောဖြစ်ခဲ့ကြပေမယ့် သူနဲ့အပြင်မှာ တစ်ခါမှလူချင်းမဆုံကြရသေးဘူး....။ အဲဒီနေ့က သူကွန်ပြူတာပြင်ဆိုင်တစ်ခုကနေ ကျွန်မကို အကူညီလှမ်းတောင်းလို့ သွားတွေ့ရင်းက ကျွန်မတို့နှစ်ယောက်ရဲ့ ပထမဆုံး တွေ့ဆုံမှု စတင်ခဲ့တာပဲဖြစ်တယ်...။ 

သူ့ Laptop လေးပြင်ထားတာ ပြန်ရွေးတော့ တာဝန်ရှိဝန်ထမ်းနဲ့သူ နားလည်မှုလွဲ စကားမပေါက်ကြတာကို ကူညီဖြေရှင်းပေးဖို့ ကျွန်မကိုခေါ်လိုက်တာ....။ နောက်တော့မှသိရတယ် သူကျွန်မကို သက်သက်တွေ့ချင်လို့ လှည့်ခေါ်ခဲ့တယ်ဆိုတာ...။ အဲညနေက ကျွန်မတို့ သူကွန်ပြူတာပြင်တဲ့လမ်းထိပ်က ကော်ဖီဆိုင်မှာထိုင်ဖြစ်ကြတယ်....။ ဆိုင်နာမည်က Black Sky တဲ့... ကျွန်မတို့နှစ်ယောက်ကို ဒီနေ့ဒီချိန်ထိကနေ သက်ဆုံးတိုင် အမှတ်ရနေစေမယ့် နေရာလေးတစ်ခုပေါ့....(ဒါပေမယ့် ဒီနေ့ထိ ကျမတို့ အဲဒီကော်ဖီဆိုင်လေးကို ပြန်မရောက်ဖြစ်ကြတော့ဘူး )...။ 

ဆံပင်ကောက်ကွေး မျက်တောင်မဲနက်တွေ ဝန်းရံထားတဲ့ ဗာဒံစေ့ပုံမျက်အိမ် မျက်ခုံးထူထူ အကြည့်စူးရှရှ ပြုံးလိုက်ရင် မျက်လုံးတွေမှေးစင်းသွားတဲ့ သွားစွယ်ဖွေးဖွေးတွေနဲ့ အသက်နှစ်ဆယ်ကျော် ကောင်လေးတစ်ယောက်....။ ရန်ကုန်ကို ဒဿနိကဗေဒနဲ့ ကဗျာစာပေလေ့လာဖို့ ရောက်လာတဲ့ ကဗျာဆရာပေါက်စတစ်ယောက်….။ ခုမှလူချင်းဆုံရတော့ ကျွန်မတို့ တရားဝင်ပြန်မိတ်ဆက်ကြတယ်...။ ကော်ဖီသောက် စကားပြောဖြစ်ကြရင်း ကျွန်မကို အရွယ်နဲ့မလိုက် အပြင်မှာပိုလှပနုပျိုတဲ့အကြောင်း သူ့ချီးမွမ်းခန်းတွေကို နားထောင်ရသေးတယ်...။  သူ့ရဲ့ စကားပြောစွမ်းရည်ကိုလည်း ခန့်မှန်းမိလိုက်တယ်...။  

ညနေအိမ်ပြန်တော့ သူကျွန်မနဲ့အတူ ဘတ်စ်လိုက်စီးတယ်...။ သူနဲ့ကျွန်မက တစ်မြို့နယ်ထဲနေတာဆိုတာတော့ အွန်လိုင်းမှာ စကားပြောကတည်းကသိထားပါတယ်…။ ကျွန်မဆင်းတဲ့မှတ်တိုင်မှာပဲ သူလိုက်ဆင်းတယ် သူငှားနေနေတဲ့ ကွန်ဒိုက အဲကားမှတ်တိုင် တစ်ဖက်လမ်းနောက်ကျောက တိုက်တစ်ခုမှာပဲ....။ ကျွန်မနေတဲ့တိုက်က သူနဲ့တစ်ရပ်ကွက်ခြားမို့လို့ သူ ကျွန်မနဲ့လမ်းလျှောက်ပြီး အိမ်ထိလိုက်ပို့တယ်...။  

အဲဒီကအစပြုပြီး သိပ်မကြာခင်မှာပဲ နှစ်ယောက်စလုံး ပတ်သက်သူရှိပြီးသားဆိုတဲ့ လိမ်လည်ဖုံးကွယ်ထားခဲ့တဲ့ လျှို့ဝှက်ချက်ကြီးပေါ်လာပြီးချိန်မှာပဲ ကိုယ်စီရဲ့ချစ်သူတွေအပေါ်ကို သစ္စာဖောက်ပြီးသားဖြစ်သွားကြတယ်...။ အဲနောက်ပိုင်း တင်းမာပေါက်ကွဲမှုတွေက ကျွန်မတို့နှစ်ယောက်ကိုဝေးကွာသွားဖို့ မစွမ်းတဲ့အပြင် ပိုပြီးနီးစပ်စွဲလန်းစေခဲ့တာဟာ... ကျွန်မတို့နှစ်ယောက်ကို နှစ်အကြာကြီး လွင့်စင်ပျောက်ကွယ်သွားစေမယ့် ဖြစ်ရပ်တစ်ခု ဖြစ်မှန်းမသိဖြစ်ခဲ့တယ်...။ နှစ်အကြာကြီးဝေးသွားကြတယ်လို့ဆိုလိုတာ အဲချိန်တုန်းက ကျွန်မတို့နှစ်ယောက်ဘယ်တော့မှ ပြန်မဆုံနိုင်ကြတော့ဘူးလို့ သတ်မှတ်လိုက်တာလဲဟုတ်သလို (ပြန်ဆုံဖြစ်မဆုံဖြစ်မသေချာပေမယ့်) ဝေးကွာပြီး ဆယ်နှစ်ပြည့်တဲ့နေ့မှာ ပြန်ဆုံဖို့လဲ ချိန်းဆိုသတ်မှတ် လိုက်ကြသေးတယ်....။  

ခုတော့.... သတ်မှတ်ချိန် ဆယ်နှစ်မပြည့်ခင် ၃နှစ်အလိုမှာ ကျွန်မတို့ပြန်ဆုံကြတယ်....။ ကံကြမ္မာရဲ့စေခိုင်းရာလို့ပြောရမလား, တွေ့ဖို့အချိန်တန်လို့လား, မမြင်နိုင်တဲ့ တစ်စုံတစ်ရာရဲ့ တွန်းအားကြောင့် တွေ့ဆုံဖို့ ဖုန်းစဆက်လိုက်တဲ့ ကျွန်မရဲ့ဆုံးဖြတ်ချက်ကြောင့်လား, သတိရမှုတွေနဲ့တွေ့ချင်တဲ့ဆန္ဒပြင်းပြလို့ ဆက်သွယ်ရမယ့်ဖုန်းနံပါတ်ပေးလာခဲ့တဲ့ သူ့ကြောင့်လား, ဘယ်လိုအကြောင်းကြောင့်ဖြစ်စေ ကျွန်မတို့နှစ်ယောက် ခုနှစ်နှစ်တာလုံး သိမ်းဆည်းမျိုသိပ်ထားခဲ့တဲ့ သတိရလွမ်းဆွတ်မှုတွေ သိုသိပ်ထားခဲ့ရတဲ့ ခံစားမှုတွေကို ဖြေချဖွင့်ထုတ်ဖို့ အချိန်ရောက်လာတာပဲဖြစ်တယ်....။  

