80th Birthday.....

အချုပ်အနှောင်ခံဘဝကမလွတ်မြောက်သေးတဲ့ အမေ့ကို ပျော်ရွှင်သောမွေးနေ့ဖြစ်ပါစေလို့ ဆန္ဒမပြုချင်ဘူး အသက်(၈၀)ပြည့်အမေ့မွေးနေ့မှာ ဆုတောင်းပေးချင်တာက

 အမေ သက်ရှည်ကျန်းမာပါစေ 

အချုပ်နှောင်ခံရတဲ့ဘဝကနေ အမြန်ဆုံးလွတ်ပါစေ

အမေချစ်တဲ့သားသမီးတွေအားလုံးနဲ့ အမြန်ဆုံးပြန်ဆုံနိုင်ပါစေ

အေးချမ်းတဲ့ဘဝ အမြန်ဆုံးရပါစေ

💖 WE LOVE AUNG SAN SU KYI 💝

အမေပြောခဲ့တဲ့ အကြိုက်ဆုံးစကား ....

''You should never let your fears prevent you from doing what you know is right''

"The only real prison is fear and the only real freedom is freedom from fear"

မိုးညများ.....

 

ဒီသီချင်းလေးနားထောင်တော့ ကျနော် အက်ဆေးတစ်ပုဒ်ရေးချင်စိတ်ပေါက်မိတယ်....။ ဒါပေမယ့် ဘာစကားလုံးမှ ထွက်မလာတော့ဘူး ...။ အရင်လို အက်ဆေးလှလှနုနုရွရွလေးတွေရေးတဲ့ မိုးငွေ့လည်း အသေးစိပ်  စနစ်တကျ ဖျက်စီးခံနေရတဲ့နိုင်ငံမှာ  အိုင်ဒီယာတွေလည်းခမ်းကုန်ပြီထင်ရဲ့....။ ခုတော့ မိုးငွေ့ဟာ မိုးငွေ့မဟုတ်တော့သလို စိတ်ကူးယဉ်စာတွေထက် လက်တွေ့ကျတဲ့အကြောင်းတွေကိုပဲရေးချင်တော့တယ်..။

ကျနော်တို့ နုရွရမယ့်အချိန်မဟုတ်တော့ဘူးလေ နော့.....။

တစ်နှစ်လောက်ထွက်ထားတာပေမယ့် "မိုးညများ"က ကျနော်နားမထောင်ရသေးတဲ့ မိုးသီချင်းအသစ်လေးတစ်ပုဒ်ပဲ စကားမစပ် နီနီနဲ့ကျနော်တို့နဲ့က တစ်တိုက်ထဲနေတာ :)

My Doodles Art .....(6)

 

မနီးတော့တဲ့ကမ္ဘာ.....

 

ဒီအဆိုတော်နှစ်ယောက်က ဗျတ်ဝိနဲ့ဗျတ္တ တဲ့....။ တိုင်းရင်းသား အဆိုတော်တွေလို့တော့ထင်တယ်...။ ရာဇဝင်ထဲက ကုလားညီနောင်တော့မဟုတ်ဘူးပေါ့...။ သူတို့သီချင်းက tik tok မှာ trend ဖြစ်နေတာရော...ဘာဝင်ကြည့်ကြည့် "ဝေးရမယ်ဆိုတာ သေချာသည်" က ခနခနတွေ့နေရတာ....။ သူတို့သီချင်းတချို့တော့ You Tube မှာတွေ့တယ်....။ မနီးတော့တဲ့ကမ္ဘာက သုံးပတ်နဲ့ 1.1 M view ရနေပြီ....။ ဒီနေ့ထိ update view က 2.9 M ပါ...။ ဗျတ္တကတော့ ယွန်းမြတ်သူ သီချင်းတွေဖြစ်တဲ့ "အဆင်ပြေမနေပါဘူး" "နင်လမ်းတွေ့ခဲ့ရင်" နဲ့ "oxygen" ကိုရေးပေးတဲ့ တေးရေးလို့လည်း သိရတယ်...။ သူတို့ရဲ့ ကျနော်မသိတဲ့ အနုပညာလှုပ်ရှားမှုတွေက အများကြီးနေမှာ....။ အခက်ခဲတွေကြားက လူငယ်တွေ လွတ်လပ်စွာ ကိုယ့်အိပ်မက်ကို အကောင်ထည်ဖော်ခွင့်ရတာတွေ့တော့ မုဒိတာပွားမိတယ်...။ ပြီးတော့ ကျနော်က အလုပ်ကြိုးစားတဲ့လူငယ်တိုင်း(လူတိုင်း)ကို ချီးကျူးအားပေးတယ်...။ ကျနော်တို့နိုင်ငံမှာက အလုပ်လုပ်တဲ့သူထက် ငပျင်းတွေ သူတောင်းစားတွေ ပိုပိုများလာနေတဲ့အကြောင်းရင်းက အထက်ကဆိုတဲ့ တကိုယ်ကောင်းဆန်တဲ့ ယုတ်ညံ့တဲ့စိတ်ဓါတ်ပိုင်ရှင်တွေ စနစ်တကျဖျက်စီးထားတဲ့အကျိုးဆက်တွေပေါ့...။ ရှေ့ဆက်ပြီး ကောင်းလာဖို့ထက် ဆိုးသထက်ဆိုးလာမယ့် ဒီကမ္ဘာကြီးမှာ ကိုယ့်မျိုးဆက်တွေကို ချန်မထားခဲ့ကြပါနဲ့ ကလေးတွေ သနားလို့ပါ...။

မိုး.....

ဒီသီချင်းလေးနားပြန်နားထောင်တော့ 2000-2005 ဝန်းကျင်နှစ်တွေကို သတိရမိတယ်...။ 2002ကစပြီး ကျနော် အလုပ်လုပ်နေပြီ အဲတုန်းက ငယ်သေးတော့ တာဝန်လည်းမကြီးသေးတော့ ပေါ့ပေါ့ပါးပါးလွတ်လွတ်လပ်လပ်ပဲ...။ လစာ နှစ်သောင်းခွဲစရတာ မှတ်မိသေးတယ်..။ အဲခေတ်က အဲလစာနဲ့ MKဆိုင်မှာ brand တွေဝယ်ဝတ်နိုင်တယ်..။ အလုပ်ကပြန်လာရင် အိမ်မရောက်ခင် လမ်းမှာရှိတဲ့ မုန့်တွေ စားချင်တာစားလိုက်တာပဲ...။ ညဖက် ရေမိုးချိုး စားသောက်ပြီးရင်လဲ အောက်တစ်ခါပြန်ဆင်း စာအုပ်အငှားဆိုင်သွား ခွေအငှားဆိုင်သွားမွှေရသေးတယ်... အဲတုန်းကတော့ အင်တာနက်တွေမပေါ်သေးတော့ အဲဆိုင်တွေသွားတဲ့ခေတ်မဟုတ်သေးဘူး ဗီဒီယိုခွေကြည့် မဂ္ဂဇင်းစာအုပ် ကာတွန်း ဝတ္ထုစာအုပ်ဖတ်တဲ့ခေတ်...။ သီးချင်းတောင် Mp 3 Mp 4 လောက်ပဲရသေးတာ ကိုယ်နားထောင်ချင်တာ ဆိုင်မှာသွားဘမ်းရတယ်...။

