ဆောင်းမကုန်သေးပါဘဲ ဥဩဟာ စောစီးစွာတွန်မြည်ခဲံလေပြီ....
နွေဦးရောက်တော့မယ်ဆိုတာ ကြိုပြီးသတိပေးလိုက်သလိုပါပဲ... ဆောင်းအငွေ့အသက်တွေဆိုလို့ မနက်ခပ်စောစောမှာတခဏတာမြင်ရတဲ့ မြူငွေ့ခပ်ပါးပါး ဝါးဝါးတွေပဲရှိတော့တယ်...။
အားလုံးဟာ ဆက်စပ်နေကြတယ်... ဆောင်းအကုန် နွေအကူးလက္ခဏာတွေကိုမြင်ရရင် ဥသြတွန်သံကြားရရင် နေရောင်ပါးပါးမှာ လေပြေလေးတိုက်ခတ်ခဲ့ရင် သစ်ရွက်နုတွေပုရစ်ဖူးတွေမြင်ရရင် နွေဦးပေါက်တော့မယ်ဆိုတာပဲ ပြီးတော့ နွေဦးရဲ့ရှင်သခင် အိန်ဂျယ်ကို သတိရလွမ်းတရတာပါပဲ...။
နွေဦးဟာ အိန်ဂျယ့်ကို ကိုယ့်ဆီရောက်အောင် ခေါ်ဆောင်လာတဲ့ အထဲမှာ အဓိကဇာတ်ဆောင်နေရာက ပါတယ်....။
အိန်ဂျယ်ရေ.... ဒီပုံထဲကလို နေခြည်ရောင်တွေ လေပြေနုတွေ ငွေမှင်ရောင်တံမြက်စည်းပင်တွေဆိုတာ ကိုယ်တို့ရဲ့စာစုမှာ တဒေါင့်တနေရာကနေ ပံ့ပိုးအလှဆင်ပေးကြတဲ့ အရာတွေပဲမဟုတ်လား..။
နွေဦးမှာ ကမ်းခြေဟာ သာယာလှပမြဲ သောင်ပြင်ပေါ်မှာလည်း လှိုင်းလုံးလေးတွေအပြေးလာရိုက်ပုတ်ဖို့ သူ့တာဝန်သူကျေဆဲပါပဲ...။ ဒီလိုပဲ ကိုယ်ဟာလည်း အိန်ဂျယ့်အတွက် နွေဦးကို ဖန်ဆင်းဆဲ အိန်ဂျယ့်ကို လွမ်းဆွတ်ဆဲပါပဲ...။
နွေဦးရောက်တိုင်း မင်းကိုယ့်ဆီကို အလည်တခေါက်တော့ ရောက်လာလိမ့်မယ်လို့ ကိုယ်မျှော်လင့်ပါတယ် အိန်ဂျယ်....။
မိုးငွေ့
No comments:
Post a Comment