Butterfly Diary....(To the moon and back)

 

အဲဒီညက နတ်တော်လပြည့်ကျော်နှစ်ရက်နေ့ည ကျမမှတ်မိနေတယ်....။

"လစထွက်တဲ့အချိန်ကို စောင့်ကြည့်ဖူးလား"တဲ့ သူကျမကိုမေးဖူးတယ်...။

ငယ်စဉ်က မီးမလင်းတဲ့ နယ်မြို့ငယ်လေးကနေ ကြီးပြင်းလာသူမို့ လထွက်တာကို မကြာခနကြည့်ဖူးခဲ့ပေမယ့်

အခုတော့  မြို့ပြရဲ့ အလင်းရောင်ကြောင့် ကျမရဲ့အိပ်ခန်း မှန်ပြူတင်းနားမှာသာတဲ့ ညတစ်ချို့တွေမှာပဲ လပြည့်လကို တကူးတကန့်ကြည့်ဖြစ်တော့တယ်....။

အဲညတုန်းက သူက "ကိုယ့်ဆီမှာ လထွက်နေပြီ မင်းကြည့်နေလား"တဲ့...။ ကျမ လထွက်ကြည့်မယ်ဆိုတာ သူမှတ်မိနေတယ် ကျမဆီကို သူဖုန်းခေါ်လာခဲ့တာ...။

ပြီးတော့ "လရောင်အောက်ကလိပ်ပြာ" အဲဒီနာမည်ရှိပြီးသားလားလို့ သူဆက်မေးတယ်....။

လသာတဲ့ညတွေကို ကျမ skip လုပ်ထားတာ ကြာပြီ 

အရင်ကျမအိပ်ခန်းကလို လကို မမြင်ရတော့တာလဲပါတယ်

ကျမအိပ်တဲ့အခန်းလေး ညသန်းခေါင်ကျော်အချိန် တခါတလေ မနက် တစ်ချက်ထိုး နှစ်ချက်ထိုးလောက်မှာ လရောင်လင်းထိန်လာတဲ့အခါ အိပ်ရာကနိုးလာခဲ့ပြီး ကင်မရာနဲ့ရိုက်ထားတတ်တာမျိုး

ခုတော့ တပေါင်းလပြည့်ညကိုတောင် မေ့လျော့တဲ့အထိ

ပျော်ရွှင်မှုတွေ လရောင်အောက်က လိပ်ပြာတွေလို ကျမအနားကနေ အဝေးကို ပျံဝဲသွားခဲ့တာကြာပြီ...

ပြီးခဲ့တဲ့ တန်ခူးလပြည့်ညက လထွက်ချိန် ကားမောင်းနေရင်းကနေ တွေ့ရတော့ ချက်ချင်းပျော်သွားတယ် 

လှလိုက်တာ.....

ပြီးတော့ ...

သတိရလိုက်တာ....

လရောင်အောက်က လိပ်ပြာ.........

မိုးငွေ့

မှင်.....

 

လက်ထပ်ရောင်ပြန်ပြီ..... ကျနော်လည်း နည်းလမ်းပေါင်းစုံခဲ့ပြီ ဘာကြောင့် မှင်ဖြစ်တယ်ဆိုတာကို (ဘယ်လိုလုပ်ရမလဲဆိုတာ) စာမဖတ် မလေ့လာခဲ့မိဘူး...။ ရှေ့ပိုင်းမှာ ကျနော် ရေခဲကပ်တာတို့ဘာတို့ပဲလုပ်တယ် 2019 2020 2021 တောက်လျှောက်တစ်နှစ်ကို တစ်ပို့စ် ကျနော်တင်ခဲ့ဖူးတယ်...။ အခုက 2022မှာတစ်နှစ်လုံးမဖြစ်ဖူးသလောက်ပဲ 2023 2024 ကျနော်မှတ်တမ်းမရေးထားမိဘူး 2025မှာလည်း တစ်ခေါက်တော့ဖြစ်ခဲ့ဖူးမယ်ထင်တယ် ဖြစ်တိုင်းလည်း မိုးရာသီနဲ့ ဆောင်းအကူးတွေမှာပဲဖြစ်တယ် တစ်ခါလက်ရောင်ရင် နှစ်ရက်ကနေ တစ်ပတ်လောက်ထိကြာတတ်တယ်...။ မြန်မာဆေးနည်းအရ သွေးမှင်လေမှင်ဆိုတာရှိတယ် အင်္ဂလိပ်ဆရာဝန်တွေကတော့ သူတို့ဒီရောဂါမရှိဘူး တချို့ဆရာဝန်သွားပြရင် သွေးမှင်လေမှင်ဖြစ်တာလားမေးရင် မကြားချင်ယောင်ဆောင်ကြသေးတယ်...။ ဒီနှစ် မတ်လ လကုန်နောက်ဆုံးပတ်ကျနော် ချင်းမိုင်သွားတဲ့ခရီးစဉ်မှာဖြစ်တယ် ပြန်လာတော့ သက်သာသွားတယ် သင်္ကြန်ပိတ်ရက်မှာဖြစ်တာ ရုံးဖွင့်ရက် အခုစာရေးနေတဲ့အချိန်ထိအရောင်ကမလျော့ဘူး....။ အခုတခါ လက်ဖမိုးတပြင်လုံးဖောင်းကားနေအောင်တော့မရောင်ဘဲ လက်ညှိုးနဲ့လက်မကြားက အသားနေရာက မာပြီးကြပ်ခဲကြီးဖြစ်နေတယ် တင်းနေတော့ နေလို့မကောင်းဘူး...။ နောက်ထပ် ညာဖက်ပေါင်ဆစ်ရိုးက လမ်းများများလျှောက်ရင်နာတယ် အထိုင်အထလုပ်ရင်နာတယ်...။  နှစ်လည်းကြာပြီ ဒီနှစ်ကျမှ ဆက်တိုက်နာနေတော့ ဆေးခန်းပြမှဖြစ်မယ်ဆိုပြီး ကျနော် ဇက်ကျီးပေါင်းတက်တုန်းကပြခဲ့ဖူးတဲ့ အရိုးကြောဆရာဝန်ဆီပြန်ပြတယ် တစ်လက်ဆထဲလက်ရောင်တာပါပြောပြလိုက်တယ်....။

ဆရာဝန်မပြခင် ကျနော့်အခြေအနေကို AIနဲ့မေးကြည့်သေးတယ် သူက ဆရာဝန်နဲ့တွေ့ရင်ဘာမေးရမလဲ ဘာတွေစစ်စရာလိုလဲအကြံပေးတယ်...။ ဆရာကတော့ Hip Joint Pain အတွက် ဓါတ်မှန်ရိုက်ခိုင်းတယ်...။ လက်တွေအကွေးအဆန့် ဘယ်လိုအနေအထားမှာနာမနာ စမ်းတယ် ခြေထောက်ရောပဲ...။ ဓါတ်မှန်အဖြေကတော့ အသက်အရွယ်ကြောင့် ယိုယွင်းလို့ ဖြစ်ရတာတဲ့ အရေးမကြီးဘူး Move Free ဆေးတစ်နေ့နှစ်ကြိမ်သောက်ခိုင်းပါတယ်..။ လောလောဆယ်နာနေရင် လေ့ကျင့်ခန်းမလုပ်ဖို့ပြောထားတယ် အငြိမ်နေပေးရမယ် ရေကူး လမ်းများများလျှောက်မလုပ်ခိုင်းဘူး...။  AI ကတော့ပေါင်ဆစ်ရိုး စတင်ပျက်စီးခြင်းလို့ဘာသာပြန်ပေးတယ်...။ သေချာဂရုမစိုက်ရင်တော့ အဆင့်တွေတက်လာပြီး ခွဲစိပ်ရတဲ့အထိဖြစ်နိုင်တာလို့ပြောတယ် ပြီးတော့ အရိုးပြန်သန်မာဖို့ လေ့ကျင့်ခန်း 4 မျိုးရေးပေးတယ်...။ အိပ်ရာထဲကနေပဲလုပ်ရတဲ့ ပေါ့ပေါ့ပါးပါးလေ့ကျင့်ခန်းတွေပါပဲ...။ ခြေထောက်ချိတ်မထိုင်ရဘူး မာတဲ့သစ်သားခုံတွေမှာမထိုင်ရဘူး ကြမ်းပြင်ပေါ်မထိုင်ရဘူး ဆိုတဲ့ ရှောင်စရာလေးတွေတော့ရှိတယ်...။ ဒီတစ်ခါပြတဲ့ဆရာကတော့ "ဟာ အစ်မ အဲဒါမှင်ဖြစ်တာ"တဲ့ ကျနော်လက်ရောင်တာကိုကြည့်ပြီး ချက်ချင်းမှတ်ချက်ပေးတယ်...။ အဲဒါနဲ့ကျနော် အွန်လိုင်းမှာ မှင်အကြောင်းဖတ်ဖြစ်သွားတယ်...။ ဓါတ်သဘောအရ ဆေးမြီးတိုတွေနဲ့ လိမ်းဆေးလုပ်ရတာ အများကြီးတွေ့ရတယ်...။ အဲထဲက တစ်ခုခုတော့ စမ်းလုပ်ကြည့်ပါဦးမယ်...။ သွေးမှင်လေမှင်ဖြစ်ရင် တစ်သက်လုံးပဲတဲ့ မပျောက်တော့ဘူးတဲ့ ကြားရတာ အားရစရာပဲ...။ အမဲသား ဝက်သား ငှက်ပျော်သီး ငါးပိ ငါးခြောက် အဲဒါတွေရှောင်ရမယ်တဲ့...။ ငှက်ပျော်သီးဆိုတာ ကိုယ်အကြိုက်ဆုံးအသီး....။

အသက်ငါးဆယ်ကျော်နောက်ပိုင်းဟာ လူရောစိတ်ပါ ဒုက္ခတစ်ခုခုပေးဖို့ ခန္ဓာကိုယ်တစ်ခုလုံးပျက်စီးယိုယွင်းမှုတွေ စတင်တော့တာပဲ....။ မသေခင် ငရဲကို စတင်မြည်းစမ်းရတာပဲ....။  ဒီလိုကြားမှာ ပျော်အောင်နေတတ်ဖို့ဆိုတာ မလွယ်ဘူးဘဲ...။

မိုးငွေ့

အချစ်လေးတစ်ယောက်ထဲ.....

 

အခုသီချင်းလေးက ကျနော် အရှေ့ပို့စ်မှာတင်ပေးထားတဲ့ နတ်သမီးပုံပြင် စီးရီးထဲမှာပါတဲ့ အက်လက်စ်ရဲ့ သီချင်းတစ်ပုဒ်ဖြစ်ပါတယ်...။ MV မှာ သရုပ်ဆောင်တာက ပိုင်‌ဇေနဲ့ခင်လေးနွယ်.....။ ဖြိုးကြီးရဲ့ "နှုတ်ဆက်ပါတယ်" လည်းကြိုက်တယ်...။ စီးရီးကာဗာနာမည်ဖြစ်တဲ့ "နတ်သမီးပုံပြင်"က Rဇာနည်ရဲ့ သီချင်း...။ စိုင်းရဲ့ "စိတ်ကူးယဉ်အနမ်းများနဲ့" သီချင်းက ဒီစီးရီးထဲကဆိုတာ ခုမှသိလိုက်ရ....။

နာကျင်တဲ့ အသည်းနှလုံးတွေကို မြင်ကြည့်ပေါ့

ဒါဆို မင်းလေးနားမလည်မလား

ဆုံဆည်းခွင့်လေးတော့ ပြန်ရချင်နေတယ်

အခွင့်ရေးလေးပေးပါကွယ်

မျှော်လင့်ခြင်းများ ငါ့ရင်မှာ ရှိသေးလို့

ဘယ်အရာနဲ့မှ အစားမထိုးပါဘူး

ကံတရားတော့ ကိုယ့်ဖက်ခွင့်ပြုမယ်ဆိုရင်

တစ်နေ့အရောက်လှမ်းလာခဲ့မယ်....

တကယ်ဆို တို့ ဖြစ်ချင်တာတွေ မဖြစ်တော့ဘူး

ဒီလိုအရှုံးနဲ့ ဆုံးရမလား

ကြေကွဲမှုများနဲ့ ရင်မှာပြည့်နှက်လို့

နင်လေ ခံစားနားလည်ပေးပါ

ငါ မင်းအနားရှိတိုင်း အချိန်တိုင်းအသင့်ပဲ

ဒီဘဝထဲ အချစ်လေးတစ်ယောက်တည်း ရှိနေတယ်...

မိုးငွေ့

လိပ်ပြာဒိုင်ယာရီ.....(အိပ်မက်ထဲကလိပ်ပြာ)

 

ကျမဆီကို လိပ်ပြာလေးတွေရောက်မလာခဲ့တာကြာပြီပဲ.....

ရောက်မလာတော့လည်း ရှာမိပြန်တယ်.....။ ညက သူ့ကို အိပ်မက်မက်တယ်...။ အိပ်မက်ထဲမှာ ကျမဆီကို စာတိုက်ကနေပို့လိုက်တဲ့ စာရောက်လာလို့ ဖွင့်ဖောက်ကြည့်တော့ သူ့ဓါတ်ပုံတချို့နဲ့ စာအုပ်တွေ စာတွေပါတယ်လို့ မြင်မက်တယ်....။ စာထဲမှာ ကျမကိုသူမပြောဖြစ်ခဲ့ရတဲ့ စကားတွေအတွက် တောင်းပန်တဲ့အကြောင်းရေးထားတာ...။ တကယ်က ကျမဆီကို လွန်ခဲ့တဲ့နှစ်ရက်ကတည်းက သူ့ပို့ထားခဲ့တဲ့စာနှစ်စောင်ကို ကျမရဲ့ ကိုယ်စောင့်နတ်တွေက အိပ်မက်အဖြစ် စာသွားဖတ်ကြည့်ဖို့ နှိုးဆော်လိုက်တဲ့ အိပ်မက်တစ်ခုဖြစ်မှန်းသိခဲ့ရတယ်...။  ကျမတို့ နှစ်ယောက်စိတ်ချင်း အဆက်အသွယ်ရှိနေကြတုန်းလား ?

အတူတူရှိစဉ်က ကျမတို့ တစ်ယောက်ကိုတစ်ယောက် ချစ်ကြောင်းတစ်ခါမှသေချာမပြောခဲ့ဖူးဘူးလို့ မှတ်မိတယ်...။ ကျမတို့ စကားတွေတော့ အများကြီးပြောခဲ့ဖူးကြတယ်... ကော်ဖီဆိုင်တွေ မထပ်အောင် ထိုင်ခဲ့ဖူးတယ်... သူ့အကြိုက်ဆုံးနေရာကို ခရီးအတူသွားခဲ့ကြဖူးတယ်....။ အဲဒီမြို့ဟောင်းလေးမှာပဲ လမ်းကြားလေးတစ်ခုမှာ ခြုံပင်တစ်ခုကနေ လိပ်ပြာတွေ ရာနဲ့ချီအုပ်လိုက် ပတ်လည်ဝိုင်းပျံသန်းနေကြတာကို တွေ့လိုက်ရဖူးတယ်...။ နောက်တော့ ကျမအကြိုက်ဆုံးနေရာကို သူနဲ့အတူခရီးမသွားဖြစ်တော့ဘဲ ဝေးသွားကြတာကိုလည်း မှတ်မိနေတယ်....။

လူနှစ်ယောက်ရဲ့ ဆုံတွေ့မှုဟာ ရေစက်ကြောင့်မဟုတ်ရင် ဝဋ်ကြွေးကြောင့်လို့ ပြောကြတယ်....။ ကျမတို့နှစ်ယောက်ကတော့ ရေစက်တစ်ဝက် ဝဋ်ကြွေးတစ်ဝက်နဲ့ ဆုံကြတာလို့ သူပြောဖူးတယ်...။ ခုတော့ ကျမတို့နှစ်ယောက်ရေစက်ရော ဝဋ်ကြွေးရော ကုန်ဆုံးသွားကြပါပြီ...။

ဒါပေမယ့် အိပ်မက်ထဲက လိပ်ပြာဝိညာဉ်လေးတွေကတော့ ကျမတို့နား မကြာမကြာ ဝဲပျံနေကြလိမ့်မယ်လို့ ယုံကြည်ပါတယ်....။

မိုးငွေ့

Fairy Tale.....

 

ကျနော်မှတ်မိနေသေးတာတော့ ကိုမျိုးကျော့ရဲ့ "ပေါ့ပေါ့လေးပါပဲ"ကို အဲဖက်ခေတ်တုန်းက "နတ်သမီးပုံပြင်"ဆိုပြီး မင်းမော်ကွန်း ပန်းဖြူ အိနြာကျော်ဇင် နဲ့ရိုက်ထားတဲ့ ဗီဒီယိုခွေ အရမ်းပေါက်ခဲ့တာ...။ ကျနော်‌ဆယ်တန်းအောင်လို့ တက္ကသိုလ်တက်ဖို့စောင့်နေတဲ့ကြားကာလ 1994-1995 ဝန်းကျင်... ဒါရိုက်တာကမောင်မျိုးမင်းလို့ထင်တယ် အဲလို Romance ကားမျိုးတွေက သူပဲအရိုက်များတာ...။ 

အခုတစ်ခါ Ah Boy က featuring  သီရိဆွေနဲ့  Fairy Tale ဆိုပြီး ဗားရှင်းအသစ်နဲ့ပြန်ဆိုတာလည်းကောင်းတယ်...။ တစ်လက်ဆထဲ အဲတုန်းက နတ်သမီးပုံပြင်ဆိုတဲ့ အခွေထဲက သီချင်းတွေကိုပါ ပြန်တင်ပေးလိုက်ပါတယ်...။ အဲထဲမှာ အဆိုတော်စုံတယ် စည်သူလွင် အဲလက်စ် စိုင်းစိုင်းခမ်းလှိုင် မြေပဲယို Rဇာနည် ဖြိုးကြီးတို့ပါတယ် တစ်ခွေလုံးနားထောင်ကောင်းပါ့....။ နတ်သမီးပုံပြင်သွားရှာရင် အဲသီချင်းတွေပါအတွဲလိုက်တွေ့လို့...။

doodle ဆွဲရင်းနားထောင်ဖြစ်တဲ့ ခေတ်သစ် နတ်သမီးပုံပြင်

မိုးငွေ့

Butterfly Diary ..... (Our Hidden Paradise)

 

အဲတုန်းက တောင်ထိပ်ပန်းလမ်းက Landbay Cafe ဆိုတဲ့ ကော်ဖီဆိုင်လေးဟာ ကျမတို့နှစ်ယောက်မကွဲကွာခင် လပိုင်းလောက်အလိုမှာပဲ ဆိုင်အပြီးပိတ်သွားခဲ့တယ်...။ ရာဇဝင်ကိုလေ့လာကြည့်တော့ ဆိုင်ကလူအဝင်နည်းလို့ စီးပွားရေးကလည်း ရဲ့ရဲ့လေးဖြစ်နေတဲ့ပုံပါပဲ ဒီလိုနဲ့ ကျမတို့နှစ်ယောက်လာထိုင်ဖို့ ဆိုင်မပိတ်သေးဘဲ ဖွင့်ပေးတယ်လို့တောင် ယူဆလို့ရတယ်...။ သူ ကျမနဲ့အတူ သွားထိုင်ချင်တဲ့ အဖြူရောင်ဆေးသုတ်ထားတဲ့ ကော်ဖီဆိုင်လေးက ညဖက်ဆို မီးအလင်းရောင်နဲ့ သိပ်လှတယ်...။ ခုခေတ်လို အပြင်အဆင်လှလှပပနဲ့ ဆွဲဆောင်မှုရှိနေတဲ့ ဓါတ်ပုံရိုက်လို့ကောင်းတဲ့ ကော်ဖီဆိုင်မျိုးတော့မဟုတ်ဘူးပေါ့...။ အစားအသောက်လည်း ထင်သလောက်မကောင်းဘူး ဒါပေမယ့် ကျမတို့နှစ်ယောက်ရဲ့ ဇာတ်လမ်းထဲမှာပါဝင်လာဖို့ ဖြစ်လာတဲ့ ကော်ဖီဆိုင်လေးလို့ ကျမထင်တယ်...။ ကော်ဖီဆိုင်ရှိတဲ့ လမ်းနာမည်ကလဲ ကျမတို့အတွက်သီးသန့် ဖန်းဆင်ပေးထားတဲ့ လမ်းလေးလို့တောင်ထင်ရတယ် "တောင်ထိပ်ပန်းလမ်း"တဲ့....။ လမ်းနာမည်လေးကိုကြားရတာနဲ့  နွယ်ပင်တွေနဲ့သိပ်လှတဲ့ သစ်ပင်ကြီးတွေနဲ့ လိပ်ပြာရောင်စုံလေးတွေ ပတ်လည်ဝိုင်းပျံသန်းနေတဲ့ ပန်းပေါင်းစုံပွင့်လန်းမွှေးပျံ့နေတဲ့ သစ်တောကြီးတစ်ခုလိုမြင်ယောင်မိတယ်...။ ဘယ်ပြောလို့ရမလဲနော် ကျမတို့နှစ်ယောက်ထိုင်နေတဲ့ အဲဒီကော်ဖီဆိုင်မှာ ကျမတို့အနား မမြင်နိုင်တဲ့ မွှေးပျံ့လန်းဆန်းနေမယ့်ပန်းလေးတွေ လိပ်ပြာလေးတွေ ဝဲပျံနေကြမယ်လို့...။

ဟိုနေ့က အိပ်မက်ထဲမှာ ကျမရဲ့လိပ်ပြာကိုတွေ့လိုက်ရတယ်....။ ဒါပေမယ့် မျက်နှာချင်းဆိုင်တော့မဟုတ်ဘူး သူက အိပ်မက်ထဲမှာ ကျမကို အမှတ်တမဲ့တွေ့လို့ အတင်းလိုက်ရှာနေတဲ့ပုံ ကျမက သူကျမကို မြင်သွားမှာစိုးပြီး ပုန်းအောင်းနေတာလို့ မြင်မက်တယ်...။ သူနဲ့ပတ်သက်ပြီး ကျမအိပ်မက်မက်ချင်တယ် မက်လည်းမမက်ချင်ဘူး....။ ကျမတို့ ဒီလောက်အချိန်ကာလနဲ့ တစ်ယောက်ကိုတစ်ယောက် မေ့မေ့ပျောက်ပျောက်ရှိသင့်ပြီလို့ထင်တယ်...။ မဖြစ်နိုင်တာတွေကို တမ်းမက်နေဖို့မသင့်တော့ဘူး...။ ဒါပေမယ့် လူတစ်ယောက်ရဲ့ စိတ်ကိုထိန်းချုပ်ဖို့က အခက်ခဲဆုံးဆိုတာဟုတ်တယ်...။ တာရော့ကြည့်တိုင်းလည်း ကျမကို လူတစ်ယောက် အမြဲစောင့်ကြည့်နေတယ်လို့ပေါ်တယ်....။ အမှန်ပြောရရင် သေသည်အထိ ကျမကိုမမေ့ပျောက်နိုင်လောက်တဲ့ ခံစားမှုတွေနဲ့ သူ့ကို တစ်သက်လုံးမရှင်သန်စေချင်ဘူး...။ ဒါပေမယ့်လည်း အဲဒီ မကြာခဏ ဖြစ်ပေါ်လာမယ့် သတိရလွမ်းဆွတ်ခြင်းတွေက သူ့အတွက် Energy တစ်ခုမဖြစ်ရင်တောင် ကောင်းတဲ့ခံစားမှုဖြစ်ဖြစ် ပြောင်းလဲပေးနိုင်ရင်ပဲ ကျမကျေနပ်ပါတယ်...။

ပြင်ပလောကမှာတော့ ကျမတို့နှစ်ယောက်နဲ့ပတ်သက်ခဲ့ဖူးတဲ့ မျက်မြင်ကိုင်တွယ်လို့ရတဲ့ နေရာအဆောက်အဦတွေ ပျောက်ပျက်ကောင်း ပျောက်ပျက်သွားနိုင်ပေမယ့် ကျမတို့ရဲ့ သတိရခြင်းတွေကတော့ ဘယ်အချိန် ဘယ်ကာလအထိဆက်လက် တည်မြဲနေဦးမယ်ဆိုတာ မပြောနိုင်သေးပါဘူး...။

မိုးငွေ့

အခုမှချစ်တတ်ပြီ.....

 

Tiktok မှာ ဒီသီချင်းလေး trend ဖြစ်နေလို့ ဘယ်သူဆိုလည်းသွားစပ်စုတော့မှ ပန်းရောင်ခြယ်တို့ ညီအစ်မနှစ်ယောက်ပြန်ဆိုထားတာ ကလေးမလေးတွေက ချစ်စရာကောင်းလိုက်တာ အထူးသဖြင့် ပန်းသွန်းခြယ်က ပိုလှလာတယ် သူ့အစ်မထက်လည်း ဆွဲဆောင်မှုပိုရှိတယ်...။ သီချင်းစာသားတွေကို ရင်းနှီးပါတယ်လို့ စဉ်းစားနေတာ သူတို့အဖေ ကိုဂရေဟမ်ရဲ့သီချင်း မခိုင်ကြီးလည်းဆိုဖူးတယ်...။ နောက်ပြီး ဂျူဝယ်လ်နဲ့ဂေးဂေးနှစ်ယောက်လည်း ပြန်ဆိုဖူးတယ်...။ ပြောရမယ်ဆို ဗားရှင်းအသစ်တွေမှာ မြူးဆစ်ပိုင်းကို သိပ်ပြောင်းမထားပေမယ့် အဆိုပိုင်းမှာ အဆိုရှင်တွေရဲ့ skillတွေနဲ့သီချင်းရဲ့ လှပကြွရွမှုကတော့ ပုံစံမတူဘူး တစ်ပုဒ်နဲ့တစ်ပုဒ်က...။ ဆိုတော့ overall အနေနဲ့ပြောရရင် လေးပုဒ်လုံး သူ့ပုံစံနဲ့သူကောင်းတယ်...။ ကျနော့် အကြိုက်ကတော့ ဗားရှင်းအသစ် ပြန်ဆိုတာလေးတွေကို ပိုကြိုက်တယ်...။

မိုးငွေ့