Dear Angel.....(5)

 

ချစ်သော... အိန်ဂျယ်..,

မင်းဆီက အမြဲတမ်းရထားတဲ့ အခွင့်အရေးတစ်ခုအတွက် ကျေးဇူးတင်ကြောင်းပြောချင်လို့ ရောက်လာခဲ့တာပါ......

"ခင်ဗျားက အိန်ဂျယ်ကို သိပ်ချစ်တာပဲလား"လို့ ခုတလော သူ ကိုယ့်ကိုမေးတတ်တယ် ....။ အိန်ဂျယ်ပို့စ်တွေကို ခပ်စိပ်စိပ်မတင်ဖြစ်တော့ပေမယ့် ချစ်ခြင်းမေတ္တာမှာ ဝန်တိုမှုရှိတတ်တယ်ဆိုတာ ကိုယ်သေချာနားလည်ထားတယ်...။ ကိုယ် ဒီလိုဖြေလိုက်တယ် သူ့ကို "ပစ္စုပ္ပန်တည့်တည့်ကိုပဲကြည့်ပါကွယ်" လို့......။ 

"S'il te plait" ဆိုတဲ့ butterfly effect ကြောင့် သူနဲ့လိပ်ပြာလေးတွေ အကြောင်းကိုယ်စာရေးခွင့်မရှိတော့ဘူးလေ....။ "ကိုယ်တို့ဝေးသွားတဲ့ တစ်နေ့ကျရင်တော့ ကိုယ့်အကြောင်းမင်းစာတွေရေးတင်ပေါ့ အဲခါကျရင် ကိုယ်လာဖတ်မှာပေါ့"တဲ့....။ ကိုယ့်ဘဝမှာ ကိုယ်လုပ်သမျှအရာတွေကို ကန့်သတ်ခွင့်ရှိတာ သူတစ်ယောက်ထဲပဲဆိုတာ ကိုယ်ဒီကနေပြောလိုက်မယ်...။ ဒါကလဲ ကိုယ်သူ့အပေါ်ထားရှိတဲ့ သူဘယ်တုန်းကမှအယုံအကြည်မရှိခဲ့ဖူးတဲ့ ကိုယ့်ရဲ့ ချစ်ခြင်းတွေကနေ ဖြာထွက်လာတဲ့ လိုက်လျောမှုတစ်ခုပါပဲ...။ ခုကစပြီး အဲဒီကန့်သတ်မှုကြောင့်ပဲ ကိုယ်သူ့အတွက်ရေးတဲ့စာ  သူ ဘယ်တော့မှဖတ်ခွင့်ရှိမှာမဟုတ်တော့ဘူး.....။ 

ကိုယ်ဘာစာမှမရေးဖြစ်တဲ့အခါ သူက တကယ်စိတ်ထဲရှိလို့မေးတာလား ကိုယ့်ကို တမင်စမ်းသပ်ချင်လို့မေးတာလားတော့မသိ "မင်း ရည်စားဟောင်းတွေကို လွမ်းဆွတ်တမ်းတတဲ့စာတွေ မရေးတော့ဘူးလား"လို့ မေးတတ်သေးတယ်....။ ကိုယ့်စာတွေအပေါ် ကိုယ်ဘယ်လောက် စပ်စပ်ထိမခံရူးသွပ်လဲဆိုတာ သူကောင်းကောင်းသဘောပေါက်ပါတယ်...။  သူ့စာတွေအပေါ်လဲ ကိုယ်ဘာမှဝင်စွပ်ဖက် ပိတ်ပင်တာမျိုးမလုပ်ဘူး ...။ ကိုယ့်ကိုလဲ ဟိုဟာမရေးနဲ့ ဒီဟာမတင်နဲ့လို့ လာတားမြစ်တာမကြိုက်ဘူးပဲ....။ 

အိန်ဂျယ်‌ရေ တကယ်တော့ ခုချိန်အထိ မင်းနဲ့ပတ်သက်ပြီး အိန်ဂျယ်စာစုတွေကို ကိုယ်ရေးခွင့်ရနေတာကိုက ကိုယ့်အတွက် မင်းပေးထားခဲ့တဲ့ တစ်သက်တာလက်ဆောင်တစ်ခုပါပဲ....။ ဒီအတွက် ကိုယ်မင်းကို အမြဲတမ်းကျေးဇူးတင်နေမှာ....။ 

Still flying…..
Still loving…..

___________________
Revolution will prevail
မိုးငွေ့

နင်သာရှိရင်.....ဆုတောင်းတွေပြည့်ချင်တယ်

"နင်သာရှိရင်" သီချင်းကို Nine One နဲ့ Featuring ဂေဂေး ဆိုတာကိုပဲ အရင်နားထောင်ခဲ့ဖူးတယ် ....။ ဂေဂေးရဲ့ အယ်လ်ဘမ်တစ်ခုအနေနဲ့ သူတစ်ယောက်ထဲ သီးသန့်ဆိုတာကိုတော့ ခုမှနားထောင်ဖူးတာ....။ ကျွန်မက ဂေဂေးတစ်ယောက်ထဲဆိုတာလေးကို ပိုသဘောကျမိတယ်....။ တခါတလေ Original ထက် New Version တွေက ပိုကောင်းတာရှိတတ်တယ်....။ Music Arrangement ပိုင်းနဲ့ ခေတ်ရဲ့ ရေစီးကြောင်းကြောင့် ပုံစံပြောင်းတွေက ပိုကောင်းတယ်လို့ထင်တာလဲဖြစ်နိုင်ပါတယ်....။ စတူတီယိုခေတ်အစက တီးဝိုင်းတစ်ဝိုင်းမှာ ဂီတာဆို Lead, Base နဲ့ Drum လောက်နဲ့ ဒုံချက်ချက် ဒုံချက်ချက် စည်းနဲ့ပဲ သီချင်းပေါင်းစုံကို အသံသွင်းခဲ့ရတာကိုး...။ ဒါကလဲ ကျွန်မနားလည်သလောက်ပြောတာပါ...။

ဘဝမှာတော့ ဒီသီချင်းထဲကလို "နင်သာရှိရင်" ဆိုတဲ့ သူမျိုး ခုထိမကြုံဖူးသေးဘူး....။ ကိုယ့်ကိုယ်ကိုကလွဲပြီး ဘယ်သူစိမ်းကိုမှ မချစ်တတ်ဘူးဆိုတဲ့ ထင်ရှားသော သဘော....။ ငါ့နားမှာနင်သာရှိရင် ဘာဖြစ်မယ် ညာဖြစ်မယ်လဲမရှိဘူး နင်သာမရှိခဲ့ရင်လဲ နီနီခင်ဇော်ရဲ့ "ဆုတောင်းတွေပြည့်ချင်တယ်" သီချင်းထဲကလို "မင်းသာငါ့ကိုထားသွားရင် ဒီကမ္ဘာကြီးက ငါအခုပျောက်ဆုံးသွားမယ်" ဆိုတာလဲမဟုတ်ဘူး....။ 

_______________________

Revolution will prevail

မိုးငွေ့

Energy.....

ကိုမျိုးသီဟကျော် Randy  ကို Telegram မှာ Join လုပ်ထားတယ် သူ့ကို မလေးက သူငယ်ချင်း ချောက တဆင့်သိတာပါ...။ နေ့စဉ်သူတင်ပေးနေတဲ့ ခွန်အားဖြည့်စာတွေက တကယ် Good Vibe ကိုဖြစ်စေပါတယ်...။ ခုလည်း သူရေးထားတာလေး သဘောကျလို့ ကျွန်မရဲ့ ဘလော့စာဖတ်သူတွေကို မျှဝေချင်တာနဲ့တင်ပေးလိုက်တာပါ တချို့လဲ သူ့ follower ဖြစ်ကောင်းဖြစ်နေကြပါလိမ့်မယ်....။ ခုလိုကာလမျိုးမှာ လိုအပ်တဲ့ အားဖြည့်စာလေးပါ....။ Everything is Energy ဆိုတာလေးကိုတော သဘောအရမ်းကျတယ်...။ သူပြောသလိုပဲ Negativity လူမျိုးနဲ့ စကားပြောဖူးတယ် တကယ်လဲ ကိုယ့်ရဲ့ Feeling တွေ Down တာပါပဲ... စိတ်ပျက်စရာတော့ကောင်းတယ်....။ မြန်မာလူမျိုးအများစုရဲ့ ပတ်ဝန်းကျင်တွေဟာ အကောင်းမြင်ဝါဒ Positive thinking သမားတွေအရမ်းနည်းတယ်....။ အဖြစ်အပျက်တစ်ခုခုကိုဆို မကောင်းတဲ့ဖက်ကပဲ အရင်မြင်တတ် တွေးတတ်ကြလွန်းတယ်....။ အဲဒီအကျင့်တွေ ပြင်နိုင်ကြရင်သိပ်ကောင်းမယ်....။ 

~~~~~~~~~~~~~~

♦️ Everything is Energy. ဆိုတော့ ကိုယ့်ကိုယ်ကို High Vibes ဖြစ်အောင် မြှင့်နေတဲ့သူတွေ အတွက် ကိုယ့်ရဲ့ Surrounding က လူတွေ၊ အရာဝတ္ထုတွေကိုလဲ သတိထားပြီး Shift လုပ်ဖို့ တွေးမိတာလေးကို မျှပေးချင်တဲ့ စိတ်ကူးနဲ့ ရေးဖြစ်တာပါ။

တစ်ခုခုကို ပြောင်းလဲချင်တယ်ဆိုရင် ကိုယ်ကစပြီး ပြောင်းလဲရမယ်ဆိုတဲ့ အလေ့အကျင့်က ကျွန်တော့် အတွက်တော့ တကယ်ကို မှန်လွန်းပါတယ်။ ဒါပေမဲ့ ဒီလိုပြောင်းလဲတဲ့ အချိန်မှာ ကိုယ့် ပတ်ဝန်းကျင်က Low Vibes ဖြစ်နေတယ်ဆိုရင် ကိုယ်ကလဲ အဲ့ဒီ Energy စက်ကွင်းထဲက မနဲလွတ်အောင် ပုံမှန်ထက် ပိုရုန်းရတာလေးတွေ ရှိတတ်ပါတယ််။

ဥပမာ - ကိုယ်က အပြုသဘောဆောင်တဲ့ စိတ်နဲ့ ကောင်းတာတွေ တွေးနေ လုပ်နေတဲ့ အချိန်မှာ ကိုယ့်နဲ့ အနီးကပ်နေတဲ့ လူတွေက Negativity တွေ အရမ်းများနေတဲ့ အခါမျိုးတွေမှာ သူတို့ အတွေးအခေါ်တွေနဲ့ ကိုယ့်လုပ်ရပ်တွေက အမြဲဆန့်ကျင်ဘက်တွေ ဖြစ်နေတတ်ပြီး ကိုယ့်ရဲ့ ကောင်းနေတဲ့ Feeling ကပါ အောက်ကို ပြန်ပြန် Down ပြီး စိတ်ပျက်စရာတွေ ကြုံရတတ်ပါတယ်။ ဒီလို အခြေအနေဆိုရင်တော့ ဒီလို လူတွေနားက သေသေချာချာ ရုန်းထွက်တတ်ဖို့ လိုပါတယ်။

ပြီးတော့ ကံအကြောင်းမလှလို့ သောကတွေ ဒုက္ခတွေနဲ့ ယှဉ်ပြီးမွေးလာရတဲ့ ကလေးတွေကိုဆိုရင် တချို့ မိသားစု အသိုင်းအဝိုင်းတွေမှာ ဘာအပြစ်မှ မရှိတဲ့ ကလေးကို ဂြိုလ်မွှေတယ်၊ ဒုက္ခပေးလွန်းတယ်၊ ဘာမှ အသုံးမကျဘူး၊ ဘာမှလဲ ဖြစ်မြောက်လာမှာ မဟုတ်ပါဘူး ဆိုပြီး အပြစ်တွေ Negative Energy ဝိုင်းဖို့ နေတာနဲ့ပဲ အဲ့ဒီ ကလေးလဲ အဲ့ဒီ Energy Field ထဲကကို မထွက်နိုင်တော့ပဲ သူလုပ်သမျှတွေက ဒုက္ခတွေ၊ သောကတွေ၊ အလွဲလွဲ အချော်ချော်တွေပဲ ထပ်ပြီး ဖြစ်လာကြရတယ်။

နောက်ထပ် သိသာတဲ့ ဥပမာက လောင်းကစားဝိုင်းတွေမှာပါ။ ကစားနေတဲ့ အဖွဲ့တစ်ဖွဲ့ထဲက တစ်ယောက်ကို မနိုင်စေချင်တဲ့ အခါမျိုးတွေမှာ ကျန်တဲ့သူတွေ အားလုံးက ဝိုင်းပြီး ပြောလေ့ရှိကြတယ်။ မင်းက ဘူကောင်ပါကွာ။ နိုင်မှာ မဟုတ်ပါဘူး။ မကစားနေပါနဲ့တော့ အရှုံးပေးလိုက်တော့။ စသည်ဖြင့် Energy ကို ဝိုင်းဆွဲချတာနဲ့ပဲ အပြောခံရတဲ့ တစ်ယောက်က ယောင်ယောင်မှားမှားနဲ့ ရှုံးလေ့ရှိတယ်။ ဒါမှမဟုတ် ကိုယ့်ကိုယ်ကို Lucky မကောင်းပါဘူးလို့ ယူဆထားတဲ့ သူတွေကလဲ ဘာဆော့ဆော့ ရှုံးလေ့ရှိကြသေးတယ်။ ဒါတွေက Energy တွေပါပဲ။

♦️ နောက်တစ်ချက်က ကိုယ့်နေထိုင်ရာ ပတ်ဝန်းကျင်၊ အခန်း အပြင်အဆင်တွေကလဲ သန့်ရှင်းသက်ရပ်ပြီး ရှင်းလင်းနေမယ်ဆိုရင် ကောင်းတဲ့ Vibe ကို ပိုပြီးဆွဲဆောင်နိုင်မှာပါ။ အိမ် သာရင်၊ ဧည့်လာတယ် ဆိုတာမျိုးပေါ့။ မကောင်းတဲ့ အနံ့တွေနဲ့ ရှုပ်ပွပြီး ညစ်ပတ်နေတဲ့ အိမ်တစ်အိမ်ကို သင် အလည်ရောက်သွားတယ်ဆိုရင် ဘယ်လို ခံစားရမလဲ။ ကိုယ့်ရဲ့ ကောင်းနေတဲ့ Feeling တွေပါ ပျောက်ကုန်မှာပါ။

ဒါ့ကြောင့် တချို့ ချမ်းသာတဲ့ အိမ်တွေ၊ လူကုံတိုင် အသိုင်းဝိုင်းတွေရဲ့ အိမ်တွေဆိုရင် ဧည့်ခန်း၊ ဘုရားခန်း၊ နားနေခန်း စသည်ဖြင့် အခန်းတိုင်းက သပ်ရပ်သန့်ရှင်းပြီး လေဝင်လေထွက်ကောင်းပြီး နေထိုင်ရတာ စိတ်ကို ရှင်းလင်းပေါ့ပါးစေပါတယ်။ ဒါကြောင့်လဲ သူတို့က ရတနာရှိရာ ရတနာစုပြီး ပိုပိုပြီး Vibe တွေ Energy တွေကောင်းလာတတ်တယ်။

ဘုရား၊ ကျောင်း၊ ကန် အဆောက်အဦးတွေကို ရောက်တဲ့အခါ ရတဲ့ Vibe ကို ခံစားကြည့်ပေါ့။ အဲ့ဒါကြောင့် ချမ်းသာမှရယ် မဟုတ်ပဲ ကိုယ့်အခန်းကို၊ ကိုယ့်အိမ်ကို ရှိတာလေးနဲ့ကို သပ်သပ်ရပ်ရပ် သန့်သန့်ရှင်းရှင်းလေး ပြင်ဆင်ပြီး နေရင် ကိုယ့်အတွက် အရမ်းကောင်းမယ််လို့ အကြံပေးချင်ပါတယ်။

ဟိုရက်က အစ်မတစ်ယောက်-မချောပြောတာလေး - FB ပေါ်မှာ မြန်မာနိုင်ငံက နေမကောင်းတဲ့ လူတွေရဲ့ အခန်းပုံတွေကို တွေ့လိုက်ရင် ရှုပ်ပွပြီး ကြည့်ရတဲ့ သူပါ အသက်ရှုမဝသလို ခံစားရတယ်ဆိုတာ အမှန်ပါပဲ။ တကယ်က နေမကောင်းဖြစ်တဲ့ လူရဲ့ အခန်းက လင်းထင်းပြီး လေဝင်၊ လေထွက်လေးလဲကောင်းပြီး ပစ္စည်းတွေလဲ အတန်သင့် ရှင်းလင်းနေမယ်ဆိုရင် လူနာလဲ စိတ်ကြည်လင်ပြီး ကျန်းမာရေးအတွက်လဲ ပိုအထောက်အကူပြုမယ်လို့ ခံစားရပါတယ်...။

♦️ ဒါ့ကြောင့် ကိုယ့်ရဲ့ Energy ကို ကောင်းအောင် ကြိုးစားနေတဲ့ အခါမျိုးတွေမှာ ကိုယ့်ရဲ့ Surrounding က လူတွေ ၊ အရာဝတ္တုတွေ ကိုလဲ Positive Vibe တွေနဲ့ သေသေချာချာ ဝန်းရံထားဖို့လဲ လိုပါတယ်။

Credit : ~ Myo Thiha Kyaw ~ Randy ~

__________________
Revolution will prevail
မိုးငွေ့

AWA 1740s.....

 

စာရေးဆရာခက်ဇော်ရဲ့ စာအုပ်တွေကို  The Guys of Yangon 1930s နဲ့ The Guys From Mandalay 1950s စာအုပ်နှစ်အုပ်ကတည်းက အားပေးလာတာ အခု "အင်းဝ ၁၇၄၀" လဲ စွန်းမိုက်တယ်....။ ဒီစာအုပ်မထွက်ခင် အွန်လိုင်းမှာတွေ့ကတည်းက အရမ်းဖတ်ချင်နေတာ စာအုပ်လိုက် ကိုင်ဖတ်ရတာကို ပိုအားရလို့ အွန်လိုင်းမှာတင်တာကိုလုံးဝသွားမဖတ်ဘဲ စာအုပ်ကိုပဲစောင့်နေတာ ခုတော့လက်ထဲရောက်ပြီ....။ သုံးရက်နဲ့အပြီးဖတ်လိုက်တယ်....။ 

ဒီစာအုပ်ထဲပါတဲ့အကြောင်းအရာတွေတချို့က ကျွန်မဒီတလောကြည့်ထားတဲ့ မြန်မာမင်းသား"ဒေါင်း"ပါတဲ့ ထိုင်းဇာတ်လမ်းတွဲနဲ့ ဝီကီမှာ နတ်သျှင်နောင်အကြောင်းသွားဖတ်ထားတဲ့ အကြောင်းအရာတွေ ဒီအင်းဝစာအုပ်ထဲမှာ ပါလာတယ်....။ လောကမှာတိုက်ဆိုင်မှုဆိုတာမရှိဘူးလို့ ယုံကြည်တယ် အားလုံးကိုမဆိုလိုပေမယ့် တချို့အရာတွေက သူ့အစီအစဉ်နဲ့သူလာပြီးသား....ဒီအချိန်မှာဒီအရာတွေဖြစ်ပျက်ရမယ်ဆိုတာမျိုးပေါ့...။ 

၁၇၄၀  အင်းဝခေတ်က တိုင်းပြည်ကြီးရဲ့ ဖြစ်ပျက်နေမှုတွေဟာ စာရေးဆရာက ဇာတ်လမ်းကျောရိုးကို စာအုပ်ပေါင်း ၃၀ကျော်က အထောက်အထားတွေနဲ့ ဇာတ်လမ်းဆင်ရေးသားထားတာပါ....။ အဲခေတ်က ပေါ်တူဂီမလေး လွီဇာဒီမဲလိုး ကို တည်ပြီး အင်းဝရဲ့ လူနေမှု နိုင်ငံရေးနဲ့ စစ်ဘေးနောက်ခံနဲ့ ရေးထားတာဖြစ်တယ်....။ ဆွဲဆောင်မှုရှိတဲ့စာရေးဆရာရဲ့ အရေးအသားနဲ့ ဇာတ်လမ်းဆင်ထားမှုကြောင့် ဖတ်ရတာပျင်းစရာမကောင်းဘူး အရှေ့မှာဖတ်ခဲ့တဲ့ နှစ်အုပ်လိုပဲ ဒီတစ်အုပ်လဲ လက်ကမချချင် လုံးဝဂွတ်တယ်လို့ပြောပါရစေ....။

အဲခေတ်က အင်းဝနိုင်ငံတော်ကြီးဟာ ခုခေတ်ကျွန်မတို့လက်ရှိဖြစ်ပျက်နေတဲ့ နိုင်ငံရေးအခြေအနေနဲ့ တော်တော်ဆင်တူတယ်....။ ဒီစာအုပ်ရေးသားနေချိန်ဟာ စကစတွေ အာဏာမသိမ်းခင်ကဖြစ်လို့...တိုက်ဆိုင်တယ်လို့ ယူဆလို့မရနိုင်ပါဘူး....။ ဖြစ်ချင်းဖြစ် သူတို့တွေကသာ ခေတ်နောက်ပြန်စွဲ ဘုရင်ရူးရူးပြီး ဟိုခေတ်ကလို လိုက်လုပ်တာဖြစ်နိုင်တယ်....။ ဖတ်ကြည့် ဖတ်ကြည့်......။

ဘာပဲပြောပြော ဖတ်ရတာအားရတယ်.... အခုတစ်အုပ်က Season 1 ပါ....။ နောက်ထပ် Season 2 ထပ်လာဦးမယ့်သဘောပါ....။ စောင့်မျှော်တာပေါ့ နောက်တစ်အုပ်ကို....။ ထုံးစံအတိုင်းပဲ "AWA 1740s" စာအုပ်ကို အင်းဝစာအုပ်ဆိုင်ကဝယ်တာပါ....။ ဆိုင်မသွားချင်လဲ အွန်လိုင်းကနေ မှာလို့ရပါတယ်လို့ တခါတည်းကြော်ငြာပေးလိုက်ပါတယ်....။ 

ဒီပို့စ်နဲ့မဆိုင်ပေမယ့် လက်ဆောင်ရထားတာလေးကြွားချင်လို့သက်သက် 