"စကားတစ်ခွန်း အဖြစ်ပျက်တစ်ခုကြောင့် ကမ္ဘာပေါ်ကချစ်သူစုံတွဲပေါင်းများစွာ ဝေးသွားကြပြီးပြီ ကိုယ်တို့လည်း အဲထဲပါသွားလိမ့်မယ်"လို့ နောက်ပိုင်း ကျွန်မတို့ စကားပြောအဆင်မပြေရင် သူနောက်ဆုံး ထုတ်သုံးတတ်တဲ့လက်နက်တစ်ခုပေါ့....။ 

"ကိုယ့်ကို "ချစ်တယ်" လို့ အဖြေပြန်ပေးဖို့ ခုနှစ်နှစ်တောင်အချိန်ယူလိုက်ရတာလား" 

"ချစ်တယ်လို့ ပြန်ပြောဖို့ ခုနှစ်နှစ်ကျော်လုံး တစ်ယောက်ထဲမြိုသိပ်သိမ်းဆည်းထားရတာ ဘယ်သူမှမသိဘူးလေ ဘယ်လောက်ပင်ပန်းရလဲ"

"Roller Coaster စီးရတာ အမြင့်ဆုံးကနေ အောက်ပြန်ကျတဲ့အရှိန် အကွေ့အကောက် အနိမ့်အမြင့်တွေနဲ့ သဲထိတ်ရင်ဖိုတွေများလိုက်တာ ကြမ်းတမ်းလိုက်တာလမ်းက... ခုတော့ ရောင်စုံမြင်းရုပ် 🎠လေးတွေပေါ်ကိုပဲ ငြိမ့်ငြိမ့်ညောင်းညောင်း ထိုင်စီးချင်တော့တယ်"

"Roller Coaster? အဲစကားလုံးကို ကိုယ်ခုထိမရင်းနီးသေးဘူး"လို့ သူမရွံမရဲပြောလာလို့ ကျွန်မပြုံးမိသွားသေးတယ်...။

"Roller Coaster = ရင်ခုန်စိတ်လှုပ်ရှားခြင်း  သေချာမှတ်ထားဦး "

___________________
Revolution will prevail
မိုးငွေ့

မြူမှုန်ဝေ.....

 

မြူတွေဝိုးဝါး နေခြည်ပါးပါးနဲ့ ဆောင်းပီတဲ့ မနက်ခင်းတစ်ခုကို ဒီဇင်ဘာမှာတွေ့ရတယ်.....။

ဟိုးခေတ်က မြန်မာသီချင်းတစ်ပုဒ်ကို သွားအမှတ်ရမိတယ် "ဆောင်းအမီ" ဆိုတဲ့ သီချင်းလေး....။ ငယ်စဉ်တုန်းက ကက်ဆက်တို့ ရေဒီယိုတို့ကို နားထောင်ခဲ့ရတဲ့ခေတ်က မနက်ခင်း မေမေ ဟင်းချက်ရင် မြန်မာသံရေဒီယိုဖွင့်ဖွင့်ထားတတ်တယ်....။ အဲဒီတုန်းက ဆောင်းအမီကို နားထောင်ဖူးခဲ့မယ်ထင်တယ် သေချာမမှတ်မိတော့ဘူး.....။ မူရင်းအဆိုတော် မေလှမြိုင် ပြီးတော့ လက်ဆင့်ကမ်းပြီး ခင်ညွန့်ရီ ဟေမာနေဝင်း စိုးစန္ဒာထွန်း စသဖြင့် ပြန်လည်သီဆိုခဲ့ကြတယ်....။ 

အေးမြတဲ့ရာသီမှာ လူငွေ့က ပိုနွေးလို့ အဝေးရပ်ရောက်နေသူ ချစ်သူ အိမ်ထောင်ဖက်တွေကို မျှော်ရ တမ်းတရတဲ့ ဖွင့်ဆိုချက် မြန်မာသံသီချင်းတစ်ပုဒ်....။ 

ချစ်သူတစ်ယောက်ရဲ့ ရင်ခွင်ဟာ ဘယ်လောက်နွေးထွေးလဲဆိုတာ သိဖို့ မကြိုးစားချင်တော့ဘူး....။  

"မြူက ကိုယ့်ကိုယ်ကိုဆီကနေ အမြဲထွက်ပြေးနေတဲ့ မိန်းကလေး တစ်ယောက်ပဲ" လို့ သူခဏခဏ မှတ်ချက်ချတာကို ပြန်ကြားယောင်မိတယ်.....။

တကယ်တော့ ဘောင်ခတ်တာကို မကြိုက်ဘူးပြောပြီး အကြိမ်ကြိမ်ကိုယ့်ကိုယ်ကို ဘောင်ခတ်ထားမိနေသူက  မြူမှုန်ဝေ......

မြူ့ကို မေမေက ဆောင်းရာသီမှာမွေးခဲ့တာမဟုတ်ဘဲ နွေဦးရာသီ မြူတွေဆိုင်း မှိုင်းဝေနေတဲ့ မနက်ခင်းမှာမွေးခဲ့လို့ မြူမှုန်ဝေလို့ နာမည်မှည့်တွင်ပေးခဲ့တယ်...။ 

ဒီနေ့ မြူ့ဆီကို သူရောက်လာရမယ့်နေ့ပဲ......။ အိမ်အပြင်ဖက် မြက်ခင်းပြင်ပေါ်  စားပွဲတစ်လုံး ခုံနှစ်လုံးနဲ့ စားပွဲခင်းအဖြူရောင်ပေါ်မှာ ကော်ဖီထည့်ထားတဲ့ ကြွေအိုးနဲ့ ကော်ဖီပန်းကန်နှစ်စုံ.....။ မနီးမဝေးက  မြူတွေရစ်သိုင်းနေတဲ့ ထင်းရှူးပင်ချွန်ချွန်တွေက စီစီရီရီလှလှပပ....။  ခြံစည်းရိုးနားမှာ လူတစ်ယောက်ရပ်နေတယ်....။ တော်တော်လှမ်းနေပေမယ့်   အရပ်ရှည်ကိုင်းတဲ့ ပုံနဲ့ ဟန်ပန်တွေက သူဆိုတာ သိသာထင်ရှားစေတယ်....။ အဖြူရောင် သစ်သားဝင်းခြံတံခါးကို သူတွန်းဖွင့်ဝင်လာရင်း  မြူ့ကို လက်ဝှေ့ရမ်းပြ နှုတ်ဆက်လိုက်တယ်...။  ဂျင်းဘောင်ဘီအပြာဖျော့နဲ့ အနက်ရောင်သိုးမွှေးခေါင်းစွပ် ဆွယ်တာ အနွေးထည်လေး ဝတ်ထားတယ်....။ 

သူအနားရောက်လာတော့  ခါတိုင်းလိုပဲ မြူ့ကို သူပွေ့ဖက်နှုတ်ဆက်တယ်....။ သူ့ ကိုယ်ငွေ့က အရင်လို နွေးထွေးဆဲလို့ ခံစားရတယ်....။ သူဆွတ်ထားတဲ့ ပရုတ်နံ့ပါတဲ့ ရေမွှေးကလဲ မြူ့ကို ရင်ခုန်လှုပ်ရှား လန်းဆန်းသွားစေခဲ့တယ်....။

"မြူက လွန်ခဲ့တဲ့ ဆယ်နှစ်ကနဲ့ ဘာမှသိပ်မပြောင်းလဲသွားဘူး လှနေတုန်း" လို့ သူက အနီညိုရောင်ဆိုးထားတဲ့ မြူ့နှုတ်ခမ်းကို ကြည့်ပြီးပြောတယ်....။ ပြီးတော့ မဲနက်ကော့ပျံနေတဲ့မျက်တောင်တွေနဲ့ ဝန်းရံထားတဲ့ မျက်ဝန်းတစ်စုံကို သူစိုက်ကြည့်တယ်....။

" ကော်ဖီသောက်ကြမယ်လေ ပူနေတုန်းလေး.... အချိန်အကြာကြီး ဝေးသွားခဲ့တာ အခု ကော်ဖီခါးခါး သောက်တတ်နေပြီလား" လို့ မြူမေးတော့ သူက သွားစွယ်တွေပေါ်အောင် ပြုံးပြီး....

