မိုးငွေ့ဆိုတာ...ကော်ဖီခါးခါးအကြိုက်နဲ့ ဖက်ရှင်တအားမိုက်သူပေါ့...း)

Monday, 15 May 2017

Jerry, Marvin and Talbot .....

ဂူဂယ်လ်မှာပုံရှာတော့ ဒီပုံထဲက သုံးယောက်က အမှတ်မထင် သူတို့သုံးယောက်နဲ့သွားတူနေတယ်


ကျွန်မ ညနေခင်းတစ်ခုမှာ ဈေးဝယ်မုန့်ထွက်စားရင်း Talbot နဲ့တူတဲ့ ကောင်လေးတစ်ယောက်ကို အမှတ်မထင်တွေ့ခဲ့လိုက်တယ်...။ Talbot ဆိုတာ ကျွန်မ တက္ကသိုလ်မတက်ခင် ဆရာကြီးလူထုဦးစိန်ဝင်းရဲ့ FMA မှာ အင်္ဂလိပ်စာသင်တန်းစတက်တုန်းက ခင်မင်ခဲ့ဖူးတဲ့ သူငယ်ချင်းတစ်ယောက်ပါ..။ သူ့ကို သင်တန်းပြီးတော့ တစ်ခေါက်လား နှစ်ခေါက်လားပဲ လမ်းမှာထပ်တွေ့မိတယ်..။ တွေ့ခဲ့ရတာလည်း လွန်ခဲ့တဲ့ ခြောက်နှစ် ခုနှစ်နှစ်တောင်မကတော့ဘူးထင်တယ်..။ သူက ကျောင်းတက်တုန်းကပိန်ပိန်ရှည်ရှည် ကျွန်မနဲ့လမ်းမှာ ရုတ်တရက်ဆုံတော့ ၀တုတ်ကြီးဖြစ်နေပြီ အိမ်ထောင်ကျနေပြီ သားကလေးတစ်ယောက် ဖအေဖြစ်နေပြီတဲ့..။

Talbot အကြောင်းပြောရင် Jerry နဲ့ Marvin ကိုလည်းထားခဲ့လို့မရဘူး..။ သူတို့သုံးယောက်စလုံးနဲ့ ကျွန်မ FMA စတက်တော့ ပထမဆုံးသူငယ်ချင်းဖြစ်ခဲ့တာ..။ Talbot က ကြည့်လိုက်ရင် အမြဲပြုံးပြုံး ပြုံးပြုံးနဲ့ရှိနေတတ်တဲ့ ကောင်ကလေး.. အသားညိုညို မျက်ခုံးမျက်ဖန်ကောင်းသူ...။ စကားပြောရင် လေးလေးကန်ကန်နဲ့ သဘောကောင်းသူ..။ သူက ပုစွန်တောင်သားဆိုတော့ တက္ကသိုလ်တက်တော့ သူက RC1 ဗိုလ်တစ်ထောင်ကျောင်းမှာ တက်ရတယ်..။ Jerry လည်း RC1 ကျောင်းသားပဲ..။ သူက လေးတန်းကျောင်းသားကလေး ဘ၀ကတည်းက ဆရာကြီးလူထုဦးစိန်ဝင်းဆီမှာ အင်္ဂလိပ်စာတက်နေပြီ..။ သူ့အမေက ဆရာကြီးတို့အိမ်အောက်ထပ်မှာ ထမင်းရောင်းတော့ သူ့ကို ဆရာကြီးဆီမှာ ကျောင်းအပ်ထားခဲ့လိုက်တာ..။ ဒါကြောင့်သူကတော့ အင်္ဂလိပ်စာမှာဆရာကြီး စကားပြောလည်းကျွမ်းကျွမ်းကျင်ကျင်ရတယ်....။ ကျောင်းတက်ရင်း Tourist Guide လည်းလုပ်တယ်....။ Marvin ကတော့ RC2 ကျောင်းသား... ဓါတုဗေဒက..။ ကျွန်မသူငယ်ချင်းတွေက ကျောင်းပေါင်းစုံကဆိုတော့ RC3 ကျောင်းသူ ကျွန်မက သူတို့ကျောင်းတွေဆီကို အလှည့်ကျ သွားလည်ခွင့်ရခဲ့တာတော့ ဒါကြောင့် ကျွန်မ တက္ကသိုလ်ပေါင်းစုံကိုရောက်ဖူးခဲ့တယ်.. ရန်ကုန်စက်မှုတက္ကသိုလ်ကအစပေါ့..။

ကျွန်မ ငယ်ငယ်တုန်းက သူငယ်ချင်းအကြောင်းတွေကိုမရေးဖြစ်တာကြာပြီ သူတို့ကိုလည်း သတိမရဖြစ်တာကြာပြီလေ..။ တခါတလေ တိုက်ဆိုင်မှုရှိရင် တော်တော်ကြီးကိုမေ့လျော့နေခဲ့တဲ့ သူတွေလည်း အတွေးထဲပြန်ဝင်လာတတ်တယ်..။ အဲခါမျိုးဆို ကျွန်မက ငယ်သူငယ်ချင်းအကြောင်းတွေရေးစရာရပြီဆိုပြီး ကိုယ့်ဘာသာတစ်ယောက်ထဲ ကြိတ်ဝမ်းသာတတ်နေသေးတယ်..။ ဒီပို့စ်လေးဖြစ်လာရတာ  Talbot နဲ့တူတဲ့ လူတစ်ယောက်ကို လမ်းမှာတွေ့ရင်းဖြစ်လာရတယ်ဆိုပေမယ့် သူ့အကြောင်းကပြောစရာ သိပ်များများစားစားမရှိပါဘူး..။ ကျွန်မတို့တွေ FMA မှာ တက်ရင်း စကားတွေပြောကြ အကြောင်းအရာတွေဆွေးနွေးငြင်းခုံကြ BC စာကြည့်တိုက်ကို စာအုပ်သွားငှားဖတ်ကြ လက်ဖက်ရည်ဆိုင်ထိုင်ကြနဲ့ အဲဒီတုန်းက ကျောင်းသားဘ၀ကို ပြည့်ပြည့်၀၀ ပျော်ရွှင်စွာဖြတ်သန်းခဲ့ကြတာပါ..။

Marvin ကိုတော့ မတွေ့ဖြစ်တာနှစ်အတော်ကြာပြီ..။ လွန်ခဲ့တဲ့ တစ်လကျော်နှစ်လလောက်ကတော့ ကျွန်မတို့အလုပ်နားက ကော်ဖီဆိုင်မှာ သူ့ကိုပြန်တွေ့ခဲ့သေးတယ်..။ ကျွန်မက ဘဏ်ကိုအသွား ကော်ဖီဆိုင်ရှေ့ကလျှောက်တော့ သူကလှမ်းခေါ်တာ..။ ကျွန်မကို သူသောက်နေကျ Americano ပဲမှာပေးရမလားတဲ့..။ တကယ်တော့ Americano ကော်ဖီကို စသိခဲ့တာ Marvin ဆီကပါ..။ ကျွန်မ ကော်ဖီအကြောင်း နကန်းတစ်လုံးမသိသေးတဲ့အချိန် ဟိုချိန်တုန်းက Jerry နဲ့ Marvin နဲ့ ကော်ဖီဆိုင်ထိုင်တော့ ဦးမောင်(ရုပ်ရှင်မင်းသားဦးကျော်သူ)တို့ စကော့ဈေးမှာစဖွင့်တဲ့ Living Color Boutique နဲ့တွဲဖွင့်ထားတဲ့ Cafe Aroma မှာထိုင်ဖြစ်ကြရင် Marvin က အမြဲတမ်း အမေရိကန်နိုမှာသောက်တယ်..။ ကျွန်မက သူမှာတာကိုကြည့်ပြီး အဲဒီကော်ဖီကိုမှာသောက်တတ်ခဲ့တာ ..။ တကယ်တမ်း Cafe Aroma ဆိုင်က ကျွန်မအကြိုက်ဆုံးက Ice Latte ..။ ခုချိန်ထိ သူတို့ဆိုင်လောက်ကောင်းတဲ့ Ice Latte ကိုမတွေ့သေးဘူး...။

