Something in the rain…..

 

မိုးထဲမှာ ဆွဲအားတစ်ခုခုရှိနေတယ် ဟုတ်တယ် ဟိုး....ကောင်းကင်ပေါ်ကနေ တိမ်တွေငွေ့ရည်ဖွဲ့ပြီး မိုးစက်မိုးပွင့်တွေအဖြစ် ရွာချပေးတဲ့ မိုးရေတွေထဲမှာ ညှို့ငင်မှုတစ်ခုရှိနေတယ် ကျမ တစ်ယောက်ထဲအတွက် လောကသဘာဝကဖန်ဆင်းပေးတဲ့လက်ဆောင်တစ်ခုပါပဲ....။ မိုးရွာထဲ ထီးဆောင်းပြီးလမ်းလျှောက်ရတာကို ကြိုက်တယ်.... မှန်းပြတင်းတွေကိုလာထိမှန်တဲ့ မိုးစက်တွေကို ထိုင်ကြည့်ပြီး ကော်ဖီသောက်ရတာကိုကြိုက်တယ် မိုးရေနဲ့အတူ လေတိုးနေတဲ့ အုန်းပင်းအုန်းလက်တွေယိမ်းထိုးနေတာကိုကြည့်ရတာ ခဲသားတိမ်တွေအလျင်စလို ရွေ့လျားနေတာကိုကြည့်ရတာ ကြိုက်တယ်....။ 

ကျမအတွက် မိုးရာသီက ပျော်ရွှင်မှု .......

ကျမအတွက် မိုးခြိမ်းသံတွေက နားဝင်ပီယံ ........

ကျမအတွက် မိုးငွေ့တွေကို ဖြတ်တိုက်လာတဲ့ လေတိုးတွေက ဂီတသံစဉ် ......

May လဟာ နှစ်တစ်နှစ်ရဲ့လတွေထဲမှာ အလှပဆုံးနာမည်ကိုပိုင်ဆိုင်ထားသလို ကျမချစ်တဲ့သူတွေအတော်များများ မွေးတဲ့လတစ်လလဲဖြစ်တယ်.....။ ပြီးတော့ ကျမချစ်တဲ့ မိုးရာသီကို ကန့်လန့်ကာစဖွင့်ပြီး ကြိုဆိုပေးတဲ့လလဲဖြစ်တယ်....။ 

မေထဲမှာ မိုးတွေရှိသလို ☔️ Something In The Rain  ☔️ မိုးထဲမှာလဲ တစ်စုံတစ်ရာရှိနေတယ် .....

May လမှာမွေးတဲ့ အိန်ဂျယ်နဲ့အတူ ချစ်တဲ့သူအားလုံး Happy Birthday ပါ...,,

Something in the rain Kdrama series ထဲက OST သီချင်းတွေကို Bonus တင်ပေးလိုက်ပါတယ်

Something in the rain MV

___________________
Revolution will prevail
မိုးငွေ့

လေနှင်ခဲ့သူ.....

 

တလောက အမှတ်တမဲ့ ဝိုင်းစုဆိုထားတဲ့ "လေနှင်ခဲ့သူ"ကို နားထောင်ရင်း ဒီသီချင်းလေးကို သိနေပါတယ်လို့ ရှာလိုက်တာ ကေအေတီရေးပြီး ပိုးရည်ဆိုခဲ့ဖူးတဲ့ သီချင်းဆိုတာ You Tube မှာတွေ့လိုက်ရတယ်....။ ပိုးရည် ဆိုတာက မဒီနဲ့ ဆိုပုံဆိုပေါက်တူတဲ့ မဒီနောက်မှာ ကေအေတီတင်ပေးလိုက်တဲ့ အဆိုတော်သစ်ကောင်မလေးပေါ့  ကြာခဲ့ပြီပဲ...။  ပိုးရည်ဆိုတာကို မေ့တောင်နေခဲ့ပြီ...ဝိုင်းစုပြန်ဆိုတာကို နားထောင်ရင်း ပိုးရည်ကို ပြန်ရှာတွေ့သွားခဲ့တာပဲ...။ အဲတုန်းက သူ့သီချင်းလေးတွေ တော်တော်များများနားထောင်ကောင်းတယ်...။

__________________
Revolution will prevail
မိုးငွေ့

Banana Diary’s (3)…..

Ingredients:

2 overripe bananas

1 banana ( for topping )

1/2 tsp lemon juice 

1 cup and + 2 tbs all purpose flour 1 cup and + 2 tbs

3/4 tsp baking powder

1/2 tsp baking soda

1 egg

1/2 cup sugar

3 drop vanilla essence

6 Tbls oil

1/4 cup butter milk (Home made butter milk 1/4 cup milk + 1/2 tsp vinegar mix and keep aside 10 mins)

Pre heat oven 170 C and grease the cake pan. Mash ripe bananas and mixed with lemon juice. Sieved all dry ingredients and set a side. In another large bowl beat the egg and sugar together until the color lighten and combine with mash banana. Put the oil, vanilla essence and butter milk (I use yogurt for mine) and mixed. Then fold the dry ingredient until combine with spatula or the electric beaten. Pour the batter in the prepare  pan. Tap 2 to 3 times to let off air bubbles. Place the slice of banana for topping. Bake in preheated oven for 55 mins until a wooden skewer inserted come out clean. Can adjust the temperature and time, due to your oven.