ပြီးတော့ အလုပ်ကအပြန် မိုးရွာထဲလမ်းလျှောက်ရတာ သိပ်သဘောကျတယ်...။ ကျနော် တက္ကသိုလ်မတက်ခင်ဆက်ကြား သင်တန်းတွေတက်နေတဲ့ ကာလတွေတုန်းက အင်္ဂလိပ်စာသင်တန်းက ကောင်လေးတစ်ယောက်နဲ့ ရက်ပိုင်းလေးခန ရည်းစားဖြစ်ဖူးတာအမှတ်ရမိတယ်...။ အဲတုန်းက လက်ကိုင်ဖုန်းဘယ်သူမှ သိပ်မကိုင်နိုင်တဲ့ခေတ်မှာ ကျနော့်ဆီမှာ ဆယ်လူလာဖုန်းတစ်လုံးရှိတယ်... တစ်ညနေမှာ အဲဖုန်းလေးနဲ့ မိုးဖွဲဖွဲလေးထဲမှာ လမ်းလျှောက်ရင်း အဲကောင်းလေးနဲ့ ဖုန်းပြောခဲ့ဖူးတယ်...။ " ငါအခု မိုးဖွဲအောက်ကနေ လမ်းလျှောက်ရင်း ဖုန်းပြောနေတာ သိလား" ဆိုပြီး မိုးရေထဲမှာ ဖုန်းလေးတစ်လုံးနဲ့ RO တာကို လက်တွေ့လုပ်ရလို့ ဂုဏ်ယူဝင့်ကြွားခဲ့ရသေး...။ အဲဒါ မိန်ရာသီခွင်မှာမွေးတဲ့သူတွေပဲ....။

စည်သူလွင်ဆိုတာ တစ်ချိန်က သီချင်းဆိုပြိုင်ပွဲကနေ ကိုညီထွဋ်ရဲ့သီချင်းနဲ့ ဆုရခဲ့ဖူးတဲ့ အဆိုတော်တစ်ယောက် ...။ ကျနော် ပထမနှစ် ကျောင်းစတက်တော့ ကိုစည်သူက RC2 မှာ နောက်ဆုံးနှစ်ကျောင်းသားဖြစ်နေပြီ ကျနော်တို့ထက် လေးငါးနှစ်တော့ကြီးတယ်...။ RC 2 မှာ Fresher Welcome လုပ်ရင် သွားသွားကြည့်တာ အဲမှာ စည်သူလွင်သီချင်းလာဆိုမယ်ပေါ့...။ သီချင်းတစ်ပုဒ်ဆီတိုင်းမှာ ကျနော်က ဇာတ်လမ်းလေးတွေ ပြောစရာရှိနေတော့တာ...။ ကဲ... ဒီနှစ်လည်း ကျနော် မိုးနဲ့ ပတ်သက်တဲ့ မတင်ရသေးတဲ့ သီချင်းတွေ အများကြီးရှာထားတယ် တစ်ပုဒ်ဆီလာတင်ပေးမယ်...။

☔...... သည်းသည်းမဲမဲ ရက်စက်တဲ့ မိုးရေ အကြင်နာတွေ သွန်းဖြိုးဦး ရက်ရက်စက်စက် ထားခဲ့တဲ့ မိုးရေ နှုတ်ဆက်ခဲ့ပြီနော် မိုးတိမ်တွေရယ် ညှို့ကာမဲခဲ့ရင်လေ ကိုယ်ကြွေပြီမိုးရေ .....☔

(သတိရခြင်းဆိုတာ)

လွတ်လပ်တယ်

တိကျသေချာတယ်

သိုဝှက်ဟန်ဆောင်မှုကင်းတယ်

လုံခြုံတယ်

အချက်အလက်ပြည့်စုံတယ်

ဒါပေမယ့်

အထီးကျန်ဆန်တယ်

၀မ်းနည်းစရာကောင်းတယ်

မရေရာတဲ့ မျှော်လင့်ချက်ရှိတတ်တယ်

အဆိုးဆုံးကတော့

တစ်ဖက်သတ်ဆန်တယ်။               ။

(အယ်ဖြူ)

( ၁၉၇၂ - ၂၇၊ မေ၊ ၂၀၀၄ )

မှတ်ချက်။          ။ ဦးကျားကြီး(ဆရာကျောင်း) စာမျက်နှာကယူလာတာ 

မုန့်လင်မယား.....

 

မုန့်လင်မယားလုပ်တဲ့အိုးလေးကို ဝယ်ထားတာကြာလှပြီ...။ လုပ်စားဖြစ်တာက ဒါ ဒုတိယအကြိမ်....။ ကျနော်တို့ လုပ်စားတဲ့မုန့်လင်မယားက ရှမ်းပြည်မှာ ကျနော်တို့ငယ်ငယ်ကစားဖူးတဲ့ အရသာအတိုင်းလုပ်တာ အုန်းနို့နဲ့ သကြားလေးဖြူးစားရတာ....။ သူ့အရာသာက ထားဝယ်က အာပုံမုန့်နဲ့တူတယ်...။ ရန်ကုန်မှာလုပ်ရောင်းသလို ငုံးဥ ပဲပြုတ် တွေ နှမ်းထောင်းတွေနဲ့မဟုတ်ဘူး...။ ပထမတစ်ခေါက်က ရန်ကုန်လိုမျိုးလုပ်စားဖူးတယ် ...။ မုန့်နှစ်စပ်တာခြင်းတော့ကွာသွားတယ်...။ ပဲပြုတ်နဲ့က အငံမုန့်လို့ဆိုပါစို့ သူ့မုန့်နှစ်ကျတော့ ဆန်မှုန့် ပဲမှုန့် ဆား ဆိုဒါ ဆီနဲနဲ ပါတယ်...။ အခု ရှမ်းပြည်ကလိုကျတော့ အချိုလို့ခေါ်ရမှာထင်တယ် သူ့မုန့်နှစ်မှာပါတာက ဆန်မှုန့် ပြောင်းကော်မှုန့်နဲနဲ ဆား နဲ့ အုန်းနို့တို့ပဲဖြစ်တယ်...။

မုန့်လင်မယားဆိုပေမယ့် အဲမုန့်လုပ်တိုင်း တစ်ခုနဲ့တစ်ခုထပ်ထားတာမျိုး တစ်ခါမှမလုပ်ဘူး အဲလို တစ်ခြမ်းဆီပဲ ပန်းကန်ထဲစီပြီးစားလေ့ရှိတယ်.....။ ရှမ်းလိုတော့ ခနုံခုတ်လို့ခေါ်တယ်...။ ယိုးဒယားကနေ ဆင်းသက်လာတဲ့ မုန့်ပဲသရေစာတစ်မျိုးလို့ထင်တယ်...။ ကျနော်အခုလုပ်စားဖြစ်တဲ့ မုန့်စပ်နည်းအချိုးအစာလေးကို ပြောပြပါမယ်...။ မွှေးဆန်စိမ်းမှုန့်တစ်ထုပ် ပြောင်းကော်မှုန့် သုံးဇွန်း baking soda လက်ဖက်ရည်ဇွန်းတစ်ဇွန်းခွဲ ဆားအနယ်ငယ်နဲ့ ရေကိုခပ်ကျဲကျဲထည့်ဖျော်ပြီး နာရီဝက် တစ်နာရီလောက် နှပ်ထားပါ....။ အုန်းနို့ကကျတော့ ကိုယ့်ဘာသာ အုန်းသီးဆံကိုအရည်ညှစ်ထားတာဖြစ်ဖြစ် အုန်းနို့ဗူးဖြစ်ဖြစ်သုံးလို့ရပါတယ်...။ ကျနော်ကတော့ အုန်းနို့ဗူးအသေးတစ်ဗူးသုံးပါတယ်...။ အုန်းနို့ကိုတော့ မုန့်နှစ်ထဲမရောပါဘူး သပ်သပ်ထားထားတာပါ...။

မု့န်လုပ်မယ့်အိုးလေးကို ဆီသုတ်ပြီး အရင်အပူလေးထား....။ ကျနော်တို့အိုးက လျှပ်စစ်အိုးမဟုတ်ဘူး ဂက်စ်နဲ့တည်ရတာ...။ မီးကို အသေးဆုံးထိထားပြီးကြော်ပေးပါ...။ အိုးပူလာရင် မုန့်နှစ်ရည်ကို ဒယ်ထဲတစ်ခွက်ခြင်းဆီလောင်းထည့် အပြည့်မထည့်ပါနဲ့ အုန့်နို့အတွက် နဲနဲနေရာချန်ထားပေးပါ...။ ခွက်လေးတွေအားလုံးမုန့်နှစ်တွေထည့်ပြီးရင် အုန်းနို့ရည်ကို ဇွန်းလေးနဲ့လိုက်ဖြည့်ပေးပါ ပြီးတာနဲ့ အဖုံးလေးခနအုပ်ထား... သုံးလေးမိနစ်လောက်ဆို အနေတော်ပဲ စားလို့ရပြီ...။ အိုးက မကပ်အိုးမို့လို့ ကော်ထုတ်ရတာလဲလွယ်တယ်...။ စားခါနီး သကြားလေးဖြူးစား ဆိမ့်ဆိမ့်လေးနဲ့ သိပ်ကောင်းပဲ...။ ဪ အရေးကြီးတာပြောဖို့မေ့ မုန့်နှစ်လေးကို အိုးထဲထည့်ခါနီးတိုင်း ဇွန်းနဲ့မွှေပေးပါ မုန့်နှစ်တွေ အနည်ထိုင်တတ်လို့ပါ....။

အဘိဓမ္မာစိတ်ပိုင်း(၇).....

 

နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ

 

အရူပါဝစရစိတ် (၁၂)ပါး

အရူပါဝစရစိတ် (၁၂)ပါးကို အောက်မှာ အဆင့်ဆင့်ခွဲပြထားပါတယ်...။

1) အရူပါကုသိုလ်စိတ် (၄)ပါး အရူပါဝစရကုသိုလ်စတ်

2) အရူပါဝစရစိတ် (၄)ပါး အရူပါဝစရ ဝိပါတ်စိတ်

3) အရူပါဝစရကြိယာစိတ် (၄)ပါး အရူပါဝစရ ကြိယာစိတ်

အရူပါကုသိုလ်စိတ် (၄)ပါး

၁. အာကာသာနဉ္စာယတနစိတ်                (၇၀)

၂. ဝိညာဏဉ္စာယတနစိတ်                        (၇၁)

၃. အာကိဉ္စာ ယတနာစိတ်                        (၇၂)

၄. နေဝသညာနာသညာ ယတနစိတ်         (၇၃)

အရူပါဝစရစိတ် (၄)ပါး

- အရူပါဝိစရ ကုသိုလ်စိတ်နှင့်တူ            (၇၄-၇၇)

အရူပါဝစရကြိယာစိတ် (၄)ပါး 

- အရူပါဝိစရ ကုသိုလ်စိတ်နှင့်တူ            (၇၈-၈၁)

1.အာကာသာနဉ္စာယတနစိတ်   

အဆုံးမရှိသော ကောင်းကင်ပညတ် Space of infinity ကိုအာရုံပြုသောဈာန်နှင့်ယှဉ်သောစိတ်...။

2.ဝိညာဏဉ္စာယတနစိတ် 

အဆုံးမရှိသော ပထမ အရူပါဝစရစိတ် Boundless Consciousness ကိုအာရုံပြုသော ဈာန်နှင့်ယှဉ်သောစိတ်...။

3. အာကိဉ္စာ ယတနာစိတ်

ပထမအရူပါဝစရစိတ်၏ မရှိခြင်း "နတ္တိဘောပညတ်" Nothingness ကိုအာရုံပြုသော ဈာန်နှင့်ယှဉ်သောစိတ်...။

4. နေဝသညာနာသညာ ယတနစိတ်  

အသိရှိလည်းမဟုတ် ရှိသည်လည်းမဟုတ်ဆိုသော နေဝသညာနာသညာယတန Neither Consciousness nor non Consciousness စိတ်...။

       အရူပါဝစရစိတ်                   မှီတွယ်အပ်အာရုံ                    လွန်မြောက်အာရုံ

         ပထမစိတ်                      ကောင်းကင်ပညတ်                   ကသိုဏ်းပညတ်
         ဒုတိယစိတ်                     ပထမရူပါဝစရစိတ်                  ကောင်းကင်ပညတ်

         တတိယစိတ်                    နတ္တိဘောပညတ်                           ပထမရူပါဝစရစိတ်

         စတုတ္ထစိတ်                    တတိယရူပါဝစရစိတ်                  နတ္တိဘောပညတ်

အရူပါဝစရစိတ်များဟာ ဉပေက္ခာ ဧကဂ္ဂတာဆိုသော ဈာန်အင်္ဂါနှစ်ပါးနဲ့သာ ယှဉ်သောကြောင့် ယင်းစိတ်အားလုံးကို ပဉ္စမဈာန်၌ထည့်သွင်းထားပါတယ်...။

အရူပဆိုတော့ နာမ်ချည်းသက်သက်သာသာရှိတဲ့ဘုံပါ...။ ရုပ်အနေနဲ့ ဘာမှမရှိပါဘူး...။ ဒီနေရာမှာ တချို့က အတွေးအခေါ်

လူ့ဘုံကိုဘယ်လိုခေါ်သလဲ ?

ခန္ဓာငါးပါးရှိတော့ ပဉ္စဝေါကာရဘုံလို့ခေါ်တယ်...။

ရူပါဈာန်ငါးဆင့်ရပြီးမှ အရူပဈာန်ကို တက်လို့ရမှာပါ...။ ရူပါဈာန်ငါးဆင့်ဝင်စားနိုင်တဲ့ ပုဂ္ဂိုလ်တွေဟာ အထက်ဈာန်ဖြစ်တဲ့ အရူပါဈာန်တွေတက်ဖို့ ဆန္ဒရှိလာကတည်းက ရူပပဉ္စမဈာန်စိတ်ဟာ ကသိုဏ်းနိမိတ်ကို အာရုံယူရတော့ ရုပ်နဲ့ဆက်စပ်နေတာမို့ ရုပ်မဆက်နွယ်တဲ့ အရူပါဈာန်တွေထက် နည်းနည်းကြမ်းတမ်းပါသေးတယ်...။

အရူပါဈာန်တက်ဖို့ဘယ်နေရာကစပြီးရှုရပါသလဲ?

အရူပါဈာန်ကို ကျင့်တဲ့ယောဂီဟာ ရုပ်နဲ့ဆက်နွယ်နေတာကို မလိုချင်လို့ ကသိုဏ်းကိုအာရုံမပြုတော့ဘဲ Ignore လုပ်လိုက်ပါတယ်..။ ကျမ်းဂန်တွေမှာ ကသိုဏ်းနိမိတ်ကိုခွာပြီး ကောင်းကင်ပညတ် Space of Infinity ကိုအာရုံပြုရမယ်လို့ဆိုပါတယ်...။ ဒီနေရာမှာ ခွာတယ်ဆိုတာ ကသိုဏ်းနိမိတ်ကို မရှုတော့တာ...။ ပယ်လိုက်တာပါ..။ ကသိုဏ်းနိမိတ်ကို ပယ်လိုက်တော့ အဲဒါပျောက်သွားပြီး ကွက်လပ်ကြီးကျန်ခဲ့တယ်...။ အဲဒီကွက်လပ်ကို အာကာသ Space ဆိုပြီး အားထုတ်ရမှာ...။

ဒုတိယဈာန်ရဖို့ ဘယ်လိုဆက်ပြီး အားထုတ်ရသလဲ?

ပထမဈာန်ရပြီးတဲ့အခါ လောကသဘာဝအတိုင်း သူက ရှေ့ဆက်တက်ချင်လာတယ် ပိုပြီးကောင်းတဲ့ ဈာန်ကိုရချင်လာတာပါ...။ ဒါကလည်း ပထမဈာန်က ရူပါပဉ္စဈာန်နဲ့နီးတော့ သူ့ထက် သိမ်မွေ့တဲ့ ဒုတိယဈာန်တက်မှပဲလို့ စိတ်ကူးရှိပြီး အားထုတ်တာပါ...။ ဒီလိုဆက်ပြီး အားထုတ်မယ်ဆိုရင် ပထမ အရူပါဝစရဈာန်ကိုပဲ ပြန်ဝင်စားရပါတယ်...။ နောက်ဆက်မဝင်စားတော့ဘဲ ပထမဈာန်စိတ်ဟာ အဆုံး အပိုင်းအခြားမရှိတဲ့စိတ်ဆိုတော့ အနန္တဝိဉာဏ် Boundless Consciousness  သဘောရှိတယ်..။ ဒီလို အထပ်ထပ်ရှုသွားရင် ဒုတိယအရူပဈာန်ကို ရောက်သွားပါလိမ့်မယ်..။ ဒီဈာန်ကို ဝိညာဏာဉ္စာယတနဈာန်လို့လည်းခေါ်တယ်...။

ဒုတိယဈာန်ရောက်ရင် တတိယဈာန်ကို တက်ချင်မှာပေါ့....

တတိယဈာန်ရဖို့ ရောက်ဖို့ ဘာကိုအာရုံပြုရသလဲ?

သူက ပထမဈာန်ရဲ့ မရှိခြင်း Nothingness ကိုပဲ အာရုံပြန်ပြုရပါတယ်...။ တကယ်တော့ စိတ်ဟာ တစ်ခုပြီးမှတစ်ခု ဖြစ်နိုင်တာလို့ ဒုတိယဈာန်ဖြစ်တဲ့အခါ ပထမဈာန်က မရှိတော့ဘဲ ပျောက်သွားပါပြီ...။ ရှိတာတောင် အာရုံပြုဖို့က ခက်ခဲတော့ မရှိတာကို အာရုံပြုနိုင်တယ်ဆိုရင် တော်တော်ကို အထက်တန်းကျပြီး သိမ်မွေ့တဲ့ စိတ်ဖြစ်နေပါပြီ...။ ဒီလိုမရှိတာကို အာရုံပြုပြီး အထပ်ထပ်ပွားများလိုက်ရင် တတိယဈာန်ကိုရောက်သွားပါတယ်...။ အာကိဥ္စညာယတနဈာန်လို့လည်း ခေါ်တယ်...။ ဒီနေရာမှာ အာကိဥ္စည က လုံးဝအကြွင်းအကျန်မရှိခြင်း Total Absent အာယတနက တည်ရာ Place ဖြစ်တာမို့ ပထမ အရူပါစိတ်ရဲ့ အကြွင်းမရှိသော နတ္တိသဘောပညတ်ကို အာရုံပြုတဲ့ ဈာန်စိတ်ရဲ့ တည်နေရာလို့ အဓိပ္ပါယ်ရတယ်...။ (အရူပဈာန်စိတ်တွေရအောင်ပွားများရတာ တော်တော်သိမ်မွေ့တာပဲ)

မရှိတာကို ဘယ်လိုအာရုံပြုရမလဲ?

ဒီလိုဘာမှမရှိတာကို အာရုံပြု အာရုံစိုက်လို့ ဖြစ်ပါ့မလားဆိုတာ ဗုဒ္ဓကျမ်းဂန်မှာ ဉပမာလေးနဲ့ ရှင်းပြထားပါတယ်...။ တစ်ခါက ရဟန်းတစ်ပါးဟာ သိမ်အတွင်းမှာ သံဃာများနဲ့အတူရှိနေပြီး ကိစ္စရှိလို့ ကျောင်းပေါ်ကို ခဏတက်သွားတယ်...။ သူကျောင်ပေါ်ရောက်ပြီး မကြာမီ သံဃာတွေကိုမတွေ့ရပေမယ့်...။ ဒီရှိတဲ့ သဘောကိုပဲ ပြန်လည်အာရုံစူးစိုက်လို့ရသလိုမျိုးပါပဲ.....။ တကယ်တော့ ရှိခြင်းမရှိခြင်းဟာ ဒင်္ဂါးပြားရဲ့ခေါင်းနဲ့ပန်းလိုပါပဲ...။

စတုတ္ထဈာန်ကျတော့ ဘာကိုအာရုံပြုရသလဲ?

သူကျတော့ အရင်ချုပ်သွားတဲ့ ဝိညာဏ်ကိုပဲ အထပ်ထပ် အာရုံပြုရပါတယ်...။ ဒီလိုနှလုံးသွင်းနေရင်း ဝိညာဏ်လေးက အလွန်သိမ်မွေ့သွားပြီး အသိရှိတယ် မရှိဘူး Neither Consciousness of non-consciousness လို့မပြောနိုင်တဲ့ အဆင့်ရောက်သွားရင် နေဝသညာနာသညာယတန စတုတ္ထအရူပဈာန်ကို‌ ရောက်သွားပါပြီ...။ ဒီသဘောလေးကိုလည်း ဗုဒ္ဓဒေသနာမှာ ရှင်းပြထားတာရှိပါတယ်...။ ဆရာတပည့်နှစ်ယောက်ခရီးသွားတော့ ကိုရင်လေးကရှေ့က ဆရာဘုန်းကြီးကနောက်က တစ်နေရာရောက်တော့ ကိုရင်က ချောင်းရိုးလေးအဖြတ်မှာ ရေလေးနည်းနည်းစီးဆင်းနေတာတွေ့တော့ "ရှေ့မှာ ရေရှိတယ်ဘုရား"လို့လျှောက်ပါတယ်...။ ရေရှိတယ်ဆိုပေမယ့် ရေချိုးလို့ရလောက်တဲ့ အထိမဟုတ် ခြေထောက်ရေစိုမယ် ရွှံ့ပေမယ်ဆိုတဲ့ သဘောပြောလိုက်တော့ အလားတူ သိလွယ်တဲ့ သညာနဲ့ စိတ်သဘောထားမျိုးမရှိပေမယ့် အလွန်သိမ်မွေ့တဲ့ စိတ်လေးကရှိနေပါတယ်...။

စတုတ္ထအရူပဈာန်က ရှိသမျှဈာန်ထဲမှာ အကောင်းဆုံးအသိမ်မွေ့ဆုံးဈာန်လို့ ထင်ရပေမယ့် လောကီချမ်းသာထဲမှာ အမြင့်ဆုံးဆိုပေမယ့် မြတ်စွာဘုရားက သူလဲ မမြဲဘဲချုပ်ပျောက်ရမှာမို့ ဈာန်ချမ်းသာကိုလည်း ဘုရားက ချမ်းသာအစစ်လို့မမြင်ဘဲ နိဗ္ဗာန်မှ ချမ်းသာအစစ်လို့ဟောပါတယ်...။

အရူပဈာန်က ဈာန်အင်္ဂါအနေနဲ့ ဘယ်နှစ်ပါးရှိလဲ?

သူက ဉပေက္ခာနဲ့ ဧကဂ္ဂတာဆိုပြီး နှစ်ပါးပဲရှိပါတယ်...။ ရူပပဉ္စမဈာန်နဲ့ အတူတူဖြစ်လို့ အရူပဈာန်စိတ်လေးပါးလုံးကို ပဉ္စမဈာန်ထဲမှာထည့်ထားတယ်...။

ရူပပဉ္စမဈာန် အရူပပဉ္စမဈာန်က ဈာန်အင်္ဂါချင်းအတူတူ ဘယ်မှာ အဓိကခြားနားလဲ?

သူတို့နှစ်ခုက ဈာန်အင်္ဂါတူပေမယ့် စိတ်တစ်ခုချင်း တစ်ခုချင်းမှာ ရှိတဲ့ အာရုံက မတူပါဘူး...။ ပထမစိတ်က ကောင်းကင်ပညတ် ဒုတိယစိတ်က အနန္တဝိညာဏ် တတိယစိတ်က နုတ္တိဘောပညတ် စတုတ္ထက အရူပါဝစရ စိတ်ဖြစ်တာမို့ ရူပဈာန်စိတ်တွေက ဈာန်အင်္ဂါနဲ့သွားပြီး အရူပါဈာန်စိတ်တွေက အာရုံနည်းသွားပါတယ်...။

ဈာန်ဝင်စားနေရင် ဘယ်နှစ်ရက်လောက် ဆက်တိုက်နေနိုင်လဲ?

လူခန္ဓာမှာ ထမင်းအသက်ခုနှစ်ရက် ရေအသက်တစ်မနက်ဆိုတဲ့ စကားအတိုင်း အစာမရှိဘဲနဲ့ အလွန်ဆုံးနေနိုင်တာ 7ရက်ပါ...။ ဈာန်ဝင်စားတယ်ဆိုရင် Limit ကအလွန်ဆုံးခုနှစ်ရက်ပါပဲ...။

နိရောဓ သမာပတ်ဆိုတာ ဘယ်လိုမျိုးလဲ ?

အဟုတ်ရှိတဲ့ နာမ်တရားတွေ ချုပ်ငြိမ်းကုန်တော့ ငြိမ်းအေးမှုသက်သက်နဲ့ အဓိဌာန်ပြုထားတဲ့ ကာလအတွင်း ခန္ဓာဟာ မလှုပ်မရှား ငြိမ်သက်စွာနေတာပါ...။ ဆီး ဝမ်း မသွားဘဲ နေလို့ရတယ်...။ မြင်လွယ်အောင် ပြောရရင် ငါးရံ့တွေဆို ရေခန်းသွားတဲ့ကန်မှာ တစ်နွေလုံးနေကြပေမယ့် မိုးပြန်ရွာတော့ ပြန်ရှင်သန်ကြပါတယ်...။ ဆေးပညာအရ Hibernation လို့ခေါ်တယ်...။ အသက်ရှူနှုန်း သွေးခုန်နှုန်းနဲ့ ခန္ဓာကိုယ်ရဲ့ ကမ္မဇီဝဖြစ်စဉ် metabolism အားလုံး နှေးသွားပြီး ပတ်ဝန်းကျင်နဲ့လိုက်လျောညီထွေ  adaptation ဖြစ်အောင်နေတာပါ...။ နိရောဓသမာပတ်မှာလည်း ဈာန်တန်ခိုး will power ခုနှစ်ရက် အဓိဌာန်ပြုပြီးနေလိုက်တာပါ...။

ရူပဝစရစိတ်က (15)ပါး အရူပဝစရစိတ်က (12)ပါး ဆိုတော့ အားလုံးပေါင်း (27)ပါး သူတို့အားလုံးဟာ အထက်တန်းကျပြီးမြင့်မြတ်တဲ့ ဈာန်စိတ်တွေမို့ Supernormal Consciousness ပါဠိလို မဟဂ္ဂုတ်စိတ်များလို့ခေါ်တယ်...။ ဒီအဆင့်ကို higher mental attainment လို့သုံးတယ်...။ စိတ်သင်တန်းအစက ကာမာဝစရစိတ် (54)ပါး ပေါင်းလိုက်ရင် (81)ပါး ရပါတယ်...။ ဒီစိတ်တွေဟာ ကာမ ရူပ အရူပ လောကသုံးပါးမှာ ကျင်လည်နေတဲ့ လောကီစိတ်တွေပါပဲ....။

မှတ်ချက်။     ။ ခွဲစိတ်ပါမောက္ခ ဒေါက်တာစိန်လင်း၏ ရွှေစင်မြင်းမိုရ်အဘိဓမ္မာစာအုပ်မှ ကောက်နုတ်ပါသည်...။ ကျွန်မလေ့လာပြီးသလောက် မှတ်သားထားသည်များကို သဘောပေါက်လွယ်အောင် အပိုင်းခွဲပြီး ဆက်လက်ရေးသားဖော်ပြပေးပါဦးမယ်....။ ဓမ္မလက်ဆောင်စာအုပ်ပေးခဲ့တဲ့ ဦး-----ကိုလည်း ဒီပို့စ်နဲ့ကျေးဇူးတင် ကန်တော့လိုက်ပါတယ်...။

Deleted.....

 

တစ်စုံတစ်ခု ဒါမှမဟုတ်....တစ်စုံတစ်ယောက်ဟာ ကျနော့်အတွက် Red flag လို့  toxic လို့ အချက်ပြလာတာနဲ့ ကျနော်ဘဝကနေ delete လုပ်လိုက်ဖို့ ကျနော်က လက်မတွန့်တတ်သူ....။  ကိုယ့်အတွက် အဆိပ်အတောက် ဖြစ်စေမယ့် လူတချို့ ခံစားမှုတချို့နဲ့ တချို့အမှတ်ရမှုတွေကို ဖျက်ပစ်ဖို့ ကျနော့်မှာ delete button ပါလာပြီးသား ဟုတ်တယ် အဲလိုပြောရမယ်....။

တကယ်က မနေ့ကဒီပို့စ်ကို ကျနော်ကျကျနန အပြီးသပ်ရေးအပြီးမှာ တစ်ခုခုမှားနှိပ်မိပြီး စာတွေအားလုံးပျောက်သွားတယ်... undo ပြန်လုပ်ဖို့တောင်မမှီလိုက်ဘူး....။ ပို့စ်မတင်ခင်မှာပဲ  delete လုပ်ပစ်တာ အလိုလိုကို...။ ဒါနဲ့ အရှေ့မှာရေးခဲ့ပြီးသား စာတွေနဲ့ အခုနဲ့ ဘာမှမတူတော့ဘူး အခုရေးတာက ရည်ရွယ်ချက်ချင်းတူပေမယ့် ရေးတဲ့စတိုင်လ်တော့နောက်တစ်ခုဖြစ်သွားပြီ....။ 

ပြီးခဲ့တဲ့ ရက်ပိုင်းကလဲ ကျနော် တစ်နှစ်ကျော်လောက်ဖွင့်ထားခဲ့တဲ့ tik tok အကောင့်ကို စိတ်အခန့်မသင့်တာလေးကြုံပြီး ချက်ချင်းကို  deleted ပစ်လိုက်တယ်...။ အဲထဲမှာ ဘာ memories တွေကျန်ခဲ့လည်း ကျနော်ဘာဆိုဘာမှမတွေးဘူး ကောက်လုပ်ပစ်တာ...။ ပြီးတော့ ကျနော့်အတွက် အဆိပ်အတောက်ဖြစ်လာစေဖို့ အရိပ်အယောင်ပြတာကြောင့်လည်း ဆက်မသုံးချင်တော့တာ...။ အချိန်ကုန်တယ် အိပ်ရေးပျက်တယ်...။ အမှန်တော့ tik tok က အချိန်တိုတို မိနစ်ပိုင်းလေးနဲ့ ထိထိရောက်ရောက်ပြောချင် ပြချင်တာလုပ်လို့ရတဲ့နေရာ နာရီပိုင်းလေးနဲ့ ပို့စ်ပေါင်း ရာနဲ့ချီကြည့်လို့ရတဲ့နေရာ သတင်းအချက်အလက်တွေ ဗဟုသုတရစရာတွေလည်း အများကြီးရတဲ့နေရာ သဘောကျစရာတော့ကောင်းပါတယ်...။  တစ်တော့ အကောင့်ကို ချက်ချင်းပိတ်ပစ်လိုက်ပြီး တစ်ရက်ခွဲနှစ်ရက်လောက်က ဖုန်းကိုင်ပြီး ဘာကြည့်လို့ကြည့်ရမှန်းမသိ တစ်ခုတည်းသောထည့်ထားတဲ့ ပစ္စည်းရှာတဲ့ ဂိမ်းကိုပဲဆော့နေမိ...။ ကျနော်လည်း နယူတန်ရဲ့ အင်နားရှားနိယာမ မိသွားတာပဲ...။

ကျနော့်ဘဝမှာ ကျနော်  delete မလုပ်တာဆိုလို့ ဒီဘလော့တစ်ခုပဲရှိမယ်...။ ဒါတောင် အကြိမ်ကြိမ်ပိတ်ပစ်ဖို့ ဖျက်ပစ်ဖို့ တွေးကြံခဲ့ဖူးတာ....။ ကျနော့်အတွက် ထွက်ပေါက်တစ်ခုတော့ ထားရမယ်ဆိုတာ နားလည်ထားလို့ ပြီးတော့ ကျနော်အတွက် အမှတ်ရစရာတွေ ကြည်နူးစရာတွေ ဝမ်းနည်း ဝမ်းသာစရာတွေ ရသအစုံအလင်ရှိတဲ့ နေရာလေးမို့ ကျနော် သေသွားသည့်တိုင် ဒီတိုင်းလေးထားခဲ့မယ့် ဘလော့ပါ...။

I wish I have deleted button in my life.

To delete some people, some memories and some feelings.

Daily Workout.....

Phone ထဲထည့်ထားတဲ့  Health App လေးပြန်ကြည့်တော့ ဒီနှစ် လမ်းလျှောက်တဲ့ခြေလှမ်းမှတ်တမ်းက မနှစ်ကထက်လျော့နေတယ်...။ တစ်ပတ်ကို ငါးရက်လောက်ရအောင် အချိန်ပေးပြီး ညနေပိုင်းလမ်းလျှောက်ဖြစ်နေတယ် တချို့နေ့တွေ ခြေလှမ်းသောင်းကျော်တယ်...။ အခု‌တော့ ခြေလှမ်းတွေက ပျမ်းမျှပြန်တက်လာပြီ...။ အဲဒီဂဏန်းတွေကြည့်ပြီး ကိုယ့်ကိုယ်ကို ထိန်းချုပ်ထားရတာပဲ တစ်ကိုယ်ရေကျန်းမာရေးအတွက်...။ အသက်ကရလာပြီမို့ ပိုဂရုစိုက်ဖို့လိုလာပြီ အရင်ကထက်...။ အိုရဲတယ် သေရဲတယ် ဒါပေမယ့်မနာချင်ဘူး အဲလိုပေါ့....။ မနက်မနက်အိပ်ရာထလာရင် ခေါင်းအုံတာ မအီမသာဖြစ်တာ ကျောနာနေတာတို့ လက်ချောင်းလေးတွေကွေးမရတာတို့ကစပြီလေ....။ ရာသီဥတုက ခုတလော အပူချိန်တွေကမြင့်နေတော့ (ဒီကြားထဲမီးကပျက်လိုက်တာလဲမပြောနဲ့) အဲကွန်းလေးနဲ့မှမအိပ်ရရင် တစ်ညလုံးအိပ်ရေးတွေပျက် မနက်ကျ မထနိုင် အလုပ်လုပ်ရတာမလန်း....။ အဲလိုတော့ မအလက တစ်တိုင်းပြည်လုံးကို ငရဲခန်းပို့ထားတာ....။ ငရဲပြည် နတ်ပြည်ဆိုတာ လူ့ပြည်မှာပဲရှိနေတာ...။ 

အဲကွန်းခန်းထဲနေတာကြာတော့ လူကသွေးပျစ်လာတယ်...။ တကယ်က ငါးဆယ်ကျော်နောက်ပိုင်း သွေးတိုး သွေးကြောအဆီပိတ် ဘာညာက အနည်းနဲ့အများ စဖြစ်နေကြပြီ...။ ခြေဆစ်လက်ဆစ်ကိုက်တာတွေ ကြွက်သားတွေနာကျင်လာတာတွေ အစုံအစုံပါပဲ...။ ဒီတော့ အကောင်းဆုံးနည်းလမ်းက ရေများများသောက် လှုပ်ရှားမှုများများလုပ်....။ ဆရာလင်းသိုက်ညွန့်ပြောပြောတတ်တဲ့ လူကြီးမင်းတို့ လှုပ်နေမှရမယ်ဆိုတဲ့ မက်ဆေ့က အားလုံးရဲ့ စီးပွားရေးကျန်းမာရေးအတွက် အကုန်အကျုံးဝင်တာတွေ့လား...။ အော်...ပြီးတော့ ဆရာဝန်တစ်ယောက်ပြောတာ နားထောင်ဖူးတယ် တစ်တော့မှာ ကျနော်တို့အရွယ်က ဝိုင်နေ့တိုင်းမှီဝဲသင့်ပြီ တစ်နေ့ကို အများဆုံး လေးခွက်လောက်သောက်လို့ရတယ် နှလုံးသွေးကြောမပိတ်ဘူး blood circulation လည်းကောင်းစေတယ်တဲ့...။ သောက်ရမယ်လေ.....သိပ်မကြိုက်ပေမယ့်လည်း....:)

သီချင်းနားထောင်ရင်း လမ်းလျှောက်တယ် အနည်းဆုံး 45မိနစ် အများဆုံး တစ်နာရီ....။ ပြီးတာနဲ့ အသက်ရှူလေ့ကျင့်ခန်းလုပ် အကြောလျှော့....။ ဒီနှစ်ထဲ 16:8 Fasting မလုပ်ရသေးဘူး 36နာရီအစာဖြတ်တာလည်းမလုပ်ဖြစ်သေးဘူး....။ ဒီဝါတွင်းမှာတော့ ကျနော် သက်သတ်လွတ်စားဖို့အစီအစဉ်မရှိသေးဘူး ။ အစားအသောက်တွေကလည်း အဆိပ်အတောက်များတော့ ချင့်ချိန်စားတတ်ဖို့လည်းလိုသေးတယ်....။ ဒါပေမယ့် ကျန်းမာရေးအတွက် Fasting လုပ်တာတို့ ဥပုသ်သီလယူတာတို့တော့ လုပ်ဖြစ်မယ်...။ ကော်ဖီကြမ်းသောက်မယ် ရေနွေးကြမ်းတစ်ခါတစ်လေသောက်မယ် အမျှင်ဓါတ်များများပါတဲ့ Chia Seeds လေးတွေ ရေထဲထည့်သောက်မယ် သကြားလျှော့စားမယ် အဆစ်တွေ မာဆယ်တွေနာလို့ ဂျုံ(Gluten) ခနရှောင်မယ်...။ ကြက်ဥနေ့တိုင်းစားနိုင်အောင် ကြိုးစားမယ်...။

လူတစ်ယောက်အမြဲကျန်းမာဖို့က immune system အမြဲကောင်းနေဖို့ပဲ....။ အဲလိုဖြစ်ဖို့က ကိုယ်လက်လှုပ်ရှားမှုရှိရမယ်....။ အခုခေတ်က ပင်ပင်ပန်းပန်းအားကစားသိပ်လုပ်စရာမလိုတော့ဘူး ခေတ်မှီနည်းလမ်းတွေနဲ့ ကျန်းမာရေးအတွက် ကိုယ်လက်လှုပ်ရှားမှုတွေက အမျိုးစုံ သင်တန်းတွေရှိနေပြီ ....။ ကျနော်ကတော့ သစ္စာရှိရှိ လမ်းလျှောက်ရေကူးပဲလုပ်ပါတယ် ယောဂလည်း မဆော့ဖြစ်ပါဘူး....။ ပြောနေကျအတိုင်း သတိရှိရှိနဲ့ ရေများများသောက်တယ် အသက်များများရှူပါတယ်....ဟုတ်..။

 

My Little Gallery.....

ကျနော့်ရုံးခန်းထဲက ပန်းချီကားလေးတွေ သုံးလေးကားလောက်ရှိတော့ ပြခန်းငယ်လေးတစ်ခုလို့တင်စားလိုက်ပါတယ်...။ ပန်းခရမ်းဖျော့ရောင်းမင်းသမီးဝတ်စုံနဲ့ကားလေးက ဆရာကြီးဦးလွန်းကြွယ်ရဲ့လက်ရာ....။ ကျနော့်အပိုင် ပန်းချီကားတွေတော့မဟုတ်ဘူး....။ ကျနော်တို့ သူဌေးဝယ်စုတဲ့ကားတွေက ရုံးခန်းရဲ့အခန်းတိုင်းမှာထားထားတယ်...။ ဒီကားတွေကို ကျနော်လက်ရွေးစင်ရွေးပြီး ကိုယ့်အခန်းထဲကိုယ်ထည့်ထားတာ...။  မင်းသမီးပုံလေးကိုတော့ အကြိုက်ဆုံးပေါ့ လေးပေ နှစ်ပေခွဲဆိုဒ်ကားပါ....။ ကျနော်က အလှအပကြိုက်တာမို့ အဓိပ္ပါယ်ဖော်ရခက်တဲ့ ပန်းချီကားတွေထက် ဒီလို ရိုးရိုးစင်းစင်း လှတပတပန်းချီကားတွေကို ပိုကြိုက်တယ်....။ ပြီးတော့ ဒုတိယအချက်က ကျနော်ကြိုက်တဲ့ အရောင်နှစ်ရောင်ပါနေတာကိုပဲ ပန်းရောင် ခရမ်းရောင် အနက်ရောင်....။

ဒါကတော့ လုံးဝ အဖြူခံမှာ မီးခိုးနဲ့ အနက်ပဲသုံးထားတာ ဘာပုံလဲ ဘာကိုပြောပြချင်လည်းတော့ ကျနော်လဲမသိဘူး ရှင်းလင်းနေလို့ကြိုက်တာပဲ...။

ဧည့်သည်လာရင် ကော်ဖီလေးဘာလေးထိုင်သောက်လို့ရ

ဝရံတာအပြင်ဖက်မှာ ယုဇနပန်းပင်လေး နှစ်အိုးစိုက်ထားတယ်....။ တလောက ဘာစိတ်ကူးမိတယ်မသိ မာလာမြိုင်ခြံထဲရောက်သွားပြီး ဝယ်ခဲ့တာ ခုထိ အိုးမလှယ်ရသေးဘူး...။ အဖူးတွေအများကြီးထွက်ပြီး တော်တော်လေးလည်း ပွင့်နေကြပြီး သူကအနံ့တော့သိပ်မရှိဘူးဘဲ....။

အသီးကနေ ပန်းအနွယ်ဝင်ဖြစ်တဲ့ Orange Jasmine

 

ကျနော်က ပန်းပွင့်လေးတွေကို အဖြူရောင်ပန်းပွင့်လေးတွေကိုပဲ ကြိုက်တတ်တာလား ?? ဟုတ်တယ် သတိထားမိသလောက်တော့ပန်းပင်ဆိုင်တွေကိုရောက်တိုင်း အရောင်ပါတဲ့ ပန်းပွင့်တွေကို ကျနော်ဘယ်တုန်းကမှ ဝယ်မစိုက်ဖြစ်ခဲ့ဖူးဘူး....။ အဖြူရောင်ပွင့်တဲ့ စံပါယ်တို့ ယုဇနတို့ပဲ... ဒါမှမဟုတ် အစိမ်းရောင်အရွက်တွေပဲပါတဲ့ ဂမုန်းလိုအပင်မျိုးပဲ ကျနော်စိုက်ဖြစ်တယ်...။ ကျနော်က ပန်းကလေးတွေကို အပြုစုမတော်တဲ့သူတစ်ယောက်လို့ ခံယူထားလို့ထင်တယ် စိုက်လို့လွယ်မယ့်အပင်မျိုးပဲ စိုက်ဖြစ်တယ် ဒီနေ့ထိ...။ ကျနော် ဇီဇဝါလို ပန်းမျိုးဝယ်စိုက်ဦးမယ် စိတ်ကူးတယ်....။ အပင်လေးတွေစိုက်ရတာ စိတ်ချမ်းသာတယ် စိတ်ကိုကြည်လင်လန်းဆန်းစေတယ် ဒါကြောင့် တစ်သက်လုံးစိတ်ချမ်းသာချင် အပင်စိုက်လို့ပြောကြတာကိုး....။

The Answer....

 

တေးရေးဆရာမလေး Phoebe Phoenix ရေးပေးတဲ့  " The Answer" ဆိုတဲ့ အယ်လ်ဘမ်က မောင်ချို့အတွက် မှတ်တိုင်တစ်ခုလို့တောင် ပြောလို့ရမယ်ထင်တယ်....။ ကျနော်တို့ငယ်ငယ်က တီဗီမှာ ဆေးကျောင်းသူလည်းဖြစ်တဲ့ "အိအိ" ဆိုတဲ့ အဆိုတော်ရဲ့ သီချင်းတွေ အမြဲကြည့်ခဲ့ရတယ်...။ ချမ်းမြေ့မောင်ချိုက အိအိရဲ့သမီးလေး .....။ သူသီချင်းဆိုတဲ့လေသံနဲ့ Tone က သူ့အမေနဲ့ တော်တော်ဆင်တယ်...။

မောင်ချိုထွက်ပြီးတဲ့ အယ်လ်ဘမ်ဆယ့်တစ်ခုမှာ "The Answer" က ကျနော်အကြိုက်ဆုံးဖြစ်မယ်ထင်တယ်..။ တကယ်က ကျနော်သူ့သီချင်းတွေကို အခုမှ ပထမဆုံး ဘလော့မှာရေးဖူးတင်ဖူးတာပါ...။ Aboy နဲ့  featuring ဆိုထားတဲ့ " အငွေ့အသက်များ " ကိုလည်းကြိုက်တယ်...ပြီးတော့ " Don't Know What To Do" ကိုကြိုက်တယ်...။

"The Answer" ကတော့ လောလောလတ်လတ် ကျနော် အိမ်ပြန်ရောက်လို့ အခန်းထဲရောက်ရင် ဖွင့်ဖွင့်နားထောင်နေဖြစ်တာပဲ နေ့တိုင်း...။ 🎶♥️ ....... ဒီရင်မှာအချစ်များ..... သူမြင်နိုင်ပါမလား.....🎶♥️

ဝေးပြီးတဲ့နောက်မှာ.....

သူပျော်နေတယ်လို့ စိတ်ထဲမှာ

ယုံထားလိုက်တယ်

နောက်ထပ် ဘာမှမသိရ မတွေ့ရ

မကြားရအောင် နေတယ်

ကိုယ့်စိတ်ကို ပျော်အောင်ထားတယ်

တတ်နိုင်တဲ့အခါ ရယ်တယ်

မတတ်နိုင်တဲ့အခါ ငိုတယ်

မနေ့ကထက် ဒီနေ့ပိုလှအောင် ပြုံးတယ်

သတိရတဲ့အခါ ကြယ်တွေကို ငေးတယ်

အိပ်မက်ဟာ အိပ်မက်ပဲဆိုတဲ့အကြောင်း

ကြိုးစားလက်ခံလိုက်တယ်

အမှတ်တရတချို့ ပြန်တွေ့ရရင်

ကိုယ့် memory ထဲမှာပဲ

ဘယ်သူမှ မမြင်အောင်

တိတ်တိတ်ကလေး သိမ်းထားတယ်

ချစ်ခြင်းမေတ္တာဆိုတာကို စကားလုံးအဖြစ်နဲ့

ကဗျာထဲမှာ သုံးရုံလောက်ပဲ အာရုံရှိတော့တယ်

ဖြတ်မျဉ်းတစ်ကြောင်းလို

ကိုယ့်ဆီမှာ ခဏတာ

ရေစက်လာဆုံပေးတဲ့အတွက်လည်း

တစ်သက်စာ ကျေးဇူးတင်တယ်

ကြီးကြီးမားမားတွေ မလုပ်ပြချင်ပေမယ့်

တခမ်းတနားတော့ တိတ်ဆိတ်ပြချင်တယ်

#ဖရော်ဆန်

Metta Sutta .....

Telegram Channel မှာ ကျနော် Followed လုပ်ထားတဲ့ သုခိတာချောဆီက ကူးယူမျှဝေတာလေးပါ...

""မေတ္တာသုတ်ကို ရွတ်ဖတ်ကြသလို လက်တွေ့လည်း Apply လုပ်ရတော့မယ့် အချိန်အခါပါ ..

ကိုယ်တိုင် အထူးလိုက်နာဖြစ်တာတော့ ဒီအပိုင်းလေးပါပဲ .. 

“ လူအချင်းချင်း လှည့်ပတ်ခြင်း ကင်းရှင်းကြပါစေ .. 

အထင်သေးခြင်း အချင်းချင်း ကင်းရှင်းကြပါစေ 

ဆင်းရဲလိုခြင်း အချင်းချင်း ကင်းရှင်းကြပါစေ “တဲ့ 

ဒီကာလ မှာကိုယ်ဘယ်လောက် ကျင့်သုံးနိုင်လဲ ကိုယ့်ကိုယ်ကို ဆန်းစစ်ဖြစ်ပါတယ် .. 

နပရော ပရံ နိကုဗ္ဗေထ နာတိမညေထ ကတ္ထစိ နကိဉ္စိ ဗျာရောသနာ ပဋိဃသည နာညမညဿ ဒုက္ခမိစ္ဆေယျ။

**တစ်ယောက်ယောက်က တစ်ယောက်ယောက်ကို ဘယ်လိုအကြောင်းကြောင့်မျှ၊ ဘယ်နေရာမှာမဆို၊ စဉ်းလဲကောက်ကျစ် မကောင်းကြံခြင်း၊ မာန်မာနထောင်လွှားကာ မထီမဲ့မြင် ပြုခြင်း မရှိကြပါစေလင့်။

ကိုယ်နှုတ်တို့ဖြင့် စော်ကားပုတ်ခတ်ခြင်း၊ ဒေါသအာဃာတဖြင့် အချင်းချင်း သူတပါးဒုက္ခရောက်သည်ကို အလိုမရှိကြပါစေကုန်လင့်။ 

Na paro paraṃ nikubbetha, nātimaññetha katthaci naṃ kiñci,

Let none deceive another or despise any being in any state.

Byārosanā paṭīgha-saññā, nāññam-aññassa dukkham-iccheyya.

Let none through anger or ill-will wish harm upon another.

ဒီအချိန်က မေတ္တာပို့နေရမယ့် အချိန်ဆိုတာထက် မေတ္တာသုတ်မှာပါဝင်တဲ့ check list နဲ့ ကိုယ့်ကိုယ်ကို check လုပ်နေရတော့မယ့် အချိန်ဖြစ်နေပါတယ် 

မေတ္တာသုတ် ပါ Check list ကတော့ အောက်ပါ အတိုင်းပါ 

၁) သက္ကောစ - ကုသိုလ်ကောင်းမှု့ကို ပြုလုပ်ရန် စွမ်းနိုင်သူ ဖြစ်ရမည်။ 

(၂) ဥဇူ စ - ကိုယ်ရော နှုတ်ပါ ရိုးသားဖြောင့်မတ် မှန်ကန်သူ ဖြစ်ရမည်။

(၃) သုဟုဇူ စ -စိတ်ဓါတ် ပါ ရိုးသားဖြောင့်မှန်သူ ဖြစ်ရမည်။

(၄) သုဝစော စဿ - ဆိုဆုံးမခြင်းကို နာခံလွယ်သူ ဖြစ်ရမည်။

(၅) မုဒု - ယဥ်ကျေး သိမ်မွေ့ရမည် ။

(၆) အနတိမာနီ - မမောက်မာရ (မာနမကြီးလွန်းရ )။

(၇) သန္တုဿကော - တင်းတိမ်ရောင့်ရဲလွယ်ပြီး ရှိတာနှင့် ကျေနပ်ရမည် ( ဇီဇာမကြောင်ရ )။ 

(၈) သုဘရော စ - မွေးမြူလွယ်ရမည် (​သူများကူညီစောင့်ရှောက်မှု့ကို ကျေနပ်နှစ်သက်နိုင်ရမည်)။

(၉) အပ္ပကိစ္စော စ - ကိစ္စ နည်းပါးရမည် ( မိမိအလုပ်နားသည့်အချိန်မှာ မေတ္တာပွားရန် အချိန်ကို ယူတတ်ရမည်)။

(၁၀) သလ္လဟုက ဝုတ္တိ - ပေါ့ပေါ့ ပါးပါး အသက်မွေးတတ်ရမည် ။

(၁၁) သန္တိန္ဒြိယ - ဣန္ဒြေ သိက္ခာ ရှိရမည် ။

(၁၂) နိပကော စ - ရင့်ကျက်သော အသိပညာဖြင့် ပြည့်စုံအောင် ကြိုးစားရမည် ။

(၁၃) အပ္ပဂဗ္ဘော - ကြမ်းတမ်းခက်ထန်သူ မဖြစ်ရ ။

(၁၄) ကုလေသွ နနုဂိဒ္ဓေါ -ဆွေမျိုး မိတ်ဆွေ တို့အပေါ် တဏှာဖြင့် တွယ်တာမှု့ ကြီးသူ မဖြစ်စေရ ။

(၁၅) န စ ခုဒ္ဒ မာစရေ ကိဉ္စိ ၊ယေန ဝိညူ ပရေ ဥပ ဝဒေယျုံ - သူများအပြစ်တင် မေးငေါ့ခံရမည့် အပြစ်ပြောစရာ အပြုအမူများကို အသေးအဖွဲက စ၍ မပြုလုပ်ရ ။ တဲ့ 

၁၅ ချက်ရှိပါတယ် .

Being က Doing ထက် ပို အရေးကြီးနေတဲ့ အချိန်ဖြစ်နေလို့ ၂ ခုလုံးကို တပြိုင်ထဲ လုပ်နေပါတယ် .. ""

Cre: Sukhitachaw

https://t.me/sukhitachaw/783

🙏🤎