Marvin အကြောင်းပြောရင်း ကော်ဖီကြော်ငြာဝင်သွားတယ်..း)  Marvinက ကျောင်းပြီးတော့ ဓါတ်ပုံရိုက်တဲ့ လိုင်းထဲဝင်သွားတယ် သူ့အဖေကိုယ်တိုင်ကလည်း ဓါတ်ပုံဆရာကိုး..။ ကျောင်းမှာကတည်းက ကျောင်းကပွဲ မောင်မယ်သစ်လွင်ပွဲဆို သူပဲ ဒိုင်ခံရိုက်တာ..။ Marvin က အခုနာမည်ရနေတဲ့ အေးဇော်မိုး(စက်မှု)ရဲ့ အစ်ကို..။ သူတို့မှာညီအစ်ကိုသုံးယောက်ရှိတယ် အားလုံး ဓါတ်ပုံပညာနဲ့ပဲအသက်မွေးကြတယ်..။ Marvin က မြန်မာတိုင်းမ်ဂျာနယ်မှာ ဓါတ်ပုံသတင်းထောက်လည်း ၀င်လုပ်သေးတယ်..။ ကျွန်မကျောင်းပြီးလို့ အလုပ်လုပ်ေတာ့ ကျွန်မတို့ ကုမ္ပဏီက ကြေ်ာငြာကိစ္စ ပစ္စည်းမိတ်ဆက်ပွဲအတွက် ဓါတ်ပုံရိုက်တဲ့ကိစ္စတွေမှာ သူတို့ညီအစ်ကိုတွေ့နဲ့လုပ်ဖြစ်ခဲ့သေးတယ်..။ နောက်မှသာ အဆက်သွယ်ပြတ်သွားခဲ့ကြတာ..။

ဒါနဲ့ အလုပ်နားက ကော်ဖီဆိုင်မှာ Marvin နဲ့ပြန်ဆုံတော့ ပျောက်ချက်သားကောင်းနေတဲ့ Jerry အကြောင်းအတင်းတုတ်ကြရော..။ ဘာလဲဆိုတာတော့ ဒီမှာထည့်မရေးတော့ဘူး နိုင်ငံရေးတွေပါလို့..။ Marvin အိမ်ထောင်ကျတော့ သူ့အမျိုးသမီးလေး ကလေးမွေးလို့ သွားကြည့်ဖြစ်သေးတယ် အဲထိအဆက်သွယ်ရှိသေးတယ်..။ Marvin အမျိုးသမီး ဂျူဂျူးက ဒေါင်ကောင်းကောင်း ချောချောလေး သူနဲ့တောင်မလိုက်ဘူး...။ Jerry အမျိုးသမီးတော့မတွေ့ဖူးဘူး... သူမင်္ဂလာဆောင်တုန်းက မသွားဖြစ်လိုက်ဘူး..။ သူ့သမီးလေးပုံတော့ တွေ့ဖူးတယ် ချစ်စရာလေး..။ ကျွန်မတောင်စလိုက်ပါသေး သမီးမွေးတယ်ဆိုတာ အဖေတွေဝဋ်လည်ဖို့လို့...။

ကျွန်မတို့ အင်္ဂလိပ်စာသင်တန်းတက်ရင် ဆရာကြီးက နာမည်ပေးသိပ်ကောင်းတာ ကျောင်းသားတစ်ယောက်ကို သူ့မြန်မာနာမည်ကိုကြည့်ပြီး အင်္ဂလိပ်နာမည်ပေးတတ်တယ်..။ Marvin ကသူ့မြန်မာနာမည်မှာ “မ”ပါတော့ “M”နဲ့စတဲ့နာမည်ပေးတယ်..။ Jerry ကတော့ Tom and Jerry ကာတွန်းကားထဲက ကြွက်ကလေးနဲ့တူလို့ ဆရာကြီးအဲလိုပေးလိုက်တယ်ထင်တယ် သူ့မြန်မာနာမည်နဲ့ဘာမှမဆိုင်လို့လေ..။ Talbot လည်းတူတူပဲ  သူ့မြန်မာနာမည်က “သ”နဲ့စတာ..။ အဲဒီနာမည်တွေအကြောင်း ကျွန်မ ဒီပို့စ်မှာ တစ်ခါရေးဖူးပါတယ်..။

ငယ်တုန်းက သူငယ်ချင်းအကြောင်းပြန်ရေးရတာ ပျော်တယ်..။ ကျောင်းတက်တုန်းကအချိန်တွေကို ပြန်ရောက်သွားသလိုပဲ...။ နောက်ထပ် သူငယ်ချင်းတွေကို သတိရဖြစ်သေးရင်လည်း လာပြောပြဦးမယ်နော်..။

မိုးငွေ့

No comments: