Good Smell to you.....

ပြီးခဲ့တဲ့ ဇွန်လ(၄)ရက်နေ့တုန်းက တင်ထားခဲ့ဖူးတဲ့ ပို့စ်လေးကိုမှတ်မိကြဦးမှာပါ...။ အဲတုန်းက ကျွန်မ နှာခေါင်းအနံ့ရတာမကောင်းလို့ အစားစားရတာလည်း အရသာပျက်တဲ့အကြောင်း ရေးထားခဲ့ပါတယ်...။ အနံ့ပြန်ရအောင် ဘယ်လိုနည်းလမ်းတွေနဲ့ စားသောက်နေထိုင်ရမယ်ဆိုတဲ့ အိမ်တွင်းဆေးနည်းလေးကို အင်တာနက်ကဖတ်ပြီး ရေးခဲ့ပါတယ်...။ အဲဒီနည်းတွေထဲက ကျွန်မ ကရိကထမများတဲ့ ဂျင်းလက်ဖက်ရည်သောက်ပေးတဲ့ နည်းလမ်းလေးကို နှစ်လဆက်တိုက်လုပ်ခဲ့ပါတယ်..။

အဲဒီလိုနဲ့ နှာခေါင်းက အနံ့မရတချက်ရတချက်ဖြစ်တာကို ၀မ်းကွဲမောင်နှမတွေထဲက ဆရာဝန်တချို့ကို ပြောပြတော့ သူတို့က နားနှာခေါင်းလည်ချောင်းဆရာဝန်ကို ပြကြည့်ဖို့ လမ်းညွှန်ကြတယ်...။ ကိုယ်ကလည်း ဆေးရုံဆေးခန်းကြောက်တတ်...အဓိကကတော့ ဆရာဝန်တွေကို စိတ်မချတာလည်းပါတယ်..။ သူတို့က အနည်းဆုံး နှာခေါင်းအတွင်းကို ဓါတ်မှန်ရိုက်ကြည့်ကြမှာပဲလေ လိုအပ်ရင် အသားစပါယူချင်ယူဦးမှာ အမလေး ကြောက်စရာ...။ ကိုယ့်သားနာမှာကိုလည်း ကြောက်တယ်လေ ဒါကြောင့် ဆေးခန်းပြရမယ့်နည်းလမ်းကို မေ့လိုက်တယ်...။ ဒီလိုနဲ့ ကျွန်မ ဖတ်ထားဖူးတဲ့ အိမ်တွင်းဆေးနည်းလေးနဲ့ ကိုယ့်ဘာသာကိုယ် ကြိတ်ကုနေလိုက်တယ်...။ ဂျင်းလက်ဖက်ရည်သောက်တယ် နှစ်လဆက်တိုက်...။ သိပ်မထူးခြားလာဘူးလို့ ကိုယ့်ကိုယ်ကိုထင်တော့ နေ့တိုင်းမသောက်ဖြစ်တော့ဘဲ သတိရတဲ့အခါသောက်လိုက် မသောက်လိုက်နဲ့နေလိုက်တယ်...။ အနံ့ကောင်းကောင်းရမရ ကျွန်မ မနက်မျက်နှာသစ်ပြီး Toner နဲ့မျက်နှာကို သုတ်တဲ့အခါ သိသာတယ်...။ ကျွန်မက Clinique Toner 3 ပန်းရောင်အရည်သုံးပါတယ်...။ သူ့အနံ့ကနည်းနည်းပြင်းတဲ့...ပုံမှန် နှာခေါင်းကောင်းတဲ့အချိန်ဆို အယ်လ်ကိုဟောပါတဲ့အနံ့လိုမျိုးရတယ်...။ ပုံမှန်မဖြစ်သေးတဲ့အတွက် ရေချိုးဆပ်ပြာ၊ ခေါင်းလျှော်ရည်၊ Boday Loation၊ ရေမွှေး စတဲ့ နေ့စဉ်သုံးနေကျ အလှကုန်တွေအနံ့က တော်တော်ဆိုးဆိုးဝါးဝါးဖြစ်နေတာ...။ ဒါကြောင့် အဲဒါတွေနဲ့ကျွန်မ နေ့စဉ် ကိုယ့်နှာခေါင်းအနံ့ရတာ ကောင်းမကောင်းစမ်းသပ်လေ့ရှိတယ်....။ 