Recipe ကို မြန်မာစာမဖတ်တတ်တဲ့သူတွေအတွက် ဘိုလိုပဲရေးပေးလိုက်ပါတယ်...။ အရင်လုပ်ဖူးတဲ့ Moist Banana Cake အချိုးအတိုင်းကိုပဲ အပေါ်က ငှက်ပျောသီးစိပ်လေးတွေ ထပ်ထည့်လိုက်တာပဲရှိတယ် အရသာကအရင်အတိုင်း ချိုအိမွှေးမြ ပါပဲ....။ လွန်ခဲ့တဲ့ 2021 ဒီဇင်ဘာ 18th  တုန်းက အဖွားရဲ့နှစ်ပတ်လည်မှာ ကန်တော့ဖြစ်တဲ့ မုန့်လေးဖြစ်ပါတယ်...။ ဗီယက်နမ်ထုံးစံကလည်း တရုတ်နဲ့တူတူပါပဲ ဆုံးပါးသွားတဲ့ မိဘဘိုးဘွားတွေကို နှစ်စဉ်ကန်တော့တာ ဘာညာပေါ့ တကယ်ကသားယောကျ်ားတွေဖြစ်တဲ့ ဦးလေးတွေလုပ်ရမယ့်အလုပ်ပါ အဒေါ်က(ကျမငယ်စဉ်ကတည်းကျောင်းထားပေးခဲ့တဲ့အဒေါ်) သူ့မိဘကန်တော့ချင်ပေမယ့် သူ့အိမ်မှကျ ယောက္ခမဓါတ်ပုံတွေရှိလို့ ထားမရတာနဲ့ ကျမတို့အိမ်ကို အဖိုးအဖွားဓါတ်ပုံတွေလာထားတယ် အဖိုးနဲ့အဖွားနှစ်ပတ်လည်ကို ကျမတို့နှစ်စဉ်လုပ်ပေးရတယ်ပေါ့...။ ဒီလိုလုပ်ရတာက မဟာယနမို့ ဗုဒ္ဓဘာသာမလို့ဆိုပြီး ဘာမှမငြင်းလိုပါဘူး...။ ရိုးရာထုံးတမ်းဓလေ့ကို လိုက်နာတယ်ပဲ သဘောထားပါတယ်...။ တကယ်အရေးကြီးတာက ကိုယ့်ရဲ့ မိဘဘိုးဘွားတွေအသက်ရှင်စဉ်ကာလပါပဲ သူတို့ စားနိုင်သောက်နိုင်နေတုန်းမှာ မငြိုမငြင်ပဲ ကျွေးမွေးပြုစုပေးနိုင်ဖို့ပါပဲ...။ ဆုံးပါးပြီးသွားတဲ့အခါကျမှ ဟိုဟာချက်ပြီး ကန်တော့ရ ဒီဟာချက်ပြီး ကန်တော့ရတာ သိပ်တော့အဓိပ္ပါယ်မရှိဘူးမဟုတ်လား....။ ကန်တော့ပြီးတော့ အိမ်ကလူပြန်စားလို့ရတယ် ဒါပဲလေ...ဟန်ပြအလုပ်ကြီးနဲ့မတူဘူးလား....။ 

နည်းနည်းအတင်းတုတ်ဦးမယ် တလောက သူငယ်ချင်းတစ်ယောက်အမေဆုံးသွားတယ် သူတို့က မြန်မာလူမျိုးစစ်စစ်တွေ ဗုဒ္ဓဘာသာတွေ ရှေးရိုးစွဲမိသားစုတွေ...။ သူငယ်ချင်းရဲ့အစ်မတစ်ယောက်က သူ့မိခင်ကြီးအတွက် သက်ပျောက်ဆွမ်းကို ရက်လည်မတိုင်ခင်ထိ ခြောက်ရက်တိတိ သံဃာတွေကို ကပ်လှူပါတယ်ဆိုတဲ့အကြောင်း Face Book ပေါ်တင်ပါတယ်...။ ခက်တာပဲ ဒါတောင် သူတို့က ဗုဒ္ဓဘာသာဝင်တွေနော်....။ ကောင်းမှုကုသိုလ်လုပ်ပေးတာကို နားလည်ပါတယ်...။ မိခင်ကြီးအသက်ရှိစဉ်က တစ်နေ့တစ်ခါတောင် ဟင်းစားလေး မုန့်လေးလာမကျွေးနိုင်ကြဘူး ကဲ ခုသေတော့ အဲလိုလုပ်ပေးတာ သူရမရ ဘယ်မှာသိနိုင်လဲ...။ လောလောဆယ်တော့ ဖဘမှာ ငါလုပ်ပါတယ်ဆိုတဲ့ ကြွားပို့စ်လေးတစ်ခုပဲ....။ ဗုဒ္ဓဘာသာမှမဟုတ်ဘူး ဘယ်ဘာသာဝင်မဆို အလှူတစ်ခုလုပ်တာဟာ အပေါ်ယံပကာသန နဲ့ တပ်မက်မှုတွေမပါရဘူးဆိုတာ သိနေကြတာပဲ...။ စိတ်ထဲက သဒ္ဓါမွန်မြတ်ဖို့ ငွေကုန်စရာမလိုဘဲ လှူရတဲ့ အလှူတွေမှ အများကြီး စိတ်ထားတတ်ရင်ရပြီ....။ 

တစ်သက်လုံးဂျင်းထည့်ခံလာရတဲ့ ကိစ္စတွေအတော်များများ ဗူးပေါ်သလိုပေါ်လာပြီးနောက်မှာ ကျမကတော့ လက်တွေ့ကျကျကိုယ်ပိုင်ဉီးနှောက်ကနေတွေးတောဆင်ခြင်လို့ရလာတဲ့ အရာတွေကိုပဲ ယုံကြည်နိုင်တော့တယ်... ။

 

Happy Baking !!!!!

__________________

Revolution will prevail

မိုးငွေ့

Dear Angel .....(8)

 

ချစ်သော..... အိန်ဂျယ်..,

မနေ့ညက အိပ်ခါနီး မင်းနဲ့စတွေ့တုန်းက Gtalk မှာ Chat ခဲ့တာတွေကို ပြန်စဉ်းစားမိရင်း   ဒီစာကို ရေးဖြစ်သွားတာပါ....။

တကယ်တော့ မင်းနဲ့စတွေ့ခဲ့တဲ့ ၂၀၁၁ မှာ Facebook သုံးနေကြပြီ အကောင့်တွေကိုယ်စီရှိနေကြပြီဆိုပေမယ့် ကိုယ်တို့  Gtalk မှာပဲ စကားပြောဖြစ်တာများတယ်...။ Gtalk နစ်မှာ တစ်နေ့သာ Daily Quote တွေတင်ကြတဲ့ ခေတ်ပေါ့....Facebook မှာ Status တင်သလိုပေါ့....။ ကိုယ့်သူငယ်ချင်းတွေထဲမှာ မီးစိမ်းနေတာမြင်နေရပြီး လာမနှုတ်ဆက်ရင် နစ်မှာ "သတိရသေးရင်နှုတ်ဆက်ပါ"တို့ ဘာတို့ ရေးတင်တာပေါ့.....။ မင်းမှတ်မိဦးမှာပါ... တစ်နေ့..ကိုယ့်နစ်မှာ " အိန်ဂျယ်နဲ့အတူကော်ဖီသောက်နေတယ်" လို့ တင်ထားတာကို ကိုယ့် Cousin တစ်ယောက်ကလာပြီး "Wake up from your dream" လို့လာပြောတယ်....။ ကိုယ့်ကို သူက စိတ်ကူးပဲယဉ်နေတယ် အပြင်လောကနဲ့ အဆက်သွယ်ပြတ်နေတယ်ပြောချင်တာ....။ ကိုယ့် Privacy ကို အဲလို လာစွပ်ဖက်တာလောက် မကြိုက်တာမရှိဘူး ကိုယ်လဲ သူများလွတ်လပ်ခွင့်ကို မစွပ်ဖက်သလို တားမြစ်ပိတ်ပင်တာမလုပ်ဘူး.....။ ကိုယ့်အလုပ်နဲ့ ကိုယ့်ဝါသနာကို တစ်သီးတစ်သန့်စီ ခွဲထားပြီးသား ဘာမှ ကိုယ့် Personal မှာ ဆရာလာလုပ်စရာကိုမလိုဘူး...။ ကိုယ့်စိတ်ထဲရှိတာ ပြောချင်တာပြောဖို့ ရေးချင်တာရေးဖို့ Personal အကောင့်လုပ်ထားတာလေ...။ တကယ်...ပြောချင်တာက အဲဒါပဲ ခုပဲ လူတစ်ယောက်ကို အိပ်မက်ယောင်နေသူ, အပြင်လောကနဲ့လက်တွေ့ကင်းကွာနေသူတစ်ယောက်ကို အိပ်မက်ကနိုးထလိုက်တော့လို့ ကိုယ်ပြောလိုက်မိတယ်....။ ခုလိုပြောမိလို့ ကိုယ်အဲတုန်းက အပြောခံခဲ့တာကို ပြန်အမှတ်ရမိတာပါ....။  ဒီလိုပြောရတာကလဲ နှစ်ရှည်လများ လိုအပ်တာရော မလိုအပ်တဲ့အတွေးတွေရောနဲ့ အိပ်မက်ထဲလမ်းလျှောက်နေသူတစ်ယောက်ကို လှုပ်နှိုးပေးချင်တာတစ်ခုကြောင့်ပါပဲ.....။ မလိုအပ်တဲ့အရာတွေအတွက် ဦးနှောက်ကို အနားပေးစေချင်တာသက်သက်ပါပဲ ဒီလောက်ပါပဲ.....။

I miss you Angel.....

Still flying.....
Still loving.....

___________________
Revolution will prevail
မိုးငွေ့

ပိတောက်ပန်း.....

 

ဆရာဇော်ဂျီရဲ့ ပိတောက်ပန်းကိုရေးမပြမီ ဒီပိတောက်ပန်းမတိုင်ခင်တုန်းက မြန်မာကဗျာဟာ သဘာဝအကြောင်း ပန်းအကြောင်း ရာသီအကြောင်း နက္ခတ်အကြောင်း တောတောင်ရေမြေအကြောင်းကို ခပ်ရိုးရိုး ခပ်စင်းစင်းဖွဲ့သွားတဲ့ သရုပ်ပြအဖွဲ့လောက်ပဲရှိပါတယ်...။ ဦးကြော့ရဲ့ ပိတောက်ပန်းအဖွဲ့ကိုကြည့်ရင် ဒီအချက်ကို သိနိုင်ပါတယ်...။

ပိတောက်ပန်း 

လတန်းခူးပေမို့
အလှထူးပါဘိ

မြမြဖူးရယ်တဲ့ ခိုင်ရွှေဝါ ။

တကယ်တမ်းသာပ

ဘယ်ပန်းသော်စံမတူလို့

နန္ဒမူဖန်ဂူရိပ်မှာ

ပစ္စေကာချွေးတော်သိပ်ရတဲ့

အေးရိပ်ဆာယာ ။

တစ်နှစ်တွင်

သည်တစ်လသာပ

တစ်လတွင် တစ်ရက်တည်း

ခက်ခဲတဲ့ရက်ဗုဒ္ဓါ

ပွင့်ရှာကြစုံမြိုင်တွင်း ။

မြူမင်းလွင်ထန်

ကြူသင်းတာချိန်ယံမတော့

ဂိမ္မာန်လေ  ပြန်နှောက်ခဲ့ရင်

ရွှေဝတ်ဆံ

ငုံတံညှောက်ကယ်က

သိန်သရေ

ထိန်ဝေလို့တောက်တဲ့ပြင်

လမ်းတစ်လျှောက်မှာလ

ဆန်းသလောက်

မလင်းနိုင်ဘု

ပန်းပိတောက်မင်း ။   (ဦးကြော့)

ဒီကဗျာလေးကို ကျမတို့ ငယ်စဉ်က ကျောင်းမှာတောင်သင်ခဲ့ဖူးမလားပဲ မမှတ်မိတော့တာ...အထက်တန်းကျောင်းတော့ မဟုတ်လောက်ဘူး တက္ကသိုလ်တန်းမှာပါတဲ့ ကဗျာဖြစ်ဖို့များတယ်...။ ကဗျာလေးဖတ်ပြီး ကျောင်းတုန်းက မြန်မာစာအချိန်တွေကို ပြန်သတိရစေတယ် ဆရာမတွေကဗျာတစ်ပိုဒ်ရွတ်လိုက် အဓိပ္ပါယ်ရှင်းပြလိုက်နဲ့ ပြီးရင် ကဗျာကို စကားပြေပြန်ရေးရတာတွေပေါ့...။   ဦးကြော့ရဲ့ ပိတောက်ပန်းက သိပ်လှပြီး ပန်းပွင့်ရဲ့ သင်္ခါရ၊ လောကရဲ့သင်္ခါရသဘောကို ဖော်ပြတဲ့ သရုပ်ပြကဗျာကလေးတစ်ပုဒ်ပါပဲ....။

ဇော်ဂျီရဲ့ (ဆရာကြီးကို ကလောင်နာမည်ပဲပွင့်ပွင့်လင်းလင်းခေါ်ပါရစေ) ပိတောက်ပန်းကတော့ ရသသဘောတင်မကတော့ဘူး ဒဿနပါ ပါလာတယ်...။ ကျမ ကဗျာရော စကားပြေပါ ရေးပြမယ်....။

ပိတောက်ပန်း

 

မခူးချင်စမ်းနဲ့

နှစ်ဆန်းခါတော်မီလို့

ဇမ္ဗော်ရည် ပြေပြေလိမ်းကာပ

ခပ်သိမ်းနယ်စုံစုံသို့

ပွင့်ငုံကို

လင့်ကုန်ကြတော့လို့

ခေါင်းကြွက ဆာဝေဝေနဲ့

သူလည်းလေ

လောကီသားလိုပေါ့

ကြွားချင်လှပေလိမ့်မယ်..။

တစ်ပိုဒ်ချင်းဆီကို  ပြောစရာတွေရှိတယ်...။ ဒီပထမဆုံးအပိုဒ်မှာ ဇော်ဂျီရဲ့ စိတ်ရင်း စိတ်ဓါတ်ကိုမြင်လိုက်ရတယ်...။ အဲဒါတွေကတော့ ခွင့်လွှတ်ခြင်းပါပဲ....။ ခွင့်လွှတ်ခြင်းဟာ ဇော်ဂျီ့စိတ်ဓါတ်ဖြစ်တယ်...။ ပိတောက်တွေပွင့်တော့မယ် တလောကလုံး ရွှေရည်တွေဖုံးတော့မယ် ကြည့်လေရာရာမှာ ပိတောက်ငုံ ပိတောက်ဖူးတွေက သူတို့လာတော့မယ် စောင့်ကြ မျှော်ကြလို့ ကြေငြာနေတဲ့ပုံမျိုး ခေါင်းမော့ပြီး ဝေဝေဆာဆာနဲ့ ကြွားနေလေရဲ့...။  ကြွားချင်လဲ ကြွားပါစေ သူလဲလောကီသားမို့ ကြွားချင်ရှာမှာပေါ့လို့ ဇော်ဂျီက နားလည်ခွင့်လွှတ်ထားပါတယ်...။ ဒီတော့ ပိတောက်ပန်းကဗျာရဲ့ ပထမပိုဒ်ဟာ နားလည်ခွင့်လွှတ်ခြင်းကို ပြတဲ့ အပိုဒ်ဖြစ်ပါတယ်...။

တသိန်တင့်ပါဘိ

တိမ်မြင့်ရီပြာပြာက

ကြည်သာသာ

ပင့်လေအဖြူးတွင်ဖြင့်

တီတာတာ ပွင့်ရွှေဖူးငယ်တို့

လည်ယှက်ကာ ဘယ်ညာ

လူးလေတော့

သူတို့လို ဘယ်မြူးနိုင်ပါ့

ထူးပါဘိတယ်....။

ကြည့်စမ်းတဲ့...။ ဘယ်လောက်ကျက်သရေရှိသလဲ...။ ပြာရီတိမ်တိုက်တွေကြားထဲ လေပြည်လေး သုတ်လိုက်တဲ့အခါမှာ ပိတောက်ဖူး ပိတောက်ခိုင်တွေဟာ ဟိုဖက်ယိမ်းလိုက် သည်ဖက်ယိမ်းလိုက်နဲ့ ငှက်တွေ လည်ချင်းယှက်နေကြသလိုပဲ မြူးနေလိုက်ကြတာ ဘယ်လောက်မြူးနေ ရွှင်နေ ပျော်နေလိုက်ကြသလဲ သူတို့လို ဘယ်သူမြူးနိုင်သလဲ သူတို့လို ဘယ်သူပျော်နိုင်သလဲ...။ ဇော်ဂျီဟာ မြူးနေတဲ့ ပိတောက်ပန်းကို မြင်တယ်...။ ပျော်နေတဲ့ ပိတောက်ပန်းကိုမြင်တယ်...။ ပိတောက်ပန်းတွေနဲ့အတူ သူ့စိတ်ဟာ မြူးနေတယ်...။ ပိတောက်ပန်းမြူးနေတာကိုကြည့်ပြီး မုဒိတာပွားနေတယ်....။ သူတပါး ပျော်တာ မြူးတာ ချမ်းသာတာကို ကြည့်ပြီး မျှဝေခံစားတာဟာ မုဒိတာဖြစ်ပါတယ်...။ ဒါကြောင့် ပိတောက်ပန်းကဗျာရဲ့ ဒုတိယအပိုဒ်ဟာ ဇော်ဂျီရဲ့ မုဒိတာစိတ်ကို ပြနေပါတယ်...။ မုဒိတာ စိတ်ဟာလည်း ဇော်ဂျီရဲ့ စိတ်ရင်း စိတ်ဓါတ်ပဲ  ဖြစ်ပါတယ်...။

တတိယအပိုဒ်ကတော့ ဇော်ဂျီရဲ့ အကောင်းမြင်ဝါဒကို ဖော်ပြနေတဲ့ အပိုဒ်လို့ ဆိုချင်ပါတယ်...။ ဘယ်လိုများအကောင်းမြင်သလဲ...။

အဝါဝါ ဆင်သင်္ကန်းရယ်နဲ့

ကမ္ဘာမှာ ဘဝင်ချမ်းစေဖို့

သာသနာရွှင်ရွှင်လန်းအောင်လို့

တမင်မှန်းကာပ သတိဆွယ်

ရည်ရွယ်ရော့သလား...။

ပိတောက်ပန်းတွေ ဒီလောက်ဝါဝင်းထိန်နေတာ ဘာကိုရည်ရွယ်တာလဲ ဘာ့ကြောင့်လဲလို့ ဇော်ဂျီက သူ့ကိုယ်သူ ပြန်မေးပါတယ်...။ ကမ္ဘာကြီးငြိမ်းချမ်းအောင် ဗုဒ္ဓသာသနာ ရွှင်လန်းအောင် ပရိယတ္တိ, ပဋိပတ္တိ, ပဋိဝေဓ စတဲ့ သာသနာသုံးရပ်ကို ကိုးကွယ်ဆည်းကပ်ိနုင်အောင် လူတွေကို သတိပေးလှုပ်ဆော်ချင်တဲ့အတွက် ပိတောက်ပန်းတွေဟာ ဒီလောက် ဝါဝင်းနေကြတာလား ဒီလောက်ထိန်ဝေနေကြသလား လူတွေကို ကပ်သုံးပါးကကျော်လွန်နိုင်အောင် အားထုတ်ကြလို့ သတိပေးတဲ့အနေနဲ့ ဒီလိုရွှေရောင်တောက်တာများဖြစ်နေရော့သလားလို့ ဇော်ဂျီက သူ့ကိုယ်သူ ပြန်မေးပါတယ်...။ ပိတောက်ရဲ့ အဝါရောင်ထဲမှာ သင်္ကန်းကို မြင်လိုက်တဲ့ ဇော်ဂျီရဲ့ အမြင်ဟာ ငြိမ်းချမ်းမှုကို လိုလားတဲ့ ဇော်ဂျီရဲ့အမြင် ဘာသာတရားကို ကိုင်းညွှတ်တဲ့ ဇော်ဂျီရဲ့အမြင် အကောင်းအမွန်ကိုသာ ကြည့်တတ်တဲ့ ဇော်ဂျီရဲ့ အကောင်းမြင်ဝါဒကို ဖော်ပြနေပါတယ်....။

ခူးပါနဲ့ကွယ်

ပွင့်ဖူးမှာ အဝါခြယ်၍

မာလာအလယ်မှာ နွဲ့ချင်တဲ့

နှလုံးရယ်ကြောင့်

နှစ်ဆုံးကုန် အတာဝင်သို့

မာန်အင်ကို ဉာဏ်ဆင်မွေးကာပ

အရေးအခါသာမှ

ခမျာမှာ

တစ်ဂုဏ်ဆန်းရတယ်

ပိတောက်ပန်းများ....။ (ဇော်ဂျီ)

နောက်ဆုံးပိုဒ်ဟာ ဇော်ဂျီရဲ့ စာနာစိတ် ကရုဏာစိတ် သမ္ပဇဉ်စိတ်တို့ကို ပြလိုက်တဲ့ အပိုဒ်ပါပဲ...။ ရွှေရောင်ခြယ်ထားတဲ့ ပိတောက်ပန်းဟာ နှစ်ဦးမှာပွင့်တဲ့ တခြားပန်းတွေလိုပဲ ပန်းပွဲတော်ကြီးထဲ ပါချင်မှာပေါ့တဲ့...။ သွားပြီးမခူးလိုက်ပါနဲ့ သူခမျာ နှစ်ကုန်ပြီး အတာကူးချိန်မှာ ပျော်ဖို့အတွက် တစ်နှစ်လုံးစောင့်ခဲ့ရတာပါတဲ့..။ ခုလို အခွင့်အရေးကြုံမှ သူ့ဂုဏ်ပုဒ်ကလေးကို သူထုတ်ပြရတာမို့ မြူးခွင့် ဖူးခွင့် ပွင့်ခွင့် ပျော်ခွင့် ဝင်းခွင့် ဝါခွင့် ပေးလိုက်ပါလို့ ဇော်ဂျီက ကရုဏာစိတ် စာနာစိတ် သမ္ပဇဉ်စိတ်နဲ့ ပိတောက်ပန်းဖက်ကနေ ရှေ့နေလိုက်ပေးပါတယ်...။ ဒါဟာ ဇော်ဂျီရဲ့ စိတ်ရင်း စိတ်ဓါတ်ပါပဲ...။

ပိတောက်ပန်းကဗျာဟာ ၁၉၂၈ ခုနှစ်က ရေးခဲ့တဲ့ ကဗျာဖြစ်တဲ့အတွက် ခုဆိုရင် နှစ်ပေါင်း ကိုးဆယ်ကျော်နေပါပြီ...။ အနှစ်ကိုးဆယ်ကျော်ကြာသည့်တိုင် ပိတောက်ပန်းဟာ လန်းဆန်းနေတုန်း မွှေးပျံ့နေတုန်း ရွှေရောင်တောက်နေတုန်းပါပဲ...။ ဒီကဗျာဟာ မြန်မာကဗျာသစ်မှာ ပထမဆုံး ပေါ်ထွက်လာတဲ့ ကဗျာဖြစ်ပါတယ်...။ အတွေးသစ် ကဗျာသစ်ကို‌ဖော်ပြလိုက်တဲ့ ပထမဆုံးသော ခေတ်သစ်ကဗျာဖြစ်ပါတယ်...။ ဒါ့ကြောင့် ခေတ်သစ်မြန်မာကဗျာဟာ ပိတောက်ပန်းက ဆင်းသက်လာတယ်လို့ပြောချင်ပါတယ်...။

အမေရိကန် ကဗျာဆရာ ရောဘတ်ဖရော့စ်က ကဗျာဟာ ပီတိနဲ့စပြီး ပညာနဲ့ဆုံးတယ် ( Poetry begins is delight and ends in wisdom ) လို့ပြောဖူးခဲ့တာကို ဖတ်ဖူးတယ်...။ ကဗျာရေးသူအဖို့ရော ကဗျာဖတ်သူအဖို့ရော ဒီအတိုင်းပါပဲ...။ ကဗျာဆရာဟာ ခံစားချက်တစ်ခုကိုရလို့ ပီတိဖြစ်သွားတယ် ဒီတင် ကဗျာတစ်ပုဒ်ကို ကောက်စပ်လိုက်တယ် စရေးလိုက်တယ် ...။ စရေးတုန်းကတော့ ပီတိဖြစ်လို့ရေးလိုက်တာပဲ ဒါပေမယ့် ကဗျာဆုံးသွားတဲ့အခါမှာ ဉာဏ်အလင်းကို ရလိုက်တယ်...။ သမ္ပဇဉ်တရားကိုရလိုက်တယ်....။ သမ္ပဇဉ်ဆိုတာ အများအပြားကိုသိတဲ့ ပညာလို့ခေါ်တာပါ...။

ဖတ်သူအဖို့လည်း ဒီလိုပါပဲ ကဗျာတစ်ပုဒ်ကို ဖတ်လိုက်တယ် ကြည်နူးသွားတယ် ကျေနပ်သွားတယ် အားရသွားတယ် ဖတ်ရင်းဖတ်ရင်း ဆုံးသွားတဲ့အခါမှာ ဪ ဒီလိုပါလားဆိုတဲ့ အသိတရားကိုရသွားတယ် ...။ ဉာဏ်အလင်းကို ရသွားတယ်...။ ဇော်ဂျီရဲ့ ကဗျာကို ဖတ်လိုက်ရင် ဒီတိုင်းပဲခံစားရပါတယ်...။ ပိတောက်ပန်းကဗျာကို ဖတ်လိုက်ရတာမှာ ပိတောက်ပွင့်တာကိုမြင်ရတော့ ကြည်နူးတယ် ပျော်တယ် ကျေနပ်တယ် ဒါပေမယ့်အဆုံးမှာတော့ ခွင့်လွှတ်တတ်မှု မုဒိတာပွားတတ်မှု အကောင်းမြင်တတ်မှု စာနာမှု စတဲ့အသိတွေကို ရလိုက်တယ် ဒါဟာ ကဗျာကိစ္စပြီးမြောက်တာပါပဲ...။

တကယ်က ကျမဟာ ကဗျာအကြောင်း ကဂနဏသိပ်သိတာမဟုတ်သလို ရေးလဲမရေးတတ်ပါဘူး....။ ဒီလိုပဲ စိတ်ဝင်စားစရာလေးတွေကို ရှာရင်း ဖွေရင်း လေ့လာရင်း ဖတ်ရှုရင်း ကဗျာချစ်စာဖတ်သူတွေကို မျှဝေပေးချင်တဲ့ စိတ်ကြောင့် ရေးသားတင်ပြပေးတာပါ...။ ကဗျာတစ်ပုဒ်ကို အဓိပ္ပါယ်ဖွင့်ရတာနဲ့ ပန်းချီကားတစ်ချပ်ကို အဖြေဖော်ရတာ ခပ်ဆင်ဆင်တူတယ်...။ ကာယကံရှင်တွေရဲ့ဆိုလိုရင်းကို ကဗျာဖတ်သူနဲ့ ပန်းချီရှုသူတွေ နားလည်တာ တစ်ထပ်ထဲကျချင်မှကျမယ် ဒီလို တစ်ဦးတစ်ယောက်ချင်းဆီရဲ့ စိတ်ခံစားမှုကနေ ဆင့်ပွားထွက်ပေါ်လာမယ့် အနက်တွေကိုက အဆုံးစမရှိတဲ့ အနုပညာတစ်ရပ်ပဲလို့ ကျမ ယူဆထားတယ်.....။

ဝန်ခံချက် ။       ။ ဆရာ မြသန်းတင့်ရဲ့ သူ့လက်ရာ သူ့အယူအဆ သူ့စာပေ သူ့အတွေးအမြင် စာအုပ်မှ ကောက်နုတ်ရေးသားပါသည်...။ 

___________________

Revolution will prevail

မိုးငွေ့

မိုးထဲမှာ.....

မိုးကို‌ မျှော်ရတာ မျှော်ရတာ ခုတော့ သူ ရောက်လာပြီ.....။ ရာသီဉတုပူလို့ မိုးကိုမျှော်ကြသလို ကျမကတော့ မိုးကိုချစ်လို့  မိုးရွာတာကိုကြိုက်လို့ကို မျှော်ရတာပဲ....။ မိုးရွာရင် ကော်ဖီလေးတစ်ခွက်နဲ့ မိုးရာသီ သီချင်းလေးတွေ နားထောင်ရတာလောက် အရသာရှိတာ မရှိ....။ ဖီးလ်သမားဆိုတော့လဲလေ နော်....။ 

ပုလဲခေတ်တဲ့ နာမည်လေးကချစ်စရာလေး လူရောပဲ သူ့ကို ကျမ မသိဘူးဘဲ....။ သူက Doreme Girl Band ထဲက တစ်ယောက်ဖြစ်မယ်...သူ့နာမည်ဘေးမှာ ဒိုရေမီလို့ ရေးထားတာတွေ့လို့လေ သူတို့အဖွဲ့ကိုတော့ နာမည်ကြားဖူးပါတယ်....။ ပုလဲခေတ်က Single Album တွေဖြစ်တဲ့ "မိုးထဲမှာ" "အိမ်ပြန်ချင်သည်" "အပြစ်တဲ့လား" " အလွမ်းနှစ်ကူး" "မချစ်မိအောင်နေပါ့မယ်" "ငါပဲတောင်းပန်မယ်" တို့ထွက်ထားပြီးသား...။ 

မိုးရာသီရောက်ပြီဆိုတော့ ထုံးစံအတိုင်း  နားမထောင်ရသေးတဲ့ မိုးသီချင်းလေးတွေကို တင်ပေးချင်နေတာလေ....။

__________________
Revolution will prevail
မိုးငွေ့

ညနေအပြန်.....

 

ဘိုလာညိုရဲ့ စာတွေကို မိုးဆတ်ဘာသာပြန်ထားတဲ့စာအုပ် ဖတ်ပြီးသွားပြီ....။ စာအုပ်က ခပ်ပါးပါး ဝတ္ထုတို ဒါမှမဟုတ် စကားပြောအက်ဆေးလို့လဲ ပြောလို့ရမယ့်စာ ခြောက်ပုဒ်ပါတယ်...။ 

၁. မြေကမ္ဘာပေါ်က နောက်ဆုံး ညနေခင်းတွေ

၂. ပေါက်ဖတ်

၃. ချီလီ

၄. ထူးမခြားနား

၅. အပြန်

၆. ကလာရာ

အဲထဲမယ် ချီလီ, အပြန်, နဲ့ ကလာရာ အဲသုံးပုဒ်ကို ဖတ်ရတာသဘောကျတယ်....။  ဘိုလာညို နောက်ဆုံးချိန်ထိပြောင်းရွှေ့နေထိုင်ခဲ့တဲ့ စပိန်နိုင်ငံမှာ ရေးခဲ့တဲ့စာတွေလို့သိရတယ်....။  မူရင်းကိုမဖတ်ရပေမယ့်... ကမ္ဘာပေါ်ကနောက်ဆုံးညနေခင်းတွေ မှာရေးတဲ့အရေးအသားတွေဆို တိုပြတ်တဲ့ ဝါကျတွေချည်းပဲ တစ်ပုဒ်လုံးကိုဖွဲ့စည်းထားတာကို သတိထားမိတယ်...။ ချီလီကျတော့ အပြန်အလှန်စကားပြောချည်းပဲ...။ အကြိုက်ဆုံးက  The Return ဆိုတဲ့ "အပြန်"....။ ဘာသာပြန် ဝတ္ထုတွေကို ကျမ အရင်က သိပ်မဖတ်ဖူးဘူး....။ အရင်ဆရာတွေဘယ်လို ပွင့်ပွင့်လင်းလင်းဘာသာပြန်ခဲ့လဲ မသိပေမယ့် Chicken Soup တွေ ခွန်အားဖြည့်စာတွေလောက်ပဲဖတ်ခဲ့တာ...။ နောက်ပိုင်းကျတော့ ကိုယ့်ကိုဆရာလုပ်တဲ့စာတွေဖတ်ရမှာပျင်းလာတယ်....။ ကိုယ့်စိတ်ခံစားမှုကို အပြည့်အဝဖျော်ဖြေပေးနိုင်တဲ့ စာကိုပဲ ဉီးစားပေးဖတ်ဖြစ်တယ်....။ 

ခုကစပြီး ဘာသာပြန်ဝတ္ထုကောင်းကောင်းတွေကို ရှာဖတ်မယ် ပြီးတော့ ကျမမှာရှိတဲ့ အင်္ဂလိပ်ဝတ္ထုတစ်ချို့ကို ကြိုးစားပြီး ဘာသာပြန်ရေးကြည့်ဖို့ စိတ်ကူးထားတယ်....။ အရင်လို အက်ဆေးလှလှလေးတွေရေးဖို့လဲ အိုင်ဒီယာကခမ်းနေပြီဆိုတော့လေ...။ 

__________________
Revolution will prevail
မိုးငွေ့

Dear Angel…..(7)

 

ချစ်သောအိန်ဂျယ်.....,

လူတစ်ယောက်ကပြောဖူးတယ်  သူကိုယ်တိုင်ဖန်တီးထားတဲ့ ဘယ်အရာမဆို ခလုတ်တစ်ချက်နှိပ်ပြီး Delete လုပ်ပစ်တဲ့ထိ မမိုက်မဲဘူးတဲ့...။ ဒီလိုဆို ကိုယ်ကအကြိမ်ကြိမ်မိုက်မဲခဲ့တဲ့သူပဲ ကိုယ်ကိုယ်တိုင်ဖန်တီးထားတဲ့ အရာတွေကို အတော်များများဖျက်စီးခဲ့ဖူးတယ် ခလုတ်လေးတစ်ချက်နှိပ်ပြီးလဲ Delete လုပ်ခဲ့ဖူးတယ်....။ 

ကိုယ်မြတ်နိုးတဲ့အရာကိုမှပဲ ခလုတ်လေးတစ်ချက်နဲ့ ကိုယ်ဖျက်စီးပစ်ခဲ့တယ်....။ မင်းနဲ့ပတ်သက်တဲ့အမှတ်တရတွေတော့ ကိုယ်ဘာနဲ့မဆိုလဲပြီး ကာကွယ်မယ် ဘယ်တော့မှမပျောက်ပျက်အောင်ထိန်းသိမ်းမယ် Google စနစ်မပပျောက်သရွေ့ ကိုယ့်ဘလော့ရှိနေသရွေ့ ကိုယ်အသက်ရှင်သရွေ့ အိန်ဂျယ်ဆိုတာ ဘယ်တော့မှ ပျောက်ကွယ်မသွားစေရဘူး ....။

Be good enough to forgive for someone but don’t be stupid enough to trust them again. တစ်ခါသေဖူး ပျဉ်ဖိုးနားလည် ဆိုတဲ့ စကားပုံလိုပါပဲ ကိုယ့်ကိုယ်ကို အကြိမ်ကြိမ် အမှတ်ရနေစေဖို့ နောက်ထပ်မမိုက်မဲမိဖို့ ....သတိ သတိ သတိ....။

I miss you Angel .....😢

Still flying …..
Still loving ….

___________________
Revolution will prevail
မိုးငွေ့

ဆာရီဝင်္ကပါချစ်သူ OST.....

 

ဒီထိုင်းဇာတ်လမ်းတွဲလေးက One 31 တီဗီလိုင်းကနေ ဖေဖော်ဝါရီလကတည်းက လွှင့်နေခဲ့တာပါ...။ ကျမကို ဒီကားလေးကောင်းတယ် ကြည့်သင့်တယ် ဘာညာနဲ့ လင့်ခ်တွေပို့ပေးပေမယ့် ကျမက လူတွေ သည်းသည်းလှုပ်တဲ့ ဘယ်အရာကိုမဆို စိတ်မဝင်စားတတ်တဲ့ထုံးစံအတိုင်း ပေပြီးလုံးဝအဲဒီကားကိုမကြည့်ခဲ့ဘူး....။ အဲတုန်းက ဒီဆာရီချစ်သူထဲက ခေါင်းဆောင်မင်းသမီး Baifern က သူ့ဇာတ်လမ်းတွဲချည်းနှစ်ကားပြိုင်တူလွှင့်တာ နှစ်ကားလုံးရဲ့လင့်ခ် တယ်လီဂရမ်မှာ ရှိနေပေမယ့် သွားကိုမကြည့်ဖြစ်ဘူး....။ 

တစ်နေ့မှာ One 31 ကလုပ်တဲ့ အစီစဉ်တစ်ခုကိုရုတ်တရက်ကြည့်မိရင်း ဒီကားလေးရဲ့ OST သီချင်းကိုဆိုပေးခဲ့တဲ့ သူတို့ဆီက နာမည်ကြီး Klear အဖွဲ့ သီချင်းလာဆိုတာကို နားထောင်မိရင်း ဆာရီဝင်္ကဘာချစ်သူကို ကြည့်မိသွားတယ်...။ ဇာတ်လမ်းကောင်းတယ်....အိန္ဒယအနောက်မြောက်ပိုင်းမှာရှိတဲ့ မန္တရာပူရတိုင်းအကြောင်းနဲ့ပတ်သက်ပြီး သေသေချာချာလေး ဇာတ်ကိုတည်ထားတယ်...။ Klear ရဲ့ ဒီဇာတ်ကားလေးအတွက် သီချင်းစပ်ဆိုရတဲ့ နောက်ခံအကြောင်းကိုပြန်ပြောထားတာကြောင့်လည်း ကြည့်ဖြစ်သွားခဲ့တာပါတယ်...။

OST သီချင်း MV ကိုရှာကြည့်မိရင်း Klear ရဲ့ ညာဖက်လက်မောင်းရှေ့က တက်တူးလေးကို သဘောကျမိ....။

__________________

Revolution will prevail

မိုးငွေ့