MA VIE ဆိုတာ ပြင်သစ်လို My Life လို့ အဓိပ္ပါယ်ရတယ်....။ Boss ရေမွှေး for women  ရထားတာ 2022ဟာ ကျွန်မဘဝအတွက် ထူးခြားမယ့် ကောင်းသောအတိတ်နိမိတ်ပဲ Boss Lady ဖြစ်မယ့်ကိန်းပေါ့  Lol !!!!! .....။ တကယ်ဖြစ်လာရင်တော့ မသေခင် ကမ္ဘာပတ်မယ့် စီမံကိန်းကို အကောင်ထည်ဖော်ရမယ်...။ စကားမစပ် ကျွန်မရဲ့ ခန္ဓာစွမ်းအားကို စစ်ဆေးကြည့်ချင်လို့ ကူးစက်မှုနှုန်းအင်မတန်မြင့်မားလျင်မြန်လှချည်ရဲ့ဆိုတဲ့ COVID-19 Omicron P ဖြစ်နေသူနဲ့ အတူအနီးကပ်ကော်ဖီထိုင်သောက်တာ လက်ဆွဲနှုတ်ဆက်တာလုပ်တယ်...ဘာမှထူးခြားမှုမရှိခဲ့ဘူး ဒီလိုဆို Wonder Woman လို့ပြောတာမလွန်ဘူးပဲ....။ ဒါဟာ 2018 ခုနှစ်တုန်းက စမ်းသပ်ချက်နဲ့ စိတ်နဲ့ခန္ဓာကို လေ့ကျင့်ပေးထားမှုရဲ့ ရလဒ်ကောင်းကျိုးတစ်ခု....။ 

______________________
Revolution will prevail
မိုးငွေ့

Dear Angel.....(4)

ချစ်သောအိန်ဂျယ်.....,,

အပြာရောင် သစ်ရွက်တစ်ရွက်နဲ့ သစ်စေ့လေးတစ်စေ့ လက်အဆောင်ရထားတဲ့အကြောင်း မင်းကိုပြောပြချင်လို့ ကိုယ်ရောက်လာခဲ့တာပါ....။

လူတစ်ယောက်ချင်းဆီမှာ အထူးသဖြင့်ကိုယ်တို့ဘာသာမှာ ကိုယ်စောင့်နတ် (၁၂)ပါးရှိတယ်ဆိုတာ မင်းကြားဖူးလား...။ မင်းတို့ ဘာသာမှာဆိုရင်တော့ Angel ခေါ်မလား Messenger တမန်တော်လို့ခေါ်မလားပဲ.....။ ပြီးခဲ့တဲ့နှစ်ကုန်ခါနီးကတည်းက ကိုယ့်အိန်ဂျယ်က ကိုယ့်ကို စိန်ခေါ်မှုအကြီးကြီးတစ်ခုနဲ့ ခန္ဓာနဲ့စိတ်စွမ်းအင်ကို စမ်းသပ်ခဲ့တယ် ...။ Soul စိတ်နှလုံးကို  ထိန်းချုပ်ရတာလောက် လောကမှာခက်ခဲတာမရှိဘူးလို့ထင်တယ်....။ ဒါပေမယ့်နောက်ဆုံးမှာတော့ ကိုယ်အောင်နိုင်ခဲ့တယ်...။ ကိုယ်တို့ သက်ရှိလူသားလာဖြစ်တာဟာလည်း အမျိုးစုံသောစမ်းသပ်မှုတွေအတွက် ရောက်လာခဲ့တာပဲမဟုတ်လား....။

အိန်ဂျယ်ရေ IT ပညာရပ်နဲ့အသက်မွေးနေတဲ့ မင်းကိုပြောပြရတာ နားလည်လွယ်မှာပါ...။   လူတွေရဲ့ဦးခေါင်းခွံထဲ မွေးကတည်းကပါလာတဲ့ ဦးနှောက်ဟာ ဆင်ခြင်သုံးသပ်တတ်ဖို့ တွေးတောတတ်ဖို့ဆိုတာ Positive thinking အတွက်နော်....။ တဖက်ကမ်းခတ် အစွန်းရောက်  အလွန်အကျူးတွေဆိုတဲ့ လုပ်ရပ်ဟာ အသိဉာဏ်ဘယ်လောက်ရှိမရှိ ပြသလိုက်တဲ့ ရလဒ်တစ်ခုပဲ...။ ဥပမာဆိုပါစို့ မုန့်ငါးခုရထားတယ် တစ်ရက်ထဲအကုန်စားပစ်မလား တစ်နေ့တစ်ခုစားရင် ငါးရက်စာမရဘူးလား ….။ အဲလိုပေါ့ ဆင်ခြင်မှုနည်းတော့  အလကားရ တစ်ရက်ထဲအကုန်စားပစ်သူတွေဟာ တစ်ဖက်လူအတွက် တစ်သက်လုံး စိတ်ကုန်စရာဖြစ်သွားတတ်တာကို သတိထားမိဖို့ ပြောချင်တာပါ....။

Still flying…..

Still loving…..

______________________

Revolution will prevail 
မိုးငွေ့

နွေဦး(၁၂).....

 

ဆောင်းအကုန် မနက်ခင်းရဲ့ မြူငွေ့တွေဟာ 

ပင်လယ်ပြင်ပေါ် ဝေ့သီရစ်သိုင်းနေသလိုပေါ့  အိန်ဂျယ်....          

မင်းကတော့ မြူငွေ့တွေ ပါးလျသွားအောင်စွမ်းတဲ့ နွေဦးရဲ့ မနက်ခင်း နေမင်းပေါ့.....

"မိုးငွေ့နှင့်အတူ" ထဲက အိန်ဂျယ်စာစုမှာတော့ ကိုယ်နဲ့မင်းဟာ ဘယ်တုန်းကမှ တကယ်ဝေးမသွားခဲ့ဖူးဘူးလို့ အမြဲယုံကြည်နေတာမျိုး....... 

စပ်ခွန်ဇရဲ့ "အိမ်ရဲ့အဝေး...." ထဲကလိုပဲ ချစ်ခြင်းမေတ္တာဟာ ခမ်းနားပါတယ်.....အိန်ဂျယ်

မမြင်ရတဲ့ ကိုယ်တို့နှစ်ယောက်ကြားက ကြိုးတွေအကြောင်း တဖွဲ့တနွဲ့ရေးပြရတာလည်း အားနာလှပြီ....

ခံစားသိနဲ့ပဲ သိနိုင်တဲ့ ရစ်ဖွဲ့နှောင်တွယ်မှုတွေလေ......

မပိုင်ဆိုင်ခဲ့ရလည်း တချို့အရာတွေက မြတ်နိုးဖို့ ထိုက်တန်တဲ့အကြောင်း.........ပြောပြချင်ရုံသက်သက်...။

______________________
Revolution will prevail
မိုးငွေ့

Fourth Wave.....

 

ကဲ...လှိုင်းတွေ လှိုင်းတွေဆိုတာ ဘယ်တော့ပြီးဆုံးမလဲ.......?

ဆောင်းကုန်ခါနီးမှာ အလည်ရောက်လာခဲ့တဲ့ အိုမီခရွန်.....။ ကိုးဗစ်ဆိုတာ တကယ်မရှိဘူးလို့ ယုံကြည်ကြသူတွေရှိနေသလို ကိုးဗစ်ကြောင့် တကယ်ခံစားနေရသူတွေလည်း တပုံတပင်ကြီးရယ်....။ သတိထားမိသလောက် ကိုးဗစ်မဖြစ်တဲ့သူတွေထဲမှာ အရက်သမားတွေပါတယ်.....။ ဒီလိုပြောလို့ အရက်တွေဇွတ်မသောက်ကြနဲ့ဦး...။ အဓိကက ခန္ဓာကိုယ်ထဲ အအေးဓါတ်ရှိမနေစေဖို့ပဲ...။ ဒီ စတုတ္ထလှိုင်းမှာ ပြောချင်တာက မနက်မိုးလင်းရင် ခွက်တစ်ခုထဲ သံပုရာသီးညှစ်ထည့် အခွံပါထည့် ပျားရည်တစ်ဇွန်းထည့်ပြီး ရေးနွေးလောင်းထည့်ဖျော်ပါ ထွက်လာတဲ့အငွေ့ကိုအားပါးတရ ရှူပါ....