ပြီးခဲ့တဲ့ နှစ်ပတ်လောက်က တိုက်ဆိုင်သွားလို့ထင်ပါတယ်... အိမ်မှာ ကြက်သားဆီပြန်ဟင်းကို အုန်းနို့ထည့်ချက်တာ စားကောင်းကောင်းနဲ့ နေ့လည်ရော ညပါ ထမင်းနဲ့အားရပါးရ နယ်စားလိုက်တာ...။ ညအိပ်ယာမ၀င်ခင် တီဗီကြည့်နေတုန်းမှာပဲ လည်ချောင်းတွေနာလာလိုက်တာ ရေသောက်တာတောင် ကောင်းကောင်းမမျိုနိုင်သလောက်ပဲ...။ ချက်ချင်းကြီးလေ...။ ခုတလော အပြင်မှာလည်း ဗိုင်းရပ်စ်တွေက သိပ်ပျံ့တာ တုပ်ကွေးဖျားပြီး ချောင်းဆို နှာစေး လည်ချောင်းနာ အဲလိုတွေကျန်ခဲ့တဲ့သူတွေခပ်များများရယ်..။ ကျွန်မက မဖျားဘဲ ရုတ်တရပ်ကြီး လည်ချောင်းတွေနာလာတော့ နောက်နေ့မနက် ဆားရေခပ်နွေးနွေးတစ်ခွက်နဲ့ ပလုတ်ကျင်းလိုက်တယ်...။ အဲဒီတစ်နေ့လုံးနဲ့ နောက်နေ့အထိ လည်ချောင်းက လုံးဝမနာတော့ဘဲ အိုကေသွားတယ်...။ ကိုယ့်ကိုယ်ကိုတောင်အံ့သြသွားတယ်...။ ဒီတခါ ဆေးမသောက် ငုံဆေးပြားမလိုဘဲ ပျောက်တာမြန်လှချေလားဆိုပြီး... ဒူးရင်းသီးတစ်လုံး ၀ယ်စားလိုက်သေးတယ်...။ နောက်နေ့တွေဘာမှမဖြစ်ဘူး...။ သုံးရက်လောက်နေတော့မှ အသံဝင်ပြီး နှာစေး ချောင်းဆိုးဖြစ်ပါလေရော...။ Antibiotic ဆေးတွေ သိပ်မသောက်ချင်တာနဲ့ ဆေးဆိုင်မှာ ဆေးသွားဝယ်တော့ Strepsils ငုံဆေးပြားအပြာရောင်နဲ့ နှာစေးပျောက်ဆေး Cetirizen ရောင်းပေးတယ်..။ ဆေးရောင်းသူကလည်း Antibiotic မလိုဘူး ဒါပဲသောက် ပျောက်တယ်တဲ့...။ ကျွန်မလည်း ဆေးတွေကို အချိန်Alarm ပေးပြီး တိတိကျကျသောက်ရမှာကို စိတ်ညစ်တာနဲ့ မသောက်ရလည်းကောင်းတယ်ဆိုပြီး အဲနှစ်မျိုးကို သုံးရက်သောက်လိုက်တယ်...။ ဗီတာမင်စီရေဆူးဆေးပြားကို တစ်နေ့တစ်ပြား ရေဗူးထဲထည့်သောက်ဖြစ်တယ်...။ မနက်နဲ့ ညဆို ဘယ်ဖက်နှာခေါင်းထဲက ချွဲပစ်ခဲခဲတွေထွက်တယ်...။ ချွဲအ၀ါရောင်ထဲမှာ အစိမ်းရောင်မျှင်လေးတွေပါပါလာတာတွေ့ရတယ်...။ အဲဒီဘယ်ဖက်နှာခေါင်းကပဲ နေ့ဖက်တစ်ခါ ညအိပ်တဲ့အခါတစ်ခါ သွေးယိုတယ်...။ မနက်ကျ ချွဲထဲမှာ သွေးစတွေတွေ့တယ်...။ ကျွန်မ အင်တာနက်မှာ ထပ်ရှာဖတ်ကြည့်တယ်...။ ဒါဟာ ဘာလက္ခဏာဖြစ်နိုင်မလဲပေါ့...။ ကျွန်မဖြစ်နေတာဟာ နှာခေါင်းကင်ဆာရဲ့ လက္ခဏာထဲမှာ သုံးမျိုးလောက်သွားတိုက်ဆိုင်နေတယ်...။ အနံ့မရတာ၊ ချွဲထဲသွေးစတွေ့တာ၊ လည်ချောင်းနာတာ စတာတွေ့ပေါ့...။ အဲဒါနဲ့ ဆရာဝန်သွားပြရင်ကောင်းမလား မသိဘူးလို့ စဉ်းစားတယ်...။ ဒီိထိလည်း ကျွန်မစိတ်က မသွားချင်ဘူးဆိုတဲ့ အဖြေပဲထွက်လာတယ်...။  နောက်နေ့တွေ ချွဲထဲသွေးစပါမပါကို သတိထားကြည့်တော့ မပါလာတော့ဘူး...။ ပထမနေ့က သွေးစတွေ့တယ်ဆိုက နှာခေါင်းသွေးယိုတာလည်းပါတယ်...။ 

 

 Brand ငှက်သိုက်က တခါမှသောက်ဖူးခဲ့တာမဟုတ်ဘူး 

ဒါပထမဆုံးအကြိမ် ခုတော့ လူတိုင်း သောက်သင့်တာမှန်းသိသွားပြီ

ဒါနဲ့ အပူများနေတာများလားဆိုပြီး ငှက်သိုက်သောက်ကြည့်မယ်လို့ တွေးမိတာနဲ့ တလောက လက်ဆောင်ရထားတဲ့ Brand ငှက်သိုက် Sugar Free တစ်ဗူးကိုဖောက်ပြီး စာဖတ်ကြည့်တော့ အသက်ရှုလမ်းကြောင်းအတွက်ကောင်းတယ် အစာအိမ်အစာခြေစနစ်ကောင်းတယ် ချောင်းဆိုးတဲ့သူတွေ အတွက်ကောင်းတယ် စတာစတာတွေရေးထားတာတွေ့တော့... တစ်ဗူးသောက်ကြည့်လိုက်တယ်... အဲဒီညက မအိပ်ခင်ပေါ့...။ ဂျင်းလက်ဖက်ရည်တွေ အသောက်များလို့ပဲ အပူများတာလားဆိုပြီး ငှက်သိုက်က်သောက်ပြီး နောက်တစ်နေ့မှာ Spaဆိုင်မှာ ခြေထောက်ဆားစိမ်လိုက်သေးတယ်...။ ခြေသည်းညှပ်ပေးတဲ့ ညီမကတောင်ပြောသေးတယ် အစ်မအပူသိပ်များနေတာထင်တယ် ဆားစိမ်ပြီး ခြေချောင်းထိပ်လေးတွေ အသားကွာလာတယ်တဲ့...။ တစ်ရက်နှစ်ရက်မှာပဲ ထူးထူးခြားခြား ငှက်သိုက်နဲ့ဆိုင်သလား ဘာလားတော့မသိဘူး ကျွန်မ နှာခေါင်းအနံ့တွေပြန်ရလာတယ်...။ မွှေးတဲ့အနံ့ကို မွှေးတဲ့သူ့အနံ့အတိုင်း နံတဲ့အနံ့လည်းနံတဲ့အတိုင်း ပြန်ရလာတယ်...။ စစချင်း ရေချိုးဆပ်ပြာကနေစသိတာ ပြီးတော့ Toner, Lotion ပြီးတော့ သုံးနေကျ Gucci Envy Me ရေမွှေးနံ့ကိုတော့ အမှန်အတိုင်းမရသေးဘူး...။ အနံ့ကကြားနံ့ဖြစ်နေတယ် ခါတိုင်းနှားခေါင်း မကောင်းတုန်းကရတဲ့ အနံ့ကတစ်ဝက် မွှေးနံ့ကတစ်ဝက် အဲလိုဖြစ်နေတယ်...။ ပြောရမယ်ဆိုရင်တော့ 80%လောက် နှာခေါင်းအနံ့ ပြန်ကောင်းလာတာကို သိလာရတယ်...။ 

ဘာပဲဖြစ်ဖြစ် ကျွန်မနှာခေါင်းအနံ့ပြန်ရလာလို့ ၀မ်းသာရတယ်...။ ပြောပြချင်သေးတယ်...။ နှာစေးရင် နှပ်ညှစ်တဲ့အခါ နှာခေါင်းနှစ်ဖက်စလုံးကို တပြိုင်တည်းမညှစ်ပါနဲ့...။ အဲလိုဆို နှာခေါင်းပိုပိတ်ပါတယ်...။ နှာခေါင်းထဲက သွေးကြောမျှင်တွေ အနံ့ခံတဲ့ Nerve ကြောတွေကို ထိခိုက်စေပါတယ်...။ ဒါကြောင့်  နှာခေါင်းကို တစ်ဖက်ပိတ်ပြီးတစ်ဖက်ကိုညှစ်ထုတ်ပေးမှသာ နည်းလမ်းမှန်ဖြစ်ပါတယ်လို့ ကျွန်မ ကိုယ်တွေ့သိလိုက်ရတာကို ပြန်မျှဝေတာပါ...။ အခုကျွန်မ အနံ့ပျောက်ဆုံးရတာဟာ အဲဒီတုန်းက နှာစေးလို့ နှစ်ဖက်စလုံးကိုပြိုင်တူ ညှစ်လိုက်မိတာလည်းပါတယ်...။ ကျွန်မရဲ့မွေးရာပါ ဘယ်ဖက်အသက်ရှုလမ်းကြောင်း ကျဉ်းတာလည်းပါတယ်...။ ပိတ်ဆို့နေတဲ့ ချွဲခဲတွေထွက်သွားလို့ အနံ့ပြန်ရတာလည်းဖြစ်နိုင်တယ်...။ အကျိုးတရားအကြောင်းတရားအားလုံး တိုက်ဆိုင်သွားတဲ့ အချိန်မို့လည်းဖြစ်နိုင်ပါတယ်...။

  ကျွန်မကို ဆိုင်မှာဆားစိမ်ပေးတုန်းက ဒီလိုဆားတော့မဟုတ်ဘူး 

အပြာရောင်ဆား Cream type ပဲ Menthol ပါတော့ ပူရှိန်းရှိန်းလေးနဲ့

အခု ကျွန်မ Coconut Oil pulling ပြန်လုပ်နေတယ်...။ ခန္ဓာကိုယ်တစ်ခုလုံးကို အန္တရာယ်ပေးနိုင်တဲ့ ဘက်တီးရီးယားအများဆုံးနေရာက ခံတွင်းထဲမှာပဲလို့ကြားဖူးတယ်...။ မနက် အိပ်ယာထတာနဲ့ မိနစ်နှစ်ဆယ် အုန်းဆီနဲ့ ပလုတ်ကျင်းတယ် ပြီးတာနဲ့ ဆားရည်နွေးနွေးနဲ့ ပြန်ပလုတ်ကျင်းတယ်၊  ရေမတ်ခွက်နှစ်ခွက်သောက် မျက်နှာသစ် သွားတိုက်တယ်..။ အဲဒါကို ရက်နှစ်ဆယ်ဆက်တိုက်လုပ်ပြီးရင် တစ်ပတ်ကိုတစ်ကြိမ်လုပ်ပေးတာနဲ့ လုံလောက်ပါပြီ...။ အုန်းဆီအကြောင်း ဒီမှာ ရေးခဲ့ဖူးပါတယ်...။

မိုးငွေ့