အရောင်မတူတဲ့ ကောင်းကင်က အလွမ်းတွေ....

တိမ်ညိုတွေ အုပ်လိုက်ရွေ့လျားနေကြတယ်.......။

ပြည့်ဝန်းနေတဲ့ လကို မကြာခဏဖုံးကွယ်သွားလိုက်ကြတာ...... လပြည့်လကနေတဆင့်ကိုယ်တို့ တစ်ယောက်ကိုတစ်ယောက်လှမ်းလှမ်းကြည့်နေကြတာကို တိမ်ကွယ်လိုက်တဲ့အခါ သူကပျောက်ကွယ်သွားလိုက်နဲ့.....။ ဒီတစ်ည ကိုယ်တို့ တိမ်ကင်းစင်တဲ့ကောင်းကင်ယံက လဝန်းကြီးကနေ ဆုံနိုင်ခွင့်ရပါ့ဦးမလား........။ တိမ်သလ္လာတွေကတော့ ခေါင်းမော့လို့ လေနှင်ရာ အဆုပ်လိုက် အစုလိုက် အဝေးလိုက် ပြေးလွှားရွေ့လျားနေလိုက်ကြတာ........ ကိုယ်တို့ကို ဒီည ငဲ့ကွက်မယ့်ပုံမပေါ်ဘူးကွယ်....။

သူရှိရာ ကောင်းကင်မှာရော တိမ်တွေဖုံးအုပ်နေသလား.......? ဒါမှမဟုတ် ကောင်းကင်ဟာ နက်ပြာရောင်နောက်ခံနဲ့ကြယ်ကလေးတွေဟာ မခို့တရို့လေး လင်းပြနေကြမလား.......? ကမ္ဘာမြေတစ်ခုတည်းအပေါ်ရပ်နေတာချင်းအတူတူ.......ကိုယ်တို့ အရောင်တူညီတဲ့ ကောင်းကင်ကိုမပိုင်ဆိုင်ကြဘူးနော်.........။

ပြူတင်းပေါက်ကနေ အအေးပေါ့တဲ့ ဆောင်းလေလေး မရဲတရဲတိုက်ခတ်ဝင်ရောက်လာတယ်။ နှင်းပွင့်တွေကွယ်ပျောက်နေတာ ကြာပြီဖြစ်တဲ့ ကောင်းကင်ပေမယ့် ကိုယ့်ကောင်းကင်မှာတော့လေ... နှင်းနွမ်းတွေပြိုကျလာတော့မလား အောက်မေ့ရတယ်......။

သူ့ကောင်းကင်မှာရော ကြည်လင်နေရဲ့လား.....။ ဆောင်းညပေမယ့် မညာမတာ တိမ်တွေနဲ့ အုပ်မှိုင်းညို့ဆိုင်းနေမလား......။ လပြည့်လကတော့ တိမ်နောက်ကွယ်မှာ... ရှက်ကိုးရှက်ကန်း ပုန်းလျှိုးကွယ်လျှိုးနဲ့........။ ဒီလပြည့်က ဆေးပေါင်းခတယ်တဲ့.........။ ဟင့်အင်း.... ကိုယ့်အတွက်တော့ အလွမ်းတွေခတဲ့ညပါ......။ အလွမ်းတွေနဲ့အတူ ပုလဲမျက်ရည်တွေပါ ကြွေခတဲ့ညလည်းဖြစ်သေးတယ်....။

မတူညီတဲ့ကောင်းကင်မှာ မမြင်ရပေမယ့် မှန်းဆလို့ နှုတ်ခမ်းနှစ်လွှာတွန့်ကွေး အပြုံးကလေးနဲ့ဖြစ်ဖြစ် ကြည်နူးခွင့်ပေးပါ.....။

ဒီည.........ဆောင်းလေတွေနဲ့အေးမယ်ဆိုလဲ သူ့ရင်ငွေ့အလား အလွမ်းတွေကိုခြုံပြီး ကိုယ်နွေးထွေးလိုက်ပါ့မယ်....။

မိုးငွေ့