သိဖို့.....

သူတပါးထဲက မျှော်လင့်တာတွေကို ရပ်ပြီး

လောကဓံကို လက်ခံတတ်လာပြီ ဆိုရင်

ဘဝက ဖြတ်သန်းရ ပိုပြီး လွယ်ကူလာမှာပါ ....

ဒီနေ့ မင်းကို နာကျင်စေသမျှ အရာအားလုံးက

မနက်ဖြန်မှာ မင်းကို သန်မာစေမည့်  အရာတွေပဲ ... ❤️

ကောင်းတဲ့နေရာမှာ ရောက်ဖို့ထက် ....

ရောက်တဲ့နေရာမှာ ကောင်းဖို့လိုတယ်....

တော်တဲ့နေရာမှာ ရောက်ဖို့ထက်....

ရောက်တဲ့နေရာမှာ တော်ဖို့လိုတယ်....

ဘဝမှာ ... နဲနဲ ပြောပြီး ... များများ နားထောင်ပါ ...

အရာရာကို လေးလေးနက်နက် ခံစားပြီး ...

လူတိုင်းအပေါ် မေတ္တာတရား ထားပါ ...

မျက်စိဖွင့် နားစွင့်ပြီး အမှန်တရားကို ရှာဖွေပါ ...

ကြုံဆုံလာသမျှကို Accept လုပ်ပြီး ကြံ့ကြံ့ခံပါ ... ❤️

                 

🍀 Myo Thiha Kyaw ~ Randy 🍀

____________________

Revolution will prevail

မိုးငွေ့

ကုသိုလ်.....

ကုသိုလ်ရအောင်လို့ ကုသိုလ်လုပ်ဖို့ ပိုက်ဆံရှိစရာမလိုပါဘူး အဓိကက ကိုယ့်စိတ်ကကောင်းနေဖို့ ဖြူစင်နေဖို့ပဲလိုတယ်....။ ကိုယ်သူတစ်ပါးအပေါ် ကောင်းခဲ့တာ ပေးကမ်းခဲ့ဖူးတာလေး လှူခဲ့ဖူးတာလေးကို တစိမ့်စိမ့်ပြန်တွေးရင်လည်း ကုသိုလ်စိတ်ဖြစ်တာပဲ ကုသိုလ်ရတာပဲ....။ ကိုယ်စားရမယ့်ထဲက တိရိစ္ဆာန်လေးတွေကို ကျွေးတာလည်း ကုသိုလ်ဖြစ်တာပဲ.....။ တချို့တတ်နိုင်တဲ့သူတွေ သံဃာတော်တွေကိုတန်းဆွမ်းလောင်းလှူတာမျိုး ဒါနသေးသေးလေးတစ်ခုအဖြစ် ကိုယ်လမ်းမှာတွေ့ရတဲ့ သက်ကြီးရွယ်အိုတွေကိုလည်း ကိုယ်တတ်နိုင်သလောက်လေး ပေးကမ်းတာမျိုးတွေကို habit တစ်ခုအနေနဲ့ ကုသိုလ်ကိုနေ့စဉ် လုပ်နိုင်သေးတာပဲ... လုပ်လို့ရတာပဲ...။ တကယ်စိတ်ထဲလုပ်ချင်ရင် ကုသိုလ်စိတ်ဖြစ်ဖို့က လွယ်လွယ်လေးပါ...။ ပေးကမ်းသောလက်တစ်စုံဖြစ်နိုင်ကြပါစေ.....။

ထာဝရဒါနကုသိုလ် ၆ မျိုး

၁။ အာရာမရောပ- သစ်သီးဥယျာဉ် ပန်းဥယျာဉ်စိုက်ပျိုး လှူဒါန်းခြင်း၊

၂။ ဝနရောပါ- သစ်ပင်ကြီးများစိုက်ပျိုး၍ ဖြစ်စေ၊ သစ်တောကို အပိုင်းအခြား သတ်မှတ်၍ ဖြစ်စေ လှူဒါန်းခြင်း၊

၃။ တံတားဆောက်လုပ်လှူဒါန်းခြင်း၊

၄။ ရေအိုးစင်တည်ဆောက် လှူဒါန်းခြင်း၊

၅။ ရေတွင်းလှူဒါန်းခြင်း၊

၆။ ကျောင်းဇရပ်ဆောက်လုပ်လှူဒါန်းခြင်း...။ (ဓမ္မစာပေ)

ကုသိုလ် အမြဲလုပ်ပါ....။ ကုသိုလ်အားကြီးလာရင်အားလုံးကအဆင်ပြေသွားမှာပါ အမှန်ပါပဲ

ဘဝမှာ အဆင်မပြေတာတွေ ကြုံတဲ့အခါတိုင်း ကုသိုလ်ကောင်းမှုကို ပိုပြီးပြုလုပ်ပါ...။ အဆင်မပြေလို့ ဗေဒင်သွားမေးလည်း ကုသိုလ်လုပ်ခိုင်းတာပဲ မဟုတ်လား....။ သူတို့အပြောကတော့ ယတြာချေတာပေါ့။

ဘယ်ဆရာမှ အကုသိုလ်လုပ်ခိုင်းပြီး ယတြာမချေခိုင်းဘူး။ ကုသိုလ်ပဲလုပ်ခိုင်းတာ....။ အဲဒီလိုဆိုတော့ သူ့အားကိုးတာထက် ကိုယ့်အားကိုယ်ကိုးပြီး ကုသိုလ်တရား ကြိုးစားပွားရုံပေါ့။

အဆင်မပြေလည်း ကုသိုလ်လုပ်၊

အဆင်ပြေရင်လည်း ကုသိုလ်လုပ်၊

အတိုက်အခိုက်ကြုံရင်လည်း ကုသိုလ်လုပ်၊

အနှောက်အယှက်ရှိရင်လည်း ကုသိုလ်လုပ်၊

ပိုပြီးအဆင်မပြေရင် ပိုပြီးကုသိုလ်လုပ်၊

လုပ်နေရင်းနဲ့ကို ပိုဆိုးလာနေရင်လည်း

စိတ်ဓာတ်မကျနဲ့....။ ယုံကြည်မှုအပြည့်၊ ဇွဲကြီးကြီးနဲ့သာ ဆက်လုပ်...။ သေချာပေါက်ကို ကုသိုလ်က ကိုယ့်ကို စောင့်ရှောက်ပါလိမ့်မယ်....။ ယုံကြည်မှုနဲ့ ဇွဲရှိမှုကိုတော့ မလျော့စေနဲ့....။

ဘဝမှာ ကုသိုလ်တွေ အားကြီးလာရင် အကုသိုလ်တွေ၊ အဆိုးတွေ အားနည်းသွားမှာပဲလေ....။ သောက်ရေခွက်လောက် ရှိတဲ့ ရေထဲကို ဆားတစ်ကုတ်လောက် ပစ်ထည့်ရင် အဲဒီရေခွက် ငန်တူးသွားမှာပေါ့....။

ရေအပြည့်ရှိနေတဲ့ ရေကန်ကြီးထဲကို ဆားတစ်ကုတ်လောက် ပစ်ထည့်ကြည့်ပါလား၊ ရေအရသာ ဘာမှပြောင်းမှာ မဟုတ်ဘူးလေ....။ ရေက များနေတာကိုး....။ ဒီလိုပဲ ကုသိုလ်တွေ အားကြီးနေရင် အကုသိုလ်ဟာ အသေးအမွှားလေးပဲ ဖြစ်သွားမှာပေါ့.....။ ဒါကြောင့် ကုသိုလ်ကောင်းမှုကို လျော့မတွက်ပါနဲ့...။ အဆင်တစ်ခါမပြေတိုင်း ကုသိုလ်တစ်ခု တိုးလုပ်ပါ။ ပိုပြီးမပြေရင် ပိုပြီးလုပ်ပါ....။ ကုသိုလ်အားကြီးလာရင် အားလုံးက အဆင်ပြေသွားမှာပါ အမှန်ပါပဲ...။

🄲🅁🄴🄳🄸🅃

ပါချုပ်ဆရာတော်

ဒေါက်တာဘဒ္ဒန္တနန္ဒမာလာဘိဝံသ

ပန်း.....

ခုတလော Good Vibe လေးရနေတယ်...။ ဒါက လမ်းဘေးတစ်နေရာမှာတွေ့လိုက်ရတဲ့ ကင်းပုံနွယ်ပင်လေးက ပန်းလေးပွင့်နေတာလှလို့ ရိုက်ထားတာ...။ ကင်းပုံသီးတော့ စားဖူးတယ် ကင်းပုံညွှန့်လေးတွေကိုတော့မစားဖူးဘူး ဟင်းချိုချက်သောက်ရင်ကောင်းတယ်တဲ့....။ ကင်းပုံသီးလေးတွေကတော့ ပုစွန်ခြောက်လေးနဲ့နှပ်စားရင် သိပ်ကောင်းတာပဲ...။ လောကမှာ သဘာဝကပေးထားတဲ့ စားပင်သီးပင်တွေကပေါများကြွယ်ဝလွန်းလှပါတယ်....။ ဘယ်အပင်က စားလို့ရတယ် မရဘူး အဆိပ်ရှိတယ် မရှိဘူးဘဲ ခွဲခြားတတ်ရင်ရပြီ....။ လူတွေမှာလည်း အဲလိုပဲ အဆိပ်ရှိတဲ့သူ, မရှိတဲ့သူ ခွဲခြားတတ်ဖို့ အရေးကြီးတယ်...။ ခွဲခြားတတ်ရင်တော့ ဆရာကြီးပဲ....:) တွေးကြည့်ရင် သနားစရာတော့ကောင်းတယ် လမ်းဘေးမှာ ဘယ်သူမှ ဂရုမပြုသတိမထားမိတဲ့ ပန်းပွင့်လေး သူ့မှာလည်း သူ့တန်ဖိုး သူ့အလှရှိတယ် မြင်တတ် ကြည့်တတ်ရင်ပေါ့...။

 

ဒီနေ့ နှင်းဆီပန်းနီရဲရဲတစ်ပွင့်ပန်ဖြစ်တယ်......

ပြီးတော့... ဒီနေ့ နှင်းဆီပန်းပန်တဲ့ကောင်မလေး ၁၃ ယောက်ကိုဖမ်းသွားကြသတဲ့...။ တွေ့လားသားရီး နင့်ပထွေးနဲ့ခွေးတစ်သိုက်က ပန်းပွင့်လေးတောင်ကြောက်ကြတယ်တဲ့....ဟဟ...။

__________________

Revolution will prevail 

မိုးငွေ့

Hello!!!....

 

အဆိုပြိုင်ပွဲဝင်တစ်ယောက်ဖြစ်ခဲ့တဲ့ ငွေဇင်လှိုင်း ကာဗာပြန်ဆိုထားတဲ့ "ဟယ်လို" သီချင်းလေးကို MDY FM 87.9 MH မှာနားထောင်လိုက်ရတယ် ...။ သေသေချာချာနားထောင်ခဲ့ဖူးတဲ့ သီချင်းတစ်ပုဒ်ပေမယ့် မူရင်းအဆိုရှင်ကို ဘယ်လိုမှ စဉ်းစားလို့မရလို့ You Tube မှာပြန်ရှာတော့မှ ငယ်ငယ်မှန်းသိခဲ့ရ....။ ကာဗာပြန်ဆိုပေမယ့် မြူးဆစ်ပိုင်း ဗားရှင်းကို သိသိသာသာဘာမှသိပ်မပြောင်းထားပါဘူး ငွေဇင်လှိုင်းက သူ့စတိုင်လ်နဲ့သူဆိုသွားတာ နားထောင်လို့ကောင်းတယ်....။ သူဆိုတဲ့စတိုင်လ်က R & B ဘက်ပိုသွားတယ်လို့ ခံစားမိတယ်...ကောင်းတယ်....။

ငယ်ငယ်ဆိုခဲ့တဲ့ "Hello" က "အလွမ်းရဲ့ည" DVD ထဲကသီချင်းလေးလို့ထင်ပါတယ်.... တေးရေးက ရဲလေးပါ....ဒီသီချင်းလေးနားထောင်ပြီး ၂၀၁၀ - ၂၀၁၂ ဝန်းကျင်ကို ပြန်သတိရစေတယ်....။

__________________
Revolution will prevail
မိုးငွေ့

လက်ရှိဘလော့ရွာသူ.....

ကျမကို ဘယ်သူမှမရှိတော့တဲ့ သရဲခြောက် ဖုံတက်နေတဲ့ ဘလော့ရွာမှာခုချိန်ထိရှိနေသေးလို့ ဘလော့ဂါတွေက လာလောပြောကြနဲ့ ကျမတော့ ဘလော့ဂါတစ်သက်တာဆုရတော့မှာပဲ....။ ကျမပြီးရင် မချစ်(CKA) နဲ့ အန်တီမာမာကတော့ ပို့စ်တွေပုံမှန်လေးတင်နေကြပါတယ်...။ တကယ်က ကျမ စာရေးရတာကိုနှစ်သက်လို့ မြတ်နိုးလို့ကို ခုထိတည်တံ့နေတာပါ ဒီနေရာလေးမှာ....။  ကျမရန်ကုန်ရောက်ခါစ ခုနှစ်တန်းကျောင်းသူကတည်းက သုံးပြီးသားကျောင်းစာအုပ်ဗလာစာအုပ်အဟောင်းအလွတ်နေရာမှန်သမျှကို စာတွေရေးနေတတ်တာ အဲအရွယ်ကတည်းက ဒိုင်ယာရီတွေရေးရေးနေခဲ့တာ ...ဝတ္ထုတွေဘာတွေရေးနေခဲ့တာ ...။ သိရသလောက်တော့ ကျမတို့က စာရေးတဲ့အနုပညာမျိုးရိုးတော့မရှိပါဘူး အမေကတော့ စာဖတ်တာပဲ သူတို့ခေတ်က ယုဝတီခင်စိန်လှိုင်တို့ တက္ကသိုလ်ဘုန်းနိုင်တို့ နေနွယ်ဇင်မြင့်တို့ ငှားငှားဖတ်တာတွေ့တာပဲ...။ ကျမငယ်ငယ်က အမေငှားလာတဲ့ စာအုပ်တစ်ခါယူဖတ်တာ အမေက ဒါကလေးဖတ်ရတဲ့စာအုပ်မဟုတ်ဘူးလို့ပြောပြီး ပြန်သိမ်းသွားတာမှတ်မိတယ်...။ ကျမတို့ တာလေရွာမှာ အဲတုန်းက စာအုပ်အငှားဆိုင်က ကျောင်းဝင်းထဲက ဆရာမကြင်မေအိမ်ပဲရှိတာ...။ အဲဆရာမက သူငယ်တန်းအတန်းပိုင်ဆရာမ ဆံပင်လည်းညှပ်တယ် စာအုပ်အငှားဆိုင်လည်းဖွင့်ထားတယ်...။ ကျမတို့ကလေးတွေကတော့ ကာတွန်းစာအုပ်တွေငှားဖတ်တာပေါ့....။ ရှမ်းပြည်မှာက ရှမ်းကလေးလေးတွေ စာအုပ်မဖတ်ကြဘူး ...အေးလေ မြန်မာပြည်က ကလေးတွေလည်းဘာထူးလဲ စာအုပ်စာပေဆိုတာ ဝေးနေကြတာပါပဲ...။ ခုခေတ်လက်ရှိအခြေအနေပိုဆိုး ကျောင်းမတက် စာမတတ်တဲ့ ကလေးတွေ အရေအတွက်ပိုများလာနေပြီ...။ စာဖတ်ပြန်တဲ့သူတွေကျတော့လဲ မြန်မာလူမျိုးတွေက တလွဲဆံပင်ကောင်းတွေလေ...။ အယူအဆတွေလွဲမှားနေတာ ခေတ်အဆက်ဆက် တည့်ပေးလည်းမရဘူး... တည့်ပေးတဲ့သူသာမောသွားမယ် သေသွားမယ်...။ ကိုယ်ပိုင်စဉ်းစားဆင်ခြင်တုန်တရားလည်းနည်းပါးတော့ အဖက်ဖက်ကတိုးတက်ရာလမ်းကြောင်းက ခုချိန်ထိ စမ်းတဝါးဝါး အရင်းစစ်ကြည့်တော့ စာမတတ်တာက ပထမ ဉာဏ်ရည်မလိုက်နိုင်လို့လမ်းချော်တွေးနေတာက ဒုတိယ...။ 

