မိုးငွေ့ဆိုတာ...ကော်ဖီခါးခါးအကြိုက်နဲ့ ဖက်ရှင်တအားမိုက်သူပေါ့...း)

Wednesday, 8 August 2018

မိုးရာသီတစ်ခုစာအလွမ်းများ(၄).....




ကိုကိုပေးခဲ့သောလက်ဆောင်


အဲဒီနေ့လည်ခင်းတုန်းက ကော်ဖီဆိုင်မှာ ကျွန်မငိုချလိုက်ပြီး မျက်ရည်တွေဘာတွေသုတ်ပြီးတော့ ကိုကိုက စကားတစ်ခွန်းစပြောတယ်....။

“ကိုယ်တို့ ခြောက်လလောက် မတွေ့ဘဲနေကြရအောင်” တဲ့.....။

ကျွန်မက အငိုတိတ်စကလေးတစ်ယောက်လို မျက်ရည်စတွေကို စက္ကူ လက်ကိုင်ပုဝါနဲ့ တို့သုတ်ရင်း... သူ့ကိုမော့ကြည့်တော့.... သူက ခေါင်းတစ်ချက်ဆတ်ပြပြီး “ရတယ်မဟုတ်လား ကလေးနေနိုင်တယ်မဟုတ်လား”..တဲ့။

“အဲခြောက်လမှာ ကိုကိုကဘာလုပ်မှာမို့လဲ.....” လို့ ရှိုက်သံတစ်ဝက်နဲ့ ကျွန်မ ဇောတက တက်ကြည့်လိုက်သေးတယ်...။

သူဘာမှမပြောဘဲ ကျွန်မကိုပဲစိုက်ကြည့်နေတယ်.....။ နောက်တော့မှ “ကလေးပြောသလိုပဲ အားလုံးကို စာရင်းရှင်းဖို့လေ အဲအတွက် ကိုယ်အချိန်ယူတာ” လို့ ကိုကိုက ခါတိုင်းကိုကို မဟုတ်သလိုပဲ မရွံ့မရဲနဲ့ ခပ်တိုးတိုးပြောတယ်...(ပြောတယ်ဆိုတာထက် ၀န်ခံလိုက်တာ)...။ ကျွန်မကတော့ သူဝန်ခံလိုက်တဲ့ သူ့အကြောင်းကို လက်မခံချင်လို့ မယုံကြည်ချင်လို့ ၀မ်းနည်းပြီးတော့တောင် ငိုလိုက်ရသေးတာ...။
ကော်ဖီဆိုင်ကနေပြီး ကျွန်မတို့ မြို့ထဲ ခြေဦးတည်ရာကို လျှောက်သွားသေးတယ်... ။ 

ကျွန်မပခုံးကိုသိုင်းဖက်ရင်းက ကိုကိုက ကျွန်မပါးကို မနာအောင်လက်နဲ့ ခပ်ဆဆကလေး ရိုက်လိုက်တယ်...။ “ခုနက ကလေးစကားတွေက ကိုယ့်ကို သိပ်စော်ကားရာကျလွန်းတယ် အဲဒါသိလား” တဲ့...။ ကိုကို့မှာ ယောကျာ်းတစ်ယောက်ရဲ့ မာနရှိနေသေးသားပဲဆိုပြီး ကျွန်မလစ်ခနဲ ကြိတ်ပြီး ၀မ်းသာလိုက်သေးတယ်....။

ကျွန်မတို့ ပန်းဆိုးတန်းက အင်းဝစာအုပ်တိုက်ဝင်တယ် သူကျွန်မကိုပေးဖတ်ချင်တယ်ဆိုတဲ့ စာအုပ်က ပထမ ဒုတိယ တတိယ သုံးအုပ်တွဲ... အင်းဝမှာမရလို့ ...စာပေလောကထပ်ဝင်ကြတယ် ...အဲမှာ စာအုပ်ကို သုံးအုပ်လုံးရတယ်...။

ကျွန်မတို့ ကန်တော်ကြီးထဲမှာ ထမင်းကြော်ထိုင်စားရင်း ကျွန်မအတင်းပူဆာလို့ စာအုပ်သုံးအုပ်လုံးမှာ ကိုကိုက သူ့လက်မှတ် ရှုပ်ရှုပ်ထွေးထွေးကို ထိုးပေးခဲ့တယ်...။

ညနေအိမ်ပြန်တော့ ကိုကိုက ဘေးနားကနေ ဘာမှမပြောဘဲ ခပ်ဆိတ်ဆိတ်လိုက်လာရင်းက.....ကျွန်မကပဲ ကျွန်မတို့နှစ်ယောက်ကြားက တိတ်ဆိတ်မှုကို စတင်ဖြိုခွင်းလိုက်တယ်...။

“ဒီညနေ ကိုကိုနဲ့တွေ့ရမှာ နောက်ဆုံးပဲနော်....” ရယ်လို့...
ကိုကိုက အဝေးကိုလှမ်းမျှော်ပြီး ကျွန်မပခုံးသားကို တစ်ချက်ဖျစ်လိုက်တယ်...။
အိမ်ပြန်ရောက်တော့ လက်ထဲပါလာတဲ့ ကိုကိုပေးတဲ့စာအုပ်သုံးအုပ်ကို အိတ်ထဲကထုတ်လိုက်တယ်...။ ကျွန်မနဲ့ ကိုကို ဆုံတွေ့ခဲ့တဲ့ အချိန်တိုကလေးမှာ ကိုကို့ဆီက ကျွန်မ လက်ဆောင်သုံးမျိုးရခဲ့တယ်....။ ကျစ်ဆံမြည်းကြိုးလေးနဲ့ သရေဖိနပ်တစ်ရံ.... မိုးပြာရောင်တောက်တောက် တီရှပ်တစ်ထည်(ကိုကိုဆီမှာက ကျွန်မနဲ့အဆင်တူ အနက်ရောင်တစ်ထည်ရှိတယ်) ပြီးတော့ခုဝယ်ပေးလိုက်တဲ့ စာအုပ်သုံးအုပ်....။
ကျွန်မအဲပစ္စည်းကလေးတွေကို ကြည့်နေတုန်းမှာပဲ ဖုန်းမက်ဆေ့လေးဝင်လာခဲ့တယ်...။

“ကိုယ်တို့ နောက်ထပ်ခြောက်လထိမတွေ့ကြတော့ဘူးနော်...ကိုယ်တို့တကယ်နေနိုင်လိမ့်မယ်လို့ ကလေးထင်လား” တဲ့...။

မိုးရွာထဲမှာ ဖိနပ်ပျက်သွားခဲ့လို့ ကိုကိုဝယ်ပေးခဲ့တဲ့ ဒီကျစ်ဆံမြည်းဖိနပ်ကလေး ကျွန်မအမြဲစီးဖြစ်နေမှာပါကိုကို... ဘာလို့လဲဆိုတော့ ဖိနပ်ပေးရင်ကွဲကွာတတ်တယ်ဆိုတဲ့ အယူကို ကျွန်မယုံကြည်လိုက်လို့ပဲ...။ တီရှပ်လေးကိုတော့ ကျွန်မဘယ်တော့မှ ၀တ်ဖြစ်မှာမဟုတ်ဘူး ရုန့်ရင်းဆန်လွန်းလှတဲ့ ကိုကို့ထွေးပွေ့မှုကို အမြဲသတိရ မနေစေချင်လို့...။ ကိုကို့ လက်မှတ်ကလေးပါတဲ့ ဒီစာအုပ်သုံးအုပ်ကိုလဲ စာကြည့်တိုက်တစ်ခုခုမှာ လှူလိုက်ပါရစေ... ။ 

လက်ဆောင်သုံးမျိုးရှေ့မှာ ကျွန်မချမှတ်ခဲ့တဲ့ ဆုံးဖြတ်ချက်ကို ခုလောက်ဆို ကိုကိုသိပြီးရောပေါ့....။ ကိုကိုပြောတဲ့ နောက်ခြောက်လဆိုတာ ခနကလေးပေမယ့် ကျွန်မ ကိုကိုနဲ့ ပြန်မဆုံချင်တော့ပါဘူး...။
ကိုကိုပြောသလိုပဲ တစ်ပတ် နှစ်ပတ်လောက်အချိန်ယူလိုက်ရင် ကိုကို့ကို ကျွန်မ မေ့ပျောက်သွားလိမ့်မှာပါ..။
လမ်းလျှောက်တိုင်း ကျွန်မစီးထားတဲ့ ကိုကိုဝယ်ပေးခဲ့တဲ့ ဖိနပ်ကို ငုံ့မကြည့်ခဲ့မိရင်ပေါ့....။

“အရာအားလုံးအဆင်ပြေသွားတဲ့အခါ ကလေးဆီကို ကိုယ်ပြန်လာခဲ့မယ် စောင့်နေနော်...
ပျော်ရွှင်ပါစေ ကလေးလေး ကိုကို မင်းကို အမြဲသတိရနေမှာပါ...” 
အဲဒါ..ကိုကို့ရဲ့ နောက်ဆုံး မုသားလှလှလေးပေါ့။


မိုးငွေ့


No comments: