လေဟာနယ်.....

 

ခုတလော ဒီသီချင်းလေးက တစ်တော့မှာအရမ်းပေါက်နေတာ.....

အဆိုတော်လေးကဘာလူမျိုးလဲမသိ နာမည်အဆန်းလေး.....

🎶♥️ လေဟာနယ်မှာ အချစ်ရှိလား ?

🎶♥️ တိမ်တွေပေါ်မှာ အချစ်ရှိလား ?

🎶♥️ ပင်လယ်ပြင်မှာ အချစ်ရှိလား ?

အထွေထွေဓမ္မမှတ်စုများ.....(၃၀)

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

ပူဇော်သမျှကိုခံယူတော်မူထိုက်သော အလုံးစုံသောတရားတို့ကို မဖောက်မပြန် 

ကိုယ်တော်တိုင်သိတော်မူသော မြတ်စွာဘုရား ရှိခိုးကန်းတော့ပါ၏ဘုရား

 ꧁ ༺ မိမိ၏ တစ်နေ့တာကို မေတ္တာ ❤️ မုဒိတာ 😊 ကျေးဇူးတရား 🙏 တို့ဖြင့် ဖြတ်သန်းခြင်း ༻꧂

​

❝ နိုးနိုးခြင်း ❞ 

​-  မိမိသည် ယနေ့ ကျန်းမာစွာ  အသက် ရှင်ခွင့်ရသည့်အတွက် ​ ကျေးဇူးတင်ပါသည် ။  မိမိသည် ​ အေးချမ်းပါစေ  ​ အေးချမ်းပါစေ ​ အေးချမ်းပါစေ ။

❝ ရေချိုးခန်း၌ ❞ 

​- မျက်နာသစ်သောအခါ ​ လောကဓာတ်တစ်ခုလုံး၌ ရှိသော  ​သတ္တဝါတွေ အားလုံးတို့၏  စိတ်သည် ဤရေကဲ့သို့ ကြည်လင်အေးမြ  ချမ်းသာပါစေ ။ 

​- ရေချိုးသောအခါ လောကဓာတ်တစ်ခုလုံး၌ ရှိသော သတ္တဝါတွေ အားလုံးတို့၏ စိတ်သည် ဤရေကဲ့သို့  ကြည်လင်အေးမြ  ချမ်းသာပါစေ ။ 

 ❝ ​ ဘုရားရှိခိုး  / တရားထိုင်သောအခါ ❞ 

​- သံသရာ ဝဋ်ဆင်းရဲမှ ​ အပြီးတိုင် လွတ်မြောက်ရာ နိဗ္ဗာန်ရှိသည့်အတွက် ​ ကျေးဇူးတင်ပါသည်။ 

​- သံသရာ ဝဋ်ဆင်းရဲမှ ​ အပြီးတိုင် လွတ်မြောက်ရာ နိဗ္ဗာန်သို့  သွားရန် လမ်းပြပေးသည့် မြတ်စွာဘုရားရှင်အဆူဆူအား ကျေးဇူးတင်ပါသည် ။ 

- မြတ်စွာဘုရားရှင်၏ တရားတော်များအား တစ်ဆင့် ပြန်လည် မျှဝေဟောပြော လမ်းပြပေးသည့် ဆရာသမားများ ၊ သံဃာတော်များအား ကျေးဇူးတင်ပါသည် ။

​- နိဗ္ဗာန်ချမ်းသာကို ခံစားနိုင်သည့် လမ်းစဉ်အထိ  လက်တွေ့ ကျသော ၊ အခါမလပ် အကျိုးပေးသော ၊ မယုံကြည်သော သူတို့ကို စိန်ခေါ်နိုင်သော  တရားတော်အား ​ ကျေးဇူးတင်ပါသည် ။ 

​- တရားတော်သည်  ကျွန်ုပ်၏ စိတ်နှလုံး၌ ယနေ့ စက္ကန့်တိုင်း ကိန်းဝပ်ပါစေ ။ 

​❝ အိမ်မှ ​ မထွက်ခင်  (သို့) အားလက်ရက်၌ အိမ်မှာ နေသောအခါ  ❞ 

​- မိမိ၏ (မိဘ ၊ သားသမီး ၊ အကို ၊ အမ ၊ ညီ၊ ညီမ ​ ၊ ဦးရီး ၊ ဒေါ်ရီး ၊ အဘိုး ၊ အဘွား ၊ တူ၊ တူမ) တို့အား ယနေ့ ကျန်းမာစွာ တွေ့ရသည့်အတွက် ကျေးဇူးတင်ပါသည် ။ 

​- မိမိ၏ ​ (မိဘ ၊ သားသမီး ၊ အကို ၊ အမ ၊ ညီ၊ ညီမ ​ ၊ ဦးရီး ၊ ဒေါ်ရီး ၊ အဘိုး ၊ အဘွား ၊ တူ၊ တူမ) မြင်လျှင်မြင်ချင်း တစ်ဦးချင်း တစ်ယောက်ချင်း ​ အေးချမ်းပါစေ ။  အေးချမ်းပါစေ ။  အေးချမ်းပါစေ ။ 

​- ပြုတင်းပေါက်ထွက်ကြည့်လိုက်တိုင်း မြင်နေရသော မိမိ အိမ်၏ရှေ့ ၊ ​ နောက် ၊ လက်ဝဲ ၊ ​ လက် ယာ — ​ အိမ်  တိုက် တိုက်ခန်းအားလုံးမှ ပုဂ္ဂိုလ် သတ္တဝါအားလုံး ​ အေးချမ်းပါစေ ။ အေးချမ်းပါစေ ။  ​ အေးချမ်းပါစေ။ 

​❝ ပြင်ပ၌  / လမ်းသွားစဉ်  ❞ 

​- လမ်းသွားစဉ် လမ်းပေါ် ၊ ကားပေါ် ၊ ဘတ်စကားပေါ် ၊ ရထားပေါ် ၊ ​ ဈေး၌ မျက်စိရှေ့ မြင်မြင်သမျှ ​ ဧရိယာတစ်ဝိုက်မှ လူအားလုံး  အေးချမ်းပါစေ ။ အေးချမ်းပါစေ ။  အေးချမ်းပါစေ ။ 

​- ​ အလုပ်သွားသူများတွေ့လျှင်  ထိုသူတို့သည် အလုပ်၌ ဤတနေ့တာလုံး အဆင်ပြေချောမွေ့စွာ  စိတ်ချမ်းသာစွာ လုပ်နိုင်ကြပါစေ ။ 

- လမ်းသွားစဉ် ​ လင်မယား  စုံတွဲများ  တွေ့လျှင် ​ ချစ်ချစ်ခင်ခင် အိုအောင်မင်းအောင်  ကျန်းမာချမ်းသာစွာ  ပေါင်းသင်းနိုင်ပါစေ ။ 

​- လမ်းသွားစဉ် ​ ​ မိသားစုများကိုတွေ့လျှင် ​ ​ မိသားစုတတွေ ​ ​ ချစ်ခင်စည်းလုံးညီညွန့်စွာ နေထိုင်သွားနိုင်ကြပါစေ။ 

​- ကလေးများအား  ပြုစုနေသော မိဘများကို တွေ့လျှင် မိဘကျေးဇူး ကြီးမားပုံကို  ခဏမျှ ​ အောက်မေ့ပါ ။   

- လမ်းသွားစဉ် ​ ​ ကလေးသူငယ်များတွေ့လျှင်  ဉာဏ်ရည်ထက်မြက်၍ ပညာရေး ထူးချွန်ပါစေ။ 

​- လမ်းသွားစဉ် ​ လှပသူများ  တွေ့လျှင် ​ ဘဝဆက်တိုင်းဆက်တိုင်း ဤသို့ ၊ ဤထက်ပို  လှပနိုင်ပါစေ ။ 

​- လမ်းသွားစဉ် ​ အစားကောင်း အသောက်ကောင်း စားနေသူများ  တွေ့လျှင် ​ ဘဝဆက်တိုင်းဆက်တိုင်း  ဤသို့ ၊ ဤထက်ပို စားနိုင်ပါစေ။ 

​- လမ်းသွားစဉ် ​ ​ အသုံးအဆောင်ကောင်းများ  သုံးစွဲနိုင်သူများတွေ့လျှင် ​ ဘဝဆက်တိုင်းဆက်တိုင်း  ဤသို့ ၊ ဤထက်ပို အသုံးအဆောင်ကောင်းများ သုံးစွဲနိုင်ပါစေ ။ 

- လမ်းသွားစဉ် မြင်နေသော အဆောက်အအုံ၌ နေကြသော ​ လူ နတ် သတ္တဝါ  အားလုံး အေးချမ်းပါစေ ။  အေးချမ်းပါစေ ။ အေးချမ်းပါစေ ။ 

​- စားသောက်ဆိုင်သို့ ရောက်သောအခါ ​ ဤစားသောက်ဆိုင်၌ရှိသော စားဖိုမှူးများ  နှင့် ဝန်ထမ်းများ  အားလုံး ​ အေးချမ်းပါစေ ။  ​ အေးချမ်းပါစေ ။ အေးချမ်းပါစေ ။ 

​​

❝ အလုပ် လုပ်စဉ်  ❞ 

​- ​ မိမိ ၊ မိဘ ၊ မိသားစု စားဝတ်နေရေးအတွက် အလုပ်အကိုင် ရှိသည့်အတွက် ကျေးဇူးတင်ပါသည် ။ 

​- ယနေ့ လုပ်နေသည့် ကိစ္စ အဝဝ သည် အဆင်ပြေ ချောမွေ့သွားသည့် အတွက် ​ ကျေးဇူးတင်ပါသည် ။ 

​- ယနေ့ ဖြစ်ပေါ်နေသည့် အခက်အခဲ ပြဿနာ သည် အဆင်ပြေ ချောမွေ့သွားသည့် အတွက် ​ ကျေးဇူးတင်ပါသည်။ 

​- ယခု ဆက်ဆံတော့မည့် လုပ်ဖော် ကိုင်ဖက် ၊ အထက်အရာရှိများ တစ်ဦးချင်းအား ​ အေးချမ်းပါစေ ။  အေးချမ်းပါစေ။ အေးချမ်းပါစေ။ 

​- အလုပ်၌ ဒုက္ခ ပြဿနာတွေ့နေသော သူများတွေ့လျှင်လည်း  ထိုသူတို့သည် ပြဿနာအပေါင်းမှ ​ အမြန်ဆုံးပြေလည်ပါစေ။ အစစ အရာရာ အဆင်ပြေပါစေ။ 

​- အလုပ်၌ ရာထူး တက်သွားသူများကို တွေ့လျှင်လည်း ထိုသူတို့သည် ကုမ္ပဏီ၏အကျိုးကို ဆထက်တပိုး  ထမ်းဆောင်နိုင်ကြပါစေ။ 

​❝ အစာ စားစဉ် ❞ 

​​- ​ လယ်ကွင်းလယ်ကွက် ​ မြွေပါးကင်းပါး အသက်နဲ့ရင်း စိုက်ပျိုး ရရှိလာသော ဆန်ထမင်းတို့အတွက်  လယ်သမား ဦးကြီးများအား ​ ကျေးဇူးတင်ပါသည်။  

​- ယခု စားရသော အစာ အာဟာရ ၊ ​ ကောဖီ ၊ ​ ဆေး အတွက် ​ ကျေးဇူးတင်ပါသည်။ 

​- ယခု စားရသော အစာ အာဟာရ၏ ကုန်ကြမ်းများကို ​ စိုက်ပျိုးထုတ်လုပ် သူအားလုံး ၊ ရောင်းချပေးသော သူအားလုံးအား ကျေးဇူးတင်ပါသည် ။ 

​- “ဤထမင်း ဟင်းအား ခန္ဓာကိုယ် အာဟာရ အတွက်သာ သုံးဆောင်ခြင်းဖြစ်ပါသည်။” ​ ဟု ဆင်ခြင်၍ ​ စားပါ။ 

​​

❝ အိပ်ခါနီး ❞  

​- “ ​ ဪ ဒီတစ်နေ့တာ တာဝန်များ ပြီးစီး၍  အသေကလေး ​ သေရတော့မှာ ပါလား ။ 

ပြီးဆုံးသွားတဲ့ ဒီ တစ်နေ့တာလုံး အချိန်တော်တော်များများမှာ ဘာတွေ တွေးနေခဲ့သလဲ။ 

ဘာကောင်းမှု ကုသိုလ်တွေ လုပ်ခဲ့သလဲ ။  ဘာ အဆိုးတွေ လုပ်ခဲ့သလဲ ။ 

ဘာ အဆိုးတွေ ပြောခဲ့သလဲ။  ဘာ အဆိုးတွေ တွေးနေခဲ့သလဲ။ 

နောက်နေ့တွေမှာ ​ 

ဒီအဆိုးတွေ မလုပ်မိအောင် ​ မတွေးမိအောင် မပြောမိအောင် ​ ဘယ်လို ကြိုးစားမလဲ။ ”  ဟု ဆင်ခြင်၍  တရားမှတ်ပြီး  အိပ်ပါ။ 

​​

❝ လကုန်သောအခါ  ❞ 

​- မိဘ ၊ မိသားစု ကို ​ ထောက်ပံ့နိုင်သည့် ပိုက်ဆံရှိသည့်  အတွက် ကျေးဇူးတင်ပါသည်။ 

​- ဖုန်းခွန် ၊ အိမ်လခ ၊ ​ ဝင်ငွေခွန် ၊ အာမခံကြေး  ​ ၊ အထွေထွေ ​ ပေးရန် ကိစ္စအဝဝ  အတွက် ပိုက်ဆံရှိသည့်  အတွက် ကျေးဇူးတင်ပါသည်။ 

​- ဤရလာသော လခ ​ ပိုက်ဆံသည်  မိမိ ၊ မိဘ ၊ မိသားစု အသက်ရှင် တည်တံခိုင်မြဲဖို့အတွက်သာ ဖြစ်ပါသည်။ 

​

❝ စိတ် သဒ္ဓါတရား ထက်သန်သလို ​ ❞ 

​

မိမိဘဝ နေ့စဉ် ​ ကြုံတွေ့မှုများအလိုက် မိမိ ​ စိတ် သဒ္ဓါတရား ထက်သန်သလို မေတ္တာ  မုဒိတာ ​ ကျေးဇူးတရားများကို  အဆင့်ဆင့် ချဲ့ကား၍ ​ ပွါးများနိုင်သည်။ 

​နမူနာ

- ​ လူတစ်ဦးနဲ့ ၊ လူအများနဲ့  ​ တွေ့ဆုံစကားပြောတိုင်း ၊ ထိုသူတို့၏ အကူအညီ ၊ ဝန်ဆောင်မှုကို  ခံယူတိုင်း လှိုက်လှိုက်လှဲလှဲ စိတ်ထဲက ကျေးဇူးတင်ခြင်း ၊ ​ မေတ္တာပို့ခြင်း လုပ်ပါ။ 

​- မကျမ်းမာသူများ  တွေ့လျှင် အမြန်ဆုံး ပြန်လည် ကျမ်းမာလာပါစေ။ ​ ကျမ်းမာလာပါစေ။ ​ ကျမ်းမာလာပါစေ။ ​- မသန်စွမ်းသူများ တွေ့လျှင် အမြန်ဆုံး ပြန်လည် ကျမ်းမာ သန်စွမ်းလာပါစေ။ ​ သန်စွမ်းလာပါစေ။  သန်စွမ်းလာပါစေ။ 

​- တောင်းရမ်းနေသူများတွေ့လျှင်  ဘဝဆက်တိုင်း​ ငွေကြေးပစ္စည်း ဥစ္စာချမ်းသာသူများ  ဖြစ်ကြပါစေ။ 

​- သက်ကြီးရွယ်အိုများတွေ့လျှင်လည်း ထိုအဘိုအဘွား တို့သည် အနာရောဂါကင်း၍  အသက်ရှည်ပါစေ။  အသက်ရှည်ပါစေ။  အသက်ရှည်ပါစေ။ 