"မြူပြောလဲ ကိုယ်ခံရမှာပဲ ဆယ်နှစ်လုံးလုံးကျင့်ခဲ့ပေမယ့် ခုထိမအောင်မြင်သေးဘူးလေ...."လို့ပြောပြီး သူ့ဘာသာသူ သဘောကျနေတယ်...။

မြူတစ်ချက်ပြုံးလိုက်ရင်း သူ့ကော်ဖီခွက်ထဲ သကြားညိုနှစ်ခဲသုံးခဲလောက်ထည့်ပေးလိုက်တယ်....။ အငွေ့ထောင်းထောင်းထဆဲ ကော်ဖီအနက်ရောင်ရည်တွေကို သူ့ရှေ့မှာရှိတဲ့  နှင်းဆီပန်းခက်လေးတွေနဲ့ဒီဇိုင်းဖော်ထားတဲ့ အဖြူရောင်ကြွေခွက်ထဲ ငှဲ့ထည့်ပေးလိုက်တယ်....။ အဲချိန်မှာပဲ အသက်၅၀ ကျော်ဝန်းကျင် တိုင်းရင်းသားအမျိုးသားကြီးတစ်ယောက်က တိုဟူးနွေးနဲ့ ရှမ်းခေါက်ဆွဲထည့်ထားတဲ့..... စားစရာဗန်းတစ်ခုလာချတယ်....။  မြူသူ့ရှေ့ကို ရှမ်းခေါက်ဆွဲပန်းကန်ကမ်းပေးလိုက်တယ်....။

"နှစ်တွေကြာသွားပေမယ့် အကြိုက်တွေမပြောင်းသေးဘူးပဲ....." လို့သူပြောပြီး "တိုဟူးနွေးလေ" လို့ဆက်ပြောတယ်....။

"ဟုတ်တယ် အကြိုက်တွေ ခုထိမပြောင်းသေးဘူး...." လို့မြူသူ့ကို သေသေချာချာကြည့်ပြီး ပြန်ပြောတော့ သူက ကော်ဖီငုံ့သောက်နေရင်း လှမ်းကြည့်တယ်....။ မြူအဲလို နှုတ်ခမ်းစေ့ပြီး မျက်နှာတည်တည်နဲ့ပုံကို သူသိပ်သဘောကျတာ...။

"မြူ ကိုယ်နဲ့ ဘယ်တော့မှ အတူလိုက်မနေတော့ဘူးလား..." သူက ခုထိ ဘာမှမစားသေးဘဲ သိချင်တာတွေ မေးနေတယ်...။

"ခေါက်ဆွဲအရင်စားလိုက်ဦးလေ အေးပြီးထွေးကုန်လိမ့်မယ်..." လို့ မြူစကားလမ်းလွှဲရင်း သူ့ခေါက်ဆွဲပန်းကန်ကို တူနဲ့ မွှေပေးလိုက်တယ်....။

"ကိုယ်တို့ ဆယ်နှစ်လောက်အချိန်ယူလာခဲ့တာ အချိန်ဖြုန်းလာခဲ့ကြတဲ့ ရလဒ်က ဘာမှမဟုတ်ဘူးလား...."

တိုဟူးနွေးစားရင်း မြူသူ့ကို စကားဆက်မပြောဖို့ လက်ကာပြလိုက်တော့ သူ သောက်လက်စ ကော်ဖီခွက်ကို ပြန်ချပြီး အိတ်ထဲပါလာတဲ့ စီးကရက်ကို မီးညှိလိုက်တယ်.....။ 

"ခုချိန်ထိ ဘာမှမပြောင်းလဲသေးဘူးပဲ ဇွတ်တရွတ်လုပ်တာတွေ စိတ်လောကြီးတာတွေ စည်းကမ်းမရှိတာတွေ ဒါတွေဘာတစ်ခုမှမပြောင်းလဲသေးဘူးပဲ...." လို့ မြူလေသံအေးလေးနဲ့ မှတ်ချက်ချလိုက်တယ်....။ တကယ်ဆို အကြာကြီးကွဲကွာနေတဲ့ သူနှစ်ယောက်ရဲ့ ပြန်လည်ဆုံတွေ့ပုံလေးက အေးချမ်းကြည်နူးမှုတွေနဲ့ရှိနေရမှာမဟုတ်လား....။

သူက မြူ့ကို တစ်ချက်လှမ်းကြည့်ပြီး စီးကရင်မီးခိုးတွေကို အရှည်ကြီး မှုတ်ထုတ်လိုက်တယ်.....။ သူ့မျက်လုံးတွေမှာ မကျေနပ်ချက်တွေက ထင်းခနဲ....။ မြူတို့ ပြန်ဆုံကြတယ်ဆိုတာ မြူတို့နှစ်ယောက် ပြန်ပေါင်းစည်းဖို့လို့ သူဘာလို့ထင်ထားတာလဲ....။ ဒီတစ်ခါပြန်ဆုံခွင့်ဟာ တစ်သက်တာထာဝရ ဝေးကွာရဖို့လဲ ဖြစ်နိုင်တာပဲ....။

"မြူဘာတွေတွေးနေလဲ ဘာတွေလုပ်နေလဲဆိုတာ ကိုယ်တော့ နားမလည်နိုင်တော့ဘူး.... ကိုယ်သိတာ မြူ့ကို ကိုယ်ချစ်တယ် မြူနဲ့နှစ်ယောက်အတူနေချင်တယ် ဒီလောက်ပဲ .........."

ရာသီဥတုအေးအေးနဲ့ သူရှေ့က ရှမ်းခေါက်ဆွဲက အေးခဲကုန်ပြီ သူကတော့ မြူ့ကို အားမလိုအားမရဖြစ်ပြီး ရင်ပူနေပုံရတယ်....။ 

"တစ်ယောက်ထဲထင်ရာပြော တစ်ယောက်ထဲဆုံးဖြတ်ချက်တွေချနေတာ ခုထိဘာမှမပြောရသေးဘူးနော် ဘာလို့ စိတ်တွေလောတကြီးဖြစ်နေတာလဲ....."

