My Doodles Art (3).....

မနက်က တက်စီငှားစီးတော့ ကားဆရာက ကျနော့်ကို ပန်းချီဆရာမလားတဲ့...။ ကျနော့်ကိုဘာကြည့်ပြီး ပန်းချီဆွဲသင်တဲ့ဆရာမလို့ထင်တာလဲလို့ ပြန်မေးတော့ လက်ထဲကပါလာတဲ့ ထမင်းစားပန်းကန်အခင်းပြားလေးကို သူက ပန်းချီကားတွေလို့ထင်နေတာတဲ့... ပန်းချီဆရာမဆို ပန်းချီဝါသနာပါတဲ့ ရှစ်နှစ်အရွယ် သူ့ရဲ့သားလေးကို သင်တန်းအပ်ချင်လို့ပါတဲ့....။ ကျနော်ကဖြင့် ပုံဆွဲဝါသနာပါပေမယ့် တခါမှတော့ ဆရာနဲ့သေချာသင်တာတွေဘာတွေ မလုပ်ဖူးဘူး ကိုယ်ဆွဲတတ်တာဆွဲလိုက်တာပဲ...။ ပန်းချီအခြေခံဘယ်လိုတွေစဆွဲရသလဲတောင်မသိတဲ့သူပါဆို....။

စိတ်ပါနေသရွေ့ဆွဲဖြစ်နေဦးမယ်ထင်တယ် Dooldes တွေကို.....။ တကယ်က အသက်ကြီးလာရင် လုပ်စရာရှိအောင်ဆိုပြီး ရှာထားတဲ့ activities တွေထဲက တစ်ခုကို ကျနော်က ခုကစပြီး လုပ်ဖြစ်နေတာ...။ အပျင်းပြေ စိတ်လေ စိတ်ညစ်တဲ့အခါ စိတ်ကို အနားပေးတဲ့ သဘောနဲ့ စမ်းရေးရင်း ခုတော့ ညအိပ်ရာဝင်ခါနီးဆို နည်းနည်းလေးဆွဲလိုက်ရမှ ....။ ခု သုံးအုပ်မြှောက်စာအုပ်နဲ့ လေးငါးပုံလောက်ပြီးနေပြီ အဲပုံအသစ်တွေကိုတော့ နောက်တစ်ပို့စ်ကျမှ တင်ပါမယ်....။ 

__________________

Revolution will prevail

မိုးငွေ့

 

ကျနော်နဲ့တရုတ်တန်း.....

အဲဒီနေ့မနက်က တရုတ်တန်းကိုအစောကြီးရောက်သွားခဲ့တယ်... ရုံးကနယ်ပြန်မယ့်ညီမတစ်ယောက်ကို ကားဂိတ်လိုက်ပို့တာ ...။ တကယ်က ကျနော် တရုတ်တန်းက ဆီချက်ခေါက်ဆွဲစားချင်တာ...။ ကျနော်စားခဲ့တဲ့ဆိုင်က "ဘောဂကဖီး" မဟာဗန္ဓုလလမ်းမပေါ်မှာ ၁၇လမ်းနဲ့ လမ်းမတော်ကြားက...။ အဲဆိုင်မှာ ဆီချက်အပြင် ကြက်ပေါင်းဆီချက် နံရိုးပေါင်းဆီချက်နဲ့ ဝက်ကောက်ညှင်းထုပ်တွေရတယ် သူ့ဆိုင်ရဲ့ Signature က ဘလက်ကော်ဖီအေး...။ တရုတ်တန်းဖက်ပြန်ရောက်တော့ ငယ်ငယ်က ကျနော်ရန်ကုန်ရောက်ခါစ ၁၇လမ်းမှာနေခဲ့ဖူးတာကို သွားသတိရမိတယ်...။ အဲတုန်းက တိုက်ခန်းက ကျဉ်းကျဉ်းလေးနဲ့ လေဝင်ပေါက် Shutter လေးတွေပါတဲ့ သစ်သားပြူတင်းပေါက်တွေက အပေါ်အောက်ဖောက်ထားတယ် အဲပုံကိုပြချင်လို့ Google မှာသွားရှာလာတာ..။ အဲတုန်းက တိုက်ခန်းတွေကကျဉ်း နောက်ဖေးဝရံတာဘာညာလည်းမပါတော့ အဝတ်တွေလှန်းရင် အောက်ပူတင်းပေါက်တံခါးတွေဖွင့် ပုံစံထွင်းထားတဲ့သစ်သာတန်းလေးတင်ပြီး ဝါးလုံးနဲ့လှန်းရတာမျိုး...။ ခုခေတ် ကလေးတွေတောင် အဲလိုမြင်ဖူးကြမယ်မထင်တော့ဘူး...။ ကျနော်ကတော့ တောကတက်လာပြီး မြို့နေလူတွေအဝတ်လှန်းနည်းကို ကြည့်ပြီး အံ့အားသင့်ရ...။ အဲတုန်းက ကျနော့်မှာ မနက်ဆို အဲပြူတင်းပေါက်အောက်ပေါက်နားထိုင်ပြီး အောက်ကလူတွေရဲ့လှုပ်ရှားသွားလာတာကို ငေးကြည့်ရ...။ တိုက်ရှေ့ကအိမ်က ရေခဲရောင်းတာ ရေခဲတုံးအကြီးကြီးတွေကို စပါးခွံတွေဖယ် လွှနဲ့ခွဲ ..။ ရေသန့်ရေခဲဆိုတာ ခုခေတ်မှသာရှိတာ အဲတုန်းက ရေခဲတုန်းတွေက လမ်းပေါ်မှာ ဒီတိုင်းချပြီး သုံးခါနီးရေဆေးသုံးရတာ ရေကလည်းရေသန့်မဟုတ်ဘူး ရှိတဲ့ ဘုံဘိုင်ရေနဲ့လုပ်တာ ရေစစ်တွေ ဘာတွေလည်းမရှိ အဲရေခဲတုံးတွေကို အရေပျော်တဲ့အထိထားကြည့်ပါလား အနယ်တွေအမှိုက်တွေတွေ့ရပါလိမ့်မယ်...။ ဒါပေမယ့်လည်း အဲခေတ်က အဲလိုရေခဲတွေနဲ့ပဲ အအေးဖျော် ကျောက်ကျောရည်ထဲထည့် သောက်ရတာပါပဲ...။ ကျနော်မှာတစ်နေ့တစ်နေ့ ဘာမှလုပ်စရာမရှိတော့ အဲပြူတင်းပေါက်လေးမှာ ထိုင်ထိုင်ကြည့်ရတာ အောက်ကသူများတွေအလုပ်လုပ်တာကို...။ ရောက်ခါစဆိုတော့ ပျော်ကလည်းမပျော် ငိုမဲ့မဲ့ သနားကမားရုပ်လေးနဲ့ပေါ့...။ အဲတုန်းက ဖုန်းကင်မရာများရှိရင် ကိုယ့်ပုံကိုယ်မှတ်တမ်းတင်ထားချင်မိတာ...ပြူတင်းပေါက်နားလေးမှာ သံတိုင်လေးကိုင်ပြီး အောက်ထပ်ကိုငေးမောနေတဲ့ ပျော်ရွှင်မှုကင်းမဲ့နေတဲ့ အသက်ဆယ့်သုံးနှစ် ကလေးမလေးတစ်ယောက်.....။ ကျနော်တို့နေတဲ့အထပ်က ပထမထပ် မြေညီထပ်မှာက ချစ်ကောင်းဆီချက်ဆိုင်ရှိတယ် ကျနော့်တစ်သက်မှာစားဖူးသမျှဆီချက်ခေါက်ဆွဲထဲမှာ ချစ်ကောင်းဆီချက်လောက်ကောင်းတာမတွေ့ဖူးသေးဘူး...။ ခုတော့ အဲလူလဲဆိုင်မဖွင့်တော့ဘူး ....။ နောက်ပိုင်းဆီချက်ခေါက်ဆွဲတွေက ပဲငံပြာရည်တွေ ခေါက်ဆွဲဖတ်တွေကအစ ပြောင်းသွားလို့ထင်တယ် အရင် မူလအရသာမျိုးမရတော့ဘူး...။ ခုဒီနေ့စားခဲ့တဲ့ ဘောဂဆိုင်က ဆီချက်ဆိုလည်း ပုံမှန်ပဲ မူလအရသာမဟုတ်တော့ဘူး ....။ ပြီးတော့ အဲဆိုင်မှာရတဲ့ ဘလက်ကော်ဖီအေးဆိုတာလည်း ကျနော် ရန်ကုန်ရောက်ခါစက ကျနော့်အဒေါ်က စတီးမတ်ခွက်ကြီးနဲ့ ပြည်တွင်းဖြစ်ကော်ဖီမှုန့်ကိုနှပ်ပြီး သကြားရည်နဲ့ဖျော် ရေခဲသေတ္တာထဲအအေးခံထားပြီးသောက်ကြတာ...။ အဲတုန်းက ကာဖီကျွိလို့ခေါ်ကြတယ် တရုတ်တွေ...။ ခုဘောဂကဖီးမှာတော့ အော်စွန်းလို့ခေါ်တယ်....။

 

______________________

Revolution will prevail

မိုးငွေ့

ဟို အို ပို နို ပို နို .....

 

♦️ Ho’oponopono ( ဟို အို ပို နို ပို နို ) နည်းနဲ့ စိတ်ကို လွှတ်ချကြည့်ကြမယ်။ စိတ်ကို Release, Relax, Healing လုပ်ချင်တဲ့ အခါတွေမှာ Hawaiian ဟာဝိုင်ယီကျွန်းပေါ်က လူတွေသုံးတဲ့ ရှေးဟောင်း ရိုးရာဓလေ့ နည်းလမ်းတစ်ခုပါ ။ အခုနောက်ပိုင်း တစ်ကမ္ဘာလုံးက ဒီိ Healing Method Mediation ကို တွင်တွင်ကျယ်ကျယ် သုံးလာကြပါတယ်။ နည်းလမ်းကလဲ အရမ်းကို ရိုးရှင်းပြီး လွယ်ကူပါတယ် ။

🔹 လူတွေမှာ ကိုယ့်ကိုယ်ကိုနဲ့ အခြားလူတွေ အပေါ်မှာ ခွင့်လွှတ်နိုင်ခြင်းနဲ့ ခွင့်မလွတ်နိုင်ခြင်းဆိုတဲ့ စိတ်က အမြဲလွန်ဆွဲနေတတ်ကြပါတယ် ။ တခါတလေကျတော့ ကိုယ့်ကိုယ်ကို ခွင့်မလွှတ်နိုင်တဲ့ အကြောင်းအရာတွေက ပိုများနေသလိုတောင် ခံစားနေရနိုင်ပါတယ် ။

ကိုယ့်ဘာသာ တစ်ယောက်ထဲ ဝမ်းနည်းမှုတွေ၊ နာကြည်းမှုတွေ၊ ဒေါသတွေ၊ အလိုမကျခြင်းတွေ၊ အပြစ်ရှိသလို ခံစားနေရတာတွေ စတဲ့ Negative Emotion တွေကြောင့် နေရထိုင်ရတာ ကိုယ့်စိတ်နဲ့ကိုယ်တောင် အဆင်မပြေတော့တဲ့ အခါတွေဆိုတာ ရှိပါတယ် ။

ဒါ့ကြောင့် ဒီမကောင်းတဲ့ ခံစားချက်တွေကို လျော့ချပြီး ကိုယ့်စိတ်နဲ့ ကိုယ့် Soul ကို ပြန်လည်သင့်မြတ်စေရေးနှင့် Self-Forgiveness ကိုယ့်ကိုယ်ကို အပြည့်အဝ ခွင့်လွတ်ခြင်းပေးခြင်းဖြင့် ဘဝမှာ ပိုပြီး နေလိုထိုင်လို့ အဆင်ပြေလာတဲ့ အကျိုးကျေးဇူးတွေ၊ စိတ်ချမ်းသာမှုတွေကို Ho’ohponopono Practice လုပ်ပေးခြင်းအားဖြင့် ရရှိနိုင်ပါတယ် ။

ဒီလို Negative Emotions တွေကို Cleansing လုပ်ပေးခြင်းအားဖြင့် ကိုယ်လဲ နေရထိုင်ရတာ ပိုအဆင်ပြေလာမယ် ။ ကိုယ့်ပတ်ဝန်းကျင်မှာ ရှိတဲ့ လူတွေ၊ မိသားစုတွေ၊ Relationship တွေနဲ့လဲ ပိုပြီး ဆက်ဆံရေးကောင်းမွန်လာမယ်။ ကိုယ့်ရဲ့ Energy တွေလဲ ပိုကောင်းလာနိုင်ပါတယ် ။