ကံ ဉာဏ် ဝီရိယ ဆိုတာ စာထဲမှာ အလကားရေးပြထားတာမဟုတ်ဘူး....။ ကံဆိုတာက အလုပ်... ဝီရိယအားကောင်းကောင်းနဲ့ အလုပ်လုပ်ရမယ် ဉာဏ်လည်းရှိရမယ်...ဒါကအပျင်းကြီးတဲ့ မြန်မာလူမျိုးအများစုကိုပြောနေတာ ဆရာလုပ်တာမဟုတ် သတိပေးနေတာ...။ ဉပမာ ရန်ကုန်မြို့ ခုပဲကြည့်လေ မြန်မာလူမျိုးတွေက မြို့ပြင် ဆင်ခြေဖုံးရောက် တရုတ် အိန္ဒိယ တခြားတိုင်းရင်းသားနဲ့ လူမျိုးခြားတွေက မြို့ထဲ တိုက်တာကြီး လုံးချင်းအိမ် ခြံဝင်းနဲ့နေနိုင်ကြတာမဆန်းဘူးဘဲ... သူတို့ရဲ့စိတ်ဓါတ်နဲ့ ဇွဲ လုံ့လ ဝီရိယတွေနဲ့ မယှဉ်နိုင်ဘူးလေ....။ ကျမ နှိမ်ပြီးပြောတာမဟုတ်ဘူး တကယ်လည်း အဲလိုဖြစ်နေတာလေ....။ တိုင်းပြည်မကောင်းတာ နိုင်ငံခေါင်းဆောင်မကောင်းတာကလည်းမပြောနဲ့ နှစ်ရာနဲ့ထောင်နဲ့ချီကတည်းက တစ်ကိုယ်ကောင်းစိတ်နဲ့ပဲအုပ်ချုပ်ခဲ့ကြတာမလား ဘုရင်ခေတ်တုန်းကလည်း တိုင်းသူပြည်သားဘာကြည့်ပေးလို့လည်း သူတို့အဝိုင်းအဝန်းလေးတစ်ခုကိုပဲကွက်ပြီးကောင်းစား သူတို့သားသမီးတွေပဲပညာသင်ပေးခဲ့တာ ပြည်သူတွေက စာမတတ်ပေမတတ် ငတုံးငအ ဖြစ်လေ သူတို့အတွက်ကောင်းလေပဲလေ ခုခေတ်ထိပါပဲ ပြောရင်ဆုံးမယ်မထင်ဘူး...။ အဲတော့ အဲလိုလူတွေရဲ့လက်အောက်မှာမရုန်းထွက်ဘဲ အလကားအချောင်လိုချင်စိတ် မနာလိုမုန်းတီး မစ္ဆျရိယတွေများပြီး ကြိုးစားချင်စိတ်မရှိကြတော့... ခုဆို ခြေကောင်းလက်ကောင်းနဲ့ တောင်းစားနေကြတာများ မြင်မကောင်းဘူး မြို့ကြီးပြကြီးမှာ.....။  Sပျင်းတွေများတဲ့ကြားထဲ ချစ်ခင်စည်းလုံးမှုကမရှိ ဒီလိုပုံစံနဲ့မပြောင်းလဲနိုင်သေးရင်တော့ နောက်နှစ်တစ်ရာဆို လူမျိုးတုံးလောက်တယ်....။ အဲတော့ အဖြစ်မရှိဘဲ လေကျယ်ပြီးထိုင်နေလေ မနာလိုစိတ်တွေပွားနေလိုက်အဲမှာ ဘာမှတော့ဖြစ်မလာဘူး တကယ်အလုပ်လုပ်နေတဲ့သူကတော့ ငတ်မသွားဘူးဟုတ်လား သူရောက်ချင်တဲ့နေရာကိုရောက်အောင်သွားနေမှာပဲ...။

ပြောချင်တာက ဘလော့မှာစာရေးဖြစ်နေသေးတဲ့အကြောင်း ရောက်သွားတာကတစ်နေရာဖြစ်နေပြီ....။ ကျမကတော့ ကျမပေ့ချ်မှာ လူတစ်ယောက်ပဲလာဖတ်ဖတ် နှစ်ယောက်ပဲလာဖတ်ဖတ် ဆက်ရေးဖြစ်နေဦးမှာပါပဲ........။ ဪ...  မနေနိုင်မထိုင်နိုင်ဝင်ဖတ်ပြီး တီဆားတို့ခံရသလို မကျေနပ်လို့ လာဆဲဆဲ ရေးနေဦးမှာပဲ ....... နော်....ကျေးဇူး....။

__________________
Revolution will prevail
မိုးငွေ့

Dear Angel(15)....

ချစ်သော အိန်ဂျယ်.....,,

အခု...မိုးတွေစရွာနေပြီ....

ဒီနှစ် မိုးကနောက်ကျတယ်.... မိုခါးမုန်တိုင်းဆဲပြီးနောက် နှစ်ပတ်လောက်နေမှရွာတာ... ထုံးစံအတိုင်း ပန်းတောက်တွေကလည်း မိုးကိုစောင့်နေရလို့ မိုးပေါက်တွေထိတွေ့မှပဲ တပြိုင်နက်ထဲ ပွင့်ကြရတယ်...။ 

မိုးကိုချစ်တတ်တဲ့ကိုယ်......
မိုးရိပ်တွေညို ပတ်ဝန်းကျင်တစ်ခုလုံး အုံ့မှိုင်းနေတဲ့အနေအထားမျိုးကို နှစ်သက်တတ်လွန်းတဲ့ ကိုယ်က ဒီနှစ်မိုးရာသီကို အမှုမဲ့အမှတ်မဲ့ဖြစ်သွားရလောက်အောင် အသိစိတ်တွေလွတ်နေခဲ့တယ်...။ 

ကြုံဆုံခဲ့ရတဲ့... အဖြစ်အပျက်တွေက  အိပ်မက်ထဲထိခြောက်လှန့်နေတုန်း.....။

ကိုယ်ရဲ့ Guardian Angel က   နာကျင်မှုတွေနဲ့အတူ ကိုယ့်ကို အမှတ်သည်းခြေကြီးကြီးနဲ့ သင်ခန်းစာပေးသွားခဲ့တယ်...။ အဲဒီသင်ခန်းစာကရတဲ့အရာအားလုံးကို သေတဲ့အထိမှတ်သားဖို့ နာတတ်ဖို့ ကိုယ့်ကိုယ်ကိုအကြိမ်ကြိမ် သတိပေးထားတယ်..။ အဲချိန်ကစပြီး ကိုယ်ဟာ ပေါ့ပါးတဲ့အမွှေးအတောင်တစ်စုံနဲ့ ဝေဟင်မှာ လွတ်လပ်စွာ ပျံသန်းနိုင်ပါသေးလားလို့ သတိတရရှိစေခဲ့တယ်....။

အချိန်တစ်ခုထိတော့ အိပ်မက်ဆိုးတွေကို မက်နေရလိမ့်ဦးမယ်...  အဲဒီနောက် အိပ်မက်ဆိုးတွေဟာ တဖြေးဖြေး...... တဖြေးဖြေးနဲ့ ကိုယ့်ထံကနေ မှေးမှိန်ပျောက်ကွယ်သွားလိမ့်မယ်လို့ ကိုယ်မျှော်လင့်ပါတယ်...။ 

ဆန့်ကျင်ဖက်ဘယ်လိုအရာမဆို အချိန်အကြာကြီး ဒွန်တွဲရိုးမရှိပါဘူး...။ သဟဇာတရှိမနေသမျှတော့ ဘယ်လိုလူမျိုး ဘယ်လိုအရာမျိုးကမှ အတူတူရှိနေလို့မရပါဘူး..။ ဒါ..လောက သဘာဝပါ...။

အခု ကိုယ်ဘာတွေလုပ်မလဲဆို.... ဝင်းမြင့်ရဲ့ ကဗျာစာအုပ်လေးတွေကိုဖတ်မယ်... ပုံဆွဲမယ်... သီချင်းတွေနားထောင်မယ် ...အစားကောင်းတွေ လျှောက်သွားစားမယ် ကော်ဖီဆိုင်ထိုင်ရင်း မျက်စိအစာကျွေးမယ်....ပျော်စရာကြီးနော် အိန်ဂျယ်...။

ခုကစပြီး မိုးတွေရွာတာကိုကြည့်ပြီး အရင်လို ပျော်ရွှင်နိုင်ဖို့ ကိုယ့်ကိုယ်ကို သတိပေးထားတယ်...:)

Still flying....

Still loving.....

____________________
Revolution will prevail
မိုးငွေ့

ဓမ္မအထွေထွေမှတ်စုများ(၂၈).....

 