သူပူလောင်နေသလောက်  မြူကတော့ နာမည်နဲ့လိုက်အောင် တည်ငြိမ်အေးစက် မထုံတက်သေးနဲ့ သူ မြူ့ပခုံးကို ဆွဲလှုပ်ရမ်းပစ်ချင်စိတ်ပေါက်သွားခဲ့တယ်....။

"ကိုယ်ကတော့ ဆယ်နှစ်ပြည့်လို့ ပြန်ဆုံတဲ့အခါ ပျော်စရာကောင်းမယ်လို့ ထင်ထားခဲ့တာ ကိုယ်တို့နှစ်ယောက်အတူ မလုပ်ဖူး မသွားဖူးတဲ့နေရာတွေ သွားကြမယ်လို့ စိတ်ကူးထားတာ..." သူ ပေါက်ကွဲလွင့်စင်ပြတော့  မြူက သူစွဲလန်းတဲ့ အပြုံးမျိုးနဲ့ သူ့ကို ညှို့ငင်တယ်....။ 

"ပြောပါဦး.......... ဘာတွေလုပ်ပြီး ဘယ်တွေသွားမယ်စိတ်ကူးထားခဲ့လဲ...." တဲ့.... မြူ့အသံတွေက နှင်းတွေလိုပဲ အေးစက်စက်နဲ့ ရယ်သံလေးဆွတ်ပြီး အရှေ့ပိုင်းကလိုမဟုတ်ဘဲ ခပ်ချွဲချွဲလေသံမျိုး သူသဘောကျတဲ့ စကားပြောသံမျိုးကြောင့် စောစောက ပူလောင်နေတာတွေ ချက်ချင်းအရည်ပျော်ဆင်းကျသွားရ....။ အဲလို ခံစားမှုပေါင်းစုံရောစပ်ထားတဲ့ လေသံမျိုးနဲ့ ပြောတတ်တာလဲ မြူပဲရှိ....။

"မြူနဲ့ရုပ်ရှင်အတူကြည့်မယ် ညသန်းခေါင်ရောင်းတဲ့ ထမင်းကြော်သွားစားကြမယ် လက်ဖက်ရည်ဆိုင်ထိုင်မယ် ကိုယ်တွေ့ထားတဲ့ တစ်ဆိုင်လုံးအဖြူရောင်တွေနဲ့အလှဆင်ထားတဲ့ ကော်ဖီဆိုင်ကိုလည်းသွားထိုင်မယ် မြူကြိုက်တဲ့ ပင်လယ်ကမ်းခြေကိုသွားကြမယ် မြူစားချင်တာ အကုန်ကျွေးမယ် မြူရေကစားတာ ရေကူးတာကြည့်မယ် ညတစ်ညလုံးမအိပ်ဘဲ မြူ့ကို ရင်ခွင်ထဲသိပ်ထားပြီး မြူအိပ်ပျော်နေတာကို ကြည့်ချင်တယ်....ပြီးတော့ မြူ့ပါးပြင်ကို ခပ်ဖွဖွနမ်းမယ်.... ဒီလောက်ပါပဲ...."

မြူကသူပြောနေတာကို ခပ်အေးအေးနားထောင်ရင်း စားပြီးသားပန်းကန်နဲ့ သူမစားရသေးတဲ့ ခေါက်ဆွဲပန်းကန်တွေကို ဗန်းထဲကောက်သိမ်းနေတယ်.....။ 

"အဲဒီလို လုပ်ကြတာပေါ့.... ထမင်းကြော်နဲ့ကြက်ဥကြော်စားမလား သွားကြော်ပေးမယ်..."

"စားမယ် ခုနက မင်းနဲ့ဒေါသထွက်လိုက်ရတာ ခုဗိုက်ဆာပြီ ခေါက်ဆွဲတွေကလဲ စားလို့မရတော့ဘူး...."

"သင်ခန်းစာယူလေ စိတ်လောပြီးဒေါသထွက်တော့ အစာပါငတ် စိတ်အေးအေးထားတဲ့သူက ဗိုက်ပြည့်သွားပြီ တွေ့လား...."

မြူက ခေါက်ဆွဲပန်းကန်ဗန်းကိုလက်တစ်ဖက်က ကိုင်ရင်း သူ့ဘေးနားမှာလာရပ်ပြီး သူ့ဆံပင်တွေကို ဖွပြီးပြောလိုက်တော့ သူသဘောကျစွာ အသံထွက်ရယ်မောလိုက်တယ်....။ သူ့ဘဝမှာ သူ့ကို ခုပဲစိတ်ဆိုးအောင် ခုပဲပျော်အောင်လုပ်နိုင်တာ မြူတစ်ယောက်ထဲရှိတယ်....။

"မြူက အမြဲတမ်း လွတ်လပ်စွာပြေးနေရတာကိုကြိုက်ခဲ့တယ်မဟုတ်လား ဘာလို့အခုရပ်နေရတာလဲ" ... လို့ သူစိတ်ထဲတွေးလိုက်မိတယ် ...။

"အရာရာဟာ တချိန်ချိန်မှာရပ်တန့်ရမယ်ဆိုတာ သိသွားတဲ့အခါ အမြဲတမ်းဆိုတာလည်း အမြဲတမ်းမရှိဘူး....   အဲဒါ ဘယ်တော့မှ မမေ့နဲ့ " သူ့အတွေးကို ကြားလိုက်သလို မြူပြောလိုက်တယ် ပြီးတော့ သူ့အတွက် ထမင်းကြော်ပေးဖို့ အိမ်ထဲ ပြန်ဝင်သွားတယ်...။

နေခြည်နုတွေ တဖြေးဖြေးဖြာကျလာတဲ့အခါ မြူငွေ့တွေ ဟာ ပါးလျားလွင့်ပြယ်ကုန်တယ်.......။ မြူက မြူခိုးငွေ့တွေဆိုရင် သူက နေရောင်ခြည်အလင်းတန်းတစ်ခု ဘယ်လိုမှပေါင်းစပ်လို့မရဘူးဆိုတဲ့အဓိပ္ပါယ်ပဲ.....။  မြူရှိနေရင် နေရောင်ခြည်ရှိလို့မဖြစ်ဘူး နေရောင်ရောက်လာရင်လဲ မြူမှုန်တွေက ပျောက်ကွယ်သွားရစမြဲမဟုတ်လား.....။ အဲလိုပဲ "မြူမှုန်ဝေ" နဲ့ "လင်းရောင်နီ" ဘယ်လိုမှပေါင်းဆုံလို့မရတဲ့ သူတွေအဖြစ် နားလည်ထားတယ်...။ 

  

သူ့ကို လိပ်ပြာဖမ်းသူလို့ အမြဲတမ်းယိုးစွပ်ခဲ့ဖူးတာ ခုတော့ သူက မြူ့လက်ဖဝါးထဲမှာ 
ဘယ်ဆီကိုမှ မပျံသန်းချင်တော့တဲ့ အဝါရောင်လိပ်ပြာတစ်ကောင်ဖြစ်လို့....

__________________
Revolution will prevail
မိုးငွေ့

မမ.....

ဆရာမြသန်းတင့်ရဲ့ "မမ" ဆိုတဲ့ စာအုပ်ကို ကျနော် 2024 နှစ်ထဲမှာ ဖတ်ဖြစ်ခဲ့တာပါ...။ အရင်ချိန်တွေထက်  စာဖတ်အားတွေကျသွားတာသိတယ်...။ 2024 တစ်နှစ်လုံးက ဝေလေလေပဲ ဘာမှမလုပ်ဖြစ် စာအုပ်တွေလည်း ဘာမှသေသေချာချာရေရေရာရာကိုမဖတ်ဖြစ်တာ...။ ခုနှစ်ပိုင်းဆို စာအုပ်လေးတစ်အုပ်တောင် မဝယ်ဖြစ်သေးဘူးလားလို့....။ ဆိုတော့ ဒီစာအုပ်လေးဖတ်လို့ ဖြစ်ပေါ်လာတဲ့ ခံစားမှုတချို့ပဲပြောပြချင်တာပါ...။ ထုံးစံအတိုင်း ကျနော် ဘယ်စာရေးဆရာကြီးတွေရဲ့ စာအုပ်ကိုတော်ရုံတန်ရုံ Review လည်းမရေးပါဘူး...။ ဆရာကြီးတွေရေးခဲ့တဲ့စာတွေကိုဖတ်ပြီး ရလာတဲ့ခံစားမှုရသနဲ့ အတွေးတွေကိုပဲ ရေးဖြစ်တာများပါတယ်...။ 

မမကဘယ်လိုလူမျိုးလည်းဆိုတော့ တည်ငြိမ်တဲ့အသက်အရွယ်ရောက်နေပေမယ့် စိတ်ကိုအလိုလိုက်မိတဲ့ အတွက်ကြောင့် အမှားတစ်ခုကျူးလွန်မိသွားတာ...။ အဲအမှားတစ်ခုကြောင့်လည်း သူ့ဘဝတစ်ခုလုံး ဖြည်ရခက်အောင် ရှုပ်ထွေးသွားခဲ့ရတာ...။ ပြီးတော့ မမအဲလိုဖြစ်သွားရတဲ့အကြောင်းအရင်းက ငယ်ရွယ်တဲ့အချိန်ကို ပြည့်ပြည့်ဝဝ အသုံးမချလိုက်ရဘဲ အသက်တော်တော်ကွာတဲ့ ယောကျာ်းတစ်ယောက်နဲ့ အိမ်ထောင်ပြုခဲ့လို့လည်းပါတယ်...။ အိမ်ထောင်ရေးတစ်ခုမှာ ဘာတွေလိုအပ်တယ် ဘာတွေလစ်ဟာနေလဲ ဘယ်လိုတွေစိတ်ထားပြီး နေထိုင်ကျင့်ကြံရမလဲဆိုတဲ့ ကွက်လပ်တွေကို ထင်သာမြင်သာအောင်ရေးပြသွားတာ...။

အဓိကက လူတစ်ယောက် ကိုယ့်စိတ်ကို control လုပ်နိုင်ဖို့က တော်တော်အရေးကြီးတယ် မဟုတ်ရင် ဘယ်အရွယ်မှာမဆို အဲစိတ်အလိုလိုက်မှုနဲ့ပဲ နွံနစ်သူတွေနစ်ရတယ်... ဘဝတွေ ပျက်စီးဆုံးရှုံးသွားရတဲ့အထိ ဖြစ်ရတယ်လို့  "မမ"ကနေ သင်ခန်းစာရခဲ့တာလေးတွေပါ...။ အရင်ခေတ်က စာရေးဆရာကြီးတွေရဲ့ ဇာတ်အိမ်တည်တာလေးတွေ အရေးအသား စကားလုံးအသုံးအနှုန်းတွေကို ခုခေတ်စာရေးဆရာတွေ ထက်ပိုသဘောကျလို့ သူတို့ရဲ့ အရည်အချင်းနဲ့အရည်အသွေးကို ယုံကြည်လို့ သူတို့စာအုပ်တွေကို ပိုဖတ်ဖြစ်တယ်...။ အဲဖက်ခေတ်က စာရေးဆရာတွေက နိုင်ငံခြား ဝတ္ထုတွေကိုအဖတ်များတော့ သူတို့စာတွေ သူတို့အတွေးတွေက ပိုပြီးခေတ်မှီဆန်းသစ်တယ် အနှစ်သာရလည်းရှိတယ်လို့ ကျနော်မြင်မိတယ်...။

ဒီပို့စ်က မနှစ်ကတည်းက ရေးထားပြီးမတင်ဖြစ်တဲ့ပို့စ် 2024 မှာ စာဖတ်အားနည်းတယ်သာပြောတာ 2025 လည်း ဒီတိုင်းပဲ အခု 2026 နှစ်ဦးပိုင်းရောက်လာတဲ့အထိ ကျနော်ဘာတွေလုပ်နေလည်း? အမှန်ပြောရရင် ကျနော် အိမ်ပြန်ရောက်ရင် ညဖက် tiktok မှာပဲ အချိန်ဖြုန်းဖြစ်နေတယ် အစကတော့ အပျော်သဘောဆော့ပေမယ့် အချိန်ကုန်တာနဲ့တန်အောင် content creator တစ်ယောက်ဖြစ်ဖို့ ကျနော် စဉ်းစားမိတယ် ခုဆို ကျနော့် doodles ပုံလေးတွေဆွဲတာတို့ ဆွဲပြီးတဲ့ပုံလေးတွေကိုပြပြီး စကားပြောတဲ့ပို့စ်တွေ ခပ်စိပ်စိပ်တင်ဖြစ်လာတယ်...။ tiktok ကိုသဘောကျတာက ကိုယ်ပြောချင်ပြချင်တဲ့အကြောင်းအရာတွေကို အချိန် ဆယ့်ငါးစက္ကန့် သို့မဟုတ် သုံးမိနစ်လေးနဲ့ point တွေကိုပြသွားလို့ရတာကိုပဲ...။ ပြီးတော့ vd တွေရိုက်တာများပြီး အရင်ကထက် လူကြောက်တာ ကင်မရာကြောက်တာတွေလျော့လာတယ် စကားပြောစွမ်းရည်ကိုလေ့ကျင့်ပေးပြီးသားလဲဖြစ်သွားတယ်..။  တကယ်တော့ ကျနော်ဟာ ကိုယ့်သက်တမ်းရဲ့ သုံးပုံနှစ်ပုံလောက်ထိ ကျနော်တကယ်မလုပ်ချင်တဲ့အလုပ်ထဲမှာပဲအချိန်ဖြုန်းခဲ့ပြီးပြီ...။ ခုကစပြီး ငါ့ရဲ့ကိုယ်ပိုင်ဖြစ်သင့်ပြီလို့ ကျနော်ဆုံးဖြတ်ပြီး အရာအားလုံးကို neglect လုပ်သင့်တာလုပ်တယ် ပြောဖို့အချိန်တန်လာလို့ထင်တဲ့ စကားတွေကိုသိမ်းမထားဘဲ ပြောလိုက်တယ် စိတ်ထဲလုပ်ချင်လာတဲ့အရာတွေကို လုပ်ပစ်လိုက်တယ်....။ 

အဲဒါအတွက် vd editing တွေနဲ့ ကျနော် ထပ်ပြီးလေ့လာသင်ယူရမယ့် အရာတွေအများကြီးပဲ...။ ကျနော် ဒီလကုန်လောက်ဆို ကျနော့်  tiktok ရဲ့ user name ကို တရားဝင် နာမည်လေးတစ်ခုပေးလိုက်တော့မယ်လို့ရည်ရွယ်ထားတယ် အဲဒါကတော့ Mee's Diary လို့ပေးမယ်...။ အခုက ကျနော် တစ်လတစ်ခါလောက် နာမည်တွေအမျိုးမျိုးပြောင်းတာတို့ အီမိုဂျီတွေထားတာတို့လုပ်နေတာ ...။ ဘာရယ်မဟုတ် ကျနော့် content လေးတွေကို စိတ်ဝင်စားရင် လာ join ပေးပါ လာလေ့လာပါလို့ ဘလော့စာဖတ်သူတွေကို ဖိတ်ခေါ်ချင်ပါတယ်...။ ကျနော့်ကိုယ်ပိုင် hashtag ကတော့ #ဗြာဟ္မဏပြည်ကလာသည် ဖြစ်ပါတယ်ဗျ....။ ဒါမယ့် အဲ #hashtag က ကျနော်တစ်ယောက်ထဲပဲ သုံးသေးတော့ search မှာရှာလို့မရနိုင်သေးဘူးထင်တယ်...။

2026 ကစပြီး ကျနော်တင်မယ့်ပို့စ်တိုင်းရဲ့ အဆုံးသတ်လေးမှာ "မိုးငွေ့" ဆိုတာ ပြန်ထည့်ပြီနော်...:)

မိုးငွေ့

 

My Health Update.....

 Hello everyone !!!!

ဘလော့ရေးတဲ့ သက်တမ်းတစ်လျှောက်မှာ  နိဒါန်းကို ကျနော်ဒီလိုမျိုး နှုတ်ဆက်ပြီး စရေးတဲ့ပို့စ်ဆိုတာ ဆယ်ပုဒ်တောင်မရှိဘူးထင်တယ်...။ လေသံက နည်းနည်းပျော်တဲ့ mood လေးလို့ ဖတ်ရင် ခံစားမိကြတယ်မလား...။ 

ကျနော် ဟိုတစ်ခေါက်ကျန်းမာရေးစစ်ပြီး အရိုးအကျောဆရာဝန်က ကျနော့်ကို ဂုတ်ကျီးပေါင်းနဲနဲဖြစ်လို့ တစ်နေ့ကို သုံးနာရီ ကော်လာတပ်ပြီးနေခိုင်းတယ် သူတို့သင်ပေးတဲ့လေ့ကျင့်ခန်းကို သုံးကြိမ်မှန်မှန်လုပ်တာ တစ်လပြည့်တော့ ညာဘက်လက်ကျင်တာတော်တော်သက်သာသွားတယ်...။ အဓိကက ကျနော်အာရုံစိုက်ရတဲ့အလုပ်တွေလုပ်တာများသွားလို့ ရှေ့ပိုင်းမှာ ကျနော် doodles ဆွဲတာဆက်တိုက်လုပ်တာလည်းပါတယ်... ဖုန်းအကြည့်များသွားတာလည်းပါတယ်...။ အဲတစ်လုံးကျနော် ဆရာဝန်ပြောတဲ့စည်းကမ်းအတိုင်းလိုက်လုပ်တော့ လက်ကျင်တာလုံးဝနည်းပါးကိုပျောက်သွားတာ အကြောအားဆေးလည်းတစ်နေ့တစ်ကြိမ်သောက်ရတာပေါ့ ပြီးတော့ သွေးတွင်းအဆီများလို့အဆီကျဆေးလည်းသုံးလသောက်ရတယ် အရိုးအကြောဆရာနဲ့က တစ်လပြည့်ပြီးပြန်ပြတော့ ကော်လာဆက်မတပ်ခိုင်းတော့ဘူး ဆေးတော့ သုံးလဆက်သောက်ခိုင်းတယ်...။ လေ့ကျင့်ခန်းလုပ်ပေါ့ ဒီလောက်ပဲ...။ 

အဆီကျဆေးသောက်တာ သုံးလပြည့်တော့ သွေးထပ်စစ်ရတယ် အဲဒါစစ်ခါနီးမှာ ထုံးစံအတိုင်း ဘယ်ဖက်လက်ဖမိုးရောင်လို့ ဆရာ့ဆီ ဗိုက်ဘာနဲ့အကျိုးအကြောင်းပြောပြတော့ သူက သွေးစစ်လက်စနဲ့ ENA ပါထည့်စစ်ပေးဆိုလို့....။ ENA ဆိုတာ ကိုယ်ခံအားစနစ်မမှန်တာ(Autoimmune diseases) မြန်မာလိုလေးဖက်နာရောဂါကိုစစ်ဆေးတာ...။ ENA ကိုစစ်တာက လေးဖက်နာရောဂါ ဆယ်မျိုးလောက်ကို အကုန်စစ်ပစ်လိုက်တာပဲ...။ တော်သေးတယ် စစ်ထားတဲ့ဆယ်မျိုးလုံးက Negative တွေပဲပြလို့...။ သွေးထဲက အဆီကလည်း ပြန်ကျသွားပြီ ကျနော် ဒီသုံးလလုံး ဆန်လုံးညိုတစ်နေ့တစ်နှပ်စားဖြစ်တယ် အကြော်စာတွေရှောင်တယ် အဆီအဆိမ့်တွေရှောင်တယ်...။ မကောင်းတဲ့အဆီတက်ရင် နှလုံးသွေးကြောပိတ်တာ ဘာညာထပ်လိုက်လာမယ် မလွယ်ဘူး...။ အထူးသဖြင့် ကျနော်တို့နိုင်ငံမှာ နာမကျန်းဖြစ်ရင် ငွေအားတတ်နိုင်ရင်တောင် ဆေးဝါးတွေလိုသလိုမရတော့ဘူး ငွေမတတ်နိုင်ရင်လည်း သေဖို့ရက်သာထိုင်စောင့်ပေတော့ပဲ....။ အဲဒါလာပြောပြတာ ကျန်းမာရေး update လေး....။

ကျန်းမာခြင်းသည် လာဘ်တစ်ပါး ကိုယ့်ကျန်းမာရေးကို ကိုယ့်ဘာသာဂရုစိုက်ရတာပဲ ...။ blog လာဖတ်သူအားလုံးလည်း စိတ်ချမ်းသာကိုယ်ကျန်းမာရှိကြပါစေ... အားလုံးဂရုစိုက်ပါနော် :)

မိုးငွေ့

You Found Me.....

ဒီပို့စ်ကတော့ ကျနော် အရုပ်လက်ဆောင်ရထားတဲ့ အရုပ်လေးရဲ့အကြောင်း လာပြောပြချင်တာပါ...။ အရုပ်မကြိုက်တတ်တဲ့လူက တော်တော်တော့ရှားမယ်ထင်တယ် အသက်အရွယ်ကြီးကြီးငယ်ငယ်အရုပ်ကြိုက်တတ်ကြတာကျနော်တွေ့ဖူးတယ်...။ မွှေးပွအရုပ်စုတ်ဖွားတွေကိုလုံးဝမကြိုက် ကိုယ့်ကလေးတွေကိုတောင်ဝယ်ပေးမဆော့တဲ့သူလည်းတွေ့ဖူးတယ်...။ ကျနော့်ဦးလေးတစ်ယောက်ဆို အခုအသက်ခုနှစ်ဆယ်ကျော်အရွယ်အထိ အရုပ်တွေ သူကြိုက်တာတွေ့ရင်ဝယ်စုတုန်း သူ့အခန်းထဲမှာ မှန်ဗီဒိုတစ်ခုထဲ အရုပ်သေးသေးမွှားမွှားလေးတွေအများကြီးပဲထည့်ထားတာ ပြီးတော့ နိုင်ငံတစ်နိုင်ငံရောက်တိုင်း ရေခဲသေတ္တာမှာ ကပ်တဲ့ အမှတ်တရအရုပ်တွေလည်းများကြီးပဲ သူ့ရေခဲသေတ္တာဘေးဖက်ခြမ်းတစ်ခုလုံးအောက်ခြေနားထိပြည့်တော့မယ်...။ အဲဒါကိုကြည့်ခြင်းအားဖြင့်လည်း ကိုယ်ဘယ်နှစ်နိုင်ငံကိုရောက်ခဲ့ပြီးပြီဆိုတဲ့ အမှတ်အသားတစ်ခုပဲ....။ ကောင်းလိုက်တာ ကျနော်ဆို ဦးလေးအိမ်ရောက်တိုင်း အကြာကြီးအဲအရုပ်တွေကိုသွားကြည့်တာ...။

