မြူနှင်းများဆီရေးတဲ့စာ.....

ဒီဇင်ဘာဟာ နှင်းတွေကို အဖော်ခေါ်ပြီး ကျွန်တော့်ထံ
အလည်ထပ်ရောက်လာတော့မှာ
ဘယ်လိုအင်အားနဲ့ ကြိုဆိုရမလဲ
သူမ ကြိုက်တဲ့ တို့ဟူးနွေးတစ်ပွဲနဲ့လား


``````````````````````````

တစ်စုံတစ်ရာကို
ခင်ဗျား အကြာကြီးရပ်စောင့်ဖူးသလား....


````````````````````````

သိပ်တော့ မထူးခြားပါဘူး
ဘာမှမဖြစ်သလို နေတတ်တဲ့ နေရာမှာ
ကျွန်တော်က တော်တယ်မဟုတ်လား
နာကျင်ပျော်ရွှင်စွာပါပဲ
ခရီးတွေထွက်မယ် စာတွေဖတ်မယ်
တတ်အားသရွေ့လည်း ခင်ဗျားအကြောင်းတွေ
သတိတရ တွေးပစ်ဉီးမှာပါပဲ.....


``````````````````````

တကယ်လို့ တစ်ယောက်ယောက်က မင်းကို နာကျင်စေတဲ့အခါ
အိမ်မှာနေရင်း အိမ်ပြန်ချင်တယ်လို့ ခံစားလာရတဲ့အခါ
စားနေကျ ရှမ်းခေါက်ဆွဲက ပုံမှန်မဟုတ်တော့ဘူးလို့ ထင်တဲ့အခါ
မိုးကုပ်စက်ဝိုင်းကို ငေးရင်း
အဝေးကြီးကို ပြေးထွက်ချင်လာတဲ့အခါ
အားမနာပါနဲ့
ငါ့ဆီ ဖုန်းခေါ်ပါ...
ငါ့ဆီကို ဖုန်းခေါ်ပါ....


`````````````````````

ပြောပြချင်တယ်
တကယ်က
မင်းကို မင်းသိခဲ့ရတာထက် ငါအများကြီးပိုချစ်ခဲ့ကြောင်း


````````````````````

တစ်ယောက်ယောက်ကို
အရမ်းချစ်မြတ်နိုးပစ်လိုက်ဖို့
ကျွန်တော်တို့မှာ
အကြောင်းပြချက်တွေ လိုလို့လား....


```````````````````

မြူတွေဝေနေတဲ့ မြို့လေးရှိတယ်
အတူလျှောက်ဖူးတဲ့ လမ်းလေးရှိတယ်
ပြန်မလာသူတစ်ယောက်ရှိတယ်
ဘဝက ကြေကွဲဖို့ အတော်ထိုက်တန်နေပါပြီ...


````````````````````

တကယ်ပြောတာ
ထပ်ဝေးရမယ်ဆိုရင်
ဘယ်ကမ္ဘာမှာမှ ပြန်မဆုံချင်တော့ဘူး...