Ho’oponopono စကားလုံးရဲ့ အဓိပ္ပါယ်က “ အကြောင်းတရားတွေကို ဟန်ချက်ညီညီ ပြန်ဖြစ်စေတာနဲ့ ကိုယ့်အတွက် အရာရာကို မှန်အောင် လုပ်ပေးတယ်၊ ထားပေးတယ်” ဆိုတဲ့ အဓိပ္ပါယ်ဖြစ်ပါတယ် ။ လေ့ကျင့်ရမှာက Self-Love ကိုယ့်ကိုယ်ကို နှစ်နှစ်ကာကာ ချစ်ပြီး၊ Self-Forgiveness ကိုယ့်ကိုယ်ကို သေသေချာချာ ခွင့်လွှတ်ပေးရမှာပါ။

~ Myo Thiha Kyaw ~ Randy ~

ဘဝမှာ မွေးလာပြီးကထဲက အခုချိန်ထိ ဒုက္ခတွေ၊ သောကတွေ၊ ဝမ်းနည်းပူဆွေးမှုတွေကို အခံရဆုံးက ကိုယ်နဲ့ ကိုယ့်စိတ်နဲ့ ကိုယ့်ခန္ဓာကိုယ်ပါပဲ ။ ဒါကိုတောင် ကိုယ်က ကိုယ့်ခန္တာနဲ့ ကိုယ့်စိတ်ကို အပြစ်တင်နေဦးမယ် ။ ခွင့်မလွတ်နိုင်ဘူးဆိုပြီး ဒုက္ခတွေ သောကတွေ ထပ်ပေးနေရင်တော့ ဘယ်သူ လွန်သလဲ ဆိုတာ စဉ်းစားကြည့်ပေါ့ ။

♦️ ဒါ့ကြောင့် Ho’oponopono ရဲ့ ကိုယ့်ကိုယ်ကို ပြန်ပြောပေးရမဲ့ စကားက “ I am sorry, please forgive me, thank you, I love you.” ပါ။ ကိုယ့်ကိုယ်ကို သေသေချာချာလေး အာရုံစိုက်ပြီး “ ငါမင်းကို တောင်းပန်ပါတယ် ။ ကျေးဇူးပြုပြီး ငါ့ကို ခွင့်လွတ်ပေးပါ ။ ပြီးတော့ ငါမင်းကို အရမ်းကျေးဇူးတင်ပါတယ် ။ ငါမင်းကို ချစ်ပါတယ်” ဆိုပြီး ရင်ထဲက အလေးအနက်ထားပြီးတော့ ကိုယ့်ကိုယ်ကို သေသေချာချာ ပြောပေးပါ ။

ဒီအရာကို ထပ်ကာ ထပ်ကာ ပြောပေးပြီး ကိုယ့်ကိုယ်ကို တစ််ကယ် တောင်းပန်ပါ ။ ခွင့်လွတ်ပေးပါ ။ ကျေးဇူးတင်ပါ ။ ချစ်ပေးပါ ။ ဒါကို သေသေချာချာ လုပ်ရုံပါပဲ။ Mediation Video တွေနဲ့ တွဲပြီးလုပ်ချင်တယ် ဆိုရင်တော့ အောက်မှာ Link ပေးထားပါမယ် ။

တိတ်ဆိတ်တဲ့ နေရာမှာ နားကြပ်တပ်ပြီး လဲလှောင်းပြီး ဖြစ်စေ၊ ထိုင်ခုံမှာ ထိုင်ပြီးဖြစ်စေ၊ တရားထိုင်သလို ထိုင်ပြီးတော့ ဖြစ်စေ လုပ်လို့ ရပါတယ် ။ ကားမောင်းနေရင်း၊ အန္တရာယ်ရှိတဲ့ စက်တွေ ကိုင်တွယ်နေတဲ့ အချိန်တွေမှာ လုပ်လို့ မရပါဘူး ။

https://youtu.be/vVFZmKSDS6w

Have A Nice Day! ♥️♥️♥️

🍀 Myo Thiha Kyaw ~ Randy 🍀

⭐️ Life Coach & Spiritual Guidance

⭐️ Reiki & Energy Healer

⭐️ Balance & Healing Chakra 

__________________

Revolution will prevail

မိုးငွေ့

အကျိုးရှိရှိနေဖို့.....

နမောဿတ ဘဂဝတော အရဟတော သမ္မာသမ္ဗုသတ္တာ

ပူဇော်သမျှကိုခံယူတော်မူထိုက်သော အလုံးစုံသောတရားတို့ကို မဖောက်မပြန် 

ကိုယ်တော်တိုင်သိတော်မူသော မြတ်စွာဘုရား....

မြတ်စွာဘုရားက လောကမှာ အကျိုးရှိရှိနေဖို့အတွက် ဘုရား၊ တရား အာရုံကို နှလုံးသွင်းထားပါတဲ့။ တရားကိုလည်း နှလုံးသွင်း အာရုံမပြုဘူးဆိုရင် အရိယာသံဃာတော်တွေရဲ့ ဂုဏ်ကို အာရုံပြုလိုက်ပါ။

ကဲ အဲဒီလိုမှ နှလုံးသွင်းပြီး မကျင့်နိုင်သေး

ရင် နောက်ဆုံး ကိုယ့်ရဲ့ သီလ 

ကိုယ်ကျင့်တရားကို ဆင်ခြင်နိုင်တယ်။ 

လူဝတ်ကြောင်တွေဆိုရင်တော့ အနည်းဆုံး 

ငါးပါးသီလလောက်ကို လုံခြုံအောင် လုပ်ရ

မယ်။ ငါးပါးသီလကို ဝါရိတ္တသီလ လို့ ခေါ်

တယ်။ တစ်ပါးမှ လျော့လို့မရဘူးနော်။

ငါးပါးသီလပြည့်စုံမှ လူ့ဘဝပြည့်စုံမယ်။

အဲဒါလေးကို နည်းနည်းလောက် ပြန်စဉ်းစား

ကြည့်ရအောင်။ လူ တစ်ယောက်ဟာ အရင်

ဘဝတုန်းက ငါးပါးသီလထဲက လေးပါး

လောက်ကို ပြည့်စုံအောင် ဖြည့်ကျင့်ခဲ့တယ်

နော်။ အဲဒီအထဲမှာ ပါဏာတိပါတကံ ကို 

မလုံခြုံခဲ့ဘူးဆိုရင် လူ့ဘဝရောက်လာတဲ့

အခါမှာ ချမ်းချမ်းသာသာ ဖြစ်ပေမယ့်လို့ 

အသက်တိုမယ်။ ဘယ်သူက အသက်တိုတို 

နေချင်မလဲနော်၊ ပါဏာတိပါတကံ မလုံခြုံခဲ့

ရင် လူဖြစ်လာတဲ့အခါမှာ အနာရောဂါများ

မယ်၊ အသက်တိုမယ်၊ ဒါက အပေါ့ဆုံး 

အပြစ်နော်။ ငရဲကျတာ မကျတာ အသာ

ထားနော်၊ ငါးပါးသီလရဲ့ အပေါ့ဆုံးအပြစ်က 

ဒီအထိ အောင် ခံရမယ်။

အာဒိန္နာဒါနကံ မလုံခြုံခဲ့ရင် ပစ္စည်းတွေဟာ 

ရှာလို့တော့ရပါရဲ့၊ ခဏခဏ ပျက်စီးသွား

မယ်၊ မီးလောင်တဲ့အထဲ ပါသွားမယ်၊ ကိုယ့်

ရဲ့ ပစ္စည်းဟာ အမြဲတမ်း ပျက်စီးနေမယ်။

နောက်တစ်ခု ကာမေသု မိစ္ဆာစာရကံ မလုံရင် 

လူမုန်းများတယ်၊ သူနဲ့ ဘယ်သူမှမတည့်ဘူး၊ 

သူ့မျက်နှာမြင်တာနဲ့ အလိုလိုမုန်းလာတယ်၊ 

အခြောက်တိုက် မုန်းတာမျိုးပေါ့။ နောက်ပြီး

တော့ “ကျား” မဟုတ် “မ” မဟုတ် ဖြစ်တတ်

တယ်။

မုသာဝါဒကံ မလုံရင် သူ့စကားကို မယုံကြ

တော့ဘူး။ သူပြောသမျှ မည်သူ တစ်ဦးတစ်

ယောက်မျှ မယုံကြည်တဲ့အခါ သူ့ရဲ့ စကား 

အရာမရောက် ဖြစ်တယ်။ ဒါကြောင့် “မုသား

ဆို ရယ်စရာအနေနဲ့တောင်မပြောဘဲ 

ရှောင်ကြဉ်သင့်တယ်” လို့ မြတ်စွာဗုဒ္ဓ 

ဟောကြားထားတယ်။

သုရာမေရယကံ မလုံခြုံခဲ့သူဟာ ဖြစ်ရာဘဝ

မှာ ဦးနှောက် မပြည့်ဘူး၊ ကျပ် မပြည့်ဘူး 

ပြောကြတယ်၊ ရူးနှမ်းနှမ်း ဖြစ်တတ်တယ်။

ဒါ့ကြောင့် လူတွေရဲ့ အခြေခံသီလဖြစ်တဲ့ 

ငါးပါးသီလလောက်ကို လုံခြုံ အောင် 

စောင့်ထိန်းသင့်တယ်။ ငါးပါးသီလထဲက 

တစ်ခုမှလျော့လို့မရဘူး။ လူရယ်လို့ ဖြစ်လာ

တဲ့အခါမှာ အသက်ရှည်ရမယ်၊ ကျန်းမာပြီး 

အနာကင်းရမယ်၊ ပစ္စည်းဥစ္စာ ရှိရမယ်၊ လူ

ချစ်လူခင် ပေါများရမယ်၊ ဉာဏ်ပညာ 

ပြည့်စုံရမယ်၊ ဩဇာရှိရမယ်။ ရူးနှမ်းနှမ်း

မဟုတ်ဘဲ တည်ကြည်သူဖြစ်ရမယ်။ 

ငါးပါးသီလလုံခြုံရင် အဲဒီအကျိုး တွေရ

မယ်။ ဒါမှ လူ့ဘဝမှာ ပြည့်စုံသူလို့ ပြောလို့ရ

မယ်။

ငါးပါးသီလဖောက်ဖျက်ခဲ့ရင် လူ့ဘဝမှာ 

တစ်ခုခုလိုနေလိမ့်မယ်။ အဲဒီတော့ ကိုယ့်ရဲ့ 

သီလလေး ကိုယ်ပြန်ဆင်ခြင်ကြည့်လိုက်ရင် 

ကျိုးပေါက်တာမရှိဘူး၊ သေစေ လိုတဲ့စိတ်နဲ့ 

ဘယ်သတ္တဝါကိုမှငါမသတ်ဘူး၊ သူတစ်ပါး

ပစ္စည်းကို မရိုးသားတဲ့စိတ်နဲ့ လိုချင်မှုမရှိဘူး၊ 

မတရားရယူခြင်းမှ ရှောင်ကြည်ရမယ်၊ မု

သာဝါဒကို ရယ်စရာ အနေနဲ့တောင် မပြော

ဘူး၊ သုရာမေရယကံ ကို ကျန်းမာရေး

အတွက်နဲ့တောင် မဖောက်ဖျက်ဘူး။ 

သီလကို ပြန်ပြီးဆင်ခြင်ဆန်းစစ်လိုက်တဲ့

အခါမှာ ဝမ်းသာတဲ့ ပီတိစိတ်ကလေး 

ဖြစ်လာတာပေါ့။ မြတ်စွာဘုရားက ရှည်

ရှည်ဝေးဝေး မဟော ပါဘူး၊ လက်တွေ့ကျ

တာကိုပဲ ဟောပြောသွားတာပါ။

နောက်တစ်ခုက ကိုယ့်ရဲ့ စွန့်လွှတ်စွန့်ကြဲ

ပေးကမ်းမှု ဒါနကို ဆင်ခြင်ပြီး ဝမ်းသာနေရ

တာ။ မိသားစုဝင်တွေကို အိမ်မှာ ကိုယ့်ရဲ့ 

လုပ်အားဒါနကို အကြောင်း ပြုပြီး ခွဲဝေ

