မိုးငွေ့ဆိုတာ...ကော်ဖီခါးခါးအကြိုက်နဲ့ ဖက်ရှင်တအားမိုက်သူပေါ့...း)

Thursday, 25 May 2017

မိုးရာသီတစ်ခုစာအလွမ်းများ(၁).....




မိုးလေး အေးအေးနဲ့ ကော်ဖီလေးသောက်ရင်း လွမ်းစရာဇာတ်လမ်းလေးတွေ အက်ဆေးလေးတွေဖတ်ရတာ ကျွန်မအတွက်တော့ သိပ်အရသာရှိတာပဲ..။ တကယ်တော့ ဒီအက်ဆေးလေးက ကျွန်မ အရင်နှစ်တွေက တင်ပြီးသားအဟောင်းတွေထဲကပါပဲ...။ တချို့ စာလာဖတ်သူတွေအတွက် ဖတ်ပြီးသားလည်း ဖြစ်ချင်ဖြစ်ပါလိမ့်မယ်...မဖတ်ရသေးသူများအတွက်တော့ အသစ်ပေါ့..ဖတ်ပြီးသူများအတွက်တော့ တကျော့ပြန်ပေါနော်...။ ဘာရယ်မဟုတ် ဒီနှစ်မိုးတွင်းစီးဖိနပ် အသစ်တစ်ရံ ၀ယ်စီးဖြစ်သွားလို့ ဒီပို့စ်လေးကို ပြန် အသက်သွင်းဖြစ်သွားတာပါပဲ..။



မိုးစီးဖိနပ်ကလေးတစ်ရံအကြောင်း (သြဂုတ်လ ၂၀၁၄)

“ဒီမှာဗျ… ခြေထောက်ဖိနပ်ပေါက်နေတာ တော်တော်နာနေပုံရတယ် ကျွန်တော့်ဖိနပ် စီးသွားလိုက်ပါလား”
ကားဂိတ်မှာ ကားပေါ်ကဆင်း တစ်ဖက်လမ်းကူးပြီးလျှောက်လာလိုက်ကတည်းက ကျွန်မနောက်မှာ လူတစ်ယောက် လိုက်ပါလာတယ်ဆိုတာ သတိထားမိပြီး ခြေထောက်နာနေလို့ မြန်မြန်မလျှောက်နိုင်တာမို့ သူကျော်သွားပါစေဆိုပြီး ကျွန်မက ပလက်ဖောင်းဘေးကပ်ပြီး တဖြေးဖြေးလျှောက်လာခဲ့တာ… ခုတော့ သူက အနောက်ကနေပြီး ကျွန်မအခြေအနေကို ကြည့်ပြီး မနေနိုင်မထိုင်နိုင် ၀င်ကူညီချင်ခဲ့တာဖြစ်မယ်…။

ကျွန်မက မျက်နှာရှုံ့မဲ့ပြီး ကိုယ့်ခြေထောက်ကိုပြန်ငုံ့ကြည့် ကျွတ်ခနဲ စုပ်သတ်လိုက်မိပြီး ကျွန်မဘေးမှာ ကပ်ရပ်နေတဲ့ သူ့ကိုမော့ကြည့်လိုက်တယ်…။ လည်ကုတ်ထိရှည်ပြီး မျက်ခုံးတွေကိုဖုံးလွှမ်းသွားတဲ့အထိ လိုင်းတွန့်နေတဲ့ ပျော့ပြောင်းမယ့်ပုံမရတဲ့ ခပ်ကြမ်းကြမ်းဆံပင်တွေနဲ့ လူငယ်တစ်ယောက် လက်ကြားမှာ စီးကရက်ညှပ်ထားတယ်…။ ဒါကြောင့်ထင်တယ် သူ့နှုတ်ခမ်းတွေက အရောင်ဖျော့ပြီး ညိုရောင်ဖက်လိုက်နေကြတယ်…။ မျက်နှာကတော့ နုနယ်သေးတဲ့ရုပ်ဆောင်နေတယ်…။

ပြီးတာနဲ့ ကျွန်မသူ့ခြေဖ၀ါးနှစ်ဖက်အောက်က သူစီးထားတဲ့ ဖိနပ်ကိုကြည့်လိုက်တယ်…။ အနက်ရောင် အောကတ္တီပါဖိနပ်…။ မိုးတွင်းကြီးမှာ ဒီလိုဖိနပ်စီးသေးတယ်…တော်သေးတာပေါ့ ဒီနေ့က နေသာပေလို့…။ ဘာမဆိုင်ညာမဆိုင် ကျွန်မက မိုးတွင်းစီးဖိနပ်မစီးဘဲ ရိုင်ဒါဘောင်းဘီကို အောကတ္တီပါဖိနပ်နဲ့တွဲစီးထားတဲ့ ကောင်လေးကို စိတ်ထဲက ဝေဖန်နေမိသေးတယ်…။ ခြေသည်းတွေကိုသန့်ရှင်းသပ်ရပ်စွာ တိဖြတ်ညှပ်ထားပုံလေးကိုပါ သတိထားလိုက်မိတယ်…။

“ကဲပါဗျာ..ဘာမှ အားမနာနေနဲ့ ကျွန်တော်က ယောက်ျားလေး ခြေဗလာနဲ့လဲ လမ်းလျှောက်ရဲတယ် ဘေးပတ်ဝန်ကျင်ကို ကျွန်တော်က သောက်ဂရုစိုက်တတ်တဲ့ကောင်မဟုတ်ဘူး… မိန်းကလေးဆိုပြီး အိနြေ္ဒတွေသိက္ခာတွေကို ခုချိန်မှာ ခနမေ့ထားလိုက်… ဖိနပ်ပေါက်ပြီး လွတ်လွတ်လပ်လပ်မလျှောက်နိုင်ဘဲ အပျိုကြီးခြေလှမ်းနဲ့ လျှောက်နေရတာ …ပိုစိတ်အိုက်ပါတယ်” တဲ့….။

ကျွန်မ သူပြောတဲ့ အပျိုကြီးခြေလှမ်းဆိုတဲ့ စကားကို သဘောကျပြီး အသံထွက်ရယ်မိသွားခဲ့တယ်…။ အပျိုကြီးတွေလှမ်းတဲ့ခြေလှမ်းကို သူစောင့်ကြည့်ဖူးတယ်ထင်ပါရဲ့…။ သူကဘာရယ်တာလဲဆိုပြီး ကျွန်မနဲ့ရောယောင်ပြီး လိုက်ရယ်ပါတယ်…။ သူရယ်လိုက်တော့ သွားစွယ်ချွန်ချွန်လေးတွေ ဖွေးခနဲပေါ်လာတယ်…။ စကားကိုစိတ်ထဲရှိတဲ့အတိုင်း ရိုးသားပွင့်လင်းစွာပြောတတ်တဲ့ အဲကောင်လေးက သွားစွယ်လေးတွေကြောင့် သူ့မျက်နှာလေး ခုနကထက်ပိုပြီး ပျိုမျှစ်သွားခဲ့တယ်..။

သူက လက်ထဲက Mild Seven စီးကရက်ကို မျက်လုံးလေးမှေးစင်းကာ တစ်ချက်ဖွာရှိုက်လိုက်ရင်း ကျွန်မကို ဖိနပ်ချွတ်ပေးတယ်…။ ကျွန်မလဲဖိနပ်ချွတ်ပြီး သူ့ဖိနပ်ကိုစီးလိုက်တယ်…။ နဂိုကတည်းက ဖိနပ်ဆို နံပါတ် ၃၉ ၄၀ စီးနေကျမို့ သူ့ဖိနပ်က ကျွန်မခြေဖိနောင့်ထက် နဲနဲပဲပိုထွက်နေခဲ့တာ…။ ကျွန်မက လုံချည်စကိုမသိမသာမပြီး ဖိနပ်ပေါက်သွားတဲ့ နေရာကိုကြည့်လိုက်တော့ ခြေဖနောင့်အပေါ်နားမှာ ဖိနပ်ပေါက်တဲ့ ဒဏ်ရာက လက်မ၀က်နီးပါးလောက် ရှိနေတယ်…။ အရေပြားတွေစုတ်သွားပြီး အသားနီပေါ်နေတာ ရဲနေတာပဲ…။

“ခြေထောက်က ဖိနပ်တော်တော်ပေါက်သွားတာပဲ… အိမ်ရောက်ဖို့လိုသေးတယ်ဆို ဒီနားမှာ ဆေးဝယ်ထည့်လိုက်ဖို့ကောင်းတယ် လမ်းလျှောက်ရင်း ဘွတ်တွေ ရွှံတွေစင်ပြီး အင်ဖက်ရှင်ရသွားမှာ စိုးရတယ်..”

ကျွန်မ လက်ကိုင်အိတ်ထဲက ဖိနပ်ထည့်ဖို့ အိတ်အပိုများပါလာမလားလို့ ရှာကြည့်တာ မတွေ့တဲ့အဆုံး ဖိနပ်ကိုဒီတိုင်းပဲ လက်နဲ့ကိုင်လာလိုက်တော့တယ်…။ ကျွန်မက ယောက်ျားစီးအောကတ္တီပါဖိနပ်စီးပြီး လက်ထဲမှာက ကျွန်မခြေထောက်ကို ကိုက်လိုက်တဲ့ မိုးစီးဖဲပြားပုံလေးပါတဲ့ရော်ဘာပျော့လေဒီရှူးဖိနပ်တစ်ရံ…။ ကျွန်မဘေးနားမှာ ဖိနပ်မပါခြေဗလာနဲ့သူလိုက်လာခဲ့တယ်…။ လမ်းကူးတော့ မီးပွိုင့်တန်းစီနေတဲ့ ကားတွေကားတွေထဲက လူတွေတော့ ကျွန်မတို့နှစ်ယောက်အဖြစ်ကိုကြည့်ပြီး စူးစမ်းတဲ့ အတွေးတွေ ကိုယ်စီနဲ့ ပြုံးရယ်နေကြလိမ့်မယ်…။ ကျွန်မတို့ လမ်းကြားလေးတစ်ခုထဲကိုချိုးဝင်လိုက်တော့ စူပါမားကတ်တစ်ခုရဲ့ အနောက်ပေါက်နားရောက်သွားကြတယ်…။ နဲနဲဆက်လျှောက်လိုက်တာနဲ့ ပန်းခြံထိပ်နားက ဖိနပ်ဆိုင်လေးမှာ ဖိနပ်တစ်ရံဝယ်စီးဖို့ ကျွန်မကစဉ်းစားထားတာ…။ သူက ဘာမပြောညာမပြောနဲ့ စူပါမားကတ်ထဲကို ချိုးဝင်လိုက်တယ်…။ ကျွန်မသူ့ကို ဘာကြောင့်အထဲဝင်တာလဲ အဲစူပါမားကတ်မှာ ဖိနပ်မှမရတာလို့ ပြောချိန်တောင်မရလိုက်ဘူး…။ ခြေလှမ်းကျဲကြီးနဲ့သူဝင်သွားတဲ့နောက်ကို ကျွန်မအပြေးလိုက်ရသေးတယ်…။ နောက်တော့ စူပါမားကတ်ဓါတ်လှေကားအောက်နားက ဆေးဆိုင်ထဲကို သူဝင်သွားခဲ့တယ်…။ ကျွန်မကို လှည့်တောင်မတိုင်ပင်တော့ဘဲ သူက အနာကပ်ပလာစတာ အနာသန့်ရှင်းတဲ့ အရက်ပျံပါပြီးသား တစ်ခါသုံးဂွမ်းနဲ့ ဘီတာဒင်းတစ်ဗူးဝယ်လိုက်တယ်…။ စေတနာကောင်းပုံ…း) 

“ကဲလာ ဒီနားမှာပဲထိုင်လိုက် အနာကိုဆေးထည့်ပြီး ပလာစတာကပ်လိုက်ရင် ဖိနပ်ပြန်စီးလို့ ရလောက်ပါပြီ”

ဆေးဆိုင်ရှေ့က ခုံတန်းလေးမှာ သူက ကျွန်မမထိုင်ခင်ထိုင်ချလိုက်ပြီး ကျွန်မကိုဆေးထည့်ဖို့ပြင်နေပြီ…။

“နေပါစေ…ကိုယ့်ဘာသာကိုယ်ထည့်ပါ့မယ် ပေးပေး…”

ကျွန်မ သူ့လက်ထဲက ဆေးထုပ်တွေကိုယူပြီး ပထမဆုံး အနာသန့်ဖို့ အရက်ပျံပါတဲ့ တခါသုံးဂွမ်းစကို ထုတ်လိုက်တယ်…။ ဖိနပ်ပေါက်နေတဲ့နေရာကို တို့လိုက်တာနဲ့ စပ်ဖျင်းသွားလိုက်တာများ… ပါးစပ်က တကျွတ်ကျွတ်ညည်းတွားမိသွားတဲ့အထိ…။ 

“အဲလိုတို့နေရင် အနာပိုးဘယ်သေပါ့မလဲ ပေး ကျွန်တော်လုပ်ပေးမယ်…” ဆိုပြီး ကျွန်မလက်ထဲက ဂွမ်းစကိုဆွဲယူပြီး အနာကိုတအားဖိထားလိုက်တော့တယ်…။

“အားးး စပ်တယ် စပ်တယ် ဖြေးဖြေးလုပ်ပါ မင်းကလဲ…”

“ဟဟဟ… ခဏလေးပါပဲ ကဲကဲ…ဘီတာဒင်းလေးတို့ပြီး ပလာစတာကပ်လိုက်တော့မယ်နော် ပြီးပါပြီ”

သူက သဘောကျစွာရယ်ပြီး ကျွန်မကို ကလေးတစ်ယောက်လို စိတ်ရှည်လက်ရှည်နဲ့ဆေးထည့်ပေးပြီး ပလာစတာကပ်ပေးလိုက်တယ်…။

“မင်းဖိနပ်ကို ဟိုနားလေးထိခနငှားစီးဦးမယ်နော်…ပန်းခြံထိပ်က ဖိနပ်ဆိုင်မှာ တို့ဖိနပ်အသစ်တစ်ရံ ၀ယ်စီးလိုက်တော့မလို့ တို့ကိုယုံတယ်ဆိုရင် ဒီနားမှာပဲထိုင်စောင့်နေလေ…ပြီးတာနဲ့ မင်းဖိနပ်ကို ပြန်လာပေးမယ်လေ… တို့ဖိနပ်လေးကိုလဲထားခဲ့မယ် မင်းဒီကပဲစောင့်…”

“ဘာထူးတာမှတ်လို့ ကျွန်တော်နေတဲ့အခန်းနဲ့နီးနီးလေးရယ်… ဖိနပ်ဝယ်မယ့်ဆိုင်အထိလိုက်ခဲ့ပါ့မယ်.. ကူညီမယ့် ကူညီတော့လဲအဆုံးထိပေါ့ မဟုတ်လား…”

“ကျေးဇူးနော်…”

ကျွန်မရဲ့ရင်ထဲက လှိုက်လှဲမှုအပြည့်ပါတဲ့ ကျေးဇူးတင်စကားက သူ့ရှေ့မှာ ဘာကြောင့်မှန်းမသိ အားမလိုအားမရ တိုးလျစွာပဲထွက်သွားခဲ့တယ်…။ သူကြားမကြားတော့မသိ သူကျွန်မကိုတချက်တော့ ပြန်ပြုံးပြလိုက်တာ တွေ့လိုက်တယ်…။ ဒီတစ်ခါတော့ သူ့သွားစွယ်လေးတွေလက်ခနဲ ပေါ်သွားတဲ့ အပြုံးကို ဒုတိယအကြိမ် ကျွန်မ ထပ်မြင်ခွင့်ရလိုက်တယ်…။

ကျွန်မတို့ အ၀င်တုန်းကအတိုင်းပဲ စူပါမားကတ်အနောက်ပေါက်ကနေပဲပြန်ထွက်ပြီး နည်းနည်းလေး ဆက်လျှောက်လိုက်တာနဲ့ မြန်မာဖြစ် ယိုးဒယားဖြစ်ဖိနပ်တွေအစုံတင်ထားတဲ့ ဖိနပ်ဆိုင်ကို ရောက်သွားခဲ့ကြတယ်…။ အိမ်မှာလဲအကြမ်းပြန်စီးလို့ရတဲ့ ရေစိုခံခြေညှပ်ဖိနပ်အပါး (sandel) ဖိနပ်လေးတစ်ရံကိုပဲ ၀ယ်ပြီး လဲစီးလိုက်တယ်…။

“ရော့ မင်းဖိနပ်လေး…” ကျွန်မက သူ့ဖိနပ်ကို ဒီအတိုင်းချွတ်ပေးလိုက်ရမှာ အားနာလို့ သေချာလက်နဲ့ကိုင်ပြီး သူ့ကိုလှမ်းပေးလိုက်တယ်…။

“ကျေးဇူးအများကြီးနော်…..” ဒီတစ်ခါတော့ ကျွန်မ သူကြားလောက်တဲ့အထိအသံနဲ့ သူ့ကိုကျေးဇူးတင်စကား ပြောလိုက်ပါတယ်…။

“ရပါတယ်… ကျေးဇူးတင်တယ်ဆိုတဲ့စကားကို သိပ်ပြီးရင်းနှီးပုံမရဘူးထင်တယ်…”

“ရှင်….”

“ထားလိုက်ပါ… ကျွန်တော်ကသာ ကိုယ့်အမြင်ကို ဇွတ်ပြောနေတာ… အိုခေ… ကျွန်တော်တို့ နောက်ထပ်ဆုံဖြစ်ရင် လက်ဖက်ရည်အတူသောက်ခွင့်ကြုံချင်ပါတယ်သေးတယ်…” တဲ့…။

အို…ကျေးဇူးတင်တဲ့အနေနဲ့ ကျွန်မကစပြီး သူ့ကို ကော်ဖီ သို့မဟုတ် လက်ဖက်ရည်သောက်ဖိတ်ရမယ် မဟုတ်လား….။ တကယ်တမ်းတော့ ကျွန်မစိတ်ကူးတွေကို အကောင်ထည်မဖော်လိုက်မိပါဘူး…။ သူပြောတာကို ခေါင်းညိတ်ပြပြီး ကျွန်မတို့လမ်းခွဲလိုက်ကြတော့တယ်…။ ကျွန်မတို့တစ်ယောက်နာမည် တစ်ယောက်တောင် မမိတ်ဆက်လိုက်ကြရဘူး…။ ကျွန်မတို့နှစ်ယောက်နေတဲ့ ရပ်ကွက်ချင်း သိပ်မဝေးဘူးဆိုပေမယ့်… ပျားပန်းခတ်လှတဲ့ ဒီမြို့ရဲ့ နေ့စဉ်လူးလားခေါက်ပြန် အလုပ်သွားအလုပ်ပြန်မှာ နောက်ထပ် ကျွန်မတို့ထပ်ဆုံဖြစ်ပါ့မလား….။ မကြာသေးခင်ကမှ ၀ယ်စီးတဲ့ အနက်ရောင်ရော်ဘာပျော့ မိုးစီးလေဒီရှူးဖိနပ်အိပ်လေးကိုကိုင်ရင်း ကျွန်မအတွေးတွေက ကျွန်မကို အစအဆုံးဘာနာမ်စားမှမသုံးဘဲ စကားပြောသွားခဲ့တဲ့ သူ့နောက်ကို ကပ်ပါသွားမှန်းမသိပါသွားခဲ့တယ်…း) 

မိုးငွေ့

No comments: