My Doodles Art (2).....

 

Dear Angel(12).....

 

ချစ်သော အိန်ဂျယ်....,,,,

ပျော်ရွှင်လွတ်လပ်မှုကို ဘုရားတစ်ဆူလိုကိုးကွယ်တတ်တဲ့ ကိုယ့်အတွက် ဘယ်လိုအရာ ဘယ်လိုရွှေငွေစည်းစိမ်ကမှ မဆွဲဆောင်နိုင်တာ သေချာသွားခဲ့ပြီ....။

အသက်ရှင်နေထိုင်ရတဲ့ အချိန်တိုတိုလေးမှာ ကိုယ်စိတ်ချမ်းသာ ပျော်ရွှင်စွာပဲနေချင်တယ် ကိုယ်လုပ်ချင်တဲ့အရာမှန်သမျှကို လုပ်နေရင်းနဲ့ပေါ့...။ စားချင်တာလေးတွေချက်စားမယ် သီချင်းနားထောင်မယ် စာအုပ်တွေဖတ်မယ်.. တခါတလေ ပုံလေးတွေဆွဲမယ်...။ ကိုယ်ချစ်ခင်ရတဲ့သူတွေနဲ့ ကော်ဖီဆိုင်ထိုင်ရင်း အသိတွေဖလှယ်ကြမယ်...။ ခရီးသွားနိုင်သေးရင် ခရီးထွက်မယ်... ဒီလောက်ပါပဲ ကျန်တာ ကိုယ်ဘာမှမက်မောတွယ်တာစရာမရှိဘူးပဲ....။

မင်းလည်း အချိန်အားရင် ကိုယ့်ဘလော့ကို အပျင်းပြေစာလာဖတ်ပါ...။ ပြုံးပျော်စရာစကားလုံးတစ်ခုတော့အနည်းဆုံး မင်းအတွက်ထင်ကျန်ရစ်စေမှာပါ ....။

Still flying .....

Still loving.....

__________________

Revolution will prevail

မိုးငွေ့

မယုံနိုင်ဘူး.....

တကယ်က ကျနော်က ကိုငဲကြီးအသံကို ကိုလေးထက်တောင်ပိုကြိုက်တာပါ...။ သူတို့ညီအစ်ကိုတွေက ဆိုသံဆိုပေါက်တော်တော်ဆင်တူတယ်ဆိုပေမယ့် မတူညီတာလေးတော့နဲနဲရှိတယ်...။ ကျတော်က အဲဒီမတူညီတာကိုကြိုက်တာ...။ ကိုငဲကြီးက သီချင်းဆိုတာထက် အရေးဖက်ကို ပိုသန်ပြီး သူများတကာတွေကိုလည်း သီချင်းကောင်းတွေ အများကြီးရေးပေးနိုင်ခဲ့တဲ့ တေးရေးဆရာကြီးလို့လဲပြောနိုင်တယ်...။ သူ့သီချင်းတွေ ကြိုက်တာအများကြီးပေမယ့် ဘာဖြစ်လို့လဲမသိ ကျနော်ကိုငဲသီချင်းကို တခါမှမတင်ဖူးခဲ့ဘူးထင်တာပဲ...။ ကျနော် တက္ကသိုလ်တက်ပြီး ကြားထဲ ကျောင်းတွေအထပ်ထပ်ပိတ်နေတဲ့ ကာလလောက်မှာပဲ ကိုငဲသီချင်းတွေကို အသေအကျေနားထောင်ဖြစ်တာပဲ "ညမီးအိမ်" တို့ "ဝေးပြီဘေဘီ"တို့...ဟုတ်တယ်...။

ဒီသီချင်းကို ကျနော်က တင်မယ့်သာမတင်ဖြစ်ခဲ့တာ ကျနော်ရေးခဲ့တဲ့ အိန်ဂျယ်စာစုတစ်ခုဖြစ်တဲ့ "တနင်္ဂနွေမိုးသည်း"မှာတော့ အိန်ဂျယ်ပို့စ်တွေကို ဖတ်ဖူးခဲ့သူတွေတော်တော်များများသိပါတယ် ဒီသီချင်းက အက်ဆေးလေးရဲ့ အဆုံးသတ်လေးမှာပါဝင်ခဲ့တာပဲ....။ 

__________________

Revolution will prevail

မိုးငွေ့

အက်ဆေးအကြောင်းအက်ဆေးရေးခြင်း.....

