 |
AI က ဖုန်းဝိုင်ဖိုင်ဖွင့်တယ်ဆိုရင်ပဲ ကိုယ်စကားပြောတဲ့အသံက အချက်လက်တွေယူပြီး အကြောင်းအရာတွေကို ကိုယ်သုံးနေတဲ့ Tictok, IG, You Tube ကနေ တစ်နည်းနည်းနဲ့လာပြတော့တာပဲ ဘာမှမပြောရဲသလောက် တခါတလေတိုက်တိုက်ဆိုင်ဆိုင် ကိုယ်တွေးနေတဲ့ အတွေးတောင်ဖတ်တတ်နေသလားမသိ ဖုန်းဖွင့်တာနဲ့ သိချင်နေတာ ရှာချင်နေတာတွေကို အဆင်သင့်လာပြတာ...OMG!!!...။ ဒီရက်ပိုင်း တရုတ်ဆီချက်ခေါက်ဆွဲစားချင်တဲ့ ချဉ်ချင်းဖြစ်နေတာ ခုထိဝယ်စားမယ့်အစီစဉ်ကမအောင်မြင်သေးဘူး...။ အဲဒါဆီချက်ခေါက်ဆွဲစားချင်လိုက်တာလို့ ညည်းရင်း AI က ဆီချက်ခေါက်ဆွဲချက်နည်းတွေလာပြတော့တာပဲ...။ သွားစားဦမယ်ရအောင်တော့ တရုတ်တန်းက ဘောဂဆိုင်မှာ...။ တကယ်က ကျမ Food Blogger လုပ်ရမှာပဲ 😜...။
ဒီနေ့ရုံးက ကျမနဲ့အတူ စာအုပ်တွေဖတ်တတ်တဲ့ညီမတစ်ယောက်ကို ဆရာမပတ္တမြားခင်ရဲ့ "ကင်မရာကိုင်ခဲ့ရသောကျွန်မဘဝ" စာအုပ်လေးသိပ်ကောင်းကြောင်း ဖတ်သင့်ကြောင်းပြောပြတာ ညနေရုံးကပြန်တော့ လှည်းတန်းဂုံးတံတားဘေးမှာ ကားပေါ်ကနေ ဓါတ်ပုံဆရာမလေး (ကျမရဲ့ထာဝရစာဖတ်ပရိတ်သတ်လေး တခါက ကဗျာဆရာမလေး) အနှိုင်းမဲ့ကိုတွေ့လိုက်လို့ ကားမှန်ဖွင့်ရင်းလက်ပြနှုတ်ဆက်လိုက်တယ် ။ ကျမတို့ညီအစ်မတွေ အသက်ကြီးလာတော့ စတိုင်လ်တူသွားကြတာက ဆံပင်ကိုထွေထွေထူးထူး ဘာပုံညာပုံမှညှပ်မနေတော့ဘဲ ထိပ်မှာစုထုံးလိုက်ကြတာပဲ...။ ညီအစ်မလို့သာပြောရတာ သူက ကျမထက် ဆယ်နှစ်တိတိငယ်တယ် ကျမကို တစ်ခါတစ်လေ အန်တီလို့ခေါ်တတ်တဲ့ ကလေးမလေး....။ သတိထားမိတာ ကျမတို့ ဆံပင်နဂိုကောက်ချင်းတူတယ် အနုပညာစာပေဝါသနာပါတာချင်းတူတယ် ဂီတကိုမက်မော သီချင်းတွေကိုချစ်ကြတာတူတယ် သဘာဝရှုခင်းပုံတွေကိုရိုက်ရတာကြိုက်တယ်...။ စစ်တပ်ကို သောက်ရမ်းရွံမုန်းစက်ဆုပ်တဲ့ စစ်သား,သားသမီးဖြစ်တာချင်းလည်းတူတယ်...။ မတူတာက သူကလက်တွေ့လုပ်တယ် သတ္တိရှိတယ် ကျမက စိတ်ကူးပဲရှိတာ လက်တွေ့မကျဘူး...။
အနှိုင်းမဲ့က ခုတော့ ဒေါင်းတောင်နာမည်နဲ့ ဓါတ်ပုံတွေရိုက်တယ်.... လွန်ခဲ့တဲ့နှစ်များက ကျမသူ့ဓါတ်ပုံပြပွဲသွားခဲ့ဖူးတာကို ပို့စ်တင်ဖူးပါတယ်....။ သူ့တွေ့တော့ ကျမတို့ ဘလော့စရေးခါစ အချိန်တွေကို ပြန်သတိရမိတယ်....။ အဲတုန်းက ဘလော့ရွာမှာ စည်စည်ကားကား... မြိုင်မြိုင်ဆိုင်ဆိုင် စာတွေရေးကြနဲ့ ပျော်စရာကြီးပဲ...။ ဘယ်အရာမဆို ကုန်ဆုံးရက် (Expire) ဆိုတာရှိတယ်...။ ဒီလိုပဲ ဘလော့လောကလည်း ကုန်ဆုံးရက်တွေလွန်လို့ Expired ဖြစ်သွားတာကြာခဲ့ပေမယ့်... ကျမတစ်ယောက်ကသာ Update ဖြစ်နေတာ အံ့ဩစရာ...။
Revolution will prevail
မိုးငွေ့
No comments:
Post a Comment