မိုးရွာခြင်းအနုပညာ (၁).....

သိမ့်ကြည်တဲ့ရသ

လှလှကလေး မှောက်ချလို့

မြေပြင်ပေါ် ခြေအချဝယ်

တမ်းတမဆုံး

(Craton)

ဒီမိုး.....

မိုးစက်တွေ အိပ်စက်နေကြတုန်းပဲ အိန်ဂျယ်......

နွေခေါင်ခေါင်မှာ ကိုယ်တစ်ယောက်တည်းပဲ မိုးတွေရွာချနေခဲ့တယ်...

မင်းကတော့ ပင်လယ်ပြင်မှာ ပေါလောမျောပြီး မုန်တိုင်းကြားထဲ သက်စွန့်ဆံဖျား ခရီးဆက်နေရတုန်းပေါ့...။

မိုးကို ကိုယ်စောင့်နေတယ်...

ဒီမိုးကျရင် မင်းနဲ့ပတ်သက်မယ့် မိုးကဗျာတွေ တသီကြီး ရေးခွင့်ရမယ် ထင်တာပဲ...။

လောလောဆယ်တော့ ....

ကိုယ်ဟာ နွေကန္တာရထဲ အထီးကျန်နေဆဲပေါ့...

အိန်ဂျယ် ဖန်ဆင်းမယ့်နေ့ညတွေကို စောင့်မျှော်နေရင်းပေါ့....

မြက်ပြင်စိမ်းစိမ်းပေါ်က ဖက်ဆွတ်မိုးတွေကို ခြေဗလာနဲ့နင်းဖို့ စိတ်ကူးယဉ်ရင်းနဲ့ပေါ့...

မိုးငွေ့

မလိုချင်ဘူး စစ်.....

ငယ်ငယ်တုန်းက ရှမ်းပြည်မှာ မြန်မာ့တပ်မတော်တွေနဲ့ ဗကပတွေ ခဏခဏစစ်ဖြစ်လွန်းလို့ ကျွန်မတို့နေတဲ့ ရွာမှာဆို အိမ်တိုင်းလိုလို ဗုံးခိုကျင်းတူးထားရတယ်...။ ဒုန်းဒုန်းဒိုင်းဒိုင်း ပစ်ခတ်သံကြားတာနဲ့ ရင်ထိတ်နေကြရပြီ...။ အခြေနေမကောင်းရင် ကျင်းထဲဆင်းပုန်းရသေးတာ...။ ကျွန်မကလေးအရွယ် ကတည်းက အဲအသံတွေကိုကြားနေရတုန်းပဲ နည်းနည်း ငြိမ်းချမ်းရေးရသွားတော့မှ ဗုံးခိုကျင်းလည်း ကျွန်မတို့အတွက် ဆင်းပြီး တူတူပုန်းတမ်းကစားတဲ့ နေရာတစ်ခုဖြစ်လိုဖြစ်သွားရတာပေါ့..။

ကျွန်မရန်ကုန်ကိုရောက်ပြီး နှစ်တော်တော်ကြာ စစ်ဆိုတဲ့စကားလုံးမကြားရတော့ပေမယ့် ခုနောက်ပိုင်း ပြည်တွင်းစစ်တွေ ဟိုနားဒီနားဖြစ်နေကြတယ်...။ ဘာလို့လည်းကွယ်... ဘာလို့ အပြစ်မရှိသူတွေ အသက်ကို သနားညှာတာမှုမဲ့စွာ စစ်တိုက်နေကြရတာလဲ...။ ကမ္ဘာကရွာဖြစ်လာတော့ လူတွေလည်း အမြင်ကျယ်လာ အကုန်လုံးသိလာခဲ့တာ... စစ်ဘေးဒုက္ခသည်တွေအတွက် အဆိုးထဲက အကောင်းလို့ပဲမှတ်ယူရတော့မယ်...။ ပရဟိတစိတ်ပြည့်ဝသူတချို့ရဲ့ ကူညီထောက်ပံ့အားပေးမှုနဲ့ စစ်ဘေးရှောင်ဒုက္ခသည်တွေ အတွက် တော်တော်ကောင်းသွားတယ်...။ ဘာပဲဖြစ်ဖြစ် စစ်ဆိုတာ မရှိရင်အကောင်းဆုံးပေါ့ လောဘ ဒေါသ မောဟတွေနဲ့ လူတွေရှိနေသရွေ့တော့  ငြိမ်းချမ်းရေးဆိုတာရတလှည့် မရတလှည့်နဲ့ လည်နေမှာပါပဲ...။

နီနီ့ရဲ့ စစ် အမ်တီဗီလေးကိုလည်း မျှဝေရင်း ပြောချင်တာလေး နည်းနည်းပြောသွားတာပါပဲ..။

မိုးငွေ့

နွေရာသီအနုပညာ..... (၁၃)

 

 

 

 

