ဒီနှစ်ထဲ ကျွန်မဝယ်ဖတ်ဖြစ်ခဲ့တဲ့စာအုပ်က အမှတ်မထင် ဆရာမင်းလူစာအုပ်တွေများနေတယ်...။ “သူ့ဆံပင်နှင်းဆီပွင့်တွေနဲ့” စာအုပ်ကို ကျွန်မမွေးနေ့တုန်းက ဝယ်ဖြစ်ခဲ့တာ...။ အရင်ဦးဆုံး စာအုပ်နာမည်လေးကိုရော မျက်နှာဖုံးကိုရောကြိုက်လို့ အတွင်းက စကားလုံးတွေ အကြောင်းအရာတွေကိုတော့ ဆရာမင်းလူလို့ဆိုတာနဲ့ စိတ်ချပြီးသားလေ...။ ဇာတ်အိမ်ခပ်ပါးပါး အရေးအသားတွေက သဘာဝကျကျနဲ့ တစ်ခေတ်တစ်ခါရဲ့ နိုင်ငံရေး ပညာရေး လူနေမှုစနစ် ကံ့ကော်တောထဲကအချစ်အကြောင်း စသဖြင့် ခပ်ရိုးရိုးလေးပဲ ရေးဖွဲ့သွားတာ...။ ဆရာမင်းလူရဲ့ ဝတ္ထုတွေတစ်ခါဖတ်ပြီးရင် စွဲစွဲမြဲမြဲနဲ့ ရင်ထဲခပ်ဆွတ်ဆွတ်လေးထင်ကျန်ရစ်တတ်တယ်...။ မွေးနေ့မှာ အမှတ်တရလည်းဖြစ်သွားခဲ့တယ်...။ လွန်ခဲ့တဲ့ 19 နှစ် 1999 ကျွန်မ အသက်24နှစ်ပြည့် မွေးနေ့တုန်းက ရန်ကုန်မျက်စိနားနှာခေါင်းဆေးရုံကြီးမှာ မျက်ကြည်လွှာလှူခဲ့ဖူးတယ်...။ ဒီနှစ် YGH ရန်ကုန်ပြည်သူ့ဆးရုံကြီးမှာ ခန္ဓာကိုယ်တစ်ခုလုံးကို လှူဖို့စိတ်ကူးရှိပေမယ့် မလှူဖြစ်ခဲ့ဘူး...။ ဘယ်လိုသွားလှူရမယ်ဆိုတာ သေချာမစုံစမ်းရသေးတာလဲပါတယ်...။ နောက်နှစ်တော့သေချာလှူမယ်လို့ ဆုံးဖြတ်ထားတယ်...။ မျက်ကြည်လွှာလှူပြီး နှစ်နှစ်ဆယ်မြောက်အမှတ်တရလည်းဖြစ်သွားအောင်ပေါ့...။
ဆရာမင်းလူရဲ့ စာအုပ်အကြောင်းပြောရင်းနဲ့ အာလူးနည်းနည်းဖုတ်ဦးမယ်...။ မျက်ကြည်လွှာလှူတာဆိုလို့ တလောက အဒေါ်တစ်ယောက်ဆေးရုံတက်လို့ သူ့စောင့်တဲ့နပ်စ်ကို စကားကြုံလို့ မျက်ကြည်လွှာလှူခဲ့ဖူးတာကိုပြောပြမိပါတယ်...။ သူက ရုတ်တရက် “အစ်မ မျက်ကြည်လွှာလှူတော့ ဘယ်လိုနေလဲ မျက်လုံးတွေအရင်ကထက်ပိုကြည်လာလား”တဲ့... အဲလိုမေးတော့ ကျွန်မ ကြောင်တက်တက်ဖြစ်သွားခဲ့တယ်...။ နောက်တော့မှသဘောပေါက်ပြီး “အဲ ညီမလေး မျက်ကြည်လွှာလှူတယ်ဆိုတာ အသက်ရှင်တုန်းခွာယူလို့မရသေးဘူးလေ ကန်းသွားမှာပေါ့ (စိတ်နည်းနည်းမရှည်တော့တဲ့လေသံနဲ့) Expire ဖြစ်သွားတော့မှ နာရီပိုင်းအတွင်း ခွာယူပြီး လိုအပ်တဲ့ မျက်စိကွယ်သူတွေကို လှူရတာမျိုး”လို့ ရှင်းပြရသေးတယ် ဆေးပညာနဲ့မဝေးတဲ့ နပ်စ်တစ်ယောက်ဖြစ်လျက်နဲ့ မျက်ကြည်လွှာလှူတာကို သေချာမသိတာတော့ တကယ်ဝမ်းနည်းဖို့ကောင်းတယ်...။ ကျွန်မတို့နိုင်ငံမှာ ဒေသန္တရဗဟုသုတတွေ သိပ်နည်းနေပါလားလို့တွေးလိုက်မိလို့လေ...။ ဒါကလည်း စာဖတ်ခြင်းအကျိုးကျေးဇူးတွေ အများကြီးပါတယ်..။ စာများများဖတ်ကြပါ...။ ကိုယ်သန်ရည်ရာစာတွေဖတ်ကြပါ ...။ စာကောင်းပေမွန်တွေကိုလည်း ရွေးချယ်ဖတ်နိုင်ကြပါစေလို့ပဲ ဆုတောင်းနိုင်တော့တယ်...။
ခုလောလောဆယ် “ရင်ခုန်သူများ” စာအုပ်ကို ဖတ်နေတယ်...။ ဆရာမင်းလူစာအုပ်တွေကို 2018 မှာ တော်တော်များများဖတ်ဖြစ်နေဦးမယ်ထင်တယ်...။ ဆရာ့ရဲ့ ဝတ္ထုတိုပေါင်းချုပ်စာအုပ်အထူကြီးကို စာအုပ်ဆိုင်ရောက်တိုင်း ကျွန်မမျက်စောင်းထိုးဖြစ်နေတယ် ဘယ်နေ့ဝယ်ဖြစ်မလဲမသိဘူး...။ ဝယ်ဖြစ်သွားရင် လာကြွားဦးမယ်...။
မိုးငွေ့
No comments:
Post a Comment