#WHATHAPPENINMYBODY

 

ဘာဖြစ်နေသလဲဆိုတော့....ခါတိုင်းနှစ်တွေဖြစ်နေကျလေ ဒီပို့စ်တွေနှစ်တိုင်းဖတ်ရလို့ စာဖတ်သူတွေလည်း အလွတ်တောင်ရနေလောက်ပြီ....။ မိုးရာသီရောက်တိုင်းဖြစ်နေကျ ဘယ်ဖက်လက်ဖမိုးရောင်တာ ခုနှစ်တော့ မိုးဦးကျမှာကိုစဖြစ်တော့တာ....။ ခါတိုင်းနှစ်ဆို August လလောက်ဖြစ်နေကျ.....။ ကံ စိတ် ဥတု အဟာရ ဒီအကြောင်းတရားလေးပါးကနဲ့မလွတ်ကင်းသရွေ့ပေါ့....။ အကြောင်းအရင်းကိုရှာကြည့်တာ ဖြစ်နိုင်ချေအနီးစပ်ဆုံးအချက်တစ်ခုကို ရှာတွေ့လိုက်တယ်....။ အဲဒါကတော့ ခြေထောက်ကိုရေနွေးနဲ့ဆားစိမ်တာပဲ....။ လက်မရောင်ခင်တစ်ရက်အလိုက သူငယ်ချင်းအိမ်မှာ ရခိုင်မုန့်တီသုပ်လုပ်စားလို့ ရခိုင်သုပ်တစ်ပွဲစားလိုက်တယ်....။ ငါးပိကြောင့်လို့ နာမည်တပ်လို့ရပေမယ့် ပြီးခဲ့တဲ့တစ်ပတ်က ရခိုင်မုန့်တီစားတာ ဘား....မှမဖြစ်ပါဘူး....။ မနှစ်ကလည်း ခြေထောက်အညောင်းပြေ ရေနွေးစိမ်ခဲ့တယ်ဆိုတဲ့ အကြောင်းရင်းနဲ့ ဒီပို့စ်မှာရေးခဲ့ပါသေးတယ်....။ ခုလည်း ဒါပဲဖြစ်ဖို့များတယ်  တိုင်းရင်းဆေးဆရာကြီးဦးရန်အောင် အဆိုအရ အပူကန်ထွက်တာ သေချာတယ်...။ အပူအစပ်အစားများရင် ကန်ထွက်တာမှာ အဲလို ရောင်တာတွေ အမ်းတာတွေအဖြစ်ပြန်ပေါ်လာတတ်တယ်တဲ့...။ အပူအစပ်ကတော့ စားဖြစ်ပါတယ်...ကြိုက်တာကိုး....။ ဒါမယ့် မိုးဥတုမှသာ သူက ဒုက္ခနဲ့လှလှပေးတတ်တာ....။ အခုက အပူရှိန်တွေများတော့ အပြင်မှာအရမ်းပူတဲ့နေရာကနေ လေအေးစက်ခန်းထဲတန်းဝင်လိုက်တာမျိုးလုပ်တာလဲ အပူအအေးမမျှရင်ဖြစ်တတ်တယ်...။ ဖြစ်လိုက်ရင်လဲ ဘယ်ဖက်လက်ပဲ အဲဒါလဲအကြောင်းရှိရမယ်....။

အဲလိုရောင်ပြီဆို အဲနေရာမှာ တဆစ်ဆစ်နဲ့ကိုက်တတ်လာတယ် နောက်လက်ဖမိုးကနေ တတောင်ဆစ် လက်မောင်း အဲလိုထိကိုက်လာတတ်တယ်....။ ဘယ်ဖက်လက်ကိုက်ရင် နှလုံးပြဿနာရဲ့အစလို့ သိထားတော့ ....။ မနှစ်တုန်းက ဆေးခန်းပြ သွေးစစ်တုန်းက ကျွန်မကို အထူးကုက ECG ရိုက်ဖို့လုပ်သေးတယ် အဲဒါဘာကြောင့်မရိုက်ဖြစ်လိုက်လဲမသိဘူး...။ ပြီးတော့ ဟိုးနှစ်တွေတုန်းက ချင်းပြည် ကန်ပက်လက်မှာ နတ်မတောင်သွားတက်တုန်းက တောင်ပေါ် ဘယ်နှစ်လှမ်းမှမတက်ရသေးဘူး အသက်ရှူမဝတော့ဘူးလို့ ကျွန်မခရီးသွားပို့စ်မှာရေးဖူးခဲ့တာကို သွားအမှတ်ရမိရင်း နှလုံးများစစ်ဖို့လိုလာပြီလားပေါ့.....။ တွေ့လား လူ့ခန္ဓာဟာ တနေရာရာ သေးသေးလေးကအစ ချို့ယွင်းပြီဆို ဘယ်လိုမှ ပုံမှန်အတိုင်း နေလို့မကောင်းတော့ဘူး.....။ ငါဘာမှမဖြစ်ဘူး ဒါငါဖြစ်နေကျပဲလို့ စိတ်ကိုလျှော့ပြီး ကိုယ့်ကိုယ်ကို ပြန်ချော့ထားပေမယ့် မသိစိတ်က ဖိစီးမှုတွေရနေတယ်.....။ ပြီးတော့ ခုလိုကာလမျိုး နိုင်ငံရေး စီးပွားရေးမကောင်းတော့ ပိုဆိုး.....။ ဒီလအတွက် ဘဏ်ကငွေဘယ်လောက်ပဲထုတ်ပေးတော့မလဲ ရုံးမှာက လစာပေးချိန်ဆို ပူရတယ်လေ ငွေသားအခက်အခဲအများကြီးရှိနေတော့ တချို့ ဘဏ်ကဒ်မရှိတဲ့သူ အောက်ခြေအလုပ်သမားတွေကျတော့ ငွေသားပေးမှအဆင်ပြေတာလေ... wave money ဆိုတာကလည်း % တွေ ယူတာ ပက်ပက်စက်စက် ဆိုတော့ အဲအပူတွေကလည်း ကိုယ်ကထမ်းထားရသေးတယ်.....။ ဆိုတော့ ဒါက စိတ်ရဲ့အပူ လောလောဆယ်ဖြစ်ပျက်နေတာတွေက ကံရဲ့အပူ ဥတုက မိုးဦးကျကာလ အဟာရကတော့ အလာဂျီဖြစ်နိုင်တဲ့ ငါးပိ ငံပြာရည် မှို မျှစ် ဘာညာသွားစားမိ အဲလို အားလုံးတိုက်ဆိုင်သွားတော့ ကျွန်မဘယ်လက်ကလေး တဖန်ရောင်အမ်းရပါသည်ပေါ့....။