 

 

 

လက်ကို ရထားအပြင်ဘက် ထုတ်ထားတယ်

အစိမ်းရောင်ရနံ့တွေ သူ့ကိုနမ်းတယ်

ကိုယ်က အစိမ်းရောင်ရနံ့တွေကို ပြန်နမ်းတယ်

ကိုယ့်ရဲ့ညာဖက်လက်မောင်းပေါ် ဘယ်သူအိပ်မှာလဲ။ ။

 ရေးသားသူ။   ။ Craton

နွေရာသီအနုပညာ..... (၁၂)

 

 

 

 

 

 

~Primrose လေးများ မျိုးသုဉ်းသွားသောအခါ

~သူအပျင်းပြေခူးဆွတ်ရန် ကျနော့်နှလုံးသားကို အစားထိုးလွှင့်ထားပြီး

~သူအပျင်းပြေမွှေးကြူရန် ကျနော့်ပါးပြင်ကို ပွင့်ထားခဲ့သည်

~သို့သော်..

~သူသည် နှလုံးသားကိုဓားနှင့် တမြည့်မြည့်ထိုး၍

~ပါးကို ဖြန်းခနဲမြည်အောင် ရိုက်သွားခဲ့၏

~ကျနော့်အိပ်မက်အိုးလေး ဗြန်းဗြန်းကွဲခဲ့တဲ့ပေါ့။ ။

  

ရေးသားသူ ။     ။ Craton

နွေရာသီအနုပညာ..... (၁၁)

~နွေရာသီအဝေးပြေးလမ်းမများကို ရူးသွပ်သူ 

~နွေရာသီ၏ အပွင့်အလင်းအတက်အဆင်းကို ချစ်သူ 

~နွေမြက်ပင်တို့၏ စိမ်းလန်းဝါခြောက် တလှည့်စီသိမ်မွေ့နေမှုကို ဂရုထားသူ ~နွေရာသီတွင် ကော်ဖီပိုသောက်သူ 

~နွေရာသီအောက်ရှိ အိမ်သေးသေးလေးများကို ငေးသူ 

~နွေရာသီကို ကဗျာစပ်သူ 

~နွေရာသီသစ်ရွက်များအကြောင်း မှတ်တမ်းတင်ထားချင်သူ 

~နွေရာသီကို တစ်ယောက်တည်းကုန်ဆုံးရမှ ပျော်ရွှင်သူ 

~နွေရာသီ တိတ်ဆိတ်အေးချမ်းစွာ အမြဲလှပနေပါစေဟု ဆုတောင်းသူ 

~နွေရာသီကို မော့ကြည့်သူ 

~နွေရာသီကို မျှော်လင့်စောင့်စားသူ 

~နွေရာသီကို ပြုံးရွှင်စွာ ကြိုဆိုသူ 

~ကျွန်တော့်ကို ဆောင်းရာသီ ရက်တစ်ရက်မှာ မွေးပါသည်။ ။ 

 ရေးသားသူ။   ။ Croton

 

နွေရာသီအနုပညာ.....(၉)(၁၀)

 

  

"နွေရာသီအနုပညာ (၉)"

လူထဲသူထဲ နွေနေပူထဲ ပြုတ်ထွက်သွားတဲ့ ကျွန်မဒေါက်ဖိနပ်ကို ကယ်တင်ပေးခဲ့ရာက

ကျွန်မဘဝထဲ စတင်ဝင်ရောက်လာတဲ့ အမျိုးသမီးကို

ဒီနေ့ပဲ ကျွန်မ နွေနေပူထဲ လူထဲသူထဲမှာ နမ်းခဲ့တယ်

ကျွန်မအမျိုးသား ဘယ်နည်းနဲ့မှ မစွမ်းသာတဲ့ ရင်ခုန်မှုမျိုးနဲ့ပေါ့

သူဘယ်တော့မှ သိလိမ့်မယ်မဟုတ်တဲ့ သူမနဲ့ကျွန်မရဲ့ နွေဒိုင်ယာရီတွေ

အဲ့နေ့ကစပြီး ကျွန်မ တိတ်တိတ်ပုန်း ရေးဖြစ်ခဲ့တယ်။ ။

 ရေးသားသူ ။    ။ Craton

 

"နွေရာသီအနုပညာ (၁ဝ)" 

ခရမ်းရောင်ပန်းတစ်စည်းနဲ့ ပျစ်ပျစ်ကလေးဖျော်ထားတဲ့ ကျွန်တော့်ရဲ့ညတွေ

မျှော်လင့်ချက်တွေဟာ အရောင်မဲ့ဆိုရင် 

သူ့အတွက် ဖွင့်ချထားတဲ့အခန်းတံခါးတွေဟာ ဘာရောင်လဲ..

နွေဟာ ရက်ရက်စက်စက် ပျတယ်။

ရေးသားသူ ။    ။ Craton