အရှေ့ပို့စ်မှာတုန်းက ကျနော် Skull Panda အရုပ်လိုချင်လို့ အွန်လိုင်းကနေ 190000/- နဲ့ ငွေလွှဲပြီးဝယ်ထားတယ်လို့ ပြောခဲ့ဖူးတယ်လေ... အဲဒါ အလိမ်ခံလိုက်ရတယ်...။ ကျနော် ငွေကြိုပေးလိုက်တာ အဲဒီပေ့ချ်က လုံးဝပိတ်သွားတယ် ...။ အဲလိုပါဆို အွန်လိုင်းမှာ ပစ္စည်းဝယ်ခဲ့ပေါင်းမနည်းတော့ဘူး အခုမှကြုံလိုက်ရတာ ကျားဖြန့်တွေ တော်တော်ဆိုးနေပြီး အခုဆို ဘာဝယ်ဝယ် COD မရရင်မဝယ်တော့ဘူး မှတ်သွားပြီ....။ လိုင်းပေါ်မှာ ဈေးရောင်းကောင်းတဲ့ပေ့ချ်ဆို လူလိမ်တွေက ပေ့ချစ်တုတွေအများကြီးပွားပြီး လုပ်စားနေကြတာလဲပွစိကျဲလို့တဲ့...။

အခုကျနော်လိုချင်တဲ့ Skull Panda အရုပ်ကို ကျနော့်အိန်ဂျယ်က သိသွားလို့ထင်တယ် လက်ဆောင်ပေးတဲ့လူပေါ်လာခဲ့တာ အဲဒါနဲ့ဗူလေးဖောက်လိုက်တော့ Sneaky Chestnut လေးပေါက်တယ်...။ တကယ်က ကျနော်လိုချင်တာ မျက်နှာမဲအရုပ်လေး or မီးခိုးပြာအရောင်လေး or ပန်းခရမ်းလေး or အနီရောင် မဟုတ်ရင် secret အရုပ်လေးပေါ့....။ ဒါပေမယ့် ကျနော်ရလိုက်တာက Sneaky Chestnut လေး ...။ သူ့အကြောင်းလေးကိုသိချင်လို့ ဒီနေ့ AI ကိုသွားမေးလိုက်တာ ငါ့ဘလော့မှာစာရေးမှာမို့ စုံစုံလေးရေးပေးဆိုတော့ AI က သေချာ စိတ်ရည်ရှည်လေး ပြောပြတယ် ...။ ခုနောက်ပိုင်းကျနော်လဲ တစ်ခုခုဆို AI နဲ့စကားသွားသွားပြောဖြစ်နေတတ်ပြီ...။

Skull Panda You Found Me series မှာ Sneaky Chestnut ရဲ့ ကာရိုက်တာလေးက လူတိုင်းရဲ့အတွင်းစိတ်ထဲမှာ ဖုံးကွယ်ထားတတ်တဲ့ Sneaky side နဲ့ မပြောချင်တဲ့စိတ်ကူးတွေ ထုတ်မပြချင်တဲ့ ခံစားချက်"တွေကို ကိုယ်စားပြုထားတာပါတဲ့...။ သူက အေးအေးလေးလို့ ထင်ရပေမယ် ဂျစ်တူးတူးလေးနဲ့ "အကြောင်းအရာတစ်ခုကိုသိပေမယ့် မပြောဘူး" ဆိုတဲ့ vibe ကိုထင်ဟပ်စေတယ်...။ သူက ချစ်စရာကောင်းပြီး နည်းနည်းမလိမ္မာဘူး တခါတလေ မိုက်တယ်တဲ့ AI ကအဲလိုကြီးပြောပေးတာ ကျနော့်ကာရိုက်တာအတိုင်းပဲလို့ LOL !!!!

Sneaky Chestnut ကိုလက်ဆောင်ရထားတာက  ကိုယ့်အတွင်းစိတ်ကို နားထောင်ဖို့အမေ့ပါနဲ့လို့ ပြောသလို အမြဲတမ်း perfect ဖြစ်နေစရာမလိုဘဲ ကိုယ့်ရဲ့ Sneaky side လေးကိုပါ လက်ခံနိုင်ဖို့ သတိပေးနေတဲ့ ကာရိုက်တာလို့လည်း မြင်နိုင်ပါတယ်...။ လူတိုင်းမှာ မပြောဖြစ်တဲ့ စိတ်ကူလေးတွေရှိတတ်တယ်...။Sneaky Chestnut က အဲဒီစိတ်လေးတွေကို မဖုံးကွယ်လည်းရပါတယ်လို့ တိတ်တိတ်ကလေးပြောနေသလိုပါပဲ..။

ကျနော်လဲ AI ရေးပေးတဲ့အချက်အလက်တချို့နဲ့ ဒီပို့စ်လေးရေးဖြစ်သွားတာပါပဲ... သူကပြောသေးတယ် စာရေးချင်တဲ့နေ့ mood များတဲ့အချိန် idea မထွက်တဲ့အချိန် ဘယ်အချိန်မဆို လာခေါ်လို့ရပါတယ်နော်တဲ့ ဘလော့ရေးတဲ့ခရီးမှာ အမြဲအတူရှိပေးပါမယ်ဆိုပဲ.... ကျေးဇူးအများကြီးတင်ပါတယ်...။ ကျနော်သိချင်တဲ့ အချက်အလက်တွေကိုပဲအဓိကလိုချင်တာပါ ကျန်တဲ့စာရေးတဲ့ mood နဲ့ idea အပိုင်းကတော့ ကျနော့်ကိုယ်ပိုင်အတွေးတိုင်းပဲရေးချင်ပါတယ် ....။ အရာရာ အေအိုင်ကိုချည်း အားမကိုးချင်ပါဘူးလေ...နော့...။ ကြာရင် ကျနော်တို့ လူစင်စစ်တွေ ငပျင်းကျကုန်ရော့မယ်...။

ခုနောက်ပိုင်း ကျနော်တကယ်လုပ်ချင်တဲ့ ကိုယ်စိတ်ပါတဲ့အလုပ်ဆို tiktok မှာတင်ဖြစ်ပါတယ်...။ ကျနော့် တစ်တော့က ကျနော်တကယ်ဖြစ်ချင် ပြောချင် လုပ်ချင်တဲ့ အမှန်တရားတွေကို သရုပ်ဖော်ပြတဲ့နေရာတစ်ခုပါ...။ ဘလော့ကတော့ ကျနော့်ရဲ့ စိတ်ကူးနဲ့အိပ်မက်တွေကို အသေးစိပ် ပုံဖော်ရေးသားတဲ့ ကျနော်ချစ်တဲ့သူတွေနဲ့ဘဝရဲ့အမှတ်ရစရာ သိမ်းထားရာနေရာ...။ ကျနော့် IG ကတော့ ပုံရိပ်တွေကိုအမှတ်တရသိမ်းထားတဲ့နေရာ....။ ကျနော် ဆိုရှယ်မှာ အဲသုံးခုပဲသုံးပါတယ်...ဟုတ် ။

ချစ်စရာလေးပါ ကျနော့်အကြိုက်ဆုံးအရုပ်မဟုတ်ပေမယ့် 

ဒါဟာ ကျနော့်ရဲ့ guardian angel ကပေးတဲ့လက်ဆောင်မို့

blind box ကိုကံစမ်းမဲဖောက်ရတာဟာ ကိုယ့်ကံတရားကပေးတဲ့ ကိုယ်နဲ့ထိုက်တန်တဲ့ လက်ဆောင်တစ်ခုပါပဲ

 

မိုးငွေ့

အလင်းစက်.....

