"ရောင်ခြယ်"ဟာ သူ့ထက်အသက်ငါးနှစ်ပဲကြီးတဲ့ မိန်းမတစ်ယောက်ကို "မာမား"လို့ခေါ်ရလိမ့်မယ်လို့ သူ့ဘဝမှာ တစ်ခါမှ အိပ်မက်တောင်မမက်ဖူးခဲ့ဘူး....။ အဲလိုဖြစ်သွားရတဲ့ အဓိကအကြောင်းအရင်းက သူ့ရဲ့အသက် (၂၅)နှစ်လောက်ကတည်းက ရှိခဲ့တဲ့ လှပနုပျိုမှုတွေက အခုလက်ရှိသူ့အသက် (၄၁)နှစ်ထိ မပြောင်းမလဲရှိနေတာ ကြောင့်ပါပဲ....။
ရောင်ခြယ် @ Y
ကျွန်မအတွက် လိုအပ်တဲ့သင်တန်းတိုတစ်ခုကို BC မှာ အတန်းအပ်တဲ့နေ့မှာပဲ ကျွန်မ B နဲ့စတွေ့ခဲ့တာ....။ BC မှာ ဟိုတုန်းက တက္ကသိုလ်တက်နေစဉ်က Library Membership ဖြစ်လို့ အမြဲစာသွားဖတ်နေကျပေမယ့် နှစ်ပေါင်များစွာ ရောက်မလာဖြစ်ခဲ့တာရယ် ခေတ်စနစ်ပြောင်းလဲမှုကြောင့် Form ဖြည့်တာကအစ Paper ကနေ Digital စနစ်ဖြစ်သွားရတော့ ကျွန်မအတွက်နဲနဲတော့ ကသိကအောက်ဖြစ်စေခဲ့တယ်....။ ကောင်တာမှာ Form ဖြည့်ဖို့ တာဝန်ရှိသူက I pad ကမ်းပေးတယ်...။ I Phone သုံးနေကျ ကျွန်မအတွက် သိပ်မခက်ခဲလောက်ဘူးထင်ပါတယ်...။ ဖောင်ကိုသေချာဖတ်ပြီး သူတို့ဖြည့်ခိုင်းတာဖြည့်ပြီး နောက်ဆုံး Summit လုပ်ခါနီးလေးမှာပဲ ကျွန်မလက်ထဲက အိုင်ပက်ကို တစ်စုံတစ်ယောက်ကဆွဲယူလိုက်တာ ခံလိုက်ရတယ်...။
"ဒါ ဘာလုပ်တာလဲ..." လို့ ကျွန်မလှည့်ပြီး ရန်တွေ့လိုက်တဲ့ ကောင်လေးက B ပဲ ဖြစ်တယ်....။ သူ့နာမည်က "Bee" ကျွန်မအခုတက်မယ့် သင်တန်းမှာ ပို့ချမယ့် Mr. Sam က B ဒီမှာ ပထမဆုံးသင်တန်းတက်ခဲ့ကတည်းက ပေးခဲ့တဲ့နာမည်တဲ့....။ သူ့မြန်မာနာမည် "ဘုန်းမင်းခန့်" ကနေလာတဲ့ အင်္ဂလိပ်နာမည်လေး...ပြီးတော့ "Bee" ဆိုတာ သူ့ကိုအလုပ်အရမ်းလုပ်တဲ့ပျားလေးတွေကို ကိုယ်စားပြုတဲ့ အဓိပ္ပာယ်တဲ့....။
B က Old School ပုံ ဝတ်ဆင်ထားပြီး ဆံပင်ကို သပ်သပ်ရပ်ရပ် ညာဖက်ခွဲပြီး ဖီးတင်ထားတဲ့ အသားဖြူဖြူ အနည်းငယ်မှေးပြီး မျက်ရစ်မပါ မျက်အိမ်ရှည်မြောမြော မျက်ခုံးမဲနက်နက်နဲ့ ပြုံးရယ်လိုက်ရင် ချစ်စရာကောင်းတဲ့ ဗမာ-တရုတ်စပ် ကောင်လေးတစ်ယောက်....။ B က အင်္ဂလိပ်စာအပြင်တရုတ်စာကိုလည်း အထက်တန်းထိအောင်ထားသူ....။
"မင်းက ဒီဖောင်လေးဖြည့်တာကို ဘာလို့ကြာနေရတာလဲ ကိုယ်ဘာကူညီရမလဲ" တဲ့....။ ကျွန်မထက် အသက်အပုံကြီးငယ်မယ့်ကောင်လေးက ကျွန်မကို မင်း လို့ နာမ်စားသုံးခေါ်လို့ ပထမ အံ့အားသင့်သွားခဲ့ရပေမယ့် သူ့ကြည့်ရတာ ကျွန်မကိုသူနဲ့ရွယ်တူထင်ပြီး ဒီလိုခေါ်လိုက်တာဖြစ်မယ်လို့ တွေးပြီးပြုံးလိုက်မိသွားတယ်...။ ဆရာလုပ်ချင်နေတဲ့သူ့ကို ကျွန်မ ဘာမှမသိမတတ်တဲ့ ကောင်မလေးတစ်ယောက်အသွင် ပြောင်းရတော့မယ်လို့ သဘောပေါက်လိုက်တယ်...။
"ဟုတ်တယ် ငါက သင်တန်းတွေနဲ့စိမ်းတယ်လေ ပုံမှန်ဆို ငါ့ဘာသာရှာဖတ်ပြီး လေ့လာတာများတယ် ဒါကြောင့် ဖောင်ဖြည့်တာ ငါ့အတွက်နဲနဲခက်ခဲနေတာ" လို့ ကျွန်မက သူ့ကို ငယ်သူငယ်ချင်းတစ်ယောက်လို ပြောဆိုလိုက်တော့ သူက သူ့မျက်ခုံးမဲနက်နက်ကို တစ်ချက်ပင့်ပြီး ...." မင်း စကားပြောပုံက ကျိလုံးလုံးနဲ့ သိပ်တူတာပဲ" တဲ့...။ သူပြောတာကို နားမလည်လို့ အူကြောင်ကြောင်ဖြစ်နေတဲ့ကျွန်မကို သူက ချက်ချင်းရှင်းပြပါတယ်...။ " ကျိလုံးလုံးဆိုတာ ကိုယ့်အစ်မလေ ..." (နောက်တော့မှသေချာသိရတာ သူတို့ ဖူးကျန့်တရုတ်စကားနဲ့ ကျိကျိဆိုတာက အစ်မ,မမကိုခေါ်တာတဲ့...) အဲချိန် ကျွန်မ သူ့လက်ထဲက I pad ကိုပြန်ယူပြီး Form ကို Summit လုပ်လိုက်ပြီး ကောင်တာကလူကို ပြန်ပေးလိုက်တယ်...။
"ဒါဆို ကျွန်မ နောက်တစ်ပတ် စနေ အတန်းစတက်လို့ရပြီပေါ့နော်" လို့ ကောင်တာက တာဝန်ရှိတဲ့လူကို နောက်ဆုံးအတည်ပြုလိုက်တယ်....။
"ကိုယ့်နာမည် “Bee” လို့ခေါ်တယ် နောက်တစ်ပတ်ကိုယ်တို့ထပ်ဆုံကြတာပေါ့လို့ သူပြောပြီး စောစောက ကျွန်မဖောင်ဖြည့်ခဲ့တဲ့ I pad ကို သူလှမ်းတောင်းလိုက်ပြီး ဖြည့်နေတာတွေ့တယ်...။ ကျွန်မလည်း သူ့ကိုခေါင်းငြိမ့်ပြပြီး စာအုပ်ငှားဖို့ စာကြည့်တိုက်ဖက်ထွက်လာခဲ့လိုက်တယ်....။ စာကြည့်တိုက်လဲ အရင်နေရာမှာမဟုတ်တော့ဘူး အချိန်ကတော်တော်ကြာသွားခဲ့ပြီပဲ အရာရာဟာလဲ ပြောင်းလဲတန်ပြောင်းလဲကုန်ပြီပေါ့...။
ရသစာအုပ်တန်းဖက် ကျွန်မ လျှောက်ကြည့်လိုက်တယ်...,။ ဂိုဂိုးလ်ရဲ့ "ကုတ်အင်္ကျီ"ဆိုတဲ့ ကျွန်မရှာနေတာကြာပြီဖြစ်တဲ့ ဝတ္ထုစာအုပ်ကို တွေ့သွားလို့ ကျွန်မလှမ်းယူဖို့မမှီလို့ တစ်ယောက်ယောက်ကို အကူညီတောင်းဖို့ ဒါမှမဟုတ် တက်ယူလို့ရတဲ့ ခုံ, လှေခါး တစ်ခုခုသွားယူဖို့ စိတ်ကူးနေတုန်းမှာပဲ ကျွန်မစာအုပ်ကိုမော့ကြည့်ပြီး ခြေဖျားထောက် လက်လှမ်းတဲ့အနေအထားမှာ ကျွန်မနောက်ကျောကိုအုပ်မိုးပြီး စာအုပ်ကို တစ်စုံတစ်ယောက်ယူပေးလိုက်တယ် ...ပြီးတော့ အနီးကပ်မွှေးရနံ့တစ်ခုကိုပါ ရလိုက်တယ် ပရုတ်နံ့ပါတဲ့ ယောကျ်ားရေမွှေးစူးရှရှ အနံ့က ကျွန်မရဲ့နှာခေါင်းကို သိသိသာသာကျီစယ်သွားတယ်....။
"မင်းက ဒီလိုစာအုပ်လဲဖတ်တာလား" လို့ ကျွန်မလက်ထဲကိုစာအုပ်ထည့်ပေးပြီး အံ့ဩမှုတွေပြည့်နေတဲ့ သူ့မျက်လုံးတွေကို ကျွန်မတခဏငေးမောမိသွားခဲ့တယ်...။ ကျွန်မ သူ့ကိုပြုံးပြရင်း "ကျေးဇူးနော်" လို့ပြောလိုက်တယ်....။
"မင်းနာမည်ကို မမိတ်ဆက်ရသေးဘူးနော်" လို့ သူက ကျွန်မနာမည်ကို သိချင်စိတ်တွေ ထိန်းမရ ဖွင့်ဟလာတယ်...။ ဟုတ်သားပဲလို့ ခုမှသတိရပြီး ကျွန်မ စောစောက မီးကောင်ပေါက်မလေးအရွယ်လို သူ့နားက အစောတလျင် ထွက်လာခဲ့မိတာကို တွေးမိပြီး အသံထွက်ရယ်လိုက်မိတယ်...။
"ဘာကို ရယ်လိုက်တာလဲ ကိုယ့်စကားထဲ ဟာသပါသွားလို့လား" တဲ့ ....
"ဘာမှမဟုတ်ဘူး .. ငါ့နာမည်က ရောင်ခြယ် "
"ရောင်ခြယ်" လို့ သူသံယောင်လိုက်ပြီး ခဏစဉ်းစားလိုက်ပုံရတယ် ....။
"ဘာလို့လဲ ငါ့နာမည်က ဘာထူးခြားနေလို့လဲ"
"နောက်တစ်ပတ် သင်တန်းချိန်ကျရင် Mr. Sam က သင်တန်းသားအသစ်တွေကို အင်္ဂလိပ်နာမည်ပေးရင် မင်နာမည်ကို သူဘယ်လိုပေးမလဲလို့ တွေးနေတာပါ"
ကျွန်မက သူ့ကို သူငယ်ချင်းတစ်ယောက်လို နင်နဲ့ငါသုံးပေမယ့် သူကတော့ ကျွန်မကို သူ့ထက်ငယ်တဲ့ကောင်မလေး တစ်ယောက်လို ကိုယ်နဲ့မင်း နဲ့ပဲ စကားပြောတာ သတိထားမိတယ်...။
နောက်တစ်ပတ် ကျွန်မသင်တန်းစတက်တော့ စာသင်ခန်းထဲသူက ရောက်နှင့်နေခဲ့ပြီ ကျွန်မဝင်လာတာတွေ့တော့ သူက သူ့ဘေးနားလာထိုင်ဖို့ ထိုင်ခုံကို လက်နဲ့ပုတ်ပြတယ်...။ ကျွန်မက ပခုံးမှာလွယ်ထားတဲ့ ဗေဒါရိုးလုပ်လွယ်အိတ်ကို လက်နှစ်ဖက်လုံးနဲ့ ကျစ်ကျစ်ပါအောင်ဆုတ်ပြီး သူရှိတဲ့နေရာကို ဆွဲငင်တဲ့အပြုံး ရဲရင့်တဲ့အမူအရာတွေအပြည့်နဲ့..... ဦးတည်လိုက်တယ်။
ဒီနေ့တော့ B က ရင်ဘတ်မှာအရုပ်ကြီးကြီးပါတဲ့ အနက်ရောင်တီရှပ်ပွပွနဲ့ အသားပျော့ပျော့ အရောင်ဖျော့ ဂျင်းဘောင်းဘီပွပွကိုဝတ်ဆင်ထားလို့ Shoes စီးထားပြီး စတွေ့တုန်းက ပုံစံထက် ပိုပြီးပျိုမျစ်နေတယ်...။ ဘယ်ဖက်နားမှာလည်း နားဆွဲတွဲလဲတပ်ထားသေးတယ်...။ ခုခေတ်စားနေကြတဲ့ Hip Hopper ဒီဇိုင်းနဲ့ပေါ့...။
Mr. Sam က ကျွန်မနာမည် "ရောင်ခြယ်"မှာ Y နဲ့စလို့ဆိုပြီး ဘာမှရှည်ရှည်ဝေးဝေး စဉ်းစားမနေဘဲ “Y” ဆိုတဲ့ အက္ခရာတစ်လုံးနဲ့ပဲ နာမည်ပေးခဲ့တယ်....။ ကျွန်မတို့တက်တဲ့သင်တန်းကာလက Weekend တွေမှာပဲဖြစ်ပြီး စုစုပေါင်း လေးပတ်ပဲတက်ရပါတယ်....။ ဒါနဲ့ B နဲ့ ကျွန်မလည်း သူငယ်ချင်းဖြစ်သွားကြတယ် ဆိုပါတော့....။ အဲကစပြီး ကျွန်မတို့တစ်ယောက်ကိုတစ်ယောက် နာမည်အတိုကောက်တွေပဲခေါ်ကြတယ်...။
ကျွန်မတို့ သင်တန်းပြီးသွားပေမယ့် အဆက်အသွယ်ရှိနေကြတုန်း တစ်ခါတစ်လေ ကော်ဖီဆိုင်မှာတွေ့ဖြစ်ကြတယ်...။ B က အင်္ဂလိပ်စာအဓိကနဲ့ကျောင်းပြီးထားပြီး ထိုင်ဝမ်မှာလည်း နှစ်နှစ်တရုတ်စာတက်ခဲ့ဖူးတယ် လောလောဆယ် ခရီးသွားကုမ္ပဏီတစ်ခုဖွင့်ပြီး အင်္ဂလိပ် တရုတ်နှစ်မျိုးလုံး ဂိုက်လုပ်ပါတယ်...။ B က အလုပ်အတွက်ဖွင့်ထားတဲ့ Page ကလွဲလို့ Personal Facebook လုံးဝဖွင့်မသုံးလို့ ကျွန်မကို နာမည်ရခါစ Life Coach တစ်ယောက်ဆိုတာလုံးဝသိမထားသူ...။ နောက်ဆုံးကျွန်မအလုပ်အတွက် နယ်သွားဖို့ ခရီးစဉ်အတွက် အလုပ်အပ်တော့မှ B ကကျွန်မဘာလုပ်တယ်ဆိုတာသိသွားတာ...။