ပြီးမှ သံပုရာရည်လေးကိုသောက်လိုက်ပါ....။ ပျားရည်ကလဲ လူတစ်ယောက်အတွက် တစ်ရက်ကို နှစ်ဇွန်းထက်ပိုမသောက်သုံးရပါဘူး အဲအချက်လေးတော့ သတိထားပေးပါ...။ Army Rum ရှိရင်တော့ တစ်နေ့ထမင်းစားဇွန်းတစ်ဇွန်းသောက်ပေးလဲကောင်းတယ်...။ တကယ်က ဘာရောဂါဖြစ်ဖြစ် ခုခံအားကောင်းနေဖို့က အဓိကပဲ....။ အစားသောက်မပြတ်ပါစေနဲ့ မစားချင်လဲ ရအောင်စားပါ  အိပ်ရေးဝဝအိပ်ပါ....။ အူလမ်းကြောင်း အစာအိမ်ရောဂါသမားများ ဂရုစိုက်ပါ ခုခံအားကောင်းစေတဲ့ Immune System က အူနံရံကနေထွက်တာမို့ အူလမ်းကြောင်းကျန်းမာပြီး သန့်ရှင်းနေမှ အဆင်ပြေမယ်...။ 

အိုမီခရွန်က ပျံ့နှံ့ကူးဆက်နှုန်းအရမ်းမြန်ပါတယ်....။ အဆင့်သုံးဆင့်နဲ့ ပိုင်းခြားထားတဲ့ သူ့လက္ခဏာတွေက ပထမ ဒုတိယနဲ့ တတိယလှိုင်းမှာဖြစ်တဲ့ လက္ခဏာတွေ တစ်မျိုးဆီပြန်ပါပါတယ်....။  ခု ကျွန်မတို့ရုံးမှာလဲ ဖျားတဲ့သူတွေတစ်ယောက်ပြီးတစ်ယောက်....။ ဖျားပြီးရုံးမလာနိုင်တော့တဲ့ Suspense သမားတွေကို ရုံးလုံးဝမတက်ခိုင်းတော့ဘဲ သူတို့နေရာထိုင်ခင်းအသုံးအဆောင်တွေကို ဆေးဖျန်းတာလုပ်ခိုင်းရတယ်...။

ကျွန်မကတော့ ဒီစတုတ္ထလှိုင်းမှာ ကိုယ်လက်လှုပ်ရှားမှု ဘာမှမလုပ်ဖြစ်ဘူး ရေကူး Gym ကစားတာ ယိုဂ ဘာမှမလုပ်ဖြစ်ဘူး လမ်းတော့လျှောက်ဖြစ်တယ် အများဆုံးလုပ်ဖြစ်တာက သီချင်းနားထောင်တယ် ဟုတ်တယ် အဲတစ်ခုအများဆုံးလုပ်တာပဲ....။ ဂီတသံစဉ်တွေနဲ့စိတ်ရဲ့ ကြည်နူးမှုကိုယူတယ်....။ ပုံမှန်လုပ်နေကျ အာရုံစုစည်း မေတ္တာအအေးလှိုင်းပို့တာလုပ်တယ်...။ မနေ့ကပဲ အိုမီခရွန် P ဖြစ်နေသူတစ်ယောက်ကို လှိုင်းပို့ပေးဖြစ်တယ် မနေ့က သူအဖျားရှိတယ် ဒီနေ့မနက်တော့ အဖျားလုံးဝမရှိတော့ဘူး wave ရဲ့စွမ်းအားကို လျှော့တွက်မရဘူးပဲ...။   Wave လွှတ်ထုတ်နိုင်ဖို့အတွက် နေ့စဉ်ကိုယ်ခန္ဓာစွမ်းအင်တွေကိုစုဆောင်းရတယ်....။ စိတ်ကိုပဲအဓိက အဟာရဖြည့်ဖြစ်သလို အစားအသောက်ကိုလဲ ကောင်းကောင်းစားဖြစ်တယ် ဒီလောက်ပဲ....။ မနက်တိုင်းရေနွေးနွေး တစ်မတ်ခွက်သောက်တယ် ထမင်းကြော် မုန့်ဟင်းခါး အုန်းနို့ခေါက်ဆွဲ သို့မဟုတ် အိမ်ကလုပ်တဲ့ ကိတ်မုန့် ပေါင်မုန့်အဝစားတယ် ကော်ဖီတစ်ခွက်သောက်တယ် သစ်သီးစားတယ် ပြီးရင် ရေတစ်ခွက်ထပ်သောက်တယ် အဲဒါကျွန်မရဲ့ နေ့စဉ်ပုံမှန်မနက်စာပါပဲ....။ ကြက်ဉပြုတ်တော့ တစ်ခါတစ်လေမှ စားဖြစ်တယ်....။ 

လေကောင်းလေသန့်ရှူပေးပါ နေပူဆာလုံပါ အိမ်မှာရှိတဲ့ ပြူတင်းတွေအကုန်ဖွင့်ပြီး အောက်စီဂျင်ကောင်းကောင်းရအောင်လုပ်ပါ...။ လေထုထဲကနေ အလကားရနေတဲ့ အောက်စီဂျင်ဟာ ရောဂါပေါင်းစုံကိုကာကွယ်ပြီးသားဖြစ်တယ်ဆိုတာ လူအတော်များများဂရုမပြုမိကြဘူး....။ ကျွန်မရဲ့ စာဖတ်သူများလဲ ကျန်းမာရေးအထူးဂရုစိုက်ကြပါလို့ မှာချင်ပါတယ် Mask တပ်ပါ လက်ဆေးပါ အဲဒါကတော့ ဘယ်ထိဆက်လုပ်နေရဦးမလဲမသိ...။

___________________

Revolution will prevail
မိုးငွေ့

အဘိဓမ္မာစိတ်ပိုင်း(၄).....

 

နမောတသ ဘဂဝတော အရဟတော သမ္မာသဗ္မုသတ္တာ

နမောတသ ဘဂဝတော အရဟတော သမ္မာသဗ္မုသတ္တာ

နမောတသ ဘဂဝတော အရဟတော သမ္မာသဗ္မုသတ္တာ

ရှေ့မှာရေးခဲ့တာ စိတ်(၈၉)ပါးမှာ အပါး(၃၀)ပြီးသွားခဲ့ပြီ...။  နည်းနည်းပြန်နွှေးကြည့်မယ်နော်

စိတ် (၈၉)ပါးမှာ

ကာမဝစရစိတ်      ၅၄ပါး

ရူပဝစရစိတ်         ၁၅ပါး

အရူပါဝစရစိတ်    ၁၂ပါး

လောကုတ္တရာစိတ်  ၈ပါး

အရှေ့အပိုင်းသုံးပိုင်းမှာ ကာမဝစရစိတ် ၅၄ပါးထဲက အပါးသုံးဆယ်ပြီးသွားပြီ...။ အခုကျန်တဲ့ ၂၄ပါးဖြစ်တဲ့ ကာမဝစရသောဘနစိတ် ကိုပြောပေးပါမယ်....။ 

ကာမဝစရသောဘနစိတ် (၂၄)ပါး

ကာမဝစရ ကုသိုလ်စိတ်  ၈ပါး

ကာမဝစရ ဝိပါတ်စိတ်     ၈ပါး

ကာမဝစရ ကြိယာစိတ်    ၈ပါး

------------------------------------------

စုစုပေါင်း                        ၂၄ပါး

ကာမဝစရ ကုသိုလ်စိတ်  ၈ပါး

၁) သောမနဿ သဟဂုတ် ဉာဏသမ္ပယုတ် အသင်္ခါရိကစိတ်   (၃၁)

၂) သောမနဿ သဟဂုတ် ဉာဏသမ္ပယုတ် သသင်္ခါရိကစိတ်   (၃၂)

၃) သောမနဿ သဟဂုတ် ဉာဏဝိပ္ပယုတ်  အသင်္ခါရိကစိတ်    (၃၃)

၄) သောမနဿ သဟဂုတ် ဉာဏဝိပ္ပယုတ်  သသင်္ခါရိကစိတ်    (၃၄)

၅) ဉပေက္ခာ သဟဂုတ် ဉာဏသမ္ပယုတ် အသင်္ခါရိကစိတ်         (၃၅)

၆) ဉပေက္ခာ သဟဂုတ် ဉာဏသမ္ပယုတ် သသင်္ခါရိကစိတ်         (၃၆)

၇) ဉပေက္ခာ သဟဂုတ် ဉာဏဝိပ္ပယုတ်  အသင်္ခါရိကစိတ်          (၃၇)

၈) ဉပေက္ခာ သဟဂုတ် ဉာဏဝိပ္ပယုတ်  သသင်္ခါရိကစိတ်          (၃၈)

ကာမဝစရ ဝိပါတ်စိတ်  ၈ပါး

ကာမဝစရ ကုသိုလ်စိတ် ၈ပါးနဲ့အတူတူ    ( ၃၉-၄၆)

ကာမဝစရ ကြိယာစိတ် ၈ပါး

ကာမဝစရ ကုသိုလ်စိတ် ၈ပါးနဲ့အတူတူ    ( ၄၇-၅၉) 

အခုပြောပြမယ့် စိတ်တွေက (၁၁)ဘုံမှာ ကျင်လည်နေတဲ့ ကာမသောဘနစိတ်တွေပါ....။ သောဘနဆိုတာ မြန်မာလို တင့်တယ်လှပတာ ကောင်းမွန်တာဖြစ်လို့ တင့်တယ်လှပတဲ့ စိတ်ကိုပြောတာပါ....။ ဒီလိုပြောရတာလည်း သူတို့ဟာ အလောဘ အဒေါသ အမောဟဆိုတဲ့ ကောင်းတဲ့ စိတ်တွေနဲ့ပဲ ယှဉ်လို့ပါ...။ နောက်ပြီး သူတို့ရှေ့မှာ မဟာတပ်ပြီးခေါ်ပါတယ်...။ ဒါလည်း သူတို့ဟာ ရူပဝစရ အရူပဝစရနဲ့ လောကုတ္တရာ ကုသိုလ်စိတ်တွေထက် အရေအတွက်ပိုများလို့ပါ...။ ကာမသောဘနစိတ် ၂၄ပါးမှာ မဟာကုသိုလ်စိတ် ၈ပါး မဟာဝိပါတ်စိတ် ၈ပါးနဲ့ မဟာကြိယာစိတ် ၈ပါး ပါဝင်ပါတယ်....။ 

ကာမဝိစရစိတ်တွေကို ပြောပြပါမယ်....။ မဟာကုသိုလ်စိတ် ၈ပါးဟာ ရှေ့ကပြောပြပြီးသွားတဲ့ လောဘမူစိတ် ၈ပါးနဲ့ ခပ်ဆင်ဆင်တူပါတယ်...။ လောဘမူစိတ်တွေကို နားလည်ထားရင် ဒိဌိဂတ သမ္ပယုတ်နေရာမှာ ဉာဏသမ္ပယုတ်၊ ဒိဌိဂတ ဝိပ္ပယုတ်နေရာမှာကျတော့ ဉာဏဝိပ္ပယုတ်လို့ ထည့်လိုက်ရင် ကုသိုလ်စိတ်တွေဖြစ်သွားတယ်....။ 

၁) သောမနဿ သဟဂုတ် ဉာဏသမ္ပယုတ် အသင်္ခါရိကစိတ်

ဒီနေရာမှာ သောမနဿက ဝမ်းမြောက်ရွှင်လန်းခြင်း Pleasure၊ ဉာဏသမ္ပယုတ်က ကံ ကံရဲ့အကျိုး၊ သစ္စာလေးပါးနဲ့ အနိစ္စ ဒုက္ခ အနတ္တ သဘောတွေကို သိမြင်တဲ့ ဉာဏ်နဲ့ယှဉ်တာ အသင်္ခါရက အလိုလို ဖြစ်တာမို့ ဝမ်းမြောက်ရွှင်လန်းစွာ ဉာဏ်နဲ့ယှဉ်၍ တိုက်တွန်းမှုမပါဘဲ မိမိအလိုအလျှောက်ပြုသောစိတ်ပါ...။  Moral consciousness, unprompted, accompanied by pleasure and associated with knowledge.

ဉပမာ လမ်းသွားရင်း မိမိထက်နွမ်းပါးတဲ့သူတွေ့လို့ ငွေအကြွေလေးထောက်ပံ့တဲ့အခါ ဝမ်းမြှောက်ရွှင်လန်းရသလို ဒါနကုသိုလ်ဖြစ်လို့ ကောင်းတဲ့ အကျိုးကိုပေးပါတယ်..။ ဒီလို ဘယ်သူမှ တိုက်တွန်းတာမပါဘဲ ဖြစ်လာတဲ့ ကုသိုလ်စိတ်ဟာ သောမနဿ သဟဂုတ် ဉာဏ သမ္ပယုတ် အသင်္ခါရိကစိတ်ပါ....။ ဘုရားသွားလို့ ရွှေသင်္ကန်းကပ်လှူဖို့ သဒ္ဒါအလျောက် ဝမ်းမြှောက်ရွှင်လန်းစွာ အလှူငွေထည့်ဝင်တဲ့အခါ ဒီစိတ်ဖြစ်ပါတယ်...။

၂) သောမနဿ သဟဂုတ် ဉာဏသမ္ပယုတ် သသင်္ခါရိကစိတ်

ဘုရားသွားရင် သူငယ်ချင်းက တိုက်တွန်းလို့ နှင်းဆီပန်းတွေကို ဝမ်းမြှောက်ကြည်နူးစွာနဲ့ ကပ်လှူခဲ့ရင် ဒီစိတ်ဖြစ်ပါတယ်....။

၃) သောမနဿ သဟဂုတ် ဉာဏဝိပ္ပယုတ်  အသင်္ခါရိကစိတ်

သူက ကောင်းမှုပြုတဲ့အခါ ဉာဏ်နဲ့မယှဉ်ဘဲ အလိုအလျောက်ပြုလိုက်တာမျိုးပါ....။ ဗုဒ္ဓဘာသာဝင် အများစုက လှူဒါန်းတဲ့အခါ ဝမ်းမြှောက်ဝမ်းသာဖြစ်ပေမယ့် သတိမထားမိတော့ ဉာဏ်မပါဘူး ဖြစ်ဖြစ်သွားတယ်...။ နိဗ္ဗာန်ကို ရည်မျှော်ပြီးလှူကြပါလို့ ဆရာတော်များက မိန့်မှပဲ ဉာဏ်နဲ့ယှဉ်ပြီးလှူဖြစ်တာမျာတယ်...။ ဒီလို ဉာဏ်နဲ့ မယှဉ်ဘဲ ကောင်းမှုကုသိုလ်တွေလုပ်တော့ ကောင်းကျိုးတွေ ရသင့်သလောက်မရဘဲဖြစ်သွားတယ်...။ ကလေးငယ်လေးတွေကို မိဘတွေက ဘုရားကို ဦးချခိုင်းပြီး သံဃာတော်တွေကို ပစ္စည်းတွေ ကပ်ပေမယ့်... ဉာဏ်မပါတော့ ဒီစိတ်ပဲဖြစ်တယ်....။

၄) သောမနဿ သဟဂုတ် ဉာဏဝိပ္ပယုတ်  သသင်္ခါရိကစိတ်

ကလေးတွေက လူကြီးတွေ ပြောမှ ဘုရားရှိခိုးရင် တိုက်တွန်းမှုပါလို့ သောမနဿ သဟဂုတ် ဉာဏဝိပ္ပယုတ်  သသင်္ခါရိကစိတ် ဖြစ်တယ်...။ ဉာဏ်နဲ့မယှဉ် တိုက်တွန်းမှုလုပ်တဲ့ ကောင်းမှုကုသိုလ်တွေမှ ဒီစိတ်ဖြစ်တယ်...။ ကလေးတွေမှ မဟုတ်ဘူး လူကြီးအများစုလည်း ဒီစိတ်ဖြစ်တတ်ကြပါတယ်...။ အဘိဓမ္မာရဲ့ အခြေခံသဘောတရားကို နားလည်ထားမှသာ ကောင်းမှုကုသိုလ်ပြုတဲ့အခါ ဉာဏ်နဲ့ယှဉ်တယ်ဆိုတာကို သဘောပေါက်နားလည်နိုင်ကြမှာပါ....။

၅)ဉပေက္ခာသဟဂုတ် ဉာဏသမ္ပယုတ်  အသင်္ခါရိကစိတ်