 "နတ်"တွေဟာ နေ့စဉ်

အစည်းအဝေး လုပ်တဲ့အခါ

လူ့ပြည်မှာ လူတွေဟာ

ဘာတွေလုပ်လဲ ဆိုတာ

မိမိရဲ့ကိုယ်စောင့်နတ်က

တင်ပြပေးရတယ်၊

အဲထဲမှာ ကုသိုလ်တကာ့

"ကုသိုလ်"ထဲတွင်

အမြင့်ဆုံးဖြစ်သော

ဝိပဿနာကျင့်ကြံ့ အားထုတ်သူကို

မြေ စောင့်နတ်

ရေ စောင့်နတ်

တော စောင့်နတ်

နတ် အမျိုးမျိုးက

အင်မတန် စောင့်ရှောက်ပေးရတယ်၊

စောင့်ရှောက် မပေးရင်

အထက္က နတ်မင်းကြီးတွေက 

အပြစ်ပေး ဒဏ်ခံရတယ်၊

အရင်ကလည်း ပြောဖူးတယ်

မနက်ဖြန်မှာ

ကမ္ဘာကြီးနဲ့ ဂြိုလ်တစ်ခုခု

ဝင်တိုက်ပြီးတော့

ပျက်စီးမယ် ဆိုပါစို့

လူတစ်ယောက်ယောက်ကများ 

အရိယာပုဂ္ဂိုလ်ဖြစ်ရမယ်ဟု

တရားတွေ ကျင့်ကြံ့နေရင် 

ကမ္ဘာပျက်မဲ့နေ့ကို နတ်တွေဗြဟ္မာတွေက 

ရက်ရွေ့ပေးရတယ်။

အဲလူဟာ အရိယာဖြစ်မှပဲ 

ကမ္ဘာကြီးက ပျက်ပေးရတယ်။

ဘုရားရှင်ခေတ်တုန်းကလည်း 

သံဃာတပါးက

ဝိပဿနာအားထုတ်နေရင်း 

မကြာခင် ရဟန္တာဖြစ်တော့မယ့် 

အချိန်အခါဖြစ်လေသည်။

မွန်းလွဲပြီးမှ ရဟန္တာဖြစ်ရင် 

ဆွမ်းမစားလိုက်ရမှာဆိုးလို့ 

နေနတ်သားကြီးက 

နေကို ရပ်တန့်ပေးထားပြီး 

ရဟန္တာဖြစ်မှပဲ မွန်းလွဲပေးရတဲ့အထိ့ 

စောင့်ရှောက်ပေးကြတယ်။

ယနေ့ခေတ်မှာလည်း 

တကယ်တရားကျင့်နေတဲ့

မဟာဗောဓိမြိုင်ဆရာတော်ကြီးဆိုရင်

နတ်သားနတ်သမီးတွေက လာလာဖူးကြသတဲ့။

အရိယာပုဂ္ဂိုလ် ဖြစ်မဖြစ်ကိုအသာထားဦး

ဝိပဿနာ တကယ်ကျင့်နေလျင်ပင်

သင့်အနီးအနားမှရှိတဲ့ ဘုမ္မစိုး ရုက္ခစိုး

ရွာစောင့်နတ်တွေ နယ်စောင့်နတ် 

နတ်အမျိုးမျိုးတွေက သင့်ကို 

စောင့်ရှောက် ကယ်တင်ပေးရတယ်။

သင်ဒုက္ခရောက်ရင် လာကူညီပေးရတယ်။

အခြားကုသိုလ်တွေ လုပ်ရင်လည်း 

စောင့်ရှောက်ပါတယ်။ သို့သော် 

သင်ဟာ နတ်တွေကို အမျှပေးဝေဦးမှ၊ 

အမျှဝေလည်း နတ်တွေဟာ 

သာဓုခေါ်နိုင်ဦးမှ ဖြစ်တယ်။

နတ်တစ်ပါးက ကြားရင် 

သင့်ကို တစ်ပါးက စောင့်ရှောက်မယ်။

သို့သော် အဲ့နတ်က သင်ဘယ်သွားသွား

အမြဲတမ်းတော့ စောင့်ရှောက်နိုင်မှာ မဟုတ်ဘူး

ဝိပဿနာအားထုတ်သူကြတော့ 

တလောကလုံးမှာရှိတဲ့နတ်တွေက 

သင်ဘယ်သွားသွား စောင့်ရှောက်ပေးရတယ်။

သင်မနောစိတ်က ဘာလိုချင်လဲ? 

ဥပမာ အစားအစာဖို့ အခက်အခဲဖြစ်နေလျင်ပင်

နတ်တွေက လူရောင်ဖန်ဆင်းပြီး

ဆွမ်းလာကပ်တဲ့အထိ အင်မတန်စောင့်ရှောက်ကြတယ်။

#Credit (ပါမောက္ခချုပ် ဆရာတော်ကြီး)

မသင်ကြားခဲ့ရသော လိုအပ်ချက်များ.....

