မိုးငွေ့ဆိုတာ...ကော်ဖီခါးခါးအကြိုက်နဲ့ ဖက်ရှင်တအားမိုက်သူပေါ့...း)

Monday, 4 April 2011

အချစ်=အဖြူရောင်ပုဝါလေး




အနည်းငယ်ကြမ်းပြီး မတိုမရှည်ဖြစ်နေတဲ့ ကျနော့်ဆံပင်တွေကို လေကတိုက်လိုက် ကျနော်ကလက်နဲ့သပ်တင်လိုက်နဲ့ လေထဲပါလာတဲ့ နှင်းတွေကြောင့်စိုစွတ်စပြုနေပြီ....။ ပါးပြင်တွေလဲ အေးစက်ထုံကျင်နေလိုက်တာများ....။

ဂျင်းဘောင်းဘီအိတ်ကပ်ထဲကို မရမကလက်ထိုးထည့်ပြီး ကျနော့်အရပ်ထက်ရှည်နေတဲ့ ကျနော့်တစ်သက်မှာ တစ်ခါမှမမြင်ဖူးတဲ့ မြက်ပင်စိမ်းစိမ်းတွေကြားထဲက ဆက်လျှောက်လာမိတယ်...။ အောက်ကိုငုံ့ကြည့်တော့ ကျနော့်အော်စတားလေးမှာ နှင်းတွေနဲ့ မြက်ပင်ပေါက်လေးတွေကပ်ညှိနေကြတယ်...။ မြက်ပင်စိမ်းတွေကြားမှာ ဘာပန်းမှန်းသေချာမသိတဲ့ အ၀ါရောင်တောက်တောက်အပွင့်လေးတွေပွင့်နေကြတာ... လှမှလှပဲဗျာ....။ ကျနော့်မျက်လုံးထဲမှာတော့ တကယ့်ပန်းချီကားတစ်ချပ်လိုပဲ....။ မိုးကောင်းကင်ကြီးကတော့ နှင်းမြူမှုန်တွေနဲ့ မီးခိုးရောင်ဖျော့ဖျော့လေး.... ကျနော့်ဘေးပတ်ပတ်လည်မှာတော့ အစိမ်းရောင်လွင်ပြင်ကျယ်ထဲမှာ အ၀ါရောင်အစက်အပျောက်လေးတွေ.... ကျနော်ကသာ ဂျင်းပင်အပြာနဲ့ အဖြူရောင်ရှပ်လက်ရှည်လေး ၀တ်ထားတာ...။ တကယ်ဆို ဒီရာသီဥတုနဲ့ ကျနော် အပေါ်ဝတ်လေးတော့ ယူလာသင့်တယ်....။