ကျွန်မကို ဝန်ထမ်းတွေအတွက် Motivate လုပ်ဖို့ ဟောပြောမှုတစ်ခုကမ်းလှမ်းထားတဲ့ ကုမ္ပဏီက ခရီးတစ်ခုစီစဉ်ချင်တယ်ဆိုလို့ B နဲ့တိုင်ပင်ပြီး အဲဒီကုမ္ပဏီရဲ့ Farm ရှိတဲ့ နယ်မြို့တစ်ခုကိုသွားဖို့ရွေးချယ်လိုက်တယ်...။ B က ကားနဲ့ခရီးစဉ်တလျှောက်အတွက် စီစဉ်ရပါတယ်...။ ဆိုတော့ Bလဲ အလုပ်ဖြစ် ကျွန်မလဲအလုပ်ဖြစ် ကျွန်မတို့ ကုမ္ပဏီနှစ်ခု Collaborate လုပ်လိုက်တဲ့သဘောပါပဲ....။ ရန်ကုန်မှာရှိတဲ့ ရုံးပိုင်းဆိုင်ရာ ဝန်ထမ်းတွေရော အဲဒီနယ်မြို့က အလုပ်သမားတွေကိုပါ အလုပ်အတွက် စိတ်အားဆေးဖြည့်ပေးဖို့ ကျွန်မတာဝန်ယူရပါတယ်...။ ဒီတော့မှ B က ကျွန်မအလုပ်ကိုသေချာသိလာခဲ့ရတယ်...။
ပထမရက်
♦️ လူအတော်များများက ဒီနေ့တော့ စိတ်ဓါတ်တွေကျနေတယ်...။ ဒီရက်ထဲ ဘာမှလုပ်ချင်ကိုင်ချင်စိတ်မရှိကြဘူး....။ အချင်းချင်း စကားပြောရင်လဲ Motivation ပေးကြပါဦး စသည်ဖြင့် အလုပ်တွေ ကောင်းကောင်း လုပ်ဆောင်နိုင်ဖို့ အတွက် ကြိုးစားချင်စိတ်ရှိအောင် စိတ်ဓါတ်တတ်ကြွလာအောင် ဘယ်လိုလုပ်ရမလဲ ဆိုတာကို ရှာဖွေလာကြတယ်။
ဖုန်းတွေတောင် အားပြန်သွင်းရသေးတာပဲ ဆိုတော့ လူတွေမှာလဲ အလုပ်တွေ အများကြီး လုပ်ပြီးတဲ့ အခါ အနားယူပြီးသည့် တိုင်အောင် လုပ်ချင်ကိုင်ချင်စိတ်တွေက တတ်မလာတဲ့အခါ ကိုယ့်ကိုယ်ကို Motivate ပေးပြီး Charge ပြန်သွင်းပေးဖို့ လိုမယ်ထင်ပါတယ်။
♦️ Motivation မှာ ၂ မျိုးရှိပါတယ်...။ ပြင်ပက ရတဲ့ Extrinsic Motivation နဲ့ ကိုယ့်အတွင်းက လာတဲ့ Intrinsic Motivation တို့ဖြစ်ပါတယ်...။
ပြင်ပက ရတယ်ဆိုတာက အခြားလူတွေဖြစ်တဲ့ Motivation Speaker တွေ ပြောတာနားထောင်တာ၊ တော်တဲ့ သူတွေ၊ အောင်မြင်တဲ့ သူတွေကို ကြည့်ပြီး အားကျတာ စသည်ဖြင့် ပြင်ပကနေလာတဲ့ စိတ်ဓါတ် တတ်ကြွခြင်းတွေပါပဲ...။
အဲ့ဒီလို ပြင်ပက ရတဲ့ Motivation တွေက ကြာကြာမခံပါဘူး...။ သူတို့ ပြောတာတွေ နားထောင်နေတုန်း၊ သူတို့ လုပ်တာတွေ ကြည့်နေတုန်း ခဏပဲ ကိုယ်လဲ လုပ်ချင်ကိုင်ချင်စိတ်တွေ ဖြစ်ပေါ်လာပြီး နဲနဲကြာတာနဲ့ အမျှ ပျောက်ကွယ်သွားတတ်ပါတယ်။
ကိုယ့်အတွင်းက လာတဲ့ Motivation ကမှ တာရှည်ခံပြီး ပိုမိုအလုပ်ဖြစ်ထွန်းပါတယ်...။ ဥပမာအနေနဲ့ ပြောရရင် အတိတ်က ကိုယ့်ရဲ့ စွမ်းဆောင်နိုင်စွမ်းတွေ၊ အောင်မြင်မှုတွေ၊ တိုးတတ်မှုတွေကနေ ရလာတဲ့ ရလဒ်တွေက နောက်အလုပ်တစ်ခုကို လုပ်ခါနီးတဲ့အခါ တွန်းအားတစ်ခုဖြစ်စေပါတယ်။
♦️ ဒါပေမဲ့ တစ်ယောက်နဲ့ တစ်ယောက် Motivation ရတဲ့ ပုံစံခြင်း မတူနိုင်တာမို့ ကိုယ်နဲ့ ကိုက်ညီတဲ့ နည်းလမ်းကိုသာ ရွေးပြီး အသုံးချရမှာပါ။
ဥပမာ လူအချို့က တစ်ယောက်ထဲ အခန်းထဲမှာ၊ ခြံဝန်းထဲမှာ၊ တောတောင် သဘာဝတွေ ကြားမှာ၊ လူတွေနဲ့ ဝေးရာမှာ အနားယူလိုက်ရင် ပြန်လည်တတ်ကြွ လန်းဆန်းသွားနိုင်လို၊ လူအချို့ကတော့ Party တွေ၊ Club တွေ၊ Bar တွေ စသည်ဖြင့် လူတွေနဲ့ ရောရောနှောနှော ပျော်ပျော်ရွှင်ရွှင် နေလိုက်တဲ့အခါ ပြန်လည်တတ်ကြွ လန်းဆန်းသွားတတ်ပါတယ်။
လူအချို့ကလဲ သူတို့ လုပ်ချင်ရာတွေ၊ ဝါသနာပါတဲ့ အရာတွေ လုပ်လိုက်ပြီးတဲ့ အခါ ပြန်လည်တတ်ကြွလန်းဆန်းလာပြီးနောက် နေစဉ် ပုံမှန် လုပ်ငန်းဆောင်တာတွေကို ပြန်လည် လုပ်ဆောင်နိုင်လာကြပါတယ်။
ကျွန်မကတာ့ နေ့စဉ် ကိုယ့်ကိုယ်ကို Motivate ဖြစ်အောင် လုပ်ဆောင်သင့်တာလေးတွေ Sharing လုပ်ပေးချင်ပါတယ်။
🔹 တစ်နေ့တာ လုပ်ဆောင်စရာတွေကို စာရင်းလေးပြုစုပြီး တစ်ခုချင်းစီ ပြီးအောင် လုပ်ကြည့်ပါ...။ အလုပ်တွေ အကုန် ပြီးမြောက်သွားတဲ့အခါ စိတ်ကို ရွှင်လန်းစေပြီး ပေါ့ပါးတတ်ကြွမှုတွေ ရရှိနိုင်ပါတယ်။
🔹 အတိတ်က ပျော်စရာအချိန်တွေ၊ လုပ်ဆောင်နိုင်ခဲ့တဲ့အရာတွေ၊ အောင်မြင်မှုတွေ ပြန်မြင်ယောင်ကြည့်ပါ။ အတိတ်ကတောင် လုပ်ဆောင်နိုင်ခဲ့သေးရင် ယခုလဲ လုပ်နိုင်ရမည်ဆိုတဲ့ ခံစားချက်တွေ ရရှိနိုင်ပါတယ်။
🔹 ရည်မှန်းချက်တစ်ခုခုထားပြီး ဖြေးဖြေးချင်စီ ကြိုးစားသွားပါ ။ အောင်မြင််သွားတဲ့အခါ ပီတိဆိုတဲ့ အရသာအပြင် ကိုယ့်ကိုယ်ကို ယုံကြည်မှုတွေလဲ တိုးပွားစေနိုင်ပါတယ် ။
🔹 ကိုယ့်ကို Motivation ပေးနိုင်မည့် Video လေးတွေကြည့်ပါ ။ စာတွေဖတ်ပါ ။ အားကျ အတုယူရမည့် လူတွေ အနားမှာနေပါ ။ Follow လုပ်ထားပါ ။ ပြီးရင် ကိုယ်တိုင်လဲ လက်တွေ့ လုပ်ဆောင် ကြိုးစားကြည့်ပါ ။
🔹 ကျန်းမာရေးအတွက် အာဟာရမျှမျှတတ စားပါ ။ အိပ်ရေးဝအောင် အိပ်ပါ ။ လေ့ကျင့်ခန်းတစ်ခုခု လုပ်ပါ ။ စိတ်ငြိမ်အောင် ဘာသာရေးနဲ့ ပတ်သတ်ပြီး ဆုတောင်း ဝတ်ပြုတာ၊ တရားထိုင်တာ လုပ်ပါ ။
🔹 တစ်ခါတစ်လေ အနားယူပါ ။ ကိုယ့်စိတ်ကို ပျော်စေမည့် အရာလေးတွေ လုပ်ပါ ။ ဝါသနာပါတာတစ်ခုခု လုပ်ကြည့်ပါ ။ ကဗျာလေးတွေဖတ်ပါ ။ ရုပ်ရှင်ဇာတ်လမ်းလေးတွေ ကြည့်ပါ ။ သီချင်းတွေ နားထောင်ပါ ။
🔹 အခြားလူတွေကို အကူညီပေးပါ ။ ကိုယ့်ကိုယ်ကို လက်ဆောင်တစ်ခုခုပေးပါ ။ အလုပ်တစ်ခုခု အောင်မြင်ရင်လဲ ကိုယ်လိုချင် ဖြစ်ချင်တာလေးတွေ ဆုလဒ်ပြန်လည်ချီးမြှင့်ကြည့်ပါ ။
ဒီအချက်တွေထဲက ကိုယ်နှစ်သက်ရာ၊ ကိုယ်နဲ့ ကိုက်ညီတာလေးတွေ ရွေးပြီး လုပ်ဆောင်ကြည့်ပါလို့ အကြံပေးချင်ပါတယ်။
ဒုတိယရက်
နံနက်ခင်း အိပ်ယာက နိုးထလာတယ် ဆိုတာ နေ့တစ်နေ့ကို စတင်ဖို့ ဆိုတာထက် အဓိပ္ပါယ်တွေ အများကြီး ပိုရှိပါတယ်...။ နိုးထလာခြင်းက အရင်ကထက် ပိုကောင်းတဲ့ ဘဝကိုရဖို့ နောက်ထပ် #အခွင့်ရေးသစ်တစ်ခုကို ရလိုက်တာပါ....။ ဒါ့ကြောင့် နေ့တစ်နေ့ရဲ့ အစကို ကျေးဇူးတင်ခြင်းများစွာဖြင့် နိုးထကြည့်ပါ.....။
🔹 ပြီးတော့ Gratitude ကျေးဇူးတင်ခြင်းက #ပျော်ရွှင်မှု၊ #စိတ်ချမ်းသာမှု၊ #အေးချမ်းမှု၊ #ငြိမ်ချမ်းမှု တွေကို ရဖို့အတွက် အကောင်းဆုံး Powerful ဖြစ်တဲ့ လက်နက် တစ်ခုပါပဲ ....။ အသုံးချခြင်း၊ အသုံးမချခြင်းက သင့်အပေါ်မှာပဲ မူတည်သွားပါပြီ....။
ကျွန်မတို့တွေက ကိုယ့်မှာ မရှိတာတွေကိုပဲတွေးမိပြီး ပူလောင်တတ်လွန်းလို့ပါ......
🔹 ဒါ့ကြောင့် မင်္ဂလာနံနက်ခင်းမှာ နိုးထလာတာနဲ့ တစ်ပြိုင်နက် စိတ်ထဲက နှစ်နှစ်ကာကာ ကျေးဇူးတင်ကြည့်ကြရအောင် ….
၁။ ကျန်းမာစွာ နိုးထခွင့်ရလို့ ကျေးဇူးတင်ပါတယ်.....။
၂။ ဘဝမှာ ကိုယ်လုပ်ချင်တာတွေ လုပ်ဖို့ အခွင့်အရေးထပ်ရလို့ ကျေးဇူးတင်ပါတယ်.....။
၃။ သန့်ရှင်းလတ်ဆတ်တဲ့ လေကို ရှုရှိုက်ခွင့် ရတဲ့ အတွက် ကျေးဇူးတင်ပါတယ်......။
၄။ နေ့မနား ညမအား ကိုယ့်အတွက် အလုပ်လုပ်ပေးနေတဲ့ နှလုံးသား၊ ဦးနှောက်၊ အစာအိမ်၊ အဆုတ် စသည့် အတွင်းကလီစာ အားလုံးကိုလဲ ကျေးဇူးတင်ပါတယ်......။
၅။ ဒီလောကထဲမှာ ကိုယ့်ရဲ့ ဖြစ်တည်မှု၊ တည်ရှိမှုကိုလဲ ကျေးဇူးတင်ပါတယ်......။
၆။ ကိုယ့်မှာ မရှိတဲ့ အရာတွေအတွက် ဝမ်းနည်းနေမည့် အစား ကိုယ်ပိုင်ဆိုင်မှုလေးတွေကို တွေးပြီး တစ်စိမ့်စိမ့် ကျေးဇူးတင်ပါတယ်.....။
၇။ ကမ္ဘာမြေကြီးနှင့်တကွ ကိုယ့်ပတ်ဝန်းကျင်က လူတွေ၊ အရာတွေ အားလုံးကိုလဲ ကျေးဇူးတင်ပါတယ်...။
မင်္ဂလာ နံနက်ခင်းမှာ ကျေးဇူးတင်စရာတွေကို သေချာစဉ်းစားကြည့်မယ်ဆိုရင် အများကြီးပါပဲ...။ ပြီးတော့ ကျေးဇူးတင်ရမည့် အရာတွေကို စဉ်းစားမိတိုင်း #စိတ်ချမ်းသာမှု၊ #အေးချမ်းမှု၊ #ငြိမ်ချမ်းမှုတွေကို နှလုံးသားက ခံစားရမှာ အမှန်ပါပဲ......။ ဒါကတော့ ကျေးဇူးတင်ရင်း ကိုယ့်ကိုယ်ကို ကြည်နူးပီတိဖြစ်ဖို့ပါ.....။
အခုကျွန်မထပ်ပြောမယ့်အကြောင်းအရာကတော့ သိမ်ငယ်စိတ် ဝမ်းနည်းစိတ်တွေကို ဘယ်လိုကုစားကြမလဲဆိုတဲ့အပိုင်းပါ ....။ ကိုယ့်ရဲ့ မသိစိတ်ထဲမှာ စွဲထင်နေတဲ့ ငယ်ငယ်ကရခဲ့တဲ့ စိတ်ဒဏ်ရာတွေ၊ ကိုယ့်ကိုယ်ကို ကန့်သတ်ထားတဲ့အယူဝါဒ Limiting Belief တွေ၊ ဖြစ်ရပ် အတွေ့အကြုံ တစ်ခုခုကြောင့် ကိုယ့်ကိုယ်ကို အပြစ်ရှိနေတယ်လို့ ခံစားနေရတာတွေ၊ ကိုယ့်ဘဝရဲ့ ဝမ်းနည်းစရာ၊ သိမ်ငယ်စရာတွေကို Healing(ကုစား) လုပ်ဖို့၊ Let go(လွှတ်ချ) လုပ်ဖို့ နည်းလမ်းတွေ အများကြီးထဲက တရားထိုင်ခြင်းကို အရှေ့တိုင်းရော၊ အနောက်တိုင်းမှာပါ တော်တော်လေး လက်ခံကျင့်သုံးလာကြပါပြီ....။
🔹 Let go လုပ်တယ် ဆိုတာက မကောင်းတဲ့ အကျင့်တစ်ခုကို (သို့) စွဲထင်နေတဲ့ စိတ်ဒဏ်ရာတစ်ခုကို စွန့်လွတ်လိုက်တာ၊ လွှတ်ချလိုက်တာပါ....။ ဒီလို Let go လုပ်ဖို့ ဆိုရင် အရင်ဆုံး ကိုယ့်ရဲ့သန္တာန်မှာ ဖြစ်နေတဲ့ မကောင်းတဲ့ စိတ်ကို အရင်ဆုံး သိရပါမယ်....။ သိပြီးသွားရင် ကိုယ်က Deep(နက်ရှိုင်းစွာ) Accept(လက်ခံ) လုပ်ရပါမယ်။ ကိုယ့်မှာ ဒီလို စိတ်ဒဏ်ရာမျိုးရှိတယ်...။ သိတယ်....။ လက်ခံတယ်...။ ပြီးတော့ ဒီအရာက ကိုယ့်အတွက် အသုံးမဝင်ဘူး၊ မလိုအပ်ဘူး ဆိုပြီးတော့ လွှတ်ချရမှာပါ။ ခန္ဓာသိ သိတာကို ပြောတာပါ....။ ဒါက ပြောတော့သာ လွယ်တာ....။ ဖြစ်လာဖို့က နဲနဲတော့ ခက်ပါတယ်။
ဒီ Process က တချို့အတွက် ၁ ပတ်လောက် တရားထိုင်လိုက်ရုံနဲ့ အဆင်ပြေချင်ပြေမယ်...။ တချို့က ၆ လ လောက် ကြာချင် ကြာမယ်...။ တချို့ ၁ နှစ်၊ ၂ နှစ် စသည်ဖြင့် ကိုယ်ရခဲ့တဲ့ စိတ်ဒဏ်ရာ အနုအရင့် အတိမ် အနက်ပေါ်လဲ မူတည်မယ်...။ ကျိုးစားအားထုတ်သူရဲ့ ဝီရိယ၊ ဉာဏ်ပညာ တွေပေါ်အပြင် Timing အချိန်ကိုက်၊ အချိန်ကျလာတဲ့ အပေါ်မှာလဲ မူတည်ပါတယ်။
🔹 Healing လုပ်တယ် ဆိုတာကတော့ ကုစားတာပါ။ စိတ်ကို သေသေချာချာ ကုစားတာမျိုးပါ...။ လူဆိုတာက ရုပ်နဲ့ နာမ်ပေါင်းစပ်ထားတာ ဖြစ်တဲ့ အတွက် Physically ဖောက်ပြန်တာရှိသလို၊ Mental စိတ်ပိုင်းဆိုင်ရာမှာလဲ နေမကောင်းတာမျိုး ဆိုတာတွေ ရှိပါတယ်...။ လူတွေက ရုပ်ခန္ဓာကိုပဲ ဆရာဝန်တွေ၊ ဆေးဝါးတွေနဲ့ ကုစားလေ့ ရှိပြီး စိတ်ပိုင်းဆိုင်ရာကို စောင့်ရှောက်မှု ဒီနိုင်ငံမှာ အားနည်းလွန်းနေပါသေးတယ်...။
တချို့ စိတ်ဒဏ်ရာတွေ အတွက် Healing လုပ်ဖို့ ကျွမ်းကျင် Healer တွေ၊ Mentor နဲ့ တိုင်ပင်ပြီး လုပ်လို့ ရသလို၊ အနည်းအကျဉ်းကို ကိုယ့်ဘာသာလဲ Healing လုပ်လို့ ရပါတယ်။ ဆိုးဝါးတဲ့ စိတ်ကျန်းမာရေး ဖောက်ပြန်တဲ့ သူတွေကတော့ Therapist တွေ၊ Psychiatrist တွေနဲ့ ပြရမှာပါ...။ အခုနောက်ပိုင်း Psychology နဲ့ ပါတ်သတ်ပြီး Counsellor တွေလည်း ကျွန်မတို့ နိုင်ငံမှာ အတော်လေး ရှိလာပါပြီ....။
🔹 အခြေခံ တရားထိုင်ခြင်းကိုပဲ နဲနဲလေး ဆက်ပြောပါ့မယ်...။ Meditation လုပ်မယ်ဆိုရင် နည်းလမ်းပေါင်းမျိုးစုံ ရှိပါတယ်။ ဒီနည်းလမ်းပေါင်း များစွာထဲကမှ ကိုယ်နဲ့ ကိုက်ညီတဲ့ နည်းလမ်းကို ရွေးပြီးလုပ်ရမှာပါ...။ အခုပြောနေတာက နိဗ္ဗာန်ရောက်ကြောင်းအတွက် မဟုတ်ပါဘူး...။ ဒါပေမဲ့ Releasing ပဲလုပ်လုပ်၊ Healing ပဲလုပ်လုပ်၊ နိဗ္ဗာန်ရောက်ကြောင်းပဲ ကျင့်ကျင့် ကိုယ်သွားချင်တဲ့ လမ်းကြောင်းပေါ်မူတည်ပြီး လိုက်လုပ်ရမည့် Guide Line တွေအတိုင်း ကျင့်ကြံလုပ်ဆောင်ရမှာပါ...။ လမ်းပြပေးနိုင်သူ ဆရာသမားကောင်းတွေကို ချည်းကပ်ရမှာပါ...။
အခုမှ Meditation စလုပ်မည့် သူတွေအတွက် ၁၀ မိနစ်လောက်ကနေ စပြီး ဝင်လေ၊ ထွက်လေ မှတ်လို့ ရပါတယ်။ ပြီးမှ တဖြည်းဖြည်းချင်း အချိန်ကို တိုးသွားပါ..။ နောက်ထပ် Releasing Meditation တို့၊ Healing Meditation တို့ကို Music နဲ့ တွဲပြီး ကိုယ့်ရဲ့ မသိစိတ်ထဲမှာရှိတဲ့ မကောင်းတဲ့ အရာတွေကို Let go လုပ်လို့ရပါတယ်...။ ဒါတွေက တိဘက်၊ အန္ဒိယ၊ တရုတ်၊ ဂျပန်၊ ဇင် ဗုဒ္ဓဘာသာ တွေကနေ လာတဲ့ နည်းလမ်းတွေပါ...။ စကားလုံးတွေ၊ အသံတွေ၊ အသံလှိုင်းတွေမှာ Energy တွေ ရှိပါတယ်...။ ဒီ Frequency တွေနဲ့ ကိုယ့်ရဲ့ Soul ကို ကုစားတဲ့ သဘောပါပဲ...။ Meditation လုပ်ရင် အကူအနေနဲ့ သုံးတဲ့ Music Link အချို့ Group ထဲမှာ ဝေမျှပေးထားပါတယ်....။ ကိုယ့်အားလပ်ချိန်မှာ လေ့လာကြည့်စေချင်ပါတယ်...။ ရှင်တို့အားလုံးအတွက် အကျိုးသက်ရောက်မှုရှိစေရပါမယ်လို့ ကျွန်မအာမခံတယ်....။ ဒီဆွေးနွေးပွဲလေးပြီးသွားရင် Client တိုင်း ကျွန်မဆီကို အကူညီလိုရင် personal လာပြီးဆွေးနွေးတိုင်ပင်လို့ရပါတယ်...ကျွန်မတတ်နိုင်သမျှ လမ်းညွှန်ပေးနိုင်သမျှ ကူညီပါ့မယ်....။
🔹 ကိုယ့်မသိစိတ်မှာ ရှိနေတဲ့ Blockage အတားအဆီးတွေ၊ Negativity တွေကို ဖယ်ရှားနိုင်မည့် - https://youtu.be/IIfw9kAbMlc
🔹 နေ့တနေ့ရဲ့ အစမှာ စိတ်ကို ငြိမ်းချမ်စေဖို့၊ ပျော်ရွှင်စေဖို့၊ Gratitude တွေနဲ့ ပြည့်နေစေဖို့ - https://youtu.be/AlxZeFrGDgc
🔹 ကိုယ့်အတွင်းက Negative Energy တွေကို သန့်ရှင်းစေရန်နှင့် မသိစိတ်ကို ကုစားပေးနိုင်မည့် - https://youtu.be/i2kh7pXPX4Y
🔹 စိုးရိမ်သောကတွေ၊ ပူပန်မှုတွေ၊ မသိစိတ်ထဲက အကြောက်တရားတွေကို Let go လုပ်ရန် - https://youtu.be/Nv07q-SFgNc
🔹 ကိုယ်နှင့် ကိုယ့်ပတ်ဝန်းကျင်က Negative Energy တွေကို ဖယ်ရှားပေးနိုင်သည့် - https://youtu.be/x6UITRjhijI
Meditation ကို အသံကုထုံးနှင့် ပေါင်းပြီး Releasing, Let go, Healing တွေ ရနိုင်ကြပါစေ … 💜💜💜
နောက်ဆုံးအနေနဲ့ စက်ဝိုင်းပုံစံထိုင်နေတဲ့ ကျွန်မတို့တွေ ဘေးနားကသူတွေနဲ့ အချင်းချင်း Hug လုပ်တာ ပွေ့ဖက်ခွန်အားဖလှယ်တာ လုပ်ကြတယ်...။ သူတို့နဲ့ကျွန်မ ဒီအဖွဲ့ထဲမှာရှိတဲ့ တစ်ယောက်ချင်းဆီဟာ ခုဆိုတစ်သားထဲဖြစ်သွားကြပါပြီ....။ ကျွန်မဘေးနားမှာက B.....။ တစ်ယောက်ရဲ့စိတ်ခွန်အားတစ်ယောက်ဖလှယ်ဖို့ ပွေ့ဖက်ရမယ်လို့ကျွန်မပြောလိုက်တာနဲ့ B ကကျွန်မဖက်လှည့်ပြီး လက်နှစ်ဖက်ကိုဆန့်တန်းပြီး ပွေ့ဖက်ဖို့အဆင်သင့်အနေထားနဲ့တွေ့လိုက်ရလို့ ကျွန်မတစ်ချက်ပြုံးလိုက်မိသေးတယ်...။ သူက ကျွန်မကြောပြင်ကိုဖက်ရင်း ခပ်တိုးတိုးမေးလိုက်သေး " ကိုယ့်ကိုဘာတွေသဘောကျလို့လဲ "တဲ့ ...။ ကျွန်မသူမေးတာကို မသိချင်ယောင်ဆောင်ပြီး သူ့လည်ဂုတ်ကိုလက်ချောင်းနဲ့ ဖွဖွကုတ်ခြစ်လိုက်တယ်....။
ကျွန်မက If I can do it လို့ အသံပြုလိုက်တာနဲ့ တစ်ဖွဲ့သားလုံးက I can do it လို့ ဝိုင်းအော်ကြပါတယ်...။
If I Can Do It
You Can Do It
ကျွန်မရဲ့ ခွန်အားဖြစ်လက်သုံး စကားလေးနဲ့ ဆွေးနွေးပွဲလေးကို ပိတ်လိုက်ပါတယ်....။ ပါဝင်ဆွေးနွေးသူအားလုံးရော ကျွန်မကို အလုပ်အပ်တဲ့ ကုမ္ပဏီက တာဝန်ရှိသူတွေကပါ စိတ်ကျေနပ်မှုရကြလို့ တကယ်ဝမ်းသာပီတိဖြစ်ရပါတယ် ဒီလိုရလဒ်က ကျွန်မရဲ့အလုပ်တစ်ခုအတွက် အောင်မြင်ခြင်းပါပဲ...။
ဒီနယ်မြို့လေးက မြန်မာပြည်မှာ ကျွန်မ သိပ်သဘောကျတဲ့ မြို့တစ်မြို့လဲဖြစ်တယ် ကျွန်မသိပ်ရောက်ဖူးချင်နေခဲ့တဲ့မြို့လည်းဖြစ်တယ်...။ မြန်မာပြည်အလယ်ပိုင်းဒေသ မန္တလေးတိုင်းထဲပါဝင်ပေမယ့် မြို့လေးဟာ ပေ ၁၃၀၀-၁၇၀၀ ကျော်အထိမြင့်တဲ့ တောင်ကုန်းတောင်တန်းတွေဝန်းရံထားတဲ့ တောင်ပေါ်ဒေသမြို့လေးတစ်မြို့ပါပဲ ရာသီဉတု သိပ်မအေးသိပ်မပူလို့ ကျွန်မက ပိုသဘောကျတာ ကျွန်မရဲ့ ကျန်းမာရေးနဲ့လဲကိုက်ညီလို့လေ....။ အရမ်းအေးလွန်းတဲ့ဒေသမျိုးဆို ကျွန်မနဲ့အဆင်မပြေဘူး....။ ပြီးတော့ ရေစီးသန်တဲ့ ချောင်းတစ်ခုနဲ့ လွင်ပြင်ကျယ်ကြီးရှိနေတာကိုက မျက်စိပသာဒသင့်လို့ စိတ်ကြည်နူးရတာပဲ....။ ချောင်းရေက လွင်ပြင်ကြီးနှစ်ခုကို ခြားထားပြီး ဟိုး ခပ်နက်နက် ချောက်ကမ်းပါးအောက်မှာ တိတ်တဆိတ်စီးဆင်းလို့နေတယ်....။ မြက်ခင်းတွေနဲ့ စိမ်းစိုနေတဲ့ လွင်ပြင်ကျယ်ကြီးဟာ အပူပိုင်းဒေသတစ်ခုမှာ မြင်ရဖို့ သိပ်မဖြစ်နိုင်ဘူးမလား....။ လွင်ပြင်ကျယ်ကြီးဆီ မရောက်ခင်မှာ သဘာဝ နှစ်ရှည်ပင်တွေဖြစ်တဲ့ ကျွန်း သစ်မာ ဝါပင် နဲ့ မျိုးစိပ်ကွဲပြားတဲ့ စကားပန်းပင်တွေ အများကြီးပေါက်ရောက်ပြီး တချို့နေရာဆို နေပျောက်တောင်ထိုးမပေါက်နိုင်အောင်အရိပ်ကျလို့ရယ်....။ ကျွန်မ စကားပန်းပင်တစ်ခုအောက်မှာဖတ်ဖို့ စာအုပ်တစ်အုပ်နဲ့ သောက်စရာ ကော်ဖီတစ်ခွက်ယူလာခဲ့တယ်...။ ကျေးငှက်သံတွေကိုနားထောင် သဘောဝလေအေးလေး တဖြူးဖြူးနဲ့ ဒီလိုဒေသမှာ အလုပ်လုပ်ခွင့်ရတာကိုက ကျေးဇူးတော်တစ်ပါးပါပဲ....။
"Y ကဒီရောက်နေတာကိုး ..." ဆိုပြီး သူကျွန်မအနားမှာလာထိုင်ချလိုက်တယ်....။
"ငါ ဒီမှာရှိမှန်း ဘယ်လိုသိလဲ"
"ကိုယ်ကော်ဖီသွားသောက်ရင်း အဲနားကလူတွေမေးလိုက်တော့ ဆရာမ ဒီဖက်ကိုထွက်သွားတယ်လို့ပြောတယ် ဒါနဲ့ ဆရာမကိုလာရှာတာ"
"ဘာဆရာမလဲ.... ငါ့ကိုအဲလိုမခေါ်ပါနဲ့"
"မကြိုက်ဘူးလား...ဟင်..ဒီစာအုပ်က ဟိုတခါ လိုင်ဘရီမှာငှားထားတဲ့စာအုပ်ပဲ ခုထိဖတ်လို့မပြီးသေးဘူးလား"
"ဟုတ်တယ် မပြီးသေးတာ ငါက စာဖတ်နှေးတယ်..."
"ကိုယ် အဲလိုစာအုပ်မျိုးမဖတ်ဖူးဘူး ပြောပြပါဦး စာအုပ်အကြောင်းနဲ့စာရေးဆရာအကြောင်း"
"နင်က တကယ်စိတ်ဝင်စားလို့လား ပြီးတော့ ငါနဲ့နင် အသက်အများကြီးကွာတာ နင်ငါ့ကို တကယ်ပဲ ဆက်ပြီးသူငယ်ချင်းလိုသုံးနှုန်းဆက်ဆံဦးမှာလား..."
"အင်း....ကိုယ်အဲဒါတွေကို ဂရုမစိုက်ပါဘူး "
ကျွန်မ သူ့ကို သေချာကြည့်ပြီး ကော်ဖီတစ်ကျိုက်သောက်လိုက်တယ်....။ ကျွန်မကို သူနဲ့ရွယ်တူ သူငယ်ချင်းတစ်ယောက်လို သဘောထားနိုင်တာဟာ ကျွန်မရဲ့ Physical အပြင်ပန်းရုပ်ရည်ကြောင့်ကလွဲပြီး ဘာအကြောင်းပြချက်မှ မဖြစ်နိုင်မှန်းသိထားတယ်...။
"ဒီ ကုတ်အင်္ကျီ(The Overcoat) ဝတ္ထုကို အရင်က ဘာသာပြန်ဖတ်ဖူးထားတယ်... မူရင်းကို ဖတ်ချင်လို့ရှာနေခဲ့တာလဲကြာပြီ ခုမှ ဆန္ဒပြည့်တော့တယ်....။ သူက ရုရှားစာရေးဆရာ နာမည်က (Nicolai Gogol) နီကိုလိုင်ဂိုဂိုးလ် ၁၈၀၉ မှာမွေးပြီး ၁၈၅၂ မှာ ကွယ်လွန်သွားခဲ့တယ်...။ သူက အစပိုင်း ကဗျာတွေဘာတွေရေးတယ်...။ သူ့ရဲ့ ထင်ရှားတဲ့စာအုပ်တွေဆို ဟော်လီးဝုဒ်ကတောင် ရုပ်ရှင်ရိုက်ကြတာ... Dead Soul တို့ Taras Bulba တို့လို ဒီစာအုပ်ကလဲ သူ့ရဲ့အကျော်ကြားဆုံးထဲက တစ်အုပ်ပဲ...။ The Overcoat ကို ၂၀၁၇ တုန်းက Animation Cartoon ဇာတ်ကားအဖြစ်နဲ့တောင် ထွက်ထားသေးတယ်တဲ့ ငါတော့မကြည့်ဖူးသေးဘူး ရှာကြည့်ဦးမယ် အားရင်...။ ဒီကုတ်အင်္ကျီဝတ္ထုက ဝတ္ထုရှည်လည်းမဟုတ် အတိုလည်းမဟုတ် ဝတ္ထုလတ်လို့ ဝေဖန်ရေးဆရာတွေက ပြောကြတယ်... ဒါတော့ စာရေးဆရာရဲ့ ငါသိသလောက် အကြောင်းအရာတချို့ပေါ့"
"ဖတ်လို့ ပြီးခါနီးနေပြီလား ဇာတ်လမ်းအကြမ်းမျဉ်းကို ပြောပြလို့ရပြီလား..." လို့ သူက ကျွန်မကို စိုက်ကြည့်ပြီး တကယ်စိတ်ဝင်စားတဲ့ ပုံစံနဲ့မေးလာတော့.....။
"တစ်အုပ်လုံးအကြမ်းတော့ ဖတ်ပြီးပြီလေ ခုက အချောပြန်ဖတ်နေတာ ပြီးခါနီးပါပြီ နင့်ကို ဇာတ်လမ်း အကြမ်းဖျဉ်းတော့ ပြောပြလို့ရပါတယ်...."
"အိုကေ ဒါဆို ပြောပြလေ... ဒီနေ့ ဘာမှလုပ်စရာမရှိတော့ဘူးမဟုတ်လား"
"နေ့ခင်းဖက်ကျရင်တော့ မြို့မဈေးကိုလိုက်ပို့ဖို့ပြောထားတယ် ခုလောလောဆယ်တော့ အေးဆေးပါပဲ"
သူက ကျွန်မပြောပြမယ့် ကုတ်အင်္ကျီအကြောင်းကို ဆက်နားထောင်ဖို့ အပင်အောက် သစ်မြစ်ဆုံတစ်ခုကို သေချာနေရာရွေးပြောင်းထိုင်လိုက်တယ်....။
" ကုတ်အင်္ကျီ ဝတ္ထုမှာ ဇာတ်လမ်းရယ်လို့ ဘာမှသိပ်မရှိပါဘူး...။ ရုံးစာရေး အကာကီး က ဆင်းရဲနွမ်းပါးတယ် နွေနွေ မိုးမိုး ဆောင်းဆောင်း အပေါ်အင်္ကျီခပ်နွမ်းနွမ်းလေးတစ်ထည်သာ ဝတ်ပြီး ရုံးတက်ရတယ်..။ ဒါကြောင့် သူရှက်တယ် ကုတ်အင်္ကျီအသစ်တစ်ထည်ကို ဝတ်ချင်တယ်...။ ကုတ်အင်္ကျီသာ သူဝတ်နိုင်ရင် လူရိုသေ ရှင်ရိုသေဖြစ်ပြီလို့ သူယူဆတယ်...။ ဂုဏ်ရှိပြီလို့ သူထင်တယ်...။ သူ့အပေါ်အင်္ကျီအဟောင်းလေးကို ကြည့်ပြီး လူတွေက အထင်မြင်သေးကြတယ်...။ စာရေးကြီးဆိုတဲ့ ဂုဏ်ပုဒ်နဲ့အညီ သူဟာ သားသားနားနား ကုတ်အင်္ကျီတစ်ထည်တော့ လိုချင်နေတယ်....။ ဒီတော့ အကာကီးက ပိုက်ဆံချေးပြီး အဟောင်းဆိုင်က တစ်ပတ်ရစ် ကုတ်အင်္ကျီတစ်ထည်ကိုဝယ်လိုက်တယ်...။ တစ်ပတ်ရစ်ပေမယ့် သူ့ကုတ်အင်္ကျီက အတော်သားနားတယ်တဲ့....စာရေးဆရာက ကုတ်အင်္ကျီလေးဝတ်ပြီး ရုံးစတက်ရတဲ့ အကာကီးအကြောင်းကို စာမျက်နှာတော်တော်များများရေးထားတာ ...သူ့ကုတ်အင်္ကျီကို လူတွေက ဝိုင်းကြည့်ကြ ချီးမွမ်းကြ အကာကီးက ပီတိတွေဖြစ်ပြီး ဂုဏ်ယူနေပုံကို ဂိုဂိုးလ်က သွက်သွက်လက်လက်လေးရေးထားတာ သိပ်ကောင်းတယ်...။ ဒီဝတ္ထုတိုလေးမှာ ဂိုဂိုးလ်က လူ့ဂုဏ်သိက္ခာ ရုရှားအုပ်ချုပ်ရေးစနစ်အတွင်းက ဗျူရိုကရေစီ စနစ်တွေအကြောင်းကို ရေးသွားတာ....။ ဂိုဂိုးလ်ကို ခေတ်သစ် ရုရှားစာပေ ထူထောင်သူ ခေတ်သစ် ရုရှားဝတ္ထုရှည် ဝတ္ထုတိုတို့ကို ရှေ့ဆောင်သူလို့တောင် ဝေဖန်ရေးဆရာတွေက ပြောကြတာ ရုရှားစာရေးဆရာ ဒေါ့စတာယက်စကီးက "ကျွန်တော်တို့အားလုံး ကုတ်အင်္ကျီ မှဆင်းသက်လာကြခြင်းဖြစ်သည်"လို့ ပြောခဲ့တယ်တဲ့...ကဲ...ဒီလောက်ပဲ အသေးစိပ်ဇာတ်လမ်းကတော့ ကိုယ်တိုင်ဖတ်ကြည့်ပေါ့..."