````````````````````

ဒီစာရေးပြီးရင် ကျွန်တော်ဖုန်းခေါ်လို့ရမလား
ခံနိုင်ရည်မရှိတဲ့ အလွမ်းသီချင်းတွေ
နားထောင်မိတယ်...
ပြိုကွဲနေတဲ့ တိမ်တွေ ငေးမိတယ်
ကြေ ကွဲ...။
ခေါ်သံတေွ မင်းမကြားနိုင်တော့ဘူး
ဘဝထဲက အပြီးထွက်သွားတဲ့သူကို
တိတ်တိတ်ကလေး ရင်ဘတ်ထဲ ထည့်ဝှက်ထားလို့ရလား
ရူးတယ်....


`````````````````

နှစ်တွေကြာသွားခဲ့ရင်
ကိုယ့်မှတ်ဉာဏ်ထဲ မင်းဘယ်လောက်ကျန်မလဲ
မင်းမှတ်ဉာဏ်ထဲမှာရော
ကိုယ်ဘယ်လောက်ကျန်မလဲ


@@@@@@@@@@


မိုးတွေရွာတဲ့အခါ
နှင်းတွေကျတဲ့အခါ
ရွက်ဝါတွေ ကြွေတဲ့အခါ
တစ်ယောက်ယောက်ကို စူးစူးနစ်နစ်သတိရပစ်ဖို့ပေါ့....

ခင်ဗျားတို့လည်း အကျအရှုံးများတဲ့ ချစ်ခြင်းမေတ္တာနဲ့ လွဲပါစေပေါ့....။

#စပ်ခွန်ဇ
#ခင်ဗျားကို ကျွန်တော်ချစ်တယ်......


မိုးငွေ့

My Favorite Photos....(3)

 လွန်ခဲ့သော ၁၀နှစ်က ချောင်းသာ ဖိုးကုလားကျွန်းမှာ



 

 အပေါ်ပုံနဲ့တူတူပဲ Belle Resource Hotel မှာ




လွန်ခဲ့သော(၃၁.၁၂.၁၉၉၉) နှစ်၂၀ ကျော်တုန်းက ချောင်းသာမှာ
ဒီပုံထဲက ဦးထုပ်ကိုမြင်တော့ ပြီးခဲ့တဲ့ ဖေဖော်ဝါရီ ဒါနန်းအသွားလေဆိပ်မှာ
အဲလိုမျိုးလေးထပ်ဝယ်ဖြစ်တော့ ကိုယ့်ဦးထုပ်ကို ဓါးပြဦးထုပ်လို့ပြောခဲ့တဲ့ MMHK(IA)ကို သတိရမိ

 ချောင်းသာဖိုးကုလားကျွန်းမှာ ရုပ်ရှင်လာရိုက်တဲ့ အဲတုန်းက my crush နဲ့

(၃၁.၁၂.၁၉၉၉)ချောင်းသာ သဲဖြူကျွန်းမှာ 

 ၂၀၀၆ မန္တလေးက ညီမဝမ်းကွဲ မင်္ဂလာဆောင်ကိုအသွား လေယာဉ်ထဲ

update မှာ အကြိုက်ဆုံးပုံ ၁.၂.၂၀၂၀ မနက်ပိုင်းမှာ ညီမလေး မင်္ဂလာဆွမ်းကျွေးပြီးလို့
ညနေဒင်နာသွားဖို့ ရိုက်ထားတဲ့ ပုံ

၂၀၁၉ ဒီဇင်ဘာလက CW ဆိုင်မှာ

 ခြေသည်းလက်သည်း လုံးဝမဆိုးတော့ဘူးလို့ ဆုံးဖြတ်ချက်မချခင်တုန်းက (၂၀၁၈) 

ဒီဖိနပ်ပုံလေးပြန်ကြည့်တော့ ကျွန်မရေးခဲ့ဖူးတဲ့ 

ကျစ်ဆံမြည်းကြိုးဖိနပ် အက်ဆေးလေးတောင်သွားသတိရမိ

မိုးငွေ့

မပျော်ရွှင်ခြင်း မိုးရေစက်များ......

မတတ်နိုင်ခဲ့ဘူး
မိုးတွေ မရွာဖို့ရယ်
သတိမရဖို့ရယ်
တစ်ယောက်တည်းဆိုတဲ့ အတွေးကနေ
ထွက်ပြေးဖို့ရယ်...။

`````````````

တစ်ခါလောက်တော့ ဝန်ခံကွယ်
တိုးတိုးတိတ်တိတ်ဖြစ်ဖြစ်ပေါ့
ကိုယ့်ကို တစ်ခါက သိပ်ချစ်ခဲ့ဖူးတယ်ဆိုတာမျိုး...။


`````````````````

အချိန်အခါမဟုတ် မင်းရှိတဲ့ မြို့လေးမှာ မိုးတွေ ရွာတဲ့အခါ
ကိုယ့်သတိရခြင်းတွေ ငွေ့ရည်လာဖွဲ့တယ်လို့ တွေးပါ...


