ဒီမနက် မိုးတွေသည်းလိုက်တာ.........
ကားမှန်အပြင်ဖက်က အုံ့ဆိုင်းညှို့မှိုင်းနေတဲ့ အရောင်တွေနဲ့ မိုးရေစက်တွေ ယှက်ထွေး နေတာကိုငေးမောရင်း... ဖုန်းနားကြပ်လေးနဲ့ X-banana အဖွဲ့ရဲ့ “မိုးရာသီအလွမ်း” သီချင်းကို နားထောင်နေခဲ့မိတယ်...။ သီချင်းလေးနဲ့ အပြင် ပတ်ဝန်းကျင်အပံ့အပိုးက လိုက်ဖက်နေတာကိုး....။
တရွေ့ရွေ့သွားနေတဲ့ ကားတန်းကြီးကိုမေ့ထားပြီး မျက်စိစုံမှိတ်ထားလိုက်တယ်...။ ခုချိန်မှာ ကားတန်းကြီးမလှုပ်လေ ကိုယ့်အတွက်ပျော်လေပဲ...။ မိုးရွာနေတာကို ကိုယ်က သဘောကျတယ်လေ...။
ကောင်းကင်ကြီးတစ်ခုလုံး မီးခိုးရောင်တိမ်တိုက်တွေဖုံးလွှမ်းနေတာများ ဒါဟာ မနက်ခင်းတစ်ခုလို့တောင် မထင်မှတ်မိဘူး...။
အင်းလေ... မနက်ခင်းတစ်ခုဟာ ကျေးငှက်သံသာတွေနဲ့ နေခြည်နုတွေနဲ့ မြက်ခင်းစိမ်းတွေနဲ့ ပန်းပေါင်းစုံတွေ ဖူးပွင့်မွှေးမြနေရမယ်လို့ တရားသေသတ်မှတ်လို့မှမရဘဲ...။ ဒီလိုပဲ အချိန်တိုင်း မိနစ်တိုင်း စက္ကန့်တိုင်းမှာ အရာရာတိုင်းဟာ ပြောင်းလဲနေကြမှာပဲ..။
အရင် ရက်တွေဆို ကိုယ်အလုပ်သွားရင် ကားစီးရင်း စာအုပ်ဖတ်ဖြစ်တာများတယ်...။ ခုနောက်ပိုင်း နဲနဲဆင်ခြင်လိုက်တယ် ..။ အလုပ်မှာလည်းတနေကုန် ကွန်ပြူတာကြည့်တာဆိုတော့ မျက်လုံးကို သက်ညှာရမယ်လေ...။ ဒါကြောင့် စာအုပ်မဖတ်ဖြစ်တော့ဘဲ သီချင်းနားထောင်တယ်... လမ်းတလျှောက်လုံးက သစ်ပင်စိမ်းစိမ်းတွေကို မျက်စိအားဆေးအဖြစ်ကြည့်ဖြစ်တယ်...။ စာအုပ်ကိုတော့ ညမအိပ်ခင် ဖတ်နိုင်သလောက်ဖတ်တယ်...။ ပိတ်ရက်တွေမှာ ဖတ်တယ်...။ အသုံးအဆောင် အဝတ်အစားတွေထဲမှာ အစိမ်းကို မနှစ်သက်ပေမယ့်လည်း အစိမ်းရောင်ရှိတဲ့ ပတ်ဝန်းကျင်ကိုတော့ ကြိုက်တယ်..။
ခုလို မိုးသည်းထဲ ဘာအနှောင်အဖွဲ့ အချည်အနှောင်မှမပါဘဲ အနှောက်အယှက်ကင်းကင်း လမ်းလျှောက်ရရင် သိပ်ကောင်းမှာပဲလို့ တွေးမိတယ်...။ ဘယ်သူမှလုမယူနိုင်တဲ့ ကိုယ်ပိုင်ချိန်စစ်စစ် ရလိုတယ်...။ မိုးသည်းထဲလျှောက်သွားပြီးရင်လည်း ကော်ဖီပူပူလေးတစ်ခွက်သောက်ရင်း မိုးကို ထိုင်ကြည့်ချင်သေးတယ်...။
မိုးကိုမြင်ရင် မိုးထဲ လမ်းလျှောက်ချင်မိ...။ ရွှဲရွှဲစိုတဲ့ အရသာကိုခံစားချင်ခဲ့မိ...။ မိုးကောင်းကင်ကို မျက်နှာမူတဲ့အခါ မိုးစက်တွေခပ်စူးစူးလေးလာထိမှန်တဲ့ ခံစားမှုကိုလိုချင်မိ....။ သြော်.... မိုးကို တွယ်တာမက်မော စွဲလန်းတဲ့ စိတ်က အရင်တိုင်းပါပဲလား....။ ပြောင်းလဲခြင်းတွေထဲက မပြောင်းလဲသေးတဲ့ စိတ်ခံစားမှုတစ်ခု...။
မိုးငွေ့
No comments:
Post a Comment