Sun Dry Beef…..

ပြီးခဲ့တဲ့ ဖေဖော်ဝါရီလကစပြီး အမဲသားပြန်စားဖြစ်တယ်.....။  အမဲသားမစားတာ နှစ်ဆယ်ချီပြီထင်တယ်...။ ကျွန်မအကြိုက်ဆုံးအသားက ဝက်သား....။ တကယ်တမ်း ဝက်သားက လူအတွက်ဘာမှမကောင်း ....။ ဝက်သားကိုဖြတ်မယ် အသက်ငါးဆယ်လောက်ဆို သက်သတ်လွတ်စားမယ်လို့တော့ စဉ်းစားထားတာပဲ...။ တကယ်လုပ်ရင်တော့ လုပ်နိုင်ပါတယ်...။ အဲအချိန်ရောက်ရင်သိရမယ်လေ....။ လောလောဆယ် အမဲသားပြန်စားလို့ အမဲခြောက်လုပ်ဖြစ်တာလေးကို အညာသူတစ်ယောက်ဆီကရတဲ့နည်းလေး ပြန်ပြောပြချင်လို့ပါ....။ 

နွေနေက ပြင်းတော့ အသားက နှစ်ရက်နဲ့ခြောက်ကတောက်ပဲ.....။ ကုလားတန်းက မူဆလင်အသိတစ်ယောက်ကို အမဲသားတစ်ပိဿာမှာလိုက်တယ် တစ်သောင်းခွဲပေးရတယ်....။ ကျွန်မတို့နားကဈေးမှာဆို နှစ်သောင်းလောက်ပေးရမယ်ထင်တယ် အမဲသားသည်ကလဲ တစ်ဆိုင်ထဲရှိတာပါ....။ အမဲတစ်ပိဿာမှာ အရွက်အကြောပါတဲ့နေရာတွေကိုဖယ်ထုတ်လိုက်တော့ ၇၀-၇၅ကျပ်သားလောက်ကျန်မယ်ထင်တယ်...။ ကျန်တဲ့ အရွတ်အကြောပါတဲ့အသားတွေကို အနေတော်တုံးပြီး ဆား ဆနွင်း မဆလာ သံပုရာသီး တစ်စိပ်ညစ်ထည့် ဂျင်း ကြက်သွန်ဖြူထောင်းအရည်ညစ်ထည့်ပြီး နယ်နှပ်ထားလိုက်တယ်....။ ကျန်တဲ့အသားတွေကို နေလှန်းဖို့အမြှောင်းရှည်ရှည်တစ်လက်မလောက်အထူလှီးပြီး ပါဝင်ပစ္စည်းတွေနဲ့နယ်လိုက်တယ်... တစ်ညသိပ်ပြီး မိုးလင်းတော့ ဝရံတာမှာ သုံးဆင့်ဇကာနဲ့လှမ်းလိုက်တယ် စကောနဲ့ဆို ငှက်စာဖြစ်သွားမယ်လေ...။

အမဲသား          ၇၀-၇၅ ကျပ်သား

ဆား                လက်ဖက်ရည်ဇွန်းတစ်ဇွန်း

ငံပြာရည်         ထမင်းစားဇွန်း နှစ်ဇွန်း

သံပုရာသီး      တစ်လုံးခွဲ

နနွင်း               လက်ဖက်ရည်ဇွန်း တစ်ဇွန်း

ငရုတ်သီးမှုန့်   ထမင်းစားဇွန်း တစ်ဇွန်း (မထည့်လည်းရ)

နေပြင်းပြင်းမှာ နှစ်ရက်လောက်လှန်းတာနဲ့ အာလုံးခြောက်သွားပြီ....။ လေလုံတဲ့ ဗူးထဲထည့်ပြီး ရေခဲ ခဲခန်း မဟုတ်ရင် ပုံမှန်အခန်းထဲထည့်သိမ်းထားပါ....။ ခဲခန်းထဲထည့်တာကတော့ မစားဖြစ်သေးလဲ မှိုမတက်ဘူးပေါ့...။ ပုံမှန်အအေးခန်းကတော့ ရေငွေ့ပျံပြီး မှိုလိုက်တတ်ပါတယ်....။ အရမ်းခြောက်နေတဲ့အတွက် ဒီတိုင်းမီးဖုတ်တာထက် ၁၀မိနစ်လောက်ပေါင်းပြီး မီးပြန်ဖုတ်စားရင် ဂွတ်ရှယ်ပါလို့ပြောပါရစေ....။ ကိုယ့်စိတ်ကြိုက်အရသာထည့်ထားတာမို့ အငံမကဲဘဲ(အသားခြောက်ဟူသမျှ အထားခံအောင် ဆားပိုထည့်ရတာပေမယ့်) အနေတော်လေးနဲ့စားကောင်းတယ်...။ ထုထောင်းမျှင်ပြီး ဆီလေးဆမ်း ထမင်းပူပူနဲ့စားစား မနက်စာထမင်းကြော်နဲ့စားစား နေ့လယ်နေ့ခင်းအကြမ်းရည်နဲ့သောက်သောက် ညဦးပိုင်း အမြည်းပဲလုပ်လုပ် အဆင်ပြေပါတယ်လို့.....။ ကျွန်မကတော့ အဲနေ့က မီးဖုတ် ထုထောင်းပြီး တခါထဲ ကောက်ညှင်းပေါင်းပူပူနဲ့ ရှမ်းငရုတ်သီးထောင်းနဲ့ စားပါတယ်....။ 

သတိထားရမယ့်အချက်ကတော့ နေပူလှန်းမယ့်နေ့မှာ မိုးအုံ့နေရင်တော့ ဆက်မလှန်းပါနဲ့ အသားတွေပျက်သွားပါလိမ့်မယ် အဲလိုနေရောင်ကောင်းကောင်းမရရင် အပူချိန် ၁၁၀ လောက်နဲ့ Oven ထဲသာထည့်လိုက်ပါ .....။ အသားခြောက်သွားတဲ့အထိ လိုအပ်ရင် အချိန်ထပ်တိုးပါ....။ 

________________________

Revolution will prevail

မိုးငွေ့

ဆယ်စုနှစ်တာ မှတ်ဉာဏ်......(၁)

 

ကလေးဘဝမှတ်ဉာဏ်ဆိုတဲ့ ပို့စ်အဟောင်းကိုပြန်ဖတ်ပြီး ကျွန်မ လွန်ခဲ့တဲ့နှစ်တွေမှာ ဘာတွေမှတ်မိနေခဲ့လည်း ဘာတွေရေးဖို့ကျန်နေခဲ့သေးလည်းလို့ အပြေးအလွှားတွေးတောကြည့်တော့ 2000-2010 ဆယ်စုနှစ်ရဲ့ အဖြစ်ပျက်တွေအကြောင်း ကျွန်မဘလော့မှာ သိပ်မရေးဖြစ်ခဲ့ဘူး....။ တစ်ခါတုန်းက တက္ကသိုလ်မှာ ခေါင်းစဉ်နဲ့ ရေးတဲ့စာတွေက 1990-1999 ထိ အဖြစ်ပျက်တွေများပါတယ်.... ကျောင်းတက်တုန်းကအကြောင်းရေးရတာလည်း ပျော်စရာကောင်းတယ်လေ ဘာပဲဖြစ်ဖြစ် ကောင်းတဲ့ Memory တွေကို ရေးရတာ လူတွေပိုအားသန်ကြတာ ထုံးစံပါပဲ....။

2000-2010 ဆယ်စုနှစ်တာ အဖြစ်ပျက်တွေက ပြန်စဉ်းစားကြည့်တော့ ဆင်တူနေ့လရက်တွေ များခဲ့လို့ မှတ်ဉာဏ်ထဲ တသီးတသန့်ရှိမနေတာလည်းဖြစ်နိုင်ပါတယ်....။ အဲဆယ်စုနှစ်အကြောင်း မှတ်မိသလောက်လေး ပြန်ရေးပြပါဆို သူ့အရှေ့သုံးနှစ်လောက်ကို ခနပြန်ဆုတ်ရလိမ့်မယ်....။ 1996 ကျောင်းသားအရေးအခင်းမဖြစ်ခင် ရက်ပိုင်းအလိုမှာ ကျွန်မ တက္ကသိုလ် တတိယနှစ် စတက်တဲ့နှစ်လည်းဖြစ်တယ်....။ နှစ်အလိုက်သာ ကြီးကြီးကျယ်ကျယ်ပြောနေရတာ တကယ်တမ်း တစ်တန်းကိုတစ်နှစ်ပြည့်အောင်မတက်ခဲ့ရပါဘူး.... ။ RC 3 မှာ Zool  ပထမနှစ်စတက်တာက ၁၉၉၅ မှာပါ ...။ ပထမနှစ်သည် Semester နဲ့ပြောရရင် နှစ်ခုစာတော့အပြည့်တက်ခဲ့ရတယ် ....။ ဒုတိယနှစ်က တစ်ခုစာပဲ ခြောက်လတက် စာမေးပွဲဖြေ နောက်တစ်တန်းတက်ဖို့စောင့်ရတယ်....။ တတိယနှစ်ကျတော့ ၁၉၉၆ စက်မှုတက္ကသိုလ်ကစတဲ့ ကျောင်းသားအရေးခင်းနဲ့ထပ်တိုးပါလေရော အောက်တိုဘာ(၂၀)ရက်နေ့ ကျောင်းတက်ရက်က မှတ်မှတ်ရရ (၁၅) ရက်ပဲရှိသေးတယ်....။ အဲနေ့ကကျောင်းရောက်တော့ ကျောင်းထဲမှာ လူတွေက စုရုံးစရုံးဖြစ်နေကြပြီ YIT အင်းစိန်ကနေ‌ ကျောင်းသားတွေ လှည်းတန်းမှာစုပြီး ကြည့်မြင်တိုင် RC3 ဖက်ကိုချီတက်လာနေကြပြီလို့ပြောတယ်....။ ရောက်လာမယ့် စစ်ကြောင်းမှာ ချီတက်မယ့်အထဲ ပါဝင်ချင်သူတွေကလဲ လက်ပတ်တွေဘာညာနဲ့ စုပြီး စောင့်နေကြပြီအဆင်သင့်....။ ကိုယ်တွေက ကျောင်းထဲဝင်မရ ကျောင်းရှေ့က Sweet ကော်ဖီဆိုင်ရှေ့မှာ အခြေအနေကို ရပ်စောင့်ကြည့်နေသေးတယ်....။  စက်မှုကျောင်းသားတွေ အုပ်လိုက်တန်းလိုက်ရောက်လာချိန်မှာပဲ ခဏစောင့်ကြည့်ပြီး အိမ်ပြန်သွားခဲ့တယ် အကြောင်းရင်းက ဗိုက်နာလာလို့....။ စိတ်လှုပ်ရှားရင် ဗိုက်နာတတ်တဲ့အကျင့်က ရှိနေတာကိုး....။ 