``````````````````

မနက်ဖန်ဆိုတာတော့ သိပ်ဝေးလွန်းပါတယ်
မသေခင်လေးတော့ မင်းကို သတိရရမှာပဲ....


`````````````````

ကျွန်တော်ဟာ တိမ်တွေလိုပါပဲ
အချိန်တန်ရင် လွင့်ပါးပျောက်ကွယ်ပေးရမှာ
ခင်ဗျားကမ္ဘာလေး သာယာဖို့
ကြည်ကြည်လင်လင်ရှိဖို့....


`````````````````

ချစ်ခြင်းမေတ္တာဟာ
နေရာကွက်ကျားရွာတတ်တဲ့
မိုးပြေးလေးပဲ ဖြစ်မှာပါ...
ကျွန်တော်ကတော့
မိုးခေါင်ရေရှား ရပ်ဝန်းလေးပေါ့...။


`````````````````````

ခင်ဗျားကလွဲရင် ဘာမှသိပ်မက်မက်မောမော
ပြန်မလိုချင်တဲ့ ဘဝမျိုးမှာ ကျွန်တော်နေထိုင်ပါတယ်...။


````````````````````

ပင်လယ်ကြီး ခြားစရာမလိုပါဘူး
မိုင်တိုင်တွေလည်း ထောင်မချီပါဘူး
"လူကြီးမင်းခေါ်ဆိုသော တယ်လီဖုန်းမှာ...."
အစရှိသဖြင့်ပေါ့...
Blacklist ထဲမှာတင် ဘဝအဆက်ဆက်ဝေး...။


`````````````````````

ကျွန်တော်ဟာ ဘယ်သူစိုက်လို့ပဲပွင့်ပွင့်
ရနံ့ကို ခင်ဗျားတစ်ယောက်သာ ရစေလိုသော
ပန်းတစ်ပွင့်ဖြစ်ချင်တယ်...။


``````````````````````

မိုးဉီးကျမှ ပိတောက်တွေ အလုအယက်ထပွင့်တယ်
ပျော်ပါတယ်
မင်းလည်း နောက်ကျမှ
ကိုယ့်ဆီ ပြန်ရောက်မလာဘူးလို့ ဘယ်သူပြောမလဲ
ဒါပေမဲ့
ပြန်လာဖို့ပဲ လိုတာပါ
ကိုယ်ဆိုတာ မင်းဘယ်တော့မှ
အိမ်ပြန်နောက်ကျမှာ မဟုတ်သော ဇာတိမြို့လေးပေါ့
ပြန်လာတိုင်း နွေးထွေးနေမှာပါပဲလေ....။


@@@@@@@@@@


မိုးတွေရွာတဲ့အခါ
နှင်းတွေကျတဲ့အခါ
ရွက်ဝါတွေ ကြွေတဲ့အခါ
တစ်ယောက်ယောက်ကို စူးစူးနစ်နစ်သတိရပစ်ဖို့ပေါ့....

ခင်ဗျားတို့လည်း အကျအရှုံးများတဲ့ ချစ်ခြင်းမေတ္တာနဲ့ လွဲပါစေပေါ့....။

#စပ်ခွန်ဇ
#ခင်ဗျားကို ကျွန်တော်ချစ်တယ်......


မိုးငွေ့

Self Quarantine မှာဘာတွေလုပ်ဖြစ်လဲ.....

