ခရေတွန်ရဲ့ ကဗျာငယ်လေးတွေကို မဖတ်ခင် ကျွန်မတို့ဘယ်လို ခင်မင်ရင်းနှီးခဲ့တယ်ဆိုတဲ့ အကြောင်းလေး နည်းနည်းပြောပြချင်ပါတယ်...။ ဟိုတုန်းက ဘလော့လောကကြီး စည်ကားသိုက်မြိုက်ခဲ့တုန်းက ဘလော့ဂါတွေဟာ ဘလော့ရိုးလ်မှာရှိတဲ့ စီပုံးလို့ခေါ်ကြတဲ့ (Chat Box) မှာတင် စကားပြောအာလူးဖုတ်ခဲ့ကြတာမဟုတ်ဘူး ဖေ့စ်ဘုတ်မှာလည်း တရုန်းရုန်းရှိခဲ့ကြတာ....။ ဘလော့မှာသာ အခု ခြောက်ကပ်သွားတာ ဖဘမှာတော့ ခုချိန်ထိ စည်ကားနေကြဦးမယ်ထင်ပါတယ်....။ ကျွန်မကသာ ဖဘမသုံးတော့လို့ မသိရတာလေ...။ အဲချိန်တုန်းက ကျော်ကျော်လို့လည်းခေါ်ကြတဲ့ ခရေတွန်ဟိန်းကို သားတွန် တွန်တွန် သားသား စသဖြင့် ချစ်စနိုးခေါ်ကြတယ်သူ့ကို....။ ဘလော့ဂါတွေထဲမှာ အသက်အငယ်ဆုံးဖြစ်နေတာလည်းပါတာပေါ့...။ အဲတုန်းက သားတွန်က အန်တီတွေ ၊ဦးလေးတွေ၊ ဘကြီးတွေတိုင်းရဲ့ မွေးစားသားလေးတစ်ယောက်ဆိုပါတော့...။ အဲဒီထဲမှာ ကျွန်မလည်း သားတွန်ရဲ့ မေမေတစ်ယောက်ဖြစ်ခဲ့ပါတယ်...။ ခုတော့ သားသားနဲ့က ဖဘမသုံးတော့လို့ အဆက်သွယ်ပြတ်သွားခဲ့တာ...။ သားတွန်က စာသိပ်တော်တဲ့အပြင် အနုပညာမှာလည်း ခေသူလေးမဟုတ် ကဗျာလှလှလေးတွေ အက်ဆေးလေးတွေရေးတာ သိပ်....ကောင်းတယ်...။ ခုချိန်ထိလည်း သူကျောင်းမှာလေ့လာသင်ယူနေတဲ့ စိတ်ပညာပိုင်းဆိုင်ရာဗဟုသုတ ဆောင်းပါးလေးတွေကို မကြာမကြာတင်ပေးတတ်တယ်...။ ခုတင်ပေးတဲ့ ကဗျာငယ်လေးတွေက သားတွန်ရဲ့ ဘလော့မှာတင်မထားဘူးလို့ထင်တယ် ဖဘသုံးနေစဉ်တုန်းက သူ့ Notes ထဲကနေ ကျွန်မခွင့်တောင်းပြီးကူးယူထားခဲ့တဲ့ ကဗျာလေးတွေပါ...။ ကျွန်မက ကဗျာကို ဟုတ်တိပတ်တိမရေးတတ်ပေမယ့် သူများရေးတဲ့ ကဗျာလေးတွေကိုတော့ ချစ်တယ်...။
သားတွန်ရဲ့ မွေးစားဖခင် နဲ့ မိခင်တွေထဲမှာ ကျွန်မရဲ့ အစ်ကိုကြီး ကိုအောင်သာငယ်နဲ့ အစ်မCKA (ချစ်ကြည်အေး) လည်းပါတယ်...။ ကိုကြီးငယ်က ကျွန်မနဲ့ မွေးနေ့တူ အစ်ကိုတစ်ယောက်ပါ...။ အဲတုန်းက ဖဘမှာ ကျွန်မနဲ့မွေးနေ့တူတဲ့သူတွေက ကိုကြီးငယ်ရယ် ခေါင်ခေါင်ရယ် တင်ထက်ဗိုရယ် နောက်ထပ် ညီမလေးတစ်ယောက်က ပေါက်စီ....။ မွေးနေ့ရောက်တိုင်း ကျွန်မတို့မွေးနေ့တူ မောင်နှမတွေ Wish တွေလုပ်ကြ နှုတ်ဆက်ကြနဲ့ ပျော်စရာကြီးပေါ့...။ အစ်မချစ်က မွေးနေ့တူမဟုတ်ပေမယ့် ရာသီခွင်တူတဲ့ အစ်မအရင်းတစ်ယောက်လိုချစ်ခင်ရတဲ့ အစ်မတစ်ယောက်ပါ...။ ဒီအကြောင်းလေးကတော့ သားတွန်နဲ့ဆက်စပ်လို့ပြောပြရုံသက်သက်ပါ...။ သားတွန်စာတေွပြန်ဖတ်ချင်သူများအတွက် ဟောဒီမှာ Kind to Earth လင့်ချပေးထားပါတယ်....။
မိုးရွာခြင်းအနုပညာ(၁)
သိမ့်ကြည်တဲ့ရသ
လှလှကလေးမှောက်ချလို့
မြေပြင်ပေါ်ခြေအကျဝယ်
တမ်းတမဆုံး....။ ။ (Craton)
အဲတုန်းကရာသက်ပန် စာဖတ်သူလေးရဲ့မှတ်ချက်ကတော့ ဒီလို
အနှိုင်းမဲ့ said (4.6.2016)
လှလိုက်တဲ့ ကဗျာ
ဖျောက်ဆိတ်ဆိတ်ညနေ
မှိုင်းခိုရီ ပြာသီလို့ဝေ
ရာသီပီတဲ့လေ....
