Perfume....

   

ကျွန်မငယ်ငယ်က ရေမွှေးကို စသိတာ မေမေသုံးနေတဲ့  နှင်းဆီပန်းနီနီပုံလေးပါတဲ့ ပုလင်းသေးသေးလေး ကြည်ကြည်လေးနဲ့ ရေမွှေးလေးဖြစ်တယ်...။ တံဆိပ်နာမည်ကိုတော့ မသိတော့ဘူး အရမ်းမွှေးတာပဲ...။ Eternalလား Poisonလား တစ်ခုခုဖြစ်မယ်..။ လွန်ခဲ့တဲ့ သုံးဆယ်ငါးနှစ်ကျော်ကဆိုတော့ အဲခေတ်ကရေမွှေးပုလင်းကို အွန်လိုင်းမှာ ရှာကြည့်သေးတယ် မတွေ့ဘူး..။ နာမည်သေချာ မသိတာလည်းပါမယ်...။ မေမေက သူ့ရေမွှေးပုလင်းလေးကို ကျွန်မတို့အိမ်က သောက်ရေတို့ရေနွေးကြမ်းအိုးတို့ ဓါတ်ဖူးတို့ထားတဲ့ စားပွဲနောက်က နံရံကပ်မှန်ဗီဒိုလေးထဲထည့်ထားတတ်တာ..။ အဲဒီတုန်းက မေမေ့ဗီဒိုထဲကနေ အဲရေမွှေးပုလင်းလေးကို ခဏခဏယူကြည့်ဖူးတယ် မွှေးကြည့်ဖူးတယ်။ ပုလင်းလေးကို ချစ်တာရယ် နှင်းဆီနီနီလေးကိုကြိုက်တာရယ် အနံ့လေးသင်းပျံ့နေတာလေးအတွက်ရောပေါ့...။ ဆွတ်တော့မကြည့်ခဲ့ဖူးဘူးလို့ထင်တာပဲ...။ အဲဒီတုန်းက သုံးလေးတန်းလောက်ပဲရှိဦးမယ်...။

ဒုတိယအကြိမ် ရေမွှေးကို သတိထားဖြစ်တာက ကျွန်မ ငါးတန်းတက်တုန်းက ကျွန်မတို့ အင်္ဂလိပ်ဆရာမ ဒေါ်ခင်ဖြူဝေ ဆွတ်ထားတဲ့ ရေမွှေးရနံ့လေး...။ ရနံ့သင်းပြီး sexy ဖြစ်တယ်...။ ဆွဲဆောင်မှုရှိတယ်...။ ဆရာမကစည်းကမ်းသိပ်ကြီးတယ်..။ အဝတ်အစားဝတ်တာ အမြဲတမ်းချပ်ရပ်ကျော့မော့နေရော...။ သူ့အတန်းချိန်ကျပြီဆို သူကိုင်နေကျ ကြိမ်လုံးကိုကြမ်းပြင်နဲ့ထောက်တဲ့ အသံတဒုန်းဒုန်းနဲ့ သူ့ရေမွှေးနံ့တွေက အရင်ရောက်လာတတ်တယ်..။ အဲခါဆို ကျွန်မတို့က ကြောက်ဒူးတုန်နေကြရော ဆရာမဒီနေ့ ဘာစာမေးမလဲ ဘယ်သူ မတ်တပ်ရပ်ထဖြေရမလဲ ဘယ်သူ ထိုင်ထလုပ်ရမလဲဆိုတဲ့ စိုးရိမ်စိတ်တွေ တထိတ်ထိတ်နဲ့ပေါ့..။ ဆရာမနား အမှတ်သွားခြစ်ရင် ဆရာမရေမွှေးနံ့က နှာခေါင်းဝကို လာကလိတော့တာပဲ..။ ရင်ဖုံးအကျီၤအဖြူ ခေါင်းလောင်းလက်ကို ဇာအနားကွပ်ပြီး ဂျော်ဂျက်အပျော့သားကျောင်းစိမ်း လုံချည် ခြေမျက်စိဖုံးဝတ်ထားတာ ခါးမှာ လက်ကိုင်ပုဝါမျိုးစုံကို ညှပ်ထားတတ်တာ ဆရာမရဲ့ ဖက်ရှင်စတိုင်လ်ပဲ..။ ဂုတ်ကျော်ကျော်လောက် ဆံပင်နဂိုအကျေကောက်သား ငုတ်စိလေးတွေကို စုစည်းပြီး ဖဲကလစ်လှလှလေးတွေနဲ့ ညှပ်ထားတတ်သေးတယ်..။ ဆရာမက တက္ကသိုလ်တုန်းက ဘော်လီဘောချန်ပီယံ.. အရပ်ရှည်ရှည်ထောင်ထောင်မောင်းမောင်း..။ နှာတံချွန်မြမြနဲ့ ပြုံးလိုက်ရင် နှုတ်ခမ်းနှစ်ဖက်ဘေးမှာ ပါးချိုင့်သေးသေးလေးတွေပါတယ်...။ ရယ်လိုက်ရင်လည်း သွားစွယ်လေးတွေက သိပ်လှတယ်...။ 