ဒီဇင်ဘာ (၉)နေ့မှာပဲ အစိုးရက ကျောင်းပိတ်ရက်ရှည်ကြီး စတင်ကြေငြာလိုက်ပါတော့တယ်....။ ခုနှစ်တန်းနှစ်တုန်းကလဲ ရှမ်းပြည်ကနေ တစ်နှစ်မဖြေဘဲ ပြည်မကြီးကိုရောက်လာ ... မန္တလေး (၁၂)ကျောင်းမှာ သုံးလတက်ပြီး ၈၈ အရေးခင်းဖြစ် ခုနှစ်တန်း တစ်နှစ်ထပ်အောက်....။ ရန်ကုန်လသာ(၂)မှာ တစ်ခါ ခုနှစ်တန်းကို ပြန်စတက်ရ...။ ဆယ်တန်းအောင်တော့လဲ တက္ကသိုလ်ကို တန်းမသွားရသေးဘူး စီနီယာလိုက်စောင့်ရသေးတယ်....။ ၁၉၉၃ မှာဆယ်တန်းအောင်ပေမယ့် တကယ်တန်း တက္ကသိုလ်ပထမနှစ်ကို ၁၉၉၅ မှတက်ရတယ် ကြားထဲမှာ နှစ်နှစ်နားနေရတယ် အဲချိန်မှာ KMD မှာ ကွန်ပြူတာသင်တန်းတက် ဆရာကြီး လူထုဦးစိန်ဝင်းဆီမှာ အင်္ဂလိပ်စာတက် BC မှာ Library ကဒ်လုပ် စာသွားဖတ် American Center ပဲခူးကလပ်မှာလည်း Library ကဒ်လုပ် ရုပ်ရှင်တွေသွားကြည့် စာအုပ်ငှား စတာတွေကိုလုပ်ပြီး အချိန်နှစ်နှစ်ကိုကုန်လွန်စေခဲ့တယ်....။

၁၉၉၆ ဒီဇင်ဘာ(၉)ကနေ ပိတ်လိုက်တဲ့ကျောင်းပိတ်ရက်ရှည်ဟာ ၁၉၉၉-၂၀၀၀ ခုနှစ်ကျမှပဲ တတိယနှစ်စာမေးပွဲကို သက်ဆိုင်ရာ မိမိမြို့နယ်မှာရှိတဲ့ အ ထ က ကျောင်းတွေမှာဖြေကြဖို့ဖြစ်လာခဲ့တယ်....။ အဲချိန်တုန်းက ကျွန်မက လမ်းမတော်မြို့နယ်ကမို့လို့ လမ်းမတော် စိန်ဂျွန်းကျောင်းမှာသွားဖြေရပါတယ်....။ တတိယနှစ်ကို စာတွေ့ လက်တွေ့ဘာနကန်းတစ်လုံးမှမသိဘဲ စာမေးပွဲသွားဖြေရပါတယ်...။ Open Book စနစ်နဲ့ပါ....။ စဉ်းစားကြည့် စာမေးပွဲဖြေဆိုချိန် နှစ်နာရီအတွင်း စာအုပ်ဖွင့်ဖြေရတာတောင်မှ ဘာတွေမေးပြီး အဖြေကို ဘယ်လိုရှာရမှန်းမသိပါဘူး ....။ တွေ့တဲ့စာ ချကူးရေးလိုက်တာနဲ့ အအောင်ပေးတဲ့ခေတ်ပါ....။ အဲချိန်ကစပြီး ပညာတတ်တွေ အရမ်းပေါများလို့နေပါပြီ မြန်မာပြည်ကြီးမှာ....ဆိုလိုချင်တာက စာအုပ်ကနေကူးချရတော့ အဲနှစ်မှာ Qualified ဝင်တဲ့သူတွေ Honest တန်းဝင်သွားကြသူတွေတစ်ပုံတစ်ပင်ကြီးရယ်....။ အဲလိုကျောင်းသားတွေကတော့ Main ထဲ ရန်ကုန်တက္ကသိုလ်ကြီးထဲမှာ ကျောင်းဆက်တက်ခွင့်ရကြပါတယ်....။ အဲမှာ Honest  first year, second year တက်ပြီးရင် သတ်မှတ်ထားတဲ့ အမှတ်တန်းဝင်တာနဲ့ Ph.D ကိုဆက်တက်လို့ရပါတယ်...။ ကျွန်မကတော့ သစ္စာရှိစွာ အောင်မှတ်လောက်ပဲ ကူးဖြေပြီး နောက်ဆုံးနှစ်ကို သန်လျင်, သာဝတက္ကသိုလ်ကို ရောက်သွားခဲ့ရပါတယ်....။ 

ဒီလိုနဲ့ ၁၉၉၆ ကျောင်းသားအရေးခင်းပြီးနောက် ကျောင်းပိတ်ရက်ရှည်ကြီးမှာ ကျွန်မတို့ စီးပွားရေးလေးတစ်ခုလုပ်ကြမယ်လို့ ကျွန်မနဲ့‌မေဂျာတူအတန်းတူတဲ့ ကျွန်မထက်အသက် သုံးနှစ်လောက်ကြီးတဲ့ တိုက်ကွန်ဒိုက သူငယ်ချင်းနဲ့ တိုင်ပင်ပြီး မန္တလေး ၇၈လမ်းမ ဘူတာကြီးနားက ဆိုင်ခန်းတွဲတစ်ခုမှာ တစ်ခန်းငှားပြီး "The Rays" ဆိုတဲ့ အဝတ်အစားရောင်းတဲ့ ဖက်ရှင်ဆိုင်တစ်ဆိုင်ဖွင့်ဖြစ်သွားခဲ့တယ်....။ ရန်ကုန်မှာနေပြီး ဘာကြောင့်မန္တလေးမှာသွားဖွင့်ဖြစ်လဲဆိုတဲ့အကြောင်းကတော့ နံပါတ်တစ် ရန်ကုန်ထက် ဆိုင်ခန်းခသက်သာလို့ နံပါတ်နှစ်က မန္တလေးမှာကျောင်းတက်တုန်းကနေခဲ့တဲ့ အဒေါ်ရဲ့သမီး ညီမဝမ်းကွဲကလဲ ဆိုင်မှာရှယ်ယာပါလို့ နံပါတ်သုံးကတော့ မန္တလေးဈေးကွက်ကို အဲခေတ်တုန်းက တရုတ်တွေမလွှမ်းမိုးသေးဘူး ယိုးဒယားထည်တွေ ဈေးကွက်ဝင် ရောင်းကောင်းခေတ်စားနေချိန်ဆိုပါတော့....။ ကျွန်မတို့ဆိုင်က ရန်ကုန်ကရှယ်ယာနှစ်ယောက် မန်းကနှစ်ယောက် လေးယောက်စပ်တူလုပ်ကြတာပါ....။ အဓိကအထည်ကို ရန်ကုန် FMI Center (အရင်စကော့ဈေးဘေးနားက Shopping Mall) က ဒုတိယထပ်မှာဖွင့်ထားတဲ့ ယောကျ်ားအဝတ်စားဆိုင် KSL ကိုကျော်စိုးဆီမှာယူပါတယ်....။ မဝတ်ကျတော့ KSL နောက်ကျော ဒေါင့်ခန်းမှာဖွင့်ထားတဲ့ Queen's Land မှာယူပါတယ်...။ အဲခေတ်က ဘန်ကောက်ကို ကူးချီသန်းချီ ဘယ်သူမှ သွားမဝယ်နိုင်ကြသေးပါဘူး....။ 

နောက်ပိုင်း ကျွန်မကိုယ်တိုင် တာချီလိတ်ကိုဆင်းပြီးမယ်ဆိုင်ဖက်မှာ ဂျင်းဘောင်းဘီတို့ တီရှပ်တို့ကို လက်ကားသွားယူရပါတယ်....။ ကိုယ်က အဲဖက်က ဇာတိဖြစ်နေတာရယ် ထိုင်းဘာသာစကားကိုပြောနိုင်တာရယ်ကြောင့် အဝယ်ပိုင်းတာဝန်ကိုယူလိုက်ရပါတယ်....။ မယ်ဆိုင်ကိုသွားရင် ကျွန်မတို့ တာချီလိတ်နဲ့မယ်ဆိုင်ကို ဆက်ထားတဲ့ ချစ်ကြည်ရေးတံတားမှာ ဟိုဖက်ကမ်းသွားဖို့ လဝကမှာ လက်မှတ်ဖြတ်ရတယ်....။ တံတားပေါ်မှာ ကျွန်မ ရုတ်တရက်လူတစ်ယောက်ကို ဖြတ်ခနဲတွေ့ခဲ့လိုက်တယ်....။ ကျွန်မဆယ်တန်းအောင် ၁၉၉၃ ခုနှစ် အိမ်ခနပြန်တုန်းက တာချီလိတ် စင်တင်စားသောက်ဆိုင်တစ်ခုမှာ ခင်ခဲ့တဲ့ သီချင်းအဆိုကောင်းတဲ့ ကိုညီ့ကိုတွေ့လိုက်တာပါ....။ အဲအစ်ကိုက အင်းတိုင်းရင်းသား ချောလိုက်တာဆိုတာ စတွေ့တာနဲ့ ပျော်ဆင်း....။ ဒီနေ့ထိ သူ့လောက်ချောတဲ့ ယောကျာ်းမမြင်ဖူးသေးဘူး မြန်မာပြည်မှာ....။ အင်းသားပေမယ့် ဗမာနဲနဲစပ်တယ်လို့ ကိုညီကပြောပြဖူးတယ်...။ တကယ့်အင်းသားစစ်စစ်တွေဖြစ်တဲ့ ကိုယ်မြင်ဖူးတဲ့ ကိုလေး(လေးဖြူ)တို့ ကိုငဲကြီးတို့ဆို ဘယ်မှာချောကြလို့လဲ....။ ကိုညီလို့သေချာမှတ်မိလိုက်ပေမယ့် နှုတ်မဆက်လိုက်ပါဘူး လွန်ခဲ့တဲ့ခြောက်နှစ်လောက်က ဆယ်တန်းအောင်ခါစ ချာတိတ်မလေးကို သူမှတ်မိဦးပါ့မလား....။ ဘာပဲဖြစ်ဖြစ် ဆယ်ကျော်သက်လေးမှာ ဆုံခဲ့ဖူးတဲ့ဘဝရဲ့ သိမ်းဆည်းထားရမယ့် အမှတ်ရမှုတစ်ခုပါပဲ....။

To Be Continued 

__________________
Revolution will prevail
မိုးငွေ့

BD.....

ဘဝက ဘာမှရေရေရာရာ ဖြစ်ဖြစ်မြောက်မြောက်မဖြစ်သေးဘဲ အသက်လေးဆယ့်ခုနှစ်နှစ်ထဲရောက်သွားခဲ့ပြီ.....။ မွေးနေ့ရောက်တိုင်း စိတ္တဇတစ်ခု အမြဲရှိတယ် မွေးနေ့သိတဲ့သူတွေ Wish လှမ်းလုပ်မှာကြောက်ပြီး ဖုန်းပိတ်ထားတဲ့ကိစ္စပဲ....။ နောက်ပိုင်းနှစ်တွေမှာ မပိတ်တော့ပေမယ့် အဲအတွေးက မွေးနေ့နီးလာတိုင်း ဝင်ဝင်လာစမြဲပဲ....။ ကလေးဘဝတုန်းက အဖွားက မွေးနေ့လုပ်ရင် ရုပ်ရှင်ထဲကလို လူဆိုးတွေသေနတ်နဲ့လာပစ်လိမ့်မယ် မွေးနေ့ကိတ်ကြီးရှေ့ထား ဖယောင်းတိုင်ထွန်းပြီး သီချင်းဆိုတာကလည်း ခရစ်ယာန်တွေလုပ်တာလို့ ဆိုက်ကိုသွင်းထားခဲ့တာ....။ ဒီတော့ အသက်ကြီးလာ တွေးတောစဉ်းစားတတ်လာသည့်တိုင် ဒီဂျင်းထည့်ခံထားရတာကို အမှန်မဟုတ်မှန်းသိနေပေမယ့် ရိုက်သွင်းခံထားရတဲ့အရာကရှိနေဆဲပဲ...။ မွေးနေ့ဆို သူငယ်ချင်းတွေ ဖုန်းဆက်ပြီး ဆုတောင်းပေးမှာကိုကြောက်တယ် မွေးနေ့မှာ ကိတ်မုန့်နဲ့ဖယောင်းတိုင်ထွန်း သီချင်းဆိုတဲ့ အစဉ်အလာကိုလက်မခံနိုင်ဘူး....။ တော်သေးတယ် မွေးနေ့မှာ မိဘမဲ့ကလေးတွေ ဘိုးဘွားရိပ်သာမှာထမင်းသွားကျွေးတာတွေကိုတော့ လုပ်ခဲ့ဖူးတယ်...။ အများအတွက်အကျိုးဖြစ်ထွန်းမှာတွေကို လုပ်ဖို့စိတ်ကူးရှိခဲ့တာလေးကိုပဲ ကိုယ့်ဘာသာတွေးပြီး ပီတိဖြစ် ကျေနပ်မိပါရဲ့....။ ရုံးကလုပ်ဖော်ကိုင်ဖက်အားလုံးကို နှစ်စဉ်ရွှေရင်အေးတိုက်တဲ့ အဆင်အလာလေးတော့လုပ်ဖြစ်ပါတယ်....။ ဒီနှစ်လဲ ရွှေရင်အေးပဲတိုက်ဖြစ်တယ်....။

ဒီနေ့မှာ မွေးနေ့ဆုတောင်းမေတ္တာပို့သပေးကြတဲ့ သူငယ်ချင်း မိတ်ဆွေအားလုံးကိုလည်း ကျေးဇူးတင်ပါတယ်...။ အားလုံး ငြိမ်းချမ်းပျော်ရွှင်တဲ့အချိန် အမြန်ဆုံးရောက်ပါစေ.....။

မိုးရွှေရင်အေး မိသားစု ကနေ မှာတာပါ.... နှစ်တိုင်းရုံးကလူတွေကို တိုက်နေကျ အရမ်းကောင်း ချိုဆိမ့်မွှေး  အုန်းနို့ကလဲ မနက်ပို့ခါနီးမှ လတ်လတ်ဆပ်ဆပ်နဲ့ ရေခဲနဲ့သေချာလုပ်ပေးပါတယ်....။ လှိုင် ဘူတာရုံလမ်း ဖုန်းနံပါတ်၀၉၂၆၁၅၈၄၄၃၄ ကိုဆက်ပြီး မှာနိုင်သလို Face Book မှာ မိုးရွှေရင်အေး မိသားစုလို့ ရိုက်ထည့်ပြီး ရှာနိုင်ပါတယ်....။

________________________

Revolution will prevail

မိုးငွေ့

ရှေ့ဆက်ရန်မရှိ.....

 

ရှေ့ဆက်ရန်မရှိကို Zig ဆိုထားတာလေး You Tube မှာကြည့်မိတယ် သူငယ်ချင်းတွေနဲ့ ပျော်ပျော်ပါးပါး MV လေးရိုက်ထားတာ Drummer Bon Bon လည်းပါတယ်....။ Zig ဆိုထားတဲ့ စတိုင်လ်နဲ့ အသံအနေအထား Alex နဲ့တော်တော်တူတယ်....။ အစက အဲသီချင်းကို Alex သီချင်းအဟောင်းထဲက ပြန်ဆိုတယ်လို့ ထင်မှတ်မှားမိတယ် ...။  ဒီသီချင်းကိုတော့ နားယဉ်နေတာကိုး ဟိုနားဒီနားကြားဖူးနေတဲ့သီချင်းလေးပေါ့....။ နောက်တော့မှ ထက်သီရိဆိုတဲ့ ချာတိတ်မလေးတစ်ယောက်ဆိုထားတဲ့သီချင်းမှန်းသိတော့တယ် ချစ်စရာလေးပါ ကောင်မလေးက....။ ကလေးသံလေးတောင်မပျောက်သေးသလိုပဲ....။ သီချင်းလေးက မြူးမြူးလေး စိတ်ညစ်စရာရှိတဲ့ချိန်ဆို အသံခပ်ကျယ်ကျယ်လေးဖွင့်ပြီး ဝုန်းဒိုင်းကျဲ ခုန်ပေါက်ကလို့ကောင်းမယ့်သီချင်းမျိုးလေး....။

ခုတလော Idea တွေခမ်း Mood တွေကန်းနေလို့ ဘာစာမှရေးမရ....။ သီချင်းတွေပဲလာတင်မိ....။

 

ဦးစောဖိုးခွားရဲ့သား ZIG

အိန်ဂျယ်ကိုမမြင်ဖူးကြဘူးဆိုလို့ ဒီလိုရုပ်မျိုးလေးပေါ့

Zig ရဲ့ ဘယ်လက်ဖမိုးပေါ်က ခြင်္သေ့တက်တူးကို သဘောကျမိ

________________________

Revolution will prevail

မိုးငွေ့

ရာတန်.....

 

လွှမ်းပိုင်ကို Rap အမြန်ရွတ်ပြီးဆိုတတ်တဲ့ အဆိုတော်တစ်ယောက်အနေနဲ့ သတိထားမိပါတယ်...။ အဲဒါထက် သူရဲ့ Slow သီချင်းတွေကို ပိုနှစ်သက်မိတယ်....။ သူရေးတဲ့သီချင်းတွေမှာ သူ့ရဲ့  Rhythm & Rhyme တွေကို သဘောကျတယ်....။ တကယ်တော့ Rap ဆိုတာ သံစဉ်ထည့်ထားတဲ့ ကဗျာတစ်ပုဒ်ပါပဲ....။

♬♬ မုန်းလို့မရလို့ ချစ်နေရုံပဲ.....♬♬

___________________

Revolution will prevail
မိုးငွေ့

My girl, my Angel…..