ကျမ အက်ဆေးတွေနဲ့တခြားပို့စ်တွေမတင်နိုင်တဲ့ ကြိုကြားတွေမှာ ကိုမျိုးသီဟကျော်ရဲ့ စာတွေကို ဗဟုသုတအဖြစ်ရော စိတ်ဓါတ်ခွန်အားအနေနဲ့ပါ တင်ပေးဖြစ်နေဦးမှာပါ....။ ရည်ရွယ်ချက်ကတော့ ကျမ တယ်လီဂရမ်မှာ Follow လုပ်ထားတဲ့ Life coach ကိုမျိုးသီဟကျော်ရဲ့ စိတ်ခွန်အားပေးစာတွေ ကိုယ်တိုင်သတိမထားဖြစ်ခဲ့တဲ့ မလုပ်ဖြစ်ခဲ့တဲ့ ဘဝအတွက်လိုအပ်ချက်တွေကို ကိုယ်တိုင်အတွက်ရော ကျမရဲ့စာဖတ်သူတွေအတွက် မျှဝေပေးချင်တာပါ.....။ 

~~~~~~~~~~~~~~~

ဘဝမှာ လူရယ်လို့ စဖြစ်ကထဲက အခုအရွယ်ထိ အခြားသူနဲ့ ယှဥ်ရင် ဘယ်လောက်ထိ တော်ရမယ်၊ တတ်ရမယ်၊ သာရမယ်၊ ပိုင်ဆိုင်ရမယ်၊ လုပ်နိုင်ရမယ် ဆိုတာတွေပဲ သင်ကြားခြင်းခံလာရတော့ ...။

ဦးစားပေးတတ်ခြင်းတွေ၊ ခွင့်လွတ်တတ်ခြင်း၊ စွန့်လွှတ်နိုင်ခြင်းတွေ၊ ရောင့်ရဲတင်းတိမ်တတ်ခြင်း၊ သည်းခံနိုင်ခြင်းတွေမှာ အရမ်းကို အားနည်းသွားကြတယ် ...။

စစ်မှန်တဲ့ ပျော်ရွှင်ခြင်း ဆိုတာကလဲ ဘယ်လောက်ပိုင်ဆိုင်ရတယ် ဆိုတာထက် ဘယ်လောက် စွန့်လွှတ်နိုင်တယ် ဆိုတာက ပိုပြီး ပျော်ရွှင်စရာ ဖြစ်လာတယ်။ များများ ပိုင်ဆိုင်ရလေ Attachment ပိုများလေလေ ဘဝက ပိုလေးလံ လေလေ ပါပဲ။ စွန့်လွတ်နိုင်လေလေ ပိုပြီး ပေါ့ပါးလေလေပေါ့ ...။

ပြီးတော့ ငယ်ငယ်က သေသေချာချာ မသင်ကြားခဲ့ရတဲ့ ယခု လက်ရှိ Life မှာ မဖြစ်မနေ လေ့လာ လေ့ကျင့်ထားသင့်သော အရာတွေက ...။

1. မိမိ၏ လက်ရှိ Emotion, Feeling များကို ခံစားသိရှိနေပြီး မည်သို့ မည်ပုံ ချိန်ညှိ ဆောင်ရွက်ရမည်ကို ကောင်းစွာ သိရှိနားလည်ခြင်း

2. Personal Life, Professional Life များတွင် စည်း၊ ဘောင် ကောင်းကောင်းချ၍ နေထိုင်၊ လုပ်ကိုင်တတ်ခြင်း

3. လေ့ကျင့်ခန်းလုပ်ခြင်း၊ ကောင်းစွာ အိပ်စက်အနားယူတတ်ခြင်း၊ ကျန်းမာရေးနှင့် ညီညွတ်မျှတစွာ စားသောက် နေထိုင်တတ်ခြင်း

4. မကောင်းသော အတွေးများ၊ မကောင်းသော အမြင်များ ဝင်ရောက်လာလျှင် ပြန်လည် ချိန်ညှိ Reframing လုပ်တတ်ခြင်း

5. တကိုယ်ရည် ငွေကြေးစီမံခန့်ခွဲမှုကို ကောင်းမွန်စွာ ဆောင်ရွက်နိုင်ခြင်း

6. ပေါင်းသင်းဆက်ဆံရေး ကောင်းမွန်ပြီး အပြုသဘောဆောင်သည့် ရေရှည် Relationship များတည်ဆောက်ထားနိုင်ခြင်း

7. မိမိကိုယ်မိမိ ယုံကြည်မှုတည်ဆောက်နိုင်ခြင်းနှင့် မြှင့်တင်နိုင်ခြင်း

8. ကျန်းမာရေး ဗဟုသုတများခြင်းနှင့် မိမိကျန်းမာရေး စနစ်ကို ကောင်းမွန်စွာ စောင့်ရှောက်၊ နေထိုင်တတ်ခြင်း

9. Self Love, Self Care အားကောင်းခြင်း

10. တိကျ မှန်ကန်သော ရည်မှန်းချက် ပန်းတိုင်များ ချမှတ်နိုင်ပြီး အောင်မြင်အောင် ဆောင်ရွက်နိုင်ခြင်း

11. ကျဆုံးမှုများ၊ အမှားယွင်းများ ကြုံဆုံရလျှင် မှန်ကန်သော တုန့်ပြန်မှုမျိုး၊ တောင့်ခံနိုင်မှုမျိုး၊ ပြန်လည် ထူထောင်နိုင်မှုများကို သိရှိနားလည်ထားပြီး အကောင်းဆုံး အနေအထားဖြင့် ဆောင်ရွက်နိုင်ခြင်း

တို့ပဲ ဖြစ်ပါတယ်။ Have A Nice Day! 💜💜💜

🍀 Myo Thiha Kyaw ~ Randy 🍀

🔸 Life Coach & Spiritual Guide 🔸