မိုးစက်ငယ်ထွေးသန်း
စကားဖြူငယ်စွင့်ကာလန်း
ပွင့်လွှာငယ်ငယ်ချမ်း....။ ။ (Craton)
အဲတုန်းကရာသက်ပန် စာဖတ်သူလေးရဲ့မှတ်ချက်ကတော့ ဒီလို
အနှိုင်းမဲ့ said (4.6.2016)
စကားလုံးတွေအရမ်းလှတယ်...
မိုးရွာခြင်းအနုပညာ(၃)
ကျွန်မကိုမိုးပေးဖို့ရာ ပိန်းကြာရွက်ကြီး သူသွားခူးသည်
စောင့်နေသောကျွန်မသည် မိုးရွှဲရွှဲစိုလေ၏
ပိန်းကြာရွက်ပါလာသည်ဖြစ်စေ မပါလာသည်ဖြစ်စေ
ကျွန်မမိုးစိုများသည်ဖြစ်စေ နည်းသည်ဖြစ်စေ
"ကျွန်မအတွက်"ဟူသော အသိစိတ်ကလေးကို နင့်နေအောင်ချစ်သည်....။ ။ (Craton)
မိုးရွာခြင်းအနုပညာ(၄)
သူ့နှုတ်ခမ်းတွေ မြင်လိုက်ရုံနဲ့တင် မိုးတွေတိတ်သွားတယ်...
စံပယ်ပန်းနံ့ နှုတ်ခမ်းဆီလေးဆိုးလို့.....။ ။ (Craton)
မိုးရွာခြင်းအနုပညာ(၅)
ချမ်းတယ်...
ရေကျသံဟာ နှလုံးသားနှစ်ခုအတွက် အဖော်ဖြစ်တယ်...
တဲအိုပျက်မှာ ထမင်းရည်သောက်စရာတော့မလိုဘူး
ဒါပေမယ့် အခန်းကျဉ်းကလေးဟာ မှိန်မှိန်လေးပျော်နေတယ်...
စောင်နှစ်ထည် လူနှစ်ယောက်
မိုးခြိမ်းတဲ့ အချစ်ညတွေ.....။ ။ (Craton)
မိုးရွာခြင်းအနုပညာ(၆)
ပတ်ဝန်းကျင်ဟာ ချဉ်ပြီးစပ်တယ်...
လူတွေနဲ့ဝေးရာ
ငါ့သီးခြား ကမ္ဘာလေးဆီ......။ ။(Craton)
မိုးရွာခြင်းအနုပညာ(၇)
စောင့်နေသောအဝေးပြေးလမ်းမများကို ရွာချလိုက်သည်
အိတ်တစ်လုံး ကိုယ်တစ်ခုနှင့် မျှော်လင့်ချက်တစ်လိတ်
တိတ်တိတ်ပုန်းဗွက်များသည် ခုမှ သူတလူငါတမင်း ထလာကြ၏
မြေသင်းနံ့ရှူနေသည်ကိုက ယားကျိကျိဖြစ်သည်
စောင့်နေသည့်အရာလာမည်လော
မိုးတိတ်မည်လော
တစ်ခုမှဖြစ်မလာလည်းရပါသည်
အရာရာတိုင်းသည် တခါတရံရုပ်ဆိုးကြသည်လော......။ ။ (Craton)
မိုးရွာခြင်းအနုပညာ(၈)
ညဟာ .. သွက်ချာပါဒလိုက်ရင်း တုန်တုန်ယင်ယင်နဲ့ငိုပြီး
လနတ်သမီးကို တိမ်မည်းတွေ သွေးဆောင်ပြန်ပေးဆွဲသွားတယ်လို့
လင်းနို့တွေ ဇီးကွက်တွေက ကွေးကွေးလေး အိပ်မက်မက်ကြရဲ့
နွေဦးမိုးဟာ ဒီလိုနဲ့ပဲ အငိုမတိတ်တော့ဘူး.....။ ။(Craton)
မိုးရွာခြင်းအနုပညာ(၉)
မေမေက ပန်းပွင့်စိပ်ဖဲထီးလေးကို ဖွင့်လှန်းတဲ့အခါ
ကျွန်တော်က ဖတ်လက်စ ဝတ္ထုစာအုပ်ကိုချရင်း မေမေ့ကိုလှမ်းကြည့်တယ်
ဈေးမှာ မုန့်စိမ်းပေါင်း ကုန်ပြီ သားရဲ့...နက်ဖန်မှ စောစောသွားပေးမယ်နော်
နှုတ်ခမ်းကိုအစွမ်းကုန်စူပြီး ကျွန်တော် အိမ်နောက်ဖေးထွက်သွားလိုက်တယ်
လျှပ်စီးလက်လိုက်တဲ့ခဏ မေမေ့ပါးပြင်ပေါ်က အပြုံးနဲ့ကျွန်တော်လွဲခဲ့တယ်....။ ။(Craton)
မိုးငွေ့
