မိုးငွေ့ဆိုတာ...ကော်ဖီခါးခါးအကြိုက်နဲ့ ဖက်ရှင်တအားမိုက်သူပေါ့...း)

Monday, 31 July 2017

Sense.....





ဒီနေ့ ကျွန်မအကြိုက်ဆုံးရေမွှေးကို ဆွတ်ခဲ့တယ်....။ ထုံအီသင်းပျံ့လှတဲ့ ရနံ့လေးက သိပ်ဆွဲဆောင်မှုရှိတာပဲ..။ ကျွန်မ ဒီရေမွှေးရနံ့လေးကို မသုံးဖြစ်တာ ဘယ်လောက်ကြာခဲ့သလဲဆို......သူနဲ့ ဝေးသွားပြီးကတည်းက ဆိုပါတော့...။ ရနံ့တစ်ခုဟာ လူတစ်ယောက်ရဲ့ စိတ်အာရုံကို သိမ်းသွင်းနိုင်တယ်... အတိုင်းမသိတဲ့ မိုင်ပေါင်းများစွာ ရှည်လျားဝေးလံတဲ့ ခရီးတစ်ခုထိကိုခေါ်ဆောင်သွားနိုင်တယ်လို့ ကျွန်မကတော့ ယုံကြည်ခံစားမိတယ်..။ မွှေးရနံ့တွေရဲ့ ခေါ်ဆောင်ရာကို ကျွန်မ မကြာခဏလိုက်သွားခဲ့ဖူးတယ်....။ အထူးသဖြင့် သူ့ဆီကရခဲ့ဖူးတဲ့ ပရုတ်နံ့သင်းတဲ့ ရနံ့တစ်ခုကို ကျွန်မ အချိန်များစွာတစ်ခုအထိ ဆွဲမက်တွဲဖက်ခဲ့ရဖူးတယ်...။ တခါတခါ အဲရနံ့တွေက နေ့အိပ်မက်တစ်ခုလို ခြောက်ခြားတတ်သေးတယ်....။ 

“ဒီနေ့ ဘာလို့ ခါတိုင်းဆွတ်နေကျရေမွှေးကို မဆွတ်ခဲ့တာလဲ ကျွန်တော်က ခင်ဗျားကို အဲဒီရနံ့လေးနဲ့မှတ်မိနေတာ...စွဲလန်းနေတာ... မတော်တဆ ကျွန်တော်တို့ ဝေးသွားကြရင်တောင် ဒီရေမွှေးရနံ့လေးရတိုင်း ခင်ဗျားပုံရိပ်တွေ မျက်ဝါးထင်ထင်ပေါ်လာမှာ သေချာတယ်..” လို့ လမ်းလျှောက်ရင်း ကျွန်မပုခုံးသားကို သိုင်းဖက်ထားတဲ့လက်တစ်ဖက်နဲ့ဖျစ်ရင်း သူပြောခဲ့ဖူးတဲ့ အမှတ်တရတွေ....။ ခုရော ကျွန်မဆွတ်နေကျရေမွှေးနံ့လေးကို သူဘယ်မိန်းကလေးတစ်ယောက်ဆီမှာ ထပ်ပြီး ရခဲ့ဖူးသေးလဲ..။ 

မိန်းကလေးတစ်ယောက်မှာရှိသင့်တဲ့ အရပ်ထက်ရှည်တဲ့ ကျွန်မက ခုံထူဖိနပ်စီးထားရင်းနဲ့ သူနဲ့လမ်းယှဉ်တွဲလျှောက်တဲ့အခါ ကျွန်မထက်ခေါင်းတစ်လုံး ပိုမြင့်နေသေးတဲ့ သူ့ကို ခြေဖျားထောက်ထောက်ပြီး သူ့ပခုံးတိုက်ဖူးခဲ့တာလေးကိုပြန်အမှတ်ရသွားမိတယ်.....။  အဲဒီနေ့ညနေက ရေချိုးပြီးခါစ သူ့ကိုယ်သင်းရနံ့ကို ကျွန်မအချိန်အကြာကြီးစွဲလန်းခဲ့ရဖူးတယ်..။ ကြည့်ပါဦး ပြောရင်းဆိုရင်းနဲ့ ရနံ့တစ်ခုဟာ ကျွန်မကို ဟိုး အတိတ်တွေဆီ တစတစနဲ့ ဆွဲခေါ်သွားလိုက်တာ...။ ယောက်ျားတစ်ယောက်ဖြစ်ပြီး ခံတွင်းနံ့ကင်းတဲ့ သွားတန်းလေးတွေ အမြဲတမ်း ဖွေးသန့်ကြည်လက်နေတဲ့ သူ့ကို ကျွန်မသိပ်သဘောကျခဲ့ဖူးတယ်..။ စီးကရက်မကြိုက်ပေမယ့် သူ့နှုတ်ခမ်းက မှုတ်ထုတ်လိုက်တဲ့ စီးကရက်ငွေ့တွေ... သူ့အမူအရာတွေကို ကျွန်မစွဲမက်ခဲ့ဖူးတယ်..။

အာရုံငါးပါးထဲမှာ ကျွန်မအကျွမ်းကျင်ဆုံး ကျွန်မကို အခေါ်ဆောင်နိုင်ဆုံးက အနံ့အာရုံပါပဲ...။ သူနဲ့တွဲဖက်လိုက်လာခဲ့တာက အတွေ့...။ အတွေ့တစ်ခုမှာ ရူးသွပ်စေဖို့ ကျွန်မတို့နှစ်ယောက်ရဲ့ စွမ်းဆောင်နိုင်မှု အရည်အချင်းသိပ်မကွာလှဘူးလို့ထင်ပါတယ်..။ France Kiss လို့ခေါ်တဲ့ wet kiss တစ်ခုကို ပြုလုပ်နေချိန်မှာ လူတစ်ယောက်ဟာ အာရုံတစ်ခုထဲမှာပဲ စုစည်းနေရမှာပဲ...။ စိတ်အာရုံမှာ အနမ်းတစ်ခုကလွဲလို့ ရှိုက်ဖိုလှိုက်မောရုံမှအပ ဘာဆိုဘာမှမရှိ ။  နောက်ဆက်တွဲမှသာ စိတ်တွေဟာ တိမ်တိုက်လိုပဲ လွင့်မျောနေလိမ့်မယ်...။ ကြယ်တွေစုံညီတဲ့ အာကာပြင်တစ်ခုဆီကို ရောက်သွားလိမ့်မယ်...။ တခါတခါ မိုးကြိုးလျှပ်နွယ်တွေနဲ့ သည်းသည်းထန်ထန်ရွာသွန်းနေတဲ့ မိုးထဲ...၊ လေတဟူးဟူးတိုက်ခတ်မှုကြောင့် ယိုင်းယိမ်လှုပ်ရှားနေတဲ့ မြက်ပင်ရှည်ကြားထဲ....၊ အရှိန်ပြင်းပြင်းနဲ့ တ၀ုန်းဝုန်းကျဆင်းနေတဲ့ ရေတံခွန်ထဲ စီးမျောနေရတတ်တယ်..။ ဒါဟာ အတွေ့အာရုံရဲ့ ကျေနပ်မှုတစ်ခုပဲ...။






မိုးငွေ့

No comments: