မိုင်ဖေးဘရိတ် ပဲကပ်ကြော်.....

  
 

ပဲကပ်ကြော်ဆိုတာ ကျွန်မငယ်ငယ်ကတည်းက စားခဲ့တဲ့ ကျွန်မရဲ့ ဖေးဘရိတ် မုန့်တစ်ခု...။ ကောက်ညှင်းဆန်ကို ကြိတ်ပြီး အပြားလေးလုပ် ကုလားပဲစေ့လေးတွေကပ်ပြီး ကြော်ရတဲ့ အကြော်... ရန်ကုန်မှာ ရိုးရိုး မုန့်ဟင်းခါးထဲ ထည့်စားတဲ့ ပဲကြော်ကိုလည်း ပဲကပ်ကြော်လို့တချို့ခေါ်တတ်ကြတယ်..။ တကယ်တော့ ကောက်ညှင်း မုန့်သားပျော့ပျော့လေးမှာ ပဲလေးကပ်ပြီးကြော်ထားတာကမှ ပဲကပ်ကြော်မုန့် စစ်စစ်..။

ကျွန်မငယ်ငယ်တုန်းက မေမေနဲ့ ဈေးလိုက်သွားရင် ပဲကပ်ကြော်နဲ့ ကောက်ညှင်းပေါင်းနဲ့စားရတာကို သိပ်ကြိုုက်တယ်...။ မေမေက ဈေးထဲမှာ ဈေးဆိုင်ခင်းပြီး ဆေးနဲ့ အသုံးအဆောင်ပစ္စည်း အစုံရောင်းတယ်..။ ကျွန်မတို့ရွာမှာ ဈေးဆိုင်ခန်းလို့ဆိုပေမယ့် ပျဉ်ချပ်ကြီးတွေခင်းထားတဲ့ ကွပ်ပျစ်ကြီးပေါ်မှာ တာလပတ်မိုးကာ ခင်းပြီး ဈေးခင်းရောင်းရတာပါ အမိုးကတော့ သွပ်မိုးပေါ့..။ ကျွန်မတို့ ဈေးဆိုင်ရဲ့မျက်စောင်းထိုးလေးမှာ ဈေးဆိုင်တစ်ခုရဲ့နဘေးမှာ တန်းစီပြီး ဝါးတောင်းလေးပေါ် လင်ဗန်းတင်ပြီး မြန်မာမုန့်တွေရောင်းကြတယ်..။ ရှမ်းပြည်ဆိုတော့ မြန်မာမုန့်လုပ်ရောင်းတာက တပ်ထဲက ရဲဘော်မိန်းမတွေ ရဲဘော်ဟောင်းရွာတစ်ရွာဖြစ်တဲ့ အုပ်ကျင်းရွာထဲက အဒေါ်ကြီးတွေလုပ်ရောင်းကြတာ..။ သူတို့လုပ်ရောင်းကြတာက ပဲကပ်ကြော်၊ ဘိန်းမုန့်၊ မုန့်လက်ကောက်၊ မုန့်လုံးကြီး၊ မုန့်ကြိုးလိမ်တို့ဖြစ်တယ်..။ အဲထဲက ပဲကပ်ကြော်ကတော့ မိုင်ဖေးဘရိတ်ပေါ့...။ သူများတွေက ဒီတိုင်းစားတဲ့မုန့်ကို ကျွန်မက ကောက်ညှင်းပေါင်းပူပူလေးနဲ့စားတယ်..။ ကျွန်မတို့ဆိုင်ရှေ့မှာက ကောက်ညှင်းပေါင်း၊ ပဲပေါင်း၊ ငချိပ်ပေါင်း၊ ကောက်ညှင်းငှက်ပျော်ထုပ်၊ အုန်းနို့ရောင်စုံ ကျောက်ကျောမုန့်တွေ ရောင်းတယ်..။ ကျွန်မက အဲဆိုင်ကနေ ကောက်ညှင်းပေါင်းပူပူလေး ဖက်နဲ့ နှစ်ဆယ်ဖိုးဝယ်ပြီး ပဲကြပ်ကြော်နဲ့စားတတ်တယ်..။

