ပျော်ရွှင်မှုဆိုတာ.....

 

ပျော်ရွှင်မှုဆိုတာဘာလဲဆိုပြီးလိုက်ရှာနေရင် ... 

ဘယ်တော့မှ ပျော်မှာမဟုတ်သလို ...

ဘဝဆိုတာကြီးကို နားလည်ဖို့ပဲကြိုးစားနေရင် ...

တန်အောင်နေလိုက်ရမှာမဟုတ်ဘူး ...#ဂရုမစိုက်ခြင်းအနုပညာ

မပြောင်းမလဲ တည်ငြိမ်ခြင်းဟာ ပျော်ရွှင်ခြင်းရဲ့ သော့ချက်တစ်ခုဖြစ်နိုင်မလား တရိပ်ရိပ်ပြောင်းလဲမှုတွေကြားမှာ စိတ်တွေဟာ လွင့်ပျံသွားတတ်သလား...။ တပ်အပ်ကြီးပြောလို့မရပေမယ့် အနည်းအကျဉ်းတော့မှန်နေလိမ့်မယ်... ။ ဥပမာ - "ပျော်နေသူတစ်ယောက်ဟာ သူနဲ့လောကနဲ့ တစ်သားတည်း ဖြစ်သွားပြီလို့ယုံကြည်တယ်...။ ဘဝရဲ့ အသီးအပွင့်တွေကြားမှာ ပျော်မွေ့နိုင်သလို သေခြင်းတရားကိုလည်း လက်ကမ်းကြိုဆိုနိုင်တယ်...။ သူသေသွားရလည်း ကျန်ခဲ့တဲ့သူနဲ့ တကယ်ကွဲကွာသွားတာ မဟုတ်ဘူးလို့ လက်ခံနိုင်လာတယ်...။ ဘဝရေစီးကြောင်းမှာ အလိုက်သင့်မျောပါနိုင်သူဟာ ပျော်ရွှင်နေတဲ့သူ အစစ်ပဲ...။ (ကာတာ - သုခမြေပုံ)

________________________

Revolution will prevail

မိုးငွေ့

ဂရုမစိုက်ခြင်းအနုပညာ.....

ကျမဘဝမှာ ကျမပြုခဲ့သမျှအရာတွေ အကောင်းအဆိုးအားလုံးအတွက် နောင်တဘယ်တော့မှမရခဲ့ဘူး...။ ဘာလို့လဲဆိုတော့ ကျမလုပ်ခဲ့သမျှအလုပ်တွေက ဘယ်သူတစ်ဦးတစ်ယောက်ရဲ့ တိုက်တွန်းအားပေးမှုကြောင့်မှမဟုတ်ဘဲ ကျမရဲ့ ကိုယ်ပိုင် ဆုံးဖြတ်ချက် ကျမရဲ့သဘောဆန္ဒအလျောက်လုပ်ခဲ့လို့ပါပဲ...။ အဲဒီအတွက် ဖြစ်လာမယ့် အကျိုးဆက်တွေကို ကျမ ခံစား စံစားတယ် ရင်ဆိုင်နိုင်တယ် ဘယ်သူဘယ်ဝါကို ဂရုစိုက်ရမယ်တို့ ဘာတို့ကို သိပ်ခေါင်းထဲမထားဘူး ဒါ ကျမရဲ့ ဂရုမစိုက်ခြင်းအနုပညာပဲ...။

