ဝက်သားပူစီနံသုပ်+ငါးပိထောင်း+ငှက်ပျောသီးအချိုပွဲ

 

ပြီးခဲ့တဲ့ နှစ်ရက်က ပိတ်ရက်ဆိုတော့ အိမ်မှာဟင်းချက်စားဖြစ်တယ်....။ ခုတလော မီးဖိုချောင်နဲ့ဝေးနေတယ်....။ တပေါင်းလပြည့်နေ့တုန်းက ဘုရားမသွားဖြစ်ဘူး လူများလို့...။ ဒါနဲ့ တပ်မတော်နေ့မနက်ပိုင်းကို တစ်မိသားစုလုံးဘုရားသွားကြတယ်... ဒုတိယမောင်လေးရဲ့မွေးနေ့လည်း ဟုတ်တယ်လေ ..မွေးနေ့ရှင်ကတော့ ဒီမှာမရှိဘူး မန်းလေးရောက်နေတယ်...။ ဘုရားဖူးပြီး မနက်စာသွားစားကြတယ်... Royal Garden မှာ...။ အိမ်ပြန်ရောက်တော့ ဆယ်နာရီခွဲကျော်နေပြီ နေ့လည်စာချက်ဖို့ရေခဲသေတ္တာထဲမှာ ဝက်သားတွေ့တာနဲ့ ဝက်သားကြော်သုပ်လုပ်စားမယ် စိတ်ကူးရသွားတယ်...။ ဈေးထဲမယ် ညီမလေး နှင်းဆီပန်းဝယ်တာ လိုက်သွားရင်းနဲ့ ရခိုင်ငှက်ပျောသီး လှတာလေးရလို့ တစ်ဖီးဝယ်ခဲ့တယ်... ငှက်ပျောပေါင်းစားချင်နေတာကြာပြီ... ပြီးတော့ ငှက်ပျောကြော်လုပ်မယ့် အမှုန့်ထုပ်ကလည်းရှိနေပြီးသား ဆိုတော့ စမ်းလုပ်ဦးမယ်ပေါ့...။

ဝက်သားပြားတွေကို ဟင်းခတ်မှုန့် ပဲငံပြာရည်အကြည်နဲနဲနဲ့ နာရီဝက်နှပ် ထားလိုက်တယ်...။ နှပ်နေတဲ့အချိန် အသုပ်ထဲထည့်ဖို့ အစာပလာလေးတွေကို အဆင်သင့်လုပ်ထားရတယ်...။ မုန်လာဥနီတစ်လုံးနဲ့ သခွားသီးတစ်လုံးကို အခွံခွာ အမျှင်ခြစ်ထား..။ ခရမ်းချဉ်သီး တစ်လုံးခွဲကို ပါးပါးလှီး ပူစီနံ့တစ်စီးကို ရေဆေးထား...။ အချဉ်ရည်အတွက် ငရုတ်သီးဆော့+နှမ်းလှော်ထောင်း+ ငါးငံပြာရည်+ သံပုရာသီး+ ငရုတ်သီးစိမ်းကို ရေနဲနဲနဲ့ဖျော်ထားတာ တစ်ခွက်လုပ်ထားပါတယ်...။ ဝက်သားပြားကို မကပ်တဲ့ဒယ်မှာ ကျက်အောင်ကြော်.... အအေးခံပြီးရင် အရှည်လိုက်လေးတွေ လှီးပြီး အဆင်သင့်လုပ်ထားတဲ့အစာပလာထဲရောထည့် အချဉ်ရည်လောင်းထည့်ပြီး ခပ်ဖွဖွလေးနယ်လိုက်ရင် ရပါပြီ....။

ငါးပိထောင်းစပ်စပ်လေး သံပုရာရည်ညစ်ထားတယ်...  

 ဒါက ထမင်းစားပြီးလို့ ရှူးရှူးရှဲရှဲဖြစ်တော့ 

အစပ်ပြေ အချိုပွဲ အုန်းနို့ခပ်ပျစ်ပျစ် နှမ်းမဲဖြူးထားတဲ့ ငှက်ပျောပေါင်း

 

ရခိုင်ငှက်ပျောသီးကိုးလုံး (ကျန်တာကို ငှက်ပျောကြော်လုပ်ဖို့ချန်ထားတာ) သကြားထမင်းစားဇွန်းငါးဇွန်း ဆားလက်ဖက်ရည်ဇွန်းတစ်ဝက် အုန်းနို့တစ်ဗူး(ရယ်ဒီမိတ်) ။ သကြားကိုရေနဲနဲနဲ့ အရင်ကြိုပြီး စစ်ထားပါ...။ ပြီးမှ အုန်းနို့ သကြားရည်နဲ့ဆား ကိုပြန်ရောပြီး ဆူအောင်တည်မယ်...။ ငှက်ပျောသီးကိုဖန်ရည်ကုန်အောင် ကင်မွန်းရွက် မကျည်းရွက်တို့နဲ့ တရေပြုတ်ထားပြီး ရရင်အခွံခွာထားပါ..။ အုန်နို့ပွက်ပွက်ဆူတဲ့အထဲ ငှက်ပျောသီးထည့်ပြီး မီးမြေ့မြေ့နဲ့ မိနစ်နှစ်ဆယ်လောက်တည်ရင် ချိုမွှေးဆိမ့်နေတဲ့ငှက်ပျောပေါင်းရပါပြီ...။

 အမြင်လည်းလှ စားချင်စရာလည်းကောင်းတဲ့ ယိုးဒယားငှက်ပျောကြော်...ကြွပ်ကြွပ်ရွရွလေး

 နေ့လည် နေ့ခင်း သရေစာလေးတစ်ပွဲပေါ့

 City Mart ကဝယ်ထားတဲ့ ရယ်ဒီမိတ် ငှက်ပျောကြော်အမှုန့်... ဂျုံ+သကြား+အုန်းသီးဖတ်+နှမ်း

 ဂျုံမှုန့်ကို ခပ်ပျစ်ပျစ်အနေရေနဲ့ရောပြီးဖျော်ထားတာ

ငှက်ပျောသီးတစ်လုံးကို လေးလွှာလွှာထားတာ...

နှစ်ရက်ဆက်ပိတ်ထားတော့ ရုံးဖွင့်ဖွင့်ချင်းအလုပ်တွေရှုပ်နေတာ... ဒီပို့်စ်ကိုတောင် မနည်းအချိန်လု တင်ရတယ်...။ အဲလို ကိုယ့်ကိုအားပေးတဲ့ ကိုယ်ချစ်တဲ့ စာဖတ်သူတွေကို အဆက်မပြတ်ချင်တာပါ...။

မိုးငွေ့