ရက်ရှည်လာတဲ့ Guardian Angel ရဲ့  စိန်ခေါ်မှုတွေက တဖြေးဖြေး ပီပြင်လာတယ်.....။ ခွဲခြားသိမြင်နိုင်စွမ်းတွေ သတိလက်လွတ်မှုတွေကို အလင်းပြခေါ်ဆောင်ပေးတယ် ....Thank you Angel…😇

အောက်မှာ ဒီနေ့ Randy တင်ထားတာလေးကြိုက်လို့ မျှဝေပါတယ်....။ 

@@@@@@@

 💔 ဘဝမှာ လွဲသွားခဲ့တဲ့လူတွေ၊ လက်လွှတ်လိုက်ရတဲ့ အခွင့်အရေးတွေ၊ ကိုယ်ဖြစ်ချင်တာတွေ မဖြစ်လိုက်ရတဲ့ အခါတွေ ဆိုတာ အများကြီးပါပဲ ....

ဒါတွေကို လွမ်းဆွတ်တမ်းတပြီး တသသဖြစ်နေရင်တော့ နောက်ထပ် ကိုယ့်အတွက် တကယ်ကောင်းတဲ့ လူတွေ၊ အခွင့်အရေးတွေ၊ ဖြစ်ချင်တာတွေကို ထပ်ပြီး လက်လွှတ် ဆုံးရှုံးရနိုင်ပါတယ် ....

တကယ်တော့ - If a train doesn’t stop at your station, then it’s not your train. ဆိုတဲ့အတိုင်း

💔 ဒီရထားက မင်းရဲ့ ဘူတာမှာ မရပ်ဘူးဆိုရင် မင်းစီးရမဲ့ ရထားမဟုတ်ပါဘူး - တဲ့ ...

ဒီတော့ လက်မလွှတ်ချင်လို့ ကိုယ်က မကြိုးစားရတော့ဘူးလား ဆိုတော့ အပြည့်အဝကြိုးစားရမဲ့ တာဝန်ရှိပါတယ်။ ဘယ်အရာမှတော့ လွယ်လင့်တကူ မရရှိတတ်ပါဘူး။ အချိန်အတိုင်းတာ တစ်ခုထိတော့ လိုတာပေါ့။

~ Myo Thiha Kyaw ~ Randy ~

ဒါမှလဲ လက်လွှတ်ခဲ့ရသည် ရှိသော် နောင်တ တရားက ကိုယ့် စီမှာ မကျန်ခဲ့ပဲ သတိပြန်ရလိုက်တိုင်း ကိုယ်ကြိုးစားခဲ့တာပဲ ဖြစ်မှ ဖြစ်မလာတာဆိုတဲ့ ကိုယ့်ကိုယ်ကို ကျေနပ်မှုကို ရမှာပါ။

♦️ ဒီလိုမဟုတ်ပဲ ကိုယ့်ကိုယ်ကို အပြစ်တင်နေပြီး လက်လွှတ်လိုက်ရတဲ့ အရာတွေကိုပဲ Focus လုပ်နေရင် နောက်ထပ် လာမဲ့ Opportunities အခွင့်လမ်းတွေကို မြင်မှာ မဟုတ်တော့သလို အဲ့ဒီအရာတွေ အတွက် ကြိုးစားဖို့ကိုလဲ မေ့ပျောက်ပြီး ဒီလိုပဲ သံသရာလည်နေမှာပါ။

ကျနော့ဘဝမှာလဲ ဖြစ်မလာတဲ့ အရာတွေ အများကြီး ရှိပါတယ်။ ဒါပေမဲ့ ကိုယ်မကြိုးစားလိုက်လို့ " တစ်မိနစ်နောက်ကျသွားပြီ ရထားကြီးထွက်လို့ သွားပြီ " ဆိုတဲ့ နောင်တမျိုးက မရှိသလောက် ရှားပါတယ်။

♦️ ဂျက်မားလို မရခဲ့တဲ့ အလုပ်တွေ၊ မဖြစ်ခဲ့တဲ့ အရာတွေအတွက် ကိုယ့်ကိုယ်ကို သိမ်ငယ်မနေပဲ သူကြိုးစားရမဲ့ အရာတွေကိုပဲ အာရုံစိုက်ခဲ့လို့ သူ့ဘဝအတွက် တကယ့် ရထားကြီး တစ်စင်းကို ပိုင်ဆိုင်ခဲ့ပါတယ်။

ဗုဒ္ဓရဲ့ စကားနဲ့ ပြောရင်တော့ ကံမပါဘူး ... ရေစက်မရှိဘူး ... ပေါ့  ဒီလောက်ပါပဲ ...

❤️ Have a nice day … ❤️

🍀 Myo Thiha Kyaw ~ Randy 🍀

🔸 Life Coach & Spiritual Guide🔸

____________________

Revolution will prevail 

မိုးငွေ့

Banana Diary's (2).....

My version of Home Made Sun Dry Banana

ဒီတစ်ခေါက် Banana Diary's ကနေ ငှက်ပျောခြောက်လုပ်နည်းလေးတင်ပေးလိုက်ပါတယ်....။ My Version of Sun Dry Banana ပေါ့....။ ငှက်ပျောခြောက်လုပ်တာက ရခိုင်ငှက်ပျောသီးသည်အကောင်းဆုံးပါ....။ တခြားငှက်ပျော်သီးနဲ့လုပ်ကြလားတော့မသိဘူး....။ ငှက်ပျောခြောက်ကို ခရီးထွက်ရင် လမ်းမှာကားရပ်နားတဲ့အချိန်ဆို အမြဲဝယ်စားဖြစ်တယ်....။ သိပ်တော့မလတ်ဆတ်ဘူးပေါ့....။ ပုသိမ် ချောင်းသာ ငွေဆောင်သွားတဲ့ ခရီးလမ်းမှာအများအားဖြင့် ရောင်းကြတယ်...။ ငှက်ပျောခြောက်အချိုကြော် အဆိမ့်ကြော်ကတော့ နာမည်ကြီးပေါ့....။ ကျွန်မက ငှက်ပျောခြောက်ကို ဒီလိုအစိုအပျော့နဲ့ပိုကြိုက်တယ်....ဆီကြော်ထက်....။ ကျန်းမာရေးနဲ့လဲ ပိုညီညွှတ်တယ်....။ ထမင်းစားပြီး အချိုးတည်းမလား ဒီတိုင်း သရေစာအနေနဲ့စားမလား အကုန်အိုကေတယ်....။ 

ခရီးမသွားဖြစ်ရင်တော့ City Mart မှာရောင်းတဲ့ Gu Gu တံဆိပ် ငှက်ပျောခြောက်ကိုဝယ်စားလေ့ရှိတယ်....။ နောက်ပိုင်း ဈေးထဲ ငှက်ပျောသီးအုန်းနို့ပေါင်းလုပ်စားတော့ ငှက်ပျောသီးတွေပိုရင် နေလှန်းပြီးစမ်းလုပ်ကြည့်ရင်းက လုပ်တတ်သွားတာ....။ ဘာသကြား ဘာပျားရည်မှဆမ်းစရာမလိုဘူး...သူ့သဘာဝအတိုင်းချိုမွှေးလေး...။ ကိုယ်နေလှန်းမယ့် ငှက်ပျောသီးကတော့ အမှည့်ဖြစ်ဖို့လိုပါတယ်...။ တအားအမှည့်မလွန်ဘဲ အလုံးမပျက် မှည့်အိနေတဲ့ အနေအထားလောက်ပေါ့....။ ကျွန်မက အလုံးလိုက်မလှန်းဘဲ ငှက်ပျောသီးတစ်လုံးကို သုံးလွှာခွဲလွှာလိုက်တယ်....။ စကောမှာ ငှက်ပျောဖတ်မဟုတ်ရင် ဆီစုပ်စက္ကူခံပြီး နှစ်နေလောက်လှန်းပေးပါ နေအပြင်းဆုံးအချိန်မှာလှန်းပါ...။ နေမရှိတဲ့အရပ်ကဆိုရင်တော့ Oven ထဲ 100-110 ဒီဂရီလောက်နဲ့ တစ်နာရီလောက် Bake လုပ်ပေးပါ...။ ပြီးရင် ပေါင်းချောင်အိုးထဲ နာရီဝက်လောက်ပေါင်းပေးပါ ဒါဆို အရောင်ရဲရဲလှလှနဲ့ စိုအိချိုမွှေးငှက်ပျောခြောက်ပေါင်းကို အိမ်မှာ လွယ်လွယ်ကူကူလုပ်စားလို့ရပါပြီ...။ အအေးခံပြီး အလုံပိတ်ဘူးလေးနဲ့ ရေခဲသေတ္တာထဲ တစ်ပတ်ကနေ နှစ်ပတ်ထိထားပြီးစားလို့ရပါတယ်....။ နှစ်ပတ်တောင်မခံဘူးကိုယ်တွေ လုပ်ထားရင်တစ်ဘူးက နှစ်ရက်သုံးရက်ပဲ....။ BKK မှာဆို စက္ကူဘူးတွေနဲ့ ရယ်ဒီမိတ်လုပ်ရောင်းတာလဲဝယ်စားဖူးတယ် အရည်အသွေးကောင်း Packaging ဘာညာသာရကာနဲ့ဆိုတော့ ဈေးကြီးပေးဝယ်စားရတယ် ...။ ခုလို နည်းသိသွားတော့ လုပ်စားရတာလွယ်ကူတဲ့အပြင် ငှက်ပျောသီး တစ်ထောင် ထောင်ငါးရာဖိုးပဲလုပ်ဦး အများကြီးစားရတယ်....။ 

နာရီဝက်ခနပေါင်းထားတဲ့ နေလှန်းပြီးငှက်ပျောခြောက်

၁၀၀ ဒီဂရီနဲ့ တစ်နာရီလောက် Bake လုပ်ထားတဲ့ ငှက်ပျောခြောက်လှလှလေးတွေ

 

Happy Baking!!!!

_________________
Revolution will prevail
မိုးငွေ့