ရှေ့နားမှာ ရေစီးသံတွေကြားနေရတယ်....။ ကျနော်လိုက်ရှာနေတဲ့ ရေခဲမြစ်ပဲဖြစ်မှာပါ....။ အဲဒီရေခဲမြစ်ရဲ့တစ်ဘက်ကမ်းမှာ သူမ ကျနော့်ကိုစောင့်နေမှာ....။ ဟော....တွေ့ပါပြီ... ချောက်ကမ်းပါးနက်ကြီး အောက်မှာစီးဆင်းနေတဲ့ မြစ်....။ ပြီးတော့ ငွေမှင်ရောင် တံမြက်စည်းပင်တွေ ကြားထဲက သူမ.....။ မြစ်ကမ်းနဖူးမှာ သူမဒူးထောက်လျက်... ကျနော့်ကို စိုက်ကြည့်နေတယ်..။ သူမပြောခဲ့ဖူးတဲ့ အရုပ်သဏ္ဍန်တိုင်း တသွေမသိမ်းပါပဲ....။ နည်းနည်းဝေးတယ်ဆိုပေမယ့် ... စိမ်းဖန့်ဖန့်သူမမျက်ဝန်းတွေကို ကျနော်မြင်နေရတယ်....။ သူမမျက်ဝန်းတွေက လွမ်းဆွေးတဲ့ အရိပ်တွေသန်းနေတယ်...။ သူမ ခေါင်းကခြုံပုဝါလေး လေအဝေ့မှာ.... ကျနော့်ဆီလွှင့်လာတယ်...။ အဖြူရောင်ပုဝါလေးကို ကျနော်ဖမ်းဆုပ်ကိုင်လိုက်မိတယ်...။ လေထဲလွင့်နေတဲ့ သူမရဲ့ရှည်လျားတဲ့ ငွေမှင်ရောင် ဆံပင်တွေက တံမြက်စည်းပင်ရောင်တွေနဲ့ ရောထွေးနေတယ်...။ သူမအသားတွေက နှင်းပွင့်တွေလိုပဲ ဖြူဖွေးနေတယ်.....။ တစ်ခါက သူမပြောဖူးတဲ့ သေမင်းရဲ့ တမန်တော်သရုပ်မျိုးပါပဲ...။ တကယ်ပဲ သူမအဲဒီအတိုင်း ပြင်ဆင်လာခဲ့သလား....။ ကျနော့်ရင်ခွင်ထဲရောက်နေတဲ့ ပုဝါလေးကြောင့် နွေးနွေးထွေးထွေးလေး ဖြစ်သွားတယ်လို့ ခံစားနေရတယ်...။ သူမ ကျနော့်ကို လက်ဝှေ့ရမ်းပြပြီး တစ်ခုခုအော်ပြောနေတယ်...။ ဒါပေမယ့် ဘာအသံမှမကြားရပါဘူး....။ ရေစီးသံတွေနဲ့ ရောသွားလို့များလား....။ သူမနောက်တစ်ကြိမ်ကြိုးစား အော်ခေါ်နေတာတွေ့ရတယ်...။ ဒီတစ်ခါလည်း ဘာအသံမှာမကြားရဘူး....။ သူမ ဂါဝန်စလေးကိုမပြီး ဟိုဘက် ဒီဘက် ပြေးနေတာကိုတွေ့တယ်....။ ကျနော့်အမြင် အာရုံရှေ့ကို မြူခိုးတိုက်တွေ ပိတ်လိုက်တယ်.....။

ကျနော် လန့်နိုးလာခဲ့တယ်....။ နှုတ်ခမ်းတွေ ခြောက်သွေ့နေလို့ လျှာနဲ့သပ်ရင်း ရေတစ်ခွက်သောက်လိုက်တယ်...။ အိပ်မက်ထဲမှာ သူမကျနော့်ကို အဖြူရောင်ပုဝါလေးလာပေးသွားတယ်ဆိုတဲ့ အဓိပ္ပါယ်က ကျနော့်အပေါ်ထားတဲ့ သူမရဲ့ အဖြူရောင်အချစ်ကို ကျနော့်ဆီမှာ အပြီးပိုင်ထားသွားတဲ့ သဘောလားဗျာ....။

မိုးငွေ့

5 comments:

မောင်လေး said...

အွန်..ဒီပို့စ်က ပထမို့ပို့စ် အိန်ဂျယ်ရဲ့ အဆက်လား..ဒါမှမ ဟုတ်..ပြောင်းပြန်ပို့စ်လား...၊ပို့စ်နှစ်ခုကို ခုလိုဆက်စက်
ပြီးရေးတဲ့ အိုင်ဒီယာလေးကမိုက်တယ်..။

မိုးငွေ့...... said...

ဟုတ်တယ်...ဒီတစ်ပုဒ်က ပျောက်ဆုံးနေတဲ့ အိန်ဂျယ်အတွက် ကောင်လေးဘက်ကအမြင်ကို ပြန်ရေးထားတာ...။ မောင်လေးပြောသလို ပြောင်ပြန်ပို့စ်ပေါ့...။ ကျေးဇူး...အားပေးတဲ့အတွက်..း)

ခင်တဲ့
မိုးငွေ့

Angelhlaing(May everybody be happy and healthy! said...

အရမ်းဖတ်လို့ကောင်းတယ်မမရေ..
ပြိးသွားမှာတောင်ဆိုးမိတယ်...
အရေးအသားအားကျလျှက်...
ကောင်းသောနေ့လေးဖြစ်ပါစေမမ။

ရွှေရတုမှတ်တမ်း said...

essay လေးတွေကောင်းတယ်...သူငယ်တောင်ပြန်ချင်လာပြီ...

အဖြူရောင်နတ်သမီး said...

နုတယ်မမိုးရေ...
အပြီအပြင်ကို ခံစားသွားတယ်နော်...
အစဉ်အားပေးလျှက်...