"တစ်သက်လုံးပျော်သလိုနေသွားမယ် အချစ်ကိုတော့ ချစ်တယ်လို့ မပြောတော့ဘူး..." ဆိုတဲ့ စစ်ငြိမ်းရဲ့ စာသားလေးကို သူငယ်ချင်းတစ်ယောက်တင်ထားတာတွေ့တော့ အတွေးတစ်ခုရလိုက်တယ်...။ ဘာလို့ ကိုယ်ချစ်တဲ့သူကို လူတွေက လွတ်လွတ်လပ်လပ်ပွင့်ပွင့်လင်းလင်း မပြောနိုင်ကြရတာလဲ...။ လူ့ဘဝဆိုတာ တိုတိုကလေးရယ်... အခွင့်အရေးဆိုတာ တစ်သက်မှာ တစ်ကြိမ်ပဲအနည်းဆုံးရတာ ကိုယ့်ဆီကို အကြိမ်ကြိမ်ရောက်လာဖို့က မဖြစ်နိုင်ဘူး...။ အဲလို "ချစ်တယ်"လို့ ပြောဖို့ ကန့်သတ်မှုတွေ အတားအဆီးတွေ စည်းမျဉ်းဉပဒေတွေ တွက်ချက်မှုတွေကြောင့် လူတွေဟာ တစ်ယာက်နဲ့တစ်ယောက် ချစ်လျက်နဲ့ နှုတ်ကဖွင့်မပြောဖြစ်တော့ဘဲ တစ်သက်လုံး ရေငုံနှုတ်ပိတ်သေတဲ့အထိ နေသွားကြရတာ ရေတွက်နိုင်မယ်တောင်မထင်ဘူး...။ ကျမကိုယ်တိုင်လည်း အဲဒီအဖြစ်မျိုး ကြုံတွေ့ဖူးတာပဲ...။ ကိုယ်ချစ်တဲ့သူကို ချစ်တယ်လို့ မပြောခဲ့ရတာ အဲဒါလည်း‌ စောစောက ပြောခဲ့တဲ့ ကန့်သတ်မှုတစ်ခုကြောင့်ဘဲဆိုပါတော့....။ ဒါပေမယ့် အဲလိုအတွက်နဲ့ ကျမ နောင်တမရခဲ့ပါဘူး...။ ဘာလို့လဲဆိုတော့ စဉ်းစားဆင်ခြင်နိုင်တဲ့ဉာဏ်ရှိနေတဲ့ လူတစ်ယောက်ဖြစ်နေလို့ပါပဲ ဒါကြောင့် နှလုံးသားကိုအလိုလိုက်ခဲ့မှုတွေကို စဉ်းစားတဲ့ဦးနှောက်က ရပ်တန့်ပစ်လိုက်တာပဲ ဒါပါပဲ ဒါကြောင့် ချစ်တယ်လို့ မပြောခဲ့ရတဲ့အတွက် ကျမနောင်တမရပါဘူး..။ ဘယ်လိုအခြေအနေမျိုးမှာပဲဖြစ်ဖြစ် ကျမကတော့ ကော်ဖီသောက်မပျက် နေနိုင်တဲ့ ခံနိုင်ရည်မျိုးရှိတဲ့ မိန်းမတစ်ယောက်ပဲဖြစ်ချင်တယ်...။

__________________
Revolution will prevail
မိုးငွေ့

Brainless.....

 

ယွန်းမြတ်သူနဲ့ သရဖီတို့ ဆိုထားတဲ့ ဒီသီချင်းမှာ မိန်းမတစ်ယောက်နဲ့ ယောကျာ်းတစ်ယောက်အချစ်ဟာ တွေးပုံစဉ်းစားပုံခြင်း တော်တော်ကွာဟတာကို သွားတွေ့တယ်...။ Mark Manson ရေးပြသလိုပဲ ဒီနေရာမှာ ယောကျားတွေဟာ စဉ်းစားတဲ့ဦးနှောက်ကိုသုံးပြီး မိန်းမတွေကတော့ ခံစားတဲ့ဦးနှောက်နဲ့ ဆုံးဖြတ်တတ်ကြတယ်... အဲမှာ...အတွေးအခေါ်အယူအဆတွေ အကွာကြီးကွာသွားလို့ ချစ်သူတွေ အကြောင်းကြောင်းကြောင့်ဝေးကြရတာပဲ...။ 

အချစ်ကိုဘဝလို့ ထင်မြင်တဲ့မိန်းမတွေက ကိုးကွယ်သူ ....

