Friday, 3 July 2020

မိုးရွာတိုင်းလွမ်း.....





ပိတ်ရက်ရှည်တုန်းက Joox ထဲက ဒီနှစ် မိုးရာသီ သီချင်းတွေစုစည်းထားတာ ဝင်ကြည့်တော့ ကျွန်မတခါမှ နားမထောင်ဖူးသေးတဲ့ ရော့ခ်အဖွဲ့အသစ်လေးတစ်ခုဖြစ်တဲ့ Born for You(BFY) ရဲ့ မိုးရွာတိုင်းလွမ်း တွေ့သွားတယ်....။ မိုးကိုချစ်တဲ့သူပီပီ မိုးရာသီရောက်တိုင်း မိုးနဲ့ပတ်သက်တဲ့ သီချင်းတွေ ရှာဖွေ စုစည်း နားထောင်နေကျ တခြား မိုးနဲ့ပတ်သက်တဲ့ သီချင်းအဟောင်းတွေလည်းပြန်နားထောင်ဖြစ်တယ်...။ ဒါပေမယ့် ဒီတစ်ပုဒ်ကိုတော့ အထပ်ထပ်နားထောင်မိနေတဲ့ ဒီနှစ်ကျွန်မရဲ့မိုးရာသီသီချင်း.....။ 

Born for You အဖွဲ့မှာ အဖွဲ့သား၆ယောက်ရှိတယ်...။ သူတို့တွေထဲက ကျွန်မ instagram မှာ follow လုပ်ထားတဲ့ ဉီးစောဖိုးခွားရဲ့ သား ZIG  တစ်ယောက်ကိုပဲသိတယ်....။ သူက rapping အပိုင်းလေး ဒီမိုးရွာတိုင်းလွမ်းမှာ ဆိုထားတယ်...။ Main Vocal ကိုဆိုတဲ့ ချာတိတ်အသံလည်းကောင်းတယ် ကျန်တဲ့အဖွဲ့သားတွေကတာ့ Lead , Rhythm နဲ့ Bass  ဂီတာရယ်... drummer ရယ် ....။ Born for You ရဲ့တခြားသီချင်းတွေဖြစ်တဲ့  မလုပ်ပစ်လိုက်နဲ့, အချစ်စစ်လမ်း, ချစ်ရသူ, Hopeless နဲ့ Fake Smile တို့လည်းကောင်းတယ်....။

အောက်မှာ သူတို့အဖွဲ့ရဲ့ ကိုယ်ရေးအကျဉ်းလေးကိုဖော်ပြပေးလိုက်ပါတယ်...။


Genre
Rock

Band Members
Vocalist - Daniel Jack, ZiG
Lead Guitarist - Kaw Shee
Rhythm Guitarist - Seng Naw Ja
Bassist - Leo
Drummer - Michael
Backing Vocal/ Guitar - Zoe
Band Manager -John Oscar

Hometown
Yangon,Myanmar

About
Born For You (BFY) is a music band from Myanmar which is united with young talented members.

Biography
Most of the band members are graduated with music major from Liberal Arts Program(LAP) and all the band members are multi-talented musicians.

Awards
Winner of Urban Talent (Acoustic) from Duwun Media.


မိုးအေးအေးမှာ လွမ်းမောစရာကောင်းတဲ့ မိုးသီချင်းလေးနားထောင်ပြီး အိပ်ယာထဲ ကာဖီတစ်ခွက်နဲ့ ဖီးလ်နိုင်ကြပါစေလို့စ်.....:)


မိုးငွေ့


Tuesday, 30 June 2020

ထိုင်းသရက်သီးအုန်းနို့ကောက်ညှင်း.....

 



ဒီထိုင်း သရက်သီးအုန်နို့ကောက်ညှင်းကို အိမ်မှာတစ်ခါမှလုပ်မစားဖူးဘူး ဆိုင်မှာပဲဝယ်စားဖူးတာ...။ ခုသရက်သီးတွေပေါတော့ အိမ်မှာ အုန်းနို့ဘူးကလဲ အဆင်သင့်ရှိနေတော့ လုပ်စားဖြစ်သွားတာ...။ ပြီးတော့ ကျွန်မတို့က ရှမ်းပြည်ဇာတိမို့လို့ ကောက်ညှင်းပေါင်းကို ထမင်းလိုစားနေတာ ဒီမှာတော့ တစ်ပတ်တစ်ခါ ပိတ်ရက်တိုင်း ပေါင်းစားဖြစ်တယ်...။ အခု အမေပေါင်းတဲ့ ကောက်ညှင်းပေါင်းထဲက နဲနဲယူပြီးလုပ်ကြည့်တာ...။ ကောက်ညှင်းပေါင်းနည်းလေးကို အရင်ပြောပြမှထင်တယ်...။ ဒါက ကျွန်မတို့အိမ်က ပေါင်းတဲ့နည်းပေါ့ ...။ တစ်ယောက်နဲ့တစ်ယောက် ပေါင်းနည်းတွေမျိုးစုံကွဲပြားပါလိမ့်မယ်...။ ပေါင်းချောင်နဲ့ပေါင်းနည်း လျှပ်စစ်ထမင်းအိုးနဲ့ချက်တဲ့နည်း စသဖြင့်ပေါ့...။

ကျွန်မက လျှပ်စစ်နှစ်ထပ်ပေါင်းအိုးနဲ့ပေါင်းပါတယ်....။ ကောက်ညှင်းဆန်ကိုညကတည်းက အနောက်ရည်တွေကုန်တဲ့အထိ သေချာဆေးပြီး ရေသန့်နဲ့ နှစ်လက်မလောက် ရေမြှုပ်ပြီးစိမ်ထားပါတယ်....။ မနက်မိုးလင်းပေါင်းတဲ့အခါ စိမ်ထားတဲ့ဆန်ကို ရေထပ်မဆေးရတော့ပါဘူး...။ ဆန်ကိုဇကာတစ်ခုမှာရေစစ်ထားပါ...။ ပေါင်းမယ့်အိုးကို အောက်အိုးမှာရေထည့်ပြီး ဆူလာတဲ့အထိတည်ထားပါ...။ ကောက်ညှင်းဆန်ရေစစ်သွားရင် အပေါက်ပါတဲ့ အပေါ်အိုးမှာ ပိတ်ပါးစခင်းပြီး ကောက်ညှင်းဆန်စစ်ထားတာကို ထည့်ခင်းလိုက်ပါ ညီညီညာညာလေးခင်းပြီးရင် အဖုံးအုပ်ပြီး ရေဆူအိုးပေါ်တင်ပြီး နာရီဝက်ပေါင်းပေးပါ....။ နာရီဝက်ပြည့်ရင် အိုးကိုခဏချပြီး ဇလုံတစ်ခုထဲသွန်ထည့်ပါ ရေအေး ခွက်တစ်ဝက်လောက် နေရာအနှံ့ဖျန်းပေးပြီး (ရေက ဆန်အနည်းအများပေါ်မူတည်ပြီး အလျော့အတင်းရှိပါတယ်)...။ ယောင်းမနဲ့သမအောင်မွှေပေးပြီး ၁၅မိနစ်လောက် အဖုံးအုပ်ထားပါ...။ ရေတွေ ဆန်ထဲကိုစိမ့်ဝင်ဖို့ ခနနှပ်ထားတဲ့သဘောပါ....။ ပြီးရင် ရေဆူအိုးပေါ် နောက်ထပ် မိနစ်၂၀လောက်ထပ်ပေါင်းပေးပါ...။ 


 Credit to Rins CookBook from You Tube


For sticky rice:
1lb sticky rice
1 1/4 cups sugar
2 3/4 cups coconut milk
1 tsp salt
1 Pandan leaf

For coconut sauce:
1/2 cup coconut milk
1/2 tsp corn starch
1 Tbsp sugar
a pitch of salt
Serve with ripe mango and coconut sauce 

ကောက်ညှင်းထဲထည့်နယ်ဖို့ အုန်းနို့နှစ်လုပ်နည်းကိုပြောပြပါမယ်....။ အိုးတစ်လုံးထဲ အုန်းနို့ သကြား ဆား ဆွမ်းမွှေးရွက် ထည့်ပြီး မီးအေးအေးနဲ့ကျိုပါမယ်.... ။ အုန်နို့ပူလာပြီး သကြားပျော်ရင်ရပါပြီ တအားဆူပွက်စရာမလိုပါဘူး အုန်းဆီတွေထွက်လာမှာစိုးလို့ပါ....။ ပေါင်းထားတဲ့ ကောက်ညှင်းပူပူလေးထဲကိုလောင်းထည့်ပြီး နှံ့အောင်မွှေပေးပါ...။ ၄၅ မိနစ် အဖုံးအုပ်ထားပါ....။ ဒီနေရာမှာ ကောက်ညှင်းရော အုန်းနို့ရောပူနေတဲ့အချိန်မှာပဲ ထည့်ရောရပါမယ် အေးသွားရင် ကောက်ညှင်းတွေမာသွားတတ်ပြီး အုန်နို့စိမ့်ဝင်မှုအားလည်းနည်းသွားမှာမို့လို့ပါ...။ကောက်ညှင်းပေါ်ဆမ်းစားတဲ့ အုန်းနို့ဆော့လုပ်ဖို့ ဖန်ခွက်တစ်ခုမှာ အုန်းနို့ သကြား ဆားနဲ့ ပြောင်းကော်မှုန့်တို့ကိုထည့်ပြီး ဇွန်းနဲ့အားလုံးသမအောင်သေချာမွှေပေးပါ...။ ပြီးရင် micro wave ထဲ တစ်မိနစ် ကနေ နှစ်မိနစ်ထိ အပူပေးပါ...။ ဒါဆို အုန်းနို့ဆော့ရပါပြီ...။ ပွဲပြင်မယ်ဆို ပန်းကန်ပြားထဲ ကောက်ညှင်းကို ပုံဖော်ခွက်နဲ့ထည့်ပြီး ပဲဝါလေးလှော်စေ့ မရှိရင် နှမ်းနဲနဲဖြူးပြီး သရက်သီးစိပ်လှလှလေးတွေစိပ်ပြီး စီထည့် အပေါ်ကထပ်ဆမ်းစားလို့ရအောင် အုန်နို့အနှစ်ရည်လေးကို တစ်ခွက်သပ်သပ်ပြင်ပေးရင် သုံးဆောင်ဖို့ အဆင်သင့်ရပါပြီ...။






မိုးငွေ့

 

Tuesday, 23 June 2020

No Bake Mango Cheesecake.....




ဒီနှစ်က export မရှိလို့ စိန်တစ်လုံးသရက်သီးတွေ ဖောဖောသီသီစားရတယ်....။ ဈေးကွက်ထဲစဝင်တုန်းကတော့ တစ်လုံးကို ၈၀၀/- နောက်ပိုင်း တစ်လုံးကို ၂၀၀, ၃၀၀ ထိ ဈေးကျသွားတယ်...။ မန္တလေးနဲ့ ကျောက်ဆည်ဖက်ကထွက်တဲ့ စိန်တစ်လုံးကတော့ အကောင်းဆုံးပေါ့....။ အသားကကျောက်ကျောလိုချောပြီး အမျှင်မပါဘူး ချိုတယ် ဒါတွေက စိန်တစ်လုံးသရက်သီးရဲ့ ဘယ်သူနဲ့မှမတူတဲ့ အားသာချက်...။ တစ်ခုမကောင်းတာတော့ အချိုမတည့်တဲ့ အချိုစားလို့မရတဲ့ ရောဂါအခံရှိသူများ မစားကြနဲ့ပေါ့....။ နှလုံးသမားတို့ ဆီးချိုသမားတို့ကို ရှောင်ခိုင်းထားတာတော့ ဖတ်ဖူးတယ်...။

မူလ မန္တလေး ကျောက်ဆည်ဖက်ကပဲ အဓိကထွက်တယ်လို့သိရပေမယ့် နောက်ပိုင်း ပြည်တို့ ဘာတို့ဖက်ကထွက်တဲ့အသီးတွေလည်းရှိတယ်....။ အပြင်ဗန်းကကြည့်ရင်တော့ ပြည်စိန်တစ်လုံးဆို ဘယ်လောက်မှည့်မှည့် အခွံရောင်က ဝါဖျော့ဖျော့...။ မန်းတို့ ကျောက်ဆည်တို့ဖက်ကအသီးကတော့ အခွံက အဝါရင့်ရင့်....။ တချို့ဘယ်မြို့တွေကထွက်မှန်းမသိ ဈေးပေါပေါနဲ့ရောင်းတဲ့ အသီးတွေကတော့ အချိုပေါ့ပြီး အမျှင်များတယ်...။ ကျွန်မကတော့ တိုက်ရှေ့က သစ်သီးသည်ဆီက ဝယ်စားဖြစ်တာများတယ်....။ 






For Crust:
180g disgestive biscuits
80g melted butter

For Filling:
160g fine sugar or powder sugar
250g cream cheese
150g mango puree
80g icing

For the mango glaze:
200g mango puree
50g water
30g sugar
4 tsp gelatin
5 tbsp hot water
1 tsp lime juice
Credit to the cooking foodie from you tube.

၈ လက်မအဝိုင်းရှိတဲ့ မုန့်ဖုတ်ခွက် (ဖြုတ်/တပ်လို့ရတဲ့ခွက်အရှင်) ခြောက်သွေ့အောင်သုတ်ထားပါ...။ ဘီစကစ်မုန့်ချပ်တွေိကို အိတ်တစ်ခုထဲထည့်ပြီး ကျေညက်အောင်ချေထားပါ...။ ဆလုံတစ်ခုထဲမှာ ဘီစကစ်အမှုန့်တွေကို ထောပတ်အရည်ပျော်နဲ့ရောပြီး မုန့်သားညက်တဲ့အထိနယ်ပေးပါ...။  ရလာတဲ့ဘီစကစ်အမှုန့်တွေကို မုန့်ဖုတ်ခွက်ထဲထည့်ခင်းပြီး ဖန်ခွက်ဖင်နဲပြားသိပ်နေအောင်ဖိပေးပါ...။ ပြီးရင် ရေခဲသေတ္တာထဲအအေးခံထားပါ...။  

အခန်းအပူချိန်မှာထုတ်ထားတဲ့ cream cheese ကို ဇလုံသန့်သန့်တစ်ခုထဲထည့်ပြီး ယောင်းမနဲ့စေးပြီးပျော့လာအောင်နယ်ပေးပါ...။ စေးညက်လာတော့မှ သကြားထည့်ပြီး ထပ်မွှေပေးပါ...။ နောက် သရက်သီးအနှစ်နဲ့ ခရမ်ရောပြီး သမအောင်မွှေထားပါ...။ မုန့်သားညက်ပြီဆို အအေးခံထားတဲ့ မုန့်ဖုတ်ခွက်ထဲ အသာလောင်းထည့်လိုက်ပါ...။ ရေခဲသေတ္တာထဲ ခဏပြန်ထည့်ထားပါ...။

ပန်းကန်လုံးတစ်ခုမှာ gelatin ကို ရေနွေးငါးဇွန်းနဲ့ရောပြီး ဖျော်ထားပါ...။ မီးအရှိန်ပျော့ပျော့မှာ သရက်သီးနှစ် သကြားနဲ့ရေတို့ကိုရောကျိုပေးပါ အဆက်မပျက် မွှေပေးပါ...။ အိုးကပ်ပြီးတူးသွားမှာစိုးလို့ပါ... ဆူပွက်လာပြီဆို gelatin ဖျော်ထားတာနဲ့ လီမွန်ရည်လေးထည့်လိုက်ပါ မီးဖိုပေါ်ကချပါ....။ gelatin ‌တွေ သရက်သီးနှစ်ထဲပိုပျော်ဝင်သွားအောင် ဆက်မွှေပေးပါ....။ သရက်သီးနှစ်နဲနဲအေးပြီဆို cheese ပေါ်ဖြေးဖြေးလောင်းချလိုက်ပါ....။ မီးဖိုသုံးစရာမလိုတဲ့ အေးခဲတဲ့နည်းပေါ့...။ ရေခဲသေတ္တာထဲ အနည်းဆုံး ၃နာရီ ဒါမှမဟုတ် တစ်ညသိပ်ပြီး ခွဲစိပ်သုံးဆောင်လို့ရပါပြီ...။ ဆိုင်တွေမှာ ရောင်းသလို မုန့်မျက်နှာပြင်မှာ သရက်သီးလေးထောင့်တုံးလေးတွေလှီးပြီး အပေါ်မှာအလှဆင်လို့ရပါတယ်...။

ဒီနှစ်စိန်တလုံးပေါလို့ သူ့ကိုအရင်းပြုပြီး မုန့်တွေ တစ်မျိုးပြီးတစ်မျိုးလုပ်စားဖြစ်တယ်....။ နောက်တစ်ပို့စ်ကျရင် တခြားသရက်သီးမုန့်တွေကို ထပ်တင်ပါ့မယ်...။ 


မိုးငွေ့


Tuesday, 16 June 2020

ကျွန်မအနှစ်သက်ဆုံး Y-Zet နှင့် Oasix သီချင်းများ.....


ကျွန်မ ဒီပိတ်ရက်ရှည်မှာ Joox ကနေ နားမထောင်ဖူးခဲ့တဲ့ သီချင်းတွေတော်တော်များများကို နားထောင်ဖြစ်ခဲ့တယ်....။ အကောင်းဆုံး hip hop တေးများထဲက သူတို့ကိုရှာတွေ့ခဲ့တယ်....။ ကျွန်မ hip hop နဲ့ Rap ဂီတကို ဟိုး ကိုမျိုးကျော့တို့ အက်စစ်တို့ခေတ်ကတည်းက ကြိုက်ခဲ့တယ်....။ သူတို့နောက်ပိုင်း hip hop ကို တစိုက်မတ်မတ်မဟုတ်ဘဲ ကြုံသလိုပဲနားထောင်ဖြစ်ခဲ့တယ်....။ ကြားထဲ ကြက်ဖတို့ J Me တို့ ဘာတို့လောက်တော့သိသေးတယ် ဆယ်စုနှစ်လောက်အလှမ်းဝေးပြီးနောက်ထွက်တွေထဲက Snare တို့ X-box တို့ လွှမ်းပိုင်တို့ကို သိခဲ့တယ်....။ Y-Zet နဲ့ Oasix ကိုတော့ ရှိုးပွဲတွေကြော်ငြာမှာ သူတို့နာမည်ကိုမြင်ဖူးခဲ့ပေမယ့် သူတို့သီချင်းကိုနားမထောင်ဖူးခဲ့ဘူး....။ နောက်ထွက်တဲ့ အသစ်တွေနဲ့အလှမ်းကွာခဲ့တယ်ဆိုပါတော့...။ 

ခု Joox မှာ သူတို့သီချင်းတွေကို နားထောင်ဖြစ်တော့ အရမ်းကြိုက်တဲ့ သီချင်းတွေကို ဖုန်းထဲ ဒေါင်းလုတ်ထားတယ် အဖန်တလဲလဲနားထောင်ဖြစ်နေတယ်....။ အဲလိုနားထောင်ဖြစ်ရင်းနဲ့ပဲ Y-Zet နဲ့ Oasix ဆိုတာ ဘယ်လိုလူမျိုးလဲဆိုပြီး သိချင်လာမိတယ်...။ ဒါနဲ့ You Tube မှာ (ဖဘမသုံးတော့) သူတို့ အင်တာဗျူးတွေကို လိုက်ရှာကြည့်ဖြစ်တယ်...။ ကျွန်မ Joox မှာ အရင်ဆုံး သူတို့နှစ်ယောက်ကို ကိုကြီးသီချင်းကနေ စနားထောင်ခဲ့ဖူးတာ...။ ကိုကြီးက အရမ်းပေါက်တယ်လေ....။ ညီမလေးတွေရော ကိုကြီးတွေ ပါးစပ်ဖျားမှာပါ ကိုကြီး ကိုကြီးနဲ့ ရေပန်းစားနေခဲ့တာ အဲသီချင်းထွက်တဲ့ လွန်ခဲ့တဲ့ ဆယ်လကတည်းကနေ ခုထိပဲ....။ ကျွန်မသူတို့သီချင်းကို Joox မှာ အကုန်လုံးနားထောင်တယ်....။ ဒီပို့စ်မှာတော့ အများကြီးတင်မပေးတော့ဘူးနော်...။ အကြိုက်ဆုံးသီချင်းတွေက အများကြီးရှိပေမယ့်လေ....။

သူတို့ကို နောက်ပေါက်လို့ ကိုယ့်ဘာသာကိုယ်သတ်မှတ်လိုက်ပေမယ့် ၂၀၀၉ ခုနှစ် ကိုယ်တွေ ဘလော့စရေးကတည်းက သူတို့က ဂီတနယ်ပယ်ထဲကိုစဝင်နေပြီဖြစ်တဲ့ hip hop ဂီတကို အရမ်းရူးသွပ်ခဲ့တဲ့ လူငယ်တွေပေါ့...။ သူတို့နှစ်ယောက်စလုံးက မန္တလေးသားတွေ...။ ကျွန်မ ငယ်ငယ်တုန်းက မန်းမှာ ခုနှစ်တန်းတစ်နှစ်တက်ခဲ့ဖူးတော့ မန္တလေးကို အဲတုန်းကတည်းက သံယောဇဉ်ရှိခဲ့တာ ဒီနေ့ထိပဲ..။  ရန်ကုန်နဲ့မတူတဲ့ မန္တလေးကစကားပြောတဲ့ လေသံကိုလည်း သိပ်သဘောကျခဲ့တယ်....။ ကျွန်မကိုယ်တိုင်တောင်မှ ၁၉၈၈ အရေးခင်းဖြစ်တော့ ကျောင်းသုံးလကျော်လေးလောက်တက်ခဲ့ရတာ ခုချိန်ထိ စကားပြောရင် ကိုယ့်ကိုယ်ကို ကျွန်တော်လို့စွဲသုံးနေတတ်တုန်း....။ စာရေးလို့သာ ကျွန်မလို့ရေးတာ...။ ဆိုတော့ကာ မန္တလေးသားအဆိုတော်တွေကို အားပေးပြီးသား....။ ရန်ကုန်အကြွား မန်းကစကား မော်လမြိုင်အစားလို့ အဆိုရှိတယ်မဟုတ်လား....။ မန္တလေးသားတွေ စကားပြောကောင်းတာ ဒါတင်ဘယ်ဟုတ်မလဲ သီချင်းတွေ ကဗျာတွေ စာတွေလဲအရေးကောင်းကြတာ ဘယ်သူမှမငြင်းနိုင်ဘူး မဟုတ်လား...။ Y-Zet က ပြင်ဉီးလွင်သားဆိုပေမယ့် သီချင်းတွေလုပ်တော့ အိမ်ကထွက်လာပြီး မန္တလေးမှာပဲအနေများခဲ့တာဆိုတော့ မန္တလေသားတစ်ဝက်ဖြစ်နေပြီ...။ O ကြီးလို့ခေါ်ကြတဲ့ Oasix ကတော့ မန္တလေးသားစစ်စစ်....။ GTC ဆက်မတက်ဘဲ အီးမေဂျာနဲ့ ရတနာပုံကျောင်းဆင်း....။ ဘာပဲဖြစ်ဖြစ် အနုပညာရူးသွပ်ကြသူချင်း လိုင်းမတူပေမယ့် ကျွန်မကတော့သူတို့ရဲ့ ကြိုးစားမှု ရူးသွပ်မှုတွေကို စာနာနားလည်မိတယ်...။ သီချင်းရေးတယ်ဆိုတာ ကျွန်မတို့စာရေးတာထက် အများကြီးခက်တယ်....။ စာသားတစ်ခုထဲကို ခံစားရှာဖွေရတာမဟုတ်ဘဲ melody တွေပါထည့်ရသေးတာ....။ ရင်ဘတ်ထဲကမလာဘဲ ဘာမှဖန်တီးယူလို့မရဘူး...။ ဒါကြောင့် သီချင်းရေးသူ ဆိုသူတိုင်းကို တကယ်ပဲအားကျချီးကျူးမိတယ်...။ 

Y-Zet ရဲ့ Hope နဲ့ သူစိမ်း ကို အရမ်းကြိုက်တယ်....။  Hope မှာ Y-Zet ရဲ့စကားပြောအသံက ဒီသီချင်းမှာအသက်ပဲ....။ ဒီသီချင်းနားထောင်ဖူးတဲ့သူတော့ သိမှာပါ....။ ကိုယ်တွေက ခုမှစနားထောင်ဖူးလို့ ပြောပြတာ နားထောင်ဖူးတာကြာပြီဖြစ်တဲ့သူတွေအတွက်တော့ အထူးဆန်းမဟုတ်တော့ဘူးပေါ့....။ ဒါပေမယ့် ကျွန်မ သီချင်းတွေအများကြီးနားထောင်ခဲ့ဖူးတာ ဒီလို သီချင်းတွေထဲက စကားပြောနေရာမှာ Y-Zet အသံက အမိုက်ဆုံးပဲ တကယ်ကြိုက်တယ်....။ စာသားတွေကလည်း တကယ်ထိတယ်...။ Hope ရော သူစိမ်းရော  Y-Zet နဲ့ ဇာနည်ချစ်ရေးတာ....။ Hope မှာမယ်လိုဒီက နှစ်ပိုဒ်လောက်ပါတာ စကားတွေအများကြီးပြောသွားတာကိုက ဒီသီချင်းလေးအတွက် တကယ့်အသက်ပါ....။ "သူ ကျွန်တော့်ကိုမေးဖူးတယ် ထွက်ခွာသွားတဲ့သူနဲ့ကျန်ခဲ့တဲ့သူ ဘယ်သူကပိုလွမ်းလဲတဲ့.... ကျွန်တော်.....ကျွန်တော်မသိဘူးဗျ သိလား " "ပင်လယ်ကြီးကို ဘယ်သူမှမပိုင်ဆိုင်ကြဘူး ဒါပေမယ့် အများအားဖြင့် ပင်လယ်ကြီးကိုတေွ့ရင် ပျော်ကြတယ် ပင်လယ်ကြီးကိုချစ်ကြတယ်...အဲဒီတော့ ပိုင်ဆိုင်ရမှ အချစ်ဆိုတာ မဟုတ်ဘူးလို့ ကျွန်တော်ယုံကြည်လာတယ်...." OMG!!!! အဲဒီစာသားတွေကို ရွတ်သွားတဲ့ အသံနေအသံထားနဲ့ ဖန်တီးထားတဲ့ music လေးက အရမ်းမိုက်တာပဲ....။ ဂီတအကြောင်း ကဂနဏ နားမလည်လို့ သေချာမရှင်းပြတတ်ဘူး နားထောင်ကြည့်ရင်တော့ ခံစားမိနိုင်ကြမှာပါ....။ သူစိမ်းမှာကျတော့ Y-Zet က Rapping အပိုင်းယူထားပြီး ဇာနည်ချစ်ရဲ့ အက်ရှရှ melody ကလည်း အမိုက်စားပါဆို....။ 

Oကြီးအသံကျတော့ ချစ်စရာကောင်းတယ်......မျက်နှာချိုတယ် လူငယ်ဆန်တယ်....။ ခုနောက်ဆုံး Joox မှာ နောက်ဆုံးတင်ထားတဲ့ "ငါမေ့လိုက်ပြီ" လဲကောင်းတယ်...။ "ရဲရင့်လိုက်" ကိုလည်းအရမ်းကြိုက်တယ်... O ကြီးရဲ့ Rapping ရော မယ်လိုဒီကိုရော အရမ်းမိုက်...(melody က အိုင်ရင်းဇင်မာမြင့်ထင်တယ် နာမည်မထိုးထားတော့ သိပ်မသေချာဘူး)...။ ကျွန်မအသက်အရွယ်နဲ့ဆိုတော့ ဒီလို ခပ်အေးအေး ခပ်ဆွေးဆွေးသီချင်းတွေကိုပဲ နားထောင်လို့ရတော့တာလေ ခပ်ဆူဆူကြမ်းကြမ်းတွေကို ငယ်ကတည်းကလဲ မကြိုက်ခဲ့ဘူး...။ ခေတ်နဲ့အညီ လိုက်နားထောင်ကြည့်ရင်း ဒီမန္တလေးသား Rapper နှစ်ယောက်ကိုရှာဖွေတွေ့ရှိခဲ့ကြောင်းပြောပါရစေ....။ ဘယ်ဆယ်လီကိုမှမကပ် အားမကိုးဘဲ ကိုယ့်ခြေထောက်ပေါ်ကိုယ်ရပ်တည်ပြီး သီချင်းအပေါ်သစ္စာရှိရှိ ရူးသွပ်ကြတဲ့ သူတို့လေးတွေကို (သူတို့အမာခံပရိတ်သတ်ရှိပြီးသားပေမယ့်လည်း) ဒီပို့စ်ကိုဖတ်ပြီး မသိသေးသူတွေ သူတို့သီချင်းတွေကိုနားထောင်ကြည့်ပြီး အားပေးကြပါဉီးလို့ ထပ်ပြောချင်ပါတယ်....။ ဒါနဲ့ ကျွန်မက Instagram မှာ Y-Zet နဲ့ Oasix ကို follow ထားတယ်....။  ပြီးတော့ သူတို့က ပြီးခဲ့တဲ့ Feb 22 ရက်နေ့တုန်းက သုဝဏ္ဏဘူမိမှာလုပ်သွားတဲ့ Joox top 100 show ပွဲမှာပါဝင်ပါသေးတယ်....။ သူတို့က မြန်မာတနိုင်ငံလုံးရဲ့ တက္ကသိုလ်ကျောင်းပွဲတွေကို လက်မလည်အောင်ကို တစ်မြို့ပြီးတစ်မြို့လိုက်ဖျော်ဖြေရတဲ့ ကျောင်းသူကျောင်းသားလေးတွေရဲ့ အသည်းကျော်တွေလည်းဟုတ်တယ်....။ 

အင်တာဗျူးတစ်ခုမှာ Oကြီးအသံကို hip hop နဲ့မလိုက်ဘူး ဘာလို့ hip hop ကိုရွေးလဲလို့ ပရိတ်သတ်တချို့မေးထားတာကိုကြည့်ရတယ်...။ ဟုတ်တယ် အဲဒီအကြောင်းလေးနဲနဲပြောချင်တယ် Y-Zet ရော Oasix ရောပဲ သူတို့က hip hop လိုင်းကိုရွေးခဲ့တာဆိုပေမယ့် melody ကိုလည်း ပျံလန်နေအောင် အမိုက်စားအဆိုကောင်းတဲ့သူတွေလို့ နားထောင်သမျှ သတိထားမိခဲ့တယ်....။ Rapper တော်တော်များများ Rap ရွတ်တာကောင်းပေမည့် melody မပိုင်တဲ့သူတွေကအများကြီးရယ်....။ ပြီးတော့ Rap ရွတ်ရင်တချို့ စကားလုံးမပီသဘဲ ဝါးပြီးလုံးနေတာ နားထောင်ရင်နားမလည်တာများတယ် ...။ ဒီဘဲကြီးနှစ်ယောက်ရဲ့ Rap ရွတ်သံကတော့ ပီသကြည်မြ နားထောင်ရင်တခါတည်းသိတယ်...။ အဲဒါလေးတော့ ချီးကျူးဖို့ကောင်းတယ်....။ Y-Zet ဆိုရင် Rapper အဆိုရှင်တစ်ယောက်လို့သာဆိုတယ် သူ့စတိုင်လ်က Rocker ဆန်တယ်... ဆံပင်ရှည်ရှည်နဲ့ဖြဲမယ်ဆိုတဲ့ ဒီဇိုင်းအမြဲဖမ်းထားတယ်လို့ထင်ရပေမယ့် အပြင်မှာတော့ အနေအေးမယ့်ပုံပဲလို့ အင်တာဗျူးလေးတွေကို ကြည့်ရင်းခန့်မှန်းမိတယ်....။ Oကြီးကတော့ အသားညိုညို အဆိုတော်စဖြစ်ကတည်းက အဲဒီအသားကိုပဲ အတိုက်ခိုက်ခံခဲ့ရတာလို့ အင်တာဗျူးတွေမှာပြောခဲ့တာ သိရတယ်...။ အသားအရောင်ခွဲခြားတဲ့ ရုပ်ဝါဒီဆန်တဲ့သူတွေကတော့ ခေတ်အဆက်ဆက်ရှိနေဉီးမှာပဲ သိပ်ဂရုစိုက်စရာမလိုပါဘူး ကိုယ့်ဝါသနာ ကိုယ့်ရူးသွပ်မှု ကိုယ်ရင်းနှီးမြှုပ်နှံထားခဲ့တဲ့ စိတ်ဝိဉာဉ်တွေ အချိန်တွေ ငွေတွေ လူမသိသူမသိအငတ်ခံခဲ့ရတာတွေ အနှိမ်ခံခဲ့ရတာတွေ အတိုက်ခိုက်ခံခဲ့ရတာတွေကို ကာယကံရှင်ကိုယ်တိုင်သာအသိဆုံး ဘယ်သူမှ သူများတကာပိုင်တဲ့ဘဝကို ဝင်ပြီး ဆုံးဖြတ်ပိုင်ခွင့်မရှိဘူး....။ ကိုယ်ယုံကြည်ရူးသွပ်တဲ့ လမ်းကြောင်းကိုသာ ဖြောင့်ဖြောင့်တန်းတန်းလျှောက်လှမ်းပြီး ကိုယ်ချစ်တဲ့ အနုပညာကိုဆက်ကြိုးစားပါ ထိန်းသိမ်းပါလို့ပြောချင်တယ်....။ သီချင်းကောင်းတွေကိုလည်း ဆက်လက်ပြီး ရေးသားသီဆိုပါလို့ ဒီပို့စ်လေးနဲ့အားပေးလိုက်ပါတယ်နော်....။

ကျွန်မက သူတို့ရဲ့ နောက်ဆုံးအသစ်စက်စက် Fan တစ်ယောက်ဆိုတော့...။ 
Lol!! သူတို့ Fan တွေထဲမှာ ကျွန်မက အသက်အကြီးဆုံးဖြစ်ချင်ဖြစ်နေမှာလေ...။ 
ကျွန်မရေးထားတဲ့အထဲက information အမှားတစ်ခုခုပါသွားရင် ကော်မန့်မှာလာပြောနိုင်ပါတယ်နော်...။
ဘယ်လိုပဲဖြစ်ဖြစ် I love you guys, Y-Zet and Oasix 



ရဲရင့်လိုက်



Hope



သူစိမ်း (Y-Zet + Zarni Chit)



ပြောစမ်းပါ featuring shwe Htoo and Alatt



Y-Zet & Oasix ရဲ့ ပြောစမ်းပါ ဆိုတဲ့ အမ်ဘမ်ထဲက "လက်တွဲဖော်"



Oကြီးနဲ့ KMH တို့နှစ်ယောက်ထွက်ထားတဲ့ X အမ်ဘမ်ထဲက ခုထိလူကြိုက်များနေဆဲ ကိုကြီး



Joox မှာနောက်ဆုံးတင်ထားတဲ့ Oasix ရဲ့ သီချင်းလေး


မိုးငွေ့

Sunday, 14 June 2020

Stay Home မှာစားဖြစ်တာလေးတွေ.....












သခွားသီးထောင်း ကောက်ညှင်းပေါင်း ပလာတူးငါးကြော် ဝက်သားပေါင်း ဆီတိုဖူး နဲ့ ဒူးရင်းသီး



ချဉ်ပေါင်နဲ့မျှစ်ကြော်ထားလို့ ထမင်းနဲ့နယ် ဆိုင်မှာရောင်းတဲ့ ချဉ်ပေါင်ဇလုံထမင်းနယ်ကို ကြက်သားရို့စ်နဲ့ အာလူးကြော်လေးနဲ့ အောင်မလေး ဆွေမျိုးမေ့



ငါးမြင်းဆီပြန်ဟင်းလေးချက်စားတယ်လေ 



ငါးမြင်းဆီပြန်ဟင်း မကျည်းချဉ်ရည် ပဲတောင့်ရှည်ကြော် အာလူးပဲကြာဇံသုပ်



စိန်တလုံးသရက်တွေပေါတော့ ထိုင်းသရက်သီးအုန်းနို့ကောက်ညှင်းလုပ်စားပလိုက်တယ်




Presentation လေးလှတယ်မဟုတ်လား



မရမ်းသီးချိုချဉ်လေးလက်ဆောင်ရလို့ ငရုတ်သီးလှော်မှုန့်နဲ့ငံပြာရည်လေးနဲ့သုပ်စား 
အမလေးသွားတောင်ကျိန်းတယ်



ငါးပိရည်ဆိုရင် ဘယ်ချိန်စားစား စားကောင်းနေတာ ငါးပိရည်ထမင်းနယ်နဲ့ ကြက်ကြွပ်ကြော် စွန်ထန်ဟင်းရည်




ရှမ်းဆန်လေးကျန်နေသေးလို့ ရှမ်းထမင်းချဉ်လေးလုပ်စားတယ် အာလူးထောင်းနဲ့ ငရုတ်သီးမီးကျွမ်းကြော်နဲ့ 



တုတ်ထိုးလေးတွေလုပ်စားတယ် အပြင်မှာဝယ်စားမရတော့ကွကိုယ်လုပ်တယ်လေ 
ကြက်ကြောလုံး ဝက်အူချောင်း အပ်မှို သွားသီး ရုန်းပဒေသီး အာလူး ပဲပြား ဒညင်းသီး အစုံပဲ 
တို့စားဖို့အချဉ်ရည်ကို you tube ကကြည့်ပြီး ရှယ်လုပ်ထားတာ
သခွားသီးထောင်းစပ်စပ် အရည်ရွှဲရွှဲနဲ့ မုန့်ဖတ်နဲ့စားမယ်



သင်္ဘောသီးထောင်းကို အတို့အစုံပလုံနဲ့



ကျိုင်းတုံမုန့်တီအရည်



စတော်ဗယ်ရီကို အမြဲနို့နံသကြားနဲ့ပဲဖျော်တာရိုးနေပြီး ဒီတခါ ငံပြာရည်ငရုတ်သီးမှုန့်နဲ့ သုပ်စားတယ်လေ

သင်္ကြန်မရှိပေမယ့် အစဉ်လာမပျက် မုန့်လုံးရေပေါ်လေးတော့လုံးပြီး ဘုရားကပ်




No Bake Mango Cheese Cake လုပ်နည်းလေး ပို့စ်သပ်သပ်တင်ပါ့မယ်


စားကောင်းလို့ ညီမလေးယောက်ျားကို သုံးစိပ်ပေးလိုက်တာ 
သူက တစ်ပတ်လုံးကုန်မှာစိုးလို့ ဇွန်းလေးနဲ့ နည်းနည်းဆီဖဲ့စားတာတဲ့ကဲ


မိုးငွေ့





Monday, 1 June 2020

My Vitamins.....





ဘဝမှာ နေဝင်ချိန်အလှ Sunset ကို ရန်ကုန်မြို့လိုနေရာမျိုးမှာ နေ့စဉ်ရက်ဆက်ကြည့်ရလိမ့်မယ်လို့ မတွေးထားခဲ့ဖူးဘူး...။ များသောအားဖြင့် Sunset ကို ပင်လယ်ကမ်းခြေတို့ ပုဂံတို့လိုနေရာမှာပဲ တကူးတကန့်ရောက်တဲ့အခါ ကြည့်ရတာမဟုတ်လား...။ ခုတော့ stay home မှာ နေဝင်အလှကို ကျွန်မအခန်းကနေ ညနေ ၆နာရီ ကိုယ်လက်လှုပ်ရှား လေ့ကျင့်ခန်းလုပ်ရင်း နေ့တိုင်းလိုလိုကြည့်ဖြစ်နေခဲ့တယ်...။ တနေ့တနေ့ အပြင်မသွားရတော့ အရင်လို ခြေလှမ်းထောင်နဲ့သောင်းနဲ့ချီ မလှုပ်ရှားရတော့ အိမ်မှာ လေ့ကျင့်ခန်းလေးလုပ်မှရမှာလေ...။ စားလိုက်အိပ်လိုက်နဲ့ ဆိုတော့ခန္ဓာကိုယ်မှာ အဆီပိုလာတဲ့နေရာ အဆီကျအောင် စိတ်အေးချမ်းမှုရအောင် ကိုယ်ခံအားအတွက် Booster ဖြစ်အောင်တော့ သွေးပူလေ့ကျင့်ခန်းလေး အရင်လုပ် squat ထိုင် leg workout လုပ် အလေးတုံးနဲနဲမ Yoga လည်းကစားလိုက်သေးတယ်...။ ကိုယ်လိုအပ်မယ့်အပိုင်းလေးတွေကိုပဲ ရွေးလုပ်လိုက်တယ်...။ ရာသီဉတုကလဲ အပူချိန်မြင့်တော့ ချွေးက စပါယ်ရှယ်ထွက်တာ...။ ကိုယ့်အသက်အရွယ်နဲ့ သိပ်ပြီး အပြင်းစားကြီးတွေ အခုန်များတဲ့ဟာတွေကို မကစားတော့ဘူး...။ ဖြေးဖြေးနဲ့ ချွေးလဲထွက်မယ့် ပေါ့ပေါ့ပါးပါး လေ့ကျင့်ခန်းမျိုးဆို အိုကေပြီ...။ ပြီးတော့ နဲနဲနားတဲ့အချိန် နေဝင်တာကိုကြည့်ရင်း မျက်နှာလေ့ကျင့်ခန်းလေးဘာလေးလုပ်ဖြစ်တယ်....။

Covid-19 ကာလမှာ တကယ်အများဆုံးလုပ်ဖြစ်တာက သီချင်းနားထောင်တာ...။ Joox ကနေ အကြိုက်ဆုံးတွေကို ဒေါင်းပြီး Air pod နဲ့ အလုပ်လုပ်လဲနားထောင် ဟင်းချက်လဲနားထောင် ပန်းကန်ဆေးလဲနားထောင် မုန့်ဖုတ်လဲနားထောင် အဝတ်လျှော်လဲနားထောင် စာရေးလဲနားထောင်ပေါ့....။ ဟိုအရင် သီချင်းဟောင်းတွေအပြင် ခုခေတ်အသစ်ထွက်တဲ့ ကိုယ်မသိသေးတဲ့သီချင်းတွေပါ နားထောင်ဖြစ်နေတယ်...။ ကျွန်မက R&B ရူးသွပ်ပြီးရင် Popလဲ နားထောင်ဖြစ်သလို Rap နဲ့ Hip hop တို့လဲနားထောင် ခုခေတ် Hip hop သီချင်းကောင်းကောင်းလေးတွေ စာသား melody ကောင်းကောင်းတွေနဲ့ အဖွဲ့သစ်တွေအများကြီး သူတို့ထဲ ဝင်မွှေနှောက် ကိုယ်ကြိုက်တာလေးတွေ သိမ်းယူထား....။ Rock ဆိုလဲ ကိုလေးတို့ ကိုညီထွဋ်တို့နောက်ပိုင်းမှာ Wanted တို့ Idiot တို့အပြင် နောက်ပေါက်လေးတွေမှာ ဟန်နေတာက မဆိုးဘူး ...။ သူရဲ့ မိုးမခအိပ်မက်က တော်တော်ကောင်းတယ် ပေါက်လဲပေါက်တယ်....။ ပြီးတော့ နောက်တစ်ဖွဲ့ထပ်တွေ့တာ Born for you တဲ့ အဲအဖွဲ့က သီချင်းလေးတွေလည်း ကောင်းတယ်...။ ပြီးမှ သူတို့ သီချင်းလေးတွေတင်ပေးဉီးမယ်...။ အကောင်းဆုံး Hip hop တေးများထဲဝင်ကြည့်တော့ D-vision ဆိုတဲ့အဖွဲ့တွေ့တယ်...။ သူတို့သီချင်းတွေ ခုလောလောဆယ် နားထောင်ဖြစ်နေတယ်...။ အရှေ့ပိုင်းမှာ အဟောင်းထဲက ဟဲလေး ထက်ယံ သားသား ရဲလေး မျိုးကြီး အားတီ မိစန္ဒီ ပိုပိုရယ်... ထုံးစံအတိုင်းနားမထောင်မဖြစ် ကိုမျိုးကျော့သီချင်းတွေ နဲ့ ဘစိုင်းရဲ့ Goodbye  ပြီးတော့ Snare နေဝင်းရဲ့ သံအိပ်မက် နားထောင်ဖြစ်တယ်...။ ဒါတွေက စိတ်ဝိဉာဉ်အတွက် အားဆေးပေါ့...။

ကိုယ်ခံအားကောင်းအောင် ဝိတ်လျှော့တာတို့ ကီတိုတို့ ဘာမှမလုပ်ဘူး တစ်နေ့ကို ထမင်းသုံးနှပ်ပြည့်အောင်စားတယ်....။ ရေများများသောက်တယ်... အသီးများများစားတယ်...။ ဒီနှစ်က စိန်တလုံးသရက်သီး ပေါခြင်းသောခြင်းပါဆို...။ ကျွန်မ စိန်တလုံးသရက်သီးနဲ့ မုန့်လုပ်ထားတာတွေ ပြီးမှတင်ပေးမယ်...။ အဲ ပြီးတော့ လေ့ကျင့်ခန်းပါတွဲလုပ်လို့လား ဘာလားတော့မသိဘူး ဝိတ်တော့ လုံးဝတက်မလာဘူး...။ ကျွန်မက ရေချိုးခန်းအဝမှာ ပေါင်ချိန်စက်ထားထားတာ နေ့တိုင်း မိုးလင်းတခါချိန် ညနေတခါချိန်တာ....။  ၁၃၇-၁၃၈ မှာပဲပြေးနေတယ်....။ အရင်ကမှ ၁၄၀ ကနေ ၁၄၆ ထိအများဆုံးတက်ဖူးတယ်....။ အခုက နေ့စဉ်ပုံမှန်လေးဖြစ်နေလို့ ခန္ဓာကိုယ်က balance ညီသွားတာထင်တယ်...။ အချိန်မှန်စား အချိန်မှန်အိပ်... အိပ်တာကတော့ အချိန်မှန်ဆိုတာ ညဉ့်နက်တယ် တခါတလေ မနက် ၂နာရီ ၃နာရီမှအိပ်ဖြစ်တယ်...။ နေ့လည်ထမင်းစားပြီး နှစ်နာရီလောက်ပြန်အိပ်ပေးတယ်...။ ဘာလို့လဲဆိုတော့ Stay Home ကာလမှာ အများဆုံးလုပ်ဖြစ်တာ သီချင်းနားထောင်ပြီးရင် ရုပ်ရှင်ကြည့်တာပဲ....။ Netflix ဝယ်ထည့်ထားတော့ ဇာတ်လမ်းတွဲတွေကို တခါတည်း အပြီး မိုးလင်းပေါက်ကြည့်တဲ့နေ့လဲရှိတာဆိုတော့...။  ကြည့်ဖြစ်တဲ့ ဇာတ်လမ်းတွေက အများကြီး ထိုင်းဇာတ်လမ်းတွဲ ကိုးရီးယားဇာတ်လမ်းတွဲ ကာတွန်းကားတွေ  Bollywood ကားတွေ....။ အရင်ကဆို Horror တို့ Thriller တို့ ကြိုက်သေးတယ်....။ ခုတော့ ရီစရာမောစရာ ချစ်စရာကားလေးတွေကိုပဲကြည့်ချင်တော့တယ် စိတ်ခြောက်ခြားစရာ ထိတ်လန့်စရာ ပူဆွေးဝမ်းနည်းစရာကားတွေကို မကြည့်ချင်တော့ဘူး....။ ခုလောလောဆယ် အရမ်းအရမ်းကို Crazy ဖြစ်နေတာကတော့ THE KING: eternal monarch ဆိုတဲ့ လီမင်ဟိုအဓိကသရုပ်ဆောင်ထားတဲ့ ကိုးရီးယားဇာတ်လမ်းတွဲ....။ တစ်ပတ်မှာ သောကြာနဲ့စနေပဲလာတာ အဲဒါကို တစ်ပတ်တစ်ပတ်စောင့်ကြည့်ရတာအမောလေ....။ ကျွန်မကသာဒီကားလေးကိုကြိုက်နေတာ သူတို့နိုင်ငံမှာတော့ မင်းသားသရုပ်ဆောင်တာမကောင်းလို့ဆိုပြီး ကြည့်နှုန်းတောင်ကျတယ်တဲ့....။ ဇာတ်လမ်းလေးက ထူးထူးဆန်းဆန်းလေးနဲ့ မင်းသားက ဒီကားမှာ တအားကြီးကိုချောမောနေလို့ကြည့်တယ်ဆိုပါတော့...။ Single ဖြစ်ခြင်းရဲ့ အားသာချက်ကတော့ ကိုယ်ကြိုက်တဲ့သူကို ဘယ်သူ့မှ ဂရုစိုက်စရာမလိုဘဲ လွတ်လပ်စွာဖွန်ကြောင်နိုင်ပဲမဟုတ်လား ha ha....။ ဟုတ်တယ် လီမင်ဟိုက ဟိုတုန်းက F-4 ကားမှာဆို ငါးမြောက်ငါးခြောက်ရုပ်လေး ခုကားမှာကမှ ခန့်ညားထယ်ဝါတဲ့ ဘုရင်တပါးအဖြစ်သရုပ်ဆောင်ထားတာ တကယ်သန့်ပြန့်သပ်ရပ်ချောမောနေတာ အဟုတ်.....။ ကလေးဘဝတုန်းကတော့ ကျောင်းပိတ်ရက်အမြန်ရောက်ချင်လို့ အသက်ကြီးလာလို့ လုပ်ငန်းခွင်ထဲရောက်တော့ tgif ဖို့ သောကြာနေ့စောင့်ရတာ ခုတော့ အလုပ်မရှိပိတ်ရက်ရှည်မှာ ဘုရင်ကြီးကားကြည့်ဖို့ သောကြာနေ့ကိုထပ်စောင့်ရပြန်တယ်ပေါ့....။

မိုင်ဗီတာမင်တွေဆိုတာ သီချင်းနားထောင် ရုပ်ရှင်ကြည့် စာအုပ်ဖတ် ချစ်ခင်သောသူများနဲ့အွန်လိုင်းစကားပြောခြင်းတွေပေါ့.....။ စာအုပ်ကလည်း အဟောင်းတွေထဲက ဖတ်ပြီးသားတွေပြန်ဖတ်ဖြစ်တယ်...။ အသစ်က ဘာမှသိပ်မဝယ်ထားဖြစ် ဖတ်ချင်တဲ့စာအုပ်လဲသိပ်မတွေ့တော့လေ...။ The Dark ဆိုတဲ့စာအုပ်ကို အင်းဝမှာ ကိုင်လိုက်ချလိုက်နဲ့ မဝယ်ဖြစ်ခဲ့ဘူး....။ အဲစာအုပ်က တချိန်က အမေရိကားမှာ အယူလွဲ လူတွေကို ယဇ်ပူဇော်တဲ့ နဲနဲကြမ်းတဲ့ ဇာတ်လမ်းမျိုး....။ Rate တောင်သတ်မှတ်ထားသေးတယ်....။ ပြီးတော့ ဒီ Covid-19 ဗိုင်းရပ်ပြီးရင် (ဘယ်တော့ပြီးမလဲတော့မသိဘူးပေါ့) အလုပ်ပြန်လုပ်ဖို့ Plan တွေဆွဲ ဆိုင်ခွဲထပ်ဖွင့်ဖို့အတွက် ဆိုင် Deco တွေ ဆွဲခိုင်းထားတာကို ပြန်စစ် Product ပုံတွေရိုက် ဆိုင်မဖွင့်သေးပေမယ့် အွန်လိုင်းနဲ့ရောင်းနေတာမို့ အော်ဒါရှိရင် ပါဆယ်ပြေးထုပ် delivery ပို့ဖို့လုပ်ရ...။ ဆိုင်အသစ်ကျရင်တော့ အဝတ်အစားတွေပါထည့်မယ်....။ မုန့်တွေပါမယ် Home made  Home bake မုန့်တွေပေါ့...။  အော်ဂဲနစ်အစာတွေပေါ့...။ ဒီကိုးဗစ်ပြီးရင် လူတော်တော်များများက အိမ်တွင်းအောင်း စားလိုက်အိပ်လိုက်ဆိုတော့ ဝိတ်တက်လာမယ့်သူတွေအတွက် gym တို့ yoga တို့ဆော့ရင်ဝတ်ဖို့အတွက် outfit မိုက်မိုက်လေးတွေရောင်းမယ်လေ....။ နှစ်ကုန်ခါနီး မလေးက သူငယ်ချင်းနဲ့လဲ ဆိုင်တစ်ခုလုပ်ဖို့ရှိတယ်...။ အဲမှာလဲ အော်ဂဲနစ်နဲ့ ကီတိုလို Healthy Food တွေကို အဓိကထားရောင်းမယ်....။ နောက် အချိုပွဲလေးတွေရောင်းမယ်...။ အဲဒါလုပ်ဖို့ မလေး KB မှာ မုန့်လုပ်သင်ဖို့ သွားလေ့လာရမှာကို ဒီဗိုင်းရပ်စ်ဝင်နှောက်တော့ အစီစဉ်တွေပျက်ကုန်တယ်....။ ဒီနှစ်ဘာမှမလုပ်ဖြစ်တောင် နောက်နှစ်တော့ အလုပ်တွေအများကြီးလုပ်ရမယ် သေချာလုပ်ရမယ်...။ ဒါက သူငယ်ချင်းတွေနဲ့ပေါင်းလုပ်မယ့် business နောက်တစ်ခု Commune Wear နဲ့မဆိုင်ဘူး....။  ဆိုင်မှာဘာပဲလုပ်လုပ် update တင်ပါ့မယ် လာအားပေးကြဉီးနော်....။

Instagram story မှာပုံတင်တော့ ညီမတစ်ယောက်ကလာမေးတယ် အစ်မက အသက်လေးဆယ်ကျော်နေပြီ ဘာလို့ မျက်နှာမှာအရေးအကြောင်းတွေမရှိသေးတာလဲတဲ့...။ ကျွန်မလည်း ဘာမှသိပ်ပြီးထွေထွေထူးထူးမလုပ်ပါဘူး ဆိုင်မှာ Facial တောင် တစ်နှစ်လုံးနေမှ နှစ်ခါသွားမလုပ်ဖြစ်ဘူး....။ သူများတွေလို မျက်နှာ ကြိုးထိုးတာတို့ ဘာတို့ဆိုပိုဆိုး အသားတော့အနာမခံနိုင်ဘူး ....။ အိမ်မှာ မျက်နှာကိုတော့သေချာသစ်တယ် စိတ်ကိုကြည်လင်အောင် ရှင်းအောင်အမြဲထားတယ်....။ မျက်နှာသစ်ပြီးရင် toner နဲ့သေချာသုတ်တယ် ရေဓါတ်များများပါတဲ့ နို့ရည်လိမ်းတယ် Sleeping mask ကိုတော့ တစ်နေ့ခြားတခါပဲလိမ်းတယ်...။ ပြီးတော့ Blogger ဝင်းမင်းသန်း အော်ဇီကပြန်လာလို့ လက်ဆောင်ပေးထားတဲ့ နှုတ်ခမ်းအဆီလေးလိမ်းတယ်... ဒါပါပဲ ...။ တစ်ပတ်နှစ်ခါ mask ကပ်ပေးတယ်....။ အဓိက အိုမင်းရင့်ရောမှုကို လျော့ကျစေတာကတော့ စိတ်ပါပဲ...။ ငယ်စဉ်ကာလ လူမှန်းသိတတ်စအရွယ်ကတည်းက ခုချိန်ထိ ဘယ်သူ့ကိုမှ မစ္ဆိရိယစိတ်မထားခဲ့ဖူးဘူး စိတ်ကိုအမြဲရှင်းအောင်ထားတယ် စိတ်ရှုပ်စရာတွေကို အကြာကြီးမသိမ်းထားတတ်ဘူး အဲဒါကြောင့် မျက်နှာကြည်လင်တယ်ထင်တာပဲ...။ နုပျိုတယ်ဆိုတာ တကယ်တော့မဟုတ်ဘူး သူ့အသက်အရွယ် သူ့ရုပ်ရည်နဲ့သူတော့ ရှိကြတာပဲ...။ ဘယ်လိုပဲပြောပြော ကိုယ့်အသက်ကိုတော့ ဘယ်တော့မှမမေ့ဘူး...။ ဘဝဆိုတာ အချိန်ကတိုတိုကလေးရယ်...။  အခု အသက်၄၅နှစ်ကျော်သွားပြီ နောက်ဆုံးကိုယ့်သက်တမ်းဟာ ၆၀-၆၅ ပဲနေရမယ်ဆို နောက် ၁၅နှစ်  နှစ်၂၀ပဲ ခဏလေးပဲနော်တေွးကြည့်တာနဲ့....။ အဲလိုအချိန်တိုတိုလေးမှာ စိတ်ချမ်းသာစရာတွေနဲ့ပဲ ကုန်ဆုံးချင်တယ်...။ ဘယ်သူ့မှမထိခိုက်ရင် ကိုယ်လုပ်ချင်တဲ့ အရာမှန်သမျှကို လုပ်လိုက်တာပဲ...။ ဒါမှလူဖြစ်ရတာ ထိုက်တန်တယ်လို့ ကျွန်မကတော့ ယူဆတယ်.... ။ လူဆိုတာ ဘယ်ချိန်ဘာဖြစ်မယ်ဆိုတာ ဘယ်သူမှ ကြိုမသိနိုင်ဘူး...။ ပြောစရာရှိတာ လုပ်စရာရှိတာ မတွန့်ဆုတ် မတွေဝေဘဲလုပ်လိုက်တာကောင်းတယ်...။ အဲလိုပဲခံယူဖြစ်သွားတယ်ပေါ့ ဒီအသက်အရွယ်ရောက်တဲ့အချိန်မှာ...။

အရေးကြီးဆုံးက တရားဘာဝနာပွားဖို့ကိုတော့ မမေ့ကြပါနဲ့လို့... သေရင်ဒါပဲပါမှာလေ....။ ကုသိုလ်ကောင်းမှုလုပ်တာက နောင်ဘဝကောင်းဖို့ ဘာဝနာပွားတာကတော့ နိဗ္ဗာန်ကိုရောက်ဖို့....။ တစ်ရက်ကို အနည်းဆုံး မအိပ်ခင် ၁၀မိနစ်လောက်တော့ တရားထိုင်ကျင့်ထားပါ ခုချိန်ကစလိုက်ပါ နောက်မကျသေးပါဘူး....။ စိတ်ရဲ့ငြိမ်းချမ်းမှုအရသာကို အဲချိန်မှာပဲရတာ....။ စစချင်းတော့ ကိုယ့်စိတ်ကိုမိအောင်ဖမ်းရတာ တော်တော်တော့ ခက်ခဲပင်ပန်းလိမ့်မယ်....။ တဖြေးဖြေးတော့ ကျင့်သားရသွားမှာပါ....။ ကျွန်မ အခု ဆရာဒေါက်တာဉီးစိန်လင်းရဲ့ ရွှေစင်မြင်းမိုရ်အဘိဓမ္မာ စာအုပ်ထဲက စိတ်အကြောင်းဖတ်နေတယ်...။ ကျွန်မသိသလောက် နားလည်သလောက်ပြန်ပြီး Apply လုပ်ပါ့မယ်...။ ဝါတွင်းသုံးလကျရင် ကျွန်မဒီပို့စ်တွေပဲတင်ဖြစ်သွားမှာပါ...။ You Tube ကနေလဲ ဆရာမဒေါ်ခင်လှတင်ရဲ့ ပို့ချမှုတွေကို လိုက်နားထောင်ပြီးသင်ယူနေပါတယ်...။

စာတော်တော်ရှည်သွားပြီ ဒီလောက်ပဲ... stay home မှာ ကျွန်မရဲ့ ဗီတာမင်တွေကတော့ ဒါတွေပါပဲလို့ Simply is the best တဲ့ ရိုးစင်ပြီးယျေဘူယျဆန်ပေမယ့် ကျွန်မလုပ်ဖြစ်ခဲ့တာလေးတွေကို ပြန်လည်မျှဝေတာပါ ....:)


မိုးငွေ့


Monday, 25 May 2020

မိုခါး(Mocha).....




ခေါင်းရင်းဘေးနားက ဖုန်းမက်ဆေ့သံမြည်လာလို့ နာရီကြည့်လိုက်တော့မှ မနက် ၇ နာရီ ၄၅မိနစ်ရှိပြီ....။ ဖုန်းယူကြည့်ရင်း ကိုယ်တစ်ချက်ပြုံးလိုက်မိတယ်...။ သူ့ဆီက မက်ဆေ့....။ မနေ့က ကိုယ်သိချင်တဲ့ အချက်လက်တစ်ခုကိုမေးထားလို့ သူပြန်ဖြေပေးထားတာ...။ အောက်ဆုံး တစ်ကြောင်းမှာတော့....
" ဒါနဲ့ မင်္ဂလာနံနက်ခင်းပါ .... ကောင်းသောနေ့လေးဖြစ်ပါစေ...." တဲ့....

ကိုယ်တို့ အွန်လိုင်းမက်ဆေ့နဲ့ စကားပြောတာဖြင့်ကြာလှပြီ တစ်ခါမှ သူ့ဆီက တကူးတကန့် ဒီလိုနှုတ်ဆက်တဲ့ မက်ဆေ့မရဖူးဘူး....။ ကိုယ်ကသာ ဂွတ်မောနင်းတွေ ဘာတွေ လုပ်ဖြစ်သေးတယ်...။ ကိုယ်နဲ့စကားလာပြောတိုင်း လိုရင်းတွေကိုပဲ တုံးတိတိပြောတတ်တဲ့သူက ဒီနေ့တော့ ထူးထူးခြားခြားမို့ ကိုယ်သဘောကျစွာ ပြုံးမိသွားခဲ့တာ...။

"ကျေးဇူးပါ.... တစ်ရက်လောက် မင်းကို ကော်ဖီတိုက်ပါ့မယ်..."

Active မှာ မီးစိမ်းနေတာမတွေ့လို့ ကိုယ်စာချန်ထားခဲ့လိုက်တယ်.....။

" ကျွန်တော် ဘာကော်ဖီကြိုက်လဲဆိုတာ ခင်ဗျားသိလို့လား...."

မက်ဆေ့သံလေးကြားလို့ ဖုန်းပြန်ယူကြည့်တော့ သူဖြစ်နေတယ်...။ ခုလို ကိုယ်ပြောတာကို စိတ်လိုလက်ရ ပြန်ပြောဖော်ရတာ ကမ္ဘာရှား....။ တခါတလေ ကိုယ်ပြောထားခဲ့တဲ့ မက်ဆေ့တွေကို နှစ်ရက် သုံးရက်နဲ့မပြန် တစ်ပတ်လောက်နေမှ စာပြန်တတ်တဲ့သူ.....။

" Coffee Latte or Americano ?  "

"No... ကျွန်တော်က အစွဲမရှိဘူး ဘာကော်ဖီဖြစ်ဖြစ်သောက်တယ်.... ကော်ဖီဆိုင်ထိုင်ရတာကို သဘောကျတာ... ဒါကြောင့် ခင်ဗျားကော်ဖီတိုက်မှာကို စိတ်ဝင်စားသွားတာ တစ်ရက်တွေ့မယ်လေ ဒါပေမယ့် ခင်ဗျားကိုပဲ ကျွန်တော်တိုက်မယ် ခင်ဗျားရောဘာကော်ဖီကြိုက်လဲ..."

"Mocha...."

"မိန်းကလေး တော်တော်များများ Mocha ကော်ဖီကြိုက်တတ်တယ်ထင်တယ် ချောကလက်ပါလို့လေ.."

" ဘာဆိုင်လို့လဲ ကိုယ်ကလုံး...ဝ ချောကလက်မကြိုက်ဘူး ဒါပေမယ့် မိုခါးကိုတော့ကြိုက်တယ်..."

"ဒါဆို ကျွန်တော် ခင်ဗျားကို ကော်ဖီတိုက်ဖို့အကြွေးရှိတယ်ဆိုတာ မှတ်ထားပေး
ခင်ဗျား အခုမှအိပ်ယာထတာမဟုတ်လား  ဒါပဲ မျက်နှာမသစ်ရသေးဘဲ စကားလာပြောနေတယ်..."

ကြည့်စမ်း ကိုယ်ခုမှ အိပ်ယာနိုးပြီး မျက်နှာမသစ်ရသေးတာကို သူက အကြားမြင်ရနေတယ်...ဟွန့်....။

Mocha ကော်ဖီကို မိန်းကလေးတွေကြိုက်တတ်တယ်ဆိုတဲ့ သူ့မှတ်ချက်ကြောင့် ပျိုးယုဝသုန်ရေးထားတဲ့ "အပြာရောင်တောင်တန်းများသို့လွမ်းချင်း"ထဲက မြတ်မင်းဧရာက ရှင်မင်းခကိုပြောတဲ့ အပိုဒ်လေးသွားအမှတ်ရမိတယ်...။

"မိုခါး ကော်ဖီမှာ နှပ်ထားတဲ့ ကော်ဖီရယ် ချောကလက်မှုန့်ရယ် သကြားရယ် နို့ရယ်ပါတော့ မိုခါးကော်ဖီက ပျော့ပျောင်းနူးညံ့တဲ့အရသာလေးထပ်ပေါင်းထားတော့ ညင်သာတဲ့အနံ့အရသာတစ်ခုကိုပေးတယ်..။ ပြီးတော့ အရောင်က အညိုရင့်ရောင်ရှိတယ်... အပေါ်က မြှုပ်အဖြူလေးတွေနဲ့ဆိုရင် ရှင်မင်းခ မျက်လုံးတွေလိုပဲဗျ...။ ခင်ဗျား မျက်လုံးတွေက အညိုရင့်နဲ့ အဖြူပေါင်းထားသလိုမျိုးလေ...။ ပြီးတော့ မိုခါးကော်ဖီရဲ့ ညံ့သက်တဲ့အရသာက ခင်ဗျားလှုပ်ရှားမှုတွေလိုပဲ စိတ်မဆိုးနဲ့ဗျာ ကျွန်တော့်စိတ်ထဲ ဖြစ်လာတာကို ပြောပြတာပါ..."(Credit to ပျိုးယုဝသုန်/ ကော်ဖီရနံ့)

ကိုယ် ရေချိုးခန်းထဲမရောက်သေးဘဲ တစ်ယောက်ထဲ အတွေးများနေတုန်း မက်ဆေ့သံလေးထပ်ပေါ်လာလို့ ပြန်ကြည့်မိတော့...

" ခင်ဗျားနဲ့ Mocha ကော်ဖီနဲ့လိုက်ဖက်တယ် သိလား..." တဲ့....

အမလေးနော်....ဒီနေ့တော့ ရေမိုးချိုးပြီး ထီသွားထိုးမှပါပဲ...။ သူ့ဆီက ကိုယ့်ကို အရောတဝင် စိတ်ရလက်ရ မက်ဆေ့တွေ ပြန်ပြောနေလို့လေ...။ သေချာတာကတော့ အပြာရောင်တောင်တန်းထဲက မြတ်မင်းဧရာက ရှင်မင်းခကို ပြောသလို မင်းကိုယ့်ကို ဘယ်တော့မှပြောမှာမဟုတ်ဘူးဆိုတာပဲ....။

ရေချိုးခန်းထဲဝင်ပြီး မှန်ထဲမှာ ကိုယ့်မျက်ဝန်းတစ်စုံကို ကိုယ်သေချာပြန်ကြည့်မိတယ်...။ အညိုရင့်ရင့်မျက်ဆံကြီးကြီးနဲ့ မျက်သားဖြူဖြူတွေ ...ဓါတ်ပုံရိုက်တိုင်း ဝိုင်းစက်နေတတ်တဲ့ မျက်ဝန်းတွေ....။ ရှည်မျောမျော မျက်အိမ်ကျဉ်းကျဉ်း မျက်ဆံနက်နက်တွေနဲ့ သူ့ကိုပြန်မြင်ယောင်မိတော့ ကိုယ် ရယ်ချင်မိသွားတယ်...။

ကိုယ်တို့ စတွေ့တွေ့ချင်းတုန်းက လေယာဉ်ပေါ်မှာ အမှောင်ထဲ ကိုယ့်မျက်လုံးတွေကို သူက သဘောကျကြောင်း ပွင့်ပွင့်လင်းလင်းပြောခဲ့ဖူးတယ်...။ အဲတုန်းက သူ့ကို ပြန်ရန်တွေ့ပြီး စူးစိုက်ကြည့်ခဲ့တုန်းကပေါ့...။ လေယာဉ်ပေါ်မှာ ကျန်းမာရေးကဒ်ပြားဖြည့်ရတော့ ဖြည့်ပြီးသားကဒ်ကို ကိုယ်က အရှေ့ထိုင်ခုံနောက်ကျောထဲ ဒီတိုင်းလေးညှပ်ထည့်ထားတာကို သူက သက်သက် ရန်လာစတာ...။

"ခင်ဗျား ဖုန်းနံပါတ်ကို ကျွန်တော် လုံးဝစိတ်မဝင်စားဘူးနော် ရေလာမြောင်းပေးလုပ်တာ ရပ်တော့..."

ကိုယ်ကြားနိုင်ရုံသလောက် တိုးတိုးကပ်ပြောပြီး ကိုယ့်ကို အရှက်ရစေတဲ့ အထက်စီးလေသံနဲ့ပြောတာကြောင့် ကိုယ်ဖြည့်ထားတဲ့ စာရွက်ကို လုံးချေပစ်လိုက်တယ်...။

"ဟာ  ဘာလို့ အဲလိုလုပ်လိုက်တာလဲ  လေယာဉ်ဆိုက်ရင်ပေးရမှာလေ ပြန်ဖြည့်ထားမလား ကျွန်တော် ခင်ဗျားအတွက် အသစ်တစ်စောင်ပြန်တောင်းပေးမယ်..."

ကိုယ်သူ့ကိုဘာမှပြန်မပြောဘဲ ပြူတင်းပေါက်ဘေးမှာထိုင်နေတဲ့ ကိုယ်နဲ့ဘေးချင်းကပ်လျက် သူ့ကို သေချာလှည့်ပြီး ဒေါသထွက်ထွက်နဲ့ စူးစိုက်ကြည့်လိုက်တယ်...။

"မိုက်တယ်.... ခင်ဗျားမျက်လုံးတွေက အမှောင်ထဲမှာတောင် တောက်ပနေတာပဲ အဲဒါတော့ သဘောကျတယ်..."

"ဘာရယ်...."

"ရှူး...တိုးတိုးပြောလေ ခရီးသည်တွေ အိပ်နေကြတာ တချို့..."

အဲကတည်းက ကိုယ့်ဖုန်းနံပါတ်ကို သူက ဖုန်းနဲ့ခိုးရိုက်ထားပြီး နောက်ပိုင်း ကိုယ့်ဗိုင်ဘာကို လာအက်ပြီး စကားလာပြောရင်းက ကိုယ်တို့ ခင်မင်သွားခဲ့ကြတာဆိုပါတော့....။


@@@@@@@@


ဆောင်းဝင်စမို့ထင်ပါရဲ့ ညနေလေညှင်းက အေးအေးစိမ့်စိမ့်....။ ကောင်းကင်ကြီးကလည်း မှုန်မှိုင်းပြာဝေနေတယ်...။  ကိုယ်တို့ ကော်ဖီသောက်မယ်လို့ မှန်းထားတဲ့ ဆိုင်မှာ မသောက်ဖြစ်တော့ဘဲ... အပြင်ရာသီဥတုကို ခံစားချင်တာနဲ့ အပြင်ဖက် ခုံခင်းထာတဲ့ ကော်ဖီဆိုင်လေးကိုပဲ ရွေးထိုင်လိုက်ကြတယ်...။  ကိုယ်တို့ထိုင်တဲ့ စားပွဲဝိုင်းက အားလုံးထဲမှာ အစွန်ဆုံးဝိုင်း....။ အဲနားမှား ဘတ်စ်ကားဂိတ်ရှိတော့ ခရီးသည်တွေနဲ့ ယောက်ယက်ခတ်လို့... တစ်ဖက်လမ်းကိုကူးလိုက်ရင် အင်းလျားကန်ဘောင်ရောက်ပြီ...။

"ခင်ဗျားအတွက် မိုခါးလက်တေးအပူတစ်ခွက်နဲ့ ငှက်ပျောကိတ်တစ်ခုမှာထားပေးတယ်...."

"မင်းရော..."

"ကျွန်တော်က hot latte  စီးကရက်နဲ့မြည်းမယ်လေ...ဒီနေရာလေးက smoking zone ဆိုတော့
ဒါနဲ့ ခင်ဗျား စီးကရက်နံ့ခံနိုင်ရဲ့လား..."

" ရပါတယ် သောက်ပါ..."

"ဆောင်းဦးပေါက်မို့ထင်တယ် နေစောစောဝင်သွားတာ မဟုတ်ရင် ဒီနေရာကနေ Sun Set ကြည့်ပြီးကော်ဖီသောက်ရရင် ပိုမိုက်မှာ.."

သဘာဝတရားကြီးကို ခံစားပြောဆိုနေတဲ့ သူ့ကို ကိုယ်သဘောကျလို့ ပြုံးလိုက်မိတယ်....။

"ဘာပြုံးစေ့စေ့လုပ်နေတာလဲ ခင်ဗျားက..."

"ဘာမှမဟုတ်ပါဘူး... မင်းလို လူမျိုးလဲ ဒါတွေကို စိတ်ဝင်စားတတ်သေးတာပဲလို့ တွေးမိလို့ပါ..."

"ဘာလဲ  ခင်ဗျားက ကျွန်တော့်ကို ကွန်ပြူတာတစ်လုံးနဲ့ပဲ အလုပ်ရှုပ်ပြီး တခြားဘာမှ စိတ်မဝင်စားတတ်တဲ့ သူလို့ ထင်နေတာလား.."

"မဟုတ်လို့လား...."

သူမှာထားတဲ့ ကော်ဖီနှစ်ခွက်နဲ့ မုန့်ရောက်လာတော့ စကားစပြတ်သွားခဲ့တယ်...။ သူက ကော်ဖီတကြိုက်သောက် အိတ်ထဲက စီးကရက်ထုတ်ပြီး မီးညှိလိုက်တယ်....။ တဖွာလောက်ရှိုက်ပြီး ကိုယ့်ကို သူလှမ်းကြည့်တယ်...။ ကိုယ်က ငှက်ပျောကိတ်ကို ဖဲ့နေတုန်း သူ့ကိုပြန်ကြည့်တော့...။

"ဘာလို့လဲ ဘာလို့ကြည့်နေတာလဲ မုန့်စားချင်လို့လား ကိုယ်ဖဲ့ပေးရမလား.."

သူက မျက်လုံးတွေကို မှေးစင်းပြီး စီးကရက်ဆက်ဖွာတယ်....။ သူ့မျက်အိမ်ရှည်ရှည်ကျဉ်းကျဉ်းထဲက မျက်ဆံနက်နက်အကြည့်တွေက စူးစူးရှရှ....။


" ခင်ဗျား မျက်လုံးတွေ ဒီနေ့ပိုလှတယ် သိလား မိုခါး..."

"မိုခါး"  ကိုယ်က အံ့အားသင့်သွားတဲ့ဟန်နဲ့ ကိုယ့်ကို မိုခါးလို့ခေါ်လိုက်တာလားလို့ ကိုယ့်ကိုယ်ကို ပုတ်ပြတော့...

"အင်း... ဟုတ်တယ်လေ... ခင်ဗျားကို ခေါ်တာ မိုခါးဆိုတာ..."

"ဘာလို့လဲ..."

" မသိဘူး အဲဒီကော်ဖီနာမည်နဲ့ ခင်ဗျားနဲ့လိုက်ဖက်တယ်လို့ တွေးမိလို့ ဘာလဲ မကြိုက်ဘူးလား..."

"ကြိုက်ပါတယ်... ခင်ဗျား ခင်ဗျားလို့ ခေါ်နေတာထက်စာရင်..."

"ha ha.... ကျွန်တော်က အဲလိုပဲပြောတတ်လို့ပါ ခင်ဗျားကလဲ...."

ပြောနေရင်း သူက နောက်တောက်တောက်လုပ်လို့ ကိုယ်မျက်စောင်းထိုးပစ်လိုက်တယ်...။

"ဟာ.... သွားပါပြီ.."

"ဘာဖြစ်တာလဲ..."

"မိုခါး မျက်စောင်းကြောင့် ကျွန်တော့် စီးကရက်မီးသေသွားပြီ..."

" ပေါက်ကရ.... လေတိုက်လို့ သေသွားတာကို..."


သူ့နာမည်ရှည်လို့ဆိုပြီး ကိုယ်နဲ့စကားပြောတိုင်း မမူးဘဲရစ်တတ်လို့ သူ့ကို ကိုယ်က ဝိုင်(Wine)ဆိုပြီး ခေါ်ဖြစ်သွားခဲ့တာ....။ ခုတော့ သူကဝိုင် ကိုယ်ကမိုခါးကော်ဖီ ဟုတ်တော့ဟုတ်နေပြီ.....။

" အော်...ဒါနဲ့ ဟိုနေ့က ခင်ဗျားကျွန်တော်နဲ့ VC ပြောနေတုန်းက စာအုပ်ဖတ်ပြီး တရှုံ့ရှုံ့နဲ့ငိုနေတာ အဲဒီစာအုပ်ခုယူလာခဲ့လား ဘာအကြောင်းရေးထားတာမို့ ငိုရသလဲလို့ ကျွန်တော်ဖြင့်မကြားဖူး မမြင်ဖူးဘူး စာအုပ်ဖတ်ပြီး ငိုတဲ့သူကို..."

သူပြောတော့မှ အိတ်ထဲက ပျိုးယုဝသုန်ရဲ့ အပြာရောင်တောင်တန်း ဝတ္ထုလေးပါတဲ့ ကော်ဖီရနံ့ စာအုပ်လေးထုတ်ပေးလိုက်တယ်...။

"ရော့ ဒီစာအုပ်ရဲ့နောက်ဆုံးက တစ်ပုဒ်နော် အဲဒါအရင်ဖတ်ကြည့် တစ်အုပ်လုံးကတော့ ကော်ဖီအကြောင်းကို ဖွဲ့ထားတဲ့ ဝတ္ထုတွေ အက်ဆေးတွေချည်းပဲ... မင်းက နိုင်ငံခြားမှာကျောင်းတက်ဖူးတော့ ကော်ဖီယဉ်ကျေးမှုကိုပိုသိမှာပေါ့..."

"ကော်ဖီအကြောင်းအဲလောက်ကြီးတော့မသိပါဘူး ဒါပေမယ့် ကျွန်တော်ရောက်တဲ့နေရာတိုင်းတော့ ကော်ဖီဆိုင်ထိုင်ရတာကိုကြိုက်တယ်.."

"ကိုယ်နဲ့ အဲဒါတော့တူတယ်..."

"ကျွန်တော်နဲ့ မိုခါး အကြိုက်တူတာ နှစ်ခုရှိသွားပြီပေါ့ ခုတော့..."

ဟုတ်တယ် သူနဲ့ကိုယ် ခရီးသွားတာနဲ့ ကော်ဖီဆိုင်ထိုင်တာ အကြိုက်ချင်းတူတယ်....။ ကိုယ်မိုခါးကော်ဖီတငုံသောက်ပြီး ပြုံးပြလိုက်တော့...။

"နောက်ဆို ကျွန်တော်ကော်ဖီဆိုင်ထိုင်ချင်ရင် ခင်ဗျားကို အဖော်ခေါ်လို့ရပြီပေါ့..."

"ရပါတယ် ကိုယ်အားရင်လာခဲ့မှာပေါ့..."

"အင်း ပြောမယ့်သာပြောတာ ကျွန်တော်ကိုယ်တိုင် တစ်ပတ်မှာ ကော်ဖီဆိုင်တစ်ခါထိုင်ရဖို့တောင် အချိန်လုရမှာ အလုပ်ကရှုပ်မှာ ခုတလောက..."

"အင်း ကိုယ်ရော မင်းရော အားတဲ့အချိန်ဆုံရင်ပေါ့..."

အဲဒီညနေက လေတဖြူးဖြူးနဲ့မို့ သူ့စီးကရက်ကို တစ်လိတ်ပြီးအောင်တောင်မဖွာလိုက်ရဘဲ မီးငြိမ်းငြိမ်းသွားတာနဲ့ ပြာကျသွားတာနဲ့ပဲ သုံးလေးလိတ်လောက် သူ့မှာ မီးညှိလိုက် သောက်လိုက် ကိုယ်နဲ့စကားပြောလိုက်နဲ့...။ ကော်ဖီသောက်ပြီး သူက ကိုယ့်ကို သူ့ရဲ့ B M W ကားအနက်ရောင်လေးနဲ့ပြန်ပို့ပေးတယ်...။ တကယ်တော့ ကိုယ်တို့ လေယာဉ်ပေါ်မှာ ဆုံကတည်းက အပြင်မှာ ခုမှသာ လူခြင်း ပြန်တွေ့ကြတာ...။ ကြားထဲမှာ အွန်လိုင်းပေါ်မှာပဲ စကားပြောဖြစ်ခဲ့ကြတာ..။

ကိုယ်တို့ ကော်ဖီအတူသောက်ပြီး အပြင်မှာ ဆုံဖို့မပြောနဲ့ အွန်လိုင်းမှာတောင် စကားသိပ်မပြောဖြစ်ကြဘူး...။ သူလဲ အလုပ်ရှုပ် ကိုယ်လဲ အလုပ်များနေတာနဲ့လေ...။ ဒီလိုနဲ့ တစ်လလောက်နေတော့မှ သူ့ဆီကမက်ဆေ့ ရောက်လာတယ်...။

"မိုခါးရေ.... ကျွန်တော် ခင်ဗျားပေးတဲ့ စာအုပ်ဖတ်ပြီးသွားပြီ... အဲစာအုပ်ထဲက "အပြာရောင်တောင်တန်းထဲမှာ မိုခါးကော်ဖီအကြောင်းပါတယ်...ဟုတ်တယ် ခင်ဗျားမျက်ဝန်းအညိုရောင်ရင့်ရင့်တွေက မိုခါးကော်ဖီနဲ့တူတာ... ကျွန်တော်ကတော့ ဝတ္ထုထဲကလို မပြောတတ်ဘူး ခင်ဗျားကို ကျွန်တော် မိုခါးလို့ခေါ်တာ ဒီစာအုပ်ကိုဖတ်ပြီးမှ ပိုအဓိပ္ပါယ်ရှိသွားတယ်... ကျန်းမာရေး ဂရုစိုက် အလုပ်ချည်းပဲ ဖိလုပ်မနေနဲ့ဦး ဒါပဲ ကျွန်တော်အလုပ်ဆက်လုပ်လိုက်ဦးမယ်...."

သူ့မက်ဆေ့ကို စာမပြန်တော့ဘဲ " Cool..." ဆိုတဲ့ စာတန်းရုပ်လေးနဲ့ " Good Night cutie" ဆိုတာကိုပါ ပို့လိုက်တယ်...။

ကိုယ်တို့နှစ်ယောက်ကြားမှာ တွယ်တာမှု လွင့်လွင့်လေး ရှိနေပြီလား...။ ကိုယ်အမှန်တိုင်းဝန်ခံရရင် တစ်နေ့တစ်နေ့ မအားတဲ့ကြားက သူ့ Active မီးလေးစိမ်းလာမလားလို့ ဖုန်းထဲသွားချောင်းကြည့်ရတာအမော...။ သူရော ကိုယ့်လိုပဲ လာချောင်းတတ်လား...။ တခါတလေ ညသန်းခေါင် တရေးနိုးလို့ဖြစ်ဖ​ြစ် ဖုန်းဖွင့်ကြည့်တဲ့အခါ  Active 23 mins ago လို့ သူ့နာမည်လေးနားမှာ ပေါ်နေတာတွေ့ရင် ကိုယ်တို့ လွဲပြန်ပြီပဲပေါ့....။ တခါတလေလဲ Active မီးစိမ်းနေရဲ့သားနဲ့ မနှုတ်ဆက်ကြဘဲ တစ်ယောက်ကိုတစ်ယောက် ဘယ်သူအရင်စနှုတ်ဆက်မလဲဆိုပြီး ဒီတိုင်းစောင့်ကြည့်နေကြတဲ့အချိန်တွေလဲ ရှိလေရဲ့....။

သိပ်မကြာတဲ့ နောက်ရက်တစ်ခုမှာ သူ့ဆီက မက်ဆေ့ထပ်ရောက်လာတယ်...။

"ကျွန်တော် ခင်ဗျားနဲ့ VC ပြောချင်တယ် မတွေ့တာကြာပြီ မိုခါး ဝက်ပုတ်လေးဖြစ်နေပြီလား... အစားတွေစားပြီး..."

သူနဲနဲအားလို့ထင်ပါရဲ့ ကိုယ်နဲ့ VC ခေါ်မယ်ဆိုလို့ စကားပြောဖြစ်ကြတယ်...။

"ဟင်...မိုခါး မျက်နှာနဲနဲချောင်နေတယ် နေမကောင်းဘူးလား..."

"လည်ချောင်းနာချင်နေလို့ အပြင်သွားပြီး အပူရှက်သွားတာနေမှာ..."

"ဟုတ်လို့လား အပူကိုတော့ရှက်တာမဟုတ်လောက်ဘူး ကျွန်တော်နဲ့  VC ခေါ်လို့ ရှက်တာနေမယ်..."

"ဟာ... အကောင်းပြောနေတာကို"

" ဆေးသောက်ထားလား ဆားရည်နွေးနွေးနဲ့ Gargle လုပ်လေ..."

"လုပ်ထားတယ်... ဆေးလဲသောက်တယ် သက်သာသွားမှာပါ..."

" ဂရုစိုက် မိုခါးရေ.... ခင်ဗျားနေမကောင်းရင် ကျွန်တော် စကားပြောဖော်မရှိဘဲနေမယ်..."

"မပြောနဲ့ပေါ့ မရှိရင် ခါတိုင်းလဲ လာပြောတာကျနေတာပဲ..."

" အော် ... တော်တော်ကြာကြာ ဘာမက်ဆေ့မှ ရောက်မလာတာ ခင်ဗျား ကျွန်တော့်ကို စိတ်ကောက်နေတာလား.."

"ဘာဆိုင်လို့လဲ..." 

"မသိဘူးလေ... ကျွန်တော် အလုပ်ရှုပ်နေလို့ပါ ဒါကြောင့် ဒီဖက်မလှည့်အားသေးတာ..."

" သိတယ် ကုလသမ္မဂ အတွင်းရေးမှူးဆိုတော့..."

" မိုခါး စိတ်ကောက်တာ သေချာသွားပြီ..."

" မကောက်ပါဘူး ဆိုနေ... ကိုယ်နဲ့မင်းနဲ့ ဘာမို့လို့ စိတ်ကောက်ရမှာလဲ..."

" မကောက်ဘူးဆိုလဲ ပြီးတာပဲ ကျွန်တော်က စိတ်ကောက်တဲ့သူကို မချော့တတ်ဘူး ဘာဖြစ်လဲ ကျွန်တော့်ကို ခင်ဗျားပြောချင်တာရှိရင် မက်ဆေ့ပို့ထားပေါ့ ခုတော့ ငြိမ်နေတယ် တစ်ယောက်ထဲ..."

" မင်းရော ကိုယ့်ဆီ မက်ဆေ့ချန်ထားလို့လား..."

"ဟောတွေ့လား မကောက်ဘူးဆိုပြီး....နောက်ဆို ကျွန်တော်ညဖက်မအိပ်ဘဲ ကွန်ပြူတာသုံးတာလျှော့မှဖြစ်မယ် ခင်ဗျားနဲ့စကားပြောဖို့အချိန်ပိုရအောင်လို့ ကဲပါ ကျွန်တော် ခင်ဗျားကို ကော်ဖီလာတိုက်ပါ့မယ် အခုတော့မဟုတ်ဘူး.."

"သိပါတယ် Some day ပေါ့ ဘယ်တော့မှန်းမသိတဲ့ တစ်ရက်ရက်ပေါ့.."

"ha ha ...ha မိုခါးစွာရင် နှုတ်ခမ်းတွေပါထော်ပြီး ကော့လန်နေတာပဲ ကလေးလေးကျနေတာပဲ ရေတစ်ခွက်သောက်လိုက်ဦး... ပြီးရင် ခင်ဗျားအခန်းမီးကို ပိတ်ပြီး စာကြည့်မီးလေးတစ်ခုပဲဖွင့်ထားပါလား.."

"ဘာဖြစ်လို့လဲ ဘာထွင်ပြန်ပြီလဲ... "

" ခင်ဗျားစကားသိပ်များတယ် ကျွန်တော်ပြောတဲ့အတိုင်းလုပ်ပါ..."

"ပြီးရော ပြီးရော..."

သူပြောတဲ့အတိုင်း အခန်းမီးပိတ်ပြီး ခေါင်းရင်းက စာကြည့်မီးအဝါရောင်တွေကိုပဲထွန်းလိုက်တယ်...။

"ရပြီလား..."

"အင်းရပြီ... wow!!!!  မိုခါးက နေမကောင်းတာတောင်မှ မျက်လုံးတွေက အရောင်တောက်ဖြာနေတာပဲ..."

သူအဲလိုပြောလိုက်တော့ ကိုယ်ဘာပြန်ပြောရမှန်းမသိဘဲ ကိုယ့်ကိုယ်ကို ကင်မရာမှာ ကပ်ကြည့်လိုက်တယ်....။

"အဲလောက်လဲမဟုတ်ပါဘူး မင်းကအပိုတွေပြောပြီ..."

"ခုန ခင်ဗျား ကင်မရာနားကပ်ကြည့်တော့ အနီးကပ်ပိုတောင်လှသေးတယ်..."

"လာမြှောက်မနေနဲ့ မင်းကို ကော်ဖီလဲမတိုက်ဘူး..."

"မမြှောက်ပါဘူး မိုခါးကို စကားသန်းနေတာ..."

"ဘာအတွက်လဲ ဘာပြောချင်လို့လဲ..."

"ရည်းစားစကားပြောမလို့လေ..."

"ဟာ......"  သူအဲလိုပြောတော့ ကိုယ်ချက်ချင်း ကင်မရာနောက်ကွယ် သူမမြင်တဲ့နေရာ ပုန်းနေလိုက်တယ်...။ လူကဘယ်လိုဖြစ်မှန်းမသိ ချွေးတွေလဲပျံလာတယ်...။

"ဟိတ်...ဘာလို့ ပုန်းတာလဲ ထွက်ခဲ့ ခင်ဗျားကို ဒီည ကျွန်တော်သေချာပြောမှရမယ်..."

"တော်ပြီ မပြောချင်တော့ဘူး ဖုန်းချလိုက်တော့မယ်.."  ကိုယ်အကွယ်ကနေပြီး လှမ်းပြောတော့...

"မရဘူးဗျ.... ခင်ဗျားကျွန်တော်ကို ကိုယ်ထင်မပြမချင်း ဖုန်းမချဘူး..."

" ဒုက္ခပဲ ဇွတ်ပဲ မင်းကတော့.."

" ကဲပါ ထွက်လာပါတော့ ရှက်မနေနဲ့တော့ ထွက်ခဲ့ ထွက်ခဲ့ မိုခါးရှက်တဲ့ မျက်နှာလေး ကျွန်တော်ကြည့်ချင်တယ်..."

ကိုယ်လက်ဝါးနှစ်ဖက်နဲ့ မျက်နှာအုပ်ပြီး ကင်မရာရှေ့ပြန်ထွက်ခဲ့တယ်...။

"ha ha.... အဲဒါက ဘယ်လိုဖြစ်နေတာလဲ လက်ဖယ်လိုက်တော့လေ ကျွန်တော် ခင်ဗျားမျက်နှာကြည့်ချင်လို့"

ကိုယ်လက်ဝါးနှစ်ဖက်ကို ဖြေးဖြေးချင်းအောက်ချလိုက်ပြီး သူ့ကိုလှမ်းကြည့်တော့ သူက ကိုယ့်ကို ပြုံးပြုံးကြီးကြည့်နေတယ်...။ 

"မိုခါး ပါးပြင်တွေ ပန်းရောင်ဖြစ်နေတယ်.... နဖူးမှာလဲချွေးတွေစို့လို့  မိုခါး တော်တော်စိတ်လှုပ်ရှားသွားတာပဲ "

"ဟုတ်လို့လား မဟုတ်ပါဘူး မဖြစ်ပါဘူး မင်းကလဲ ဒီမှာကြည့်..." ဆိုပြီး ကိုယ်က ကင်မရာနားကပ်ပြတော့ သူက ရွှတ်ခနဲ ကိုယ့်ပါးကို လှမ်းနမ်းလိုက်တယ် ကင်မရာကနေ....။

"မင်းဘာလုပ်တာလဲ..."

" နမ်းလိုက်တာလေ ခင်ဗျားရဲ့ ပန်းရောင်ပါးပြင်ကို.."

"မင်း အဲလိုထပ်လုပ်ရင် ကိုယ်အပြင်မှာလာတွေ့မှာမဟုတ်ဘူးနော်..."

"အိုကေ အိုကေ..မလုပ်တော့ပါဘူး ဟုတ်ပြီလား အပြင်မှာတော့ တွေ့ခွင့်ပြုပါ.."

"ပြီးရော ဒါပဲ အိပ်တော့မယ် ဂွတ်နိုက်.."

"ဟာ နေဦးလေ စကားပြောဦးမယ်လေ..."

"မပြောချင်တော့ဘူး ကိုယ်ရှက်နေသေးတယ် မင်းမသိဘူးလား.."

"အော် အဲလိုလား ဒါဆို ကျွန်တော် မက်ဆေ့ချန်ထားခဲ့မယ် ပြောချင်တာတွေကို good night Mocha..."

ကိုယ်တို့စကားပြောတဲ့ တလျှောက်မှာ  ဒီတစ်ခါပဲ အကြာဆုံး  VC  နဲ့ပြောဖူးတာ ခါတိုင်းက စာပဲရိုက်ကြတယ်...။ ဒီနေ့ သူရဲ့Surprise  ကြီးကတော့ လူကိုထူပူသွားစေတာပဲ...။






မိုခါး....

ကျွန်တော် ခင်ဗျားကို မြင်မြင်ချင်းချစ်ခဲ့တာလို့ပြောရင် ခင်ဗျားယုံမှာလား......
Love at first sight ဆိုတာ အရင်က စာအုပ်ထဲမှာပဲဖတ်ဖူးခဲ့တာ... တကယ်အပြင်မှာလက်တွေ့ကိုတော့ ခင်ဗျားနဲ့ဆုံတော့မှ သေချာသိသွားတာ... ဒါကြောင့် လေယာဉ်ပေါ်မှာ ခင်ဗျားနဲ့စတွေ့တော့ ခင်ဗျားကို တမင်သက်သက် စနောက်ခဲ့တာ ဒီလိုမှ ခင်ဗျားကို ကျွန်တော်အရောဝင်လို့ရမှာလေ... ခင်ဗျားက ကျွန်တော့်ဘေးမှာ တည်တည်ကြီးနေနေတာဆိုတော့ ဘယ်လိုစကားစရမလဲမှမသိတာ....

ခင်ဗျားကို ကျွန်တော်ချစ်တယ် မိုခါး........
ကျွန်တော် ဘယ်သူ့ကိုမှ ရည်းစားစာမရေးဖူးတော့ ဒီစာအဆင်မပြေတာရှိရင် ခွင့်လွတ်ပါ.. ။ အရင်ကတော့ ကောင်မလေးတွေ တစ်ယောက်နှစ်ယောက်လိုက်ဖူးပါတယ်...။ ကျွန်တော့လို ရုပ်ဆိုးကို ဘယ်ကောင်မလေးက ပြန်ကြိုက်ပါ့မလဲ...။ အဲ ဒါပေမယ့် ခင်ဗျားတော့ ကျွန်တော့်ကို ပြန်ချစ်ရမယ်နော်...။ မဟုတ်ရင် ကျွန်တော် တစ်နေ့တစ်နေ့ အလုပ်လုပ်ရတာဖြောင့်မှာမဟုတ်ဘူး ခင်ဗျားဆီကိုပဲ စိတ်ရောက်ရောက်နေတာနဲ့...။

ခင်ဗျား ကျွန်တော့်ကို အဖြေပေးဖို့ စဉ်းစားထားပါ...ကျွန်တော်တို့ တစ်ရက် ကော်ဖီသောက်တဲ့အခါ ခင်ဗျားဆီက ချစ်တယ်ဆိုတဲ့စကားကြားချင်တယ်... ဆောရီးဗျာ ကျွန်တော့်ရည်းစားစာက အမိန့်ဆန်သွားသလား...။ ဘယ်လိုပဲဖြစ်ဖြစ် ကျွန်တော့် ဝသီအတိုင်း ကျွန်တော်ရေးတတ်သလို ရေးလိုက်ပါတယ်...။ ခင်ဗျား ကျွန်တော့်အချစ်ကို လက်ခံမယ်လို့ မျှော်လင့်ပါတယ်....။

မိုခါးကို ကျွန်တော် ချစ်တယ်...
ကျွန်တော့်ကိုလည်း ပြန်ချစ်ပါ မိုခါး.....

ခင်ဗျားရဲ့
ဝိုင်


@@@@@@@@


မိုးငွေ့

Friday, 15 May 2020

သူတို့ရဲ့အမှတ်တရတွေ.....




တကယ်တမ်း ဒီစာအုပ်က ဆရာမင်းလူကွယ်လွန်ပြီး ဆရာ့အတွက် စာပေလောကက မိတ်ဆွေသူငယ်ချင်းများနဲ့ ဆွေမျိုးသားချင်း တူ တူမများက အမှတ်တရတွေရေးထားတဲ့ စာစုပဲဖြစ်ပါတယ်....။ ဆရာမင်းလူအရှေ့ပိုင်းမှာထွက်ထားတဲ့ ဒေဝတာမြို့တော်ဆိုတာ တစ်အုပ်ရှိတယ်...။ ကွယ်လွန်အနိစ္စရောက်သွားကြပြီဖြစ်တဲ့ ဆရာလေးစားအားကျရတဲ့ စာရေးဆရာကြီးတွေ ကဗျာဆရာကြီးတွေ ရုပ်ရှင်သမားတွေအကြောင်းကို ဆရာ့ရဲ့ ရေးနေကျ ဇဝနဉာဏ်လေးကွန့်ပြီး ဒေဝတာမြို့တော်မှာ ဘယ်လိုဘယ်ပုံတွေနေထိုင်ကြတဲ့အကြောင်းအလည်ရောက်သွားတဲ့သူတစ်ယောက်အနေနဲ့ရေးထားခဲ့တာပါ....။ ခုတော့လည်း ဆရာကိုယ်တိုင် သူဖန်တီးထားတဲ့ ဒေဝတာမြို့တော်မှာ ပျော်ရွှင်အေးချမ်းနေရောပေါ့...။



ဒီစာအုပ်ကို အစ်မချစ် ပြန်လာလည်လို့ Feel စားသောက်ဆိုင်မှာ ဘလော့ဂါတွေဆုံကြတုန်းက 
အမှတ်တရလက်မှတ်ထိုးပေးခဲ့တာ....  နှင်းနဲ့မာယာလက်မှတ်ပါပါတယ်... 
တကယ်အမှတ်တရဖြစ်ပါတယ် ခုတော့ မဆုံဖြစ်တာကြာလှပေါ့ ဘလော့ဂါတွေနဲ့




မိုင်တိုင်နှစ်ဆယ်ဆိုတာလဲ ဘလော့ဂါတွေစုရေးထားတဲ့ စာအုပ်တစ်အုပ်ပဲ 
အဲတုန်းက ကိုယ့်ကိုယ်ဝယ်ထားတာ မနေ့တုန်းကပဲ  မသက်ဝေရဲ့ ထာဝစဉ်ကို ပြန်ဖတ်ဖြစ်နေသေး ဘယ်ခါဖတ်ဖတ် ခံစားမှုပေးစွမ်းနိုင်တဲ့ လွမ်းဖောဖွယ် စာလေးတစ်ပုဒ်







ကိုဏီနဲ့က ခင်တော့ စာအုပ်ထွက်တာနဲ့ သူ့ပူဆာထားတာ လက်မှတ်ထိုးပေးရမယ်ဆိုပြီး





ဒီစာအုပ်က နှစ်တိုင်းပြန်ပြန်ဖတ်တဲ့ထဲကပါတယ်....ကျွန်မသိပ်ကြိုက်တဲ့ အပြာရောင်တောင်တန်းများသို့လွမ်းချင်းကိုပဲ ရွေးပြီး ပြန်ဖတ်ဖြစ်တာများတယ်...ခုမှသတိထားမိတယ် သူငယ်ချင်းအရင်းခေါက်ခေါက် မမဝသုန်(ပျိုးယုဝသုန်)လက်မှတ် ဘာကြောင့်ဒီစာအုပ်မှာမပါသလဲလို့




တီတင့်အိမ်ထိသွားယူခဲ့တဲ့ စာအုပ်လေး တီတင့် ဖြတ်သန်းခဲ့ရတဲ့ မိသားစု မောင်နှမအကြောင်းကို 
စုံစုံလင်လင်လေးရေးထားတဲ့ စိတ်ဝင်စားစရာ ချစ်စရာကောင်းတဲ့ Family Saga အမျိုးအစားလို့သတ်မှတ်လို့ရတဲ့စာအုပ်လေးတစ်အုပ်ပါပဲ



အဲတုန်းက FMI မှာ မုန့်သွားစားရင်း တီတင့်ကိုမုန့်ခေါ်ကျွေးရင်းနဲ့ 
တီတီက အိမ်ခဏခေါ်ပြီး ဒီစာအုပ်လေး လက်မှတ်ထိုးပေးခဲ့တာ


နောက်ဆုံး ဘလော့ဂါတွေ ၉၉ယောက်ပါတဲ့ Feeling 99 လား အဲဒါထွက်တော့ ကျွန်မကို စာအုပ်မိတ်ဆက်ပွဲဖိတ်သေးတယ် မသွားဖြစ်တာ...။ တီတင့်ကိုယ်တိုင်စီစဉ်လို့ ဒီစာအုပ်ထဲ မိုးငွေ့ပါ စာမူပေးရမယ်လို့တောင်းထားပေမယ့် မပေးဖြစ်ခဲ့လိုက်ဘူး....။ စာမူအသစ်ရေးပေးရမယ်ဆိုတော့ လွန်ခဲ့တဲ့ တစ်နှစ်ခွဲလောက်ကထင်တယ် အဲတုန်းကိုယ်တိုင်က စာရေးကျဲပြီး အဆက်ပျက်နေတဲ့ချိန်မို့ ဘာမှရေးမထွက်နိုင်ခဲ့...ဒီလိုနဲ့ အဲစာအုပ်မှာပါဝင်ခွင့်မရခဲ့ဘူးဆိုပါတော့...။ 


မိုးငွေ့