ဒီမနက် ပဲကပ်ကြော်နဲ့ လက်ဖက်ရည်ဝယ်သောက်တော့ ငယ်ငယ်တုန်းက ရွာက ဈေးထဲဝယ်စားခဲ့တာလေးကို အမှတ်ရမိပြီး ပဲကပ်ကြော်လေးကို ဓါတ်ပုံရိုက် ဒီပို့စ်လေးကောက်ရေးဖြစ်တော့တာ..။ ရန်ကုန်ကပဲကပ်ကြော်က ကျွန်မငယ်ငယ်တုန်းကစားခဲ့ဖူးတဲ့ ပဲကပ်ကြော်နဲ့မတူဘူး အရသာကအစ ပုံထွက်တာကအစပေါ့...။ ခုခေတ်အကြော်သည်တွေက အကြော်ပေါင်းစုံကို ဒီဆီတစ်အိုးထဲနဲ့ကြော်ကြတော့ တခြားအကြော်အကြေအမွတွေတူးပြီးလာကပ်တာတို့ ဆီကို သုံးလေးငါးခါပြန်သုံးတာတို့ကြောင့် မုန့်က ရုပ်ထွက်မကောင်းတော့ဘဲ မဲညစ်ညစ်ဖြစ်နေတာမျိုးလေ...။ တကယ်ဆို ဝယ်တောင်မစားသင့်တဲ့ ထဲမှာ လမ်းဘေးအကြော်တွေလည်း ထိပ်ဆုံးကပါတာပါပဲ..။ ကိုယ်တွေမြန်မာလူမျိုးကလည်း ကိုယ့်စိတ်ကိုဖြေသိမ့်တတ်တဲ့နေရာမှာ ပထမတန်းစားမဟုတ်လား..။ တခါတလေဝယ်စားတာပဲလေ ဆိုတာမျိုးနဲ့ ဖြေသိမ့်ပြီး စားတတ်ကြတယ်...။ တခါတလေတွေများလာတော့ ဒုက္ခနဲ့လှလှတွေ့တတ်ကြတာမျိုး...။ ကျွန်မငယ်ငယ်ကစားဖူးခဲ့တဲ့ ပဲကပ်ကြော်လေးက ရန်ကုန်မှာကြော်ရောင်းတာလောက် မကြီးဘူး ကော်ဖီမတ်ခွက် အဝလောက်တော့ရှိမယ်...။ ကောက်ညှင်းဆန်ကြိတ်ထားတာကို ဆားနဲ့ဂျင်းရည်လေးညှစ်ထည့်ပြီး နယ်ထားလို့ မုန့်သားလေးက မွှေးပြီးအရသာရှိနေတာ..ဆီကလည်း ဆီသန့်တာမို့ မုန့်က ဘာအမှုန်အမွှားမှ ကပ်မနေပဲ အရောင်လေးလှနေရော...။ အမြင်လည်းလှ အရသာလည်းကောင်း...။ 

ပဲကပ်ကြော်က ဖေးဘရိတ်ဆိုပြီး တခြားမုန့်မစားဘူး မကြိုက်ဘူးလို့မထင်ပါနဲ့ အကုန်စားပါတယ်...။ အဲတုန်းက ဘိန်းမုန့်ဆို ကျွန်မတို့အခုရန်ကုန်မှာရောင်းသလို သေးသေးဝိုင်းဝိုင်းအချပ်လေးတွေ မဟုတ်ဘူးရှင့်...။ ဗန်းလိုက်ဖုတ်ထားတဲ့ ဘိန်းမုန့်ထူထူ ပွပွတွေ သိပ်ကောင်းတာပဲ...။ အဲဒါကို ကပ်ကြေးနဲ့ညှပ်ညှပ်ပြီး အုန်းသီးဆံဖတ်လေးဖြူး စက္ကူအိပ်လေးနဲ့ ထည့်ပေးတာ ..။ ခုလည်းမုန့်တွေကို ပလပ်စတစ်အိပ်အစား ငှက်ပျောဖက်တွေ စက္ကူတွေကို သုံးစေ့ချင်တယ်...။ ပတ်ဝန်းကျင်ညစ်ညမ်းမှုပပျောက်ရေးဆိုတဲ့ စိတ်ဓါတ်ေ်လးရှိကြရင်သိပ်ကောင်းမှာပဲလို့ စိတ်ကူးပဲယဉ်ပါရစေ...။ ဘိန်းမုန့်ပြီးရင် မုန့်လုံးကြီးလည်းသိပ်ကောင်း..။ ဘာမကောင်းတာများ ကျန်သေးလဲလို့မမေးနဲ့...။ မုန့်လုံးကြီးတစ်လုံးက လက်သီးဆုပ်လောက်ကြီးတယ် ကောက်ညှင်းမုန့်သားက တစ်ညသိပ်ပြီး ကြိတ်ထားတဲ့မုန့်သားမို့ ချဉ်တဲ့အရသာလေးပါရပြီးအထဲက အုန်းယိုလေးထည့်ထားတာ ချိုမွှေးလို့...။ ညဖက်ကျွန်မတို့ စစ်တပ်ထဲ ရုပ်ရှင်ပိတ်ကားကြီးပြတဲ့ချိန်ဆို တပ်ထဲက အဒေါ်ကြီးတွေလာရောင်းတဲ့ မုန့်လုံးကြီးကို ရုပ်ရှင်ကြည့်တိုင်း ဝယ်စားတတ်တာလည်း အမှတ်ရမိတယ်....။ (အဖြူအမဲမြန်မာရုပ်ရှင်ကား+မုန့်လုံးကြီးကြော်) အဲလို ကဘေးဘ၀ memory ထဲ အတွဲလိုက်မှတ်ထားမိတယ်။

ငယ်ငယ်တုန်းက ဈေးလိုက်သွားရင် မနက်စာမုန့်ကို တစ်နေ့တစ်မျိုးဝယ်စားတတ်တာ အထပ်တစ်ရာ(ပလာတာ)ကို နို့ဆီဆမ်းပြီး လက်ဖက်ရည်နဲ့သောက်တယ်.. အီကြာကွေးနဲ့ လက်ဖက်ရည်နဲ့သောက်တယ် ။ အဲတုန်းက လက်ဖက်ရည်ဟာ အချိုခြောက်စစ်စစ်မွှေးမြမြကို နို့ဆီနဲ့ပဲဖျော်တာ သိပ်ကောင်းပဲ..။ ခုခေတ်တော့ နို့စိမ်းတွေဘာတွေထည့်တော့ လက်ဖက်ရည် အရသာစစ်စစ်ကို မရတော့ဘူး...။ ကျွန်မဆို ငယ်တုန်းက သောက်ခဲ့တဲ့အရသာမျိုးရချင်လို့ လက်ဖက်ရည်တစ်ခါ မှာသောက်ရင် နို့စိမ်း မထည့်ခိုင်းဘဲ နို့ဆီနဲ့ပဲဖျော်ပေးလို့မှာပေမယ့် အရင်တုန်းက လက်ဖက်ရည်အချိုခြောက်နံ့မွှေးတဲ့ အရသာမျိုးမရတော့ဘူး...။ ခေတ်ရဲ့ ပြုပြင်ပြောင်းလဲမှုကြီးက လူထုတစ်ရပ်လုံးရဲ့ ကျန်းမာရေးကို ထိုးနှက်တိုက်ခိုက်လာတာ တကယ်စိတ်မကောင်းစရာပါပဲ..။ ဒီတော့ ကိုယ့်ကျန်းမာရေးအတွက် အသက်ရှည်ရှည် ကျန်းကျန်းမာမာနေသွားနိုင်ဖို့ အစားအသောက်တွေကို အထူးတလည် ဂရုစိုက်စားသောက် သင့်တယ်လို့ အကြံပေးပါရစေ..။ ဖြစ်နိုင်ရင် အောဂင်းနစ်တွေကိုပဲရွေးစားပါ ဆီကောင်းကောင်းတွေပဲ သုံးကြပါလို့...။ အုန်းဆီဟာလည်း လူ့ခန္ဓာအတွက် အကျိုးရှိကြောင်းဖတ်ထားရလို့ အုန်းဆီအကြောင်း သိကောင်းစရာများကို ရေးပါဦးမယ်...။

မိုးငွေ့