ငယ်စဉ်ကတည်းက စာဖတ်ဝါသနာပါခဲ့ပေမယ့် ဘယ်လိုစာအမျိုးအစားကိုကိုယ်တကယ်နှစ်သက်ခဲ့လဲဆိုတာ သေချာမသိခဲ့ဘူး...။ ကိုယ်တိုင်စာရေးဖြစ်တဲ့အခါကျပြန်တော့လည်း ဘယ်လိုစာမျိုးကိုရေးရတာ အာသီတပိုရှိသလဲဆိုတာကို လွန်ခဲ့တဲ့ငါးနှစ်ကမှ သေသေချာချာ ကွင်းကွင်းကွက်ကွက် မြင်လာခဲ့ရတာကလည်း ဦးသာဓုနှင့်သားများ စာတွေကတဆင့်သိရတာပဲ...။  အထူးသဖြင့် ဆရာမင်းလူရဲ့ "အက်ဆေးချစ်သူ"စာအုပ်ကိုဖတ်လိုက်ရချိန်မှာ ကျမဟာဘယ်လိုစာမျိုးကို နှစ်သက်သလဲဆိုတာ ကိုယ့်ကိုယ်ကို မှန်ကြည့်သလို မြင်ခဲ့သိခဲ့ရတယ်...။

ဒီတော့မှ ဟာ!!! ဒီစာအမျိုးအစားဟာ ငါနဲ့ထပ်တူပါလား ငါ့ကိုယ်ငါပြန်မြင်နေရသလိုပါလားလို့တောင် ထင်မှတ်ပြီး သဘောအကျကြီးကျခဲ့ရတယ်...။ အဲဒီနောက်ပိုင်း ကျမအက်ဆေးရေးရတာ ပိုပျော်လာတယ်...။ ဘာလို့လဲဆိုတော့ ကျမကိုယ်တိုင် လွတ်လပ်မှုကို ကြိုက်တဲ့သူမို့လို့ပါပဲ...။ အက်ဆေးရေးရတာ တခြားစာအမျိုးအစားနဲ့မတူတာ အကြောင်းအရာအကောင်အထည် စ လည် ဆုံးပါစရာမလိုဘူး...။ လူတစ်ယောက်ရဲ့ ခံစားမှုကို လိုချင်တဲ့နေရာကနေ Photo Shop လုပ်ရင် Crop လုပ်သလိုပဲ လိုရာနေရာလေးကိုပဲ ကွက်ပြီး ဖြတ်ယူရေးသားလို့ရတယ်...။ အဲဒီလိုပဲ ပုရွက်ဆိတ်တစ်ကောင်ရဲ့သွားရာလမ်း သူ့ရဲ့ လှုပ်ရှားမှု သူဘာလုပ်မလဲ စသဖြင့် လိုက်စပ်စုပြီး အကြီးချဲ့ရေးလို့ရသေးတယ်...။ ပန်းတစ်ပွင့်အကြောင်း သစ်ရွက်တစ်ရွက်အကြောင်း သူ့ရဲ့ဖြစ်တည်မှုကို ရေးစရာမလိုဘဲ ကိုယ်ကိုယ်တိုင်ရဲ့ အမြင်တစ်ခုအနေနဲ့ပဲ ပိုင်းဖြတ်ရေးလို့ရတယ်...။ စာဖတ်သူကိုလဲ ဖိအားမပေး အမိန့်မပေး တွန်းအားမပေးဘဲ စာဖတ်သူကိုယ်တိုင် အက်ဆေးတစ်ပုဒ်ကို သူခံစားမိတဲ့အတိုင်း လွတ်လပ်စွာ ထင်မြင်ယူဆ ပုံဖော်လို့ရနိုင်တယ်...။ 