Self Quarantine လို့သာပြောရတာ ကျွန်မအတွက်တော့ အပြည့်အဝ Self Quarantine မဟုတ်ဘူး....။ ကျွန်မတို့ရုံး ပြီးခဲ့တဲ့မတ်လနောက်ဆုံးပတ်ကတည်းက ဝန်ထမ်းအကုန်နီးပါး အိမ်ကို ကွန်ပျူတာသယ်သူသယ် စာရင်းစာအုပ်တွေသယ်သူသယ် နယ်ပြန်သူပြန်နဲ့ အလုပ်ကို work from home လုပ်ကြတယ်....။ ကျွန်မကတော့ ရုံးနဲ့အိမ် ဟိုဖက်ဒီဖက် တာဝါမို့လို့ ဘာမှမသယ်ဘဲ တစ်ယောက်တည်း ရုံးတက်ပါတယ်...။ ဘဏ်သွားစရာရှိ Mask တပ် လက်သန့်ဆေးဆောင် ကိုယ့်ကိုယ်ကိုတော့ လုံခြုံမှုအပြည့်ယူပြီးထွက်တယ်...။ လက်တွေလည်း ဘာကိုင်ကိုင်  ကိုင်ပြီးတိုင်းဆေးလွန်းလို့ လက်တွေခြောက်ကပ်ကွဲအက်ပြီး ယားလာတယ်.....။ အဲဒါနဲ့ hand cream ပါထပ်ကူရပြန်ရော ပစ္စည်းတစ်ခုကိုင်ပြီးတိုင်း (ကျွန်မက ပိုက်ဆံကိုင်ရတာများတယ်) လက်ဆေး တစ်ရှူးနဲ့သုတ် သုတ်ပြီးသားတစ်ရှုးအစိုနဲ့ အရက်ပျံဆွတ် ဖုန်းတွေ ဘောလ်ပင်တွေ ဂဏန်းတွက်စက် ကီးဘုတ် အကုန်သုတ်တော့တာ အဲဒါနဲ့လုံးချာလိုက်နေတာ တနေ့လုံး....။

အိမ်ပြန်ထမင်းစားရင်လည်း ဓါတ်လှေခါးစီးရင် ခလုတ်တွေကိုလက်နဲမထိအောင် ထီးနဲ့တို့တယ် အိမ်ရှေ့ရောက်လို့ ဘဲလ်တီးလဲ ထီးနဲ့တို့တယ် တံခါးကိုလုံးဝမကိုင်ဘူး အိမ်မှာရှိတဲ့အမေကို ဖွင့်ခိုင်းတယ်..။ အမေဖွင့်ပြီးလဲ သူ့ကိုလက်ဆေးခိုင်းရသေးတယ်...။ ကိုယ်တိုင်လည်း လက်ပြေးဆေး ပါလာတဲ့ထီး ပိုက်ဆံအိတ် ဖုန်းတွေကို အိမ်ဝင်ပေါက်မှာအဆင်သင့်ထားထားတဲ့ အရက်ပျံကို wet tissue နဲ့ဆွတ်ပြီးသုတ်တော့တာ...။ ဒါက နေ့လည်ပိုင်းထမင်းစားပြန်လုပ်တာ ညနေရုံးအပြန်ဆို အိမ်သော့ ရုံးသော့အကုန် ဆပ်ပြာအမြှုပ်များများနဲ့ဆေး အိမ်ရှေ့ဝရံတာက အကျနေဆိုတော့ အဲမှာ နေပူပြန်လှန်း ထီးကိုလည်း ဟိုတို့ဒီတို့လုပ်ထားတော့ ထီးကိုလည်း တို့ထားတဲ့နေရာတွေ အရက်ပျံပွတ် ဖွင့်ပြီးနေပူလှမ်း...ခါတိုင်း နေထိုးမှာစိုးလို ကိုယ်အိပ်တဲ့ အိပ်ခန်းဆို လိုက်ကာအပြည့်ပိတ်ထားတာ ခုဆို အကုန်ဖွင့် အိပ်ယာကို နေများများထိပါစေ အဲလိုလုပ်ရတာ...။ COVID 19 အမွှေစိန်နဲ့ စည်းကမ်းမလိုက်နာတဲ့ ပိုးရှိသူ ကူးစက်သယ်ဆောင်သူတွေကြောင့် လူက အမြဲသတိအနေထားကိုရှိနေတာ.....။ 

တစ်နေ့တစ်နေ့လဲ အစက ကျန်းမာရေးဝန်ကြီဌာနက positive ဖြစ်သူ လူဦးရေကို ညသန်းခေါင်မှာကြေငြာတတ်တော့ ကျွန်မမှာ ညဖက်ဆို မအိပ်နိုင် အဲသတင်းလေးပို့ပေးမယ့်သူကိုမျှော်ရသေးတာကိုး ကိုယ်က ဖဘမသုံးတော့ update မဖြစ်ဘူးဖြစ်နေတာ အခု အမေစုတောင် ဖဘအကောင့်ဖွင့်လိုက်ပြီပြောတယ်...။ ကျွန်မကို ချစ်ခင်သူ စာဖတ်သူလဲဖြစ်တဲ့တစ်ယောက် အမြဲသတိတရနဲ့ သတင်းပေးနေတော့ ဖဘဖွင့်ဖို့အစီစဉ်ကိုမရှိဘူး...။ လူတွေဟာ အန္တရာယ်ဆိုး ကပ်ဆိုးတွေနဲ့ကြုံလာရင် စိတ်ရင်းမှန်တွေ အတ္တတွေ လောဘတွေ အလိုလိုပေါ်လာတတ်တယ်...။ ဒီလိုချိန်မှာ ကိုယ့်ကို သတိတရနဲ့ ခင်မင်လို့ သတိပေးစကားပြောသူတွေရှိသလို ကိုယ်တိုင်ကလည်း ချစ်ခင်ရသူများကို ဘာသိရသိရ ဖုန်းဆက်ပြောဖြစ်တယ်...။ ကျွန်မ ဗိုင်ဘာမှာဆို Group တွေများတယ် Cousin Group  အရင်ရုံးအဟောင်းကအဖွဲ့တွေ ရုံးသစ်အဖွဲ့တွေ ဒီအကြောင်းတွေပဲပြောနေကြတာ...။ ကိုယ်သိတာကြားတာ သူသိတာကြားတာဝေမျှတော့ အဆင်ပြေပါတယ်.... ဖဘမရှိလဲ....။ တချို့အမျိုးတွေကျတော့ ကိုယ်ကသတိပေးတာ သတင်းတစ်ခုရလို့ forward လုပ်တာတောင် အဖက်မလုပ်သူရှိတယ်...။ အဲလိုလူဆီကျတော့ ကျွန်မက နောက်ထပ်မပို့ဖြစ်တော့ဘူး....။ တစ်ဦးကမေတ္တာ တစ်ဦးကစေတနာဖြစ်နေရမယ့်အချိန်မှာလေ....။

Covid 19 ပြီးရင်တော့ လူလဲ ဝက်ဖြစ်မယ်ထင်တယ်.....။ အားရှိအောင် ကိုယ်ခံအားကောင်းအောင်ဆိုပြီး ထမင်းကိုလျှော့မစားရဲရင်းကလေ....။ ဒါပေမယ့် ရေချိုးခန်းအဝမှာထားတဲ့ ပေါင်ချိန်စက်ကတော့ အမြဲ ဒီဂဏန်းပဲပြနေတာဆိုတော့ ပေါင်ချိန်တော့မတိုးလာဘူး... ခြေထောက်ချိတ်ထိုင်ရင်တော့သိသာလာတယ် ပေါက်တွင်းအဆီတွေတက်နေတယ်ဆိုတာ...။ အိမ်မှာနေရင် ထိုင်ချည်းပဲမနေဖို့ you tube မှာတော့ မျိုးစုံပဲ ဘယ်သူတွေ တနေ့တနေ့ဘာတွေလုပ်လည်းဆိုတာ...။ မုန့်လုပ်စားသူ စာဖတ်သူ သီချင်းဆိုသူ ရုပ်ရှင်ကြည့်သူ live လွှင့်သူ စသဖြင့် အခု အဆိုတော် Ar T ဆို လေ့ကျင့်ခန်းလုပ်ပြတယ်....။ ကျွန်မလည်း ပေါင်ဆီကျအောင်လို့ အောက်ကပုံအတိုင်း leg work out လေ့ကျင့်ခန်းစလုပ်နေပြီ....။ ခါတိုင်းက Yoga ကစားနေကျသူ  မကစားဖြစ်တာကြာပြီ အပျင်းတစ်နေတာက ခပ်များများ....။ ရေကူးချင်တာ Covid က ကလိုရင်းကိုကြောက်တယ်လို့ပြောထားတာတွေ့တယ် ရေကူးကန်မှာ ကလိုရင်းတွေထည့်ထားတော့ အဆင်ပြေပေမယ့် ကျွန်မသွားကူးမယ့် တဖက်တာဝါက ရေကူးကန်က နိုင်ငံခြားသားတွေများတော့ မီးမီးကြောက်ကြောက်လေ...။ ခုချိန်မှာ ဘာမှမမြင်ရတာမို့ ဒီဗိုင်းရပ်စ်ပိုးဟာ လူတွေကို အချင်းချင်းသံသယစိတ်ထားထားမှရမယ့်ကိန်းလေ...။ တစ်အိမ်ထဲမှာနေတာတောင် Social distance နေနေရတာမဟုတ်လား....။ ခုလိုချိန်မှာ couple တွေအတွက် အဆင်မပြေပေမယ့် Single is the best လို ဟစ်ကြွေးနေကျလူတွေအတွက်တော့ အေးဆေးပေါ့...။

အိမ်မှာ စားစရာတွေလုပ်စားတာတော့အများကြီးပဲ ကော်ပြန့်ကြော်စား ငှက်ပျောသီးကိတ်လုပ် ရှမ်းထမင်းချဉ်လုပ် သူငယ်ချင်းလက်ဆောင်ပေးထားတဲ့ Waffle စက်လေးနဲ့ Waffle ကို ထိုင်းစတိုင်လ် အုန်းသီးဆံဖတ်တွေထည့်ပြီးလုပ် ရှမ်းခေါက်ဆွဲ ယိုးဒယားအုန်းနို့မုန့်ဟင်းခါး.. ငါးပိရည်ထမင်းသုပ်နဲ့ ကြက်ကြော် စသဖြင့်ပေါ့ ပုံတွေပြရင် သရေယိုကုန်မှာစိုးရတယ်...။

ဘာပဲဖြစ်ဖြစ် ဒီကပ်ကြီး အမြန်ဆုံးပပျောက်နိုင်ပါစေလို့ ဆုတောင်းရုံကလွဲပြီး မတတ်နိုင်တော့ပြီ....။ အော် ဒါနဲ့ ဘာလို့မတတ်နိုင်ရမှာလည်း အိမ်မှာနေ ဘယ်မှလျှောက်မသွားဘဲ လက်ခဏခဏဆေးပေး အဲဒါလည်း ကမ္ဘာကြီးကို ကယ်တင်ရာရောက်ပါတယ်....။ အားလုံးကိုယ်ကျန်းမာ စိတ်ချမ်းသာကြပါစေလို့.....။

မိုးငွေ့

အဝါရောင် နွေအဟောင်းများသို့.....

ဇာတိရဲ့ ကဗျာလေးလိုပေါ့
ချစ်ရပါသော မျက်ဝန်းညိုလေးရေ
ကျွန်တော်တို့ တစ်နေရာတည်း အကျယ်ကြီးဝေးတယ်....

