#THE_LADY

အမေစုမွေးနေ့အကြို ဂုဏ်ပြုကဗျာပြိုင်ပွဲရဲ့

ပထမဆုရ ကဗျာ

**************

ခေါက်ရိုးကျိုးနေတဲ့

လူနေမှုအဆင့်အတန်း ...

ကြောက်ရိုးကျိုးနေတဲ့

တရားဥပဒေဘောင်တန်း ...

ဟေ့ ...

The Ladyရှေ့မှာ ဒူးထောက်ကြစမ်း ...

The Lady နဲ့တွေ့ရင်

သေနတ်ပြောင်း၀က ကျည်ဆံဖူးတွေ 

အငွေ့တလူလူနဲ့ အပြင်မထွက်ဝင့်ဘူး ...

The Lady နဲ့ ဆုံရင် 

နေပြည်တော်က စားဖားကြီးတွေ

သွားရည်တမြားမြားနဲ့ ပါးစပ်မဟရဲဘူး ...

The Lady နဲ့တွေ့ရင်

ဝိတိုရိယ ဘုရင်မကြီးတောင်

ခနိုးခနဲ့မရယ်ရဲဘူး ...

စနစ်ကြောင့် ကျွန်ဖြစ်ရတာ

သမိုင်းရဲ့အပြစ်မဟုတ်ဘူး ...

စနစ်ကိုမတော်လှန်ပဲ ကျွန်ဖြစ်ခံရင်တော့

ငါတို့အပြစ်ဖြစ်သွားပီ ...

ဘုရားခေတ်မှပဲ လိမ္မာကြတာပေါ့ ...

လာ ...

Do Or Die တစ်ခုကိုရွေး

The Lady နဲ့သာဆို 

နိုင်ငံတော်အလံရဲ့အနီရောင်ကိုတောင်

ငါ့နှလုံးသွေးနဲ့ရေးခြစ်ခြယ်ပေးမယ် ...

"မဟတ္တမဂန္ဓီ" ကပြောတယ် ...

"An eye For an eye only ends

up making the whole world blind..."

"မျက်လုံးတစ်လုံးအတွက် နောက်ထပ်တစ်လုံး

ထပ်ပြီးစတေးရရင် တစ်ကမ္ဘာလုံး

မျက်ကန်းတွေ ဖြစ်ကုန်လိမ့်မယ်"တဲ့ ...

စုံလုံကန်းချင်သူများ 

The Lady ကို ပုန်ကန်ပါ ...

နှစ်ပေါင်း(၂၀)ကျော်

တစ်ဖက်ကန်းခဲ့ရတဲ့ ငရမကန်းနိုင်ငံတော်ဟာ

အမှန်လက္ခဏာနဲ့မိုးစင်စင်လင်းသင့်ပြီ ...

နှင်းဆီရေကြည် သစ္စာတည်မှ

အတ္တအမှောင်ကို ခွဲနိုင်မယ် ...

ကိုယ့်သမိုင်းကိုယ်ရေးပေါ့ ...

နောက်ထပ်မျက်လုံးတစ်လုံး

ဘယ်သူတွေကန်းချင်မိသေးလဲ, ဖြေ ...

ဂါထာမန္တရားမတိုးတဲ့

ဘုန်းကြီးတစ္ဆေဝေလေလေများ

The Lady အမိန့်ပေးမယ် နားစွင့်ထား ...

ဒီစတုတ္ထနိုင်ငံတော်ရဲ့ခြစားအဂတိ

အမြစ်လှန်တော်လှန်မှုမှာ

"ငါ"စွဲသူများအတွက် အမျှဝေကြမယ် ...

ဒီဘက်ခေတ်မှာ ဒဏ္ဍါရီတွေထဲကလို

အရိုးနဲ့စည်းရိုးထိုးစရာမလိုဘူး ...

"သူခိုးနဲ့အမျိုး"အတွက်မကြည့်ရင်

မြေပုံစည်းတစ်စက်မရွေ့ဘူး ...

ဘယ်သူသေသေ ငတေမာရင်ပြီးရောသူတွေ

ခေါင်းမြီးတွေခြုံမနေနဲ့ 

The Lady လာနေတယ် ...

မြန်မာပြည်ရဲ့လမ်းထိပ်တွေမှာ

စစ်သေနတ်နဲ့ပစ်သတ်ခံရတဲ့ 

ဒီမိုကရေစီစစ်သည် ညီလေးတို့ရေ ...

သွေးအိုင်အတိမ်အနက်ထဲက

လူ့အခွင့်အရေးကို မီးအိမ်ထွန်းပြချင်တဲ့

ဒေါင်းချေသည် ညီမလေးတို့ရေ ...

ကောင်းချီဩဘာ မျှဝေယူဖို့

အလင်းခန္ဓာတို့ကို မတ်ပြီး

ခေါင်းထောင်လို့ ကြည့်လှည့်ပါတော့ ...

ကမ္ဘာမကြေမီးတွေ ညှိမ်းဖို့ ...

တောင်တန်းတိုက်ပွဲတွေ ငြိမ်းဖို့ ...

ပြည်သူတွေ စိမ်းလန်းစိုပြေဖို့ ...

နှင်းဆီပန်းတွေ ပန်ပြီး

နေဝန်းနီနီနဲ့အပြိုင် သတ္တိအစိုင်အခိုင်နဲ့ 

အားလုံးရဲ့ရှေ့ကို 

The Lady လာနေပြီ ... ။ ။

Credit