လိပ်ပြာဒိုင်ယာရီ.....(ခန္ဓာကိုယ်တစ်ခြမ်း)

 

"ချစ်တယ်"💖ဆိုတာ အန်မတန်ရိုးစင်းတဲ့ ကမ္ဘာဦးကတည်းက လူယောက်ျားတစ်ယောက်က လူမိန်းမတစ်ယောက်အပေါ် ရင်ထဲ နှလုံးသားထဲကနေ တိမ်းညွှတ်တဲ့ခံစားမှုကို ဖော်ပြတဲ့ စကားလုံးအဖြစ် သုံးလာခဲ့ကြတာပါ.....။ ဒါပေမယ့် အဲဒီစကားလုံးတွေက ကျွန်မနှုတ်ခမ်းကနေ ထွက်ကျလာဖို့ ဘာလို့ ဒီလောက်ခက်ခဲနေလဲဆိုတာ ကိုယ့်ဘာသာတောင် စဉ်းစားမရခဲ့ဘူး....။

သီချင်းတစ်ပုဒ်ရှိတာပဲ 🎶အဖိုးကလည်းအဖွားကို အဖေကလည်းအမေ့ကို ကိုယ်ကလဲမင်းကို "ချစ်တယ်" ပြောပါတယ်🎵...ဆိုတာလေ.....။ စန္ဒရားလှထွဋ်တို့ ဦးသုမောင်တို့ တခြားအဆိုတော်တွေလဲ ခေတ်အဆက်ဆက်ဆိုလာတဲ့ သီချင်းတစ်ပုဒ်လေ....။

လွန်ခဲ့တဲ့နှစ်များ ကျွန်မတို့ဆုံတွေ့စဉ်ခါတုန်းက သူ အကြိမ်ကြိမ်မေးခဲ့တဲ့ မေးခွန်းကို ဖြေဖို့ ကိုယ့်ကိုယ်ကို ယုံကြည်မှုမရှိခဲ့ဘူး....။ "ကိုယ့်ကို ချစ်လား...? " အဲလိုမေးတိုင်း ကျွန်မဝေ့လည်ကြောင်ပတ်ဖြေရင်ဖြေ မဖြေရင် စကားလမ်းကြောင်း လွှဲလိုက်တာ များတယ်....။ ကျွန်မသာ သူ့နေရာဆိုလဲ စိတ်တိုမှာပဲ.... စောင့်ဆွဲလှုပ်ရမ်းပစ်ချင်စိတ် ပေါက်မိမှာပါပဲ....။ အဲတုန်းက  "I love you honey "  "ခင်ဗျားကို...ချစ်တယ်"လို့ တစ်ခွန်းထဲ နှုတ်ကထွက်ဖို့ ဘာတွေခက်ခဲနေတာလဲ....။ ဒါမှမဟုတ် အဲဒီတုန်းက ကျွန်မတို့နှစ်ယောက်ကြားမှာ မမြင်နိုင်တဲ့ စည်းတွေ နံရံတွေခြားထားခဲ့လို့လား .....။ အခုပြန်တွေ့ကြတော့ပြောင်းပြန် "ကိုယ့်ကို....ချစ်လား"လို့ သူမေးရင် မကြားလိုက်ဘူး ပြန်မေးလို့ နှစ်ခါ သုံးခါလောက်ပြောတာနဲ့ သူက  စိတ်မရှည်တော့သလို ဘာမှမဟုတ်တော့ဘူးဆိုပြီး ရှက်တတ်သေးတာ မေးဖို့ကို...။ အသက်အရွယ်က စကားပြောလာတာလဲ ပါမှာပါ....။ သူက ကျွန်မ စတွေ့တုန်းကလို အသက်နှစ်ဆယ်ကျော်အရွယ် ကောင်လေးမှမဟုတ်တော့ဘဲ....။

တစ်နေ့... ကျမ ကိုးရီးယားဆိုင်တစ်ခုမှာ နေ့လည်စာသွားစားရင်း လေအေးပေးစက်ဖွင့်ထားတဲ့အခန်းထဲက နံရံဖြူဖြူမှာ လိပ်ပြာလေးတစ်ကောင်ကို အမှတ်မထင်တွေ့လိုက်တယ်....။ 🦋လိပ်ပြာတစ်ကောင်ကို ပန်းခြံ ပန်းပင်တွေမှာမဟုတ်ဘဲ ခုလို အအေးခန်းထဲမှာ တွေ့ရမယ်လို့ထင်မထားဘူးလေ ပြီးတော့ ဘာအကြောင်းနဲ့သူက ဒီနံရံမှာရှိနေတာလဲ တိုက်ဆိုင်မှုဆိုတာ တကယ်မရှိဘူးမဟုတ်လား....။ ကျွန်မဓါတ်ပုံသွားရိုက်တော့ သူက အတောင်ပံတွေကိုဖြန့်ပြတယ်....။ ကျွန်မတွေ့တုန်းက သူက အတောင်တွေကိုစုထားတာ အညိုရောင်လေး ဖြန့်ကားလိုက်တော့မှ လိမ္မော်ဝါရောင်လိပ်ပြာလေး....အိုး !!!! 

"သတိရခြင်းတွေကို လိပ်ပြာတွေက သယ်ဆောင်လာပေးလိမ့်မယ် မင်းကိုယ့်ကို ယုံလို့ရတယ်သိလား"....တဲ့....။ "My soul just want to be closer to yours, butterflies will bring my soul to you. You can trust me" လို့သူပြောဖူးတာကို ပြန်အမှတ်ရမိသွားတယ်...." (လက်ရှိအချိန်မှာတော့ ကျမ လိပ်ပြာလေးတွေကို မတွေ့ဖြစ်တာကြာပြီ သူကျမကို သတိမရတော့လို့လား မေ့သွားပြီလားဆိုတာ ကျမ ဘာလို့သိချင်နေသေးသလဲ)

သူ့ဆီ အဲပုံလေးနဲ့အတူ...."ခင်ဗျားသတိရနေတာလား လိပ်ပြာလေး" လို့မေးလ်ပို့ပေးလိုက်တော့ သူက "Sure " "သေချာတာပေါ့" ဆိုတဲ့ စာလေးပြန်ပို့လာတယ်....။ 

 

 

"Butterflies are nature’s Angel and you are my nature" သူ ကဗျာတွေသိပ်မရေးဖြစ်တော့ပေမယ့် ကဗျာဆန်နေတုန်း....။ သဘာဝကို ချစ်မြတ်နိုးတဲ့ သူတစ်ယောက်က ကျွန်မကို သဘာဝနဲ့နှိုင်းယှဉ်တင်စားလိုက်လို့ ချက်ချင်းတောင် လိပ်ပြာဖြစ်ချင်စိတ် ပေါက်မိ....။

"Just when the caterpillar thought her life was over, she began to fly" တဲ့ "ဘောက်ဖတ်လေးဟာ သူမဘဝသက်တမ်းကုန်ဆုံးသွားပြီလို့ တွေးလိုက်တဲ့အချိန်မှာ စတင်ပျံသန်းဖို့လုပ်တော့တာပဲ" ကျွန်မ အဲစာသားလေးရှာတွေ့ထားလို့ သူ့ဆီပို့လိုက်တယ်....။ အမြဲတမ်း လိပ်ပြာလေးတွေနဲ့ သူ့ကိုယ်သူကိုယ်စားပြုနေကျမို့ ဒီနေရာမှာ စာရေးသူက "She" လို့ သုံးထားတာကို သူဖတ်ပြီးတာနဲ့ ချက်ချင်း သတိထားမိပြီး ကျွန်မကိုလှမ်းမေးတယ် ...(ကျွန်မလဲ ထိုနည်းတူပဲ သတိထားမိ)...။ "She" လို့သုံးထားတာကို မင်းဘယ်လိုမြင်လဲ တဲ့....။ လောကသဘာဝရဲ့ အိန်ဂျယ်လေးတွေလို့ တင်စားခံထားရတဲ့ လိပ်ပြာတွေရဲ့ အလှတရားကြောင့် အမျိုးသမီးကိုယ်စားပြု "She" လို့သုံးထားတာ ဖြစ်မှာပါလို့ကျွန်မအမြင်ကိုပြောမိတယ်....။ ကျွန်မအဖြေကို သူစိတ်ကျေနပ်မှုရလို့ထင်တယ် ဘာမှပြန်မပြောတော့ဘူး...။ ဒါမှမဟုတ် သူတစ်ခုခု စဉ်းစားနေတာလဲဖြစ်နိုင်တာပဲ...။

ကျွန်မလုပ်ချင်တဲ့ အလုပ်တွေထဲက တက်တူးထိုးမယ့်ကိစ္စ သူ့သဘောထားကိုသိရပေမယ့် အနည်းဆုံး လိပ်ပြာပုံလေးတော့ ထိုးမယ် ဆုံးဖြတ်ထားတယ်...။ သေရင်ပါသွားမယ့် သူနဲ့ပတ်သက်တဲ့ အမှတ်တရတစ်ခု.....(သူစိုက်မယ့်အပင်အတွက်မြေဩဇာဖြစ်ဖို့) သူကိုးကွယ်တဲ့ ကျွန်မရဲ့ခန္ဓာကိုယ်တစ်ခြမ်းမှာ သိမ်းထားချင်တယ်.....။ 

Sai ရဲ့ သီချင်းအသစ်လေး "နှစ်လေးငါးခြောက်ဆယ်" တဲ့

ကျမတို့ လူချင်းအတူရှိမနေနိုင်ပေမယ့် သတိရခြင်းတွေ မမေ့နိုင်ခြင်းတွေ နဲ့ နှလုံးသားချင်းတော့ နှစ်လေးငါးခြောက်ဆယ်ထိ နီးစပ်နေလိမ့်ဦးမယ်လို့ ယုံကြည်ပါတယ်...။

__________________

Revolution will prevail
မိုးငွေ့

လိပ်ပြာဒိုင်ယာရီ.....(ဖရန်စစ်)

 

ပြောမယ့်သာ ပြောတာ ကျွန်မတို့နှစ်ယောက်က စရိုက်တူကြလို့လား တည့်တဲ့အချိန်တော်တော်နည်းတယ် ရန်ဖြစ်နေရတာကခပ်များများလေ....။ လူနှစ်ယောက်ဟာ အကျင့်စရိုက်တစ်ထပ်တည်းကျလွန်းအားကြီးရင်လည်း တစ်ယောက်စိတ် တစ်ယောက်သိနေ တစ်ယောက်အကြံစည် တစ်ယောက်မြင်နေရတော့ သိပ်အဆင်မပြေလှဘူး....။ ဆန့်ကျင်ဖက်လေး နဲနဲရှိနေမှ ပိုအဆင်ပြေမယ်ထင်တယ် တစ်ယောက်မသိတာကို တစ်ယောက်ဖြည့်ဆည်းပေး အဲလိုလေးဖြစ်ရမယ်ထင်တယ်....။ တကယ်တမ်း ကျွန်မသူနဲ့ အချိန်ကြာကြာမတွဲခဲ့ဖူးတော့ RS တွေရဲ့ ဘဝကို သေချာနားမလည်တာလဲဖြစ်မယ်...။ 

ကျွန်မတို့ရန်ဖြစ်ထားကြလို့ စကားမပြောဖြစ်တာတစ်ရက်တိတိ ကျွန်မဆီသူဖုန်းဆက်တာ လုံးဝမကိုင်ဘဲထားလိုက်တယ်...။ အွန်လိုင်းမှာလာပြောတော့ စိတ်တိုတိုနဲ့ သူ့ကို နားမလည်တဲ့စကားနဲ့ပြောလို့ သူကလဲ ကျွန်မနားမလည်တဲ့ စကားနဲ့ပြန်ပြောတာတဲ့ ကြည့်.....။

 

"Décrocher le téléphone ဖုန်းကိုင်လေ..."

"je suis désolé ကိုယ် တောင်းပန်ပါတယ် "

"je t'aime ကိုယ် မင်းကိုချစ်တယ် "

"Vous ne vous fâchez pas စိတ်မဆိုးပါနဲ့တော့နော် "

"Je veux te voir en colère dehors မင်း စိတ်ဆိုးနေတဲ့ရုပ် ကိုယ် အပြင်မှာမြင်ချင်တယ်"

"I don't want to show you my ugly look" ဆိုတော့ ..သူက "Tu es toujours belle pour moi  မင်းက ကိုယ့်အတွက် အမြဲလှတယ်လေ" တဲ့

"Je peux croire que je t'aime ကိုယ် မင်းကို အရမ်းချစ်တယ် သိလား "

 

အဲလိုတွေ ကျွန်မကို ပျော့ပျောင်းလာအောင် အရည်ပျော်သွားအောင် စိတ်နှလုံးကို ဆုပ်ကိုင်ဆွဲယူနိုင်စွမ်းတဲ့သူလဲ ဖြစ်တယ်....။ ရန်ဖြစ်ပြီးပြန်ချစ်တဲ့ အရသာကို သူရောကျွန်မရော မသိစိတ်ကနေ နှစ်သက်ကြလို့ထင်ပါရဲ့....။ ဟိုးအရင်ကတည်းကလည်း အဲလိုပဲ မတည့်ကြဘူး ရယ်စရာတော့ကောင်းသားပဲ မတည့်ဘဲနဲ့တွဲဖြစ်နေကြတာ....။ 

"ဟိုတလောက မင်းကိုယ့်ကို စာတစ်ပုဒ်ရေးခိုင်းတာ ဘာအကြောင်းလဲ မှတ်မိသေးလား..."

"အင်း...  အာကာသထဲက ကြယ်တွေ ဂလက်စီအကြောင်းတွေလေ....."

"မင်းကမှတ်ဉာဏ်ကောင်းတာရော..."

"ကိုယ် ခုတလော တစ်ခုခုစဉ်းစားရင် မလာတော့ဘူး  မှတ်ဉာဏ်သိပ်မကောင်းတော့ဘူး ဆံပင်တွေလဲဖြူနေပြီ ကိုယ်အသက်ကြီးပြီပဲ...." တဲ့  အသက်သုံးဆယ်ကျော်စွန်းစွန်းပဲရှိသေးတဲ့ သူက ညည်းပြတာ...။ 

ကျွန်မကသာ သူ့ကို တောင်းဆိုတတ်တာ ဟိုစာရေးပေး ဒီကဗျာရေးပေးဆိုပြီး သူက အင်း အင်းဆိုပြီး တစ်ခါမှ မရေးပေးသေးပါဘူး ခုထိတော့....။ ကျွန်မသူ့ကို စာကြွေးတောင်းတော့ ကိုယ်နဲ့မင်းနဲ့ စကားပြောထားတာတွေ မင်းကို ကိုယ်အပိုင်ပေးထားပြီးသားပဲလေ မင်းစိတ်ကြိုက်ယူသုံးပေါ့ တဲ့ ....။ လူလည်ကျတတ်တယ် သူက....။

__________________
Revolution will prevail
မိုးငွေ့

Butterfly Diary......( Round the World with you)

 

"ကိုယ်တို့ ဂရိနဲ့တူရကီအကြောင်းညကပြောပြီး မနက်ကျတော့ တီဗီမှာ ဂရိနဲ့တူရကီခေါင်းဆောင်တွေ တွေ့တဲ့အကြောင်းလာတယ်..."

" Something wrong with you"  "Surely"  လို့ ကျွန်မပြောတော့ သူကပြန်ပြောတယ် 

" You are SOMETING " တဲ့ 

"No, I am NOTHING" လို့ ကျွန်မပြန်ပြောလိုက်တယ် သူ့ကို...။ ဟုတ်တယ်လေ ကျွန်မက ကျွန်မသက်သက်ပဲ ဘာမှမဟုတ်ဘူး....သူကတစ်ခုခုဆို ကျွန်မကို Spy လိုလို ဘာလိုလို ယုန်ထင် ကြောင်ထင် ထင်လွန်းလို့....။

"တူရကီက ဥရောပ ရန်ကို အကြာကြီး ကွာကွယ်ခဲ့တယ် အရှေ့အလယ်ပိုင်းနယ်မြေတွေကို ဥရောပကိုလည်း ကျူးကျော်သေးတယ် ဂျာမန်ကိုလားမသိဘူး ရှုံးသွားလို့ မဟုတ်ရင် ဥရောပနယ်မြေအားလုံးကို သိမ်းသွားနိုင်မှာ အဲတုန်းကတော့ ပါရှန်းအင်ပါယာလို့ခေါ်မလားပဲ  အစ္စလာမ်အဖွဲ့အစည်းကို ထိန်းချုပ်ထားတာနဲ့တူတယ် စစ်အင်အားအကြီးဆုံးထဲ ပါတယ်သူက ဒါပေမယ့် ဒုတိယကမ္ဘာစစ်မှာ လစ်သွားတာပါပဲ အားလုံးက... သေချာတော့ မသိတော့ပါဘူး...." သူအကြောင်းအရာတစ်ခုခုကို ဆက်မပြောချင်တော့ရင် အဲလိုအဆုံးသတ်လေ့ရှိတယ် သေချာမသိတော့ဘူး, ထားလိုက်တော့, ထားပါတော့, အဲဒါပါပဲ, ဒီလောက်ပါပဲ...စသဖြင့်ပေါ့ ကျွန်မက အလွတ်ရနေပြီ....။ 

" မင်းက ကိုယ့်လိုပဲ ခရီးသွားရတာကြိုက်တယ်မလား ...ဟိုနေ့ကပြောသေးတယ်လေ ကိုယ်နဲ့ ခရီးတစ်ခုသွားချင်တယ်ဆို.... ကိုယ်တို့ ဂရိသွားကြမလား သင်္ဘောနဲ့လေ...."

"အင်း သင်္ဘောနဲ့ဆို အရှေ့အလယ်ပိုင်းနဲ့ အာဖရိကတိုက်အစပ်က တူးမြောင်းကနေသွားရမယ်ထင်တယ်.... အဲဒါဆို ဆိုင်းပရက်စ် တူရကီ ဂရိ အကုန်အဲနားကပဲ "လို့ ကျွန်မ ဆူးအက်တူးမြောင်းကို မြင်ယောင်လိုက်မိပြီး သူနဲ့ကျွန်မ ချက်ချင်း Google Map ဖွင့်ကြည့်လိုက်ကြတယ်....။ ငယ်တုန်းက သင်ခဲ့တဲ့ ပထဝီက ခေါင်းထဲကျန်နေသေးတာပဲ ကမ္ဘာ့မြေပုံတွေ တိုက်ကြီးခုနှစ်ခုရဲ့ မြေပုံတွေကို အကြိမ်ကြိမ်ဆွဲခဲ့ဖူးတာပဲ အဲတုန်းက.....။

"မင်းပြောတာ Suez Canal မဟုတ်လား...အီဂျစ်နိုင်ငံပိုင်နက်ထဲက ပင်လယ်နီနဲ့ မြေထဲပင်လယ်ကို ဆက်စပ်ပေးတဲ့ တူးမြောင်း... စိတ်ဝင်စားစရာပဲ အဲတူးမြောင်းကနေ  ခရီးသွားသင်္ဘောတွေ ဖြတ်မဖြတ် ကိုယ်စုံစမ်းဦးမယ်...သေချာတာကတော့ ဥရောပနဲ့အာရှကြား ရေကြောင်းပို့ဆောင်ရေးအတွက် ဖောက်ထားတာ အာဖရိကကို ကွေ့သွားစရာမလိုအောင်လေ..."

 

 

"ဂရိရဲ့ ကမ်းခြေတလျှောက်က အဆောက်အဦးတွေကို မြင်ဖူးတယ်လေ အဖြူရောင်တွေ မိုးပြာရောင်တွေ ဆေးသုတ်ထားတာ သိပ်လှတာပဲလေ... ငွေကြေးတတ်နိုင်တဲ့သူတွေ Pre Wedding ပုံတွေသွားရိုက်ကြတဲ့ နေရာတစ်ခုပဲ..... သိလား " လို့ ကျွန်မက မြေပုံကိုစိုက်ကြည့်ပြီး သူ့ကိုလှည့်မကြည့်ဘဲ အဖော်ညှိသလိုပြောလိုက်တယ်...။

"စောစောက မင်းပြောလို့ ဆိုင်းပရက်စ် တူရကီနဲ့ ဂရိ သုံးပွင့်ဆိုင်အကြောင်းလေး ပြန်သတိရတယ်... တကယ်တော့ ဆိုင်းပရက်စ်က ကျွန်းနိုင်ငံလေးပါပဲ နေထိုင်တဲ့ လူမျိုးစုက ငါးပုံမှာလေးပုံက ဂရိနွယ်ဖွားတွေ ကျန်တစ်ပုံကတော့ တူရကီနွယ်တွေ အကျယ်သိချင်ကိုယ်ပေးဖတ်မယ် မင်းသွားဖတ်ကြည့်ပေါ့..." လို့ ကမ္ဘာ့သမိုင်းနိုင်ငံရေးတွေကို ခုနောက်ပိုင်းပိုစိတ်ဝင်စားလာတဲ့သူက ကြုံရင် ကျွန်မကို အဲလိုတွေ တပိုင်းတစ ပြောပြတတ်သေးတယ်....။

ကျွန်မကိုလည်း မြန်မာပြည်မြေပုံနဲ့ ကမ္ဘာ့မြေပုံကို အကြီးဆုံးဆိုဒ်ရှိရင် ဝယ်ပေးထားဖို့ မှာလိုက်သေးတယ်...။ ရှိမှာပါ လူတစ်ရပ်စာဆိုဒ်ဆို ကောင်းကောင်းကြည့်လို့ရပြီပဲ....။ 

လောလောဆယ် ကျွန်မတို့ကမ္ဘာကြီးကို မြေပုံပေါ်ကနေ တစ်ပတ်ပတ်ကြတာပေါ့......။

_____________________
Revolution will prevail
မိုးငွေ့

Butterfly Diary.....(You are my Idol)

 

 

"ခင်ဗျားက ဘယ်ဘာသာအယူဝါဒမှမယူတော့ ကိုယ့်ကိုယ်ကို ကိုးကွယ်တဲ့သူလား..."လို့ ကျွန်မမေးတော့..."You are my idol " "ကိုယ်ကမင်းကို ကိုးကွယ်တယ်လေ..." လို့  သူပြန်ဖြေတယ်....။ သာမန်အားဖြင့် လူတွေက ကိုယ်အထင်ကြီးလေးစားရတဲ့သူ ကိုယ့်အဖေ အမေ စတဲ့သူတွေကိုသာ ကိုယ့်ရဲ့ Idol လို့ပြောလေ့ရှိတာမဟုတ်လား...။ တော်တော်များများကလည်း ကိုးကွယ်တယ်ဆိုတဲ့ စကားလုံးကို ဘာသာရေးဆိုင်ရာမှာပဲအသုံးများကြတယ် အဲမှာပဲသုံးရမယ်လို့ အရိုးစွဲလာကြတာလေ....။ 

ကျွန်မကဖြင့် သူ့ Idol ဖြစ်ဖို့ ဘာအရည်ချင်းတွေများ ပြည့်မှီနေလို့လဲ...။ 

“You  are my most beautiful someone, that’s enough for the reason " တဲ့ ....။

တွေ့လား အဲလိုတွေသူဖြေတဲ့အခါ ကျွန်မဖြင့် Roller Coaster စီးနေရသလိုပဲ ရင်ထဲ တလှပ်လှပ်နဲ့ ခံစားရတတ်တယ်...။

"မင်းရဲ့ကိုယ့်အချစ်ပေါ် ခံစားဖွင့်ဆိုချက်ကလဲ ဘယ်လိုကြီး.....လဲ ကလေးကစားကွင်းထဲ ရောက်နေသလိုပဲရော....."တဲ့ ....😄  မောင်လို့အခေါ်ခံချင်တဲ့သူက ကျွန်မနဲ့စကားပြောရင်တော့ သူ့ကိုယ်သူ "ကိုယ်"လို့အမြဲပြောတတ်တဲ့သူ…။ ကျွန်မရဲ့ Dear love ချစ်သောက တခါတရံ ချစ်ဖို့အရမ်းကောင်း...။ တခါတရံ သိပ်ရစ်တတ်ပြီးလဲ ချွဲတတ်သေးသူ...။

ဒီနေ့ ကျွန်မ အလုပ်ကိစ္စတစ်ခုနဲ့ ဘဏ်တစ်ခုရောက်နေတုန်း သူ့မက်ဆေ့လေးဖွင့်ဖတ်မိတယ်.....။  " တရေးနိုးသေးလား..." တဲ့ မနက် 4:21 မှာပို့ထားတာ....။ ခုနောက်ပိုင်း သူ့စကားကို တသွေမတိမ်းလိုက်နာဖြစ်နေတာကတော့ ညအိပ်တော့မယ်ဆို ဖုန်းပိတ်အိပ်တယ်... ဒါမှမဟုတ် Silent လုပ်ထားတာ...။ 

"မနက်က 5 နာရီနိုးတာလေ...ထုံးစံအတိုင်းပေါ့ ဆက်အိပ်လိုက်တော့ 8 နာရီထိုးရော..."

"ခင်ဗျားက အဲချိန် တရေးနိုးလာတာလား...ဒါမှမဟုတ် မအိပ်ရသေးတာလား...? "

"မင်း နိုးတဲ့အချိန်ထိ ကိုယ်မအိပ်ရသေးတာ..."

"ထင်တော့ထင်နေတယ်... ဘာလုပ်နေလို့လဲ အိပ်ရေးဘယ်ဝတော့မလဲ ခင်ဗျားကလဲ.........."

"အင်း... စာဖတ်တာများသွားတာ..."

"ခုတော့ ရေမိုးချိုးပြီး တစ်ခုခုစားထားလိုက်နော် လန်းသွားအောင်  ကျွန်မ ကတော့ဗိုက်ဆာနေပြီ ခုထိအလုပ်ကမပြီးသေးဘူး...."

"ပြီးရင် အိမ်ပြန်ထမင်းစားမှာမဟုတ်လား... ပဲနို့ဗူးဆောင်ထားလေ နောက်ဆို ဗိုက်ဆာရင် ပဲနို့သောက်"

"လက်တာဆွိုင်းလေ" တဲ့.... ချစ်ဖို့ကောင်း

"ပဲနို့မကြိုက်ဘူး...."

"အွန်း... " လို့ သူပြန်ဖြေရင် ဒီ 😏 Emoji ရုပ်ကိုသာ မြင်ယောင်ပေတော့......။

___________________
Revolution will prevail
မိုးငွေ့

Butterfly Diary…..(Sense)

 

ကျွန်မတို့ ညကောင်းကင်ကို အတူမကြည့်ဖြစ်တာကြာပြီ... လာမယ့် တနနင်္ဂနွေနေ့က ပြာသိုလပြည့်ည , လပြည့်ဝန်းကြီး ဘယ်လောက်လှလိုက်မလဲ...။ တကယ်တမ်း ကျွန်မတို့ အစောပိုင်း စကားပြောကြတုန်းက နှစ်ယောက်ဆုံဖို့ အဲဒီလပြည့်ညနေပိုင်းကိုရွေးချယ်ထားခဲ့ကြပြီးသား....  ။ အကြောင်းကြောင်းကြောင့် တစ်ပတ်စောပြီး တွေ့ဖြစ်သွားကြတယ်....။

 Marchလ 8 ရက်နေ့.....

သူကျွန်မနဲ့အတူထိုင်ချင်တယ်ဆိုတဲ့ အဖြူရောင်ကော်ဖီဆိုင်လေးမှာ ညနေပိုင်း ကျွန်မတို့ဆုံဖြစ်တယ်...။ အဲညနေက ကော်ဖီဆိုင်ရှေ့မှာ သူ့ကိုတွေ့တွေ့ချင်း ပွေ့ဖက်ထားမိတယ်...။ ဒီလိုနွေးထွေးမှုမျိုးနဲ့ ကင်းကွာခဲ့ရတာ နှစ်ပေါင်းဘယ်လောက်တောင်ကြာခဲ့ပြီလဲ....။ တကယ်က ခြေဖျားထောက်ပြီး သူ့လည်ဂုတ်ကို တွဲခိုပြီး အကြာကြီး ဖက်တွယ်ထားချင်ခဲ့သေးတာ...။ ဟိုအရင်ချိန်တုန်းက ကျွန်မကိုသူပွေ့ဖက်ထားရင် သူ့ရင်ဘတ်နားကပ်ပြီး သူ့ရင်ခုန်သံတွေကို နားထောင်ရတာ သိပ်သဘောကျတာ ကျွန်မအနားရှိနေရင် သူ့ရင်ခုန်သံစည်းချက်တွေက တဒုန်းဒုန်းနဲ့မြန်နေတတ်တယ်... အဲဒါဘာကြောင့်လဲလို့ သူ့ကိုမေးတော့ "မင်းက ကိုယ့်ကိုပြုစားထားလို့ပေါ့" လို့ သူဖြေတတ်တယ်...။ ပြီးတော့ သူဆွတ်ထားတဲ့ CK ရေမွှေးလေးကို သူ့ရင်ခုန်သံနားထောင်ရင်း ရှူရှိုက်ရတာကိုကြိုက်တယ်....။

လူနေရပ်ကွက်အလယ်ခေါင်မှာဖွင့်ထားတဲ့ ဆိုင်မို့လို့ ဂရုမစိုက်ပေမယ့်လည်း အနောက်တိုင်းဆန်တဲ့ ကျွန်မတို့အပြုမူက သူတို့အတွက် အထူးဆန်းမျက်စိနှောက်စရာဖြစ်သွားမှာစိုးလို့ ကျွန်မတို့ပွေ့ဖက်နှုတ်ဆက် နမ်းရှုံ့ခြင်းအမှုကို ဆက်မလုပ်တော့ဘဲ ဆိုင်အရှေ့  သရက်ပင်အောက်မှာ ခင်းထားတဲ့ စားပွဲလေးကိုရွေးချယ်လိုက်ကြတယ်....။ ကျွန်မတို့စကားမပြောဖြစ်သေးဘဲ မိနစ်ပိုင်းလောက် တစ်ယောက်ကို တစ်ယောက် ထိုင်ကြည့်နေခဲ့ကြတယ် .....။ 

ပြီးတော့မှ သူ ကျွန်မကိုစကားစလိုက်တာက... "ခု ဘာရေမွှေးသုံးနေလဲ" တဲ့.....

အာရုံခြောက်ပါးထဲ လုံးချာလိုက် အသက်ရှင်နေတဲ့လူတွေအတွက် အထူးသဖြင့် Relationshipတွေအတွက် ရနံ့ဟာ အရေးကြီးတဲ့ အခန်းမှာပါဝင်တယ်လို့ ကျွန်မယူဆတယ်....။ ကျွန်မကိုယ်တိုင်ကလည်း ရနံ့တစ်ခုနဲ့ပတ်သက်ပြီး Sensitive ဖြစ်လွန်းသူတစ်ယောက် ဖြစ်နေလို့ပါပဲ....။ ရနံ့တစ်ခုဟာ လွန်ခဲ့တဲ့ အချိန်တွေဆီ အတွေးတွေကို စက္ကန့်ပိုင်းနဲ့ခေါ်ဆောင်သွားနိုင်စွမ်းရှိတယ်....။ ရနံ့နဲ့ပတ်သက်ပြီး ကျွန်မစာရေးဖူးပါတယ်...။

လွန်ခဲ့တဲ့နှစ်များ ကျွန်မသူနဲ့စတွေ့တုန်းက သုံးဖြစ်ခဲ့တာ Gucci Envy Me ဆိုတဲ့ရေမွှေးပဲ သူ့အနံ့ကဆွဲဆောင်မှုရှိပြီး Sexy ကျတယ်....အခု ကျွန်မသုံးဖြစ်နေတာကလည်း Gucci ပါပဲ ဒါပေမယ့် Envy Me မဟုတ်တော့ဘူး GUCCI Bamboo  ပါ....။  သူ့ရနံ့က performance ကောင်းတယ် ဆွဲဆောင်မှုရှိတယ် ညီမျှချင်းကျတယ်လို့ ခံစားရတယ်....။ ပြန်လည်တွေ့ဆုံမှုရဲ့ ပထမဆုံး ပွေ့ဖက်နှုတ်ဆက်ခြင်းမှာ ရနံ့တစ်ခုက သူ့အတွက် နွေးထွေးတဲ့ကြိုဆိုမှု ဖြစ်သွားတာကို ကျေနပ်မိတယ်...။ 

__________________

Revolution will prevail
မိုးငွေ့

Butterfly Diary…..(Chaos theory)

သူကျွန်မကိုစတွေ့ဖူးတာ အွန်လိုင်းက ကျွန်မအကောင့်ထဲကဓါတ်ပုံတစ်ပုံကလို့ပြောဖူးတယ်...။ 

တကယ်တော့ ကျွန်မတို့နှစ်ယောက် နှစ်ပေါင်းများစွာ ဝေးကွာရာမှ ပြန်တွေ့ဆုံဖို့ သူပြောတဲ့ တောင်ထိပ်ပန်းလမ်းက Landbay Coffee မှာပဲ ညနေပိုင်း Date ဖို့ အတည်ပြုလိုက်ကြတယ်...။ 

"မင်း သေချာပြီဆို အိုကေပြီနော်"

"သေချာတယ် "

"အဲလို လုပ်ကြတာပေါ့ ကော်ဖီသောက်ပြီး လမ်းခွဲခါနီး မမြူဆွယ်နဲ့နော် ကိုယ့်ကို"

"ဟာ ..."

"ဘာ ဟာလဲ .... မင်း ကကြည့်တတ်တယ် ကိုယ့်ကိုအနေရခက်အောင်"

"ဘယ်လိုကြည့်တာလဲ..."

"မသိဘူး...အကြည့်တခုရှိတယ်လမ်းခွဲကာနီးအဲလိုကြည့်ရင် ပြန်မလွှတ်ချင်တော့ဘူး ပြီးရင် ရန်ဖြစ်ကြရတော့တာပဲ"

"အဲလိုလား  သိတောင်မသိဘူး ကိုယ့်ဘာသာကိုယ်..."

"ကိုယ်ပြောပြမယ် ကိုယ်အွန်လိုင်းမှာပထမဆုံးတွေ့တဲ့ မင်း ပုံလေသိလား အဲပုံထဲကလိုအကြည့်မျိုးနဲ့ဆင်တယ်..."

"အဲလိုမျိုးလား.... ကော်ဖီဆိုင်မှာတွေ့ရင် ကြည့်ကြည့်မယ်လေ..."

"အကြည့်က သူ့တခုတည်းတော့လာတာမဟုတ်ဘူး အဲလိုအကြည့်မျိုးကိုဖန်တီးတော့မယ်ဆိုရင် မျက်နှာပြင်တစ်ခုလုံးက အကြောတွေက ဒီဇိုင်းလိုက်ပြောင်းတယ် နှုတ်ခမ်းတို့ မျက်ခုံးတို့ အားလုံးကလိုက်ပြောင်းတာပေါ့ အော်တို ဦးနှောက်က အလိုအလျောက်ဖန်တီးနိုင်တဲ့အစွမ်းတစ်ခုပဲ..."

"ဓါတ်ပုံရိုက်တာလဲ တစ်သက်လုံးမှာ အဲတစ်ပုံပဲအဲလိုအကြည့်နဲ့ရှိတာပါ ကျန်တာက ဘယ်လိုမှ မနေတတ်မထိုင်တတ် အိုက်တင်မပေးတတ်တဲ့ပုံတွေချည်းပဲ..."

"တကယ်တော့ ထူးဆန်းတယ်နော်....မင်း သာ အဲနေ့ အဲဓါတ်ပုံမရိုက်ခဲ့ဘူးဆိုရင် အခု ကိုယ်တို့နှစ်ယောက် အခုလို စကားပြောဖြစ်ဖို့ဆိုတာ မသေချာဘူး...သိလား ကိုယ်ပြောတာ အဖြစ်ပျက်တွေကို..."

“အခု ကိုယ်ပြောတဲ့ ပုံစံမျိုးနဲ့ ပက်သက်ပြီး ပြင်သစ်တွေရိုက်တဲ့ ရုပ်ရှင်တွေ တော်တော်များများရှိတယ်အဖြစ်အပျက်တွေရဲ့ ဆက်စပ်တိုက်ဆိုင်မှုတွေ ဘယ်လိုသဘောတရားနဲ့ ထပ်ဆင်လဲဆိုတော့ မင်း ဟိုတစ်နေ့က မေးတဲ့ (Chaos Theory)ခေးအော့​သီအိုရီရဲ့ (Butterfly Effect)လိုပဲ ကမ္ဘာတခြမ်းမှာ လိပ်ပြာတစ်ကောင် တောင်ပံခတ်ခြင်းကြောင့် ကမ္ဘာတစ်ခြမ်းမှာ မုန်းတိုင်းတစ်ခုဖြစ်ပေါ်သလိုပေါ့ အဲ​နေ့က ရိုက်မိတဲ့ ဓာတ်ပုံကြောင့် ကိုယ်တို့ ပက်သက်ခဲ့ကြတယ်ပဲဆိုပါတော့"

ကျွန်မက သူမတူ ထူးခြားတဲ့စရိုက် အတွေးခေါ် အသိဉာဏ်ရှိတဲ့ယောကျာ်းကို တစ်သက်လုံးသဘောကျခဲ့တာ သူကအဲလိုယောကျ်ားမျိုး ... ဟုတ်တယ် သူကကျမသဘောကျရတဲ့ ယောကျာ်းမျိုး...။  

တခါတလေ "လူတစ်ယောက်က လူတစ်ယောက်ကိုချစ်တယ်ဆိုတာ ဘယ်လိုသိနိုင်မလဲ" ဆိုတဲ့ မေးခွန်းမျိုး ထမေးတတ်သေးတာသူက...။ သူ့လိုချစ်သူမျိုးရထားတာ ဦးနှောက်အနားမနေရတာတော့သေချာတယ် အမြဲစဉ်းစားတွေးတောရတယ် သူ့မေးခွန်းတွေကို ဖြေနိုင်ဖို့လေ...။ 

ခင်ဗျားမေးခွန်းကို ဖြေကြည့်မယ်သိလား... လူတစ်ယောက်ကတစ်ယောက်ကို ချစ်တာဘယ်လိုသိရလဲ သိပ်မခက်ဘူးလေ ... Love is in the air တဲ့ ခင်ဗျားကြားဖူးပါတယ်... ယေဘူယျ အချက်ပြ Signals ဆယ်ချက် ရေးပြမယ်... 

 

1. He is interested in Your Love

2. He knows how to make You Smile

3. He’s very thoughtful, sweet and sensitive 

4. He rings your phone without reason

5. He would like to spend more time with You

6. When you talk he looks into Your Eyes

7. He would like to know more about You 

8. He gives You lots of Cuddles and Caresses 

9. When You have a bad day He can comforts

10. He gives You Good presents

အဲအချက်တွေထဲက နံပါတ် ၈ တစ်ခုပဲ မရသေးတာလို့ ကျွန်မပြောတော့ သူက ချက်ချင်းပဲ " နံပါတ် ၈ရဲ့လိုအပ်ချက်ကို ၈ ရက်နေ့မှာလာပေးမယ် ၈ ဂဏန်းသမားဆီကို ၈ဂဏန်းသမားက " တဲ့ တွေ့လား သူဘယ်လောက် Bright ဖြစ်လဲ....။

__________________
Revolution will prevail
မိုးငွေ့

Butterfly Diary.....(Before Ten Years)

 

"Before Ten Years"  လို့  ဒီလို  ကျွန်မ နာမည်ပေးလိုက်တယ်.......

သူကြည့်တဲ့ရုပ်ရှင်ကားတွေ နားထောင်တဲ့ သီချင်းတွေ ဖတ်တဲ့စာအုပ်တွေကအစ သူ့အသက်အရွယ်နဲ့ ဟိုး ခပ်ဝေးဝေးလံလံက ခေတ်ကဟာတွေကို သွားရှာဖွေ ကြည့်ရှုလေ့လာ နားထောင်တတ်သူ....။ ပြောရမယ်ဆိုရင် ကျွန်မလောက် ရုပ်ရှင်ကြည့်တဲ့သူတောင် သူကြည့်ဖူးတဲ့ကားတွေ မကြည့်ဖူးဘူးဖြစ်နေတာ ကဲ...။ 

ကျွန်မက စာအုပ်တွေကိုတော့ ခေတ်ဟောင်းစာရေးဆရာတွေ ရေးတာပိုဖတ်ဖြစ်ပြီး ရုပ်ရှင်ကတော့ လက်ရှိစီးဆင်းနေဆဲကာလထွက်တဲ့ ဇာတ်ကားတွေ စီးရီးတွဲတွေကို ပိုကြည့်ဖြစ်တယ်....။ သီချင်းလဲအဲလိုပဲ ကျွန်မက လတ်တလော ခေတ်က သီချင်းတွေကို Joox မှာ Update နားထောင်ဖြစ်နေသလို ကျွန်မက လူငယ်ပိုဆန်ပြီး Hip Hop, R & B ဘာညာကြိုက်တတ်နေတဲ့အချိန် သူကတော့ ဟိုး သူမမွေးခင်က Jonh Lenon တို့ Air Supply တို့ Lionel Rechi တို့ သီချင်းတွေ 1990's ကသီချင်းတွေ အဲလို ပြောင်းပြန်တွေဖြစ်ပေါ့ ကျွန်မနဲ့က.....။

ခု မနေ့ညက စကားပြောရင်း ရုပ်ရှင်အကြောင်းရောက်သွားတော့ သူကျွန်မကို ရုပ်ရှင်သုံးကားကြည့်ခိုင်းတယ်..။ Director Richard Linklater ရိုက်ကူးခဲ့တဲ့ Drama Romance အမျိုးအစား ဆယ်နှစ်မှ တစ်ကားထွက်တာ 1995 မှာ " Before Sunrise "  2004 မှာက " Before Sunset " 2013 မှာ " Before Mid Night " ဆိုတဲ့ ရုပ်ရှင်ကားသုံးကား...။ ဆယ်နှစ်ပြီးတစ်ကားထွက်နေကျမို့ ပရိတ်သတ်တွေကတော့ အခုနောက်ဆယ်နှစ်ပြည့်ဖြစ်တဲ့  2022 မှာထပ်ထွက်လာမယ့် ကားကို ရင်ခုန်စောင့်မျှော်နေကြပါတယ်....။ အဲကားထဲက သရုပ်ဆောင်တွေလဲ အသက် ၅၀တွေကျော်ကုန်ပြီလေ....။ နောက်ဆုံး  2013 မှာထွက်တဲ့ " Before Mid Night " ကားလေးက ဂရိမှာသွားရိုက်ထားတာ....။ "မင်းကို နောက်ဆယ်နှစ်ပြန်တွေ့မယ်လို့ပြောသွားတာ အဲဇာတ်ကားရဲ့လွှမ်းမိုးမှုပဲ" လို့ သူပြောတယ် ပြီးတော့ သူဂရိသွားချင်တာလဲ အဲကားလေးကြောင့်လို့ တပြိုင်တည်း ကျွန်မယူဆလိုက်မိတယ်....။ ဇာတ်ကားနာမည်က စီးရီးလိုက်လေးဖြစ်နေတာဆိုတော့ ခုနောက်ဆုံးထပ်ထွက်မယ့်ကားနာမည်က " Before Dawn " များဖြစ်မလားလို့ ကျွန်မပြောတော့ သူကသဘောကျနေလေရဲ့....။

သူ့အရွယ် လူငယ်တော်တော်များများ အဲလို ခေတ်နောက်ပြန်သွား စိတ်ဝင်စားကြတာ သိပ်မရှိဘူးလေ ဒါမှမဟုတ် ကျွန်မ မသိတာလဲဖြစ်နိုင်ပါတယ်...။ အဲအကြောင်းနဲ့ပတ်သက်ပြီး ကျွန်မမေးတော့..."အစောဆုံးဇာတ်လမ်းတွေကို ရသလောက်ပြန်ကြည့်တယ်လေ ကိုယ်မမီခဲ့တဲ့ ခေတ်က ကားတွေ 1970 ရှေ့ပိုင်းအထိပဲ အဖြူအမဲတွေရောပေါ့ ဘယ်ကမလဲ 2nd World War မတိုင်ခင်က ကားတွေတောင် ကြည့်ဖူးမယ်ထင်တယ်..."

ဒါဆို ကျွန်မတို့နှစ်ယောက်ရဲ့  လိပ်ပြာစီးရီးတွဲကို Before Ten Years လို့ ဒီလို ကျွန်မ နာမည်ပေးလိုက်တယ်.....။

__________________
Revolution will prevail
မိုးငွေ့

Hello…..

 

Hello 📞!!!!

ဘယ်တော့မှ အဆက်အသွယ်မလုပ်တော့ဘူးလို့ သူထင်ထားတဲ့ ကျွန်မဆီက ဖုန်းဝင်လာတော့ သူရုတ်တရက် မှင်သက်သွားလိမ့်မယ် .....။ သူက "Who's speaking ?" လို့ ဝတ္တရားအရမေးလိုက်ပေမယ့် ကျွန်မအသံကို မှတ်မိနေသေးတယ်ဆိုတာ ကျွန်မသိတယ်... "Its me..." လို့ ကျွန်မပြန်ဖြေလိုက်တဲ့အသံကိုသူကြားတော့....အတွေးထဲမှာ ဖျတ်ခနဲ ဒါဟာ အိပ်မက်လား တကယ်ဖြစ်နေတာလားလို့ စဉ်းစားလိုက်ပုံပဲ သူတခဏငြိမ်သက်သွားခဲ့တယ်....။

အဖြစ်ပျက်ဟာ Adele ရဲ့  🎵Hello...🎶 သီချင်းထဲကနဲ့မတူဘူးလား.....?

ကျွန်မဖတ်ဖူးတာရှိတယ် 🎶 Hello...🎵 သီချင်းကို Adele သီဆိုတော့ ကမ္ဘာတစ်ဝှမ်းက ပြတ်စဲသွားကြတဲ့ ချစ်သူစုံတွဲတွေ ရည်းစားဟောင်းတွေ တော်တော်များများ ပြန်ဆုံတွေ့ပြီး တွဲဖြစ်သွားကြတယ်တဲ့.....။ အဲဒါဟာ တကယ်အမှန်လား တကယ်ပဲ Hello လို့ ထူးလိုက်တဲ့ သူ့အသံလေးတစ်ခုဟာ ကျွန်မတို့ နှစ်ယောက်ပြန်ဆုံတွေ့ဖို့ သက်ရောက်မှုတကယ်ရှိခဲ့တာလား....။

Hello !!!! ဆိုပြီး အစပြုလိုက်တဲ့ ကျွန်မတို့နှစ်ယောက်ရဲ့ ပြန်တွေ့ဆုံမှုဟာ အရင်ကထက် ပိုသိမ်မွေ့နူးညံ့ လေးနက်ပီပြင်ပြီး ပိုနက်ရှိုင်းလာတယ်.....။ ကျွန်မနဲ့ပြန်ဆုံပြီးနောက် သူ့စာမျက်နှာမှာ Lionel Riche ရဲ့ "Hello.." သီချင်းထဲက ကောင်မလေးနာမည်ကိုယူပြီး "Dear......" "ချစ်သော....." ဆိုပြီး သူရေးနေကျမဟုတ်တဲ့ စာတွေကို အခန်းဆက်လိုက် စတင်ရေးသားနေတာတွေ့ရတယ်....။ ပုံမှန်သူရေးနေကျစတိုလ်ကနေ ဆန့်ကျင်သွေဖယ်ပြီးရေးထားတာ သူအဲလောက် စိတ်ကူးကွန့်မြူးပြီး Romance ဆန်တတ်လိမ့်မယ်လို့ ထင်မထားခဲ့ဘူး...။ သူ့ရဲ့ရိုးစင်းတဲ့ စကားလုံးတွေကလည်း ချစ်စရာကောင်းလိုက်တာရော....။ ကျွန်မက ကဗျာတွေကိုချစ်ပေမယ့် ကဗျာဘယ်တုန်းကမှ မရေးတတ်ခဲ့ဘူး....။ ကျွန်မသူ့ကိုစသိတာ သူ ကဗျာဆရာပေါက်စနတစ်ယောက် အဖြစ်ကပါ...။ နောက်ပိုင်း သူ့စာမျက်နှာမှာ သူရေးနေကျပုံစံအတိုင်း ကဗျာတွေ သရော်စာတွေ အတွေးအခေါ်ပိုင်းဆိုင်ရာ ဆောင်းပါးတွေ ရေးတာများတယ်....။ 

"ဟဲလို" ကနေအကြောင်းပြုပြီး ကျွန်မရဲ့ ညပိုင်းအချိန်တွေကို သူစတင်သိမ်းပိုက်လိုက်တော့တာပဲ.....။ သူရေးတဲ့ "ချစ်သော........"ထဲကလိုပဲ ညတွေမှာ မင်းအနား မအိပ်ဘဲ အမြဲရှိနေပေးမယ်ဆိုတာမျိုးပေါ့...။သူက ကျွန်မနဲ့ စကားပြန်ပြောရလို့ ပျော်တယ်တဲ့....ပြောနေရင်း ကျွန်မအိပ်ပျော်သွားမှာ ပြန်သွားမှာကို အမြဲစိုးရိမ်ပြီး စိတ်ဖိစီးရတယ် သူ့ဘေးနားကနေ ပျောက်ပျောက်သွားမှာကို စိုးရိမ်စိတ်နဲ့ပဲ ကွိုင်တက်နေရတာတဲ့လေ....။ တွေ့လား သူပုံစံပြောင်းပြီး ကျွန်မကို ချင်းကပ်တာသေချာသွားပြီပဲ....။ သူစကားပြောကောင်းတာ ကျွန်မကို ကြွေဆင်းပျော်ဝင်အောင် လုပ်နိုင်တယ်ဆိုတာ ယုံပြီလား....။ 

အဲဒီကစပြီး ကျွန်မတို့ စကားဝိုင်းမှာ အကြောင်းအရာတော်တော်များများမထပ်အောင် မရိုးအောင်ပြောဖြစ်ကြတယ်....။ အသက်ငယ်ပေမယ့် သူပြောတာတွေက အတွေးခေါ်ပိုင်း စိတ်ပိုင်းဆိုင်ရာတွေနဲ့ စစ်ပွဲတွေအကြောင်း နိင်ငံတကာရေးရာတွေအကြောင်းများတယ် သူပြောသမျှလိုက်တွေး လိုက်စဉ်းစားရတာလဲ စိတ်ဝင်စားစရာကောင်းတယ် အသစ်တွေရတယ် သူ့ခံယူချက်အရ အရင်းမြစ်ကိုရသလောက်ယူတတ်ရမယ်ပေါ့....။ ကျွန်မကတော့ ငယ်ဘဝကနေကျောင်းပြီးတဲ့အထိ ကျွန်မဘဝရဲ့ဖြစ်စဉ်အကြောင်း ပြောဖြစ်တာများတယ် သူက ကျွန်မအကြောင်းကို အသေးစိပ် စိတ်ဝင်စားတတ်သူ ကျွန်မကိုဖန်ပြွန်သန္ဓေနဲ့မွေးပြီး ပုံသွင်းထားတဲ့သူလို့ စွပ်စွဲတတ်သူ ပြီးတော့ ကျွန်မရဲ့မွေးဇာတိထိ လက်တွေ့ကျကျသွားပြီး အရင်းအမြစ်အနေနဲ့ ကုန်ကြမ်းလည်း ယူတတ်သူလေ....။ 

အဲညမှာ.... ကျွန်မတို့နှစ်ယောက်က "နတ်သျှင်နောင်နဲ့ဓါတုကလျာ"စုံတွဲနဲ့တူတယ်ပြောတော့ သူကဟုတ်တယ် သူတို့ကို ကိုယ်သိတယ်တဲ့....။  စာတမ်းငယ်လုပ်ဖို့ကြိုးစားနေသူ နိုင်ငံတကာ ကဗျာတွေအတော်များများကိုလေ့လာ ဖတ်ရှုနေတဲ့သူတစ်ယောက်အနေနဲ့ သူသိတာကိုတော့ ကျွန်မ မအံ့ဩမိပါဘူး....။ သူတို့နှစ်ယောက်က အသက်တော်တော်ကွာကြတာလေ အခု ကိုယ်တို့နှစ်ယောက်လိုပေါ့လို့ သူပြောပြီး "ကိုယ့်အတွက်က အသက်ဆိုတာ ကိန်းဂဏန်းတစ်ခုပါပဲ"လို့ ကျွန်မကိုနှစ်သိမ့်သလိုထပ်ပြောတယ်...။ 

"ရာဇဓါတုကလျာက မြန်မာ့သမိုင်းမှာ တော်တော်လှတဲ့ ပင်တိုင်စံမင်းသမီးတစ်ပါးလို့ ကိုယ်သိထားတယ်.... ဒါပေမယ့် သူတို့နှစ်ယောက်က (၇)လလောက်ပဲပေါင်းရပြီး ဓါတုကလျာက နတ်သျှင်နောင်ကို အပြီးတိုင်ထားခဲ့တော့တာပဲ....သူသေသွားတယ်လေ.... မင်းကတော့ ကိုယ့်ကို အဲလိုမထားခဲ့ဘူးမလား"....တဲ့....။  

"ဟိတ် .... တစ်ခုရှိသေးတယ် နတ်သျှင်နောင် ဓါတုကလျာကိုစတွေ့ပြီး ချစ်ခင်စုံမက်သွားတဲ့အချိန်က သူ့အသက် ၂၃နှစ် ဓါတုကလျာက ၄၀ ရှိနေပြီ ..ကိုယ်တို့နှစ်ယောက်ဆုံတဲ့အချိန်နဲ့ တစ်ထပ်ထဲပဲရော မထူးဆန်းဘူးလား ...ကိုယ်က လူဝင်စား ရှေးဘဝ နောက်ဘဝ အဲဒါတွေ အယုံအကြည်မရှိလို့သာ ရှိရင် ကိုယ်တို့နှစ်ယောက်ဟာ နတ်သျှင်နောင်နဲ့ဓါတုကလျာ လက်သစ်လဲဖြစ်နိုင်တာပဲနော်...တွေးကြည့်ရင်"

တခါတခါ သူက ကျွန်မထက်တောင် စိတ်ကူးယဉ်ဆန်တတ်နေပြန်ရောလို့တွေးပြီး ပြုံးလိုက်မိသေးတယ်....။

"သူတို့လက်ထပ်တဲ့နေ့စွဲ ကိုယ်မှတ်မိသေးတယ် (21st March 1603).. မင်းမွေးနေ့နဲ့ သိပ်တောင်မကွာပါလား..." လို့ မှတ်ချက်ချတယ်....။ အံမယ်သူက ကျွန်မထက် နတ်သျှင်နောင်နဲ့ဓါတုကလျာအကြောင်း ပိုသိနေတယ်...။ 

ကျွန်မတို့နှစ်ယောက်စလုံးက မွေးလမတူပေမယ့် ရာသီခွင်ချင်းတူကြတယ်...ပြီးတော့ မွေးဂဏန်းလည်းတူကြတယ်...။ ဒါကြောင့် အမူအကျင့် စိတ်နေစိတ်ထား တော်တော်နီးစပ်ကြတယ်...။ တခါတလေ တူလွန်းအားကြီးရင်လဲ အတူနေလို့မရပြန်ဘူး....။ သူနဲ့စကားစပ်မိရင်းက ကျွန်မလဲ နတ်သျှင်နောင်နဲ့ဓါတုကလျာ အကြောင်း ရှာဖတ်ရဦးမယ် ပြီးတော့ သူတို့ရေးခဲ့တဲ့ ရတု ရကန်တွေ ကဗျာတွေကို ပြန်လေ့လာချင်သေးတယ်.....။ သူ့ဆီကတောင်အကူညီပြန်ယူရမယ့် သဘောမှာရှိတယ်....😊

________________________
Revolution will prevail
မိုးငွေ့