ဆောင်းရနံ့.....

ဆောင်းမနက်ခင်းရဲ့ နေခြည်နုနုအောက်မှာ ပန်းတွေ … ပန်းတွေ လှလိုက်တာ… အရောင်စုံအသွေးစုံ အပွင့်အခက်တွေနဲ့ လှချင်တိုင်းလှနေကြတယ်…..။ ပန်းတွေအများစုက ရှမ်းပြည်ကနေ သယ်လာရောင်းကြတာ… တချို့တွေက တိုက်ကြီး မှော်ဘီ ပဲခူး စတဲ့မြို့တွေက ခြံထွက်တွေကို ခူးယူလာရောင်းကြတယ်…။ နှင်းဆီပွင့်ကြီးတွေများ အပွင့်ကြီးကို စွံကားနေတာပဲ အပွင့်လေးကို ဇကာလေးနဲ့စွပ်ထားလိုက်သေးတယ်…။ ဘာအနံ့မှမရှိတဲ့  တရုတ်ပြည်ကလာတဲ့နှင်းဆီ… တစ်ပွင့်ကိုသုံးရာကျပ်တဲ့…။ အရိုးတုတ်တုတ်ခိုင်ခိုင်နဲ့ သုံးလေးရက် အသာလေးခံတယ်…။ ဆောင်းရာသီမှာပန်းတွေက အမျိုးပိုစုံပြီးရောက်လာကြတယ်…။ စက္ကူပန်းလို့အတွန့်လေးနဲ့ အပွင့်သေးသေးနုတ်နုတ် အရိုးပွပွကြီးကြီးတွေနဲ့ အရောင်ကနှစ်မျိုးရှိတယ် ခရမ်းပြာရောင်နဲ့ ပန်းနုရောင် ဘာပန်းခေါ်သလဲတော့မသိဘူး…ဒါလဲ တရုတ်ကလာတာနေမယ်…။ ပန်းအစစ်ပေမယ့် ပန်းခြောက်နဲ့ပိုတူနေတယ်…အရိုင်းစည်းတစ်စည်းကို လေးထောင်ကျပ်တဲ့…။ အဖြူရောင်အပွင့်သေးသေးလေးတွေနဲ့က စိန်မှုန်ပန်းတဲ့ နာမည်လေးနဲ့လိုက်အောင် ပန်းစည်းလေးကကြည့်လိုက်ရင် စိန်မှုန်လေးတွေလိုပဲလက်နေတယ်… အပွင့်ဖြူဖြူသေးသေးတွေကြားမှာ ခရမ်းရောင်အပွင့်သေးသေးတွေက ကြိုကြားကြိုကြားပွင့်နေကြတယ်….။ 

ဒီလိုပွင့်လင်းရာသီမှာ ပွဲလမ်းသဘင်တွေကလဲများသလို အလှူမင်္ဂလာပွဲတွေလည်းများတော့ ပန်းဈေးကွက်ကပိုကောင်းနေတာပေါ့…။ ကိုယ်လိုချင်တဲ့ ပန်းအမျိုးအစား အရောင်တွေကို စိတ်ကြိုက်ရွေးချယ်သုံးလို့ရတယ်လေ…။ ဂန္ဓာမာပန်းတွေကလည်း အပွင့်အရွယ်စုံ အရောင်သွေးစုံ။ ကာနေရှင်းဆိုလဲ ရောင်စုံ… လီလီ လက်ထပ်ပန်း…မြေမြို့ပန်း ဒေစီပန်း…သစ္စာပန်း…အို..အစုံအစုံပါပဲ…။