"နားထောင်လို့ကောင်းတယ် Y ကစကားပြောကောင်းတော့ ကိုယ်တိုင်ဖတ်ရင် ဒီလောက်ကောင်းချင်မှကောင်းမှာ Y ပြောပြတာ ဘာပဲဖြစ်ဖြစ် ပိုနားထောင်လို့ကောင်းတယ်..."
"နင်လူလည်ကျပြီး မဖတ်ချင်တာနဲ့ ငါ့ကို ညာခိုင်းတာပေါ့ ဟုတ်လား B "
ဘုန်းမင်းခန့် @ B
ငယ်စဉ်ကလေးဘဝထဲက အိမ်က ပုံစံသွင်းတဲ့အတိုင်း အတန်းကျောင်းပညာရေး ဒေသန္တရဗဟုသုတတွေကို သင်ယူလေ့လာခဲ့ရပေမယ့် ကျွန်တော်ကျောင်းပြီး အလုပ်စလုပ်တော့ ကျွန်တော့်ဘဝကို လွတ်လွတ်လပ်လပ် ဖြတ်သန်းခွင့်ရခဲ့ပါတယ်...။ အထူးသဖြင့် ကျွန်တော့်ကို သည်းတုန်အောင်ချစ်တဲ့ ကျွန်တော့်မာမား(အမေ)က အရင်လို ကလေးတစ်ယောက်လို မျက်စိဒေါက်ထောက်သိပ်မရှိတော့ဘဲ ကျွန်တော့်ကို လွတ်လပ်ခွင့်အပြည့်ပေးတဲ့အတွက် ကျေးဇူးတင်ရပါတယ်...။ ကျွန်တော့် ကျိကျိ(အစ်မ)ကိုလည်း ထိုနည်းတူပဲ အခွင့်အရေးရပါတယ်...။ ကျိလုံးလုံးက အိမ်ကလုပ်ငန်းဖြစ်တဲ့ ရွှေဆိုင်ကို ဦးစီးလုပ်နေတာမို့ ပါပါး မာမားတို့က သူ့ကိုစိတ်ချနေပြီ ...။ ခုဆို တရုတ်လူမျိုးတွေရဲ့ ထုံးစံအတိုင်း ကျိလုံးလုံးကို အိမ်ထောင်ချပေးဖို့ ကြင်ဖက်ရှာပေးနေကြတာ သူကတော့ အေးဆေးပဲ မိဘစီစဉ်တာကို အသာတကြည်လိုက်နာခေါင်းညိတ်မယ်လို့ ပြောတယ်....။ ကျွန်တော်ကတော့ အဲဒါတွေ သိပ်မစဉ်းစားဖြစ်သေး အလုပ်လုပ်ဦးမယ်....။ အလုပ်အတွက် Upgrade လုပ်ဖို့ သင်တန်းတိုတွေတက်နေတုန်းမှာပဲ BC မှာ ကျွန်တော် ကောင်မလေးတစ်ယောက်ကိုတွေ့ထားတယ်....။ ချစ်စရာလေးသူက....။ သူ့အရွယ်နဲ့မလိုက် ဖတ်လိုက်တဲ့စာအုပ်တွေက တကယ့် ဂန္ဓဝင်တွေ အတွေးအခေါ် အပြောအဆိုတွေကအစ ကျွန်တော့်ထက်တောင် ပိုရင့်ကျက်နေသေးတယ်လို့ထင်နေတာ ဘယ်ဟုတ်မလဲ တစ်နေ့တော့ နယ်သွားဖို့ လေယာဉ်လက်မှတ်လုပ်တော့မှ သူ့မှတ်ပုံတင်ကို ကျွန်တော်ကြည့်မိသွားတာ ကျွန်တော့်မာမားနဲ့ ငါးနှစ်ပဲငယ်တာ ဘုရားရေ ကျွန်တော်တကယ် ရှော့ရသွားခဲ့တာ...။ သူ့အသက်အရွယ်နဲ့ သူ့ရုပ်ရည်က တကယ်ကို ထင်မှတ်ထားစရာကိုမရှိဘူး....။ ဒါပေမယ့် ကျွန်တော်သူ့အသက်ကို မသိချင်ဟန်ဆောင်နေလိုက်ပါတယ် ဒီနေ့ထိ...။ ဘယ်လိုပဲဖြစ်ဖြစ် အသက်ဆိုတာ ကိန်းဂဏန်းတစ်ခုပဲလို့ ကျွန်တော်သတ်မှတ်ထားတယ်...။ ဒီလိုအတွေးကိုဖြစ်စေတာက ကျွန်တော် Y ကို ချစ်မိသွားပြီလို့ သေသေချာချာသိလိုက်ရလို့ပဲ..။
တိုက်တိုက်ဆိုင်ဆိုင် တစ်ရက်မှာ မာမားကို ကော်ဖီဆိုင်တစ်ခုမှာသွားကြိုပေးရတာ Y ကို မာမားနဲ့သူ့သူငယ်ချင်း အန်တီဝင်းနဲ့တွေ့လိုက်ရတယ်....။ ဒီတော့မှ အန်တီဝင်းက Y ကို Life Coach လုပ်ပေးဖို့ အပ်ထားတဲ့ Client တစ်ယောက်မှန်းသိရတော့တယ်...။ Y နဲ့ မာမားတို့က တော်တော်လေးတောင် ရင်းနှီးနေကြပြီ....။
" B ရောက်လက်စနဲ့ တစ်ခုခုစားသွားလေ " လို့ Y စကားစပေးလိုက်တော့ ကျွန်တော့်အတွက် တော်တော်လေးအဆင်ပြေသွားတယ်....။ ကျွန်တော့်စိတ်ကို အလိုက်တသိရှိပေးတဲ့အတွက်လဲ ကျေးဇူးတင်ပါတယ် Y...။ စားသောက်ရင်း မာမားတို့ကို ကျွန်တော် Y နဲ့ ဘယ်လိုသိခဲ့တာ အလုပ်လုပ်ဖူးသေးတာတွေကို ပြောပြဖြစ်တော့တယ်...။ အိမ်အပြန် မာမားကတော့ Y တော်ကြောင်းတွေ အထပ်တလဲလဲပြောနေတော့တာပဲ အဲချိန် ကျွန်တော်ပါးညောင်းလောက်အောင် တလမ်းလုံးပြုံးလာရတာကိုသာ မြင်ယောင်ကြည့်ပေတော့ ကျွန်တော့်ချစ်သူလေးကို ကျွန်တော့်အမေက ချီးကျူးခန်းဖွင့်နေလို့လေ....။ Y နဲ့စကားပြောရတာ စိတ်ချမ်းသာတယ်လို့ မာမားကတော့ တဖွဖွပြောနေတော့တာပဲ အိမ်ပြန်ရောက်တော့လဲ ပါပါးကို ပြန်ဖေါက်သည်ချလို့....။ ပါပါးကတော့ အိမ်မှာ အေးဆေး အငြိမ်းစားယူ သူဝါသနာပါတဲ့ အပင်တွေစိုက်တာကိုပဲအာရုံစိုက် စာဖတ် ဒါပဲလုပ်တော့တာ...။ အန်တီဝင်းယောက်ျားက မိန်းမခပ်ရှုပ်ရှုပ်မို့ သူ့စိတ်ကျရောဂါကို သက်သာလိုသက်သာငြား မာမားက အွန်လိုင်းမှာ နာမည်ရနေတဲ့ Y နဲ့ တွေ့ပေးလိုက်တာ အဆင်ပြေနေတယ်ပြောတယ်...။
မှတ်ချက်။ ။ စိတ်ခွန်အားဖြစ် အချက်အလက်တွေအတွက် Myo Thiha Kyaw ~ Randy 🔸 Life Coach & Spiritual Guide 🔸 ကို ကျေးဇူးတင်ပါသည်....။ အကြောင်းအရာတချို့အတွက် ဆရာမြသန်းတင့်၏ "သူ့လက်ရာ သူ့အယူအဆ သူ့စာပေ သူ့အတွေးအမြင်" စာအုပ်မှ လည်း ကိုးကားပါသည်...။
_________________
Revolution will prevail
မိုးငွေ့