ပင်လယ်ပြင်ပေါ်တိုက်ခတ်လာတဲ့ လေညှင်းအကြောင်း ချစ်သူကောင်မလေးရဲ့ ကော့ညွှတ်နေတဲ့ မျက်တောင်အကြောင်းကနေ နဂါးငွေ့တန်းတွေ ကြယ်တွေလတွေ အာကာသတွေအထိ ချဲ့ထွင်ရေးသားလို့ရတာမို့ ကျမကတော့ ကျမနဲ့ပုံစံအတော်တူတဲ့ အက်ဆေးကို ဒီနေ့ထိရေးသားနေရတာကို သဘောကျနေခဲ့တယ်...။ ရေးပြီးတိုင်းလည်း ပျော်ရွှင်ကြည်နူးရတယ် စိတ်ကျေနပ်မှုရတယ် ပီတိသုခတွေကိုပါ တဆက်တည်း ခံစားရတယ်...။ ခုပဲကြည့်လေ ကျမ အက်ဆေးအကြောင်း အက်ဆေးတစ်ပုဒ်ရေးလို့ရနေတယ်..။ ကျမက ဘောင်ခတ်ထားတဲ့ဟာကို မနှစ်သက်တတ်သူပီပီ စာရေးတာကိုလည်း ဘောင်နဲ့သတ်မှတ်ပြီးရေးရတာကိုမကြိုက်ဘူး....။ ဒီတစ်ပုဒ်ထဲမှာ ဒီလိုစကားလုံးတွေပါရမယ် ဒီအကြောင်းအရာထည့်ရေးပေးရမယ် စသဖြင့် သတ်မှတ်ချက်တွေနဲ့လာရင် ကျမစာမရေးချင်တော့ဘူး...။  

ကျမဘလော့မှာ အက်ဆေး သို့မဟုတ် ဝတ္ထုတိုတစ်ပုဒ်ဖြစ်ဖြစ် ရေးတော့မယ်ဆိုရင် ကျမ အချက်သုံးချက်ကို အမြဲဦးစားပေးလေ့ရှိတယ်...။ ပစ္စည်းတစ်ခု ကြော်ငြာသလိုပဲ စာရေးတာမှာလဲ Presentation လိုတယ်လို့ထင်တယ်...။ ကျမစာတစ်ပုဒ်ရေးတော့မယ်ဆိုရင် ပထမဆုံး ခေါင်းစဉ်ကို အရင်စဉ်းစားပါတယ်...။ အကြောင်းအရာကတော့ အကြမ်းမျဉ်းခေါင်းထဲရှိနေပြီးသားပေါ့ ...။ သူနဲ့လိုက်ဖက်မယ့် စာဖတ်သူလဲ စိတ်ဝင်တစားဖြစ်စေမယ့် နာမည်ကိုရွေးချယ်တယ်...။ နောက်တစ်ခုက အဲဒီစာအတွက် ပုံတစ်ပုံ (သို့) နှစ်ပုံကို စာဖတ်သူတွေ စာဖတ်ရင်းတွဲမိအောင် အလိုက်ဖက်ဆုံး အဆွဲဆောင်နိုင်ဆုံးလို့ထင်ရတဲ့ ပုံတွေကိုရှာပါတယ်...။ နောက်ဆုံးတစ်ခုကတော့ ကျမရေးရမယ့်အကြောင်းအရာကို ဉပမာပေးရရင် အဝတ်အစားတစ်ထည်ချုပ်ပြီးရင် ချုပ်သားအနားစတွေကို ဒါးစက်လိုက်သလို အနားသပ်လေးတွေ သပ်ရပ်လှပသလိုပဲ ကျမစာတွေကို ဘယ်လိုစကားလုံးတွေနဲ့ အနားကွပ်မလဲဆိုတာကို စာကြမ်းအစဆုံးရေးပြီးတာနဲ့ အဲဒီအနားသပ်ကို အကြိမ်ကြိမ်အဖန်ဖန်ပြန်ဖတ်ပြီး ထပ်ဖြည့်ရတာတွေ ဖြုတ်ပစ်တာတွေကိုလုပ်ပါတယ်...။ အဲဒီထဲမှာ စာဖတ်သူတွေ ဖတ်ရတာ မျက်စိပသာဒဖြစ်အောင်လဲ စာပိုဒ်တွေခွဲတာ စကားစုတွေတစ်ခုနဲ့တစ်ခုခြားတာ တခါတလေ စကားပြောနေတဲ့ လေသံအတိုင်း အသံနေအသံထား အနှိမ့်အမြင့်ကို Dot Dat လေးတွေနဲ့ ခြားပြီးရေးတာမျိုး Exclamation Mark(!!)ထည့်တာမျိုး အဲလိုအသေးစိပ် စာပိုဒ်တွေကို ဒီဇိုင်းလုပ်ရတာတွေလဲပါတာပေါ့...။

ဒီလောက်စစ်နေတဲ့ကြားက စာလုံးပေါင်းသတ်ပုံမှားတာတွေ ရှမ်းတာတွေကရှိသေးတယ်..။ အဲဒါ အင်မတန်အရေးကြီးတယ် စာတစ်ပုဒ်မှာ သတ်ပုံမှားတာတစ်ခုပါသွားတာနဲ့ စာဖတ်သူရဲ့ စိတ်ကထိကအောက်ဖြစ်သွားပြီပဲ...။ ကျမကိုယ်တိုင်လဲ စာအုပ်ဝယ်ဖတ်တဲ့အခါ အဲလိုအမှားတွေကြုံရင် ဒီလိုပဲ ခံစားမိလို့ပါ...။ စာအုပ်တစ်အုပ်ဖြစ်လာဖို့ စာပြင်ဆရာကလဲ အရေးကြီးတဲ့ နေရာက ပါဝင်တာပါလားလို့ တစ်ဆက်ထဲသတိပြုမိလိုက်တယ် စာအုပ်မထုတ်ဖူးသေးပေမယ့်လဲ...။

ကျမတို့လို အွန်လိုင်းမှာပဲစာရေးသူအဖို့ကတော့ စာရေးသူလဲ ကိုယ်တိုင် စာပြင်ဆရာလဲ ကိုယ်တိုင် စာစစ်ဆရာလဲ ကိုယ်တိုင်ဖြစ်နေတော့ တခါတလေ အမှားကတော့ မကင်းဘူးပဲ...။ ဒါပေမယ့် ကျမကတော့ တင်ပြီးသားစာအဟောင်းတွေတချို့ဆို နှစ်ကြာနေပေမယ့် စာလုံးပေါင်းအမှားတွေကို ဘယ်ချိန်ဖတ်မိဖတ်မိ ချက်ချင်းသွားပြင်လိုက်တာပဲ...။ တွေ့လား အက်ဆေးအကြောင်း အက်ဆေးရေးရင်းက စိတ်ထဲ ခံစားမိသမျှရေးနိုင်သလောက်ချရေးလို့ရတယ်ဆိုတာ လက်တွေ့ပဲ...။

ဪ... တစ်ခုပြောဖို့ကျန်သေးတယ်..... စာအုပ်တွေကို ရာနဲ့ထောင်နဲ့ချီ ဖတ်ခဲ့ဖူးတဲ့သူတွေအများကြီးရှိလိမ့်မယ် စာချည်းပဲဖတ်မနေပါနဲ့လို့ ကိုယ်ဖတ်တဲ့စာက ကိုယ်တစ်ယောက်ထဲသိတာ တခြားသူတွေကိုမျှဝေဖို့ စာလည်းရေးပါလို့တိုက်တွန်းချင်ပါတယ်...။ 

_________________
Revolution will prvail
မိုးငွေ့

ငါမဟုတ်ဘူး.....

🎵 နင်လိုချင်တာ ငါမဟုတ်ဘူး...🎶

🎵နင်လိုချင်တာ ရက်ပ် သီချင်းတွေ.....🎶

အဲလက်စ်ရဲ့ တစ်ချိန်ကပေါက်ခဲ့တဲ့သီချင်းတွေထဲက တစ်ပုဒ်....။

ကျနော့်အတွက်နဲ့ ရက်ပ်သီချင်းတွေ နောက်ဆုံးပေါ်  Hip Hop တွေကို နားထောင်တတ်နေတဲ့ သူအတွက်... 🥰 

__________________
Revolution will prevail
မိုးငွေ့

ဆရာကျောင်းရဲ့ ရွှေဂူနီ.....

 (ပုဂံအစိမ်းရယ် အညိုရောင်ရွှေဂူနီရယ် ချစ်သောမျက်စိရယ်)