__________________

Revolution will prevail

မိုးငွေ့

ဘာကိုစတေးရမလဲ.....

ကျနော့်အကြိုက်ဆုံး ကိုမျိုးကျော့သီချင်းတွေထဲမှာ ဒီသီချင်းက ထိပ်ဆုံးကပါတယ်....။ ကိုမျိုးကျော့ကို စသိကတည်းက သူ့သီချင်းတွေကို စနားထောင်ကတည်းက အရမ်းကြိုက်ခဲ့ရတဲ့ သီချင်းတစ်ပုဒ်...။ ကာဗာလည်း ခနခနဆိုကြတယ်...။ ပထမဆုံး ဒီသီချင်းလေးရဲ့ ဗားရှင်းအသစ်မှာ မြေပဲယိုအဖွဲ့က "အချစ်များစွာအတွက်" စီးရီးမှာ ပြန်ဆိုထားတာကိုလည်းကြိုက်တယ် အခု မေမဒီနဲ့စုံတွဲပြန်ဆိုထားတဲ့ ဗားရှင်းကိုလည်းကြိုက်တယ်...။ မူလသီချင်းကိုက စာသားရော သံစဉ်ရောကကောင်းပြီးသားမို့ ဘယ်လိုဗားရှင်းမျိုးကိုပဲပြောင်းပြောင်းဘယ်သူပဲကာဗာဆိုဆို ကောင်းနေတော့တာပဲ....။ ကိုမျိုးကျော့ သီချင်းတွေကို အရမ်းနှစ်သက်စွဲလန်းနားထောင်နေဖြစ်တဲ့ အဲအချိန်တွေက ကျနော့် Crush လေးနဲ့ ကျောင်းတော်မှာသာယာပျော်ရွှင်နေတဲ့အချိန်ပေါ့...။ ခုတော့လည်း Crush ဟာ အိမ်ထောင်တွေဘာတွေကျ ကလေးတွေရ တကယ့်ဦးလေးကြီးတစ်ယောက်ပုံစံ ထိပ်တွေလည်းပြောင်လို့ ဟဟ....ကိုယ်တွေက နှစ် နှစ်ထောင် Vampire မျိုးဆိုတော့.... အမလေး ငါမယူလိုက်တာမှန်တယ်ဖြစ်ရော....။ ဟိုတုန်းကတော့ သူမင်္ဂလာဆောင်သွားလို့ အသည်းတွေကွဲလိုက်ရတာ.....။

ငယ်ငယ်ကအကြောင်းပြန်ပြောလို့ ဟိုတလောက ဘဏ်မှာ ကျနော် ဆယ်တန်းပြီးလို့ အင်္ဂလိပ်စာသင်တန်းတက်တုန်းက သူငယ်ချင်းနဲ့ပြန်တွေ့တယ် ....။ ပြန်တွေ့တယ်ဆိုတာ ကျနော့်ကိုသူအရင်တွေ့ပြီး လိုက်ကြည့်နေတာ ကျနော်ဝင်ထိုင်လိုက်တာ သူ့အနောက်တစ်ခုံကျော်က သူကျနော့်ကိုနောက်ပြန်လှည့်ကြည့်သေးတယ် ကျနော်ဘယ်လောက်အကျင့်မကောင်းလည်းဆို သူကြည့်နေတာသိပေမယ့် မသိချင်မမြင်ချင်ယောင်ဆောင်လိုက်တယ် ခေါ်နေရမှာစိုးလို့....ကျနော် အဲလိုလူမှုရေးညံ့ပါတယ်....။ ဟိုတုန်းက အဲကောင်လေးနာမည်က Rays(ကျောင်းကဆရာကြီးပေးထားတဲ့နာမည်)တဲ့ အသားဖြူဖြူကြည်ကြည် ရုပ်ကဘိုရုပ်စပ်တယ်...ချောချောလေး...။ သူ အသက်ဆယ့်ရှစ်နှစ်ကတည်းက နာမည်ကြီး Brand ကားတာယာကုမ္ပဏီတစ်ခုမှာ အလုပ်လုပ်နေတာ ကျနော် လေယာဉ်မယ်လုပ်ချင်တယ်ပြောတော့ CV form ဖြည့်ထား..သူအိမ်မှာလာယူပေးမယ်ပြောတာ...။ ကျနော်ကတော့ ငယ်ငယ်လေးနဲ့အလုပ်လုပ်နေတဲ့သူ့ကို အားတွေကျလို့ပေါ့....။ ဟော ....အခုကျနော် ဘဏ်မှာပြန်တွေ့တော့ ပလေကပ်ပုဆိုးနဲ့ရှပ်အင်္ကျီနဲ့ ဗိုက်ရွှဲရွှဲ အဖိုးကြီးပေါက်စရုပ်ပေါက်နေပြီတဲ့ အံ့ဩစရာပဲ တကယ်က သူကျနော့်ထက် သုံးလေးငါးနှစ်လောက်ငယ်သေးတယ်...။ ခုအလွန်ဆုံးရှိ လေးဆယ်ငါးပေါ့....(ဒါလေးက ကြုံတုန်းပြောပြတာ ပို့စ်နဲ့မဆိုင်)..။

ပို့စ်အကြောင်းပြန်ဆက်မယ်... ဒါကြောင့် ကျနော်အရမ်းကြိုက်ခဲ့တဲ့ ခုထိလည်း ကြိုက်နှစ်သက်နေဆဲ "ဘာကိုစတေးရမလဲ" ကို  June ရဲ့ ပထမဆုံး မိုးနေ့ညနေလေးမှာ မှတ်မှတ်ရရတင်ပေးလိုက်ပါတယ်....။ အားလုံးသာယာကြည်နူးတဲ့နေ့တစ်နေ့ဖြစ်ပါစေ.....။

 

_______________________

Revolution will prevail

မိုးငွေ့