ဟိုအရင် ငယ်စဉ်တုန်းက တောင်ပေါ်ဒေသမှာနေခဲ့ဖူးတော့ ဆောင်းရာသီရဲ့ ချမ်းခိုက်တုန်အေးမှုကို ညမအိပ်နိုင်လောက်အောင် အန်တုခဲ့ရဖူးတယ်…။ ပြီးတော့ မွေးရာပါ နှာခေါင်းပေါက်တစ်ဖက်ကပုံမှန်ထက်သေးနေလို့ အသက်ရှူရတာ ပိုအားစိုက်ရတယ်… နှာခေါင်းနဲ့မလုံလောက်တဲ့အခါ ပါးစပ်နဲ့ပါရှူရတဲ့ အခါမျိုးရှိခဲ့တယ်…။ အထူးသဖြင့် ဆောင်းရာသီလိုအချိန်မျိုး နှင်းတွေပိန်းပိတ်နေအောင်ကျ နေရောင်ကိုတောင် တနေလုံးနေမှမမြင်ရတဲ့ နေ့မျိုးကို ဖြတ်သန်းရတဲ့အခါမျိုးဆို ညအိပ်ယာဝင်ဖို့တောင်ကြောက်ခဲ့ဖူးတယ်…။ အေးလွန်းလို့ နှာစေးတယ် နှာစေးတော့ နှာခေါင်းပိတ်ရော... ဒီတော့ အသက်ရှူလို့မရတော့ဘူး… ခေါင်းအုံးကို မြင့်မြင့်ခုအိပ်ရတယ်…ညသန်ခေါင်း အိပ်မောကျတော့မယ်ဆို အသက်ရှူမရလို့ ထထိုင်နေရတဲ့ညမျိုးတွေကို ဖြတ်သန်းခဲ့ရတော့ ဆောင်းရာသီကို ကိုယ်ကြောက်တတ်လာခဲ့တယ်…။ ကိုယ်အရွယ်ရောက်လာတော့ တောင်ပေါ်ဒေသကိုစွန့်ခွာပြီး မျှတတဲ့ရာသီဥတုရှိတဲ့ မြေပြန့်အရပ်ကိုလာနေရတော့ ကိုယ့်ရဲ့ ညမအိပ်ရတော့တဲ့ နှာခေါင်းပိတ်တဲ့ ဒုက္ခတော်တော်လေးကိုဝေးသွားတယ်….။ ဒီရာသီဥတုလေးနဲ့ ကိုယ်နဲ့တော်တော်အစဉ်ပြေနေတယ်… ဒီနေ့အချိန်ထိဆိုပါတော့..။ ဆောင်းရာသီကို သဘောကျမိတာက ခုလိုပန်းပွင့်ကလေးတွေ ကြွားကြွားနဲ့ဖူးပွင့်ခွင့်ရှိတာတခုထဲကိုပါပဲ…။ အေးတာကိုတော့ ကိုယ်ကကြောက်နေမိတာလေ….။

အရောင်စုံလှပကြွရွနေတဲ့ ပန်းစည်းသေးငယ်အသွယ်သွယ်ကို ကြည့်ရင်း… လွန်ခဲ့သော နှစ်နှစ်ဆယ်ကျော်တုန်းက ဆောင်းနံနက်ခင်းတွေကို သတိရမိသွားတယ်….။ ကိုယ်နေခဲ့ဖူးတဲ့ တောင်ပေါ်ဒေသမြို့ကလေးက တကယ်တော့ တောင်တွေပတ်လည်ဝိုင်းနေတဲ့ ချိုင့်ဝှမ်းဒေသလေးပါ…။ အဲဒီဒေသမှာ တောင်ပေါ်ဒေသမှာရှိတတ်တဲ့ ချယ်ရီပန်းတို့လိုပန်းမျိုးတွေ မပွင့်ပါဘူး…။ ကိုယ်မှတ်မိသလောက်တော့ စိန်ပန်းနီ စိန်ပန်းပြာပင်တွေကတော့ ကိုယ်တို့ရဲ့ အလယ်တန်းကျောင်းဝင်းထဲမှာ တော်တော်များများရှိတယ်…။ နောက်… ကိုယ်မမွေးခင်ကတည်းက ရှိနေခဲ့တဲ့ လမ်းမရဲ့ ဟိုဖက်ဒီဖက်မှာ စီတန်းနေတဲ့ လုံးပတ်ကြီးကြီး ကုက္ကိုပင်ကြီးတွေ…အဲဒီကုက္ကိုပင်ကြီးမှာ သဘာဝအလျှောက်ကပ်ပြီးပေါက်တဲ့ အ၀ါရောင် ခရမ်းရောင် သစ်ခွပန်းတွေ တွဲလောင်းလေးတွေ ပွင့်လို့ရယ်…  ။ အဲဒီဒေသမှာ ဆောင်းတွင်းဖက်ဘာပန်းတွေပွင့်သလဲ ကိုယ်သေချာမမှတ်တော့…။ ပြီးတော့ ပန်းပင်တွေ ပန်းပွင့်တွေကို စီးပွားဖြတ်စိုက်ပျိုးသူတွေလဲမရှိကြဘူး…။ 