အချစ်ကိုဖျော်ဖြေရေးသက်သက်လို့ ထင်မြင်တဲ့ယောက်ျားတွေက ချနင်းသူ....

ကျနော် အချစ်ဆရာမကြီးမဟုတ်ပါဘူး ဒီလိုပဲ လက်တွေ့ကြုံတွေ့မြင်နေရတာတွေကို ပြောကြည့်တာ...။

__________________
Revolution will prevail
မိုးငွေ့

အကြိမ်ကြိမ်.....

ကျနော် သီချင်းတွေ ဆက်တိုက်တင်ပြီဆိုရင် ကျနော်ဘာပို့စ်မှ စာမရေးဖြစ်လို့ဆိုတာ အားလုံး သိလောက်ပါတယ်...။ တကယ်ကျနော် အခုတလော ဘာတွေရှုပ်မှန်းမသိ စာလဲမဖတ်ဖြစ်ဘူး ဒီလောက်ဆွဲဆောင်အားကောင်းတဲ့ ဖတ်လက်စ ဆရာမြသန်းတင့်ရဲ့ "မမ" စာအုပ်တောင်မှ အိပ်ရာဘေးမှာ ဒီတိုင်းလေး တိုးလို့တန်းလန်း....။ အဲစာအုပ်လေးဖတ်ပြီးရင်တော့ ကျနော်စာတစ်ပုဒ်ရေးဖြစ်မယ်ထင်တယ်...။ ခုတော့ သီချင်းလေးတွေကိုပဲ နားထောင်ထားကြဦး...။

ယွန်းမြတ်သူရဲ့ "အကြိမ်ကြိမ်" က  You Tube ပေါ်တင်လိုက်တာ ရက်ပိုင်းပဲရှိဦးမယ်...။ THOR(THE HEART OF RANGOON) မှာလုပ်တဲ့ သူ့ရဲ့  (၂၅)နှစ်မြောက်မွေးနေ့မှာဆိုဖြစ်တဲ့ သီချင်းလေး ...။ နောက်ပိုင်း ထွက်လာတဲ့အဆိုတော်သစ်မှာ သူလေးက သီချင်းအဆိုကောင်း ချစ်စရာလည်းကောင်းတဲ့ ကောင်မလေးတစ်ယောက်လို့ မြင်တယ်...။

အဖြစ်အပျက်တစ်ခုခုကိုဖြစ်ဖြစ် ခံစားမှုတစ်ခုခုကိုဖြစ်ဖြစ် မေ့ပစ်နိုင်အောင် ဘဝကနေပျောက်ကွယ်သွားအောင် အကြိမ်ကြိမ်ကြိုးစားခဲ့ရတာတွေ လူတိုင်းမှာရှိခဲ့ဖူးမယ်ထင်ပါတယ်...။ အဲလိုအကြိမ်ကြိမ်ကြိုးစားလုပ်ဆောင်နေရင်း အားထုတ်နေရင်းနဲ့လည်း မေ့ပျောက်ပစ်ဖို့မရနိုင်တဲ့ ခံစားမှုတွေလဲ လူတိုင်းမှာ ရှိဖူးမှာပါ...။

🎵 အကြိမ်ကြိမ်နေနိုင်အောင် ကြိုးစားခဲ့ပါတယ်...

🎵 ဒီဒဏ်ရာတွေကို  မေ့ဖျောက်ဖူးပါတယ်....

🎵 ခံနိုင်ရည်ကုန်အောင် ချစ်ခဲ့ဖူးပါတယ်....

🎵 သူပျော်နိုင်အောင် တောင်းဆုပြုဖူးပါတယ်....

 

__________________
Revolution will prevail
မိုးငွေ့

Dear Angel(17).....

 

ချစ်သော အိန်ဂျယ်....,

ဟိုး....အရင်တုန်းက ကိုယ်တို့နှစ်ယောက်  နှုတ်ဆက်နေကျ ဒီဇင်ဘာက ခုတော့ သူမဟုတ်သလို စိမ်းစိမ်းကားကားကြီးနဲ့ ဖြူလွလွနှင်းပွင့်လေးတွေကိုတောင် မခြွေချပေးနိုင်တော့တာ ဘယ်လောက်ကြာပြီလဲ...။

တစ်သီးပုဂ္ဂလကြောင့်ရော အကြောင်းအမျိုးမျိုးကြောင့်ရော...ခုတလော စိတ်နဲ့ကိုယ် ကပ်လိုက်မကပ်လိုက်ပါပဲ....။ ကြုံတွေ့နေရတဲ့ နိုင်ငံရေး စီးပွားရေး လူမှုရေးတွေက လူတစ်ယောက် ရှင်သန်ရပ်တည်နိုင်ဖို့ အလွန်ခက်ခဲတယ်ဆိုတာ အကုန်လုံးလက်တွေ့ကြုံနေကြရတာမဟုတ်လား...။

စုတ်သထက် စုတ်ပြတ်သပ်လာနေတဲ့ လူ့လောကကြီးမှာ ရာသီဉတုတွေ ဖေါက်လွဲဖေါက်ပြန်ဖြစ်တာလဲ မဆန်းပါဘူး...။ 

ဘယ်တော့များမှ ကိုယ်တို့ အေးချမ်းတဲ့အချိန်ရောက်လာမှာလဲ ?

ဘယ်တော့များမှ သာယာလှပစည်ပင်ဝပြောတဲ့ တိုင်းပြည်တစ်ခုဖြစ်လာမလဲ?

ဘယ်တော့များမှ စည်းလုံးညီညွှတ်တဲ့ သူတွေအားလုံးနဲ့ ပျော်စရာကောင်းတဲ့ နိုင်ငံဖြစ်လာမလဲ?

အဲဒီအတွက် ကိုယ်တို့အများကြီး ရင်းနှီးရဦးမှာ ကိုယ့်အတွက်မဟုတ်တဲ့ ကျန်ရစ်ခဲ့သူတွေအတွက် ဆက်ပြီး ရင်းနှီးနေရဦးမှာပဲ......ကိုယ်တတ်နိုင်တဲ့ မြူတစ်မှုန် သဲတစ်ပွင့် ဖြစ်ဖြစ်ပေါ့....။

လုပ်စရာရှိတာတွေပဲ လုပ်နေရင်း စာတွေလဲမရေးဖြစ်သလို စာတွေလည်း မဖတ်ဖြစ်ဘူး....

Miss you Angel

Still flying

Still loving

__________________
Revolution will prevail
မိုးငွေ့

အလွမ်းမှတ်တိုင်….

 

ဝိုင်းစုသီချင်းလေးတွေတော်တော်များများကျနော်ကြိုက်တယ် သူ့သီချင်းလေးတွေက မြူးဆစ်ရော စာသားလေးတွေရော ချစ်စရာလေးတွေ ပေါ့ပေါ့ပါးပါးလေးလွမ်းရတဲ့ သီချင်းမျိုးလေး...။ ဒီတစ်ပုဒ်က ကျနော့် Sound Cloud  Pop Selection ထဲကတစ်ပုဒ်....😍

ချစ်တဲ့စိတ်ဟာ တော်တော်ဆိုးရွားပြီး ခွင့်မလွတ်နိုင်တာတွေကိုပါ မှေးမှိန်ပျောက်ကွယ်စေတဲ့အပြင် တမ်းတလွမ်းရတဲ့စိတ်ကိုပါ သည်းသည်းထန်ထန် တခါတလေ ဖြစ်စေသေးတယ်... တကယ်ချစ်ခဲ့လို့ဖြစ်ပါလိမ့်မယ်လေ...။ 

ဒါနဲ့ 2023 နှစ်ကုန်တော့မယ် .....

အရင်လို ဒီဇင်ဘာမှာ  ချိုပါစေ ဘာညာလဲ စာတတန်ပေတတန် မရေးဖြစ်တော့ဘူး....။ 

__________________
Revolution will prevail
မိုးငွေ့