ဘယ်ဖက်လက်ဖြစ်တာ ကျွန်မအတွက် ကထိကအောက်တော့ဖြစ်တယ်....။ ကျွန်မက မျက်နှာသစ်တာဘယ်လက်နဲ့ပဲသစ်ခဲ့တာ ငယ်ငယ်ကတည်းက...။ ဦးနှောက်က ဒီလိုမှတ်ထားပေးပုံရပါတယ် ညာလက်က မျက်နှာသစ်ဖို့အတွက် ရေခွက်ကိုင်ရတဲ့အလုပ်ကိုလုပ်ရတော့ ဘယ်လက်ကမျက်နှာသစ်တာ အသားကျသွားတယ်...။ ငယ်ငယ်က တောမှာ ဘေစင်မှာသစ်ရတာမှမဟုတ်တာ ရေတွင်းမှာ ဒန်ဖလားခွက်နဲ့ရေခပ်ပြီး တစ်ဖက်က ခွက်ကိုင်ထားရတာကိုး အဲတော့ မျက်နှာသစ်တာမှာ ဘယ်သန်သွားတယ်...။ ထမင်းစားလဲ ဘယ်ညာနှစ်ဖက်လုံးသုံးတယ်....။ လွယ်အိတ်လွယ် နှာရီပတ်လဲ ဘယ်ဖက်ပဲ ဖုန်းနားထောင် ဖုန်းကိုင်လဲဘယ်လက်ပဲသန်တယ်...။  ညာလက်က တခြားအရေးကြီးတာ ထီးကိုင်တာ တံခါးဖွင့်တာ သော့ဖွင့်တာလုပ်ရမယ်ဆိုတဲ့ အသိနဲ့မှတ်ထားလို့ထင်တယ် ပစ္စည်းသယ်ရင်လဲ ဘယ်လက်နဲ့ပဲအသုံးများတယ်...။ သူက ညာလက်ထက်တောင်အလုပ်ပိုပန်ပန်းသလိုပဲ ပြန်တွေးကြည့်ရင်...။ 

ထုံးစံအတိုင်းပဲ ရေခဲအိတ်ကပ်ပေးတယ် မနှစ်ကဆရာဝန်ပေးထားတဲ့ဆေးစာအတိုင်း ငါးရက်စာဆေးဝယ်သောက်တယ် ဗိုက်တာမင်စီသောက်တယ်....။ ရေများများသောက်တယ်....။ ဆင်ခြင်ရမယ် ဆင်ခြင်ရမယ် နောက်ဆို ဆားရေလုံးဝမစိမ်တော့ပါ.....။ ဆရာကြီးဦးရန်အောင်က ပြောထားပြီးသား ရေမချိုးခင်ကို ဆားကြမ်းနဲ့ ခြေဖဝါးတစ်ဖက်စီကို အခါခြောက်ဆယ်လောက်ပွတ်ပေးပြီးမှ ရေကို ခြေဖျားထိပ်ကနေစလောင်း အပေါ်ဖက်ကိုတဆင့်ချင်းလောင်းပြီးမှချိုးရတာ....။ အဲဒါသိပြီး သတိလွတ်သွားတာ ခြေဖနောင့်ကွဲနေတာကို အကြောင်းပြပြီး ရေနွေးစိမ်လိုက်တာ ကျယ်မရဲ့ မဟာအမှားတစ်ခုဖြစ်သွားခဲ့တယ်....။  သတိ... သတိ အရေးအကြီးဆုံးပဲ.....။ သူများဘာတွေဖြစ်နေလဲဆိုတာထက် ကိုယ့်ကိုယ်ကို ဘာဖြစ်နေလဲဆိုတာကို သတိချပ်ပြီး စောင့်ကြည့်နေရမှာ...။ လူအများစုက ကိုယ့်အကြောင်းထက် သူများအကြောင်းကို ပိုစိတ်ဝင်စားတတ်ကြတာမဟုတ်လား....။ 

အားလုံးကျန်းမာလန်းဖြာကြပါစေ.....

အရေးတော်ပုံအောင်မြင်ပါစေ.....

မိုးငွေ့