ကျွေးမွေးတဲ့အချိန်မှာ ဒါမှမဟုတ် 

အလုပ်တာဝန် ခွဲဝေဆောင်ရွက်ပေးတဲ့ အခါ

မှာ မစ္ဆရိယ မရှိဖို့လိုအပ်တယ်။ မစ္ဆရိယရှိရင် 

ဒါကတော့သူဖို့ ဒါကတော့ငါ့ဖို့ ဆိုပြီးတော့ 

ခွဲဝေလာတတ်တယ်။ ကိုယ့်ရဲ့ မိတ်ဆွေ

သင်္ဂဟတွေကိုလည်း ခွဲဝေပြီး အားလုံးရဲ့ဆန္ဒ

ကို ဖြည့်ဆည်းပေးကာ ဝမ်းမြောက်နေကြရ

မယ်။ အားလုံးက ချစ်ခင် တဲ့ စာဂဂုဏ်ကို 

အာရုံပြုရင် ကြည်နူးဝမ်းမြောက်မှုက

တစ်ဆင့် စိတ်တည်ငြိမ်မှု ရလာတော့တယ်။

နောက်တစ်ခုက ဒေဝတာနုဿတိ ပွားများ

လို့ရတယ်။ ဒါ နတ်တွေကို ပူဇော်တာမျိုး၊ 

သတိရတာမျိုး မဟုတ်ပါဘူး။ နတ်တွေရဲ့ 

ဂုဏ်ဖြစ်တဲ့ သဒ္ဓါ, သီလ, သုတ, စာဂ ဆိုတဲ့ 

အရည်အသွေးကောင်းတွေကိုအာရုံပြုပြီး 

ကိုယ့်ရင်ထဲမှာရှိတဲ့ အရည်အချင်းနဲ့ နှိုင်းယှဉ်

ကြည့်ပြီး ငြိမ်းအေးလာအောင်လုပ်တာဖြစ်

တယ်။ နတ် တွေရဲ့ ကုသိုလ်ကောင်းမှုတွေ

ဟာ ကိုယ့်ရဲ့ ရင်ထဲမှာလည်းရှိနေတာပဲလို့ 

ဆင်ခြင် စဉ်းစားပြီး ဒေဝတာနုဿတိ 

ပွားများခြင်းဖြင့် ဝမ်းမြောက်မှု ပီတိ, ငြိမ်

အေးမှု စိတ်ချမ်းသာပြီး တည်ကြည်လာပါ

တယ်။

အဲဒီလို ဘဝမှာ နေထိုင်နည်း အမျိုးမျိုးရှိတဲ့

အနက် ဖော်ပြပါ ၆-မျိုးထဲက တစ်ခုခုနဲ့နေ

ရင် ဓမ္မအသိနဲ့နေခြင်းလို့ မြတ်ဗုဒ္ဓက 

ဟောပြော ပြသထားတယ်။ ဒါကလည်း 

သဒ္ဓါ, ဝီရိယ, သတိ, သမာဓိ, ပညာ ငါးမျိုး 

လုံလောက်ပြည့်စုံမှသာ အခုလုပ်တဲ့လုပ်ငန်း

အောင်မြင်နိုင်မယ်။ ဒါကြောင့် ၅-မျိုးကို 

လုံလောက်အောင် ဖြည့်ကျင့်ရင်း မြတ်ဗုဒ္ဓ 

ဟောပြောပြသခဲ့တဲ့ မဟာနာမသုတ်တော်

လာ ဓမ္မအသိနဲ့ နေခြင်းမျိုးနဲ့ တရားချစ်ခင် 

သူတော်စင်အပေါင်းတို့ နေနည်းမှန်စွာ ဘဝ

မှာ နေထိုင် နိုင်ကြပြီး အေးချမ်းတည်ငြိမ်တဲ့ 

ပုဂ္ဂိုလ်မြတ်တွေ ဖြစ်နိုင်ကြပါစေသတည်း။

#ဆရာတော်ဒေါက်တာအရှင်နန္ဒမာလာဘိဝံသ

#Posted_by_Words_of_Buddha

[ ဓမ္မအသိဖြင့်အကျိုးရှိရှိနေမည် 

တရားတော်မှ ]

ရှမ်းမုန့်ဖက်ထုပ်.....

 

ကျမရဲ့မွေးရပ်မြေ ရှမ်းပြည်အရှေ့ပိုင်းမှာ သင်္ကြန်ဆိုရင် ဒီလိုရှမ်းမုန့်ဖက်ထုပ်တွေ အများကြီးလုပ်ပြီး အိမ်တွေလိုက်ဝေကြတဲ့ ဓလေ့ရှိတယ်...။ တခြား ရှမ်းတောင် ရှမ်းမြောက်ဖက်ကသူတွေလည်း လုပ်မယ်လို့ထင်ပါတယ် ဒေသအလိုက်လုပ်နည်းလေးတွေ ပါဝင်ပစ္စည်းတွေပဲ ကွဲပြားသွားမယ်ထင်ပါတယ်....။

တကယ်က နှပ်ပြီးသားမုန့်သားပေါ်မှာ ပါးပါးလှီးထားတဲ့ အုန်းသီးဖတ်နုနုလေး နှစ်ဖတ်သုံးဖတ်လောက်ထည့်ကြတယ် ကျမက ဘာမှမပါတဲ့ မုန့်သားကို အုန်းဆံလေးနဲ့ဖြူးစားရတာပိုကြိုက်လို့...။ နှစ်သက်ရင် မြေပဲဆံလေးတွေပါထည့်လည်းရတယ်...။ အွန်လိုင်းမှာ မြောက်ပိုင်းသူ မခမ်းဆုလုပ်ပြတာတော့ နှမ်း မြေပဲထောင်းတွေ မုန့်သားထဲထည့်နယ်တာတွေ့တယ် အဲလိုမျိုးတော့မစားဖူးသေးဘူး...။ 

ကျမတို့ရှမ်းပြည်မှာ သင်္ကြန်ဆို မုန့်ဖက်ထုပ်အပြင် တချို့အိမ်တွေက ရှမ်းခေါက်ဆွဲပါချက်ပြီးဝေသေးတယ်...။ အုန်းသီးဌာပနာတဲ့ မြန်မာမုန့်ဖက်ထုပ်လိုမျိုးလည်းလုပ်ကြတယ်...။ ကျမတို့ငယ်ငယ်က အဲလိုချိန်ဆို အိမ်တိုင်းနီးပါး မုန့်လုပ်ကြတော့ ကောက်ညှင်းဆန်တွေပြည်လိုက်တွေနဲ့ ကျောက်ဆုံရှိတဲ့အိမ်တွေမှာ မုန့်သွားကြိတ်ဖို့တန်းစီရတယ်...။ တရွာလုံးမှ ကြိတ်ဆုံရှိတဲ့အိမ်က ညှပ်ခေါက်ဆွဲလုပ်တဲ့အိမ်တွေမှာပဲရတာကိုး...။ ခုခေတ်တော့ ရယ်ဒီမိတ်ဆန်မှုန့်တွေရှိတော့ အဆင်ပြေတာပေါ့....။

ကျမ ရှမ်းမုန့်ဖက်ထုပ်လုပ်တဲ့ အချိုးပြောပြပါမယ်...

ကောက်ညှင်းဆန်မှုန့်  850 g
ဆန်မှုန့်  200 g
ကျိုပြီးသားထန်းလျက်ရည်ပျစ်ပျစ် 800 ml
ဆား 1 tsp
ဆီ 1 Tbsp

ရေလိုသလောက်

ဆီနဲ့ ရေကလွဲပြီး ပါဝင်ပစ္စည်းအားလုံးကို ဇလုံကြီးကြီးတစ်ခုမှာသမအောင်ရောနယ်လိုက်ပါ...။ မုန့်သားနှံစပ်ခါနီး မုန့်သားလေးခပ်ပျော့ပျော့ဖြစ်အောင် ရေကိုလိုသလောက်နည်းနည်းဆီထည့်ပေး လိုချင်တဲ့အနေထားရောက်ရင် ဆီထည့်နယ်ပြီး နာရီဝက်နှပ်ထားရမယ်....။ မုန့်သားရရင် နေပြသန့်စင်ပြီးဖြတ်ထားပြီးသား ငှက်ပျောဖက်နဲ့ထုပ်ပြီး ရေဆူဆူနှစ်ထပ်ပေါင်းအိုးမှာ နာရီဝက်ပေါင်းပါ...။ မုန့်ရရင် ခနအအေးခံ ဖက်ထဲကခွာယူပြီး အုန်းဆံခြစ်နုနုလေးဖြူးစားပါ အရမ်းကောင်း...။ အရသာက အနီးစပ်ဆုံးပြောရရင် တရုတ်အီကွေ့မုန့်နဲ့ ခပ်ဆင်ဆင်တူပါတယ်....။

_______________________

Revolution will prevail

မိုးငွေ့

Self - Affirmation.....

ဒီနေ့ ကျနော် တယ်လီဂရမ်မှာ follow လုပ်ထားတဲ့ ကိုမျိုးကျော်ရဲ့ ခွန်အားဖြစ်စာလေးတင်ပေးချင်ပါတယ်...။

Self - Affirmation ဆိုတာက ကိုယ့်ကိုယ်ကို ခံယူချက်တစ်ခုခုကို အခိုင်အမာ ချမှတ်လိုက်တာပါ...။

Eg - I am strong. I am enough. I am smart. etc.. I am နဲ့ စတဲ့ ခံယူချက် စာကြောင်းတွေပါ .... နောက်ထပ် ပြောချင်တာက စကားလုံးတိုင်းမှာလဲ စွမ်းအင်တွေ ရှိပါတယ်။ ဥုံ .. ဆိုတဲ့ စကားလုံးလိုမျိုး။ ပရိတ်တရားတော်တွေ၊ ဂါထာတွေ၊ မန္တန်တွေ လိုမျိုး words တွေက Powerful ဖြစ်ပါတယ်...။

လူတိုင်းက ကိုယ့်ခံယူချက်နဲ့ ကိုယ်ရှေ့ဆက်နေကြသူတွေပါ...။ ကိုယ်က လုပ်နိုင်တယ်လို့ တွေးတဲ့ အရာတွေက လုပ်ဖို့ လွယ်ကူနေတတ်ကြပြီး ကိုယ် မလုပ်နိုင်ပါဘူးလို့ တွေးရင်တော့ လုပ်ဖို့ ခက်ခဲနေကြပြန်တယ်..။ ဒါ့ကြောင့် စိတ်သာ အဓိကမို့ ကိုယ့်ရဲ့ ခံယူချက်တွေကို အရင်ဆုံး ပြုပြင်သင့်ပါတယ်..။

အတွေးတွေ ပြောင်းသွားရင် လုပ်ရပ်တွေကလဲ ပြောင်းလဲ သွားမှာပါ..။ လုပ်ရပ်တွေ ပြောင်းလဲလာရင် ရလဒ်တွေကလဲ ကောင်းမွန်လာမှာ ဖြစ်ပါတယ်။ ဒါကြောင့် ရလဒ်ကို အဓိကကောင်းချင်ရင် အတွေးတွေ ကောင်းနေဖို့ လိုပါတယ်..။

ငါလုပ်နိုင်မှာ မဟုတ်ပါဘူး...။ ငါက သူများတွေလောက် Style မကျဘူး...။ ငါကို ချစ်မဲ့ ခင်မဲ့လူတွေ မရှိဘူး...။ အဲ့ဒီလိုတွေ တွေးပြီး လုပ်တဲ့ အပြုအမူတွေနဲ့ ဆိုရင်တော့ အပေါ်က ပြောသလို မကောင်းတဲ့ ရလဒ်တွေပဲ ထွက်လာမှာပါ...။

ဒါ့ကြောင့် ကိုယ့်ကိုယ်ကို ခံယူချက်တွေကို Positive ဘက်ကို ပြောင်းကြည့်ပါ...။

ဆရာကြီး မင်းသိင်္ခရေးတဲ့ Today Affirmation နဲ့ ဒီစာကို အဆုံးသတ်ပါ့မယ်...။

“ ငါဟာ စိတ်ဓါတ်ကြီးမား ရင့်သန်တဲ့သူဖြစ်တယ်။ ဘယ်လို အကြောင်းကိစ္စနဲ့မှ ငါ့စိတ်ဟာ ယောက်ယက်မခတ်ဘူး...။ ငါ့စိတ်ဟာ ကျောက်ဆောင်ကျောက်တုံးလို ခိုင်မာတယ်...။ ဒါ့ကြောင့်လဲ ငါနဲ့ တွေ့ကြုံဆုံဆည်းတဲ့ လူမှန်သမျှရဲ့ စိတ်ဓါတ်ကို လွှမ်းမိုးနိုင်တယ်။ ဒါဟာ ငါ့မှာ ရှိတဲ့ အရည်အချင်း အစစ်အမှန်ပဲ...။ "

ကိုယ် အလိုရှိသလို တီထွင်ကြံဆ အသုံးပြုနိုင်ကြပါစေ ...

Have A Nice Day! ♥️♥️♥️

🍀 Myo Thiha Kyaw ~ Randy 🍀

⭐️ Life Coach & Spiritual Guidance

⭐️ Reiki & Energy Healer

⭐️ Balance & Healing Chakra 

⭐️ Own Business Management Trainer

ပန်းတစ်ပွင့်.....

 

ကိုယ် လုပ်တဲ့အလုပ်တွေမှန်သမျှ စေတနာကောင်း ကောင်းနဲ့ လုပ်ဖို့ လိုအပ်တယ်...။

မှန်ကန်တဲ့ စိတ်နေသဘောထားတွေ၊ မှန်ကန်တဲ့စေတနာတွေ ရှိရမယ်...။

လူမှာ Intention လို့ခေါ်တဲ့ ရည်ရွယ်ချက်ကောင်းဖို့ အင်မတန်မှ အရေးကြီးတယ်...။

ကုသိုလ်ကောင်းမှုလုပ်ရင် ရည်ရွယ်ချက် ကောင်းရတယ်...။ 

ကောင်းတဲ့ရည်ရွယ်ချက်သည် စေတနာကောင်း၊ စေတနာကောင်းရင် ကံကောင်းမယ်...။

ကံကောင်းလို့ရှိရင် အကျိုးပေးကောင်းတယ်... ။

ကုသိုလ်ကောင်းမှု ဆိုတာ တစ်ကြိမ်တစ်ခါ လုပ် လိုက်တာကစပြီး ကုသိုလ်အဆက်ဆက်ကြောင့် နောက်ဆုံး နိဗ္ဗာန်ရသည့်တိုင်အောင် အကျိုးတရားဆိုတာ ဖြစ်ပေါ်လာနိုင်တယ်....။

ရှေးတုန်းက ပုဂ္ဂိုလ်တစ်ယောက် ဘုရားတစ်ဆူနဲ့ ကြုံတဲ့အခါမှာ ပန်းကလေးတစ်ပွင့် လှူတယ်....။

မိမိ လှူလိုက်တဲ့ ဒီကုသိုလ်ကောင်းမှုအပေါ်မှာအလွန်ကို ပီတိဖြစ်တယ်.....။

ဝမ်းမြောက်ဝမ်းသာ ဖြစ်ရတဲ့ကုသိုလ်စိတ်တွေ တိုးပွားပြီး သေသွားတယ်....။

နောက်ဘဝ တစ်ခု ရောက်တဲ့အခါမှာလည်း ကုသိုလ်တွေ ဆက်ဆက် လုပ်တယ်....။

ပန်းတစ်ပွင့် လှူရတဲ့ ကုသိုလ်ကို အခြေပြုပြီးတော့ ( ၉၁)ကမ္ဘာ အပါယ်ဘုံ မရောက်ခဲ့ဘူး....။

တိရိစ္ဆာန်ဘဝ မရောက်ခဲ့ဘူး...။ ပြိတ္တာဘဝ မရောက်ခဲ့ဘူး...။ ငရဲဆိုတာ မရောက်ခဲ့ဘူး....။

လူ့ပြည်ရောက်လိုက်၊ နတ်ပြည်ရောက်လိုက် ဒီကုသိုလ် ကံက စောင့်ရှောက်ထားတယ်...။ ဘယ်သူကမှ စောင့်ရှောက်တာ မဟုတ်ဘူး...။

ကုသိုလ်ကံကို ဓမ္မ လို့ ခေါ်တယ်...။

ဓမ္မဆိုတာ"အတ္တာနံ ဓာရေန္တေ ပဋိပဇ္ဇမာနေ စတူသု အပါယေသု အပတမာနေ ကတွာ ဓာရေတီတိ ဓမ္မော"
ဒီကုသိုလ်ဆိုတဲ့ သဘာဝတရားသည် အဲဒီ မိမိဖြစ်ရာ ပုဂ္ဂိုလ်ကို အပါယ်ဘုံမရောက်အောင် သူက ဆွဲဆောင်ထားနိုင်တယ်...။ စောင့်ရှောက်ထားနိုင်တယ်...။

အင်မတန်မှ အားကိုးစရာ ကောင်းတယ်...။

ပန်းတစ်ပွင့် လှူတဲ့ ကုသိုလ်ကို အခြေပြုပြီး(၉၁) ကမ္ဘာ အပါယ်မလားတဲ့ အပြင် နောက်ဆုံးအချိန်မှာ ဒီကုသိုလ်ကံကို အခြေပြုပြီး မြတ်ဘုရားနဲ့တွေ့လို့ တရားဓမ္မနာကြားပြီးနိဗ္ဗာန်မျက်မှောက်ပြုနိုင်တဲ့ ရဟန္တာပုဂ္ဂိုလ်ထိအောင် ဖြစ်သွားတယ်....။

လောကလူတွေက ချမ်းသာချင်ကြတယ်....။

သို့သော် အကုသိုလ်တွေ ရင်ထဲများလာပြီ ဆိုရင်တော့ ဆင်းရဲမှာပဲ သေချာတယ်....။

ကုသိုလ်တွေ ရင်ထဲနှလုံးထဲမှာ များလာပြီဆိုမှ ချမ်းသာမှာ ဖြစ်တယ်....။

ဒါကြောင့်မို့ မြတ်စွာဘုရားရဲ့ အဆုံးအမ တရားတော်နဲ့အညီ စေတနာမှန်မှန် စေတနာ ထက်ထက်သန်သန် ပြုလုပ်ခြင်းအားဖြင့်ကံကောင်းမှာ ဖြစ်တယ်....။

ကံကောင်းလို့ရှိရင်လည်း အကျိုးပေးကောင်းမှာ ဖြစ်တယ်...။

Crd:
ကျေးဇူးတော်ရှင် ပါမောက္ခချုပ်ဆရာတော်
ဒေါက်တာ နန္ဒမာလာဘိဝံသ
ပါချုပ်ဆရာတော် 

______________________

Revolution will prevail

မိုးငွေ့

Flowers.....🪷

 

အွန်လိုင်းမှာ နှစ်ပေါင်းများစွာ စိတ်တူ ကိုယ်တူ ဝါသနာတူ  ချစ်ခဲ့ လက်တွဲခဲ့ကြတဲ့ ဗိုလ်ပိုင်ကြီး(လွှမ်းပိုင်)နဲ့ထက်ထက်(Bobby Soxer)တို့ လမ်းခွဲပြတ်စဲကြပြီလို့ဖတ်လိုက်ရတယ်..။ ထက်ထက်အင်တာဗျူးလေးကိုလည်းကြည့်ပြီး Miley Cyrus ရဲ့ “Flowers” သီချင်းကိုမျက်စိထဲတန်းမြင်ယောင်မိသွားတယ်...။ ရည်းစားနဲ့ပြတ်ပြီး အသည်းကွဲတာလည်းကွဲတာပေါ့ အဲသီချင်းလေးထဲကလို မိုင်လေရဲ့  လွတ်လပ်ပေါ့ပါးသွားမှုကြီးနဲ့ ကခုန်နေတာကို သိပ်သဘောကျတာပဲ ...။ ပြီးတော့ “ I can love me better than you can “ ဆိုတဲ့စာသားကိုအကြိုက်ဆုံးပဲ...။ အသည်းကွဲပြီးရင် ပျော်ပျော်ရွှင်ရွှင်နေ လှလှပပလေးနေ အချစ်သစ်တဖန်မွေးဖွားလာလိမ့်မယ်ပေါ့....။

______________________

Revolution will prevail

မိုးငွေ့

Metta Wave.....

 

2022 တစ်နှစ်ပတ်လုံး လေးလံထိုင်းမှိုင်းမှုတွေနဲ့ Low Vibes မှာ အမြဲလိုလိုရှိနေတာရယ် Angel No.12 ရဲ့ ဖိအားပေးမှုတွေနဲ့ Evil ရဲ့ အားကောင်းမှုတွေကြောင့် ကျမ မေတ္တာလှိုင်းမပို့ဖြစ်တာ ဘယ်လောက်ကြာနေခဲ့လဲ....။ ခုတော့ စိတ်ချလက်ချ ဝန်ထုတ်ဝန်ပိုးမရှိ သန့်ရှင်း လွတ်လပ် ပေါ့ပါးစွာ ပြန်စလုပ်နိုင်လို့ ကိုယ့်ကိုယ်ကို တကယ်ပဲအားရမိသလို ကျေးဇူးလဲတင်မိတယ်....။ ကျမကို အမြဲစောင့်ရှောက်ပေးတဲ့ အိန်ဂျယ် ဆယ့်နှစ်ပါးလုံး အထူးသဖြင့် Angel No.8....thank you so much....။

ကောင်းမွန်တဲ့ဘယ်လိုအရာကိုပဲဖြစ်ဖြစ် ဆိုးရွားလွန်းတဲ့ဘယ်လိုအဖြစ်အပျက်မျိုးကိုပဲဖြစ်ဖြစ် မိမိကိုယ်တိုင်ပါဝင်ပတ်သက် ပြုလုပ်ဖန်တီးလို့ ဖြစ်လာရတာချည်းပဲ....။ ကျမ ကိုယ်လုပ်တဲ့ ကိုယ့်အပြစ်ကိုခံယူတယ် နားလည်သဘောပေါက်အောင်လုပ်တယ်...။ ဒီလိုပဲ မှတ်သားသင်ခန်းစာယူစရာရှိတာလည်း အရိုးစွဲသေသည်အထိ မှတ်သားတတ်ရတယ်...။ လူတစ်ယောက်မှာ အခွင့်အရေး နှစ်ကြိမ်ကနေ သုံးကြိမ်ထိအများဆုံးရကြတယ် ရနိုင်တယ် အဲသုံးကြိမ်ထိကို မယူတတ်ရင်တော့လည်း ကိုယ့်ရဲ့အရည်အချင်းနဲ့ အသုံးမကျမှုကြီးဖြစ်သွားတဲ့အတွက် ကိုယ်ရရှိထားတဲ့အရာတွေကို လက်လွတ်ဆုံးရှုံးတဲ့အခါလည်း စိတ်ဓါတ်ကြံ့ခိုင်စွာ ခံနိုင်ရည်အပြည့်ရှိနေရမယ်...။ အမှားတစ်ခုကိုထပ်မလုပ်ဖို့လည်း အနည်းဆုံး သတိပေးစကားတွေ Warning တွေအရင်လာတာပဲ အခွင့်အရေးသုံးကြိမ်ရနိုင်တာပဲ သုံးကြိမ်ကျော်သွားလို့ ထပ်လုပ်မိရင်တော့ မိမိကိစ္စ မိမိတာဝန် မိမိရဲ့ညံ့ဖျင်းမှုကြီးဖြစ်သွားပြီ...။ ကျမကတော့ လူညံ့တစ်ယောက်ဘယ်တော့မှ အဖြစ်ခံမှာမဟုတ်ဘူးပဲ...။ ဘယ်လိုပဲ လဲပြိုပြို လဲပြိုအောင်လာလုပ်လုပ် မသေမချင်းတော့ ပြန်ထနိုင်ဖို့ ခွန်အားတွေ သတ္တိတွေ စွမ်းအင်တွေ ကျမရဲ့ ခန္ဓာမှာ စိတ်ဝိညာဉ်မှာ အမြဲသိုလောင်ထားတယ်...။ ဘယ်အရာမဆို ကိုယ့်အတွက်ကောင်းတာလေးတွေ ရွေးတတ် ယူတတ်ဖို့ပဲလိုတယ် ....။

"ကိုရမ်ဒီမျိုးကျော်" ပြောသလိုပဲ Everything is Energy ဆိုတော့ ကိုယ့်ကိုယ်ကို High Vibes ဖြစ်အောင် မြှင့်နေတဲ့သူတွေ အတွက် ကိုယ့်ရဲ့ Surrounding က လူတွေ၊ အရာဝတ္ထုတွေကိုလဲ သတိထားပြီး Shift လုပ်ဖို့ ပါ။ တစ်ခုခုကို ပြောင်းလဲချင်တယ်ဆိုရင် ကိုယ်ကစပြီး ပြောင်းလဲရမယ်ဆိုတဲ့ အလေ့အကျင့်က တကယ်ကို မှန်လွန်းပါတယ်။ ဒါပေမဲ့ ဒီလိုပြောင်းလဲတဲ့ အချိန်မှာ ကိုယ့် ပတ်ဝန်းကျင်က Low Vibes ဖြစ်နေတယ်ဆိုရင် ကိုယ်ကလဲ အဲ့ဒီ Energy စက်ကွင်းထဲက မနဲလွတ်အောင် ပုံမှန်ထက် ပိုရုန်းရတာလေးတွေ ရှိတတ်ပါတယ်..။ ဥပမာ - ကိုယ်က အပြုသဘောဆောင်တဲ့ စိတ်နဲ့ ကောင်းတာတွေ တွေးနေ လုပ်နေတဲ့ အချိန်မှာ ကိုယ့်နဲ့ အနီးကပ်နေတဲ့ လူတွေက Negativity တွေ အရမ်းများနေတဲ့ အခါမျိုးတွေမှာ သူတို့ အတွေးအခေါ်တွေနဲ့ ကိုယ့်လုပ်ရပ်တွေက အမြဲဆန့်ကျင်ဘက်တွေ ဖြစ်နေတတ်ပြီး ကိုယ့်ရဲ့ ကောင်းနေတဲ့ Feeling ကပါ အောက်ကို ပြန်ပြန် Down ပြီး စိတ်ပျက်စရာတွေ ကြုံရတတ်ပါတယ်။ ဒီလို အခြေအနေဆိုရင်တော့ ဒီလို လူတွေနားက သေသေချာချာ ရုန်းထွက်တတ်ဖို့ လိုပါတယ်။

ခုကစပြီး Concentration ကောင်းအောင် Meditation ပြန်လုပ်ရမယ်....။ စိတ်ငြိမ်အေးချမ်းမှုကို ပြန်တည်ဆောက်ယူမယ်...။ ချစ်ခင်သူတွေဆီ ညစဉ် ပြန်ပြီး Metta Wave ပို့ပေးမယ်...။ 

__________________
Revolution will prevail
မိုးငွေ့