ဒီစိတ်မျာ ဉာဏ်နဲ့တော့ယှဉ်တယ်....။ ဒါပေမယ့် ဝမ်းနည်းတာလည်းမဟုတ်  ဝမ်းသာတာလည်းမဟုတ်တဲ့ အလယ်အလတ် ခံစားမှုနဲ့ မိမိအလိုအလျောက်လုပ်လိုက်တာမျိုးပါ...။ ဆိုပါတော့ အဘိဓမ္မာသင်တန်းကို လေ့လာဖို့လိုမယ်ဆိုပြီး ဝမ်းနည်းဝမ်းသာမရှိဘဲ ပုံမှန်တက်ရောက်ရင် ဒီစိတ်ဖြစ်တယ်....။ အဘိဓမ္မာသင်တန်းတက်မယ်ဆိုကတည်းက ကံ ကံရဲ့ အကျိုးကို ယုံတဲ့သူဖြစ်နေလို့ ဉာဏ်နဲ့ယှဉ်ပါတယ်....။ 

၆) ဉပေက္ခာသဟဂုတ် ဉာဏသမ္ပယုတ်  သသင်္ခါရိကစိတ်

သူငယ်ချင်းက တိုက်တွန်းလို့ ဝမ်းနည်းဝမ်းသာမရှိဘဲ အဘိဓမ္မာသင်တန်းတက်တဲ့အခါ ဒီစိတ်ဖြစ်ပါတယ်....။

၈) ဉပေက္ခာသဟဂုတ် ဉာဏဝိပ္ပယုတ်  အသင်္ခါရိကစိတ်

တခါတလေ သတိမထားလိုက်မိဘဲ ဉာဏ်နဲ့မယှဉ်မိဘဲ ကုသိုလ်ကောင်းမှုကို မိမိသဘောအလျောက် အမှတ်တမဲ့ လုပ်တာမျိုးဆိုပါတော့ အိမ်ရှေ့မှာ လမ်းပြင်ဖို့ အလှူငွေလာကောက်တော့ ဝတ်ကျေတန်းကျေလှူလိုက်တာမျိုးဆိုရင် ဒီစိတ်ဖြစ်တယ်....။

၈) ဉပေက္ခာသဟဂုတ် ဉာဏဝိပ္ပယုတ်  သသင်္ခါရိကစိတ်

သူများတိုက်တွန်းလို့ လှူတာမျိုးဆိုရင် ဉပေက္ခာသဟဂုတ် ဉာဏဝိပ္ပယုတ် သသင်္ခါရိကစိတ် ဖြစ်ပါတယ်....။

ဘုရားရှိခိုးတာ အလှူအတန်းပြုတာ ဆင်းရဲချို့တဲ့သူတွေကို ကူညီတာ လူနာတွေကို ဂရုတစိုက် ကုသပေးတာတွေ အားလုံးဟာ ဒီကုသိုလ်စိတ် ၈ မျိုးထဲက တစ်ခုခုနဲ့ပြုကြတာပါ...။ ဒါပေမယ့် ဉာဏ်နဲ့ယှဉ်မှ အကျိုးပေးတဲ့အခါပြည့်ပြည့်စုံစုံလေးဖြစ်ဖို့ ဉာဏသမ္ပယုတ်ဖြစ်အောင်လုပ်ဖို့အရေးကြီးပါတယ်....။ 

ကာမဝစရဝိပါတ် ဒါမှမဟုတ် မဟာဝပါတ်စိတ် (၈)ပါးက ဒီကုသိုလ်စိတ် (၈)ပါးရဲ့ အကျိုးပါ...။ အခေါ်အဝေါ်အားလုံးအတူတူပါပဲ ဒီဘဝမှာ သိမ် ကျောင်း ဆေးရုံကြီးတွေ ဆောက်ပြီးလှူတယ် ဘုရားတည်တယ် မရှိဆင်းရဲတဲ့ သူတွေလှူတယ်ဆိုရင် နောင်ဘဝမှာ ပဋိသန္ဓေစိတ်အနေနဲ့ အကျိုးပေးပါတယ်...။ ဒီဘဝမှာ အကျိုးပေးရင်တော့ ပဝတ္တိအကျိုးပေးလို့ခေါ်ရမှာပါ...။ တကယ်တော့ ပဋိသန္ဓေ ဘဝင်နဲ့ စုတိ စိတ်တွေဟာ အမည်ကွဲပြားနေပေမယ့် အားလုံးဟာ ဝိပါတ်စိတ်တွေပါပဲ....။ 

ကာမဝစရကြိယာစိတ် ဆိုတာ အကျိုးမဖြစ်ထွန်းတဲ့ ပြုကာမတ္တစိတ် inoperative mind တွေကိုခေါ်တာ ...။ ဒါပေမယ့် ဒီကြိယာစိတ်တွေဟာ ဘုရား ရဟန္တာမှာသာဖြစ်ပါတယ်...။ ပုထုဇဉ်လူတွေမှာ ဘုရာရှိခိုးတယ် အလှူဒါနပေးတယ်ဆိုရင် နောင်ဘဝဖြစ်စရာရှိသေးလို့ ကုသိုလ်စိတ် ...၊ ဘုရား  ရဟန္တာတွေမှာတော့ နောင်ကျင်လည်စရာ ဘဝတွေမရှိတော့လို့ ကြိယာစိတ်ပဲဖြစ်တာမို့ မြတ်စွာဘုရား တရားဟောတယ်ဆိုရင် ကုသိုလ်မဖြစ်ဘဲ ကြိယာသာဖြစ်ပါတယ်...။ အမြစ်ဖြတ်ထားတဲ့ သစ်ပင်ဟာ မရှင်သန်မကြီးထွားနိုင်တော့သလို ကြိယာစိတ်ဟာလည်း အကျိုးမဖြစ်ထွန်းလို့ ဘဝသစ်တဖန် မပေးတော့ပါဘူး...။ ကာမဝစရ ကြိယာစိတ်တွေဟာလည်း မဟာကုသိုလ်စိတ် (၈)ပါးနဲ့ အခေါ်အဝေါ်အတူတူပဲဖြစ်တာမို့ ထပ်မရှင်းပြတော့ပါဘူး....။

မှတ်ချက်။     ။ ခွဲစိတ်ပါမောက္ခ ဒေါက်တာစိန်လင်း၏ ရွှေစင်မြင်းမိုရ်အဘိဓမ္မာစာအုပ်မှ ကောက်နုတ်ပါသည်...။ ကျွန်မလေ့လာပြီးသလောက် မှတ်သားထားသည်များကို သဘောပေါက်လွယ်အောင် အပိုင်းခွဲပြီး ဆက်လက်ရေးသားဖော်ပြပေးပါဦးမယ်....။ ဓမ္မလက်ဆောင်စာအုပ်ပေးခဲ့တဲ့ ဉီး------ကိုလည်း ဒီပို့စ်နဲ့ကျေးဇူးတင် ကန်တော့လိုက်ပါတယ်...။

အဘိဓမ္မာစိတ်ပိုင်း(၁)
အဘိဓမ္မာစိတ်ပိုင်း(၂)
အဘိဓမ္မာစိတ်ပိုင်း(၃)

_____________________
Revolution will Prevail 
မိုးငွေ့

Banana Diary’s (1) .....

ကျွန်မတို့ အိမ်မှာ အခု Bakery နဲ့ပတ်သက်တဲ့ Small Business လေးတစ်ခုလုပ်နေတာ ရှေ့ပို့စ်မှာတုန်းက တင်ဖူးခဲ့ပါတယ်....။ Facebook မှာ Food Lover နာမည်နဲ့ ပေ့ချ်တစ်ခုဖွင့်ပြီး အလုပ်စနေတာ သုံးလကျော်လောက်ရှိနေပါပြီ....။ လူသိနည်းနေသေးတာမို့ သင့်တင့်တဲ့ အော်ဒါလေးတွေကိုတော့လုပ်နေရပါတယ်....။ လောလောဆယ် Burnt Cheesecake, Crumble Cheesecake, Sea Salt Cream Cheese Chiffon Cake နဲ့  နောက်ဆုံး ရိုးရိုး ဗန်နီလာအရသာ Muffin Cup Cake လေးလဲ လူကြိုက်များပြီး အော်ဒါကောင်းနေပါတယ်....။ မုန့်စားရတာကြိုက်တဲ့ မုန့်ဖုတ်ရတာနှစ်သက်တဲ့ စာဖတ်သူတွေ ကျွန်မရဲ့ Food Lover စာမျက်နှာလေးကို Fackbook သုံးရင်း ကြုံရင် Like and Share လေး လုပ်ပေးသွားကြပါဦးလို့ တောင်းဆိုပါတယ်...။

ကျွန်မ အကြိုက်ဆုံးအသီးက ငှက်ပျောသီး ဖြစ်ပါတယ်....။ ဒါကြောင့် ကျွန်မ ဘာမုန့်လုပ်လုပ် ငှက်ပျောသီးနဲ့ပတ်သက်တဲ့မုန့်တွေကို လုပ်စားဖြစ်တာများတယ်....။ တွေးကြည့်တာ လူတစ်ယောက်ဟာ‌ မွေးလာပြီး အမေနို့သောက်ပြီးရင် ပထမဆုံးစားဖူးတဲ့အသီးက ဘာဖြစ်မလဲဆိုတာလေ...။ အဲဒီမှာ ငှက်ပျောသီးကိုသွားတွေ့တယ်....။ ဘာလို့လဲဆိုတော့ ကလေးလေးတွေက သွားလဲမပေါက်သေးတော့ တခြားမာတဲ့အသီးတွေလဲကျွေးလို့မရသေးဘူးလေ.... ဆိုတော့ အသီးပျော့ပျော့ အဟာရလဲရတဲ့ ဝယ်ရတာလဲလွယ်ကူတဲ့ ဖီးကြမ်းလိုငှက်ပျောသီးမျိုးတော့ အမေတွေက သေးသေးလေးတွေဖဲ့ပြီး ကျွေးဖူးကြမှာပဲ ဟုတ်တယ် တစ်ရာမှာ ကိုးဆယ်ကိုးကတော့ မလွဲနိုင်ဘူး....။ ဒါကြောင့် လူတစ်ယောက် လူဖြစ်လာတဲ့အချိန်မှာ စပြီးစားဖူးတဲ့ အသီးဟာ ငှက်ပျောသီးလို့ ကျွန်မခုပဲ သတ်မှတ်လိုက်တယ်...။ 

ကျွန်မလုပ်တဲ့ Banana Muffin ရဲ့ ထူးခြားချက်က Cold Press Coconut Oil အုန်းဆီသုံးတယ် ဒိန်ချဉ်ထည့်တယ် ပါဝင်ပစ္စည်းက ဘာမှသိပ်မရှိဘူးဆိုပေမယ့် အရည်အသွေးကောင်းတဲ့ အုန်းဆီစစ်စစ်ကိုသုံးထားတာမို့ အရသာထူးခြားမှုကတော့ သာမန်မုန့်တွေထက် ကွာပါတယ်...။ အခုငွေဈေးတက် ကုန်ကြမ်းတွေပျက်တဲ့အချိန်မှာ အရင်က အုန်းဆီ တစ်လီတာပုလင်းကလဲ နှစ်ဆတက်သွားပါတယ်....။ အုန်းဆီအစား အနံ့မရှိတဲ့ နေကြာဆီသုံးလို့ရပါတယ်...။ ဒါပေမယ့် မုန့်ရဲ့အရသာနဲ့ အရည်အသွေးကတော့ နဲနဲဆီကွာခြားသွားပါလိမ့်မယ်....။ ကိတ်မုန့်တစ်လုံး ဘာကြောင့်ဈေးကြီးလဲဆိုတာ ကိုယ်တိုင် မုန့်လုပ်တဲ့အချိန်မှ သေချာနားလည်သွားတယ် သုံးရတဲ့ပစ္စည်း အရည်သွေးကောင်းလေ မုန့်တန်ဖိုးကကြီးလေလေပဲ....။ အစားအသောက်တစ်ခုလုပ်တဲ့နေရာမှာ ကျွန်မက သန့်ရှင်းမှုနဲ့ကျန်းမာရေးကို ဦးစားပေးလုပ်လေ့ရှိတယ်...။ ရာဂဏန်းပဲပေးပြီးဝယ်စားလို့ရတဲ့ ငှက်ပျော်သီးကိတ်တွေဆိုတာ ငှက်ပျောသီးအစစ်မသုံးဘဲ Flavor တွေ တာရှည်ခံမှိုသတ်ဆေးတွေ ဆိုးဆေးတွေ သက်သာတဲ့ဆီနဲ့သကြားတွေ သုံးပြီးလုပ်လို့ရပါတယ်....။

ကလေးကြိုက် ကာတွန်းရုပ်လေးတွေနဲ့ မုန့်ခွက်တွေက ကျွန်မ ကိုတာဘာရူးသွားတုန်းက ဝယ်ခဲ့တဲ့ ပစ္စည်းတွေ ခုမှထုတ်သုံးဖြစ်တယ်....။ လောလောဆယ် ကျွန်မတို့ pages မှာ Banana Muffin ကို Menu တစ်ခုအနေနဲ့ မထည့်ရသေးပေမယ့် ဒီမှာတော့ အသိလာပေးတာပါ....ကျွန်မရဲ့ Banana Muffin အရသာလေးကို ဒီကနေပေးမြည်းလို့ရရင်သိပ်ကောင်းမှာပဲလို့...။ ခုလိုဆောင်းရာသီလေးမှာ အေးအေးစိမ့်စိမ့်လေးနဲ့ လက်ဖက်ရည် ကော်ဖီနဲ့ဖြစ်ဖြစ် နေ့ခင်းနေ့လည် လက်ဖက်စိမ်းရည်နဲ့ဖြစ်ဖြစ် ချစ်ခင်သူတွေကို လက်ဆောင်ပေးချင်လို့ဖြစ်ဖြစ် စားလို့အလွန်အရသာတွေ့မယ့် သဘာဝငှက်ပျောသီးနံ့မွှေးမွှေးလေးနဲ့မုန့်တစ်ခုဆိုတာ လက်တွေ့မှာယူစားသုံးလို့ရပါပြီ....မီနူးထဲမထည့်ရသေးပေမယ့် အော်ဒါလင့်ကနေမဟုတ်ဘဲ နှစ်ရက်ကြိုတင်ပြီး မေးလ်ကနေတဆင့်မှာယူနိုင်ပါတယ်.....။ Thank you. Love you all.....

gmail : coralnyo@gamil.com

Instagram : Love_raincoral

_____________________

Revolution will prevail

မိုးငွေ့

 

သူစိမ်း.....

 

တခါတလေ ပိုရင်းနှီးလာပြီလို့ထင်တာဟာ ပိုသူစိမ်းဆန်နေတတ်ပြန်တယ်ဆိုတဲ့ အသိတစ်ခု ဒီနေ့ရလိုက်တယ်...။ You Tube ဖွင့်ကြည့်တော့ ကိုရီးက သူ့ ကိုယ်ပိုင်ချယ်နယ်မှာ သီချင်းတစ်ပုဒ်တင်ထားတယ် "သူစိမ်း" တဲ့ ...။ ခုတလော ကျွန်မတို့လည်း သီချင်းထဲကလို အဝေးကသူစိမ်းပါပဲပေါ့....။

သူစိမ်းဆန်သွားသူတစ်ယောက်မှာခဲ့တဲ့ ညအိပ်ရင်ဖုန်းပိတ်အိပ်နော်ဆိုတာကို ကျွန်မနားမထောင်ဘဲ ဒီပို့စ်လာရေးဖြစ်တယ်....အချိန်က မနက် 1:35 ....။

ဖော်ဖေဝါရီ(၁)ရက်နေ့ ရုံးမတက်ဘူး တစ်နေကုန်အိပ်မယ်လေ 👌 ..... ဘယ်သူ့ သောက်ဂရုစိုက်ရမလဲ ...။

Pls ကျေးဇူးပြုပြီး ကိုရီး Y-Zetရဲ့ YouTube Channel ကို Subscribe လေးလုပ်ပေးကြပါဦးလို့ တောင်းဆိုပါတယ် ကျွန်မရဲ့ချစ်သော စာဖတ်သူများ ❤️❤️❤️

Bonus Songs

__________________________
Revolution will prevail 
မိုးငွေ့