ကိုယ်မှတ်မိတာတော့ ကိုယ်တို့အိမ်နောက်ဖေး ရေတွင်းနားမှာ… နှင်းဆီပင်တွေရှိတယ်… ပြီးတော့ ဇော်စိမ်းပန်းပင်တွေ ဒီလောက်ပဲ…။ သြော်….ပြီးတော့ အရွက်ဖားဖားနဲ့ ပိန်းရွက်ပင်တွေ ဟုတ်တယ် ဒါလောက်ပဲ…။ ဈေးထဲမှာ ဘုရားပန်းအိုးထိုးဖို့ ပန်းမရတဲ့နေ့မျိုးမှာဆို အဖွားက ဇော်စိမ်းပန်းတွေကိုပဲ ခူးဖြတ်ပြီး ကပ်လေ့ရှိတယ်…။ အဲဒီပန်းက ရေမှန်မှန်လဲပေးရင် တစ်ပတ်ဆယ်ရက်မကခံတယ်တဲ့…။ နှင်းဆီပန်းပင်တွေက ပိုးကျတယ်…။ ကိုယ်က ပိုးကောင်လေးတွေကိုကြောက်တတ်တော့… အဲအပင်နားကိုမကပ်တော့…။ မှတ်မှတ်ရရ ၂၀၀၀ခုနှစ်တုန်းက ဗယ်လင်တိုင်းနေ့ကို ပန်းစည်းရဖူးတယ်…တော်တော်လည်းလှတဲ့ ပန်းစည်းလေးပါ…။ ပန်းစည်းလေးကိုဖြေ ပန်းအိုးထိုးမယ်လုပ်တော့…လားလား… ပိုးကောင်ကြီးက တုတ်တုန်ခဲခဲကြီးနဲ့ ရိုးတံမှာကပ်နေတာစိမ်းနေတာပဲ…အဲလို…အဲလို…ကြောက်တယ်ဆို ပိုကြုံရတတ်တယ်…။

 မနက်စောစော ဈေးသွားတဲ့လမ်းတောက်လျှောက် လမ်းဘေးခြုံပင်မှာ အလေ့ကျပေါက်တတ်တဲ့ တောစံပါယ်ပန်းတွေကိုတော့ ငယ်တုန်းက ဈေးသွားတိုင်း ခူးခူးတတ်တယ်…လက်ဖ၀ါးထဲ အပြည့်အလျှံရတဲ့အထိ ခူးသွားတယ်… ဈေးထဲရောက်တော့ ဈေးသည်အဒေါ်ကြီးတွေဆီက နှီးတစ်ခုတောင်းပြီး အမျှင်သေးတောင်ခွာယူ ခူးလာခဲ့တဲ့ တောစံပါယ်ပန်းလေးတွေကိုသီလိုက်တယ်….။ အိမ်ပြန်ရောက်တော့ ဘုရားပူဇော်တယ်…။ အဲဒီပန်းလေးကိုတော့ချစ်တယ်…။ ရိုးစင်းတဲ့ဘ၀နဲ့ လုံးဝအဖြူသက်သက် ဘာပကာသနမှာမပါတဲ့ပန်းကလေး…။ သူ့ကိုဘယ်သူကမှ ပွဲလမ်းသဘင်မှာသုံးဖို့တကူးတကန့်လာပြီး မခူးယူကြဘူး….။ သူ့ဘ၀လေးကတခြားပန်းတွေနဲ့စာရင် ပိုပြီးလွတ်လပ်တယ်…။ အပင်မှာဖူးတယ် ငုံတယ် ပွင့်တယ် ဝေတယ်…အချိန်တန်တော့ကြွေတယ်…။ ပြန်တွေးမိရင်း လွမ်းမိပါတယ်လေ….။ ကိုယ်တောစံပါယ်လေးကို မြင်ခွင့်မရတာ နှစ်ပေါင်းနှစ်ဆယ်ကျော်လာခဲ့ပြီ…။ ခုဆို ရာသီတွေပြောင်း နှစ်လတွေဟောင်းသွားတော့ တောစံပါယ်လေးပေါက်ခဲ့ဖူးတဲ့ ခြုံပင်လေးတွေလည်း မရှိလောက်တော့ပါဘူး…။ လမ်းတွေလည်း အရင်လိုဖုန်တလုံးလုံးနဲ့မြေလမ်း ခဲလမ်းမဟုတ်တော့… ကတ္တရာစေးတွေမဲနက်နေတဲ့ လမ်းမကြီးဘေးက တောစံပယ်ခြုံပင်လေးလည်း လူတွေခုတ်ထွင်ရှင်းလင်းတဲ့အထဲပါသွားရောပေါ့…..။

ဒီမနက်တရုတ်တန်းဈေးက တွေ့ခဲ့တဲ့ပန်းရောင်စုံတွေကြောင့် ကလေးဘ၀တုန်းက ဆောင်းမနက်ခင်းဆီကိုခေါ်ဆောင်သွားခဲ့တဲ့ အတွေးစတွေကို စာတပုဒ်ရေးလိုက်ခြင်းဖြစ်ပါတယ်….။

မိုးငွေ့