ကျွန်မမှာ အနံ့(ဂန္ဓာရုံ)နဲ့ပတ်သက်ပြီး ထူးခြားမှုနည်းနည်းရှိတယ်...။ ခုနောက်ပိုင်းအသက်ကြီးမှသာ သတိသိပ်မထားကြည့်မိတော့တာ...။ ဆပ်ပြာ ရေမွှေး ကိုယ်လိမ်းပေါင်ဒါ ဒါမှမဟုတ် အမွှေးနံ့ပါတဲ့ အသုံးဆောင်ပစ္စည်းထဲက အနံ့တစ်ခုခုကိုရရင် ဘယ်အချိန် ဘယ်နေရာမှာ သုံးခဲ့ဖူးတဲ့ အနံ့လေးဆိုပြီး တန်းပြီးမှတ်မိတတ်တယ်...။ တခါတလေ အင်္ကျီမီးပူတိုက်လို့ထွက်လာတဲ့အနံ့ရရင် အထက်တန်းကျောင်း တက်တုန်းက ကျောင်းစိမ်း ရင်ဖုံးအင်္ကျီအဖြူ လေးမီးပူတိုက်တဲ့အခါ ထွက်လာတဲ့ အနံ့ကို အမှတ်ရမိတတ်တယ်..။ ကုန်တိုက်တွေမှာ ကိုယ်တိုက်ဆပ်ပြာခဲလေးတွေ တွေ့လို့ ကောက်ယူပြီးနမ်းကြည့်မိရင်လည်း ဒီဆပ်ပြာကို ဘယ်ချိန်တုန်းက ဘယ်နေရာမှာ သုံးခဲ့ဖူးတယ်ဆိုတာကို မှတ်မိနေတတ်တယ်။ အဲဒါ အနံ့နဲ့ပတ်သက်တဲ့ ကျွန်မရဲ့ထူးခြားချက်ပဲ...။ ပြီးတော့ ကျွန်မက အနံ့နဲ့ပတ်သက်လာရင်လည်း sensitive သိပ်ဖြစ်တယ်..။ အနံ့ရတာလည်း သူများထက်ပိုကဲတယ်..။ ဒါဘာအနံ့ဆိုတာကိုလည်း တန်းပြီးခွဲခြားပြနိုင်တယ်..။ နောက်ပိုင်းအသက်ကြီးလာတော့ အနံ့နဲ့ပတ်သက်ပြီး Sense ရတာကို အမှုမဲ့အမှတ်မဲ့ပဲ နေလိုက်မိတော့တယ်..။

     

ကျွန်မ အသက်နှစ်ဆယ်ကျော် တက္ကသိုလ်တက်နေချိန်မှာတော့ ရေမွှေးကို Clinique Happy စသုံးဖြစ်တယ်..။ အဲဒီရေမွှေးကို နှစ်တော်တော်ကြာတဲ့အချိန်ထိ ကျွန်မနှစ်သက်စွဲလန်းစွာသုံးခဲ့ဖူးတယ်..။ သူ့အနံ့လေးက Happy ဆိုတဲ့ စကားလုံးအတိုင်းပဲ သူ့ကိုဆွတ်ထားရင် အလိုလို ကြည်နူးရွှင်ပြ တက်ကြွနေတာပဲ..။ Clinique မှာ happy ရယ် Heart ရယ် နှစ်မျိုးလာတဲ့အထဲ Happy အနံ့က ကျွန်မအတွက် ပိုဆွဲဆောင်မှုရှိတယ်လို့ထင်တယ်..။ သူ့ကို ကျွန်မ Lotion လည်းသုံးဖူးတယ်...။ Rolling လည်းသုံးဖူးတယ်..။

Happy ကို လေးငါးနှစ်ဆက်တိုက်သုံးလာပြီးမှ ကျွန်မ Lancome ရေမွှေးကို ပြောင်းသုံးဖြစ်ခဲ့တယ်..။ တကယ်တော့ ကျွန်မက ရေမွှေးကို ကိုယ့်ဘာသာကို ဝယ်သုံးဖြစ်တာနည်းတယ်..။ အဒေါ်တွေ နိုင်ငံခြားက ပြန်လာရင် ဝယ်ပေးတာများတယ်..။ နောက် Gucci Envy me ကိုဆက်သုံးဖြစ်တယ်...။ အဲဒါက ကျွန်မမွေးနေ့တစ်ခုမှာ ညီမဝမ်းကွဲတစ်ယောက်က လက်ဆောင်ပေးလို့။ Gucci Envy Me က နာမည်နဲ့ လိုက်အောင် ဆွဲဆောင်မှုရှိလွန်းတယ် ပြီးတော့ သူ့အနံ့က သိပ် sexy ကျတယ်..။ ကျွန်မဘဝမှာ အကြိုက်ဆုံးရေမွှေးရနံ့ထဲမှာ Happy Clinique ပြီးရင် Gucci Envy me ပဲဖြစ်တယ်..။ ခုနောက်ဆုံးတစ်ပတ်လည်ပြီး ကျွန်မ Happyကို ပြန်သုံးဖြစ်နေတယ်..။

 

တခါတခါ ရေမွှေးဆွတ်တိုင်း ကျွန်မ ဆရာမဒေါ်ခင်ဖြူဝေကို သတိရတတ်တယ်...။ ခုဆိုကျွန်မဟာ အဲဒီတုန်းက စည်းကမ်းကြီးသေသပ်ပြီး သန့်ပြန့်သပ်ရပ်မွှေးကြိုင်နေတဲ့ ဆရာမရှိနေတဲ့ အရွယ်ကိုတောင် တော်တော်ကျော်လွန်ခဲ့ပြီပဲ..။ ဆရာမရော ဘယ်နေရာမှာ ဘယ်ဒေသကို ရောက်ရှိနေလို့ စိတ်လက်ခန္ဓာကျန်းမာစွာနဲ့ရှိနေရဲ့လားလို့ သိချင်နေမိတယ်...။

မိုးငွေ့