ဒီတစ်နွေမကုန်ခင်တော့
ကျွန်တော်အဝေးကြီးကို ထွက်သွားတော့မယ်
ကျွန်တော်တို့ ရင်းနှီးဖူးကြတယ်
ဒီလောက်ပါပဲ

ခင်ဗျားဟာ အခုရွာနေတဲ့ မိုးပြေးလေးပါပဲ
ပြီးတော့
ကျွန်တော်ကတော့ ခင်ဗျားမသွားဖြစ်တဲ့ ခရီးလေးပေါ့...။


`````````````````

အခု ကိုယ်သတိရနေတာ
အခု မင်းမဟုတ်ဘူးကွဲ့...
"အတိတ်က....မင်း"
ဟိုး...အတိတ်တွေထဲက မင်း


``````````````````

အချစ်ဆုံးဆိုတာဟာ
ကိုယ့်ဆီမှာ ဖြစ်ထွန်းပြီး ကိုယ်ရှိရာ အရပ်မှာ ရွာမချတဲ့
ကိုယ်ခဏခဏငေးကြည့်မိပါသော
အဖြူရောင်တိမ်တိုက်လေးသာ ဖြစ်ရတယ်....။


``````````````````

ကျွန်တော်က အစွဲအလမ်းကြီးတယ်
ပြီးရင် သတိလည်းကောင်းတယ်...
လျှောက်ခဲ့တဲ့ လမ်းတွေကို ပြန်လှည့်မကြည့်တတ်ပေမယ့်
ကျောပေးရက်နဲ့ကို ပြန်မြင်နေရတဲ့ မှတ်ဉာဏ်တွေရှိတယ်
တစ်ခါတစ်ခါကျ အကြောင်းမဲ့
အကျယ်ကြီး အော်ရယ်မိတယ်
တစ်ခါတစ်လေကျလည်း တိုးတိုးလေး ဝမ်းနည်းနေတတ်တယ်
တစ်ယောက်တည်းပေါ့....။
ကျွန်တော်ဟာ အဲဒီလို ထိလွယ်ရှလွယ် ရော်ရွက်ဝါလေးပါ
တစ်စုံတစ်ယောက်ကို အရမ်းသတိရမိတဲ့အခါတွေ ရှိပေမယ့်
တစ်ယောက်ယောက်ကို ပြန်လာစေချင်တာမျိုးရယ်တော့
မရှိတော့ဘူး....။
တကယ်တမ်းက ကျွန်တော်တစ်စုံတစ်ခုကိုပဲ ပြန်လိုချင်တာပါ
ထိုက်တန်တယ်ထင်ပြီး အိတ်သွန်ဖာမှောက် ပုံအောလိုက်တဲ့
ကျွန်တော့်ချစ်ခြင်း မေတ္တာပေါ့....။


`````````````````````

ယုံပါ
ကိုယ်ရေးဖြစ်တဲ့ သတိရခြင်းစာစုတွေဟာ
မင်းကို ရည်ရွယ်တာ ဖြစ်ကြောင်းပေါ့
လောကဓံက ထင်တာထက် ပိုရက်စက်ပါတယ်
မိုးတွေ မရွာပါဘဲ
ကျွန်တော့်ကို သူရှာမတွေ့ခဲ့ပါဘူး....။

ပြန်မလာချင်သူအဖို့
အမှတ်တရတွေဟာလည်း ဘယ်လိုမှ
အသုံးမဝင်နိုင်တော့ပါဘူး...။
သူက ကျွန်တော်နဲ့ဝေးရာကို ပြေးသွားတယ်
နောက်ပိုင်း
ကျွန်တော်လည်း သူနဲ့ဝေးရာ ပြေးခဲ့ရတာပါပဲ
မှားပါတယ်
အဝေးကြီးမှာ လွတ်မြောက်ခြင်းကို မတွေ့ခဲ့ပါဘူး
သူရယ်
ကျွန်တော်ရယ်
သတိရခြင်းတွေရယ်
နောင်တတရားရယ်။

စိတ်ဒဏ်ရာဟာ မီးတောင်တစ်ခုလိုပဲ
ဘယ်အချိန်ထပေါက်ကွဲမလဲဆိုတာမျိုး
ဘဝကလည်း အမြဲတမ်းချောက်ကမ်းပါးစွန်းမှာ
အိပ်မက်အသေတွေ ဖက်ပြီး
ခုန်ချပစ်ချင်စရာ..။


``````````````````

နှစ်ကာလတွေ အများကြီး
သတိရနေခဲ့ရတာ.....
တစ်ခါတစ်လေတော့လည်း ကြားချင်ပါတယ်
သတိရပါတယ်ဆိုပြီး
အဝေးကြီးက လွင့်လာတဲ့ အသံလေးကို....


```````````````

မှတ်မှတ်ရရ ပြောရရင်
ကျွန်တော်တို့ Couple shirt မဝတ်ဖူးဘူး
နှစ်ယောက်တွဲပြီး ဓါတ်ပုံမရိုက်ဖူးဘူး
ပြီးရင်
အချို့ အချို့ Relationship တွေမှာ ရှိလေ့ရှိတဲ့
အမှတ်တရမျိုး မရှိသလောက်ရှားပါတယ်
ဒါပေမယ့်လည်း
ကျွန်တော်တို့ အမှတ်တရတွေက ရင်ထဲမှာ ရှိနေဆဲပဲ
အဖြစ်အပျက်တွေ
ဘဝအချိုးအကွေ့တွေ
အချို့က အမည်းစက်တွေ အမှားတွေ

တစ်ချိန်မှာ ပြန်ထွက်သွားမှာကို သိသိနဲ့
သူ ကျွန်တော့်ဘဝထဲ ပြေးဝင်ခဲ့တယ်
တစ်ချိန်မှာ ပြန်လက်လွှတ်ရမှာ သိသိကြီးနဲ့
ကျွန်တော်လည်း ဖက်တွယ်ခဲ့မိတာပါပဲ
ပိုင်ဆိုင်ခဲ့ဖူးသလိုလိုနဲ့
ဘယ်တုန်းကမှ တစ်ယောက်ကို တစ်ယောက်
မပိုင်ဆိုင်ခဲ့ကြဘူး
ကြေကွဲဖွယ်အတိ။

အချစ်ကဆန်းပါတယ်
တစ်ရက်လောက် ပိုချစ်ရ ချစ်ရဆိုတဲ့ စိတ်မျိုးနဲ့
ကိုယ့်ဒဏ်ရာတွေ ကိုယ်ဖန်တီးခဲ့ရတာ ပျော်ပါတယ်...။


````````````````````

ကျွန်တော့် ပျော်ရွှင်ခြင်း ဝမ်းနည်းခြင်းဆိုတာ
ခင်ဗျားမျက်ဝန်းထဲက ရာသီဉတုပါပဲ...


````````````````````

စိတ်မကောင်းစရာပဲ
တင်းတင်းကျပ်ကျပ်ပွေ့ဖက်ထားတဲ့ကြားကနေ
နွေဉီးဟာ ကျွန်တော့်ဆီက ခုန်ထွက်သွားခဲ့....။


@@@@@@@@@@


မိုးတွေရွာတဲ့အခါ
နှင်းတွေကျတဲ့အခါ
ရွက်ဝါတွေ ကြွေတဲ့အခါ
တစ်ယောက်ယောက်ကို စူးစူးနစ်နစ်သတိရပစ်ဖို့ပေါ့....

ခင်ဗျားတို့လည်း အကျအရှုံးများတဲ့ ချစ်ခြင်းမေတ္တာနဲ့ လွဲပါစေပေါ့....။

#စပ်ခွန်ဇ
#ခင်ဗျားကို ကျွန်တော်ချစ်တယ်......


မိုးငွေ့