နွေဦးတော်လှန်ရေး(၂၁).....

 

တစ်ခန်းရပ်.....

 

23.6.2021  မနက်မှာ Idiot  အဖွဲ့က ဝေမွန်ဦး(ခ)ရေမွန် ရုတ်တရက်ဆုံးသွားပြီလို့ ကြားရတော့ စိတ်မကောင်းဖြစ်ရတယ်....။ နောက်ပိုင်း ကျွန်မအနှစ်သက်ဆုံး Rocker အဆိုတော်ထဲမှာ သူလဲပါတယ်.....။ သူ့သီချင်းတွေကို လွန်ခဲ့တဲ့ ဆယ်နှစ်ကျော်ကတည်းက နားထောင်ခဲ့ဖူးတာ.....။ အဲဒီတုန်းက ကျွန်မဆီမှာ လက်တပြားစာ အနက်ရောင် Zen ဆိုတဲ့ Mp4 စက်ကလေးတစ်လုံးရှိတယ်....။ သီချင်းတွေကို အွန်လိုင်းကနေ ရာနဲ့ချီ Download ပြီးသိမ်းလို့ရတယ်... FM ရေဒီယိုတွေလည်း အကုန်နားထောင်လို့ရတယ်....။ အဲကတည်း... သူ့သီချင်းတွေကျွန်မဆီမှာ ရှိနေခဲ့ဖူးတယ် အိပ်ရာဝင်ချိန်တိုင်း နားထောင်ခဲ့ဖူးတယ်.....။ စာရေးနေချိန်တွေမှာလည်း နားထောင်ခဲ့ဖူးတယ်....။ ခုနောက်ပိုင်းခေတ်အဆိုတော်တွေ အများစုက ကိုယ့်သီချင်းကိုယ်ရေးကြတာများတယ်....အရင်စတူဒီယိုခေတ်ကလို တေးရေးဆရာသပ်သပ် အဆိုတော်သပ်သပ် သိပ်မရှိကြတော့ဘူး....။ ဒီထဲမှာ သီချင်းရေးတာ ရေမွန်ရေးတဲ့ သီချင်းစာသားတွေကို ကြိုက်တယ်...။ သီချင်းအကြောင်းကို အသေးစိပ်နားမလည်ပေမယ့် သီချင်းတစ်ပုဒ်ရဲ့စာသားတွေဟာ ခံစားမှုရသအပြည့်အဝနဲ့ ကဗျာတွေလို အဖွဲ့အနွဲ့လေးတွေကို သံစဉ်ထည့်ရတာ....။ 

ရေမွန်ရေးတဲ့ "တစ်ခန်းရပ်"မှာ အကြိုက်ဆုံးစာသားက .........

🎵 တစ်ယောက်တည်းနေတဲ့ အချိန် မိုးတွေရွာတော့ မလွမ်းဖို့တတ်နိုင်လား 🎵

ဒီနှစ်မိုးဟာ နာကျင်စို့နင့်မှုတွေ ကြေကွဲစရာတွေအပြည့်နဲ့ပါ.....။ မနက်လင်းလာလို့ အပြင်ကိုလှမ်းကြည့်လိုက်လို့ မိုးတွေရွာနေတာတွေ့ရင် စိုးရိမ်ဝမ်းနည်းစိတ်တွေက တရိတ်ရိတ်တက်လာရော....။ တောတွေ တောင်တွေထဲ စစ်ဘေးရှောင်နေတဲ့ တိုင်းရင်းသားတွေ ...... တော်ကြာရွာတွေကိုလာဝင်စီးခံရလို့ မီးတင်ပြာချခံရလို့ ထွက်ပြေးတိမ်းရှောင်နေကြရတဲ့ ပြည်သူတွေ.... လွတ်မြောက်နယ်မြေက တိုက်ပွဲဝင်ဖို့ ပြင်ဆင်နေကြတဲ့ ကလေးတွေကို ပြေးမြင်မိရင် ပိုလို့တောင် စိတ်မကောင်းဖြစ်ရ... ငိုရနဲ့....။   အမြဲတမ်း မိုးတွေရွာရင် ပျော်တဲ့ ကျွန်မက ခုတော့ ဒီမိုးမှာ အသည်းတွေကွဲရတယ် .....။ 

ရေမွန်ဆုံးပြီလို့ ကြားကြားချင်း Joox က In Memory Of Raymond ဆိုပြီး သူ့ရဲ့ အကောင်းဆုံးသီချင်းဆယ်ပုဒ်တင်ထားပေးတာတွေ့လို့ နားထောင်ဖြစ်ခဲ့တယ်.....။ အဲထဲမှာ တစ်ခန်းရပ်ကိုနားထောင်တဲ့အခါ heart အထိဆုံးပဲ....။ ပြီးတော့ MIR Radio မှာ တတိယအယ်လ်ဘမ်ထွက်ဖို့ကို နောက်ဆုံးအယ်လ်ဘမ်လို့မှားပြောခဲ့တာဟာ နိမိတ်တစ်ခုဖြစ်ခဲ့လိမ့်မယ်လို့ ဘယ်သူမှတွေးမိခဲ့ကြမှာမဟုတ်ဘူး...။

"သားရေမွန်အတွက် မိခင်ဖြစ်သူ ခင်မြတ်မွန်ရေးတဲ့စာ"

၈၈ဆောင်းဦး မှာမွေးဖွား

၂၁နွေဦးမှာကြွေလွင့်

အဖေကသားကို

၁နှစ်မှာစွန့်ပစ်

သားကအမေကို

၃၃ မှာထားသွား

မေကြီး..mommy ခေါ်သံ

ဘယ်တော့မှမကြားရတော့

လောကကြီးမှာအနှစ်သက်ဆုံး

အမေချက်တဲ့ဟင်းတွေ 

စားခွင့်မရတော့

ဆုံပြီးလို့ လမ်းခွဲတဲ့အခါတိုင်း

ရနေပေးနေကျ အနမ်းတွေ

ဘယ်တော့မှမရတော့

သူ့အသံအောတွေမကြားရတော့

သူ့မျက်နှာမတွေ့ရတော့

သူ့ကိုယ်လုံးကိုထိတွေ့ကိုင်တွယ်ခွင့်

မရတာ့..

အို..ကြမ္မာဆိုးရယ်

အငြှိုးကြီးပြီးရက်စက်လိုက်တာ

တစ်နှစ်သားမှာ 

fatherless ဖြစ်ရတာတင်

ဒဏ်ခတ်လို့မဝသေးဘဲ 

ဒီကလေးကသိပ်ချစ်တဲ့

ဒီကလေးကိုသိပ်ချစ်တဲ့

အမေနဲ့သေကွဲတောင်

ခွဲရသလား ?

မကျေနပ်ရင်ငါ့ကို‌ခေါ်သွားပါ

ပြုံးပြံး‌လေးလိုက်ခဲ့ပါ့မယ်

ခုတော့ ....

(ခင်မြတ်မွန်)

အောင်မြင်တဲ့အဆိုတော်တစ်ယောက်ထက် စစ်မှန်တဲ့ Artist တစ်ယောက် Musician တစ်ယောက်သာဖြစ်ချင်ခဲ့တဲ့ ဝေမွန်ဦးရေ... ရောက်တဲ့ဘဝအသစ်တစ်ခုမှာ ဖြစ်ချင်တာတွေဖြစ်ခွင့်ရပါစေ.....။

Beautiful soul!!! 

You never die in our hearts 

Rest In Power 

Legend will never die

Fly high Raymond .... 

________________________

Revolution will prevail 

မိုးငွေ့