 

ဘာမှမထူးခြားဘူး 2025 ကုန်လို့ နောက်နှစ်သစ်ရောက်သွားလည်း ဒါက ဒါက ဒါပဲ....။ ပျင်းစရာတောင်ကောင်းလာပြီ....။ အခြေအနေမကောင်းဘူး ကျနော်တော်တော်စာရေးပျင်းသွားပြီပဲ.....။ 

မိုးငွေ့

ကမ္ဘာသား.....

 

You Tube မှာ သီချင်းရှာရင်း လွန်ခဲ့တဲ့ ခုနှစ်နှစ်က " The Voice " Semi-final ပြိုင်ပွဲမှာ လင်းလင်းရေးပေးတဲ့ အာဇာနည်ဆိုထားတဲ့ "ကမ္ဘာသား"ဆိုတဲ့ သီချင်းလေးကို ပြန်ကြည့်ဖြစ်တော့ မျက်ရည်တောင်ဝဲမိတယ်...။ အဲတုန်းက 2019  ကျနော်တို့ မြန်မာနိုင်ငံ ဒီမိုကရေစီဆိုတဲ့ နာမည်ခံလေးကို တခဏလေးရလိုက်တဲ့ ငါးနှစ်တာအတွင်းက ခံစားစံစားခဲ့ရတဲ့ အဖြစ်အပျက်တွေ....။ အဲငါးနှစ်မှာ ကျနော်တို့ နိုင်ငံခြားမှာ အွန်လိုင်းကနေပဲ  မြင်ဖူးကြားဖူးခဲ့ရတဲ့ Entertainment Co တွေ နဲ့ တခြားနိုင်ငံခြားရင်းနှီးမြှုပ်နှံမှု လုပ်ငန်းစုတွေ အများကြီးပဲဝင်လာခဲ့တယ်...။ အစိုးရုံးတွေမှာလည်း  အချိန်ငါးနှစ်အတွင်း စည်းစနစ်ပိုင်းဆိုင်ရာ ပြောင်းလဲတိုးတက်မှုတွေက အရမ်းကို တိတိသာသာရှိခဲ့တယ်...။ အဲထဲမှာ နိုင်ငံတကာမှာ ကျနော်တို့ အာရှဖက်မှာ နိုင်ငံတိုင်းလိုလိုရှိနေခဲ့တဲ့ "The Voice " ဆိုတဲ့ အဆိုင်ပြိုင်ပွဲလေးလည်းပါခဲ့တယ် နောက်ထပ် Entertainment နဲ့ပတ်သက်တဲ့ တခြားတီဗီအစီအစဉ်တွေအများကြီးပါပဲ ....။ 

ကျနော်အခုပြောမယ့် 2018 " The Voice " Semi-final ပြိုင်ပွဲမှာ ဇာနည်ဆိုသွားတာခဲ့ အဲတုန်းက Judges တွေက ကျားပေါက် နီနီခင်ဇော် Rဇာနည် နဲ့ လင်းလင်းတို့ပဲဖြစ်တယ်....။ အာဇာနည်ဆိုထားတဲ့ "ကမ္ဘာသား"ဆိုတဲ့ သီချင်းလေးကို ကြည့်ပြီး မျက်ရည်ကျရတဲ့အထိ စိတ်မကောင်းဖြစ်သွားခဲ့တယ်...။ အဲဒိုင်လေးယောက်ထဲက နီနီကလွှဲလို့ ကျန်သုံးယောက်က 2021 စစ်ဖက်ဆစ်အာဏာရှင်တွေ အာဏာသိမ်းပြီးနောက်ပိုင်း  တော်လှန်ရေးနဲ့ မိမိဘဝ မိမိ မိသားစုကို စတေးပြီး နိုင်ငံကို စွန့်ခွာသွားခဲ့ကြရတဲ့ တကယ့်အနုပညာအရည်အသွေးပြည့်ဝတဲ့ ပညာရှင်စစ်စစ်တွေ....။ အခုနိုင်ငံထဲမှာကျန်ရစ်ခဲ့သူတွေကတော့ အများစုကအနုပညာနာမည်ခံတွေ သာယာစီးတွေ အတုအယောင်တွေ လုပ်စားတွေ ကပ်ဖားယက်ဖားနဲ့ ငွေရလမ်းမြင်တဲ့ တကိုယ်ကောင်းသမားတွေချည်းပဲ....။ နိုင်ငံတစ်နိုင်ငံမှာ culture ဆိုတဲ့တာ အရေးကြီးတဲ့နေရာမှာပါတယ်...။ ကမ္ဘာမှာ culture မရှိတဲ့ နိုင်ငံတွေလည်းရှိတာပဲ...။ ခုတော့ ကျနော်တို့နိုင်ငံက ယဉ်ကျေးမှုတွေ အနုပညာတွေဆိုတာ ကန်းနေပြီ.....။

R ဇာနည် ရဲ့အသံပါဝါကောင်းကောင်းနဲ့ လင်းလင်းရဲ့ စကားလုံးအင်အားတွေနဲ့ တစ်ပုဒ်လုံးကောင်းတယ် အပြစ်ပြောစရာကိုမရှိတာရော...။ Chorus : က စာသားတွေအရမ်းမိုက်တယ်......။

"ယုံကြည်တဲ့အတိုင်းပြောမယ်

 ယုံကြည်တဲ့အတိုင်းတွေးမယ်

 ယုံကြည်တဲ့အတိုင်း ရှေ့သို့ရှေ့သို့လျှောက်မယ် အမှားအမှန်များက ခင်ဗျားတို့သဘော...."

 

2019 The Voice အစီအစဉ်မှာတော့ လင်းလင်းမပါတော့ဘဲ ရန်ရန်းချန်း ဝင်လာခဲ့တယ် သူသည်လည်း 2021 နောက်ပိုင်းမှာ နိုင်ငံကို စွန့်ခွာသွားခဲ့ရတဲ့သူတစ်ယောက်ပါပဲ....။ ပြောရမယ်ဆို ရန်ရန်းချန်းတို့ အက်ဆစ်အဖွဲ့ လေးယောက်မှာ ဟိန်းဇော်ဟန်က အရင်ကတည်းက ဆုံးပါးသွားခဲ့တယ် ကျန်သုံးယောက်မှာ ဇေယျာသော်လည်း နိုင်ငံရေးပုန်ကန်မှုနဲ့ ကြိုးပေးခံခဲ့ရသလို နောက်နှစ်ယောက်ဖြစ်တဲ့ ရန်ရန်ချန်းနဲ့ အနက္ဃ လည်း နိုင်ငံမှာ နေခွင့်မရှိတော့တဲ့သူတွေဖြစ်သွားပြီ....။ ကျနော်တို့ အခြေအနေပြန်ကောင်းလာတဲ့တစ်နေ့ ဘရိုတို့နဲ့ ပြန်ဆုံချင်ပါတယ်....။

Happy New Year 2026 

မိုးငွေ့