ရင်တွင်းစကား.....

စားရေးတဲ့သူဆိုတာ စာဖတ်သူတွေရဲ့စိတ်ကိုလှည့်စားတဲ့သူလား......?????

ကျမ မကြာခဏတွေးမိတဲ့ မေးခွန်းလေးတစ်ခုပါ....။

စာရေးသူဖက်ကကြည့်ရင် တနည်းအားဖြင့်လည်း မှန်ပါတယ်...ကိုယ်ရေးတဲ့စာတွေကို စာဖတ်သူတွေစိတ်ဝင်တစား ရှိစေချင်တာလည်းပါတယ်.... ကိုယ့်ရင်တွင်းကထွက်ကျလာတဲ့ ခံစားမှုပေါင်းစုံကိုလဲ ပြချင်တယ်... အဲဒီလိုလေး.....စာဖတ်သူကို အရေးအသားလေးနဲ့ လှည့်စားတာပဲပေါ့.....။

စာဖတ်သူအနေနဲ့ကြည့်ပြန်တော့လည်း အများစုက ဒီစာကိုဖတ်လိုက်တာနဲ့ ဒီအဖြစ်အပျက်ဟာ စာရေးသူရဲ့ ကိုယ်တွေ့ တကယ့်အဖြစ်အပျက်လို့ မုချမှတ်လိုက်တတ်ကြတယ်.....။ ကျမပြောချင်တာ အဲဒီနေရာလေးပါပဲ...။ စာရေးသူနဲ့သူ့စာကို မရောထွေးစေချင်ဘူးဆိုတာပဲ.....။ တချို့စာတွေမှာ မှတ်ချက် စာကြွင်းတွေအဖြင့် တွေ့ရတတ်ပါတယ် ဒီအဖြစ်အပျက်ဟာစိတ်ကူးနဲ့ရေးတာမို့ တိုက်ဆိုင်မှုရှိရင် နားလည်ပေးပါ ဘာညာတွေပေါ့။ကျမတော့အဲလို တခါမှ မှတ်ချက်မရေးဖူးဘူး....။ ဘာကြောင့်လဲဆိုတော့ ကျမရေးသမျှစာတွေအများစုက ကျမရဲ့ စိတ်ကူးယဉ်သက်သက်တွေပဲလေ.....။

တခါတလေစာဖတ်သူတွေက စိတ်ဝင်တစားရှိလာပြီဆို သူတို့ကိုပျော်ပါစေဆိုတဲ့စေတနာနဲ့ တကယ်ရှိသလိုဖန်တီးပေးဖူးပါတယ်.......။ ဥပမာ မနှစ်ကကျမတော်တော်များများရေးဖြစ်ခဲ့တဲ့ “အိန်ဂျယ်”လိုဇာတ်ကောင်မျိုးပေါ့....။ တကယ်တော့ “အိန်ဂျယ်”ဆိုတဲ့ ဇာတ်ကောင်က အပြင်မှာတကယ်ရှိတဲ့ လူငယ်လေးတစ်ယောက်ပါ...။ ဒါပေမယ့် ကျမရေးသမျှ အိန်ဂျယ်နဲ့ပတ်သက်တဲ့ အက်ဆေးအားလုံးဟာ ကျမစိတ်ကူးတွေနဲ့ပုံဖော်ထားခြင်းသက်သက်သာဖြစ်ပါတယ်...။ တချို့ကော်မန့်တွေကိုဖတ်မိရင် ကိုယ်ရေးခဲ့တဲ့စာအတွက် စာဖတ်သူကို တော်တော်လေးအားနာမိသွားတယ်....။

“အိန်ဂျယ့်” ကိုဆက်လက်ချစ်နေနိုင်ပါစေ...ဆိုတဲ့ ကော်မန့်လိုမျိုးပေ့ါ...။

တကယ်တော့ စာရေးသူတွေဟာ အပြင်ပတ်ဝန်းကျင်က ဖြစ်ပျက်သမျှကို ကြည့်မြင်ခံစားပြီး စိတ်ကူးနဲ့ပေါင်းစပ်ရေးသားတတ်သူတွေပါ...။ ကျမအက်ဆေးတွေအများစုဟာ ကျမရဲ့ စိတ်ကူးယဉ်ခြင်းက စီးဆင်းလာတဲ့ စမ်းချောင်းလေးတစ်ခုပါ..။ ကျမက စိတ်ကူးတော်တော်ယဉ်တတ်တဲ့ မိန်းမတစ်ယောက်ပါ....။ သူများတွေယဉ်တာထက်ပိုယဉ်တတ်သူလို့ ဝန်ခံပါရစေ....။ အနီးကပ်ပေါင်းတဲ့ သူငယ်ချင်းတွေတောင် မသိနိုင်ပါဘူး...ဘာကြောင့်လဲဆိုတော့ ကျမရဲ့အပြင်လက်တွေ့လုပ်ကိုင်နေထိုင်မှုနဲ့ ကျမရဲ့ဝါသနာနဲ့က ဘယ်လိုမှ မဆက်စပ်နိုင်လို့ပါပဲ...။ ဒါကြောင့် ကျမရဲ့စိတ်ကူးယဉ်မှုတွေက စာတွေထဲမှာရောက်ကုန်ရော ဒီတော့ စာလာဖတ်သူတွေကသာ ကျမရဲ့စိတ်ကူးယဉ်မှုကိုပိုပြီးဖမ်းမိလိမ့်မယ်ထင်တယ်...။ ဒီအသက်အရွယ်အထိ စိတ်ကူးယဉ်နယ်ထဲက မရုန်းထွက်နိုင်တော့တာဟာ မရင့်ကျက်မှုဆိုရင်တော့ အိုခေ ကျမငယ်ပါသေးတယ်လို့ ဝန်ခံလိုက်မယ်...။

တခါတလေ ကျမ ဂျီတော့နစ်မှာ ရေးထားတတ်တယ် “အိန်ဂျယ်ဖျော်ပေးတဲ့ ကော်ဖီတစ်ခွက်လောက် သောက်ချင်တယ်” ...။ အဲခါမျိုးမှာ ကျမသူငယ်ချင်းတချို့က “wake up from your dream world” ဆိုတာမျိုးလာပြောတတ်တယ်....။ ငါစိတ်ကူးယဉ်တော်တော်လွန်သွားပြီလားလို့ ကိုယ့်ကိုယ်ပြန်မေးကြည့်တယ်......။ ဘယ်ဟာက စိတ်ကူးယဉ် ဘယ်ဟာကလက်တွေ့ဆိုတာ ခွဲခြားထားပြီးသားမို့ ကျမစိတ်ကို ကျမအသိဆုံး...။ ဒါကြောင့် ကိုယ့်စိတ်ကို ပိုမသိနိုင်တဲ့သူတွေပြောတာကို ကျမလျစ်လျူရှူနိုင်ခဲ့ပါတယ်....။

ပျော်စရာတော့ကောင်းတယ်....ကျမဘလော့ကိုလာဖတ်သူတွေ ကော်မန့်လာပေးသူတွေက ကျမစာကိုဖတ်ပြီး ကျမစိတ်ကိုဖတ်နေကြသူတွေလေ.....။ ခုတလော ကျမ ပန်းနုရောင်လေးတွေကို အရမ်းဓါတ်ကျနေတာကို မှတ်ချက်ပေးကြတာမျိုးပေါ့....။ ကျမက အပြောင်းအလဲတော့ မြန်တယ်ရှင့်.... မှန်သောစကားကိုဆိုတာ....။ ခုဒီအရောင်ကြိုက်ပေမယ့် နောက်တခါကျ နောက်တရောင်ပြောင်းကြိုက်တတ်သူမျိုး....။ ဖက်ရှင်နယ်ပယ်မှာ သူ့ season နဲ့သူ ဘာအရောင်ခေတ်စားလဲ ဒီနွေဦးကတော့ အဖြူရောင် မိုးရာသီ ဆိုဘာအရောင်ဆိုတာမျိုးလေ...။ ကျမရဲ့ ရာသက်ပန်အရောင်က အညိုရောင်ပါ....။ ဒီနေ့ဒီချိန်ထိတော့ အညိုရောင်နဲ့တူသော ကျမမျှော်လင့်ထားတဲ့သူမျိုး မတွေ့ဖူးသေးဘူး....:)

ဒီနှစ်ဦးပိုင်းမှာ ကျမရဲ့ အဓိက ဇာတ်ကောင်ကတော့ “ကျွန်မရဲ့ကဗျာဆရာ”ပါပဲ...။ သူ့ကိုလဲ ရှင်တို့တွေ သိပ်စိတ်ဝင်စားနေကြတယ်မဟုတ်လား....။ အိုခေ.... သူလည်း အပြင်မှာတကယ် သက်ရှိဇာတ်ကောင်ပါပဲ...။ အထက်မှာပြောခဲ့တဲ့အတိုင်းပါပဲ “ကျွန်မ၏စာရေးဆရာ”နဲ့ပတ်သက်ပြီး ရေးသမျှစာတွေဟာလည်း ကျမရဲ့စိတ်ကူးယဉ်သက်သက်ပါ....။ ဒါပေမယ့် အချိန်ဘယ်လောက်ကြာတဲ့အထိ ကျမအတွက် သူကုန်ကြမ်းဖြစ်နိုင်မလဲ ဆိုတာမပြောတတ်သေးဘူး..။ လောလောဆယ် ကျမကတော့ သူ့ကဗျာတွေအတွက် ကုန်ကြမ်းပါ.....။

အဆိုးဆုံးကတော့ စိတ်ကူးယဉ်စာရေးသူတွေဟာ စာဖတ်သူတွေ သူ့ဇာတ်ကောင်တွေကို လှည့်စားရုံတင်မကဘဲ သူ့ကိုယ်သူလဲ လိုအပ်ရင် လှည့်စားရသေးတာကိုပဲ....။ကျမခုလိုဘာကြောင့် ရင်ဖွင့်စကားဆိုချင်ရသလဲ?? ကျမစာတွေရေးရင်း စာဖတ်သူတွေကိုလှည့်စားရပါများလာလို့ ရင်ထဲမွှန်းကြပ်လာလို့ပါ....။ အားနာတယ်...အမှန်တော့ ကိုယ်ရေးတဲ့ စာတွေက ဘာမှရေးကြီးခွင်ကျယ်တာလဲမဟုတ် ဘယ်သူ့အတွက်မှလဲ အရေးပါတာမဟုတ်ဘူးလေ...ဒါပေမယ့် ကျမစိတ်ကူးယဉ်ရေးချသမျှကို စိတ်ဝင်တစားနဲ့ ခံစားအားပေးသွားကြတဲ့အတွက် ကျေးဇူးကမ္ဘာပါပဲ ။ စာဖတ်သူတွေကသာ ကျမအတွက် တကယ့်ခွန်အားပါ.... တကယ်ပါ ရှင်တို့တွေသာမရှိရင် ကျမစာတွေဟာ သေဆုံးသွားတာကြာပြီပေါ့...။

မိုးငွေ့