- ပင်ပင်ပန်းပန်း  လုပ်ကိုင်စားသောက်နေသူများတွေ့လျှင် ​ အမြန်ဆုံး ပြေလည်၍  သက်သက်သာသာ  လုပ်ကိုင်စားသောက်နိုင်ပါစေ။ ​ လုပ်ကိုင်စားသောက်နိုင်ပါစေ။ ​ လုပ်ကိုင်စားသောက်နိုင်ပါစေ။   

​- ဆင်းရဲသူများတွေ့လျှင်  စီးပွါးရေး အမြန်ဆုံး ​ ပြေလည်၍  ချောင်ချောင်လည်လည် နေနိုင်ပါစေ။  နေနိုင်ပါစေ။ ​ ​ နေနိုင်ပါစေ။  ​ ​  

​- ချမ်းသာသူများ  တွေ့လျှင် ယခုထက်ပိုပြီး  ရှာနိုင်ဖွေနိုင် ချမ်းသာနိုင်ပါစေ။  ယခုထက်ပိုပြီး  ရှာနိုင်ဖွေနိုင် ချမ်းသာနိုင်ပါစေ။  ချမ်းသာနိုင်ပါစေ။  ချမ်းသာနိုင်ပါစေ။ 

​- အလွန် ထူးချွန်သော အတတ်ပညာရှင်များကိုတွေ့လျှင် ယခုထက် ပို၍  ​ တဖက်ကမ်းခက်  ထူးချွန်ပါစေ။  ​ ထူးချွန်ပါစေ။ ​ ထူးချွန်ပါစေ။ 

- အလွန် အလုပ်ကြိုးစားသော သူများကို  တွေ့လျှင် ဤကြိုးစားသည်နှင့် ​ ထိုက်တန်သော ဆုကြေးလစာ ၊ အထူးကောင်းမွန်သောဘဝကို  ပိုင်ဆိုင်နိုင်ပါစေ။ ​ ပိုင်ဆိုင်နိုင်ပါစေ။  ​ ပိုင်ဆိုင်နိုင်ပါစေ။   

​- ယခု ​ သောက်ရသော ​ ဆေး  ​ အတွက် ​ ကျေးဇူးတင်ပါသည်။  ထိုဆေးကို ထုတ်လုပ်ပေးကြသော ဆေးပညာရှင်များ  ကျမ်းမာပါစေ။  ကျမ်းမာပါစေ။  ​ ကျမ်းမာပါစေ။   

- မိမိ ​ နေမကောင်း ဖြစ်တော့မည့်အခါ ၊ ​ ဖြစ်သည့်အခါ ​ ရောဂါပိုးမွှားများကို တိုက်ထုတ်ပေးသော  ဤ ခန္တာကိုယ်၏ ဇီဝ ​ ခံတပ် (Immune System)  ကို ​ ကျေးဇူးတင်ပါသည်။  ကျွန်ုပ်သည် မေတ္တာ  မုဒိတာ  တရားဘာဝနာများကို  ကျန်းကျန်းမာမာဖြင့်  ဆက်၍ အားထုတ်နိုင်ပါစေ။ 

​- မိမိ ​ အလုပ်မှ လခ ရသော ဤအလုပ်ကြောင့်  ငါ၏ မိသားစု အား  လုပ်ကျွေး နိုင်ခြင်းဖြစ်ပါသည်။ ဤအလုပ်အား ကျေးဇူးတင်ပါသည်။ 

​- ပန်းခြံသို့  ရောက်သော်အခါ သစ်ပင်ပန်းမန်များကို  တွေ့လျှင် ထိုသစ်ပင်ပန်းမန်များ ကျန်းမာသန်စွမ်း  စိမ်းစို လန်းစမ်းပါစေ။ ​ ထိုသစ်ပင်ပန်းမန်များကို စိုက်ပျိုးထိန်းသိမ်းသူ  အားလုံး အေးချမ်းပါစေ။  ​ အေးချမ်းပါစေ။ ​ အေးချမ်းပါစေ။ 

​ — အလှုအတန်းပြုသူများကို  တွေ့လျှင် ထိုသူတို့ပြုသော အလှုကိုငါသည် ဝမ်းမြောက်ဝမ်းသာ  သာဓု…  သာဓု…  သာဓု… ခေါ်ဆိုပါသည်။ ​ ထိုသူတို့သည် ဆထက်တပိုး လှုနိုင် တန်းနိုင်ပါစေ။ 

​- မိမိအလှူအတန်းပြုသော်အခါ  ယခုလို လှူနိုင် တန်းနိုင် သည့် ပိုက်ဆံရှိသည့် အတွက် ကျေးဇူးတင်ပါသည်။ 

​- အများအကျိုး ဆောင်ရွက်နေသူများ  တွေ့လျှင် ထိုသူသည် ဤကဲ့သို့ အများအကျိုးကို ဆထက်တပိုး  ​ ဆောင်ရွက်နိုင်ကြပါစေ။  ​ ဆောင်ရွက်နိုင်ကြပါစေ။  ​ ဆောင်ရွက်နိုင်ကြပါစေ။ 

​- ယနေ့ သာယာသော ​ နေအား  ​ ကျေးဇူးတင်ပါသည်။  ​ ​ နေကြောင့်သာ  မိမိနှင့်တကွ ​ လူသတ္တဝါ  အပင်များ  အသက်ရှင်နေရခြင်းဖြစ်သည်။ 

​- ဤကမ္ဘာမြေကြီး၏  ဆွဲအားကြောင့်သာ () ကျွန်ုပ်တို့ ပင်လယ် သစ်ပင်တောတောင်  အဆောက်အအုံများ  ​ တည်ရှိ နိုင်ခြင်း ဖြစ်သည်။ ​ လူသတ္ထဝါ အားလုံး  မျိုးစဉ်မျိုးဆက်  အစင့်စင့် အသက်ရှင်လာနိုင်ခြင်း ဖြစ်သည်။  ထို့ကြောင့် ဤမဟာပထဝီကမ္ဘာမြေကြီးအား ​ ကျေးဇူးတင်ပါသည်။   

​- အသက်ရှူကို  ၁ မိနစ်ခန့် အောင့်ပြီး သောအခါ ငါ၏ အသက်အား  အစဉ်အမြဲ ​ စက္ကန့် တိုင်း ​ ထောက်ပံ့ ပေးနေသော ​ ​ လေအား  ​ ​ ကျေးဇူးတင်ပါသည်။  ​ (လေအသက်  ၃ — ၄ မိနစ် ခန့်သာ။ ​ လေမရသည့် ၅မိနစ် နောက်ပိုင်းတွင် ဦးနှောက်ဆဲလ်များ စတင် ပျက်စီးလာပါပြီ။ )

​- ​ ငါ၏ခန္ဓာကိုယ်ဇီဝ ဖြစ်စဉ်ကို  ​ ထောက်ပံ့ ပေးနေသော ​ သောက်သုံးရေ အား  ​ ကျေးဇူးတင်ပါသည်။  ​ (ကျွန်ုပ်ခန္ဓာကိုယ် ​ ​ ခြောက်ဆယ်ရာခိုင်နှုန်းသည် ​ ရေဖြင့်  ဖွဲ့စည်းထားသည်။ ​ ရေအသက်  ၃ရက်သာ။ )

​- မိမိ အညစ်အကြေးစွန့်သောအခါ  ဤ အညစ်အကြေးစွန့်ပေးသော ​ ခန္တာကိုယ်ကြီးအား ​ ကျေးဇူးတင်ပါသည်။  ဤ ခန္တာကိုယ် ဇီဝဗေဒ ဖြစ်စင်ကို  အဓိက ​ လည်ပတ်ပေးသော ​ ဦးနှောက် ၊ ​ နှလုံး ၊ ​ ကျောက်ကပ် ၊ အသည်း ၊ အဆုတ် 🫁၊ သရက်ရွက် ၊ သည်းခြေအိပ် တို့အားလည်း ​ ကျေးဇူးတင်ပါသည်။ 

​- မိမိ ​ အမြဲ သုံးစွဲနေသော အသုံးအဆောင် ၊ ကိရိယာ တန်ဆာပလာ၊ နာရီ ၊ ​ မျက်မှန် ၊ ပိုက်ဆံအိတ် ၊ ​ အိမ်သုံး ပရိဘောဂ ၊ စက်ပစ္စည်း  များ တီထွင် ထုတ်လုပ်  ရောင်းချသူများ  အား ကျေးဇူးတင်ပါသည်။  ထိုသူတို့သည် ​ အေးချမ်းပါစေ။  အေးချမ်းပါစေ။  အေးချမ်းပါစေ။ 

​- ( ဥစ္စာဓန ​ ကြွယ်ဝချမ်းသာသူများ ) မိမိ၌ လက်ရှိပိုင်ဆိုင်နေသော ပစ္စည်းဥစ္စာတို့အား ယခုလို ပစ္စည်း ဥစ္စာ စုံစုံ လင်လင် နှင့် နေရသည့်အတွက် ကျေးဇူးတင်ပါသည်။  မိမိပိုင်ဆိုင်ရသလို ချို့တဲ့သောသူများလည်း  ပိုင်ဆိုင်ရပါစေ။ 

​- သီချင်းနားထောင်လျှင်လည်း  ထိုသီချင်း တီးမုပ် သီဆို ဖျော်ဖြေသော အနုပညာရှင် အားလုံး အေးချမ်းပါစေ။ ​ အေးချမ်းပါစေ။  ​ အေးချမ်းပါစေ။  ​ ဤသို့ အစဉ်အမြဲ ကောင်းသော အသံပိုင်ရှင် ဖြစ်ပါစေ။ 

​- ရုပ်ရှင် ကြည့်လျှင်လည်း ​ ထိုရုပ်ရှင်၌ ပါဝင် သရုပ်ဆောင်သော အနုပညာရှင်  အားလုံး ​ အေးချမ်းပါစေ။  ​ အေးချမ်းပါစေ။ ​ အေးချမ်းပါစေ။ 

​- တစ်စုံတစ်ဦးကို သတိရမိလျှင်လည်း  ထိုသူသည် ​ ​ အေးချမ်းပါစေ။ ​ ​ အေးချမ်းပါစေ။ ​ ​ အေးချမ်းပါစေ။   

​- ခွန်အားဗလကြီးမားသူများ  တွေ့လျှင်လည်း ​ အခုလိုပဲ ​ နောင်လည်း ကျန်းမာသန်စွမ်းပါစေ။  ကျန်းမာသန်စွမ်းပါစေ။  ကျန်းမာသန်စွမ်းပါစေ။ 

​- စိတ်ထားကောင်းသော သူများနှင့်  ​ တွေ့လျှင်လည်း စိတ်ထားကောင်းသော သူများနှင့် တွေ့ခွင့်ရသည့်အတွက် ​ ကျေးဇူးတင်ပါသည်။  ထိုသူတို့သည် ယခုလိုပဲ အစဉ်အမြဲ စိတ်သဘော ​ ကောင်းနိုင်ပါစေ။ 

​​

❝ နိဂုံးချုပ် ရှင်းပြချက် ❞ 

 ကျေးဇူး သိတတ်ခြင်းသည် (Gratitude) မြတ်စွာဘုရားကိုယ်တော်တိုင်  ဟောကြားသော မင်္ဂလသုတ်တော် မှ ​ မင်္ဂလာတရားပေါင်း(၃၈) ပါး မှ ​ ၁ ပါးလည်း ဖြစ်သည်။  ​ မြတ်စွာဘုရား တရားကို  ​ နေ့စဉ် လက်တွေ့ အောက့်မေ့ လိုက်နာ ကျင့်သုံးသော်ကြောင့် ​ မြတ်စွာဘုရားကို ​ လေးနက်သော ရှိခိုး ပူဇော်ခြင်း ​  ဖြစ်သည်။  

​ မိမိ ​ နေ့စဉ်ဘဝ ​ တွေ့ကြုံမှု ၊ ပိုင်ဆိုင်မှုတို့ကို  ​ လုံးလစိုက်၍  ​ ကျေးဇူးတင်သည့်အတွက်  ​ ​ ​ ရောင့်ရဲတင်းတိမ်လွယ်ခြင်းကို  ဖြစ်စေသည်။ ​ ရောင့်ရဲတင်းတိမ်လွယ်သည်လည်း ၃၈ဖြာ မင်္ဂလာ တစ်ပါး ပါပေ။ 

​ မိမိသည် ​ ​ မေတ္တာဖြင့်  အချိန်တော်တော်များများ၌ 🕓 ​ နေသည့် အတွက် အစဉ်မပြေမှုများကို အရင်ကထက် သည်းခံ  လာနိုင်မည်။ ဘဝ အစဉ်မပြေမှုများကို သည်းခံနိုင်သည်လည်း  ၃၈ဖြာ မင်္ဂလာ တစ်ပါးဖြစ်ပါသည်။ 

​​ ကျေးဇူးတရားသည်  မိမိတို့၏ ဘဝ ​ နေရာတိုင်း၌ ရှိသည်။ ​ သက်ရှိ ဖြစ်စေ၊ သက်မဲ့ ​ဖြစ်စေ — လူ့ပတ်ဝင်းကျင်၌ အရာအားလုံး သည် ချိတ်စက်လျက်  အချင်းချင်း အကျိုးပြုနေကြသည်။ 

ပဋ္ဌာန်းမြတ်ဒေသနာတော်သည်  ဓမ္မ အားလုံး မည်သို့ မည်ပုံ အကျိုးပြုပုံ အသီးသီးကို ဖွင့်ဆိုပူဇော်ထားသည်။ ပဋ္ဌာန်းမြတ်ဒေသနာတော်အား တစ်လုံးထဲနှင့် အနှစ်ချုပ်ပါလျှင် ​ ကျေးဇူးတရား (Gratitude ) ဖြစ်သည်။  

​​

ကိုးကား။ 

ဤသို့ အရာရာတိုင်း သက်ရှိ သက်မဲ့ အားလုံးမကျန် အသေးစိတ် အနုစိတ် ​ ကျေးဇူးတင်သော အတွေးအခေါ်အား စာရေးဆရာမ  ​ Rhonda Byrne ရေးသားသော The Magic စာအုပ်မှ 📖 ​ လေ့လာယူခဲ့သည် — https://www.thesecret.tv/products/the-magic-book/  ။ 

​

#ဝိမုတ္တိယုဂခေတ်

​၂၀၂၅-၀၆-၁၀

အထွေထွေဓမ္မမှတ်စုများ.....(၂၉)

 

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

ပူဇော်သမျှကိုခံယူတော်မူထိုက်သော အလုံးစုံသောတရားတို့ကို မဖောက်မပြန် 

ကိုယ်တော်တိုင်သိတော်မူသော မြတ်စွာဘုရား ရှိခိုးကန်းတော့ပါ၏ဘုရား

꧁ ༺ သဘာဝဘေးအန္တရာယ်အပေါ် ဉာဏ်ဖြင့် ဆင်ခြင်ခြင်း | နေ့စဉ် ကိုယ့်စိတ်ကိုယ်စစ် စာမေးပွဲ ༻ ꧂

☐ သဘာဝဘေးအန္တရာယ်များ (ဥပမာ- ငလျင်၊  ရေကြီးမှု) ဟာ  တောတောင်ရေမြေတွေရဲ့ မတည်မြဲခြင်း (အနိစ္စ)၊ ဖောက်ပြန်တတ်ခြင်း သဘောဖြစ်ကြောင်း ဉာဏ်နဲ့ ဆင်ခြင်ပြီး သံဝေဂ ယူနိုင်ပြီလား။ စိတ်မကောင်းဖြစ်ရုံမျှသာ မဟုတ်ဘဲ တရားနှလုံးသွင်းနိုင်ပြီလား ?

☐ ကြောက်ရွံ့မှု၊ စိုးရိမ်ပူပန်မှု (ဥပမာ- ရင်တုန်ခြင်း) စတဲ့ စိတ်ခံစားချက်၊ ကိုယ်အမူအရာတွေ  ပေါ်လာသည့်အခါ၊ ဒါတွေကို "ငါ ကြောက်တာ"၊ "ငါ ရင်တုန်တာ" လို့ အတ္တစွဲဖြင့် အမည်မတပ်ဘဲ၊ "ရုပ်ဇာတိ" (ရုပ်၏ ဖောက်ပြန်မှု) သက်သက်လို့ ဉာဏ်နဲ့ လက်ခံနိုင်ပြီလား ?

☐ ဒီအဖြစ်ဆိုးများဟာ အကြောင်းတရားများစွာ (ဥတုနိယာမ၊ ကံအကြောင်းအကျိုး) စုံညီလို့ ဖြစ်ပေါ်လာတာပဲလို့  "အကြောင်းအကျိုး သဘာဝတရား" ကို လက်ခံပြီး၊ "ငါ့တို့ကိုမှ  ဒီလိုဖြစ်ရသလား" စတဲ့ အတ္တစွဲ၊  ဒေါသ၊ မကျေနပ်မှုတွေ လျော့ပါးပြီလား ?

☐ ဖြစ်ပြီးခဲ့တဲ့  ဘေးဒုက္ခ အာရုံတွေ  (အတိတ်က "အရိပ်သဖွယ် အာရုံ") တွေကို  ပြန်လည် တွေးတောသောက  မပွားတော့ဘဲ၊ ထပ်ပြီး ဖြစ်လာမှာ စိုးရိမ်တဲ့ အနာဂတ် အတွေး "အရိပ်" တွေအပေါ်မှာလည်း "အတည်မယူဘဲ"  နေနိုင်ပြီလား ?

☐ အတိတ်၊ အနာဂတ်ကို အာရုံမပြုတော့ဘဲ၊ လက်ရှိ ပစ္စုပ္ပန်မှာ သတိ၊ ပညာဖြင့် နေထိုင်ပြီး၊ လုပ်သင့်လုပ်ထိုက်သော ကုသိုလ်တရားများ (ဥပမာ- မေတ္တာပွားခြင်း၊ ဒါနပြုခြင်း၊ သီလဆောက်တည်ခြင်း) ကို အာရုံစိုက် ပြုလုပ်နိုင်ပြီလား ?

☐ "ရုပ်ဇာတိ" နဲ့ "အကြောင်းအကျိုး သဘာဝတရား" ဆိုတဲ့ ဉာဏ်လက်နက်တွေကို အခြေခံ ခိုင်မာအောင်  လေ့လာထားပြီး၊  သဘာဝဘေးအန္တရာယ်  လောကဓံကြုံတိုင်း ၊  သဘာဝဘေးအန္တရာယ်အကြောင်းကြားသိရတိုင်း လက်တွေ့ အသုံးချနိုင်ပြီလား ?

------

ဒီ စာမေးပွဲ  ဟာ သဘာဝဘေးအန္တရာယ်လို လောကဓံကြုံတွေ့ရတဲ့အခါ မိမိရဲ့ စိတ်အခြေအနေနဲ့ နှလုံးသွင်းမှု မှန်ကန်ရေးကို ဆန်းစစ်ဖို့ အထောက်အကူပြုပါလိမ့်မယ်။

အဓိကကတော့ ကြောက်ရွံ့မှု၊ စိုးရိမ်မှုတွေနဲ့ တုံ့ပြန်မယ့်အစား၊ သတိ၊ ပညာ၊ ဥပေက္ခာတို့နဲ့ ရင်ဆိုင်ကျော်လွှားနိုင်ဖို့ ဖြစ်ပါတယ်။‎

‎ဝိမုတ္တိဉာဏ် ရရှိပါစေ ၊ ယောဂီ။

#ဝိမုတ္တိယုဂခေတ်

၂၀၂၅-၀၆-၁၁

ဓမ္မအထွေထွေမှတ်စုများ.....(၂၈)

 

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

နမောဿတ ဘဂဝတော အရဟတော သမ္မာသမ္ဗုသတ္တာ

ပူဇော်သမျှကိုခံယူတော်မူထိုက်သော အလုံးစုံသောတရားတို့ကို မဖောက်မပြန် 

ကိုယ်တော်တိုင်သိတော်မူသော မြတ်စွာဘုရား ရှိခိုးကန်းတော့ပါ၏ဘုရား

꧁ ༺ ရုပ်ရှင်နဲ့ သရုပ်ဆောင်တွေအပေါ် စွဲလမ်းမှု (ရူပတဏှာ) | နေ့စဉ် ကိုယ့်စိတ်ကိုယ်စစ် စာမေးပွဲ ༻ ꧂

☐ ရုပ်ရှင်၊ စီးရီးတွေ (အထူးသဖြင့် ကိုယ်ကြိုက်တဲ့ သရုပ်ဆောင်တွေ ပါဝင်တဲ့) ကြည့်ချင်တဲ့စိတ် ပြင်းပြစွာ ဖြစ်ပေါ်လာတဲ့အခါ၊ ဒီစိတ်ကို "ငါ ကြည့်ချင်တာ" လို့ အတ္တစွဲနဲ့ မရှုမြင်ဘဲ၊ စိတ်မှာ ပေါ်လာတဲ့ အာရုံသက်သက်လို့ ဉာဏ်နဲ့ ပိုင်းခြားနိုင်ပြီလား ။

☐ လှပတဲ့ သရုပ်ဆောင်တွေရဲ့ ရုပ်အဆင်း ("အာရုံအရိပ်") ကို မြင်တယ့်အခါ ပြင်းထန်တဲ့ တပ်မက်မှု (ကာမရာဂ)၊ သာယာမှု (သုခဝေဒနာ) ဖြစ်ပေါ်လာတာကို သတိထားမိပြီး၊ ဒီစိတ်နဲ့ ဝေဒနာကို "အတည်မယူဘဲ"၊ သူတို့ရဲ့ မမြဲတဲ့ (အနိစ္စ)၊ အနှစ်သာရမရှိတဲ့ (အနတ္တ) သဘောကို ဆင်ခြင်နိုင်ပြီလား ။

☐ ရုပ်ရှင်ဇာတ်လမ်း၊ ဇာတ်ကောင်တွေ၊ သရုပ်ဆောင်တွေအကြောင်း အလွန်အကျွံ တွေးတောနေတာ၊ စိတ်ကူးယဉ်တာ၊ ကိုယ့်ဘဝနဲ့ နှိုင်းယှဉ်တာတွေ ဖြစ်ပေါ်လာရင်၊ အတွေးတွေကို စောင့်ကြည့်သတိထားပြီး "မတွေးနဲ့" ကမ္မဋ္ဌာန်းနဲ့ ဒီအတွေးစဉ်ကို ဖြတ်တောက်နိုင်ပြီလား ။

☐ ရုပ်ရှင်ကြည့်တုန်း ဖြစ်ပေါ်လာတဲ့ ပြင်းထန်တဲ့ စိတ်ခံစားမှုတွေ (ဥပမာ- ရင်ခုန်စိတ်လှုပ်ရှားမှု၊ ဝမ်းနည်းမှု၊ ကြောက်ရွံ့မှု၊ ချစ်စိတ်၊ မုန်းစိတ်) ကို "ငါ ခံစားနေရတာ" လို့ မစွဲလမ်းဘဲ၊ ဖြစ်ပြီး ပျက်သွားမယ့် "ဝေဒနာအရိပ်" သက်သက်လို့ ဥပေက္ခာနဲ့ ရှုမှတ်နိုင်ပြီလား။

☐ ရုပ်ရှင်ကြည့်ချင်စိတ်၊ ဒါမှမဟုတ် သရုပ်ဆောင်တစ်ယောက်ယောက်ကို တမ်းတစိတ် ပေါ်လာတယ့်အခါ၊ ဒီစိတ်ဟာလည်း "ကာလသုံးပါးမှာ အစဉ်မရှိ" ကြောင်း၊ ဖြစ်ပြီး ပျက်သွားမယ့် "အာရုံအရိပ်" သာ ဖြစ်ကြောင်း ဆင်ခြင်နိုင်ပြီလား ။

☐ ရုပ်ရှင်ကြည့်တာအပေါ် အလွန်အကျွံ အချိန်ကုန်ဆုံးနေတာ၊ တခြားအရေးကြီးတဲ့ တာဝန်ဝတ္တရားတွေ (ဥပမာ- အလုပ်၊ မိသားစု၊ တရားအားထုတ်မှု) လစ်ဟင်းတာ စတဲ့ ဆိုးကျိုး (ဒုက္ခ) တွေကို ဉာဏ်နဲ့ မြင်လာပြီး၊ ကြည့်ရှုချိန်ကို သတိနဲ့ ထိန်းချုပ်ချင်စိတ် (သီလ၊ ဝီရိယ) ဖြစ်ပေါ်လာပြီလား ။

☐ ကိုယ်နှစ်သက်တဲ့ သရုပ်ဆောင်တွေ၊ ဇာတ်ကောင်တွေအပေါ် "ငါ့အကြိုက်ဆုံး"၊ "သူကတော့ အကောင်းဆုံး" စတဲ့ ပြင်းထန်တဲ့ အစွဲအလမ်း (ဥပါဒါန်) တွေ ဖြစ်နေသေးလား ။ ဒီအစွဲတွေဟာလည်း "အတည်ယူစရာမဟုတ်တဲ့" စိတ်ရဲ့ ပြုပြင်မှု (သင်္ခါရ) သာ ဖြစ်ကြောင်း နားလည်ပြီလား ။

☐ စိတ်ဖိစီးမှု၊ ပျင်းရိမှု၊ အထီးကျန်မှုတွေ ကြုံတွေ့တယ့်အခါ ရုပ်ရှင်ကြည့်တာကို ထွက်ပေါက်အဖြစ် အလွန်အကျွံ အသုံးချနေမိသေးလား။ ဒီအစား တရားရှုမှတ်တာ၊ မေတ္တာပွားတာ စတဲ့ ကုသိုလ်ဖြစ်စေတဲ့ နည်းလမ်းတွေနဲ့ စိတ်ကို ပြောင်းလဲနိုင်အောင် ကြိုးစားရဲ့လား ။

☐ ရုပ်ရှင်ထဲက မြင်ကွင်း၊ အဖြစ်အပျက်၊ လူပုဂ္ဂိုလ်တွေဟာ တကယ့်အပြင်လောကနဲ့ ထပ်တူမဟုတ်တဲ့၊ ဖန်တီးထားတဲ့ "အာရုံအရိပ်" တွေသာ ဖြစ်ကြောင်း ဉာဏ်နဲ့ ပိုင်းခြားသိမြင်နိုင်ပြီလား ။

☐ ရုပ်ရှင်မကြည့်ဘဲ မနေနိုင်အောင် စွဲလမ်းတပ်မက်နေတဲ့စိတ် (အာသဝ) ကို သတိထားမိပြီး၊ ဒီစွဲလမ်းမှုကနေ လွတ်မြောက်ချင်တဲ့ (နိက္ခမ) ဆန္ဒ ဖြစ်ပေါ်လာပြီလား ။

ဒီ စာမေးပွဲဟာ ကိုယ့်ရဲ့ ရုပ်ရှင်နဲ့ သရုပ်ဆောင်တွေအပေါ် ထားရှိတဲ့ စွဲလမ်းတပ်မက်မှု တဏှာကို ဆန်းစစ်ပြီး၊ သတိ၊ ပညာ၊ ဥပေက္ခာတို့နဲ့ ကျင့်ကြံနိုင်ဖို့ အထောက်အကူ ပြုပါလိမ့်မယ် ။ အရေးကြီးဆုံးကတော့ အမြင်အာရုံ ဟာလည်း ဖြစ်ပြီး ပျက်တတ်တဲ့၊ အတည်ယူလို့ မရတဲ့၊ အစိုးမရတဲ့ သဘာဝတရား တစ်ခုသာဖြစ်ကြောင်း ဉာဏ်နဲ့ သိမြင်ပြီး၊ အလွန်အကျွံ တပ်မက်စွဲလမ်းမှုကနေ လွတ်မြောက်အောင် ကြိုးစားဖို့ ဖြစ်ပါတယ် ။

ရုပ်ရှင်၊ တီဗီက မြင်ကွင်းတွေ၊ သရုပ်ဆောင်တွေရဲ့ ရုပ်အဆင်းတွေဟာလည်း မျက်စိဒွါရမှာ ခဏတာ ထင်ဟပ်တဲ့ "အာရုံအရိပ်" တွေသာ ဖြစ်လို့ "အတည်ယူ" စွဲလမ်းဖွယ်ရာ မဟုတ်ကြောင်း ဉာဏ်နဲ့ ရှုမြင်နိုင်ကြပါစေ ။‎

‎ဝိမုတ္တိဉာဏ် ရရှိပါစေ ၊ ယောဂီ ။

#ဝိမုတ္တိယုဂခေတ်

၂၀၂၅-၀၆-၁၂

My Sassy Curly Hair .....

ကျနော့်ကို အရင်က စက်ရုပ်မနဲ့တူတယ်လို့ မကြာခဏပြောဖူးခဲ့တဲ့သူ တစ်ယောက်ရှိတယ်....။ ကျနော်ဟာ ဓါတ်ပုံရိုက်လဲ မပြုံးတတ် အပြောအဆိုမှာလည်း မချောမွတ် မျက်နှာကြောကလဲ တလောကလုံးလုပ်ကျွေးတဲ့ ပုံအမြဲပေါက်တယ် ရုပ်ရှင်စကားနဲ့ပြောရင် ဗီလိန်ရုပ် .... ကြည့် ကြည့် အဲအပေါ်ကရုပ်ကို....။ ဟိုတလောက အဒေါ်က ဗိုင်ဘာမှာ မေးတစ်ခွန်းဖြေတစ်ခွန်းပဲလုပ်လို့ ကျနော့်ကို AI ကျနေတာပဲတဲ့....။ AI ကမှ ကျနော့်ထက် ပိုဖော်ရွေနေဦးမယ်...။ မွေးရာပါ ကျနော့်ပုံစံကိုတော့ ဘယ်သူမှလာပြောင်းလို့မရသလို ကျနော်လဲ ပြောင်းမှာမဟုတ်ဘူး....။

Before

After

ဆိုင်မှာ ဆံပင်မညှပ်ဖြစ်တာတော်တော်ကြာနေပြီ.....။ ဆံပင်အရှည်ကို စုထုံးပြီးချည်ထားတာ ကြာတော့ ပျင်းလာ အမြဲတစေထုံးထားတော့ ခေါင်းအရေပြားနာလာတယ်...။ ဆံပင်က နဂိုကောက်သားမို့လို့ စတက်ပုံပဲ ညှပ်ရတာအဆင်ပြေတယ်....။ အဲဒါ အခုပုံလေးဖြစ်သွားတာ အနောက်ဖက်ကို ဆံပင်စည်းလိုက်ရင် ဂေါ်ဂေါ်လေးဖြစ်အောင် ရှိတ်ထိုးလိုက်တယ်...။ အသက်ကြီးမှ လုပ်ချင်တာ မသေခင်လုပ်တာပဲ ကျန်တာ အရေးမပါတာ ဘာမှမတွေးဘူး....။ ဒါပေမယ့်လှတယ်မဟုတ်လား....?

ညှပ်သာညှပ်လိုက်တာ ပြီးတော့ ဆံပင်မချချင်ဘူး အိုက်တာရယ် ဆံပင်ကောက်ကွေးတွေက ရှုပ်ပွနေတာရယ်နဲ့ ပြန်စည်းထားလိုက်ရတာပါပဲ....။ ဘာညာ ပွဲတက်လေးရှိတုန်းလေးပဲ ရှိုးထုတ်တာကောင်းပါတယ်....။ ကျနော်တို့အသက်အရွယ် ဆံပင်ဖါးလျားချရင် ကြည့်ရတာအဆင်မပြေဘူး ကျနော်ကိုက ကြည့်မရတာ သူများတွေတော့ကြိုက်ချင်ကြိုက်နေမှာ....။

အဲလိုလေး အနောက်မှာရိတ်ထားတာ တကယ်က ဂေါ်ရတာ လွတ်လပ်ပေါ့ပါးတယ်....

ကြိုးစားပြုံးပါသော်လည်း မဲ့ပြုံးဖြစ်သွားသောအခါ

 

အနီရောင်က လက်ကီးမန်းနီး အရောင်တဲ့ ထိုင်းမှာ လက်သည်းဆို အနီရောင်ပဲဆိုးကြတာ 

တကယ်ငွေဝင်တာတဲ့ ဘတ်ခြောက်သန်းထီထိုးထားတယ်

လက်သည်းခြေသည်းတွေ အရောင်မဆိုးဖြစ်တာ ငါးနှစ်ကျော်ပြီ အခုက ဆိုးချင်လို့တော့မဟုတ်ဘူး လက်သည်းဆက်တဲ့ အရသာကို သိချင်တာ....။ ပြောနေကျအတိုင်း မိန်းမတွေလုပ်တတ်တဲ့ အရာတွေမသေခင် မလုပ်ဖူးတာလုပ်ကြည့်တာ...။  နှစ်စတုန်းက လက်သည်းတုကပ်တာ ဘယ်ဖက်လက်လုပ်ဖူးပြီးသွားပြီ အခုက ဂျယ်နဲ့လက်သည်းဆက်တာသွားလုပ်ကြည့်တာ cat eyes ဆိုလား သံလိုက်ပါတဲ့အတံတစ်ခုနဲ့ လက်သည်းထိပ်လေးကို ပုံဖော်ပေးတယ်...။ နှစ်ဖက်လုံးလုပ်တာ ထမင်းတော့ လက်နဲ့စားမရတော့ဘူး ဇွန်းနဲ့ပဲ အခုဒီပို့စ်ရေးတော့ စာရိုက်ကြည့်တာ အစလေးပဲနဲနဲခက် အခုတော့ အဆင်ပြေပြီ...။ မနက်က အင်္ကျီကြယ်သီးတပ်တာ 15မိနစ်လောက်ကြာသွားတယ်...။ ဘောင်းဘီဇစ်တပ်တာရသွားပြီ ကြယ်သီးတပ်တတ်သွားပြီး ဆွဲကြိုးချိတ် တပ်တတ်သွားပြီ....။ လက်မှတ်ထိုးတော့ ဘောလ်ပင်ကိုင်ရတာ အဆင်မပြေသေးဘူး...။ ဖုန်းစာရိုက်တာလဲ မရသေးဘူး... ဟမ်!!!! နားကပ် မဖြုတ်ကြည့်ရသေးဘူး လုပ်ဦး....။ 

စာလာဖတ်သူအားလုံးကို mini heart လေးပေးတယ်နော်

ဝါဆိုလပြည့်

နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ

🌕🌕🌕🌕🌕

ဝါဆိုလပြည့် ဓမ္မစင်္ကြာအခါတော်နေ့နှင့် ထူးခြားချက်များ ....

  သန္ဓေ တောထွက်၊ ဓမ္မစက်

  တစ်ချက် ပြာဋိဟာ။

  ဝါဆိုလပြည့်၊ ထူးခြားနေ့

  အောက်မေ့ ဤလေးဖြာ။

ဓမ္မစင်္ကြာဟောကြားခြင်း

  သန္ဓေ, တောထွက်, ဓမ္မစက်, 

  မိန်မြွက်ဝါဆို ဟူသော 

  စကားနှင့် အညီ ..

  မြတ်စွာဘုရားရှင် ကိုယ်တော်မြတ်ကြီးသည် 

  တုသိတာနတ်ပြည်မှ နတ်သားအပေါင်းတုိ့၏

  ဘုရားဖြစ်ရန် အချိန်တန်ပါပြီဟု 

  လာရောက်ကာ ...  တောင်းပန်ကြသောကြောင့် -

  သေတကေတု နတ်သားအဖြစ်မှ 

  စုတေပြီးနောက် ..

  မယ်တော်မာယာ၏ ဝမ်းတွင်ဝယ် 

  ဝါဆိုလပြည့်နေ့တွင် ပဋိသန္ဓေနေတော်မူပါသည်။

  ဖွားမြင်မြောက်သောအခါ ..

  သိဒ္ဓတ္ထဂေါတမ အမည်ရလေ၏။ 

  ဆယ့်ခြောက်နှစ်ဝယ် ယသော်ဓရာနှင့် 

  ထိန်းမြှား လက်ထပ်လေ၏။

  ရာဟုလာ အမည်ရသော ..

  သားတော်တစ်ပါး မွေးဖွားလေ၏။ 

  ထိုနောက် ..

  သူအို, သူနာ, သူသေ, ရဟန်း, ဟူသော 

  နိမိတ်ကြီးလေးပါးကို မြင်တော်မူကာ 

  အိုခြင်းသဘော နာခြင်းသဘော

  သေခြင်းသဘော တရားတို့ကို

  ကြောက်လန့်ကာ ..

  အိုခြင်းကင်းရာ နာခြင်းကင်းရာ 

  သေခြင်းကင်းရာ ..

  ရဟန်းတစ်ပါး၏ ချမ်းသာတရားကို တွေးသိကာ ..

  တောထွက်ရန် ကြံစည်တော်မူပြီး 

  ဝါဆိုလပြည့်နေ့ ညသန်းခေါင်ယံ အချိန်တွင် 

  ဖွားဖက်တော်ဆန္ဒအမတ် ကဏ္ဍကမြင်းတို့ နှင့် 

  ဥရုဝေလတောသို့ ကိလေသာကုန်ခန်းပြီး 

  ဥာဏ်အလင်းရောင်တွေကို ရှာဖွေရန် 

  တောထွက်တော်မူပါသည် ...။

  မဂဓတိုင်း ဂယာမြို့အနီး ဥရုဝေလတောဝယ် 

  (၆)နှစ်တို့ ကာလပတ်လုံး ..

  ရှေးဟောင်း အိန္ဒိယ ယောဂီ ပရိဗိုဇ်တို့၏

  အတ်တကိလမထာ -

  (ပင်းပန်းစွာခန္ဓာကိုယ် ညင်းဆဲကြောင်း) 

  အကျင့်တို့ကို့ ..

  ထိုတောဝယ်(၆) နှစ်တိုင်တိုင် 

  ပင်းပန်းစွာ ကျင့်ကြံသော်လည်း 

  တရားထူးကိုမရရှိပေ ...။

  (၆)နှစ်မျှ ကျင့်ခဲ့ရတဲ့ ..

  ရှေးဟောင်းအိန္ဒိယ ယောဂီပရီဗိုဇ်တို့၏

  အကျင့်များသည် ..

  ခန္ဓာကိုယ်ပင်ပန်းဆင်းရဲကြောင်း 

  အကျင့်များသာဖြစ်သည်ဟု 

  သိရေသာအခါ -

  မိမိ၏ ကိုယ်ပိုင်နည်းစနစ်ဖြစ်သော

  မဂ္ဂင်(၈)ပါး နည်းလမ်းသစ်ဖြင့်

  ၁၀၃ ခု၊ ကဆုန်လပြည့်၊ ဗုဒ္ဓဟူးနေ့တွင်

  သဗ္ဗညုတဉာဏ်တော်ကိုရရှိကာ

  ဘုရားအဖြစ်သို့ ရောက်ရှိတော်မူပါသည်။

  ဘုရားအဖြစ်သို့ ရောက်ရှိပြီးနောက် 

  အားထုတ်ခဲ့သောတရားများနှင့်

  လောကကို ဆင်ခြင်ကြည့်သော် 

  မိမိရရှိ ကျင့်ကြံထားသော တရားတို့သည် 

  အလွန်သိမ်မွေ့ နက်နဲခက်ခဲလွန်းနေ၏။

  လောကလူသားတို့၏ အသိဥာဏ်ကား 

  ကိလေသာအမှောင်တို့ဖြင့်သာ 

  ထာဝစဉ်ပိတ်ဖုံးနေ၏။

  ပုထုဇဉ်တို့ အား ဟောကြားရန် 

  မတန်တဆ ခက်ခဲပင်ပန်းလိမ့်မည်ဟု

  ဆင်ခြင်နေစဉ် သဟမ္ပတိဗြဟ္မာမင်း၏ 

  လျှောက်ထားတောင်းပန်ချက်အရ 

  အဘယ်သူ့ကို တရားဦးဟောကြားအံ့နည်းဟု 

  ဆင်ခြင်တော်မူ၏ ...။

  အရင်က မိမိ တပည့်တော်ခဲ့ဘူးသော

  ဗာရာဏသီမြို့အနီး မိဂဒါဝုန်တောဝယ်ရှိသော

  ပဉ္စဝဂ္ဂီငါးဦး -

  (ပဉ္စ- ငါးခု ငါးယောက်၊ ၀ဂ္ဂ-အစု အဖွဲ့)တို့ကို 

  တရားဦးဟောကြားရန် ကြွချီတော်မူလေသည်။

  အချိန်ကား -

  နေမင်းကြီး ဝင်လုဝင်ဆဲအချိန်၊ 

  လမင်းကြီးမှာ ပြူလစ်စ အခါသမယ ဖြစ်၏။

  ဆည်းဆာ ညချမ်း ဖြစ်သည်။ 

  သူတော်မြတ်ဓာတ်ကြောင့် 

  သာယာဖွယ်ကောင်းလှပေ၏။

  မိဂဒါဝုန်တောကား ရွှင်ပျအေးမြနေ၏။ 

  ဆိတ်ငြိမ်မှုဖြင့် ပြီးလျက်ရှိ၏ ...။

  ထိုအခိုက်တွင် ...

  မြတ်စွာ ဘုရားရှင်သည် ပဉ္စဝဂ္ဂီတို့၏ ရှေ့တွင် 

  ထက်ဝယ်ဖွဲ့ခွေ နေတော်မူသည်။ 

  ထို့နောက်... "ရဟန်းတို့" ဟု ခေါ်ဝေါ်ကာ 

  နှုတ်ခွန်းဆက်တော်မူလိုက်၏။ ဤကား ..

  တရားဦးဟောရန် ဖိတ်ခေါ်သံအစတည်း။

  ပဉ္စဝဂ္ဂီတို့သည် သီလစင်ကြယ်ပြီးသူများ

  ဖြစ်ကြသည်။ ထို့ ပြင် ..

  သဒ္ဓါ၊ ဆန္ဒ၊ ဝီရိယစိတ်ထား ပြည့်စုံနေပြီးသူများ

  ဖြစ်ကြလေရာ ...

  မြတ်စွဘုရား၏ စကားအစသည် 

  သူတို့၏ နှလုံးသားဝယ်

  တရား တည်၍တည်၍ လာလေသည်။

  ထိုအချိန်တွင် မြတ်စွာဘုရားက 

  မိမိဘုရား ဖြစ်တော်မူကြောင်း မိန့်ကြား၏။ 

  တရားနာယူကြရန်လည်း တစ်ဆက်တည်း 

  တိုက်တွန်း၏ ...။

  သို့သော် မယုံကြည်နိုင်ကြသဖြင့် 

  သုံးကြိမ်သုံးခါ ငြင်းဆန်ကာ နေကြ၏။

  မြတ်စွာဘုရားသည် ထိုငြင်းဆန်မှုကို 

  ဘုရားဖြစ်ကြောင်း ထပ်မံသိစေပြန်၏။

  ပြီးမှ ..

  "တရားဦး" ခေါ် ဓမ္မစက္က ပဝတ္တန သုတ္တ ကို

  ဟောကြားတော်မူလေသည်။ 

  ထိုတရားတော်၏ အဆုံးဝယ် 

  အရှင်ကောဏ္ဍညသည် လူသားများ အနက် 

  ပထမဦးဆုံး သောတာပတ္တိဖိုလ်၌ 

  တည်လေ၏။ 

  ထိုနေ့သည် ဝါဆိုလပြည့်နေ့ဖြစ်၏။

  ထို့နောက်တဖန် ...

  ဒေသနာကိုဟောပြတော်မူရာ ..

  ဝါဆိုလပြည့်ကျော် (၁) ရက်နေ့၌ အရှင်ဝပ္ပ 

  (၂) ရက်နေ့၌ အရှင်ဘဒ္ဒိယ၊

  (၃) ရက်နေ့၌ အရှင်မဟာနာမ်၊ 

  (၄) ရက်နေ့၌ အရှင်အဿဇိ တို့သည် 

  အသီးသီး သောတာပန် တည်ကြလေကုန်၏။ 

  ပဉ္စဝဂ္ဂီအားလုံးပင် "ဧဟိဘိက္ခု" ရဟန်း အဖြစ်

  ရောက်ကြလေသည်။

  ဝါဆိုလပြည့်ကျော် (၅)ရက်နေ့တွင် 

  မြတ်စွာဘုရားသည် "အနတ္တလက္ခဏသုတ္တ" ကို 

  ဟောကြားတော်မူခဲ့သည်။ 

  ဤတွင် ငါးဦးလုံး ..

  ရဟန္တာ ဖြစ်တော်မူကြလေသည်။ 

  ထိုနေ့ကိုလည်း "ရဟန္တာနေ့" ဟု 

  ဗုဒ္ဓဘာသာဝင်တို့ သတ်မှတ်ယူကြကုန်သည်။

  ဝါဆိုလပြည့်နေ့ကိုမူ တရားဦးဓမ္မစကြာ

  ဟောကြားသောနေ့ ဖြစ်၍ 

  "ဓမ္မစကြာနေ့့" ဟု... ယနေ့အထိ 

  ဗုဒ္ဓဘာသာဝင်တို့ အလေးအမြတ် ပြုခဲ့ကြပေသည်။ 

၀ါဆိုလပြည့်နေ့မြတ် ထူးခြားချက်များ

  (၁) ပဋိသန္ဓေတည်သည့်နေ့ 

  မဟာသက္ကရာဇ် – ၆၇၊ ဝါဆိုလပြည့်။

  (ကြာသပတေးနေ့)

  (၂) တောထွက်သည့်နေ့ 

  မဟာသက္ကရာဇ် – ၉၇၊ ဝါဆိုလပြည့်။

  (တနင်္လာနေ့)

  (၃) ဓမ္မစကြာတရားဦး 

  မဟာသက္ကရာဇ် -- ၁၀၃၊ ဝါဆိုလပြည့်။

  (စနေနေ့)

  (၄) သောတာပန်လူသား စပေါ်သည့်နေ့ 

  မဟာသက္ကရာဇ် – ၁၀၃၊ ဝါဆိုလပြည့်။

  (စနေနေ့)

  ပုထုဇဉ်ခရီးမှ အရိယာခရီးသို့ 

  စတင်ကူးပြောင်းခွင့်ကြုံသောနေ့။

  (၅) သံဃာရတနာ စပေါ်သည့်နေ့ 

  မဟာသက္ကရာဇ် – ၁၀၃၊ ဝါဆိုလပြည့်။

  (၆) “ဧဟိ ဘိက္ခု ” ဟူသော စကားကို 

  စတင် ကြားရသောနေ့။

  (၇) ရေမီး အစုံစုံတို့ဖြင့် တန်ခိုးပြာဋိဟာကို 

  ပြတော်မူသောနေ့ (၇ ဝါမြောက်တွင်)

  ပြောင်လျှံထိန်ညီး၊ ရေမီးထွေထွေ၊

  အံ့ဖွယ်ဖန်ဆင်း၊ ဘက်ကင်းသရေ။

  အမျိုးမျိုးပ၊ တန်ခိုးသင်္ချေ၊

  ဝါဆိုလ ပုဏ္ဏ ဒိဝသေ။

လယ်တီဆရာတော်ကြီး၏ ကဗျာများ

  သန္ဓေယူတော်မူသောနေ့ 

  (ကြာသာပတေးနေ့)

  သုံးလူ့ရှင်ပင်၊ ကျွန်းထိပ်တင်

  သောင်းခွင်စကြာ၀ဠာ၊ နတ်ဗြဟ္မာတို့

  ညီညာရုံးစု၊ တောင်းပန်မူကြောင့်

  ရတုနဂိုရ်၊ ရွှန်းရွှန်းစိုသည်

  ဝါဆိုလပြည့် ကြွက်မင်းနေ့၀ယ်၊ 

  ချမ်းမြေ့ကြည်ဖြူ သန္ဓေယူသည်

  နတ်, လူ ငြိမ်းဖို့ ကိန်းပါကို ....။

  တောထွက်တော်မူသောနေ့

  (တနင်္လာနေ့)

  ဖွားမြင်မြောက်သော်၊ 

  ဆယ်ခြောက်နှစ်ရွယ် ပျိုမြစ်နုနယ်၌၊ 

  သုံးသွယ်ရွှေနန်း သိမ်းမြန်းပြိးလစ်

  ဆယ်သုံးနှစ်လျှင်၊ ဘုန်းသစ်လျှံလူ၊ 

  စံတော်မူ၍ ရွယ်မူနုဖြိုး၊ နှစ်ဆယ်ကိုး၀ယ်” 

  လေးမျိုးနိမိတ် နတ်ပြဟိတ်ကြောင့်၊

  ရွှေစိတ်ငြင်ငြို၊ သံဝေပိုက

  ဝါဆိုလပြည့် ကျားမင်းနေ့၀ယ်၊ 

  ချမ်းမြေ့ရဂုံ တော်ရပ်လှုံသည်”

  စုံမြိုင်ပင်ရိပ် ခမ်းမှာကို …။

  ဓမ္မစင်္ကြာဟောတော်မူသောနေ့

  (စနေနေ့)

  ဘုရားဖြစ်ကာ၊ မိဂဒါသို့၊ 

  စကြာရွှေဖဝါးဖြန့်ချီ သွား၍၊ ငါးပါး၀ဂ္ဂီစုံအညီိနှင့် 

  မဟီတစ်သောင်း တိုက်အပေါင်းမှ၊ 

  ခညောင်းကပ်လာ၊ နတ်ဗြဟ္မာအား“

  ဝါဆိုလပြည့်၊ စနေနေ့၀ယ်

  ကြွေ့ကြွေ့လျှံတက်၊ ဓမ္မစက်ကို” 

  မိန့်မြွတ်ထွေပြား၊ ဟောဖော်ကြားသည်

  တရားနတ်စည်ရွှမ်းတယ်ကို ...။

စိတ်ကူးပျော်ရာနှင့် ဓမ္မလက်ဆောင်

ဘလော့ဂ်တို့မှ ပိုစ့်နှစ်ခုကို ပေါင်းစပ်ကာ 

ဓမ္မဒါနပြုပါသည်။

အရှင်ဉာဏဝရ

ညွှန်း - မာဂဓိ(သာစည်)၏ အခါတော်နေ့များ

#ဓမ္မဒါန

~~~~~~~~~~~~~~~~~~~~~~~~~~~~~

ဝါဆိုလပြည့် ဓမ္မစကြာအခါတော်နေ့အကြောင်းသိကောင်းစရာများ

#ဝါဆိုလပြည့်နေ့ကို ဓမ္မစကြာအခါတော်နေ့ အထိမ်းအမှတ်အဖြစ် ကျင်းပရခြင်းမှာ ထိုနေ့၌ ဓမ္မစကြာတရားတော်ကို မြတ်စွာဘုရားက ဟောကြားတော်မူသည်ကို အကြောင်းပြု၍ ကျင်းပရခြင်းဖြစ်ပါသည်။

#ဓမ္မစကြာတရားတော်ကို မြတ်စွာဘုရားသည် အိန္ဒိယနိုင်ငံ ဗာရာဏသီပြည် မိဂဒါဝုန်တော၌ မဟာသက္ကရာဇ် ၁၀၃ ခုနှစ် ဝါဆိုလပြည့်နေ့ နေဝင်လထွက်အချိန်၌ ပဉ္စဝဂ္ဂီငါးဦးတို့အား ဘုရားအဖြစ်ကို ဝန်ခံသောအားဖြင့် ဟောကြားတော်မူခဲ့ပါသည်။

#ဓမ္မစကြာတရားတော်သည် ဝိနည်းမဟာဝါ ပါဠိတော်၌ ``ပဉ္စဝဂ္ဂိယကထာ´´အမည်ဖြင့် လာရှိပါသည်။ ပဋိသမ္ဘိဒါမဂ္ဂ ပါဠိတော်၌ ``ဓမ္မစက္က ပဝတ္တနဝါရ´´အမည်ဖြင့် လာရှိပါသည်။ မဟာဝဂ္ဂသံယုတ် ပါဠိတော်၌ ``ဓမ္မစက္က ပဝတ္တနသုတ္တ´´အမည်ဖြင့် လာရှိပါသည်။

#ဓမ္မစက္က ပဝတ္တန၏အဓိပ္ပါယ်မှာ- တရားတည်းဟူသော အသိစက်ကိုဖြစ်စေ၊ လည်စေတော်မူခြင်းဟု အဓိပ္ပါယ်ရပါသည်။ [ ဓမ္မစက္က = တရားတော် + ပဝတ္တန = ဖြစ်စေ၊ လည်စေခြင်း]

#ဓမ္မစကြာတရားတော်သည် သစ္စာလေးပါးတရားကို ညွှန်းဆိုဟောကြားသော ဒေသနာဖြစ်၍ ပိဋကတ်သုံးပုံ၏ အနှစ်ချုပ်တရားဟု ဆိုထိုက်ပါသည်။

#ဓမ္မစကြာတရားတော်ကို စိစစ်သုံးသပ်ကြည့်ပါလျှင် လမ်းစဉ်မှား ``အစွန်း ၂ခု´´ကို ရှောင်ကြဉ်ရေး၊ မဇ္စျိမ ပဋိပဒါ လမ်းစဉ်မှန်ကို ကျင့်သုံးရေးတို့ကို ညွှန်ကြားထားပြီး သစ္စာလေးပါးတရားကို သိမြင်စေရန် ဟောကြားထားသောကြောင့် ဗုဒ္ဓဝါဒ၏ တိကျခိုင်မာသော သဘောတရားကို တွေ့မြင်နိုင်ပါသည်။

#ဤကဲ့သို့ အနှစ်သာရပါရှိသော တရားဖြစ်၍ ဗုဒ္ဓဘာသာဝင် ရဟန်းရှင်လူတို့က ဓမ္မစကြာတရားတော်ကို အထူးပင် အာရုံစိုက်၍ ရွတ်ဖတ်သရဇ္စျာယ်တော်မူကြပါသည်။ အမြို့မြို့အရွာရွာ၌ ဓမ္မစကြာအသင်းများ ဖွဲ့စည်းပြီး ပြန့်ပွားအောင် ဆောင်ရွက်လျက်ရှိကြပါသည်။

ဝါဆိုလပြည့်နေ့၏ ထူးခြားချက်များ

မြန်မာ့ရိုးရာ ၁၂ လ ရှိသည့်အနက် ဝါဆိုလပြည့်နေ့သည် -

၁။ ဂေါတမဘုရားလောင်း ပဋိသန္ဓေနေသော နေ့ဖြစ်၍ ထူးခြားခြင်း၊

၂။ ဂေါတမဘုရားလောင်း တောထွက်တော်မူသောနေ့ဖြစ်၍ ထူးခြားခြင်း၊

၃။ ဂေါတမဘုရားလောင်း ဓမ္မစကြာတရား စတင်ဟောတော်မူသောနေ့ဖြစ်၍ ထူးခြားခြင်း၊

၄။ ရေမီး အစုံစုံတို့ဖြင့် တန်ခိုးပြာဋိဟာကို ပြတော်မူသောနေ့ဖြစ်၍ ထူးခြားခြင်း၊

၅။ ဘုရားအဖြစ်ကို ဝန်ခံတော်မူသောနေ့ဖြစ်၍ ထူးခြားခြင်း၊

၆။ တရားရတနာ စတင်ပေါ်ပေါက်သောနေ့ဖြစ်၍ ထူးခြားခြင်း၊

၇။ သံဃာရတနာ စတင်ပေါ်ပေါက်သောနေ့ဖြစ်၍ ထူးခြားခြင်း၊

၈။ ``ဧဟိ ဘိက္ခု´´ဟူသောစကားကို စတင်ကြားရသောနေ့ဖြစ်၍ ထူးခြားခြင်း၊

အထက်ဖော်ပြပါ ဝိသေသအကြောင်းများကြောင့် ဗုဒ္ဓဘာသာဝင်သူတော်စင်တို့က ဤဝါဆိုလပြည့်နေ့၌ ကျောင်းကန်ဘုရားသို့ သွားရောက်၍ ဝါဆိုပန်းများ ကပ်လှူခြင်း၊ ဝါဆိုသင်္ကန်း လှူဒါန်းခြင်း၊ ဓမ္မစကြာတရားတော်များကို ရွတ်ဖတ်သရဇ္စျာယ်ခြင်းအားဖြင့် ``ဝါဆိုလပြည့် ဓမ္မစကြာ အခါတော်နေ့´´ကို ဆင်နွှဲပြုလုပ်ကြပါသည်။ ။

မာဂဓီ (သာစည်)

အခါတော်နေ့များ စာအုပ်မှ

Review.....

 

ဒီ 2025 ထဲ ကျနော် စာတွေသိပ်မရေးဖြစ်ဘူး အရင်နှစ်တွေနှစ်တွေနဲ့စာရင်ပေါ့....။ မရေးဖြစ်တဲ့အကြောင်းအရင်းက စာတွေမဖတ်ဖြစ်တာလည်းပါသလို ရေးချင်တဲ့ Mood မရှိတာလည်းပါတယ်....။ ကျနော် ဘယ်တွေရောက်နေလည်းဆို You Tube ဖက်ရောက်နေတာ ပြီးတော့ သီချင်းတွေနားထောင်ဖြစ်တယ်နေ့တိုင်း ကျန်းမာရေးအတွက် လမ်းလျှောက်တယ် တစ်ရက်ကို ခြေလှမ်းအနည်းဆုံး ခြောက်ထောင် အများဆုံး တစ်သောင်းကျော် လျှောက်ဖြစ်နေတယ်...။ ကျနော့်အတွက် စာရေးချင်စိတ်အဖြစ်ဆုံးက စာဖတ်ခြင်းပဲ ကျနော် ဟိုတလောက ဆရာမင်းလူရဲ့ စာအုပ်တွေ သုံးလေးအုပ်ဝယ်ဖြစ်တယ် ခေါင်းရင်းမှာထားပြီး စိတ်ပါတော့မှဖတ်ဖြစ်တယ်...။ ဆရာ့ရဲ့ "စာဖတ်တဲ့မင်းလူ ဖတ်တဲ့စာ" စာအုပ်ကိုဖတ်ပြီး ဆရာညွှန်းထားတဲ့ တခြားကျနော်မဖတ်ရသေးတဲ့ စိတ်ဝင်စားစရာကောင်းတဲ့ စာအုပ်တွေကို မှတ်ထားသေးတယ် ဆရာမကြီး ခင်နှင်းယုစာအုပ်တွေ ဆရာကြီးရွှေဉဒေါင်းစာအုပ်တွေ ပြီးတော့ ဆရာမ ဝင်းဝင်းလတ်ရဲ့ စာအုပ်....။

ကျနော် အားရင် ရေးခဲ့ပြီးသား ပို့စ်အဟောင်းတွေသွားပြန်ဖတ်တဲ့အခါ လွန်ခဲ့တဲ့ ငါးနှစ် 2020-2022 အထိရေးတဲ့ပို့စ်တွေကို တကယ်အားရတယ်....။ ကိုးဗစ်-19 ကပ်ဆိုက်နေတဲ့ကာလမှာရေးခဲ့တဲ့ စိတ်ခွန်အားဖြစ်တွေ ကိုယ်တွေ့ကျန်းမာရေးပို့စ်တွေ သီချင်းခံစားမှုပို့စ်တွေ ရုပ်ရှင် review တွေနဲ့ တချို့ဟင်းချက် မုန့်လုပ်ပို့စ်တွေရောပဲ....။ စိတ်ကူးယဉ် အက်ဆေးတွေ ဝတ္ထုတွေကျတော့ ခုနာက်ပိုင်း အားမသန်တော့ဘူး ...။ လက်တွေ့ကျကျ အကြောင်းအရာတွေကိုပဲ ရေးရတာ ပိုကြိုက်တော့တယ်...။ အဲဒါ... ပြီးခဲ့တဲ့ ငါးနှစ်ကို နောက်ပြန်လှည့်ကြည့် သုံးသပ်တာ ကိုယ်ရေးဖြစ်ခဲ့တဲ့ စာတွေကို အားရမိပါတယ်လို့...။

ပို့စ်နဲ့မဆိုင်ပေမယ့် ပြောရဦးမယ်.... လွန်ခဲ့တဲ့ နှစ်လလောက်က ကျနော် အိပ်မက်မက်တယ်....ကမ်းနားတစ်ခုမှာကျနော်ကရပ်နေတာ အဲချိန်မှာ ရေလှိုင်းအကြီးကြီးပဲ မီတာနဲ့ချီမြင့်မယ် အဲရေလှိုင်းတက်လာပြီး ရေတွေလွှမ်းသွားတာ ဒါပေမယ့် ကျနော်ရပ်တဲ့နေရာကိုတော့ ရေတွေရောက်မလာတာထူးဆန်းတယ် တကယ်က နီးနီးလေးပဲ ကျနော်နဲ့က အဖြစ်အပျက်က 3D ရုပ်ရှင်ပိတ်ကားကြည့်ရသလိုမျိုးဖြစ်သွားတာ...အင်း...အဲလိုအိပ်မက်ခဲ့တာ နိုးလာတော့ ခါတိုင်းဖြစ်နေကျလိုပဲ ငါ့ကိုနိမိတ်တစ်ခုခုလာပြောသလားလို့ တန်းပြီး သတိထားလိုက်ပြီး အဲအိပ်မက်ကိုမှတ်ထားလိုက်တယ်....။ အခုပေ့ချ်တွေမှာ ရေအောက်ငလျင်ကြောင့် ဆူနာမီလှိုင်းတွေ ကမ္ဘာတလွှားဖြစ်လာနိုင်တယ်လို့ ခန့်မှန်းနေကြတယ်...အခုခန့်မှန်းတာကတော့ နက္ခတ်ပညာရှင်တွေပေါ့...။ ရေနဲ့လေကို သတိထားခိုင်းတာ ဘယ်နေရာဘာဖြစ်မလဲဆိုတာတော့ တိတိကျကျဘယ်သူမှမသိနိုင်ဘူး ကြိုတင်ကာကွယ်မှုလုပ်နိုင်အောင်လို့ သတိပေးထားတာ ဖတ်ရတယ်...။ မနှစ်က နိုဝင်ဘာလမှာ ဆည်ပေါက် မိုးကြီးပြီး ရွာတွေအတော်များများ မြေကြီးအောက်ရောက်သွားတာ မှတ်မိသေးတယ်မဟုတ်လား...။ အဲရွာတွေထဲရေစီးတွေ တရဟောဝင်နေတာ အဲပုံစံမျိုးလည်း ကျနော် 2023 လောက်က အိပ်မက်နိမိတ်ရခဲ့ဖူးတယ်...။ အဲလို ထူးထူးဆန်းဆန်းအိပ်မက်မျိုးဆို ကျနော်က memory ထဲ မှတ်မှတ်ထားတာ တိုက်ဆိုင်တာက များလို့လေ....။ ဒါကတော့ ဖြစ်လာခဲ့သည်ဖြစ်စေ မဖြစ်သည်ဖြစ်စေ ကြိုတင်ပြင်ဆင်ဖို့ သတိရှိနေဖို့ပြောချင်တာပဲ...။ စကားမစပ် ကျနော်က အရာရာကိုကြိုမြင်တတ်တဲ့ နဂါးမယ်တော်တော့မဟုတ်ဘူးပေါ့...။

ဗုဒ္ဓလမ်းစဉ်ကို လိုက်နေတဲ့သူဆိုရင် ရတနာသုံးပါးကိုမမေ့နဲ့ ဂုဏ်တော်ပွားဖို့လည်းမမေ့နဲ့ သတ္တဝါအချင်းချင်း မေတ္တာထားဖို့လည်းမမေ့နဲ့.....။ 

9 YEARS OF YOU.....

2025 မှာ ကျနော် ကြည့်သမျှ ထိုင်းစီးရီးတွဲထဲက အကြိုက်ဆုံးဖြစ်တဲ့ 9 years of you အကြောင်းလေးနည်းနည်းလာပြောချင်တာပါ....။ တစ်ပတ်ကို ညစဉ် တနင်္လာ အင်္ဂါ နှစ်ရက်ကို One 31, One D ကနေ 9 June လမှာ စလွှင့်ပြီး ep 9 ခုပါဝင်ပါတယ်....။ သတိထားမိသလောက် ဒီကားလေးက ကိုးဂဏန်းတွေချည်းရွေးထားတာတွေ့ရတယ်...။ ဇာတ်လမ်းနာမည်လေးကလည်း 9 years of you စလွှင့်တာလည်း ကိုးရက်နေ့ အပိုင်းကလည်း ကိုးပိုင်းပါတယ်....။ ဇာတ်အိမ်ကျစ်ကျစ်လစ်လစ်လေးနဲ့ ချစ်စရာကောင်းတဲ့ Romance Drama အမျိုးအစားလေးဖြစ်ပြီး ကျနော့်လို မျက်ရည်မခိုင်တဲ့သူများကတော့ တစ်ရှူးစက္ကူလေးစောင်ပြီးမှကြည့်ပါလို့...။  ဒီစီးရီးထဲက မင်းသမီးလေးက Cherprang Areekul ဖြစ်ပြီး Thai Idol girl group ဖြစ်တဲ့ AKB48 ရဲ့ အဖွဲ့ဝင်တစ်ယောက်ဖြစ်ပါတယ်...။ မင်းသားက Aimm  Sanpetch Kunakorn ဖြစ်ပြီး သူ့အတွက် ဒီဇာတ်လမ်းလေးက သူအမေရိကားကနေ ကျောင်းပြီးလို့ပြန်လာလာခြင်း သူ့ရဲ့ အနုပညာပထမခြေလှမ်းဖြစ်ပါတယ်....။  သူ့ရဲ့ဖခင်ကလည်း သရုပ်ဆောင်ဟောင်းတစ်ယောက်ဖြစ်ဖူးခဲ့သလို တကယ့် main career က ထိုင်းရုပ်သံလောက နာမည်ရပြီးသား top ten စာရင်းဝင် interviewee တစ်ယောက်လည်း ဖြစ်ပါတယ်...။

 

စီးရီးတွဲတွေကို ခုနောက်ပိုင်း ထိုင်းဇာတ်လမ်းတွေပဲအကြည့်များတယ်...။ အဓိကက သူတို့စကားနားလည်တာရယ် အဖက်ဖက်က ပံ့ပိုးမှုအားကောင်းတဲ့ သရုပ်ဆောင်တွေရဲ့ ကြိုးသားအားထုတ်မှု နဲ့ ဖန်တီးမှုကောင်းတဲ့ ဒါရိုက်တာနဲ့ စိတ်ကူးကောင်းတဲ့ ဇာတ်ညွှန်းရေးသူတွေကြောင့်လည်းပါပါတယ်...။ ကျနော်ငယ်ငယ်က ကြည့်ခဲ့ဖူးတာထက် ခုနောက်ပိုင်း ထိုင်းရဲ့ ဂီတရော ရုပ်ရှင်အနုပညာလက်ရာတွေက အာရှနိုင်ငံတော်တော်များများ နဲ့ အနောက်နိုင်ငံတချို့ထိကို ပြန်နှံ့ ပေါက်ရောက်နေပါပြီ...။ နိုင်ငံအတော်များများမှာလည်း Fan Group တွေက အင်းအားတွေနည်းတာမဟုတ်ဘူး....။

9 years of you ဆိုတာ သူတို့နှစ်ယောက် ငယ်ငယ်ကတည်းကနေ လက်ရှိအချိန်ထိ သူငယ်ချင်းဘဝနဲ့ ကိုးနှစ်တာ အကြာ အခက်အခဲ အလွဲအချော်မျိုးစုံနဲ့ ကြုံတွေ့ပြီး ချစ်သူဖြစ်သွားကြတဲ့အကြောင်းလေးကို လှလှပပလေး ကြည့်တဲ့ ပရိတ်သတ်ကို ဆွဲခေါ်သွားနိုင်တဲ့ ဇာတ်လမ်းလေးတစ်ပုဒ်ပဲဖြစ်ပါတယ်...။ ဒါရိုက်တာကလည်း သူတို့နိုင်ငံရဲ့ နာမည်ကြီးဇာတ်တော်တော်များများကို ရိုက်ကူးခဲ့ဖူးတဲ့  Boy Takonkiet Viravan  ပဲဖြစ်ပါတယ်...။

ကျနော်က ရုပ်ရှင်ပဲကြည့်ကြည့် စာအုပ်ပဲဖတ်ဖတ် စိတ်နစ်ပြီး ဇာတ်လမ်းထဲက ကိုယ်တိုင်ဝင်ခံစားရသလိုမျိုးကြည့်တတ်တဲ့သူမို့ ငိုရမယ့်နေရာဆို မျက်ရည်ကကျပြီးသား....။ သူ့ရဲ့ ost သီချင်းလေးကလည်း ကောင်းလိုက်တာ...။ "9 years of you" OST ကို Fellow Fellow ဆိုတဲ့ music artist တွေက ဆိုပေးထားတာဖြစ်ပါတယ်...။ ဒီကားမှာပါတဲ့ မင်းသမီးလေးကလည်း သီချင်းလေးကို သူတို့ AKB48 အဖွဲ့လေးယောက်နဲ့လည်း မိန်းကလေး ဗားရှင်းနဲ့ပြန်ဆိုထားပါသေးတယ်...။ သီချင်းက ဗားရှင်း နှစ်ခုလုံးကောင်းတယ်...။ လောလောဆယ် ကျနော့်ရဲ့ music playlist ထဲထည့်ပြီး နေ့တိုင်းနားထောင်ဖြစ်နေတဲ့ သီချင်းလေးပေါ့...။ ဇာတ်ကြောင်းလေးကိုတော့ spoil မလုပ်တော့ဘူး ကြိုက်ရင် သွားကြည့်ကြည့်နော် you tube မှာကြည့်လို့ရပါတယ်....။

အငွေ့အသက်များ(၂).....

 

လွန်ခဲ့တဲ့လေးနှစ်ကထွက်ခဲ့တဲ့ Ah Boy နဲ့ ချမ်းမြေ့မောင်ချို တို့ရဲ့ "အငွေ့အသက်"များ ကို ကျနော်တင်ခဲ့ဖူးပါတယ် ...။ အဲတုန်းက သီချင်းရေးဆရာကို သားကြီးမှန်းလုံးဝမသိခဲ့ဘူး အခုYou Tube မှာ သားကြီးသီချင်းတွေကိုပြန်ရှာတော့မှ သူကိုယ်တိုင်ဆိုထားတဲ့ အငွေ့အသက်များ(၂)ကိုတွေ့လို့ ကြိုက်တာနဲ့ လာတင်ပေးလိုက်တာ...။ သားကြီးရဲ့ အသံက ဘယ်လိုပြောရမလဲ ပါးပါးလျားလျားနဲ့ သံစဉ်ထဲမှာ လှလှပပလေး စီးမျောနိုင်တဲ့ အသံမျိုး တစ်ချိန်က "ရုပ်သေးရုပ်" ဆိုတဲ့ သီချင်းနဲ့ပေါက်ခဲ့ဖူးတဲ့ အဆိုရှင်တစ်ယောက်ပေါ့ ခုထိလည်း သူ့သီချင်းတွေက နားထောင်နေကြတုန်းပါပဲ...။ တလောက မော်လ်ဒယ်နေခြည်လင်းလဲ့ရဲ့ မင်္ဂလာဆောင်မှာ သီချင်းလာဆိုတာတွေ့တော့မှ သားကြီးကို ပြန်အမှတ်ရသွားတယ် ဒီကြားထဲ သူ့သီချင်းတွေ ကြိုကြားထွက်နေပေမယ့် ကျနော်မသိခဲ့ဘူး....။ အဲဒါနဲ့သူ့ကို You Tube ထဲသွားပြန်မွှေကြည့်တာ.....။

အငွေ့အသက်များ(၂) ဆိုပြီး စာသားအသစ်တွေနဲ့ အရင်"အငွေ့အသက်များ"ရဲ့ chorus လေးပြန်ဖြည့်ပြီး ဆိုထားတာလေးလှတယ်....။ အငွေ့အသက်များ (၁)ရော (၂)ရော တစ်မျိုးဆီကောင်းတယ်...။

တယ်လီဖုန်း.....

 

မှတ်မိသလောက် ကျနော်တင်တဲ့ သီချင်းတွေထဲမှာ Rဇာနည်ရဲ့သီချင်းက တစ်ပုဒ်လောက်ပဲရှိမယ်ထင်တယ်...။ သူ့သီချင်းတွေကို မကြိုက်လို့တော့မဟုတ်ဘူး သူ့သီချင်းတော်တော်များများက ကျနော့်ရဲ့ Taste မဟုတ်လို့ပဲထင်တယ်...။ တယ်လီဖုန်းသီချင်းကိုတော့ ကားမောင်းရင်း FM ကနားထောင်လို့ ကြိုက်တာ B-Sox  featuring ဆိုထားတာလေးလည်း ကြိုက်တယ် ...။ ကျနော်က အဲလို melody နဲ့ rapping လေးညှပ်ဆိုတဲ့ သီချင်းလေးတွေဆို သဘောကျတယ်....။ rap ရွတ်ရင် များသောအားဖြင့် အသက်ကြီးပိုင်းတွေက နားမလည် နားမထောင်တတ်တဲ့အချိန်မှာ ကျနော်ကတော့ rap သီချင်းတွေ hip hop တွေကို ရူးသွပ်ဆဲ...။ ကျနော့်ကြောင့် ခင်မောင်တိုးသီချင်းလောက်ကိုပဲ စွဲစွဲမြဲမြဲနားထောင်တတ်တဲ့ လူငယ်လေးတစ်ယောက် hip hop သီချင်းတွေကို နားယဉ်တတ်သွားတာတော့ မှတ်မှတ်ရရပါပဲ 😊:)

သီချင်းတွေစိတ်ကြိုက်တင်နေလို့ ဂီတဟာ ကျနော့်အတွက်အကောင်းဆုံးအဖော်လို့ ထင်မှတ်မှားစရာရှိလိမ့်မယ်..။ သီချင်းဆိုတာ ကျနော့်အတွက် အပန်းဖြေဖို့ ဖျော်ဖြေရေးတစ်ခုသက်သက်ပဲ... စာဖတ် ရုပ်ရှင်ကြည့်သလိုမျိုး‌ပေါ့... ဒါက လူတိုင်းဒီလိုပါပဲ....။ ကျနော့်မှာအသက်အရွယ်ဘယ်လောက်ရောက်ရင် ဘာလုပ်မယ်ဆိုတဲ့ ရည်မှန်းချက်ရှိပြီးသားလေ ကျနော့်လိုပဲ တစ်ကိုယ်တည်း တောက်ပမယ့် ကျနော်နဲ့စိတ်တူကိုယ်တူ partner နဲ့ ကျနော်တို့နေချင်တဲ့နေရာ ကျနော်တို့သွားချင်တဲ့ခရီး ကျနော်တို့လုပ်ချင်တဲ့အလုပ် စသဖြင့် Planတွေ ရှိတယ်.....။ So what သဘောက loneliness ဆိုတဲ့အဓိပ္ပါယ်ကိုကွာ သေသေချာချာတိတိကျကျနားလည်နေတဲ့သူကသာ loneliness ဖြစ်နေသူပါ...။ 

80th Birthday.....

အချုပ်အနှောင်ခံဘဝကမလွတ်မြောက်သေးတဲ့ အမေ့ကို ပျော်ရွှင်သောမွေးနေ့ဖြစ်ပါစေလို့ ဆန္ဒမပြုချင်ဘူး အသက်(၈၀)ပြည့်အမေ့မွေးနေ့မှာ ဆုတောင်းပေးချင်တာက

 အမေ သက်ရှည်ကျန်းမာပါစေ 

အချုပ်နှောင်ခံရတဲ့ဘဝကနေ အမြန်ဆုံးလွတ်ပါစေ

အမေချစ်တဲ့သားသမီးတွေအားလုံးနဲ့ အမြန်ဆုံးပြန်ဆုံနိုင်ပါစေ

အေးချမ်းတဲ့ဘဝ အမြန်ဆုံးရပါစေ

💖 WE LOVE AUNG SAN SU KYI 💝

အမေပြောခဲ့တဲ့ အကြိုက်ဆုံးစကား ....

''You should never let your fears prevent you from doing what you know is right''

"The only real prison is fear and the only real freedom is freedom from fear"

မိုးညများ.....

 

ဒီသီချင်းလေးနားထောင်တော့ ကျနော် အက်ဆေးတစ်ပုဒ်ရေးချင်စိတ်ပေါက်မိတယ်....။ ဒါပေမယ့် ဘာစကားလုံးမှ ထွက်မလာတော့ဘူး ...။ အရင်လို အက်ဆေးလှလှနုနုရွရွလေးတွေရေးတဲ့ မိုးငွေ့လည်း အသေးစိပ်  စနစ်တကျ ဖျက်စီးခံနေရတဲ့နိုင်ငံမှာ  အိုင်ဒီယာတွေလည်းခမ်းကုန်ပြီထင်ရဲ့....။ ခုတော့ မိုးငွေ့ဟာ မိုးငွေ့မဟုတ်တော့သလို စိတ်ကူးယဉ်စာတွေထက် လက်တွေ့ကျတဲ့အကြောင်းတွေကိုပဲရေးချင်တော့တယ်..။

ကျနော်တို့ နုရွရမယ့်အချိန်မဟုတ်တော့ဘူးလေ နော့.....။

တစ်နှစ်လောက်ထွက်ထားတာပေမယ့် "မိုးညများ"က ကျနော်နားမထောင်ရသေးတဲ့ မိုးသီချင်းအသစ်လေးတစ်ပုဒ်ပဲ စကားမစပ် နီနီနဲ့ကျနော်တို့နဲ့က တစ်တိုက်ထဲနေတာ :)

My Doodles Art .....(6)

 

မနီးတော့တဲ့ကမ္ဘာ.....

 

ဒီအဆိုတော်နှစ်ယောက်က ဗျတ်ဝိနဲ့ဗျတ္တ တဲ့....။ တိုင်းရင်းသား အဆိုတော်တွေလို့တော့ထင်တယ်...။ ရာဇဝင်ထဲက ကုလားညီနောင်တော့မဟုတ်ဘူးပေါ့...။ သူတို့သီချင်းက tik tok မှာ trend ဖြစ်နေတာရော...ဘာဝင်ကြည့်ကြည့် "ဝေးရမယ်ဆိုတာ သေချာသည်" က ခနခနတွေ့နေရတာ....။ သူတို့သီချင်းတချို့တော့ You Tube မှာတွေ့တယ်....။ မနီးတော့တဲ့ကမ္ဘာက သုံးပတ်နဲ့ 1.1 M view ရနေပြီ....။ ဒီနေ့ထိ update view က 2.9 M ပါ...။ ဗျတ္တကတော့ ယွန်းမြတ်သူ သီချင်းတွေဖြစ်တဲ့ "အဆင်ပြေမနေပါဘူး" "နင်လမ်းတွေ့ခဲ့ရင်" နဲ့ "oxygen" ကိုရေးပေးတဲ့ တေးရေးလို့လည်း သိရတယ်...။ သူတို့ရဲ့ ကျနော်မသိတဲ့ အနုပညာလှုပ်ရှားမှုတွေက အများကြီးနေမှာ....။ အခက်ခဲတွေကြားက လူငယ်တွေ လွတ်လပ်စွာ ကိုယ့်အိပ်မက်ကို အကောင်ထည်ဖော်ခွင့်ရတာတွေ့တော့ မုဒိတာပွားမိတယ်...။ ပြီးတော့ ကျနော်က အလုပ်ကြိုးစားတဲ့လူငယ်တိုင်း(လူတိုင်း)ကို ချီးကျူးအားပေးတယ်...။ ကျနော်တို့နိုင်ငံမှာက အလုပ်လုပ်တဲ့သူထက် ငပျင်းတွေ သူတောင်းစားတွေ ပိုပိုများလာနေတဲ့အကြောင်းရင်းက အထက်ကဆိုတဲ့ တကိုယ်ကောင်းဆန်တဲ့ ယုတ်ညံ့တဲ့စိတ်ဓါတ်ပိုင်ရှင်တွေ စနစ်တကျဖျက်စီးထားတဲ့အကျိုးဆက်တွေပေါ့...။ ရှေ့ဆက်ပြီး ကောင်းလာဖို့ထက် ဆိုးသထက်ဆိုးလာမယ့် ဒီကမ္ဘာကြီးမှာ ကိုယ့်မျိုးဆက်တွေကို ချန်မထားခဲ့ကြပါနဲ့ ကလေးတွေ သနားလို့ပါ...။

မိုး.....

ဒီသီချင်းလေးနားပြန်နားထောင်တော့ 2000-2005 ဝန်းကျင်နှစ်တွေကို သတိရမိတယ်...။ 2002ကစပြီး ကျနော် အလုပ်လုပ်နေပြီ အဲတုန်းက ငယ်သေးတော့ တာဝန်လည်းမကြီးသေးတော့ ပေါ့ပေါ့ပါးပါးလွတ်လွတ်လပ်လပ်ပဲ...။ လစာ နှစ်သောင်းခွဲစရတာ မှတ်မိသေးတယ်..။ အဲခေတ်က အဲလစာနဲ့ MKဆိုင်မှာ brand တွေဝယ်ဝတ်နိုင်တယ်..။ အလုပ်ကပြန်လာရင် အိမ်မရောက်ခင် လမ်းမှာရှိတဲ့ မုန့်တွေ စားချင်တာစားလိုက်တာပဲ...။ ညဖက် ရေမိုးချိုး စားသောက်ပြီးရင်လဲ အောက်တစ်ခါပြန်ဆင်း စာအုပ်အငှားဆိုင်သွား ခွေအငှားဆိုင်သွားမွှေရသေးတယ်... အဲတုန်းကတော့ အင်တာနက်တွေမပေါ်သေးတော့ အဲဆိုင်တွေသွားတဲ့ခေတ်မဟုတ်သေးဘူး ဗီဒီယိုခွေကြည့် မဂ္ဂဇင်းစာအုပ် ကာတွန်း ဝတ္ထုစာအုပ်ဖတ်တဲ့ခေတ်...။ သီးချင်းတောင် Mp 3 Mp 4 လောက်ပဲရသေးတာ ကိုယ်နားထောင်ချင်တာ ဆိုင်မှာသွားဘမ်းရတယ်...။

ပြီးတော့ အလုပ်ကအပြန် မိုးရွာထဲလမ်းလျှောက်ရတာ သိပ်သဘောကျတယ်...။ ကျနော် တက္ကသိုလ်မတက်ခင်ဆက်ကြား သင်တန်းတွေတက်နေတဲ့ ကာလတွေတုန်းက အင်္ဂလိပ်စာသင်တန်းက ကောင်လေးတစ်ယောက်နဲ့ ရက်ပိုင်းလေးခန ရည်းစားဖြစ်ဖူးတာအမှတ်ရမိတယ်...။ အဲတုန်းက လက်ကိုင်ဖုန်းဘယ်သူမှ သိပ်မကိုင်နိုင်တဲ့ခေတ်မှာ ကျနော့်ဆီမှာ ဆယ်လူလာဖုန်းတစ်လုံးရှိတယ်... တစ်ညနေမှာ အဲဖုန်းလေးနဲ့ မိုးဖွဲဖွဲလေးထဲမှာ လမ်းလျှောက်ရင်း အဲကောင်းလေးနဲ့ ဖုန်းပြောခဲ့ဖူးတယ်...။ " ငါအခု မိုးဖွဲအောက်ကနေ လမ်းလျှောက်ရင်း ဖုန်းပြောနေတာ သိလား" ဆိုပြီး မိုးရေထဲမှာ ဖုန်းလေးတစ်လုံးနဲ့ RO တာကို လက်တွေ့လုပ်ရလို့ ဂုဏ်ယူဝင့်ကြွားခဲ့ရသေး...။ အဲဒါ မိန်ရာသီခွင်မှာမွေးတဲ့သူတွေပဲ....။

စည်သူလွင်ဆိုတာ တစ်ချိန်က သီချင်းဆိုပြိုင်ပွဲကနေ ကိုညီထွဋ်ရဲ့သီချင်းနဲ့ ဆုရခဲ့ဖူးတဲ့ အဆိုတော်တစ်ယောက် ...။ ကျနော် ပထမနှစ် ကျောင်းစတက်တော့ ကိုစည်သူက RC2 မှာ နောက်ဆုံးနှစ်ကျောင်းသားဖြစ်နေပြီ ကျနော်တို့ထက် လေးငါးနှစ်တော့ကြီးတယ်...။ RC 2 မှာ Fresher Welcome လုပ်ရင် သွားသွားကြည့်တာ အဲမှာ စည်သူလွင်သီချင်းလာဆိုမယ်ပေါ့...။ သီချင်းတစ်ပုဒ်ဆီတိုင်းမှာ ကျနော်က ဇာတ်လမ်းလေးတွေ ပြောစရာရှိနေတော့တာ...။ ကဲ... ဒီနှစ်လည်း ကျနော် မိုးနဲ့ ပတ်သက်တဲ့ မတင်ရသေးတဲ့ သီချင်းတွေ အများကြီးရှာထားတယ် တစ်ပုဒ်ဆီလာတင်ပေးမယ်...။

☔...... သည်းသည်းမဲမဲ ရက်စက်တဲ့ မိုးရေ အကြင်နာတွေ သွန်းဖြိုးဦး ရက်ရက်စက်စက် ထားခဲ့တဲ့ မိုးရေ နှုတ်ဆက်ခဲ့ပြီနော် မိုးတိမ်တွေရယ် ညှို့ကာမဲခဲ့ရင်လေ ကိုယ်ကြွေပြီမိုးရေ .....☔

(သတိရခြင်းဆိုတာ)

လွတ်လပ်တယ်

တိကျသေချာတယ်

သိုဝှက်ဟန်ဆောင်မှုကင်းတယ်

လုံခြုံတယ်

အချက်အလက်ပြည့်စုံတယ်

ဒါပေမယ့်

အထီးကျန်ဆန်တယ်

၀မ်းနည်းစရာကောင်းတယ်

မရေရာတဲ့ မျှော်လင့်ချက်ရှိတတ်တယ်

အဆိုးဆုံးကတော့

တစ်ဖက်သတ်ဆန်တယ်။               ။

(အယ်ဖြူ)

( ၁၉၇၂ - ၂၇၊ မေ၊ ၂၀၀၄ )

မှတ်ချက်။          ။ ဦးကျားကြီး(ဆရာကျောင်း) စာမျက်နှာကယူလာတာ 

မုန့်လင်မယား.....

 

မုန့်လင်မယားလုပ်တဲ့အိုးလေးကို ဝယ်ထားတာကြာလှပြီ...။ လုပ်စားဖြစ်တာက ဒါ ဒုတိယအကြိမ်....။ ကျနော်တို့ လုပ်စားတဲ့မုန့်လင်မယားက ရှမ်းပြည်မှာ ကျနော်တို့ငယ်ငယ်ကစားဖူးတဲ့ အရသာအတိုင်းလုပ်တာ အုန်းနို့နဲ့ သကြားလေးဖြူးစားရတာ....။ သူ့အရာသာက ထားဝယ်က အာပုံမုန့်နဲ့တူတယ်...။ ရန်ကုန်မှာလုပ်ရောင်းသလို ငုံးဥ ပဲပြုတ် တွေ နှမ်းထောင်းတွေနဲ့မဟုတ်ဘူး...။ ပထမတစ်ခေါက်က ရန်ကုန်လိုမျိုးလုပ်စားဖူးတယ် ...။ မုန့်နှစ်စပ်တာခြင်းတော့ကွာသွားတယ်...။ ပဲပြုတ်နဲ့က အငံမုန့်လို့ဆိုပါစို့ သူ့မုန့်နှစ်ကျတော့ ဆန်မှုန့် ပဲမှုန့် ဆား ဆိုဒါ ဆီနဲနဲ ပါတယ်...။ အခု ရှမ်းပြည်ကလိုကျတော့ အချိုလို့ခေါ်ရမှာထင်တယ် သူ့မုန့်နှစ်မှာပါတာက ဆန်မှုန့် ပြောင်းကော်မှုန့်နဲနဲ ဆား နဲ့ အုန်းနို့တို့ပဲဖြစ်တယ်...။

မုန့်လင်မယားဆိုပေမယ့် အဲမုန့်လုပ်တိုင်း တစ်ခုနဲ့တစ်ခုထပ်ထားတာမျိုး တစ်ခါမှမလုပ်ဘူး အဲလို တစ်ခြမ်းဆီပဲ ပန်းကန်ထဲစီပြီးစားလေ့ရှိတယ်.....။ ရှမ်းလိုတော့ ခနုံခုတ်လို့ခေါ်တယ်...။ ယိုးဒယားကနေ ဆင်းသက်လာတဲ့ မုန့်ပဲသရေစာတစ်မျိုးလို့ထင်တယ်...။ ကျနော်အခုလုပ်စားဖြစ်တဲ့ မုန့်စပ်နည်းအချိုးအစာလေးကို ပြောပြပါမယ်...။ မွှေးဆန်စိမ်းမှုန့်တစ်ထုပ် ပြောင်းကော်မှုန့် သုံးဇွန်း baking soda လက်ဖက်ရည်ဇွန်းတစ်ဇွန်းခွဲ ဆားအနယ်ငယ်နဲ့ ရေကိုခပ်ကျဲကျဲထည့်ဖျော်ပြီး နာရီဝက် တစ်နာရီလောက် နှပ်ထားပါ....။ အုန်းနို့ကကျတော့ ကိုယ့်ဘာသာ အုန်းသီးဆံကိုအရည်ညှစ်ထားတာဖြစ်ဖြစ် အုန်းနို့ဗူးဖြစ်ဖြစ်သုံးလို့ရပါတယ်...။ ကျနော်ကတော့ အုန်းနို့ဗူးအသေးတစ်ဗူးသုံးပါတယ်...။ အုန်းနို့ကိုတော့ မုန့်နှစ်ထဲမရောပါဘူး သပ်သပ်ထားထားတာပါ...။

မု့န်လုပ်မယ့်အိုးလေးကို ဆီသုတ်ပြီး အရင်အပူလေးထား....။ ကျနော်တို့အိုးက လျှပ်စစ်အိုးမဟုတ်ဘူး ဂက်စ်နဲ့တည်ရတာ...။ မီးကို အသေးဆုံးထိထားပြီးကြော်ပေးပါ...။ အိုးပူလာရင် မုန့်နှစ်ရည်ကို ဒယ်ထဲတစ်ခွက်ခြင်းဆီလောင်းထည့် အပြည့်မထည့်ပါနဲ့ အုန့်နို့အတွက် နဲနဲနေရာချန်ထားပေးပါ...။ ခွက်လေးတွေအားလုံးမုန့်နှစ်တွေထည့်ပြီးရင် အုန်းနို့ရည်ကို ဇွန်းလေးနဲ့လိုက်ဖြည့်ပေးပါ ပြီးတာနဲ့ အဖုံးလေးခနအုပ်ထား... သုံးလေးမိနစ်လောက်ဆို အနေတော်ပဲ စားလို့ရပြီ...။ အိုးက မကပ်အိုးမို့လို့ ကော်ထုတ်ရတာလဲလွယ်တယ်...။ စားခါနီး သကြားလေးဖြူးစား ဆိမ့်ဆိမ့်လေးနဲ့ သိပ်ကောင်းပဲ...။ ဪ အရေးကြီးတာပြောဖို့မေ့ မုန့်နှစ်လေးကို အိုးထဲထည့်ခါနီးတိုင်း ဇွန်းနဲ့မွှေပေးပါ မုန့်နှစ်တွေ အနည်ထိုင်တတ်လို့ပါ....။

အဘိဓမ္မာစိတ်ပိုင်း(၇).....

 

နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ
နမောတသ ဘဂဝတော အရဟတော သမ္မာသဗ္မုသတ္တာ

 

အရူပါဝစရစိတ် (၁၂)ပါး

အရူပါဝစရစိတ် (၁၂)ပါးကို အောက်မှာ အဆင့်ဆင့်ခွဲပြထားပါတယ်...။

1) အရူပါကုသိုလ်စိတ် (၄)ပါး အရူပါဝစရကုသိုလ်စတ်

2) အရူပါဝစရစိတ် (၄)ပါး အရူပါဝစရ ဝိပါတ်စိတ်

3) အရူပါဝစရကြိယာစိတ် (၄)ပါး အရူပါဝစရ ကြိယာစိတ်

အရူပါကုသိုလ်စိတ် (၄)ပါး

၁. အာကာသာနဉ္စာယတနစိတ်                (၇၀)

၂. ဝိညာဏဉ္စာယတနစိတ်                        (၇၁)

၃. အာကိဉ္စာ ယတနာစိတ်                        (၇၂)

၄. နေဝသညာနာသညာ ယတနစိတ်         (၇၃)

အရူပါဝစရစိတ် (၄)ပါး

- အရူပါဝိစရ ကုသိုလ်စိတ်နှင့်တူ            (၇၄-၇၇)

အရူပါဝစရကြိယာစိတ် (၄)ပါး 

- အရူပါဝိစရ ကုသိုလ်စိတ်နှင့်တူ            (၇၈-၈၁)

1.အာကာသာနဉ္စာယတနစိတ်   

အဆုံးမရှိသော ကောင်းကင်ပညတ် Space of infinity ကိုအာရုံပြုသောဈာန်နှင့်ယှဉ်သောစိတ်...။

2.ဝိညာဏဉ္စာယတနစိတ် 

အဆုံးမရှိသော ပထမ အရူပါဝစရစိတ် Boundless Consciousness ကိုအာရုံပြုသော ဈာန်နှင့်ယှဉ်သောစိတ်...။

3. အာကိဉ္စာ ယတနာစိတ်

ပထမအရူပါဝစရစိတ်၏ မရှိခြင်း "နတ္တိဘောပညတ်" Nothingness ကိုအာရုံပြုသော ဈာန်နှင့်ယှဉ်သောစိတ်...။

4. နေဝသညာနာသညာ ယတနစိတ်  

အသိရှိလည်းမဟုတ် ရှိသည်လည်းမဟုတ်ဆိုသော နေဝသညာနာသညာယတန Neither Consciousness nor non Consciousness စိတ်...။

       အရူပါဝစရစိတ်                   မှီတွယ်အပ်အာရုံ                    လွန်မြောက်အာရုံ

         ပထမစိတ်                      ကောင်းကင်ပညတ်                   ကသိုဏ်းပညတ်
         ဒုတိယစိတ်                     ပထမရူပါဝစရစိတ်                  ကောင်းကင်ပညတ်

         တတိယစိတ်                    နတ္တိဘောပညတ်                           ပထမရူပါဝစရစိတ်

         စတုတ္ထစိတ်                    တတိယရူပါဝစရစိတ်                  နတ္တိဘောပညတ်

အရူပါဝစရစိတ်များဟာ ဉပေက္ခာ ဧကဂ္ဂတာဆိုသော ဈာန်အင်္ဂါနှစ်ပါးနဲ့သာ ယှဉ်သောကြောင့် ယင်းစိတ်အားလုံးကို ပဉ္စမဈာန်၌ထည့်သွင်းထားပါတယ်...။

အရူပဆိုတော့ နာမ်ချည်းသက်သက်သာသာရှိတဲ့ဘုံပါ...။ ရုပ်အနေနဲ့ ဘာမှမရှိပါဘူး...။ ဒီနေရာမှာ တချို့က အတွေးအခေါ်

လူ့ဘုံကိုဘယ်လိုခေါ်သလဲ ?

ခန္ဓာငါးပါးရှိတော့ ပဉ္စဝေါကာရဘုံလို့ခေါ်တယ်...။

ရူပါဈာန်ငါးဆင့်ရပြီးမှ အရူပဈာန်ကို တက်လို့ရမှာပါ...။ ရူပါဈာန်ငါးဆင့်ဝင်စားနိုင်တဲ့ ပုဂ္ဂိုလ်တွေဟာ အထက်ဈာန်ဖြစ်တဲ့ အရူပါဈာန်တွေတက်ဖို့ ဆန္ဒရှိလာကတည်းက ရူပပဉ္စမဈာန်စိတ်ဟာ ကသိုဏ်းနိမိတ်ကို အာရုံယူရတော့ ရုပ်နဲ့ဆက်စပ်နေတာမို့ ရုပ်မဆက်နွယ်တဲ့ အရူပါဈာန်တွေထက် နည်းနည်းကြမ်းတမ်းပါသေးတယ်...။

အရူပါဈာန်တက်ဖို့ဘယ်နေရာကစပြီးရှုရပါသလဲ?

အရူပါဈာန်ကို ကျင့်တဲ့ယောဂီဟာ ရုပ်နဲ့ဆက်နွယ်နေတာကို မလိုချင်လို့ ကသိုဏ်းကိုအာရုံမပြုတော့ဘဲ Ignore လုပ်လိုက်ပါတယ်..။ ကျမ်းဂန်တွေမှာ ကသိုဏ်းနိမိတ်ကိုခွာပြီး ကောင်းကင်ပညတ် Space of Infinity ကိုအာရုံပြုရမယ်လို့ဆိုပါတယ်...။ ဒီနေရာမှာ ခွာတယ်ဆိုတာ ကသိုဏ်းနိမိတ်ကို မရှုတော့တာ...။ ပယ်လိုက်တာပါ..။ ကသိုဏ်းနိမိတ်ကို ပယ်လိုက်တော့ အဲဒါပျောက်သွားပြီး ကွက်လပ်ကြီးကျန်ခဲ့တယ်...။ အဲဒီကွက်လပ်ကို အာကာသ Space ဆိုပြီး အားထုတ်ရမှာ...။

ဒုတိယဈာန်ရဖို့ ဘယ်လိုဆက်ပြီး အားထုတ်ရသလဲ?

ပထမဈာန်ရပြီးတဲ့အခါ လောကသဘာဝအတိုင်း သူက ရှေ့ဆက်တက်ချင်လာတယ် ပိုပြီးကောင်းတဲ့ ဈာန်ကိုရချင်လာတာပါ...။ ဒါကလည်း ပထမဈာန်က ရူပါပဉ္စဈာန်နဲ့နီးတော့ သူ့ထက် သိမ်မွေ့တဲ့ ဒုတိယဈာန်တက်မှပဲလို့ စိတ်ကူးရှိပြီး အားထုတ်တာပါ...။ ဒီလိုဆက်ပြီး အားထုတ်မယ်ဆိုရင် ပထမ အရူပါဝစရဈာန်ကိုပဲ ပြန်ဝင်စားရပါတယ်...။ နောက်ဆက်မဝင်စားတော့ဘဲ ပထမဈာန်စိတ်ဟာ အဆုံး အပိုင်းအခြားမရှိတဲ့စိတ်ဆိုတော့ အနန္တဝိဉာဏ် Boundless Consciousness  သဘောရှိတယ်..။ ဒီလို အထပ်ထပ်ရှုသွားရင် ဒုတိယအရူပဈာန်ကို ရောက်သွားပါလိမ့်မယ်..။ ဒီဈာန်ကို ဝိညာဏာဉ္စာယတနဈာန်လို့လည်းခေါ်တယ်...။

ဒုတိယဈာန်ရောက်ရင် တတိယဈာန်ကို တက်ချင်မှာပေါ့....

တတိယဈာန်ရဖို့ ရောက်ဖို့ ဘာကိုအာရုံပြုရသလဲ?

သူက ပထမဈာန်ရဲ့ မရှိခြင်း Nothingness ကိုပဲ အာရုံပြန်ပြုရပါတယ်...။ တကယ်တော့ စိတ်ဟာ တစ်ခုပြီးမှတစ်ခု ဖြစ်နိုင်တာလို့ ဒုတိယဈာန်ဖြစ်တဲ့အခါ ပထမဈာန်က မရှိတော့ဘဲ ပျောက်သွားပါပြီ...။ ရှိတာတောင် အာရုံပြုဖို့က ခက်ခဲတော့ မရှိတာကို အာရုံပြုနိုင်တယ်ဆိုရင် တော်တော်ကို အထက်တန်းကျပြီး သိမ်မွေ့တဲ့ စိတ်ဖြစ်နေပါပြီ...။ ဒီလိုမရှိတာကို အာရုံပြုပြီး အထပ်ထပ်ပွားများလိုက်ရင် တတိယဈာန်ကိုရောက်သွားပါတယ်...။ အာကိဥ္စညာယတနဈာန်လို့လည်း ခေါ်တယ်...။ ဒီနေရာမှာ အာကိဥ္စည က လုံးဝအကြွင်းအကျန်မရှိခြင်း Total Absent အာယတနက တည်ရာ Place ဖြစ်တာမို့ ပထမ အရူပါစိတ်ရဲ့ အကြွင်းမရှိသော နတ္တိသဘောပညတ်ကို အာရုံပြုတဲ့ ဈာန်စိတ်ရဲ့ တည်နေရာလို့ အဓိပ္ပါယ်ရတယ်...။ (အရူပဈာန်စိတ်တွေရအောင်ပွားများရတာ တော်တော်သိမ်မွေ့တာပဲ)

မရှိတာကို ဘယ်လိုအာရုံပြုရမလဲ?

ဒီလိုဘာမှမရှိတာကို အာရုံပြု အာရုံစိုက်လို့ ဖြစ်ပါ့မလားဆိုတာ ဗုဒ္ဓကျမ်းဂန်မှာ ဉပမာလေးနဲ့ ရှင်းပြထားပါတယ်...။ တစ်ခါက ရဟန်းတစ်ပါးဟာ သိမ်အတွင်းမှာ သံဃာများနဲ့အတူရှိနေပြီး ကိစ္စရှိလို့ ကျောင်းပေါ်ကို ခဏတက်သွားတယ်...။ သူကျောင်ပေါ်ရောက်ပြီး မကြာမီ သံဃာတွေကိုမတွေ့ရပေမယ့်...။ ဒီရှိတဲ့ သဘောကိုပဲ ပြန်လည်အာရုံစူးစိုက်လို့ရသလိုမျိုးပါပဲ.....။ တကယ်တော့ ရှိခြင်းမရှိခြင်းဟာ ဒင်္ဂါးပြားရဲ့ခေါင်းနဲ့ပန်းလိုပါပဲ...။

စတုတ္ထဈာန်ကျတော့ ဘာကိုအာရုံပြုရသလဲ?

သူကျတော့ အရင်ချုပ်သွားတဲ့ ဝိညာဏ်ကိုပဲ အထပ်ထပ် အာရုံပြုရပါတယ်...။ ဒီလိုနှလုံးသွင်းနေရင်း ဝိညာဏ်လေးက အလွန်သိမ်မွေ့သွားပြီး အသိရှိတယ် မရှိဘူး Neither Consciousness of non-consciousness လို့မပြောနိုင်တဲ့ အဆင့်ရောက်သွားရင် နေဝသညာနာသညာယတန စတုတ္ထအရူပဈာန်ကို‌ ရောက်သွားပါပြီ...။ ဒီသဘောလေးကိုလည်း ဗုဒ္ဓဒေသနာမှာ ရှင်းပြထားတာရှိပါတယ်...။ ဆရာတပည့်နှစ်ယောက်ခရီးသွားတော့ ကိုရင်လေးကရှေ့က ဆရာဘုန်းကြီးကနောက်က တစ်နေရာရောက်တော့ ကိုရင်က ချောင်းရိုးလေးအဖြတ်မှာ ရေလေးနည်းနည်းစီးဆင်းနေတာတွေ့တော့ "ရှေ့မှာ ရေရှိတယ်ဘုရား"လို့လျှောက်ပါတယ်...။ ရေရှိတယ်ဆိုပေမယ့် ရေချိုးလို့ရလောက်တဲ့ အထိမဟုတ် ခြေထောက်ရေစိုမယ် ရွှံ့ပေမယ်ဆိုတဲ့ သဘောပြောလိုက်တော့ အလားတူ သိလွယ်တဲ့ သညာနဲ့ စိတ်သဘောထားမျိုးမရှိပေမယ့် အလွန်သိမ်မွေ့တဲ့ စိတ်လေးကရှိနေပါတယ်...။

စတုတ္ထအရူပဈာန်က ရှိသမျှဈာန်ထဲမှာ အကောင်းဆုံးအသိမ်မွေ့ဆုံးဈာန်လို့ ထင်ရပေမယ့် လောကီချမ်းသာထဲမှာ အမြင့်ဆုံးဆိုပေမယ့် မြတ်စွာဘုရားက သူလဲ မမြဲဘဲချုပ်ပျောက်ရမှာမို့ ဈာန်ချမ်းသာကိုလည်း ဘုရားက ချမ်းသာအစစ်လို့မမြင်ဘဲ နိဗ္ဗာန်မှ ချမ်းသာအစစ်လို့ဟောပါတယ်...။

အရူပဈာန်က ဈာန်အင်္ဂါအနေနဲ့ ဘယ်နှစ်ပါးရှိလဲ?

သူက ဉပေက္ခာနဲ့ ဧကဂ္ဂတာဆိုပြီး နှစ်ပါးပဲရှိပါတယ်...။ ရူပပဉ္စမဈာန်နဲ့ အတူတူဖြစ်လို့ အရူပဈာန်စိတ်လေးပါးလုံးကို ပဉ္စမဈာန်ထဲမှာထည့်ထားတယ်...။

ရူပပဉ္စမဈာန် အရူပပဉ္စမဈာန်က ဈာန်အင်္ဂါချင်းအတူတူ ဘယ်မှာ အဓိကခြားနားလဲ?

သူတို့နှစ်ခုက ဈာန်အင်္ဂါတူပေမယ့် စိတ်တစ်ခုချင်း တစ်ခုချင်းမှာ ရှိတဲ့ အာရုံက မတူပါဘူး...။ ပထမစိတ်က ကောင်းကင်ပညတ် ဒုတိယစိတ်က အနန္တဝိညာဏ် တတိယစိတ်က နုတ္တိဘောပညတ် စတုတ္ထက အရူပါဝစရ စိတ်ဖြစ်တာမို့ ရူပဈာန်စိတ်တွေက ဈာန်အင်္ဂါနဲ့သွားပြီး အရူပါဈာန်စိတ်တွေက အာရုံနည်းသွားပါတယ်...။

ဈာန်ဝင်စားနေရင် ဘယ်နှစ်ရက်လောက် ဆက်တိုက်နေနိုင်လဲ?

လူခန္ဓာမှာ ထမင်းအသက်ခုနှစ်ရက် ရေအသက်တစ်မနက်ဆိုတဲ့ စကားအတိုင်း အစာမရှိဘဲနဲ့ အလွန်ဆုံးနေနိုင်တာ 7ရက်ပါ...။ ဈာန်ဝင်စားတယ်ဆိုရင် Limit ကအလွန်ဆုံးခုနှစ်ရက်ပါပဲ...။

နိရောဓ သမာပတ်ဆိုတာ ဘယ်လိုမျိုးလဲ ?

အဟုတ်ရှိတဲ့ နာမ်တရားတွေ ချုပ်ငြိမ်းကုန်တော့ ငြိမ်းအေးမှုသက်သက်နဲ့ အဓိဌာန်ပြုထားတဲ့ ကာလအတွင်း ခန္ဓာဟာ မလှုပ်မရှား ငြိမ်သက်စွာနေတာပါ...။ ဆီး ဝမ်း မသွားဘဲ နေလို့ရတယ်...။ မြင်လွယ်အောင် ပြောရရင် ငါးရံ့တွေဆို ရေခန်းသွားတဲ့ကန်မှာ တစ်နွေလုံးနေကြပေမယ့် မိုးပြန်ရွာတော့ ပြန်ရှင်သန်ကြပါတယ်...။ ဆေးပညာအရ Hibernation လို့ခေါ်တယ်...။ အသက်ရှူနှုန်း သွေးခုန်နှုန်းနဲ့ ခန္ဓာကိုယ်ရဲ့ ကမ္မဇီဝဖြစ်စဉ် metabolism အားလုံး နှေးသွားပြီး ပတ်ဝန်းကျင်နဲ့လိုက်လျောညီထွေ  adaptation ဖြစ်အောင်နေတာပါ...။ နိရောဓသမာပတ်မှာလည်း ဈာန်တန်ခိုး will power ခုနှစ်ရက် အဓိဌာန်ပြုပြီးနေလိုက်တာပါ...။

ရူပဝစရစိတ်က (15)ပါး အရူပဝစရစိတ်က (12)ပါး ဆိုတော့ အားလုံးပေါင်း (27)ပါး သူတို့အားလုံးဟာ အထက်တန်းကျပြီးမြင့်မြတ်တဲ့ ဈာန်စိတ်တွေမို့ Supernormal Consciousness ပါဠိလို မဟဂ္ဂုတ်စိတ်များလို့ခေါ်တယ်...။ ဒီအဆင့်ကို higher mental attainment လို့သုံးတယ်...။ စိတ်သင်တန်းအစက ကာမာဝစရစိတ် (54)ပါး ပေါင်းလိုက်ရင် (81)ပါး ရပါတယ်...။ ဒီစိတ်တွေဟာ ကာမ ရူပ အရူပ လောကသုံးပါးမှာ ကျင်လည်နေတဲ့ လောကီစိတ်တွေပါပဲ....။

မှတ်ချက်။     ။ ခွဲစိတ်ပါမောက္ခ ဒေါက်တာစိန်လင်း၏ ရွှေစင်မြင်းမိုရ်အဘိဓမ္မာစာအုပ်မှ ကောက်နုတ်ပါသည်...။ ကျွန်မလေ့လာပြီးသလောက် မှတ်သားထားသည်များကို သဘောပေါက်လွယ်အောင် အပိုင်းခွဲပြီး ဆက်လက်ရေးသားဖော်ပြပေးပါဦးမယ်....။ ဓမ္မလက်ဆောင်စာအုပ်ပေးခဲ့တဲ့ ဦး-----ကိုလည်း ဒီပို့စ်နဲ့ကျေးဇူးတင် ကန်တော့လိုက်ပါတယ်...။