လှပတင့်တယ်ခြင်းဆိုတာ သူ့အခင်းအကျင်းနဲ့အတူ

အလိုလိုလှတာပဲ

ဒါက သူ့ ဂုဏ်သတ္တိမပါသေးဘူး....။

ဆယ်တန်းတုန်းက သင်ခဲ့ရတဲ့

သင်္ဃသူ့သမီး ကျောက်စာက

ဒီစေတီက တွေ့ကြရတာပဲ

ကျောက်စာထဲမှာ အချင်းချင်း

အမျက်အဣီ တစေ့မရှိ

ချစ်သောမျက်စိဖြင့် ရှုကြရာ၏ တဲ့....။

တစ်ယောက်နဲ့တစ်ယောက် ရန်ငြိုးမဖွဲ့ 

အမျက်မစောင်ကြဘဲ

ချစ်သောမျက်စိနဲ့ ကြည့်ကြပါတဲ့...။

ချစ်သောမျက်စိနဲ့ 

နှစ်တစ်ထောင်နီးပါး 

ဖြတ်သန်းလာတဲ့

ပုဂံခေတ်က ဒီစကားလုံးကို မှီတဲ့စကား

အခုထိမတွေ့သေးဘူး

ရိုးစင်းတယ် ထိမိတယ် ကျစ်လစ်တယ် 

လေးလုံးထဲပဲ ဒါပေမယ့်

အနက်အဓိပ္ပါယ်ရဲ့ နက်ရှိုင်းကျယ်ပြန့်မှုက

ကြီးမားတယ်....။

လူတစ်ယောက်ကို ချစ်တယ် ဆိုပါတော့

အဲဒီလူ ထိုင်နေလည်း ချစ်စရာ

ထသွားလည်း ချစ်စရာ

ခုန်ပေါက်နေလည်း ချစ်စရာ

ဘာလုပ်လုပ်မျက်လုံးထဲမှာ ချစ်စရာ

မုန်းနေလို့ကတော့

ထိုင်နေနေ ထသွားသွား

ခုန်ပေါက်နေလို့ကတော့

အမြင်ကပ်စရာ

ရိုက်ချင်လိုက်တာအထိ

ဖြစ်ရောမဟုတ်လား....။

ဒီတော့ ချစ်သောမျက်စိနဲ့

တစ်ယောက်ကိုတစ်ယောက်

ကြည့်ကြစမ်းပါတဲ့....။

ပုဂံခေတ်က မြန်မာတို့ရဲ့ စံလို့ပြောလည်းရတယ်

ရှေးမြန်မာတွေရဲ့ အိုင်ဒီယော်လော်ဂျီလို့ပြောလည်းရတယ်

မြန်မာတို့ရဲ့ ကျင့်ဝတ်တို့ လာရာလမ်းတို့လို့လည်း ယူလို့ရပါတယ်...။

သက္ကရာဇ်အတိအကျပါတဲ့ ကျောက်စာက

ရာဇကုမာရ်ကျောက်စာ

ပျူ မွန် ပါဠိ မြန်မာ

လေးဘာသာနဲ့ရေးထိုးခဲ့ပြီး

ခရစ်သက္ကရာဇ် ၁၁၁၃ ခုနှစ်က ရေးထိုးခဲ့ခြင်းဖြစ်လို့

အဲဒီရာစုမှာပဲ

ရေးထိုးခဲ့တဲ့ သင်္ဃသူ့သမီးကျောက်စာမှာ

ချစ်သောမျက်စိဆိုတဲ့

စကားလုံးကိုရေးထိုးနိုင်ခဲ့ပြီဆိုတာ

ရွှေဂူညီအစ်မတဲ့ ဓမ္မရံကြီးရဲ့တောင်ဘက် ကပ်ရပ်

နှစ်ဆူရှိတယ် တောင်ဂူနီ မြောက်ဂူနီတဲ့

ဒီလို မြက်ခင်းစိမ်းနဲ့ 

သာယာတဲ့ မနက်ခင်းရဲ့ ရှုချင့်စဖွယ် မြင်ကွင်းရဲ့အလယ်မှာ

တစ်ဆူပေါ်တက်ပြီး‌ နောက်တစ်ဆူကိုပြရင်း

ပုဂံခေတ်က အမတ်ကြီး သင်္ဃသူ့သမီးတွေရဲ့

စေတနာ သဒ္ဓါတရားနဲ့ ဉာဏ်ကြီးမားပုံကို

ကိုယ့်သားသမီးမြေးမြစ်တွေကို ပြောပြပေါ့

ကိုယ်ချစ်ခင်တဲ့သူ တစ်ယောက်ယောက်ကို 

ချစ်သောမျက်စိဆိုတဲ့ စကားလုံးအကြောင်းကို

ဒီစေတီလေးပြရင်း ပြောပြပေါ့....။

ဒီစေတီလေးရယ် ဒီမြက်ခင်းစိမ်းမြမြရယ်ပြရင်း

ဒီစေတီရဲ့ အလှူမှတ်တမ်းအတွက်‌ ရေးထိုးခဲ့တဲ့

ရေစက်ချအမျှဝေဆုတောင်းက

"ချစ်သောမျက်စိဖြင့်ကြည့်ကြပါ"ဆိုတဲ့

ဆုတောင်းစာသားဟာ ကိုယ့်နိုင်ငံ ကိုယ့်လူမျိုးရဲ့

ယဉ်ကျေးမှုသမိုင်းလမ်းကြောင်းထဲမှာ

ရှေ့လူတွေဖြည့်စွက်ခဲ့တဲ့ ချစ်သောမျက်စိလေ ကိုပြရင်း

ကိုယ်ဘာမျှမထည့်သွင်းနိုင်ခဲ့ပါလည်း

နောက်လူတွေကို

ဒီလို ချစ်သောမျက်စိကလေးတွေ

ထည့်သွင်းရတယ် ဆိုတဲ့အကြောင်းကိုတော့

သင်ကြားပေးခဲ့တယ်....။

ပုဂံအစိမ်းရယ်.....

ရွှေဂူနီရယ်.....

ချစ်သောမျက်စိရယ်.....

မျိုးဆွေသန်း

___________________________________

ဒီဘဲကြီးပျောက်နေတာကြာပြီ သူ့ပေ့ချ်လေးခနဖွင့်တုန်း ပုဂံဘုရားပုထိုးပုံတွေတင်တာ ရှားပါးကဗျာတွေတင်တာ ပန်းချီဆရာတော်တော်များများရဲ့ကားချပ်တွေတင်ပေးတာ သဘောကျလို့ သွားသွားကြည့်နေတာ...။ တကယ်က ကျနော်သူ့ပေ့ချ်က ပုဂံညနေခင်းပုံတွေသွား'မလာရင်း ဒီရွှေဂူနီကိုတွေ့လို့ ပို့စ်တစ်ပုဒ်အဖြစ် သိမ်းချင်တာပါပဲ...။

_______________________

Revolution will prevail

မိုးငွေ့

ပုဂံညနေ.....

အလွမ်းရဲ့ အရောင်ဟာ အဝါရောင်ဖြစ်လိမ့်မယ်လို့ ကျနော် အက်ဆေးတစ်ပုဒ်မှာရေးဖူးတယ်...။ 

ဒီပုံလေးကြည့်တော့ အဲဒီအက်ဆေးလေးသွားပြေးမြင်မိ....။

 

ကျနော့်ဘဝမှာ အများဆုံးရောက်ဖူးတဲ့ခရီးစဉ်က ပုဂံလို့ပြောရမှာပဲ ...။ မိသားစုနဲ့ အပေါင်းအသင်းသူငယ်ချင်းတွေနဲ့ အလုပ်ကိစ္စနဲ့ အကြိမ်ပေါင်းများစွာဘယ်နှစ်ကြိမ်မြှောက်လဲဆိုတာတောင် မမှတ်မိတော့ဘူး...။ ပုဂံနဲ့ ကျနော် ရေစက်ပါပုံရပါတယ်....။ ဒီအပေါ်ပုံနဲ့ အောက်က နှစ်ပုံက ကျနော့်ဖုန်းနဲ့ရိုက်ခဲ့တာ....။ ကျန်တဲ့ပုံတွေက ဆရာကျောင်းပေ့ချ်က ခွင့်ပြုချက်မယူဘဲ သွားမ'လာတာ...။ ရည်ရွယ်ချက်ကတော့ ပုဂံနဲ့ပတ်သက်တဲ့အမှတ်တရတွေ ရှုမျှော်ခင်းပုံတွေကို သိမ်းထားချင်ရုံသက်သက်ပါပဲ...။

ကျနော်က ပုဂံကိုဆောင်းရာသီမှာ အများဆုံးရောက်ဖူးနေကျ အောက်တိုဘာ နိုဝင်ဘာ ဒီဇင်ဘာလိုအချိန်မျိုးပေါ့...။ နွေမှာလည်းရောက်ဖူးခဲ့ပေမယ့် မိုးရာသီကိုတော့ ဒီတစ်ခေါက်ပဲရောက်သွားခဲ့တာ စိမ်းစိမ်းစိုစို တကယ့် ကန္တာရရဲ့ အိုအေစစ်လေးပါပဲ..။ 

2016 ပုဂံခရီးစဉ်က ဒီပုံထဲက ကျနော့် Fuji လေးယူမသွားလိုက်ရဘူး....

__________________

Revolution will prevail

မိုးငွေ့